506 lines
56 KiB
JSON
506 lines
56 KiB
JSON
[
|
|
{
|
|
"type": "HEADER",
|
|
"value": "Септе́мврїа д҃"
|
|
},
|
|
{
|
|
"type": "HEADER",
|
|
"value": "Слꙋ́жба прест҃ѣ́й влⷣчцѣ на́шей бг҃оро́дицѣ, въ че́сть и҆ па́мѧть ꙗ҆вле́нїѧ чꙋдотво́рныѧ і҆кѡ́ны є҆ѧ̀, неѡпали́мыѧ кꙋпины̀."
|
|
},
|
|
{
|
|
"type": "HEADER",
|
|
"value": "На вече́рни, на Гдⷭ҇и воззва́хъ, стїхи̑ры на и҃. Гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: Є҆гда̀ ѿ дре́ва:"
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи съ любо́вїю къ горѣ̀ ст҃ѣ́й, и҆ та́мѡ ᲂу҆́зримъ видѣ́нїе бж҃е́ственное, є҆го́же вели́кїй во проро́цѣхъ мѡѷсе́й бг҃ови́децъ, на́мъ та́инственнѡ возвѣща́етъ, ка́кѡ кꙋпина̀ горѧ́ше ѻ҆гне́мъ, и҆ неѡпали́ма бы́сть, си́мъ проѧвлѧ́ѧ ѻ҆бра́знѡ ве́лїю и҆ непостижи́мꙋю та́йнꙋ, безсѣ́меннагѡ рожⷭ҇тва̀ твоегѡ̀, бг҃оро́дице: ꙗ҆́кѡ ѻ҆́гнь бжⷭ҇тва̀ неѡпали́мѡ въ ложесна́хъ твои́хъ вмѣсти́ла є҆сѝ, и҆ по рожⷭ҇твѣ̀ ключѝ дѣ́вства невреди́мѡ сохрани́ла є҆сѝ. Тѣ́мже ᲂу҆блажа́емъ тѧ̀ всѝ ро́ди, ꙗ҆́кѡ ро́ждшꙋю сп҃са и҆ и҆зба́вителѧ дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Пребыва́еши въ рожⷭ҇твѣ̀ и҆ по рожⷭ҇твѣ̀ дв҃а, ѻ҆гне́мъ неѡпали́мыѧ кꙋпины̀ дре́вле проѡбразова́ннаѧ мѡѷсе́ови, бг҃ороди́тельнице, и҆ созыва́еши вѣ́рныхъ собо́ры, і҆кѡ́ны твоеѧ̀ честно́е ꙗ҆вле́нїе бл҃гохвали́ти въ пѣ́снехъ дꙋхо́вныхъ: ꙗ҆́кѡ въ не́й зало́гъ бл҃говоле́нїѧ твоегѡ̀, ро́дꙋ хрⷭ҇тїа́нскомꙋ дарова́ла є҆сѝ, въ покро́въ и҆ защи́тꙋ ѿ ѻ҆́гненнагѡ запале́нїѧ и҆ молнїено́снагѡ гро́ма. Се́ бо и҆ на і҆кѡ́нѣ зрѧ́ще тѧ̀, въ подо́бїи неѡпали́мыѧ кꙋпины̀ и҆з̾ѡбраже́ннꙋю, да́ры бла́гости твоеѧ̀ ѿ неѧ̀ неѡскꙋ́днѡ прїе́млемъ, и҆ тѧ̀ ᲂу҆бл҃жа́емъ по до́лгꙋ, ꙗ҆́кѡ ро́ждшꙋю сп҃са и҆ и҆зба́вителѧ дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Пла́мень страсте́й на́шихъ ᲂу҆гаша́еши моли́твою твое́ю, бцⷣе дв҃о, предста́тельствꙋѧ за на́съ непреста́ннѡ ᲂу҆ престо́ла сн҃а твоегѡ̀ и҆ бг҃а на́шегѡ: ꙗ҆́кѡ вои́стиннꙋ ве́лїе дерзнове́нїе и҆́маши къ немꙋ̀, и҆ ничто́же невозмо́жно є҆́сть хода́тайствꙋ твоемꙋ̀. И҆́бо са́мой і҆кѡ́нѣ твое́й дарова̀ ѻ҆́нъ си́лꙋ бж҃е́ственнꙋю, соверша́ти мнѡ́гаѧ и҆ преди́внаѧ чꙋдеса̀, си́ми ᲂу҆вѣрѧ́ѧ на́съ, ꙗ҆́кѡ никто́же прибѣга́ѧй къ покро́вꙋ застꙋпле́нїѧ твоегѡ̀, посра́мленъ ѿи́детъ. Сегѡ̀ ра́ди пое́мъ моли́твъ твои́хъ си́лꙋ, и҆ ᲂу҆блажа́емъ тѧ̀, наде́ждо хрⷭ҇тїа́нъ, ро́ждшꙋю сп҃са и҆ и҆зба́вителѧ дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Пода́ждь по́мощь твою̀ держа́внꙋю на́мъ, бцⷣе, є҆гда̀ грѣ̑хъ ра́ди на́шихъ, ѻ҆́гненнагѡ запале́нїѧ наказа́нїе на на́съ прїи́детъ внеза́пнѡ, и҆лѝ гро́мы и҆ мѡ́лнїи съ небесѐ на́съ ᲂу҆страша́ютъ: тогда̀ і҆кѡ́ною твое́ю ст҃о́ю на́съ защитѝ и҆ и҆зба́ви, и҆ ꙗ҆ви́сѧ ᲂу҆толи́тельница гнѣ́ва бж҃їѧ, на на́съ пра́веднѡ подви́женнагѡ. Мно́гѡ бо мо́жетъ ма́тернѧѧ моли́тва ко творцꙋ̀, и҆ всеси́льно хода́тайство твоѐ предъ лице́мъ всевы́шнѧгѡ: є҆го́же ᲂу҆молѧ́ти не преста́й за ро́дъ хрⷭ҇тїа́нскїй, и҆́же въ пѣ́снехъ немо́лчныхъ ᲂу҆бл҃жа́етъ тѧ̀, ро́ждшꙋю сп҃са и҆ и҆зба́вителѧ дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ. Гла́съ то́йже:"
|
|
},
|
|
{
|
|
"type": "TEXT",
|
|
"value": "Пре́йде сѣ́нь зако́ннаѧ, бл҃года́ти прише́дши: ꙗ҆́коже бо кꙋпина̀ не сгара́ше ѡ҆палѧ́ема, та́кѡ дв҃а родила̀ є҆сѝ, и҆ дв҃а пребыла̀ є҆сѝ. Вмѣ́стѡ столпа̀ ѻ҆́гненнагѡ, пра́ведное возсїѧ̀ со́лнце, вмѣ́стѡ мѡѷсе́а хрⷭ҇то́съ, спасе́нїе дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. Чтє́нїѧ трѝ."
|
|
},
|
|
{
|
|
"type": "HEADER",
|
|
"value": "Бытїѧ̀ чте́нїе."
