ponomar-pwa/static/data/shared/menaion-daily/07-25/1.json

[
 {
  "type": "HEADER",
  "value": "І҆ꙋ́лїа к҃є"
 },
 {
  "type": "HEADER",
  "value": "Оу҆спе́нїе ст҃ы́ѧ а҆́нны, ма́тере ст҃ы́ѧ бцⷣы."
 },
 {
  "type": "HEADER",
  "value": "И҆ па́мѧть ст҃ы́хъ же́нъ, ѻ҆лѷмпїа́ды и҆ є҆ѵпраѯі́и."
 },
 {
  "type": "HEADER",
  "value": "Стїхи̑ры ст҃ы́ѧ а҆́нны, гла́съ д҃, на ѕ҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Зако́ны ѡ҆правда́нїѧ соблюда́ющи невреди́мѡ, и҆ бг҃ꙋ вседержи́телю непоро́чнѡ рабо́тающи, сподо́биласѧ є҆сѝ, а҆́нно, ма́ти бы́ти, по пло́ти хрⷭ҇та̀ ро́ждшей, чи́стѣй бг҃оѻтрокови́цѣ: съ не́юже тѧ̀ ᲂу҆блажа́емъ, и҆ ст҃о́е твоѐ ᲂу҆спе́нїе ра́достною мы́слїю пра́зднꙋемъ дне́сь."
 },
 {
  "type": "TEXT",
  "value": "Жи́зни пала́тꙋ, а҆́нно бг҃омꙋ́драѧ, ро́ждши, къ жи́зни преста́виласѧ є҆сѝ вои́стиннꙋ нетлѣ́ннѣй, и҆ совокꙋплѧ́ешисѧ съ ли́ки пра́ведныхъ, пита́ющихъ тѧ̀ бога́тнѡ влⷣчнею ра́достїю: тѣ́мже твоѐ преставле́нїе соверша́емъ, приснопомина́емаѧ, и҆ вѣ́рнѡ почита́емъ бг҃омꙋ́дрїи дне́сь."
 },
 {
  "type": "TEXT",
  "value": "Две́рь нбⷭ҇нꙋю, а҆́нно бг҃омꙋ́драѧ, ро́ждши, къ нбⷭ҇номꙋ селе́нїю востекла̀ є҆сѝ, сла́внаѧ, и҆ сла́вы бжⷭ҇твенныѧ ны́нѣ наслажда́ешисѧ. Є҆́йже и҆ на́съ, честно́е твоѐ ᲂу҆спе́нїе пра́зднꙋющихъ, моли́твами твои́ми сподо́би, страсте́й мра́къ разорѧ́ющи, и҆ лю́тыхъ ѡ҆бстоѧ́нїй мглꙋ̀ ѿгонѧ́щи."
 },
 {
  "type": "HEADER",
  "value": "И҆́ны стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Ѽ ди́внагѡ чꙋдесѐ!"
 },
 {
  "type": "TEXT",
  "value": "Сѐ свѣтоза́рное торжество̀, и҆ свѣ́тлый де́нь, и҆ мі́рꙋ ра́достный, ᲂу҆спе́нїе честно́е и҆ достохва́льное а҆́нны благосла́вныѧ, и҆зъ неѧ́же роди́сѧ жи́знь ро́ждшаѧ: ѡ҆дꙋшевле́нный кївѡ́тъ, невмѣсти́мое сло́во вмѣсти́вшаѧ, печа́ли разрѣше́нїе, и҆ ра́дости хода́таица, подаю́щаѧ всѣ̑мъ вѣ̑рнымъ ве́лїю ми́лость."
 },
 {
  "type": "TEXT",
  "value": "Ѽ пресла́внагѡ чꙋдесѐ! И҆сто́чникъ жи́зни пресла́внѡ ро́ждшаѧ, є҆ди́нꙋ въ жена́хъ бл҃гослове́ннꙋю чⷭ҇тꙋю, преставлѧ́етсѧ ѿ вре́менныѧ жи́зни къ безконе́чнѣй а҆́нна благосла́внаѧ, ѿ землѝ взе́мшисѧ къ нбⷭ҇нымъ, дне́сь сра́доватисѧ а҆́гг҃льскимъ собо́рѡмъ: є҆ѧ́же ны́нѣ свѧто́е пра́зднꙋемъ торжество̀."
 },
 {
  "type": "TEXT",
  "value": "Дне́сь свѣ́тлое торжество̀, вѣ́рныхъ ли́цы, ᲂу҆спе́нїе твоѐ честно́е почита́емъ всеблагоговѣ́йнѡ, бжⷭ҇твеннымъ дх҃омъ: наста́ бо на́мъ и҆сцѣле́нїй блиста́ющаѧ благода́ть, и҆ попалѧ́ющаѧ воздꙋ́шныхъ дꙋхѡ́въ лꙋка́выхъ совокꙋплє́нїѧ, и҆ свѣ́томъ наставлѧ́ющаѧ мы̑сли, вѣ́рою воспѣва́ющихъ твоѐ, досточꙋ́днаѧ а҆́нно, честно́е преставле́нїе."
 },
 {
  "type": "HEADER",
  "value": "Сла́ва, и҆ ны́нѣ, гла́съ и҃."
 },
 {
  "type": "TEXT",
  "value": "А҆нато́лїево: И҆́же ѿ непло́дныхъ чре́слъ, же́злъ ст҃ы́й бцⷣꙋ прозѧ́бшїй, и҆зъ неѧ́же спасе́нїе мі́рꙋ возсїѧ̀ хрⷭ҇то́съ бг҃ъ, сꙋпрꙋ́гъ непоро́чный и҆ дво́ице ст҃а́ѧ і҆ѡакі́мъ и҆ а҆́нна: сі́и бо преста́вльшесѧ къ нбⷭ҇нымъ селе́нїємъ, со дще́рїю свое́ю пречⷭ҇тою дв҃ою, и҆ со а҆́гг҃лы ликꙋ́ютъ, ѡ҆ мі́рѣ моли́твꙋ творѧ́ще. И҆̀хже и҆ мы̀ соше́дшесѧ благоче́стнѡ пою́ще, глаго́лемъ: и҆̀же бг҃оѻтрокови́цы ра́ди, и҆ пречⷭ҇тыѧ марі́и, пра́ѻтцы хрⷭ҇то́вы бы́вше, моли́тесѧ ѡ҆ дꙋша́хъ на́шихъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ є҃."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ра́дꙋйсѧ, мы́сленнаѧ ла́стовице, ве́снꙋ благода́ти на́мъ возвѣсти́вшаѧ, непоро́чнѡ въ цѣломꙋ́дрїи жи́тельствовавши до́брѣ, и҆ дѣ́вства сокро́вище: че́стнѡ болѣ́зновавшаѧ, непоро́чнꙋю бцⷣꙋ а҆́гнице честна́ѧ, ꙗ҆́же ро́ждшаѧ ю҆́ницꙋ, взе́млющаго а҆́гнца мі́ра прегрѣшє́нїѧ, сло́вомъ сло́во ро́ждшꙋю, є҆ди́нꙋ неискꙋсомꙋ́жнꙋю, а҆́нно, прама́ти гдⷭ҇нѧ, тѧ̀ ѿ землѝ пресе́льшаго. Є҆го́же ны́нѣ молѝ, дꙋша́мъ на́шымъ дарова́ти ве́лїю ми́лость."
