ponomar-pwa/static/data/shared/menaion-daily/06-23/1.json

[
 {
  "type": "HEADER",
  "value": "І҆ꙋ́нїа к҃г"
 },
 {
  "type": "HEADER",
  "value": "Ст҃ы́ѧ мꙋ́ченицы а҆грѷпі́ны."
 },
 {
  "type": "HEADER",
  "value": "Стїхи̑ры мꙋ́ченицы, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Ри́мъ тѧ̀ предлага́етъ, ꙗ҆́коже цвѣтоно́сный ши́покъ бл҃гово́ненъ, а҆грѷпі́но многострада́льнаѧ, вѣ́рныхъ мы́сль бл҃гоꙋха́ѧ вонѧ́ми добродѣ́тельными, и҆ ѕлосмра́дїе страсте́й ѿгонѧ́ѧ бл҃года́тїю всегда̀, мꙋ́ченикѡвъ ᲂу҆добре́нїе, цр҃кве ᲂу҆твержде́нїе, дѣ́въ похвала̀, и҆ чꙋде́съ пꙋчи́на."
 },
 {
  "type": "TEXT",
  "value": "Бога́тство ꙗ҆́кѡ многоцѣ́нно, сїкелі́и тѧ̀ дае́тъ, въ ри́мѣ пострада́вшꙋю, хрⷭ҇то́съ бг҃ъ на́шъ: и҆дѣ́же прише́дши, сла́внаѧ мꙋ́ченице, де́мѡнѡвъ лꙋка́вое мно́жество ѿго́ниши предста́тельствомъ твои́мъ. Тѣ́мже тѧ̀ ᲂу҆блажа́емъ, и҆ свѧто́е твоѐ дне́сь пра́зднꙋемъ страда́нїе, а҆грѷпі́но многострада́льнаѧ."
 },
 {
  "type": "TEXT",
  "value": "Ноша́хꙋ на ра́менахъ тѧ̀ ва́сса и҆ па́ѵла, повелѣ́нїемъ всѧ́чєскаѧ носѧ́щагѡ, мѣста̀ премѣнѧ́юще, и҆ долготꙋ̀ пꙋчи́ны, мꙋ́ченице а҆грѷпі́но, чꙋдодѣ̑йствїѧ стра̑шнаѧ соверша́ющи бж҃е́ственною бл҃года́тїю, почи́ла є҆сѝ на мѣ́стѣ, и҆дѣ́же бг҃ъ ᲂу҆чинѝ, ᲂу҆трꙋждє́ннымъ поко́й бы́вши, всехва́льнаѧ."
 },
 {
  "type": "HEADER",
  "value": "И҆́ны стїхи̑ры бцⷣы, гла́съ и҆ подо́бенъ то́йже."
 },
 {
  "type": "TEXT",
  "value": "//Є҆гда̀ пое́ши а҆ллилꙋ́їа, сі́и стїхи̑ры глаго́ли пре́жде:"
 },
 {
  "type": "TEXT",
  "value": "Ра́дꙋйсѧ, солнцезра́чнаѧ лꙋчѐ, сл҃нца незаходи́магѡ престо́ле, ꙗ҆́же сл҃нце возсїѧ́вши недоꙋмѣ́нное: ра́дꙋйсѧ, ᲂу҆́ме, ѡ҆блиста́ѧй бж҃е́ственными сїѧ́ньми, зарѐ мо́лнїйнаѧ, ѡ҆свѣти́вшаѧ землѝ концы̀, и҆́стинное зла́та блиста́нїе, вседо́браѧ и҆ пренепоро́чнаѧ, свѣ́тъ невече́рнїй вѣ̑рнымъ ѡ҆блиста́вши."
 },
 {
  "type": "TEXT",
  "value": "Скве́рнꙋ ѿмы́й стра́стнагѡ се́рдца моегѡ̀, бцⷣе всепѣ́таѧ, и҆ всѧ̑ ꙗ҆́звы и҆ гноє́нїѧ сегѡ̀, ꙗ҆̀же ѿ грѣха̀, ѡ҆чи́сти, чⷭ҇таѧ, и҆ ᲂу҆ма̀ моегѡ̀ ᲂу҆ста́ви непостоѧ́нїе: ꙗ҆́кѡ да си́лꙋ твою̀, и҆ вели́кое застꙋпле́нїе, велича́ю ѻ҆каѧ́нный и҆ непотре́бный ра́бъ тво́й."