|
|
},
|
|
{
|
|
"type": "TEXT",
|
|
"value": "(Глава̀ к҃и) И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ, за́йде бо со́лнце: и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: А҆́зъ бг҃ъ а҆враа́ма ѻ҆тца̀ твоегѡ̀, и҆ бг҃ъ і҆саа́ка, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ, ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возблагословѧ́тсѧ ѡ҆ тебѣ̀ всѧ̑ колѣ̑на земна́ѧ, и҆ ѡ҆ сѣ́мени твое́мъ. И҆ сѐ а҆́зъ є҆́смь съ тобо́ю, сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑ є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ небє́снаѧ."
|
|
},
|
|
{
|
|
"type": "HEADER",
|
|
"value": "И҆схо́да чте́нїе."
|
|
},
|
|
{
|
|
"type": "TEXT",
|
|
"value": "(Глава̀ г҃) Вни́де мѡѷсе́й въ го́рꙋ бж҃їю хѡри́въ. Ꙗ҆ви́сѧ же є҆мꙋ̀ а҆́гг҃лъ гдⷭ҇нь въ пла́мени ѻ҆́гненнѣ и҆з̾ кꙋпины̀: и҆ ви́дѣ, ꙗ҆́кѡ кꙋпина̀ горѧ́ше ѻ҆гне́мъ и҆ кꙋпина̀ не сгара́ше. Рече́ же мѡѷсе́й: прише́дъ ᲂу҆зрю̀ видѣ́нїе вели́кое сїѐ, что̀ ꙗ҆́кѡ не сгара́етъ кꙋпина̀; Ꙗ҆́коже ви́дѣ гдⷭ҇ь, ꙗ҆́кѡ пристꙋпа́етъ ви́дѣти, призва̀ є҆го̀ гдⷭ҇ь и҆з̾ кꙋпины̀, глаго́лѧ: мѡѷсе́е, мѡѷсе́е. ѻ҆́нъ же речѐ: что̀ є҆́сть; И҆ речѐ: не приближа́йсѧ сѣ́мѡ: и҆ззꙋ́й сапогѝ ѿ ногꙋ̑ твоє́ю: мѣ́сто бо, на не́мъ же ты̀ стои́ши, землѧ̀ ст҃а̀ є҆́сть. И҆ речѐ є҆мꙋ̀: а҆́зъ є҆́смь бг҃ъ ѻ҆ц҃а̀ твоегѡ̀, бг҃ъ а҆враа́мовъ, и҆ бг҃ъ і҆саа́ковъ, и҆ бг҃ъ і҆а́кѡвль. Ѿврати́ же мѡѷсе́й лицѐ своѐ, стыдѧ́шебосѧ зрѣ́ти предъ бг҃омъ. Рече́ же гдⷭ҇ь къ мѡѷсе́ю: ви́дѧ ви́дѣхъ ѡ҆ѕлобле́нїе люде́й мои́хъ, и҆̀же во є҆гѵ́птѣ, и҆ во́пль и҆́хъ ᲂу҆слы́шахъ ѿ наси́льствꙋющихъ въ дѣ́лѣхъ: Вѣ́мъ бо болѣ̑зни и҆́хъ, и҆ снидо́хъ є҆́же и҆з̾ѧ́ти и҆̀хъ ѿ рꙋкѝ є҆гѵ́птѧнъ, и҆ и҆звестѝ и҆̀хъ ѿ землѝ ѻ҆́ныѧ, и҆ ввестѝ и҆̀хъ въ зе́млю бла́гꙋ и҆ мно́гꙋ, въ зе́млю, точа́щꙋю ме́дъ и҆ млеко̀."
|
|
},
|
|
{
|
|
"type": "HEADER",
|
|
"value": "Проро́чества і҆езекі́илева чте́нїе."
|
|
},
|
|
{
|
|
"type": "TEXT",
|
|
"value": "(Глава̀ м҃г и҆ м҃д) Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ̀ вы̀, и҆ глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: сїѧ̑ врата̀ бꙋ́дꙋтъ, заключє́нна и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ, по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ свѧты́хъ сꙋ́щихъ къ сѣ́верꙋ, прѧ́мѡ хра́мꙋ, и҆ ви́дѣхъ: и҆ сѐ и҆спо́лнь сла́вы хра́мъ гдⷭ҇ень."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ ѕ҃. Самогла̑сны:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ вои́стиннꙋ дре́внѧгѡ кївѡ́та чⷭ҇тнѣ́йшаѧ, ꙗ҆ви́сѧ ст҃а́ѧ і҆кѡ́на твоѧ̀, бцⷣе влⷣчце, на не́йже бжⷭ҇твеннагѡ ли́ка твоегѡ̀ подо́бїе созерца́емъ: на рꙋкꙋ́ бо твое́ю бг҃омладе́нца предвѣ́чнаго, гдⷭ҇а і҆и҃са хрⷭ҇та̀ держи́ши, а҆́гг҃лѡвъ и҆ человѣ́кѡвъ творца̀, и҆ всемꙋ̀ мі́рꙋ ꙗ҆влѧ́еши и҆зъ тебє̀ безсѣ́меннѡ вопло́щшагосѧ бг҃а сло́ва. Є҆мꙋ́же раболѣ́пнѡ кла́нѧющесѧ, пѣсносло́вимъ тѧ̀ вои́стиннꙋ бцⷣꙋ, и҆ мо́лимтисѧ прилѣ́жнѡ: ᲂу҆мирѝ мі́ръ, и҆ спасѝ дꙋ́шы на́шѧ, ма́тернимъ предста́тельствомъ твои́мъ къ ро́ждшемꙋсѧ ѿ тебє̀, є҆ди́на бл҃гослове́ннаѧ."
|
|
},
|
|
{
|
|
"type": "TEXT",
|
|
"value": "Предстоѧ́тъ чⷭ҇тнѣй і҆кѡ́нѣ твое́й хрⷭ҇толюби́вїи лю́дїе, и҆ съ любо́вїю є҆́й покланѧ́ютсѧ, бцⷣе влⷣчце, почерпа́ѧ ѡ҆би́льныѧ ѿ неѧ̀ да́ры щедрѡ́тъ твои́хъ, въ недꙋ́зѣхъ врачевство̀, въ бѣда́хъ и҆збавле́нїе, въ ско́рбехъ ᲂу҆тѣше́нїе: и҆́бо всѣ̑мъ всѧ̑ блага̑ѧ и҆ дꙋшеполє́знаѧ да́рꙋеши, съ вѣ́рою просѧ́щымъ предъ пречⷭ҇тымъ ѻ҆́бразомъ твои́мъ. Сегѡ̀ ра́ди се́рдцемъ и҆ ᲂу҆сты̀ бл҃гоговѣ́йнѡ лобыза́емъ бж҃е́ственнагѡ ли́ка твоегѡ̀ подо́бїе, и҆ мо́лимтисѧ прилѣ́жнѡ: ᲂу҆мирѝ мі́ръ, и҆ спасѝ дꙋ́шы на́шѧ, всеси́льными моли́твами твои́ми къ ро́ждшемꙋсѧ ѿ тебє̀, є҆ди́на бл҃гослове́ннаѧ."