 },
 {
  "type": "TEXT",
  "value": "Сті́хъ: Ра́дꙋйтесѧ, пра́веднїи ѡ҆ гдⷭ҇ѣ:"
 },
 {
  "type": "TEXT",
  "value": "Ра́дꙋйсѧ, вожделѣ́ннаѧ бг҃ꙋ, и҆збра́ннаѧ свѣ́тлостьми сїѧ́нїй зако́на, дво́ице честна́ѧ, ꙗ҆́же и҆з̾ѧвлє́нїѧ до́брѣ бжⷭ҇твенною благода́тїю предлага́ющаѧ, хрⷭ҇та̀ ро́ждшꙋю нача́льника жи́зни на́шеѧ та̀ роди́вши, і҆ѡакі́мъ бг҃опрїѧ́тный и҆ бжⷭ҇твеннаѧ а҆́нна всечестна́ѧ: свѣти́льницы возсїѧ́вшїи свѣщꙋ̀ безсѣ́ннꙋю, благопра́вѧщїи бл҃года́ть, пречⷭ҇тꙋю бцⷣꙋ. Съ не́юже моли́тесѧ, дꙋша́мъ на́шымъ дарова́ти ве́лїю ми́лость."
 },
 {
  "type": "TEXT",
  "value": "Сті́хъ: Блаже́ни всѝ боѧ́щїисѧ гдⷭ҇а, ходѧ́щїи въ пꙋте́хъ є҆гѡ̀."
 },
 {
  "type": "TEXT",
  "value": "Ра́дꙋйсѧ, благослове́ннаѧ землѐ, ꙗ҆́же бг҃опрозѧ́бшꙋю мі́рови зе́млю процвѣ́тшаѧ, ꙗ҆́же въ зако́нѣ бжⷭ҇твеннѣмъ безпреста́ни поꙋча́ющаѧсѧ, и҆ благода́ть всѣ̑мъ подписа́вшаѧ: сою̑зъ непло́дствїѧ ржⷭ҇тво́мъ свои́мъ и҆збѣ́гшаѧ, и҆ сме́ртїю нетлѣ́нїе воздава́ющаѧ, и҆ къ бжⷭ҇твеннѣй преста́вльшаѧсѧ свѣ́тлости а҆́нна бг҃облаже́ннаѧ, прама́ти хрⷭ҇та̀ бг҃а, ꙗ҆́же свѣтоно́сный свѣти́льникъ бцⷣꙋ ро́ждшаѧ. Съ не́ю же и҆спросѝ дꙋша́мъ на́шымъ дарова́ти ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, гла́съ и҃:"
 },
 {
  "type": "TEXT",
  "value": "Прїиди́те, всѧ̀ тва́рь, въ кѷмва́лѣхъ ѱало́мски соше́дшесѧ, восхва́лимъ а҆́ннꙋ бг҃омꙋ́дрꙋю, бж҃е́ственнꙋю го́рꙋ ро́ждшꙋю ѿ ложе́снъ свои́хъ, и҆ къ горѣ̀ мы́сленнѣй и҆ ра̑йскимъ селе́нїємъ дне́сь преминꙋ́вшꙋю, и҆ къ не́й возопїе́мъ: блаже́нное чре́во твоѐ, носи́вшее вои́стиннꙋ свѣ́тъ мі́рови внꙋ́трь во чре́вѣ носи́вшꙋю: и҆ сосца̀ твоѧ̀ кра̑снаѧ, ꙗ҆̀же сса́ше дои́вшаѧ хрⷭ҇та̀, пи́щꙋ жи́зни на́шеѧ: є҆го́же молѝ, и҆зба́вити на́съ ѿ всѧ́кїѧ ско́рби, и҆ прило́га вра́жїѧ, и҆ спастѝ дꙋ́шы на́шѧ."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Жи́знь ро́ждшꙋю во чре́вѣ носи́ла є҆сѝ, чⷭ҇тꙋю бг҃ома́терь, бг҃омꙋ́драѧ а҆́нно. Тѣ́мже къ прїѧ́тїю нбⷭ҇номꙋ, и҆дѣ́же веселѧ́щихсѧ жили́ще, въ сла́вѣ ра́дꙋющисѧ ны́нѣ преста́виласѧ є҆сѝ, чтꙋ́щымъ тѧ̀ любо́вїю прегрѣше́нїй просѧ́щи ѡ҆чище́нїе, присноблаже́ннаѧ."
 },
 {
  "type": "HEADER",
  "value": "На повече́рїи канѡ́нъ ст҃ы́хъ же́нъ, і҆ѡ́сифъ, гла́съ и҃, є҆гѡ́же краегране́сїе:"
 },
 {
  "type": "TEXT",
  "value": "Честны̑мъ жена́мъ честно́е пою̀ пѣ́нїе."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща."
 },
 {
  "type": "TEXT",
  "value": "Плотско́ю не́мощїю си́льнаго врага̀ низложи́сте, и҆ присво́истесѧ къ бг҃ꙋ, прпⷣбныѧ жєны̀, молѧ́щесѧ, си́лꙋ всѣ̑мъ на́мъ пода́ти спаси́тельнꙋю."
 },
 {
  "type": "TEXT",
  "value": "Оу҆ѧзви́стесѧ добро́тою женихо́вою, и҆ во слѣ́дъ є҆гѡ̀ прилѣпи́стесѧ ѱало́мски, послѣ́дꙋюще живонѡ́снымъ стопа́мъ є҆гѡ̀: и҆ сегѡ̀ ра́ди низложи́сте врага̀ ѕмі́ѧ."