 },
 {
  "type": "TEXT",
  "value": "Не́мощь и҆ разслабле́нїе, дв҃о мт҃и всенепоро́чнаѧ, дꙋшѝ моеѧ̀ преложѝ въ крѣ́пость и҆ си́лꙋ, стра́хомъ и҆ любо́вїю твори́ти же и҆ дѣ́ѧти ѡ҆правда̑нїѧ хрⷭ҇тѡ́ва: ꙗ҆́кѡ да и҆збѣ́гнꙋ ѻ҆гнѧ̀ нестерпи́магѡ, и҆ наслѣ́дїе нбⷭ҇ное, и҆ жи́знь непроходи́мꙋю тобо́ю воспрїимꙋ̀, веселѧ́сѧ всегда̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ и҆ подо́бенъ то́йже:"
 },
 {
  "type": "TEXT",
  "value": "Бѣсо́вскими приклоне́на прило́гми, и҆ въ ро́въ поги́бели вве́ржена, ᲂу҆ще́дри, влⷣчце, и҆ ᲂу҆тверди́ мѧ на ка́мени добродѣ́телей, и҆ навѣ́ты вра̑жїѧ разо́рши, сподо́би мѧ̀ твори́ти повелѣ̑нїѧ твоегѡ̀ сн҃а и҆ бг҃а на́шегѡ: ꙗ҆́кѡ да ᲂу҆лꙋчꙋ̀ ѡ҆ставле́нїе въ де́нь сꙋда̀."
 },
 {
  "type": "HEADER",
  "value": "Крⷭ҇тобг҃оро́диченъ. Подо́бенъ то́йже:"
 },
 {
  "type": "TEXT",
  "value": "Распина́ема хрⷭ҇та̀ чл҃вѣколю́бца ви́дѧщи пречⷭ҇таѧ, и҆ ре́бра и҆скопава́єма копїе́мъ, пла́чꙋщи вопїѧ́ше: что̀ сїѐ, сн҃е мо́й; что́ ти безблагода́тнїи лю́дїе возда́ша, за ꙗ҆̀же сотвори́лъ є҆сѝ дѡ́браѧ и҆̀мъ, и҆ тщи́шисѧ безча́дствовати мѧ̀, вселюбе́знѣйшїй; ᲂу҆дивлѧ́юсѧ, благоꙋтро́бне, твоемꙋ̀ во́льномꙋ распѧ́тїю."
 },
 {
  "type": "HEADER",
  "value": "Тропа́рь, гла́съ д҃."
 },
 {
  "type": "TEXT",
  "value": "А҆́гница твоѧ̀, і҆и҃се, а҆грѷпі́на, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да ца́рствꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. Тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "HEADER",
  "value": "Канѡ́нъ, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Хрⷭ҇то́вꙋ невѣ́стꙋ а҆грѷпі́нꙋ хвалю̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀."
 },
 {
  "type": "TEXT",
  "value": "Сїѧ́нїемъ бл҃года́ти, ѡ҆блиста́вшимъ тебѐ свы́ше, мра́къ ѿженѝ невѣ́дѣнїѧ моегѡ̀, и҆ пода́ждь мѝ моли́твами твои́ми, а҆грѷпі́но, бл҃года́ть, воспѣ́ти твоѧ̑, мч҃нице, чꙋдеса̀."
 },
 {
  "type": "TEXT",
  "value": "Со́лнца свѣтлѣ́йши ꙗ҆́кѡ и҆́стиннѡ возсїѧ́ла є҆сѝ на тве́рди цр҃кви хрⷭ҇то́вы: и҆ просвѣти́ла є҆сѝ зарѧ́ми пѡ́двигъ, мꙋ́ченице, и҆ чꙋде́съ твои́хъ мі́ра концы̀."
 },
 {
  "type": "TEXT",
  "value": "Жениха̀ безсме́ртнагѡ, жизнода́вца жела́ющи, ꙗ҆́кѡ да́ръ страда́нїе семꙋ̀ принесла̀ є҆сѝ: и҆ воспрїѧ́ла є҆сѝ нбⷭ҇ное ца́рство, и҆ вѣне́цъ нетлѣ́ненъ, мꙋ́ченице сла́внаѧ."