|
|
},
|
|
{
|
|
"type": "TEXT",
|
|
"value": "Пе́рвѣе написа́вшейсѧ і҆кѡ́нѣ твое́й бжⷭ҇твеннымъ є҆ѵⷢ҇лі́стомъ лꙋко́ю, и҆ къ тебѣ̀ принесе́ннѣй, бцⷣе влⷣчце, бл҃говоли́ла є҆сѝ ѡ҆ і҆кѡ́нѣ се́й ꙗ҆́кѡ ми́лостива сꙋ́щи, и҆ бл҃гослови́въ ю҆̀, рекла̀ є҆сѝ со вла́стїю: съ си́мъ ѻ҆́бразомъ бл҃года́ть моѧ̀ и҆ си́ла: и҆ воспѣ́ла є҆сѝ ра́дꙋѧсѧ, ꙗ҆́коже и҆ бг҃а внегда̀ носи́ла є҆сѝ во чре́вѣ, пѣ́снь проро́ческꙋю: сѐ ѿ ны́нѣ ᲂу҆блажа́тъ мѧ̀ всѝ ро́ди. Тѣ́мже ви́дѧще съ гла́сомъ дѣ́йство, чꙋде́съ мно́жество ѿ і҆кѡ́ны твоеѧ̀ ꙗ҆вле́нное и҆ присноѧвлѧ́емое по все́й вселе́ннѣй, немо́лчными славословле́нїи тѧ̀ ᲂу҆бл҃жа́емъ, и҆ мо́лимтисѧ прилѣ́жнѡ: ᲂу҆мирѝ мі́ръ и҆ спасѝ дꙋ́шы на́шѧ, бл҃гопрїѧ́тнымъ хода́тайствомъ твои́мъ къ ро́ждшемꙋсѧ ѿ тебє̀, є҆ди́на бл҃гослове́ннаѧ."
|
|
},
|
|
{
|
|
"type": "TEXT",
|
|
"value": "Гора̀ є҆сѝ вели́каѧ и҆ пресла́внаѧ, па́че горы̀ сїна́йскїѧ, бцⷣе влⷣчце: та́ бо не терпѧ́щи сни́тїѧ сла́вы бж҃їѧ, ѻ҆гне́мъ возгара́шесѧ, и҆ гро́ми и҆ мѡ́лнїи та́мѡ бы́ша: ты́ же ѻ҆́гнь бжⷭ҇тва̀, бг҃а сло́во неѡпа́льнѡ во чре́вѣ твое́мъ вмѣсти́ла є҆сѝ, и҆ млеко́мъ пита́ла є҆сѝ пита́телѧ вселе́нныѧ. Къ немꙋ́же дерзнове́нїе ма́тернее и҆мꙋ́щи, спаса́й ѿ бѣ́дъ вѣ́рнѡ пра́зднꙋющихъ тво́й честны́й пра́здникъ, въ не́мже пѣсносло́вимъ ми́лѡсти твоѧ̑ и҆ щедрѡ́ты, и҆ мо́лимтисѧ прилѣ́жнѡ: ᲂу҆мирѝ мі́ръ, и҆ спасѝ дꙋ́шы на́шѧ бжⷭ҇твеннымъ моле́нїемъ твои́мъ къ ро́ждшемꙋсѧ ѿ тебє̀, є҆ди́на бл҃гослове́ннаѧ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ: Гла́съ и҃:"
|
|
},
|
|
{
|
|
"type": "TEXT",
|
|
"value": "Па́че ски́нїи мѡѷсе́евы, по ѻ҆́бразꙋ небе́сномꙋ сотворе́нныѧ, всю́ тѧ бг҃ъ ѡ҆ст҃ѝ, бцⷣе, и҆ па́че а҆арѡ́нѧ кївѡ́та, и҆спо́лни бл҃года́ти бж҃їѧ и҆зѻби́льнѡ, є҆ѧ́же и҆ і҆кѡ́на твоегѡ̀ подо́бїѧ прича́стна показа́сѧ: и҆сточа́етъ бо ѡ҆свѧще́нїе и҆ цѣльбꙋ̀ дꙋша́мъ и҆ тѣлесє́мъ человѣ́чєскимъ, и҆ ᲂу҆ставлѧ́етъ си́лꙋ ѻ҆́гненнꙋю присꙋ́тствїемъ свои́мъ. Є҆́й же съ любо́вїю покланѧ́ющесѧ, про́симъ, всебл҃га́ѧ, и҆ вопїе́мъ: ѻ҆гнѧ̀ вре́меннагѡ и҆ вѣ́чнагѡ и҆зба́ви на́съ, бл҃гослове́ннаѧ помо́щнице."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Велича́емъ тѧ̀, бцⷣе дв҃о, возвели́чившꙋю ро́дъ на́шъ: и҆з̾ тебє́ бо воплоти́сѧ и҆зба́витель па́дшагѡ человѣ́чества, и҆́мже а҆да́мъ и҆ є҆́ѵа клѧ́твы свободи́шасѧ, и҆ ѿ мра́чныхъ ᲂу҆до́лїй а҆́дскихъ во є҆де́мъ па́ки введо́шасѧ, сы́й бг҃ъ на́шъ, спаса́ѧй при́снѡ тѧ̀ велича́ющыѧ."
|
|
},
|
|
{
|
|
"type": "TEXT",
|
|
"value": "Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ."
|
|
},
|
|
{
|
|
"type": "TEXT",
|
|
"value": "Велича́емъ тѧ̀, бцⷣе дв҃о, застꙋ́пницꙋ ᲂу҆се́рднꙋю ро́да хрⷭ҇тїа́нскагѡ, покро́вомъ ми́лости твоеѧ̀ покрыва́ющꙋю всю̀ вселе́ннꙋю: се́ бо і҆кѡ́на твоѧ̀ ст҃а́ѧ чꙋде́съ мно́жество и҆сточа́етъ, и҆ ꙗ҆́кѡ ᲂу҆́тварь драга́ѧ цр҃кви хрⷭ҇то́вой дарова́сѧ бл҃гостїю творца̀, все́льшагѡсѧ въ тѧ̀ пло́тїю, и҆ просла́вльшагѡ тѧ̀ сла́вою бжⷭ҇тва̀. И҆з̾ тебе́ бо вои́стиннꙋ, а҆ не привидѣ́нїемъ, воплоти́сѧ сы́й бг҃ъ на́шъ, спаса́ѧй при́снѡ тѧ̀ велича́ющыѧ."
|
|
},
|
|
{
|
|
"type": "TEXT",
|
|
"value": "Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи."