 },
 {
  "type": "TEXT",
  "value": "Оу҆вѧди́вше трꙋды̑ по́стническими тѣлє́сныѧ добрѡ́ты, ᲂу҆краси́сте ва́шѧ дꙋ́шы: и҆ со хрⷭ҇то́мъ женихо́мъ въ черто́ги свѣ́тлыѧ внидо́сте, прпⷣбныѧ."
 },
 {
  "type": "TEXT",
  "value": "Бг҃оро́диченъ: Невѣ́стникъ показа́сѧ свѣтови́дѣнъ ᲂу҆тро́ба твоѧ̀, дв҃о, ми́лости ра́ди тѣле́снѡ и҆зъ тебє̀ воплоти́вшагѡсѧ гдⷭ҇а, и҆ всѧ́чєскаѧ бг҃оразꙋ́мїѧ лꙋча́ми просвѣ́щшагѡ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
 },
 {
  "type": "TEXT",
  "value": "Презрѣ́ла є҆сѝ добро́тꙋ тѣле́снꙋю, пречестна́ѧ, и҆ мимогрѧдꙋ́щꙋю сла́вꙋ ꙗ҆́кѡ со́нъ вмѣни́ла є҆сѝ: во смире́нїи же, ѻ҆лѷмпїа́до, и҆ поще́нїи бг҃а взыска́ла є҆сѝ, бг҃облаже́ннаѧ."
 },
 {
  "type": "TEXT",
  "value": "Младе́нствꙋющи лѣ́ты, на́съ ра́ди младе́нца сло́ва, на зе́млю, є҆ѵпраѯі́е, прише́дшаго, вѣ́рою возлюби́ла є҆сѝ, и҆ тогѡ̀ ѻ҆́бразꙋ дꙋ́шꙋ свѧза́ла є҆сѝ, непрело́жна пребы́вши."
 },
 {
  "type": "TEXT",
  "value": "Ѿверго́стесѧ мі́ра и҆ пло́ти мꙋдрова́нїѧ, воздержа́нїемъ же и҆ трꙋды̑ стѧжа́вше хрⷭ҇та̀ жениха̀ пречⷭ҇таго, черто́гъ нбⷭ҇ный, подаю́щаго ва́мъ бжⷭ҇твенное наслажде́нїе."
 },
 {
  "type": "TEXT",
  "value": "Бг҃оро́диченъ: Свѧще́нныхъ прорѡ́къ свѧщє́нныѧ трꙋбы̑ дре́вле тѧ̀ провозвѣсти́ша: две́рь свѣ́та ро́ждшꙋю и҆ сви́токъ ѡ҆дꙋшевле́нный, на не́мже не рꙋка́ми сло́во написа́сѧ, па́че сло́ва пречⷭ҇таѧ дв҃о."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Страннопрїе́мница ᲂу҆се́рднѣйша была̀ є҆сѝ, собо́ръ свѧще́нныхъ ᲂу҆покоева́ющи, и҆ хрⷭ҇та̀ ѡ҆ се́мъ веселѧ́щи, за милосе́рдїе стра́нна бы́вшаго."
 },
 {
  "type": "TEXT",
  "value": "Добро́тꙋ пречⷭ҇тꙋю люби́магѡ ви́диши жениха̀ твоегѡ̀, є҆ѵпраѯі́е, ᲂу҆вѧди́ла є҆сѝ пло́ти добро́тꙋ воздержа́нїемъ."
 },
 {
  "type": "TEXT",
  "value": "Дрема́нїе ѿри́нꙋвше ѿ дꙋше́вныхъ вѣ́ждей свѧщє́нныѧ жєны̀, ᲂу҆спи́сте двиза̑нїѧ тѣлє́сныѧ воздержа́нїемъ."
 },
 {
  "type": "TEXT",
  "value": "Бг҃оро́диченъ: Воплоти́вшагосѧ тебѐ, гдⷭ҇и, ѿ пречⷭ҇тыѧ дв҃ы, преподѡ́бныѧ возлюби́вше, въ воню̀ мѵ́ра твоегѡ̀ потеко́ша, твое́ю ᲂу҆ѧзви́вшесѧ бжⷭ҇твенною любо́вїю."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Ѿ и҆сто́чника напаѧ́ема, вселе́ннꙋю всезлаты́ми ᲂу҆че́нїи свѧще́ннагѡ па́стырѧ напои́вшагѡ, кла́сы прозѧбла̀ є҆сѝ до́брыѧ дѣ́тели, ѻ҆лѷмпїа́до, и҆́миже пита́еши сердца̀ на́съ чтꙋ́щихъ тѧ̀."
 },
 {
  "type": "TEXT",
  "value": "Блаже́нными наде́ждами твою̀ сла́внꙋю дꙋ́шꙋ ᲂу҆крѣ́пльши, и҆ пи́щею невеще́ственною пита́ема, ᲂу҆ма̀ чистото́ю, де́ньми мно́гими терпѣли́внѡ а҆́лчбꙋ, є҆ѵпраѯі́е, претерпѣ́ла є҆сѝ ра́дꙋющисѧ."
 },
 {
  "type": "TEXT",
  "value": "Оу҆мертви́вшесѧ мі́рови, наслѣ́довасте жи́знь безсме́ртнꙋю, и҆ черто́га бжⷭ҇твеннагѡ сподо́бистесѧ, бг҃облажє́нныѧ, свѣщы̀ ва́шѧ по́стническимъ є҆ле́емъ неꙋгаси́мы соблю́дше, всечестны̑ѧ."
 },
 {
  "type": "TEXT",
  "value": "Бг҃оро́диченъ: Бж҃їе бг҃ъ сло́во во ᲂу҆тро́бꙋ неискꙋсобра́чнꙋю во́лею всели́сѧ, и҆ чл҃вѣ́къ ᲂу҆зрѣ́нъ бы́сть, и҆́же дв҃ою соблюды́й тѧ̀, пречⷭ҇таѧ: є҆го́же жела́юще ѻ҆трокови̑цы, по́стнически семꙋ̀ послѣ́доваша житїе́мъ свѣ́тлымъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ."
 },
 {
  "type": "TEXT",
  "value": "Ю҆́на сꙋ́щи є҆ѵпраѯі́а, болѣ́зней ᲂу҆се́рдїемъ, благочести́вымъ по́мысломъ, ве́тхаго запина́телѧ попира́ше, въ не́мощи же́нстѣй тѣлесѐ: ᲂу҆твержда́ше бо сїю̀ хрⷭ҇то́съ, и҆́же въ на́шꙋ ѡ҆бо́лксѧ не́мощь."