 },
 {
  "type": "TEXT",
  "value": "Рꙋко́ю влⷣки твоегѡ̀ ѡ҆кормлѧ́ема, преплыла̀ є҆сѝ непостоѧ́нное мо́ре нече́стїѧ, честна́ѧ: и҆ ᲂу҆стреми́ласѧ є҆сѝ ко приста́нищꙋ, а҆грѷпі́но, вы́шнїѧ свѣ́тлости, бг҃облаже́ннаѧ."
 },
 {
  "type": "TEXT",
  "value": "Бг҃оро́диченъ: Денни́ца возсїѧ̀ въ сердца́хъ, пренепоро́чнаѧ, вѣ́рою чтꙋ́щихъ тѧ̀ бж҃їю мт҃рь, и҆ ѡ҆зарѝ де́нь свѣтоно́сный, хрⷭ҇то́съ, и҆́же и҆зъ ложе́снъ твои́хъ возсїѧ̀, препѣ́таѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ."
 },
 {
  "type": "TEXT",
  "value": "Же́злїемъ бїе́ма ра́довашесѧ, си́ми кѡ́сти нече́стїѧ сокрꙋша́ющи и҆ вопїю́щи, твоеѧ̀ любвѐ ничто́же мѧ̀ разлꙋчи́тъ, хрⷭ҇тѐ."
 },
 {
  "type": "TEXT",
  "value": "Да врагѡ́въ наготꙋ̀ ѡ҆бличи́ши, мч҃нице, ри́зъ совлекла́сѧ є҆сѝ: сегѡ̀ ра́ди нетлѣ́нїѧ ѻ҆де́ждꙋ тебѣ̀ хрⷭ҇то́съ дадѐ."
 },
 {
  "type": "TEXT",
  "value": "Оу҆ста̀ глагѡ́лющаѧ беззако́ннѡ на тѧ̀, зако́ннѡ, хрⷭ҇то́ва мꙋ́ченице, загради́шасѧ, вели̑чїѧ сп҃са проповѣ́дающей тѝ."
 },
 {
  "type": "TEXT",
  "value": "Протѧ́гъ на землѝ тѣ́ло твоѐ, нече́стїѧ слꙋжи́тель ѡ҆сꙋ́етисѧ, просте́ртъ ко влⷣцѣ ᲂу҆́мъ тво́й и҆мꙋ́щи."
 },
 {
  "type": "TEXT",
  "value": "Бг҃оро́диченъ: Глаго́лъ благоче́стнѡ и҆спо́лнисѧ и҆са́їинъ, дв҃а бо родѝ воплоще́нна жизнода́вца и҆ сп҃са дꙋ́шъ на́шихъ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "И҆̀же ка́менїю слꙋжа́щїи пре́лестїю мно́гою, ѡ҆тѧгчава́ютъ ка́менїемъ тѧ̀, и҆сповѣ́дꙋющꙋю хрⷭ҇та̀, ка́менѧ неѡбори́маго. Тѣ́мже сконча́вшисѧ, пресла́вныхъ чꙋде́съ, сла́внаѧ а҆грѷпі́но, ѡ҆блиста́ла є҆сѝ зарю̀, просвѣща́ющꙋю дꙋ́шы на́съ восхвалѧ́ющихъ тѧ̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Є҆ди́на ро́ждшаѧ творца̀ всѣ́хъ, є҆ди́на ᲂу҆краси́вшаѧ человѣ́чество рождество́мъ твои́мъ, бг҃оневѣ́сто, и҆зба́ви мѧ̀ ѿ сѣ́ти льсти́вагѡ врага̀: поста́ви мѧ̀ на ка́мени хрⷭ҇то́выхъ хотѣ́нїй, тогѡ̀ молѧ́щи прилѣ́жнѡ, є҆го́же воплоти́ла є҆сѝ."