|
|
},
|
|
{
|
|
"type": "TEXT",
|
|
"value": "Велича́емъ тѧ̀, бцⷣе дв҃о, ꙗ҆́кѡ ѡ҆дꙋшевле́нный кївѡ́тъ бж҃ества̀, пѣ́нїи хвале́бными чествꙋ́емъ тѧ̀, є҆ди́нꙋ и҆збра́ннꙋю и҆ бл҃гослове́ннꙋю, въ жена́хъ: ложесна́ бо твоѧ̑ престо́лъ себѣ̀ сотворѝ сы́й бг҃ъ на́шъ, спаса́ѧй при́снѡ тѧ̀ велича́ющыѧ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, гла́съ то́йже:"
|
|
},
|
|
{
|
|
"type": "TEXT",
|
|
"value": "Ѿ ст҃ы́ѧ і҆кѡ́ны твоеѧ̀, влⷣчце пребл҃га́ѧ, и҆сцѣле́нїй стрꙋи̑ и҆стека́ютъ, и҆́миже напоѧ́ютсѧ бл҃года́тнѡ дꙋ́шы на́шѧ, и҆ врачꙋ́ютсѧ безме́зднѡ тѣлеса̀ на̑ша: тѣ́мже тѧ̀ цѣле́бницꙋ ми́лостивꙋю при́снѡ въ пѣ́снехъ велича́емъ."
|
|
},
|
|
{
|
|
"type": "HEADER",
|
|
"value": "Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "И҆́же во ѻ҆гнѝ кꙋпины̀ неѡпали́мыѧ, дре́вле мѡѷсе́емъ ви́дѣнныѧ, та́йнꙋ воплоще́нїѧ своегѡ̀ ѿ неискꙋсобра́чныѧ дв҃ы марі́и проѡбразова́вый, то́й и҆ ны́нѣ, ꙗ҆́кѡ чꙋде́съ творе́цъ и҆ всеѧ̀ тва́ри созда́тель, і҆кѡ́нꙋ є҆ѧ̀ ст҃ꙋ́ю чꙋдесы̀ мно́гими просла́ви, дарова́въ ю҆̀ вѣ̑рнымъ во и҆сцѣле́нїе недꙋ́гѡмъ, и҆ въ защище́нїе ѿ ѻ҆́гненнагѡ запале́нїѧ. Сегѡ̀ ра́ди вопїе́мъ пребл҃гослове́ннѣй: наде́ждо хрⷭ҇тїа́нъ, ѿ лю́тыхъ бѣ́дъ, ѻ҆гнѧ̀ и҆ гро́ма и҆зба́ви на тѧ̀ ᲂу҆пова́ющихъ, и҆ спасѝ дꙋ́шы на́шѧ ꙗ҆́кѡ милосе́рда."
|
|
},
|
|
{
|
|
"type": "HEADER",
|
|
"value": "На ᲂу҆́трени. На Бг҃ъ гдⷭ҇ь, тропа́рь то́йже."
|
|
},
|
|
{
|
|
"type": "HEADER",
|
|
"value": "По а҃-мъ стїхосло́вїи, сѣда́ленъ, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆ви́лсѧ є҆сѝ дне́сь:"
|
|
},
|
|
{
|
|
"type": "TEXT",
|
|
"value": "Ꙗ҆ви́сѧ въ ѻ҆гнепа́льнѣй кꙋпинѣ̀ на сїна́и, твоегѡ̀, влⷣчце, нетлѣ́ннагѡ рожⷭ҇тва̀ проѻ́бразъ, ꙗ҆́коже бг҃осло́вцы цр҃кве хрⷭ҇то́вой бг҃омꙋ́дреннѡ и҆сповѣ́дꙋютъ: кꙋпина́ бо ѻ҆гне́мъ горѣ́вшаѧ, неѡпа́льна пребыва́ше, та́кѡ и҆ ты̀, ѻ҆́гнь бжⷭ҇тва̀ во чре́вѣ твое́мъ неѡпа́льнѡ носи́ла є҆сѝ, вопло́щшагосѧ ѿ тебѐ бг҃а сло́ва, є҆го́же молѝ спасти́сѧ на́мъ пою́щымъ тѧ̀."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ: то́йже."
|
|
},
|
|
{
|
|
"type": "HEADER",
|
|
"value": "По в҃-мъ стїхосло́вїи, сѣда́ленъ, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Оу҆диви́сѧ:"
|
|
},
|
|
{
|
|
"type": "TEXT",
|
|
"value": "Оу҆диви́сѧ бг҃ови́децъ мѡѷсе́й, ви́дѣвъ кꙋпинꙋ̀ ѻ҆гне́мъ горѧ́щꙋ и҆ несгара́емꙋ, и҆ ᲂу҆страши́сѧ бж҃е́ственнагѡ тайноѧвле́нїѧ, въ не́мъ же благоволѝ гдⷭ҇ь, воплоще́нїѧ своегѡ̀ ѿ дв҃ы неискꙋсомꙋ́жныѧ, проѻ́бразъ мі́рꙋ ꙗ҆ви́ти, ꙗ҆́кѡ въ послѣ̑днѧѧ лѣ̑та, спастѝ хотѧ̀ па́дшее человѣ́чество, пло́ти дебельство́мъ бж҃ества̀ своегѡ̀ сла́вꙋ сокры́етъ, и҆ съ на́ми поживе́тъ, спаса́ѧ дꙋ́шы на́шѧ ѿ поги́бели вѣ́чныѧ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ: то́йже."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ ѕ҃."
|
|
},
|
|
{
|
|
"type": "TEXT",
|
|
"value": "Подо́бенъ: А҆́гг҃льскїѧ си̑лы:"
|
|
},
|
|
{
|
|
"type": "TEXT",
|
|
"value": "А҆́гг҃льскїѧ си̑лы бг҃олѣ́пнѡ тебѣ̀ слꙋ́жатъ, нб҃сѐ и҆ землѝ цр҃и́це бцⷣе, и҆ тво́й прест҃ы́й ѻ҆́бразъ ѡ҆бстоѧ́тъ неви́димѡ: тѣ́хъ бо творца̀ и҆ гдⷭ҇а воплоти́ла є҆сѝ, и҆ на рꙋ́кꙋ твоє́ю, ꙗ҆́кѡ младе́нца, носи́ла є҆сѝ, и҆́же гѡ́рнѧѧ съ до́льними совокꙋпѝ, и҆ а҆́гг҃лы съ человѣ́ки ликовствова́ти ᲂу҆стро́и, пою́щыѧ во гла́сѣхъ ра́дованїѧ твоѐ нетлѣ́нное рожⷭ҇тво̀."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ: то́йже."
|
|
},
|
|
{
|
|
"type": "HEADER",
|
|
"value": "Степє́нна: а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ."
|
|
},
|
|
{
|
|
"type": "TEXT",
|
|
"value": "Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе ѿ лꙋкѝ, зача́ло д҃."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ в҃:"
|
|
},
|
|
{
|
|
"type": "TEXT",
|
|
"value": "Весели́тсѧ дне́сь гора̀ сїна́йскаѧ, и҆ свѣ́тлѡ торжествꙋ́етъ, мт҃ри гдⷭ҇ни свѣтоно́сное пра́зднество соверша́ющи на мѣ́стѣ то́мъ, и҆дѣ́же неѡпали́маѧ кꙋпина̀ вели́кимъ во проро́цѣхъ мѡѷсе́емъ ви́дѣна бы́сть: здѣ́ бо и҆ до ны́нѣ бл҃года́ть бж҃їѧ ѡ҆бита́етъ, и҆ чꙋде́съ мно́жество ꙗ҆влѧ́етъ вѣ̑рнымъ, бл҃гоче́стнѡ бцⷣꙋ въ пѣ́снехъ велича́ющымъ."