 },
 {
  "type": "TEXT",
  "value": "Воздержа́нїе и҆ смире́нное се́рдце, бдѣ́нїе съ ми́лостынею, ра́зꙋмъ и҆ вѣ́рꙋ пра́вꙋ, и҆ соверше́ннꙋ любо́вь, ѻ҆лѷмпїа́до, стѧжа́вши, сла́внаѧ, была̀ є҆сѝ хра́мъ бж҃їй, и҆ чꙋде́съ и҆сто́чникъ неѡскꙋ́дный."
 },
 {
  "type": "TEXT",
  "value": "Оу҆страни́вше себѐ жите́йскихъ сласте́й терпѣ́нїемъ болѣ́зней по́стническихъ, на зе́млю соше́дшаго на́съ ра́ди, и҆ во́лею стра́нствовавша, вы̀ честны̑ѧ: сегѡ̀ ра́ди стѧжа́сте на небесѣ́хъ страннопрїи́мствовавша ва́съ, досточꙋ̑дныѧ."
 },
 {
  "type": "TEXT",
  "value": "Бг҃оро́диченъ: Чистоты́ тѧ, и҆ че́стна дѣ́вства чⷭ҇тый сосꙋ́дъ, ѻ҆трокови́це, содѣ́тель ѡ҆брѣ́тъ, сло́вомъ въ пречⷭ҇тое твоѐ чре́во всели́сѧ, и҆ всю̀ вра́жїю ѿ человѣ̑къ ѕло́бꙋ и҆згна̀."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Повелѣ́нное."
 },
 {
  "type": "TEXT",
  "value": "Въ моли́твахъ та́йныхъ бдѧ́ще, и҆ насла́ждшесѧ писа́ньми бг҃одохнове́нными, ѻ҆лѷмпїа́да и҆ є҆ѵпраѯі́а сла́внаѧ, на ра́мꙋ гдⷭ҇ень взѧ́ша кре́стъ, и҆ семꙋ̀ послѣ́дꙋюще воздержа́тельнѡ, всю̀ ле́сть ѕмі́ѧ низложи́ша, зовꙋ́ще хрⷭ҇тꙋ̀. Женишѐ нбⷭ҇ный, ты̀ бꙋ́ди на́мъ ᲂу҆твержде́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Сла́вꙋ тлѣ́ющꙋю на нетлѣ́ннꙋю премѣни́ша любо́вїю, прпⷣбныѧ, є҆ѧ́же наслажда́ющесѧ при́снѡ, ра́дꙋющесѧ и҆ веселѧ́щесѧ пою́тъ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Ѽ ка́кѡ претерпѣ̀ стоѧ́нїе, а҆́лчбꙋ же на днѝ мно́ги, є҆ѵпраѯі́а, хрⷭ҇тꙋ̀ вопїю́щи женихꙋ̀: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Вели́къ тѧ̀ сосꙋ́дъ ᲂу҆зрѣ́въ бжⷭ҇твеннагѡ дх҃а, ѻ҆лѷмпїа́до, бога́тнѡ вели́кими свои́ми и҆сполнѧ́етъ тѧ̀ ᲂу҆че́нїи въ патрїа́рсѣхъ вели́кїй златосло́въ, блаже́ннаѧ."
 },
 {
  "type": "TEXT",
  "value": "Бг҃оро́диченъ: Разрꙋши́ла є҆сѝ є҆ди́на клѧ́твꙋ прама́тернюю, всѣ́хъ бл҃гослове́нми вѣнча́ющаго хрⷭ҇та̀ ро́ждши, дв҃о, є҆мꙋ́же пое́мъ: гдⷭ҇и бж҃е, бл҃гослове́нъ є҆сѝ во вѣ́ки."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Побѣди́тели мꙋчи́телѧ и҆ пла́мене благода́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "По́мыслꙋ, дѣ́во, стра̑сти безсловє́сныѧ повинꙋ́ла є҆сѝ, и҆ женихꙋ̀ сло́вꙋ ᲂу҆невѣ́стившисѧ, непоро́чнаѧ чⷭ҇таѧ, вопїю́щи: благослови́те, всѧ̑ дѣла̀ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Ва́шими пѡ́двиги те́мнаго кнѧ́зѧ низло́жше, вѣне́цъ нетлѣ́нїѧ на́мъ и҆схода́таиша, и҆ ра́йскїѧ вхо́ды, ѻ҆трокови́це, и҆ бж҃е́ственное наслажде́нїе, въ ра́дости дꙋшѝ во вѣ́ки."
 },
 {
  "type": "TEXT",
  "value": "Распе́ншесѧ мі́рꙋ, и҆ бж҃їею любо́вїю ᲂу҆ѧзви́вшесѧ, свѧщє́нныѧ дѣ́вы, вкꙋше́нїемъ сла́дкимъ є҆́ѵꙋ ᲂу҆ѧзви́вшаго, воздержа́нїѧ стрѣла́ми ᲂу҆ѧзви́сте, воспѣва́юще хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: І҆и҃са ро́ждшаѧ ѿ чⷭ҇тыхъ крове́й твои́хъ воплоще́нна, дѣ̑вы всѧ̑ собрала̀ є҆сѝ, пречⷭ҇таѧ дв҃о мт҃и, и҆ съ ни́ми вопїю́щи: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще."
 },
 {
  "type": "TEXT",
  "value": "Кра́сныѧ влⷣцѣ, и҆ бг҃оглагѡ́ливыѧ гѡ́рлицы, и҆ ла̑стовицы свѣ̑тлыѧ и҆ чистолюби̑выѧ, въ добрѡ́ты нбⷭ҇ныѧ приведе́ни бы́сте."
 },
 {
  "type": "TEXT",
  "value": "Сочта́стесѧ съ вы́шними ликостоѧ́нїи, и҆ во и҆збра́нныхъ собо́рѣхъ всели́стесѧ, ѡ҆ на́съ молѧ́щесѧ любо́вїю ще́дромꙋ бг҃ꙋ."
 },
 {
  "type": "TEXT",
  "value": "Па́мѧть є҆ѵпраѯі́и и҆ ѻ҆лѷмпїа́ды, ꙗ҆́кѡ со́лнце мі́рови возсїѧ̀, вѣ́рныхъ мы̑сли просвѣща́ющи, хрⷭ҇та̀ велича́ющихъ при́снѡ."