 },
 {
  "type": "TEXT",
  "value": "Крⷭ҇тобг҃оро́диченъ: На крⷭ҇тѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Во́лю тогѡ̀ боѧ́щихсѧ творѧ́й, а҆́гг҃ломъ, мꙋ́ченице, разрѣша́етъ тѧ̀ ᲂу҆́зъ, и҆ стѣсне́нїѧ, разори́вшꙋю всѧ́кое нече́стїе соꙋ́зомъ любвѐ хрⷭ҇та̀, жениха̀ твоегѡ̀."
 },
 {
  "type": "TEXT",
  "value": "Оу҆мертви́вшисѧ любвѐ ра́ди, ᲂу҆мертви́вшагѡ всю̀ крѣ́пость сме́ртнꙋю, бл҃года́ть и҆сточа́еши присноживо́тнꙋю, страстьмѝ ᲂу҆мерщвлє́нныѧ и҆сцѣлѧ́еши, а҆грѷпі́но, мꙋ́ченикѡвъ хрⷭ҇то́выхъ ᲂу҆добре́нїе."
 },
 {
  "type": "TEXT",
  "value": "Превозше́дши любо́вїю жениха̀ твоегѡ̀ всѧ́кꙋ плотскꙋ́ю любо́вь, терпѣ́ла є҆сѝ тве́рдѡ, внегда̀ бїе́мѣ бы́ти болѣ́зненнѣ, вопїю́щи: не разлꙋчи́тъ мѧ̀ любвѐ твоеѧ̀, хрⷭ҇тѐ, мꙋ́къ преще́нїе."
 },
 {
  "type": "TEXT",
  "value": "Бл҃же́ннагѡ совокꙋпле́нїѧ тро́ичнымъ жела́нїемъ пострада́вшихъ, ва́ссы и҆ а҆грѷпі́ны цѣломꙋ́дрыѧ кто̀ мꙋ́жество и҆зрече́тъ; и҆́мже показа́ша не́мощнꙋ і҆́дѡльскꙋю крѣ́пость, держа́внѡ."
 },
 {
  "type": "TEXT",
  "value": "Бг҃оро́диченъ: Цари́ца дв҃а, злато́ю ѻ҆де́ждою ᲂу҆кра́шена, сн҃ꙋ царю̀ ны́нѣ предстои́тъ, ꙗ҆́же безъ разсꙋжде́нїѧ а҆́гг҃лы превосходѧ́щи, зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Свѣ́тъ незаходи́мый все́льшїйсѧ въ твоѐ тѣ́ло, ꙗ҆влѧ́ше тѧ̀ зрѧ́щымъ, въ нощѝ ꙗ҆́кѡ во днѝ, зарю̀ чꙋде́съ и҆спꙋща́ющꙋю."
 },
 {
  "type": "TEXT",
  "value": "Нескве́рнаѧ а҆́гница па́стырѧ стопа́мъ послѣ́дꙋющи, ꙗ҆́коже же́ртва непоро́чна, семꙋ̀ принесе́сѧ бжⷭ҇твеннѡ."
 },
 {
  "type": "TEXT",
  "value": "Оу҆́мъ и҆мꙋ́щи свѣ́телъ, прⷪ҇ро́чествїѧ и҆спо́лненъ, бꙋ̑дꙋщаѧ ꙗ҆́кѡ сꙋ̑щаѧ, сла́внаѧ ва́ссо, предглаго́лати сподо́биласѧ є҆сѝ."
 },
 {
  "type": "TEXT",
  "value": "Бг҃оро́диченъ: Ѽ мт҃и бж҃їѧ, дꙋшѝ моеѧ̀ ѡ҆ѕлобле́нїе и҆сцѣлѝ, ро́ждшаѧ преблага́го сло́ва, всѣ́хъ ᲂу҆блажа́юща."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Ѡ҆блиста́вшее ѿ ри́ма, ꙗ҆́кѡ незаходи́мое сл҃нце, сїкелі́а тѣ́ло ст҃ы́ѧ мꙋ́ченицы прїе́мши, мра́ка де́мѡнскагѡ и҆збавлѧ́етсѧ лю́тости."
 },
 {
  "type": "TEXT",
  "value": "До́блественнѡ требога̑тыѧ ст҃ы̑ѧ мч҃ницы, ꙗ҆̀же пре́жде сме́рти ᲂу҆ме́ршыѧ, въ ча́ѧнїи мꙋче́нїѧ, ᲂу҆ме́ршее твоѐ живоно́сное тѣ́ло принесо́ша."