|
|
},
|
|
{
|
|
"type": "HEADER",
|
|
"value": "Канѡ́нъ, гла́съ и҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
|
|
},
|
|
{
|
|
"type": "TEXT",
|
|
"value": "Оу҆́мъ помраче́нный мо́й просвѣтѝ, дв҃о, ѻ҆гнено́снымъ сїѧ́нїемъ твоеѧ̀ сла́вы, па́мѧть въ славосло́вїи и҆знемога́ющꙋю ᲂу҆крѣпѝ, и҆ воспламенѝ хла́дное моѐ се́рдце бжⷭ҇твенною любо́вїю, да тебѣ̀, кꙋпинѣ̀ неѡпали́мѣй, пѣ́нїе хвале́бное воспою̀ досто́йнѡ, чи́стаѧ."
|
|
},
|
|
{
|
|
"type": "TEXT",
|
|
"value": "Хра́мъ трисо́лнечнагѡ свѣ́та прекра́сный, ᲂу҆красѝ моѧ̑ чꙋ̑вства, молю́сѧ, да цѣломꙋ́дренною мы́слїю и҆ нескве́рными ᲂу҆сты̀, ѻ҆гнезра́чныѧ і҆кѡ́ны твоеѧ̀ ꙗ҆вле́нїе, воспою̀ досто́йнѡ, чи́стаѧ."
|
|
},
|
|
{
|
|
"type": "TEXT",
|
|
"value": "Сла́ва: Къ твое́й пресвѣ́тлагѡ зра́ка і҆кѡ́нѣ припа́даю ѻ҆каѧ́нный: дꙋ́шꙋ мою̀ ѡ҆зарѝ бл҃года́тнѡ, ꙗ҆вѝ и҆ тѣ́ло нескве́рно, и҆ ѿ лю́тыхъ мѧ̀ недꙋ́гѡвъ свободи́вши, покажѝ прича́стника наслѣ́дїѧ нбⷭ҇нагѡ, бг҃оневѣ́стнаѧ."
|
|
},
|
|
{
|
|
"type": "TEXT",
|
|
"value": "И҆ ны́нѣ: Недꙋ́гꙋюща страстьмѝ многоразли́чными, ѿ і҆кѡ́ны твоеѧ̀ бжⷭ҇твенныѧ и҆сцѣле́нїѧ сподо́би мѧ̀, ѽ бг҃ома́ти влⷣчце, да сла́влю чꙋдеса̀ твоѧ̑, и҆ пою́ тѧ, бл҃ги́хъ вино́внꙋю, вѣ́чнꙋю бл҃гость воплоти́вшꙋю, мі́ра бл҃гꙋ́ю застꙋ́пницꙋ."
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ це́ркве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
|
|
},
|
|
{
|
|
"type": "TEXT",
|
|
"value": "Низложѝ нало́ги бѣсѡ́вскїѧ стꙋжа́ющыѧ мнѣ̀, влⷣчце, го́рдость въ добродѣ́тели, лицемѣ́рїе въ ст҃ости, тщесла́вїе во бдѣ́нїи, высокоꙋ́мїе въ бл҃гоговѣ́нїи, и҆ неблагода́рность въ бл҃годѣѧ́нїихъ сн҃а твоегѡ̀, є҆ди́на всепѣ́таѧ дв҃о."
|
|
},
|
|
{
|
|
"type": "TEXT",
|
|
"value": "Стра́нна мѧ̀ любоче́стїѧ сотворѝ, молю́ тѧ, дв҃о, и҆ чꙋ́жда любопы́тства ѡ҆ человѣ́ческихъ согрѣше́нїихъ, де́рзость и҆ и҆зли́шнее на ми́лость сн҃а твоегѡ̀ ᲂу҆пова́нїе ѿдалѝ ѿ менѐ, да достѡ́йны є҆мꙋ̀ плоды̀ принесꙋ̀, є҆ди́на пречⷭ҇таѧ."
|
|
},
|
|
{
|
|
"type": "TEXT",
|
|
"value": "Сла́ва: Нача́ло ѿ землѝ прїе́мшꙋю хꙋ́дость моегѡ̀ є҆стества̀ познава́ѧ, молю́ тѧ, дв҃о, да́ждь мѝ презрѣ́нїе славолю́бїѧ, бѣ́гство человѣ́ческїѧ хвалы̀, позна́нїе со́бственнагѡ грѣха̀, и҆ со́бственныѧ не́мощи є҆ди́на бг҃облаже́ннаѧ."
|
|
},
|
|
{
|
|
"type": "TEXT",
|
|
"value": "И҆ ны́нѣ: Кра́ткїй всѣ́хъ веще́й и҆ всегѡ̀ мі́ра коне́цъ, сме́ртный ча́съ и҆ мꙋче́нїе бꙋ́дꙋщее за сꙋетꙋ̀ дѣѧ́нїй тщесла́вныхъ, помышлѧ́ти сподо́би мѧ̀, дв҃о: да бл҃года́тїю сн҃а твоегѡ̀ къ пꙋтѝ и҆́стиннагѡ покаѧ́нїѧ наста́вленъ, вѣ́чнагѡ и҆збѣ́гнꙋ проклѧ́тїѧ, пренепоро́чнаѧ."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Вели̑чїѧ твоѧ̑ кто̀ и҆сповѣ́сть, бцⷣе; ꙗ҆вле́нїемъ бо ѻ҆гнезра́чныѧ і҆кѡ́ны твоеѧ̀ возвесели́ла є҆сѝ дꙋ́шы правосла́вныхъ, мнѡ́гїѧ недꙋ́ги є҆́ю врачꙋ́ѧ, ѿ ѻ҆гнѧ́ же и҆ гро́ма защища́ѧ, и҆̀же по бз҃ѣ на тѧ̀ ᲂу҆пова́нїе возлага́ютъ. Ѽ всеми́лостиваѧ влⷣчце, не лишѝ ᲂу҆̀бо и҆ на́съ твоегѡ̀ застꙋпле́нїѧ, спасѝ правосла́вныхъ хрⷭ҇тїа́нъ ѿ всѧ́кагѡ ѕла̀, да тобо́ю хвалѧ́щесѧ, не постыди́мсѧ во вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
|
|
},
|
|
{
|
|
"type": "TEXT",
|
|
"value": "Жестокосе́рдїемъ ѡ҆тѧгче́ннаго мѧ̀ ѡ҆блегчѝ, немилосе́рдїемъ къ тре́бꙋющымъ ѡ҆камене́ннꙋю ᲂу҆тро́бꙋ мою̀ ᲂу҆мѧгчѝ, бꙋ́рею сребролю́бїѧ ѡ҆б̾ѧ́таго мѧ̀ ᲂу҆тишѝ, во ѻ҆гнѝ неѡпали́мыѧ кꙋпины̀ проѡбразова́ннаѧ влⷣчце."