 },
 {
  "type": "TEXT",
  "value": "Бг҃оро́диченъ: Свѣ́та сꙋ́щи прїѧ́телище, просвѣтѝ, дв҃о, ѡ҆мраче́ннꙋю страстьмѝ дꙋ́шꙋ мою̀, и҆ кромѣ́шнїѧ тмы̀ и҆зба́ви мѧ̀ мольба́ми твои́ми."
 },
 {
  "type": "HEADER",
  "value": "Стїхи̑ры ст҃ы́хъ же́нъ, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Тайносло́вца прⷪ҇ро́ка, и҆ ᲂу҆чи́телѧ на́шегѡ, ᲂу҆чени́цꙋ въ пѣ́снехъ ѻ҆лѷмпїа́дꙋ согла́снѡ почти́мъ досто́йнѡ: и҆ съ не́ю восхвалѧ́юще цѣломꙋ́дреннꙋю и҆ чи́стꙋю є҆ѵпраѯі́ю, ꙗ҆́кѡ хрⷭ҇тꙋ̀ молѧ́щꙋюсѧ спасти́сѧ на́мъ."
 },
 {
  "type": "TEXT",
  "value": "Благоче́стїѧ и҆сча́дїе, и҆ ᲂу҆добре́нїе мона́шествꙋющихъ сꙋ́щꙋ, пѣ́сньми досто́йнѡ почти́мъ, согла́снѡ всѝ вѣ́рнїи, є҆ѵпраѯі́ю цѣломꙋ́дреннꙋю, ꙗ҆́кѡ молѧ́щꙋю зижди́телѧ ѡ҆ на́съ, спасти́сѧ дꙋша́мъ на́шымъ."
 },
 {
  "type": "TEXT",
  "value": "Сла́ва: Ты̀ земнꙋ́ю красотꙋ̀ совле́кши, до́брѣ благꙋ́ю ча́сть и҆збра́ла є҆сѝ, бг҃омꙋ́драѧ, ю҆́же ѡ҆брѣ́те марі́а, и҆ всѧ̑ а҆́бїе ѡ҆ста́вльши вре́мєннаѧ, добродѣ́телїю прїѧ́ла є҆сѝ мы́сленный би́серъ многоцѣ́нный."
 },
 {
  "type": "TEXT",
  "value": "И҆ ны́нѣ: Досто́йно є҆́сть."
 },
 {
  "type": "HEADER",
  "value": "На ᲂу҆́трени на Бг҃ъ гдⷭ҇ь тропа́рь а҆́нны ст҃ы́ѧ, три́жды. Бг҃оро́дична не глаго́лемъ."
 },
 {
  "type": "HEADER",
  "value": "По а҃-й каѳі́смѣ сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Твоѐ пра́зднꙋемъ, пра́веднаѧ а҆́нно, ᲂу҆спе́нїе, сла́вою бо неизрече́нною просла́ви тѧ̀ хрⷭ҇то́съ бг҃ъ, ꙗ҆́кѡ прама́терь свою̀. Тѣ́мже преста́вльшисѧ того̀ молѝ, ми́ръ моли́твами твои́ми пода́ти на́мъ, покрыва́ющи ѿ сопроти́вныхъ дꙋ́шы на́шѧ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. Тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ."
 },
 {
  "type": "HEADER",
  "value": "По в҃-й каѳі́смѣ сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Въ рꙋ́цѣ на́съ ра́ди ѿ дв҃ы вочл҃вѣ́чшагѡсѧ преда́вши дꙋ́шꙋ, и҆́бо зижди́тель тво́й и҆ бг҃ъ, къ нетлѣ́ннѣй жи́зни преста́ви тѧ̀. Тѣ́мже ны́нѣ че́стнѡ ᲂу҆блажа́емъ тѧ̀, ꙗ҆́кѡ є҆ди́ной честнѣ́й и҆ непоро́чнѣй вои́стиннꙋ бцⷣѣ сꙋ́щꙋю мт҃рь, и҆ согла́снѡ взыва́емъ: зижди́телѧ твоего̀ и҆ бг҃а, хрⷭ҇та̀ сп҃са на́шего молѝ, спасти́сѧ дꙋша́мъ на́шымъ. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ."
 },
 {
  "type": "HEADER",
  "value": "Канѡ́ны ѻ҆ктѡ́иха ѻ҆́ба безъ мꙋ́ченична, и҆ ст҃ы́ѧ на ѕ҃. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "Согрѣше́нїй проще́нїе, и҆ ѕлы́хъ и҆збавле́нїе, и҆ житїѧ̀ и҆справле́нїе ны́нѣ мѝ и҆спросѝ, твою̀ свѣтоно́снꙋю па́мѧть почита́ющемꙋ дне́сь, а҆́нно всехва́льнаѧ."
 },
 {
  "type": "TEXT",
  "value": "Живо́тъ ро́ждшꙋю, бг҃олѣ́пнѡ родила̀ є҆сѝ: тѣ́мже къ присножи́зненнѣй жи́зни преста́виласѧ є҆сѝ, наслажда́ющисѧ ра́дости неизглаго́ланныѧ, и҆ свѣ́та невече́рнѧгѡ, а҆́нно бг҃озва́ннаѧ."
 },
 {
  "type": "TEXT",
  "value": "Благода́ть бжⷭ҇твеннаѧ къ ра́дости преста́ви, безъ сѣ́мене ю҆́же родѝ дщѝ сеѧ̀, чи́стаѧ, и҆ предстои́тъ со мно́гимъ дерзнове́нїемъ, гдⷭ҇еви молѧ́щисѧ, спасти́сѧ всѣ̑мъ."
 },
 {
  "type": "TEXT",
  "value": "Пра́веднѡ и҆ прпⷣбнѡ пожи́вши, всехва́льнаѧ, къ пра́ведномꙋ гдⷭ҇ꙋ ны́нѣ преста́виласѧ є҆сѝ, ра́доватисѧ съ пра́ведными и҆̀же ѿ вѣ́ка: тѣ́мже соше́дшесѧ тѧ̀ вѣ́рою почита́емъ."
 },
 {
  "type": "TEXT",
  "value": "Бг҃оро́диченъ: И҆зъ тебє̀ на́мъ возсїѧ̀ сл҃нце пра́ведное, и҆ всю̀ ѡ҆зарѝ бг҃оразꙋ́мїемъ зе́млю, и҆ разорѝ мглꙋ̀ неразꙋ́мїѧ, чⷭ҇таѧ, всенепоро́чнаѧ и҆ всебл҃же́ннаѧ."
 },
 {
  "type": "TEXT",
  "value": "Катава́сїа: Ѿве́рзꙋ ᲂу҆ста̀ моѧ̑:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ: но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче."