 },
 {
  "type": "TEXT",
  "value": "Ѻ҆рꙋ́жїе врага̀ на тебѣ̀ и҆знемо́же: и҆́бо ꙗ҆́кѡ гра́дъ низложи́ла є҆сѝ неимꙋ́щъ ѡ҆снова́нїѧ, сегѡ̀ горды́ню, а҆грѷпі́но, трꙋдо́мъ сла́вныхъ по́двигѡвъ твои́хъ."
 },
 {
  "type": "TEXT",
  "value": "И҆сцѣлѧ́етсѧ прикоснове́нїемъ тѣ́ла твоегѡ̀ кровоточи́ваѧ, прокаже́ннїи ѡ҆чища́ютсѧ вѣ́рою притека́юще: ѿбѣга́етъ же и҆ и҆́нъ всѧ́къ недꙋ́гъ, призыва́нїемъ ст҃а́гѡ твоегѡ̀, мꙋ́ченице, и҆́мене."
 },
 {
  "type": "TEXT",
  "value": "Бг҃оро́диченъ: Глаго́лы гаврїи́ла, дв҃о всенепоро́чнаѧ, ны́нѣ прїе́мше, вопїе́мъ: ра́дꙋйсѧ, мт҃и є҆ди́на благослове́ннаѧ: ра́дꙋйсѧ, две́ре, сл҃нце пра́вды и҆мꙋ́щи."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ:"
 },
 {
  "type": "TEXT",
  "value": "Свѣ́тлыхъ пѡ́двигъ твои́хъ свѣтоно́сный наста̀ де́нь, въ ѻ҆́ньже почита́ющи си́хъ бж҃е́ственнаѧ цр҃ковь, всѧ̑ созыва́етъ ве́селѡ вопи́ти тебѣ̀: ра́дꙋйсѧ, дв҃о и҆ мꙋ́ченице, а҆грѷпі́но всечестна́ѧ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Голꙋби́ца ꙗ҆́коже злата̀, ѻ҆рꙋ́жїемъ крⷭ҇та̀ ѡ҆гражда́ема, а҆га̑рѧны, и҆̀же въ нощѝ ко гра́дꙋ твоемꙋ̀ прибли́жившыѧсѧ, потреби́ла є҆сѝ, спа́сши вѣ̑рныѧ скверноꙋбі́йства си́хъ, мч҃нице."
 },
 {
  "type": "TEXT",
  "value": "Многови̑дныѧ хрⷭ҇та̀ ра́ди претерпѣ́вши болѣ̑зни, мꙋ́ченице, неболѣ́зненно ѡ҆брѣла̀ є҆сѝ въ то́мъ и҆ безсме́ртно наслажде́нїе, зовꙋ́щи: препѣ́тый гдⷭ҇и, бж҃е ѻ҆тє́цъ, благослове́нъ є҆сѝ."
 },
 {
  "type": "TEXT",
  "value": "Свѧще́нникъ чꙋ́дный, и҆ чꙋдодѣ́йствомъ сїѧ́ѧ, твоѧ̑ чꙋдеса̀ зрѧ̀, а҆грѷпі́но, бг҃а велича́ше, и҆ веселѧ́сѧ поѧ́ше: бж҃е ѻ҆тє́цъ на́шихъ, благослове́нъ є҆сѝ."
 },
 {
  "type": "TEXT",
  "value": "Тве́рдымъ по́мысломъ тве́рдое твоѐ къ страсте́мъ носѧ́щи тѣ́ло, же́нскꙋю ника́коже чꙋ́ла є҆сѝ не́мощь, зовꙋ́щи дѣ́ва влⷣцѣ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Ро́ждшаѧ бг҃а пребыва́еши по ржⷭ҇твѣ̀ дв҃ою, и҆ млеко́мъ пита́еши мт҃рски подо́бнѡ пита́телѧ мі́ра, пренепоро́чнаѧ, є҆мꙋ́же пою́ще зове́мъ: бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Но́щь ꙗ҆́кѡ де́нь зрѧ́шесѧ носѧ́щымъ, мꙋ́ченице, твоѧ̑ мо́щи. Мѣ́сто благоꙋха́шесѧ всѧ́ко тѧ̀ прїе́млющее. Де́мѡнское ѡ҆полче́нїе вельмѝ ѿгонѧ́шесѧ. И҆сцѣле́нїй и҆злива́ютсѧ ка̑пли, превозносѧ́щымъ хрⷭ҇та̀ во всѧ̑ вѣ́ки."