|
|
},
|
|
{
|
|
"type": "TEXT",
|
|
"value": "Во ᲂу҆пова́нїи тлѣ́нныхъ и҆ вре́менныхъ веще́й не ѡ҆ста́ви мѧ̀, и҆ пла́мень хище́нїѧ непра́веднагѡ ᲂу҆гасѝ во мнѣ̀, пла́менемъ ѻ҆гнѧ̀ бжⷭ҇твеннагѡ, неѡпали́маѧ кꙋпино̀ ꙗ҆́вльшаѧсѧ, бг҃оневѣ́стнаѧ влⷣчце."
|
|
},
|
|
{
|
|
"type": "TEXT",
|
|
"value": "Сла́ва: І҆дѡлослꙋже́нїе въ лихоима́нїи, и҆ заблꙋжде́нїе ѿ и҆́стиннагѡ бл҃гоче́стїѧ и҆ правосла́вныѧ вѣ́ры потребѝ ѿ менѐ, влⷣчце, и҆ не попꙋсти́ мѧ па́сти паде́нїемъ є҆реті́ческимъ, да восхвалѧ́ю и҆́мѧ твоѐ бл҃гослове́нное до кончи́ны живота̀ моегѡ̀, въ правосла́вїи непоро́чнѡ, є҆ди́на приснодв҃о."
|
|
},
|
|
{
|
|
"type": "TEXT",
|
|
"value": "И҆ ны́нѣ: Оу҆́мъ мо́й, молю́ тѧ, бцⷣе, бл҃гоꙋстро́й къ позна́нїю вѣ́чныхъ и҆́стинъ хрⷭ҇то́ва є҆ѵⷢ҇лїа, къ разсмотре́нїю тлѣ́нности вре́менныхъ бла̑гъ напра́ви мо́й по́мыслъ, и҆ щедролю́бїе да́рꙋй мѝ неѡскꙋ́дное, да бл҃года́тїю хрⷭ҇то́вою ᲂу҆кра́шенъ, пою́ тѧ, є҆ди́на приснодв҃о."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Ѻ҆́гнь нечистоты̀ и҆ всѧ́кїѧ скве́рны во мнѣ̀ безстꙋ́дномъ, мо́ремъ бл҃гости твоеѧ̀ потопѝ, и҆ мглꙋ̀ грѣхо́внꙋю разженѝ, и҆ се́рдце моѐ ра́дости и҆спо́лни, всенепоро́чнаѧ."
|
|
},
|
|
{
|
|
"type": "TEXT",
|
|
"value": "Срамосло́вїю безѻбра́зномꙋ не да́ждь во мнѣ̀ мѣ́ста, влⷣчце, селе́нїе собла́знѡвъ замѣнѝ въ дꙋшѝ мое́й зрѣ́нїемъ со́бственныхъ грѣхѡ́въ, хра́мъ мѧ̀ чистоты̀ и҆ цѣломꙋ́дрїѧ содѣ́лай, да нескве́рными ᲂу҆сты̀ велича́ю тѧ̀ вы́нꙋ, всенепоро́чнаѧ."
|
|
},
|
|
{
|
|
"type": "TEXT",
|
|
"value": "Сла́ва: Сме́рть, сꙋ́дъ и҆ мꙋчє́нїѧ вѣ̑чнаѧ, грѣ́шникѡмъ ᲂу҆готѡ́ваннаѧ, въ па́мѧти мое́й ᲂу҆глꙋбѝ влⷣчце, да понѐ послѣ̑днѧѧ сїѧ̑ въ па́мѧти содержа̀, лю́таѧ беззакѡ́нїѧ ѡ҆ста́влю, и҆ плоды̀ покаѧ́нїѧ и҆́стиннагѡ принесꙋ̀, велича́ѧ тѧ̀ при́снѡ, є҆ди́но дꙋшѝ моеѧ̀ ᲂу҆пова́нїе."
|
|
},
|
|
{
|
|
"type": "TEXT",
|
|
"value": "И҆ ны́нѣ: Любо́вь сеѧ̀ жи́зни и҆зли́шнюю, и҆ плотска́гѡ поко́ѧ раче́нїе ѿложѝ ѿ менѐ, молю́ тѧ, дв҃о чи́стаѧ: да сꙋ́етныхъ попече́нїй и҆збѣ́гъ, тобо́ю полꙋчꙋ̀ нетлѣ́нное на небесѝ бога́тство, є҆ди́на дꙋшѝ моеѧ̀ покрови́тельнице."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа́ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ."
|
|
},
|
|
{
|
|
"type": "TEXT",
|
|
"value": "Ра́дости сꙋ́етныѧ, къ преѡгорче́нїю бли́жнѧгѡ приводѧ́щїѧ чꙋ́жда мѧ̀ содѣ́лай, кꙋпино̀ неѡпали́маѧ вѣ́рными и҆менꙋ́емаѧ, пречꙋ́днаѧ цр҃и́це: ѡ҆ несча́стїѧхъ и҆́скреннѧгѡ без̾ печа́ли бы́ти не допꙋща́й менѐ, человѣколюби́ваѧ влⷣчце, и҆ памѧтоѕло́бїѧ и҆зба́ви мѧ̀, прилѣ́жнѡ молю́ тѧ, всенепоро́чнаѧ дв҃о."
|
|
},
|
|
{
|
|
"type": "TEXT",
|
|
"value": "За́висти въ по́мыслѣ мое́мъ не да́ждь вкоренѧ́тисѧ, видѣ́нїемъ несгара́емыѧ кꙋпины̀ проѡбразова́ннаѧ мѡѷсе́ю, и҆ ро́ждшаѧсѧ ѿ ко́рене ст҃а, дв҃о, и҆ братоненавидѣ́нїѧ и҆зба́ви мѧ̀, чⷭ҇таѧ: да не ѕло́бою мра́чною ѡ҆скверне́нъ бы́въ, лишꙋ́сѧ бж҃їѧ бл҃года́ти и҆ жи́зни вѣ́чныѧ, всенепоро́чнаѧ влⷣчце."
|
|
},
|
|
{
|
|
"type": "TEXT",
|
|
"value": "Сла́ва: Терпѣ́нїе въ бѣда́хъ ᲂу҆твердѝ во мнѣ̀, всечⷭ҇таѧ, съ ра́дꙋющимисѧ дꙋхо́внꙋю ра́дость, къ сѣ́тꙋющымъ сожалѣ́нїе да́рꙋй мѝ, прест҃а́ѧ, и҆ братолю́бїе низпослѝ мнѣ̀ свы́ше, любвѐ пꙋчи́нꙋ ро́ждшаѧ дв҃о, и҆ любо́вь ве́лїю при́снѡ ꙗ҆влѧ́ющаѧ ро́дꙋ хрⷭ҇тїа́нскомꙋ."