 },
 {
  "type": "TEXT",
  "value": "Заче́ншꙋю содержа́щаго всѧ̑ зачала̀ є҆сѝ, и҆ родила̀ є҆сѝ па́че сло́ва хрⷭ҇та̀ ро́ждшꙋю: тѣ́мже твоѐ ᲂу҆спе́нїе, а҆́нно, почита́емъ."
 },
 {
  "type": "TEXT",
  "value": "Съ похвала́ми соверша́етсѧ сла́внаѧ па́мѧть твоѧ̀, ꙗ҆́кѡ родила̀ є҆сѝ на́мъ хвале́нїй превы́шшꙋю, чⷭ҇тꙋю бг҃ома́терь, а҆́нно бг҃опрїѧ́тнаѧ."
 },
 {
  "type": "TEXT",
  "value": "Ꙗ҆́коже со́лнце съ лꙋно́ю а҆́ннѣ совокꙋплѧ́ѧсѧ сла́вный і҆ѡакі́мъ, дѣ́вства зарю̀ ражда́етъ: є҆ѧ́же ра́ди бж҃ества̀ лꙋча̀ просїѧ̀."
 },
 {
  "type": "TEXT",
  "value": "Го́рꙋ бжⷭ҇твеннꙋю и҆зъ чре́слъ твои́хъ родила̀ є҆сѝ, и҆ къ гора́мъ мы́слєннымъ, и҆ раѧ̀ селе́нїємъ, а҆́нно, преминꙋ́ла є҆сѝ, бг҃облаже́ннаѧ."
 },
 {
  "type": "TEXT",
  "value": "Бг҃оро́диченъ: Тѧ̀ предста́тельницꙋ тве́рдꙋю, бг҃ороди́тельнице, стѧжа́хомъ, ᲂу҆пова́нїе на тѧ̀ возложи́вше спаса́емсѧ, и҆ къ тебѣ́ бо прибѣга́юще ѡ҆гражда́емсѧ."
 },
 {
  "type": "HEADER",
  "value": "Сѣда́ленъ, гла́съ и҃:"
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Мт҃ре влⷣки и҆ творца̀ ма́ти была̀ є҆сѝ, а҆́нно всехва́льнаѧ, тогѡ̀ повелѣ̑нїѧ при́снѡ хранѧ́щи: сегѡ̀ ра́ди ᲂу҆ме́рши, къ жи́зни безсме́ртнѣй преста́виласѧ є҆сѝ вои́стиннꙋ, и҆ къ свѣ́тꙋ невече́рнемꙋ. Тѣ́мже свѣтоно́снꙋю и҆ свѧтꙋ́ю твою̀ па́мѧть соверша́емъ, дꙋ́хомъ просвѣща́еми всегда̀, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Ꙗ҆́же въ зако́нѣ пи̑саннаѧ поꙋча́ющисѧ соверши́ла є҆сѝ, и҆ законода́вца мт҃ре ма́ти была̀ є҆сѝ: тѣ́мже тебѣ̀ всѧ̀ тва́рь по до́лгꙋ ны́нѣ сотворѧ́етъ твою̀ ра́достнѡ па́мѧть."
 },
 {
  "type": "TEXT",
  "value": "Блаже́нное чре́во твоѐ вои́стиннꙋ, носи́вшее свѣ́тъ мі́ра внꙋ́трь во чре́вѣ носи́вшꙋю, и҆ сосца̀ твоѧ̀ кра̑снаѧ, ꙗ҆́кѡ дои́вшаѧ дои́вшꙋю, а҆́нно, хрⷭ҇та̀, пита́телѧ на́шего."
 },
 {
  "type": "TEXT",
  "value": "Ꙗ҆́кѡ пожи́вши непоро́чнѡ, ю҆́же непоро́чнѡ родила̀ є҆сѝ бцⷣꙋ ѻ҆трокови́цꙋ, сло́во ѻ҆́ч҃ее породи́вшꙋю: и҆ къ немꙋ̀ со сла́вою всели́ласѧ є҆сѝ, ѡ҆божена̀ честны́ми вои́стиннꙋ прича́стїи."
 },
 {
  "type": "TEXT",
  "value": "Бг҃оро́диченъ: Дв҃ы чре́во сто́гъ, ꙗ҆́коже на гꙋмнѣ̀ вои́стиннꙋ ꙗ҆ви́сѧ, кла́съ недѣ́ланенъ и҆мꙋ́щи, и҆́мже пита́етсѧ всѧ́кое є҆стество̀, зовꙋ́щее: всеси́льне, сла́ва, хрⷭ҇тѐ, си́лѣ твое́й."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Нечести́вїи не ᲂу҆́зрѧтъ сла́вы, твоеѧ̀, хрⷭ҇тѐ, но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче."
 },
 {
  "type": "TEXT",
  "value": "Не́бо родила̀ є҆сѝ на землѝ вои́стиннꙋ, ро́ждшꙋю нб҃сѐ творца̀, дне́сь тѧ̀ преставлѧ́юща къ небє́снымъ со сла́вою, а҆́нно пресла́внаѧ."
 },
 {
  "type": "TEXT",
  "value": "Съ невеще́ственными чи́нми, невеще́ственнымъ ᲂу҆мо́мъ, ликꙋ́еши ра́достнѡ, и҆сполнѧ́ема сїѧ́нїѧ богатода́вца: но на́съ помина́й, вѣ́рою хва́лѧщихъ тѧ̀."
 },
 {
  "type": "TEXT",
  "value": "Ѿ ко́рене і҆ессе́ева прозѧ́бшаѧ ꙗ҆́вѣ, благоцвѣтꙋ́щїй же́злъ чⷭ҇тꙋю и҆зрасти́ла є҆сѝ, сла́внаѧ, и҆зрасти́вшꙋю цвѣ́тъ неꙋвѧда́ющїй, і҆и҃са, и҆зба́вителѧ на́шего."
 },
 {
  "type": "TEXT",
  "value": "Бг҃оро́диченъ: Къ тебѣ̀ прибѣга́ю є҆ди́нѣй держа́внѣй, вѣ́рныхъ покро́вꙋ, на тѧ̀ наде́ждꙋ возлага́ю спасе́нїѧ моегѡ̀, прест҃а́ѧ влⷣчце бцⷣе, не пре́зри менє̀."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости, ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Гдⷭ҇а і҆и҃са бг҃а пра́ѻтцы, і҆ѡакі́мъ же и҆ а҆́нна, пра́вдою ᲂу҆кра́шени, по достоѧ́нїю въ пѣ́снехъ да восхва́лѧтсѧ дне́сь."