 },
 {
  "type": "TEXT",
  "value": "Жениха̀ безсме́ртнагѡ жела́ющи, въ слѣ́дъ бл҃гоꙋха́нїй сегѡ̀ текла̀ є҆сѝ, тогѡ̀ страсте́мъ и҆ сме́рти подо́бѧщисѧ, мꙋ́ченице сла́внаѧ, и҆ взыва́ющи: гдⷭ҇а по́йте, дѣла̀, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Несꙋмнѣ́ннꙋ и҆мꙋ́щи вѣ́рꙋ, є҆ле́емъ просвѣ́щши крове́й твои́хъ, мꙋ́ченице, свѣщꙋ̀ твою̀, внꙋ́трь вошла̀ є҆сѝ черто́га, пою́щи нбⷭ҇ныѧ ра́дѡсти: гдⷭ҇а по́йте, дѣла̀, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Ви́дѣти красотꙋ̀ гдⷭ҇ню, сегѡ́ же цр҃ковь посѣща́ти жела́ющи, ꙗ҆́кѡ на колесни́цѣ кро́ве своеѧ̀ взе́мшисѧ, пою́щи къ семꙋ̀ дости́гла є҆сѝ: гдⷭ҇а по́йте, дѣла̀, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Кꙋпина̀, ꙗ҆́же пре́жде проѡбразова́ше стра́нное ржⷭ҇тва̀ твоегѡ̀ та́инство, неѡпа́льна пребы́вши, пренепоро́чнаѧ: и҆́бо ѻ҆́гнь родила̀ є҆сѝ бжⷭ҇тва̀, и҆ неѡпа́льна пребыла̀ є҆сѝ, ѻ҆трокови́це. Тѣ́мже тѧ̀ пое́мъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Ма́нїемъ всѧ̑ творѧ́щагѡ, къ концꙋ̀ мꙋче́нїѧ а҆гаѳоні́ка, съ ва́ссою вкꙋ́пѣ и҆ па́ѵлою ᲂу҆се́рднѡ тща́щесѧ, ꙗ҆́кѡ вои́стиннꙋ дрꙋже́бнѡ, ѡ҆брѣто́ша жела́нїѧ кра́й."
 },
 {
  "type": "TEXT",
  "value": "Въ нбⷭ҇ныхъ черто́зѣхъ всели́вшисѧ, дв҃о, и҆ неви́димыхъ добрѡ́ты смотрѧ́ющи, и҆ прїе́млющи бж҃їю свѣ́тлость, тѧ̀ пою́щыѧ ᲂу҆ѧснѝ."
 },
 {
  "type": "TEXT",
  "value": "Вѣне́цъ положи́сѧ бл҃года́тей на версѣ̀ твое́мъ, а҆грѷпі́но, ꙗ҆́кѡ сконча́вшей тече́нїе, и҆ вѣ́рꙋ соблю́дшей некра́домꙋ, и҆ пра́ведныхъ чи́нове краснѡ́ тѧ прїѧ́ша."
 },
 {
  "type": "TEXT",
  "value": "Ꙗ҆́кѡ предстоѧ́щи зижди́телю со дерзнове́нїемъ влⷣцѣ, мꙋ́ченице а҆грѷпі́но, со всѣ́ми ѿ вѣ́ка ст҃ы́ми, просѝ согрѣше́нїй проще́нїѧ тѧ̀ пою́щымъ, до́браѧ дв҃о."
 },
 {
  "type": "TEXT",
  "value": "Бг҃оро́диченъ: Всѧ̑ содержа́щаго, ма́терски подо́бнѡ, твои́ми рꙋка́ми носѧ́щи, дв҃о мр҃і́е, рꙋки́ мѧ и҆зба́ви борца̀, ꙗ҆́кѡ да твоѐ, спаса́емь, восхвалю̀ вели́чїе."
 }
]