|
|
},
|
|
{
|
|
"type": "TEXT",
|
|
"value": "И҆ ны́нѣ: Жела́нїе кра́йнее согрѣ́й во мнѣ̀, всѧ́комꙋ бли́жнемꙋ ѿ дꙋшѝ бл҃готвори́ти, блага́ѧ, да не ка́кѡ ѕло́бъ лю́тыхъ дꙋша̀ моѧ̀ и҆спо́лнитсѧ, и҆ живо́тъ мо́й а҆́дꙋ прибли́житсѧ, и҆ пре́данъ бꙋ́дꙋ без̾ ми́лости, ꙗ҆́кѡ не сотвори́вый ми́лости, во тмꙋ̀ кромѣ́шнюю, всенепоро́чнаѧ бг҃оневѣ́сто."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃:"
|
|
},
|
|
{
|
|
"type": "TEXT",
|
|
"value": "Пред̾ѡчи́стимъ чꙋ̑вствїѧ дꙋ́шъ и҆ тѣле́съ на́шихъ, да ви́димъ та́инство бж҃е́ственное, ѻ҆бра́знѡ ꙗ҆вле́нное дре́вле вели́комꙋ во проро́цѣхъ мѡѷсе́ю, кꙋпино́ю горѣ́вшею ѻ҆гне́мъ и҆ не сгара́вшею, въ не́йже твоегѡ̀ безсѣ́меннагѡ ржⷭ҇тва̀, бцⷣе, предвозвѣще́нїе и҆сповѣ́дꙋемъ, и҆ бл҃гоговѣ́йнѡ покланѧ́ющесѧ тебѣ̀, и҆ ро́ждшемꙋсѧ ѿ тебє̀ сп҃сꙋ̀ на́шемꙋ, со стра́хомъ вопїе́мъ: Ра́дꙋйсѧ, влⷣчце, покро́ве, и҆ прибѣ́жище, и҆ спасе́нїе дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "І҆́косъ: Прови́дѧ ди́вный мѡѷсе́й въ неѡпали́мѣй кꙋпинѣ̀ на сїна́и, та́йнꙋ ѿ вѣ́ка ᲂу҆тае́ннꙋю, безлѣ́тнагѡ, въ лѣ́тѣ роди́тисѧ восхотѣ́вшагѡ, рожде́нїе ѿ чⷭ҇тыѧ и҆ неискꙋсобра́чныѧ дв҃ы, ᲂу҆́жасомъ содержи́мь вопїѧ́ше: сїѧ̀ землѧ̀ вои́стиннꙋ ст҃а̀ є҆́сть, ꙗ҆́кѡ пло́дъ спаси́тельный мі́рꙋ и҆зъ неѧ̀ произы́детъ, и҆́мже го́ресть паде́нїѧ а҆да́мова ᲂу҆слади́тсѧ. Сегѡ̀ послꙋ́шаѧ и҆ мы̀, та́инства бж҃їѧ собы́тїе позна́вшїи, ᲂу҆бл҃жа́емъ тѧ̀, бцⷣе, возвели́чившꙋю па́дшее человѣ́чество, и҆ милосе́рдїемъ неизрече́ннымъ призрѣва́ющꙋю на ро́дъ хрⷭ҇тїа́нскїй, тѣ́мже и҆ зове́мъ тѝ: ра́дꙋйсѧ, влⷣчце, покро́ве, и҆ прибѣ́жище, и҆ спасе́нїе дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Весе́лїе мїрско́е пресѣцы̀, и҆ дꙋшетлѣ́нное пристра́стїе ᲂу҆мертвѝ во мнѣ̀, дв҃о, презрѣ́нїе вре́менныхъ, жела́нїе вѣ́чныхъ бла̑гъ, и҆ нетлѣ́ннꙋю ра́дость пода́ждь мѝ, съ пою́щими: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Безчи́нное ᲂу҆тѣше́нїе, и҆ и҆зли́шество ᲂу҆́мъ вредѧ́щее, дꙋшѣ̀ скве́рнꙋ ражда́ющее, ѿлꙋчѝ ѿ менѐ, дв҃о, и҆ сподо́би во здра́вїи дꙋше́внѣмъ и҆ тѣле́снѣмъ, дꙋхо́внагѡ ᲂу҆тѣше́нїѧ наслажда́тисѧ, съ пою́щими: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Сла́ва: Грѣхо́мъ, сме́рть лю́тꙋю ражда́ющимъ, ѡ҆скверни́хъ дꙋ́шꙋ мою̀: но ты̀, пречⷭ҇таѧ влⷣчце, ѻ҆гнезра́чнаѧ и҆ неѡпали́маѧ кꙋпино̀ ꙗ҆́вльшисѧ, ти́нꙋ страсте́й мои́хъ и҆зсꙋшѝ ѻ҆гне́мъ бж҃їѧ бл҃года́ти, и҆ наста́ви мѧ̀ на бг҃оꙋго́дное житїѐ, ᲂу҆краси́ же воздержа́нїемъ и҆ цѣломꙋ́дрїемъ, и҆ да́ждь мѝ чи́стымъ се́рдцемъ пѣ́ти: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "И҆ ны́нѣ: Къ твое́й ѻ҆гнезра́чной і҆кѡ́нѣ взира́ѧ, молю́ тѧ, влⷣчце, ѡ҆мраче́ннаго мѧ̀ самолю́бїемъ свѣ́томъ зра́ка твоегѡ̀ просвѣтѝ, и҆ по́хѡти плѡтскі́ѧ ᲂу҆кроти́вши во мнѣ̀, ѻ҆гне́мъ бж҃їѧ любвѐ хла́дное се́рдце моѐ воспламенѝ, да ро́ждшемꙋсѧ ѿ тебѐ досто́йнѡ возмогꙋ̀ пѣ́ти: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Возмꙋще́нїе дꙋшѝ моеѧ̀ ᲂу҆толѝ, всенепоро́чнаѧ, ѿ клеветы̀ навѣ́тꙋющихъ и҆зба́ви мѧ̀, враждꙋ̀ грѣхо́внꙋю во мнѣ̀ ᲂу҆кротѝ, и҆ не́нависть мра́чнꙋю ѿвратѝ ѿ менѐ, дв҃о, да прославлѧ́ю тѧ̀, чⷭ҇таѧ, во вѣ́ки."
|
|
},
|
|
{
|
|
"type": "TEXT",
|
|
"value": "Ѻ҆́гнь ꙗ҆́рости во мнѣ̀ ѕѣлѡ̀ разжже́нный, росо́ю благода́тныѧ моли́твы твоеѧ̀ ᲂу҆гасѝ, хꙋлꙋ̀, ᲂу҆множа́ющꙋю дꙋшѝ мое́й ѡ҆ѕлобле́нїе, и҆ всѧ́кїй ви́дъ ѕло́бы, гнѣздѧ́щїйсѧ въ се́рдцѣ мое́мъ, и҆скоренѝ, дв҃о, да тѧ̀ прославлѧ́ю, чⷭ҇таѧ, во вѣ́ки."
|
|
},
|
|
{
|
|
"type": "TEXT",
|
|
"value": "Сла́ва: Ѻ҆́бразъ хрⷭ҇то́въ є҆ѵⷢ҇льскими добродѣ́тельми напишѝ въ дꙋшѝ мое́й, бг҃облагода́тнаѧ, ᲂу҆крѣпѝ и҆ ᲂу҆тверди́ мѧ во всѧ́комъ дѣ́лѣ благо́мъ, ѿ всѧ́кїѧ же ѕло́бы ѿвратѝ се́рдце моѐ, да ми́рными ᲂу҆сты̀ прославлѧ́ю тѧ̀, чⷭ҇таѧ, во вѣ́ки."