 },
 {
  "type": "TEXT",
  "value": "Всѧ́ческихъ похва́лъ а҆́нна превзы́де ꙗ҆́кѡ всѧ́кїѧ похвалы̀ превозше́дшꙋю родила̀ є҆́сть: сегѡ̀ ра́ди въ ли́цѣ пра́ведныхъ водворѧ́етсѧ."
 },
 {
  "type": "TEXT",
  "value": "Свѣтоно́сїѧ и҆ свѣ́тлости и҆спо́лнена па́мѧть твоѧ̀: сїѧ̑нїѧ же въ мі́рѣ спаси́тєльнаѧ и҆спꙋща́ющи, цѣломꙋ́дреннаѧ а҆́нно, дарова́нїй всѧ́ческихъ и҆спо́лни."
 },
 {
  "type": "TEXT",
  "value": "Рꙋ́чкꙋ, ма́ннꙋ бжⷭ҇твеннꙋю вмѣсти́вшꙋю, во чре́вѣ носи́ла є҆сѝ, а҆́нно, и҆ съ не́ю ны́нѣ на нб҃сѣ́хъ живꙋ́щи, ѡ҆ всѣ́хъ мо́лишисѧ, прехва́льнаѧ."
 },
 {
  "type": "TEXT",
  "value": "Бг҃оро́диченъ: Ѿ а҆́нны мі́рови родила́сѧ є҆сѝ, цр҃и́це, всѣ́хъ цр҃ѧ̀ ро́ждшаѧ, и҆ дѣ́вствꙋющи по ржⷭ҇твѣ̀, херꙋві̑мъ превы́шши, пренепоро́чнаѧ."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Прароди́телей хрⷭ҇то́выхъ па́мѧть пра́зднꙋемъ, тѣ́хъ вѣ́рнѡ просѧ́ще по́мощи, и҆зба́витисѧ всѣ̑мъ ѿ всѧ́кїѧ ско́рби, зовꙋ́щымъ: бг҃ъ на́шъ съ на́ми, си́хъ прославле́й, ꙗ҆́коже благоволѝ."
 },
 {
  "type": "TEXT",
  "value": "І҆́косъ: Проро́чески сни́демсѧ всѝ, досто́йнѡ пѣ́ти прама́тере хрⷭ҇то́вы блаже́нное преставле́нїе: дне́сь бо ѿ вре́менныѧ преста́висѧ жи́зни, на нб҃сѣ́хъ съ ра́достїю ше́ствїе творѧ́щи ра́дꙋетсѧ, ꙗ҆́кѡ сꙋ́щи ма́ти и҆́стиннаѧ сꙋ́щїѧ бцⷣы, и҆ взыва́етъ вѣ́рнѡ: вели́читъ дꙋша̀ моѧ̀ гдⷭ҇а, ꙗ҆́кѡ роди́хъ сегѡ̀ мт҃рь на землѝ, и҆́же сїю̀ прославле́й, ꙗ҆́коже благоволѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Ꙗ҆́кѡ жи́зни и҆́стинныѧ, а҆́нно, мт҃рь ро́ждши, къ жи́зни и҆́стиннѣй преста́виласѧ є҆сѝ ко свѣ́тꙋ, взыва́ющи: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Ꙗ҆́же мт҃ри и҆зба́вителѧ, ма́ти сꙋ́щи, а҆́нно, ѿ землѝ къ небесѝ добродѣ́тельми ᲂу҆кра́шена востечѐ, во хвале́нїи зовꙋ́щи: бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Къ несконча́емѣй жи́зни, къ простра́ннѣй широтѣ̀ ра́йскїѧ пи́щи, къ невече́рнемꙋ свѣ́тꙋ ѿшла̀ є҆сѝ, бг҃оно́сице, зовꙋ́щи: бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "И҆спещре́на добродѣ́тельми, добро́тою бжⷭ҇твенныхъ дарова́нїй ᲂу҆кра́шена, къ бг҃ꙋ приложи́сѧ, непреста́ннѡ зовꙋ́щи: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Оу҆кра́шена добро́тами добродѣ́телей, кра́снаго па́че сынѡ́въ человѣ́ческихъ родила̀ є҆сѝ, сло́во, пренепоро́чнаѧ, кра́сными лѣ́потами ᲂу҆краша́ющаго тебѐ пѣсносло́вѧщихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Мт҃и є҆ди́ныѧ бцⷣы, ꙗ҆́же непло́ды пре́жде, ны́нѣ же прама́ти хрⷭ҇то́ва, ꙗ҆́коже непло́дства, си́це и҆ ме́ртвости совле́кши ѻ҆де́ждꙋ, во странѣ̀ живꙋ́щихъ вопїе́тъ: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Хрⷭ҇то́съ тебѣ̀ двє́ри вы́шнїѧ ѿве́рзе, ра́достнѡ тѧ̀ прїѧ́тъ: ꙗ҆́кѡ две́рь родила̀ є҆сѝ, є҆́юже са́мъ про́йде, и҆ затворе́нꙋ ꙗ҆вѝ по и҆схожде́нїи, бг҃омꙋ́драѧ, достойнопѣ́таѧ а҆́нно: тѣ́мже тѧ̀ почита́емъ вѣ́рнїи во вѣ́ки."
 },
 {
  "type": "TEXT",
  "value": "Свѧ́тѡ житїѐ сконча́вши, ст҃ы́ѧ приснодѣ́вы мт҃и была̀ є҆сѝ, ꙗ҆́же прест҃о́е сло́во породѝ, ѡ҆свѧще́нїе и҆ и҆збавле́нїе на́мъ подаю́ща, бг҃омꙋ́драѧ и҆ досточꙋ́днаѧ а҆́нно: тѣ́мже тѧ̀ пое́мъ при́снѡ вѣ́рнїи во вѣ́ки."
 },
 {
  "type": "TEXT",
  "value": "Бг҃оро́диченъ: Мно́гими мѧ̀ содержи́ма бѣда́ми, и҆ бꙋ́рею грѣхо́вною бѣ́дствꙋющаго, ко приста́нищꙋ невла́емомꙋ дыха́нїи дх҃а, бг҃ороди́тельнице влⷣчце, ны́нѣ наста́ви: приста́нище бо є҆сѝ хрⷭ҇тїа́нъ. Тѣ́мже тѧ̀ пое́мъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Ѿ землѝ чре́ва твоегѡ̀ вои́стиннꙋ роди́сѧ землѧ̀ ст҃а́ѧ, недѣ́ланенъ кла́съ прозѧ́бши безсѣ́меннѡ, мі́рови пита́телѧ и҆ гдⷭ҇а, тебѐ къ пи́щи неиждива́емой, а҆́нно, премꙋ́дрѡ преста́вльшагѡ."
 },
 {
  "type": "TEXT",
  "value": "Па́мѧть твоѧ̀ дне́сь на́мъ возсїѧ̀, со́лнца свѣтлѣ́йши, сїѧ́нїемъ бога́тыхъ дарѡ́въ, на́съ просвѣща́ющи, всечестна́ѧ, и҆ мра́къ страсте́й и҆з̾има́ющи: ю҆́же соверша́ющихъ сохранѝ."
 },
 {
  "type": "TEXT",
  "value": "Бжⷭ҇твенный на́съ і҆ѡакі́мъ и҆ а҆́нна бг҃омꙋ́драѧ и҆ всесла́внаѧ, сꙋпрꙋ́гъ честны́й и҆ свѣтоно́сный, созыва́ютъ бжⷭ҇твеннѣ весели́тисѧ си́хъ пра́здникомъ: є҆го́же ᲂу҆ѧснѝ свѣтода́вецъ всѣ́хъ гдⷭ҇ь."
 },
 {
  "type": "TEXT",
  "value": "Бг҃оро́диченъ: Марі́е, гпⷭ҇жѐ всѣ́хъ, всѧ́кими мѧ̀ порабоще́на согрѣше́нїи, ны́нѣ свободѝ: сама́ бо свободи́телѧ родила̀ є҆сѝ всѣ́хъ, рабо́ты на́съ и҆зба́вльшаго грѣхо́вныѧ, бжⷭ҇твеннымъ манове́нїемъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Со ᲂу҆ченикѝ:"
 },
 {
  "type": "TEXT",
  "value": "Достодо́лжнѡ воспое́мъ бг҃озва́ннꙋю а҆́ннꙋ: бцⷣꙋ бо та̀ дв҃ꙋ марі́ю ро́ждши па́че наде́жды, сро́дница по пло́ти хрⷭ҇та̀ и҆зба́вителѧ на́шегѡ ꙗ҆ви́сѧ, сїю̀ бг҃олѣ́пнѡ прїе́мшагѡ дне́сь въ вы́шнихъ, ѡ҆ на́съ молѧ́щꙋюсѧ и҆ ѡ҆ ᲂу҆мире́нїи мі́ра. Два́жды."
 },
 {
  "type": "HEADER",
  "value": "Сла́ва, и҆ ны́нѣ,"
 },
 {
  "type": "TEXT",
  "value": "Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "Нб҃о ро́ждши, а҆́нно, но́вое, марі́ю, є҆́же возсїѧ̀ сла́вы сл҃нце: дне́сь ѿ землѝ къ нбⷭ҇нымъ прехо́диши, хрⷭ҇тꙋ̀ сра́дꙋющисѧ, пресла́внаѧ."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Па́мѧть соверша́юще честнꙋ́ю, тебѐ воспѣва́емъ, хрⷭ҇тѐ, пресла́внѡ а҆́ннꙋ ѿ жи́зни привре́менныѧ, къ непрестаю́щей сла́вѣ, преста́вльшаго ны́нѣ, ꙗ҆́кѡ ма́терь сꙋ́щꙋю, безъ сѣ́мене ро́ждшїѧ тѧ̀ па́че є҆стества̀, бцⷣы и҆ приснодв҃ы мт҃ре. Два́жды."
 },
 {
  "type": "TEXT",
  "value": "Па́мѧть свѧтꙋ́ю соверша́юще пра̑ѻтецъ хрⷭ҇то́выхъ, і҆ѡакі́ма и҆ а҆́нны, честны́хъ и҆ непоро́чныхъ, прославлѧ́емъ непреста́ннѡ и҆зба́вителѧ, и҆ ще́драго гдⷭ҇а, си́хъ преста́вльшаго къ жи́зни нестарѣ́емѣй и҆ нетлѣ́ннѣй."
 },
 {
  "type": "TEXT",
  "value": "Къ невеще́ствєннымъ ликѡ́мъ, и҆ пра́ведныхъ селе́нїємъ, и҆дѣ́же а҆́гг҃льстїи чи́ни, и҆дѣ́же ст҃ы́хъ собо́ръ, ра́дость пра́зднꙋющихъ соверша́етсѧ: и҆ ны́нѣ дꙋ́хи пра́ведныхъ і҆ѡакі́ма и҆ а҆́нны вселѝ, и҆̀хже благоче́стнѡ восхвалѧ́юще ᲂу҆блажи́мъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ в҃:"
 },
 {
  "type": "TEXT",
  "value": "Прїиди́те, любодѣ́вственнїи всѝ и҆ чистоты̀ рачи́телїе, прїиди́те, пра́зднꙋемъ а҆́ннино честно́е ᲂу҆спе́нїе: и҆́бо та̀ породѝ па́че є҆стества̀ и҆сто́чника жи́зни, марі́ю бг҃оѻтрокови́цꙋ, и҆зъ неѧ́же роди́сѧ и҆зба́витель, просвѣща́ѧй и҆ ѡ҆свѧща́ѧй дꙋ́шы на́шѧ."
 },
 {
  "type": "HEADER",
  "value": "Славосло́вїе вели́кое. И҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, бл҃жє́нна, пѣ́снь г҃ и҆ ѕ҃."
 },
 {
  "type": "HEADER",
  "value": "Прокі́менъ, гла́съ д҃:"
 },
 {
  "type": "TEXT",
  "value": "Ди́венъ бг҃ъ во ст҃ы́хъ свои́хъ, бг҃ъ і҆и҃левъ."
 },
 {
  "type": "TEXT",
  "value": "Сті́хъ: Въ цр҃квахъ благослови́те бг҃а, гдⷭ҇а ѿ и҆стѡ́чникъ і҆и҃левыхъ."
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло с҃і."
 },
 {
  "type": "TEXT",
  "value": "А҆ллилꙋ́їа, гла́съ а҃: Спасе́нїе пра́вєднымъ ѿ гдⷭ҇а, и҆ защи́титель и҆̀мъ є҆́сть во вре́мѧ ско́рби."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло л҃ѕ."
 },
 {
  "type": "TEXT",
  "value": "Прича́стенъ: Ра́дꙋйтесѧ:"
 }
]