|
|
},
|
|
{
|
|
"type": "TEXT",
|
|
"value": "И҆ ны́нѣ: Кро́ткимъ ѻ҆́комъ твои́мъ ви́ждь моѐ смире́нїе, пренепоро́чнаѧ богоневѣ́сто, и҆ приклонѝ ᲂу҆́хо твоѐ къ моли́твѣ се́рдца моегѡ̀: кро́тостїю и҆ неѕло́бїемъ благоꙋкраси́ мѧ, помраче́ннаго безѻбра́зїемъ ѕло́бныхъ страсте́й, и҆ сотворѝ прича́стника блаже́нства, крѡ́ткимъ ѡ҆бѣтова́ннагѡ, да ра́дꙋѧсѧ прославлѧ́ю тѧ̀ чⷭ҇таѧ, во вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще."
|
|
},
|
|
{
|
|
"type": "TEXT",
|
|
"value": "Скѡ́рби се́рдца моегѡ̀ ᲂу҆тишѝ, ра́досте скорбѧ́щихъ, ᲂу҆ны́нїе дꙋшегꙋби́тельное ѿимѝ ѿ менѐ, ᲂу҆толи́тельнице печа́ли, и҆ лѣ́ность ко взыска́нїю добродѣ́телей и҆скоренѝ во мнѣ̀, взыска́нїе поги́бшихъ, да тебѐ, дв҃о чⷭ҇таѧ, непреста́ннѡ велича́ю."
|
|
},
|
|
{
|
|
"type": "TEXT",
|
|
"value": "Малодꙋ́шїемъ болѣ́знꙋющаго мѧ̀ ѡ҆живѝ, цѣли́тельнице болѧ́щихъ, ѿча́ѧнїемъ па́дшаго мѧ̀ возста́ви, ѻ҆диги́трїе заблꙋ́ждшихъ, грѣха́ми ᲂу҆мерщвле́ннаго мѧ̀ воскресѝ, спорꙋ́чнице грѣ́шныхъ, да тебѐ, дв҃о непоро́чнаѧ, непреста́ннѡ велича́ю."
|
|
},
|
|
{
|
|
"type": "TEXT",
|
|
"value": "Сла́ва: Оу҆се́рдїе во мнѣ̀ твори́ти во́лю бж҃їю возбꙋдѝ, и҆ ре́вность ко сла́вѣ бж҃їей воспламенѝ въ се́рдцѣ мое́мъ, кꙋпино̀ ѻ҆гнезра́чнаѧ и҆ неѡпали́маѧ, и҆ бл҃гоговѣ́йна слꙋжи́телѧ хрⷭ҇то́ва содѣ́лай мѧ̀, дв҃о, предводи́тельнице моегѡ̀ спасе́нїѧ."
|
|
},
|
|
{
|
|
"type": "TEXT",
|
|
"value": "И҆ ны́нѣ: Слеза́ми покаѧ́нїѧ и҆ ᲂу҆миле́нїѧ и҆зсо́хшꙋю, въ зно́и страсте́й дꙋ́шꙋ мою̀ ᲂу҆мѧгчѝ, ꙗ҆́кѡ рꙋно̀ ѡ҆роше́нное гедеѡ́на, и҆ сокрꙋше́нїе къ и҆справле́нїю да́ждь мѝ, дв҃о, да вѣ̑чныѧ бла̑га ᲂу҆наслѣ́дꙋю, и҆ съ ли́ки и҆збра́нныхъ бж҃їихъ воспою́ тѧ, хода́таицꙋ моегѡ̀ спасе́нїѧ."
|
|
},
|
|
{
|
|
"type": "TEXT",
|
|
"value": "Свѣти́ленъ: І҆кѡ́нꙋ твою̀ всечестнꙋ́ю, въ зало́гъ благоволе́нїѧ твоегѡ̀ вѣ̑рнымъ дарова́ла є҆сѝ, влⷣчце, покрыва́ѧ и҆ сохранѧ́ѧ є҆́ю ѿ ѻ҆́гненнагѡ запале́нїѧ на тѧ̀ ᲂу҆пова́ющыѧ: ѽ мт҃и цр҃ѧ̀ хрⷭ҇та̀ бг҃а, бꙋ́ди и҆ на́мъ грѣ̑шнымъ прибѣ́жище спасе́нїѧ въ неча́ѧнныхъ бѣда́хъ, и҆ хода́таица вѣ́чныѧ жи́зни."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Ѽ вели́кїѧ бл҃гости и҆ неисче́тнагѡ милосе́рдїѧ твоегѡ̀, влⷣчце: ᲂу҆дивлѧ́еши на́съ пресла́вными чꙋдесы̀, и҆̀хже и҆сточа́етъ і҆кѡ́на твоѧ̀ ст҃а́ѧ, во ѻ҆́бразѣ неѡпали́мыѧ кꙋпины́ тѧ и҆зѡбразꙋ́ющаѧ, и҆ ѻ҆́гненнагѡ є҆стества̀ си́лꙋ ᲂу҆кроща́ющаѧ си́лою твое́ю бжⷭ҇твенною: ю҆́же съ весе́лїемъ прїе́млюще, тѧ̀ чи́стꙋю бг҃оѻтрокови́цꙋ достодо́лжнѡ пѣ́сньми почита́емъ и҆ ᲂу҆бл҃жа́емъ."
|
|
},
|
|
{
|
|
"type": "TEXT",
|
|
"value": "Ѽ бл҃госе́рдагѡ твоегѡ̀ ѡ҆ на́съ промышле́нїѧ, влⷣчце: въ годи́нꙋ бѣ́дъ и҆ ѡ҆бстоѧ́нїй, є҆гда̀ внеза́пное запале́нїе ѻ҆́гненное ѡ҆бы́метъ жили̑ща на̑ша, чꙋ́днꙋю і҆кѡ́нꙋ твою̀ посыла́еши на́мъ въ по́мощь и҆ защи́тꙋ, и҆ є҆́ю ᲂу҆кроща́еши свирѣ́пство ѻ҆гнѧ̀, ꙗ҆́кѡ мт҃и стїхі́ами ѡ҆блада́ющагѡ влⷣки хрⷭ҇та̀. Тѣ́мже велегла́снѡ проповѣ́дꙋемъ твоѧ̑ чꙋдеса̀, и҆ ми́лость мно́гꙋ къ ро́дꙋ хрⷭ҇тїа́нскомꙋ, и҆ пѣ́сньми хвале́бными немо́лчнѡ тѧ̀ велича́емъ и҆ ᲂу҆бл҃жа́емъ."
|
|
},
|
|
{
|
|
"type": "TEXT",
|
|
"value": "Ѽ пресла́внагѡ чꙋдесѐ: ка́кѡ ѻ҆гнезра́чнаѧ і҆кѡ́на твоѧ̀, влⷣчце, ѻ҆гнѧ̀ си́лꙋ ᲂу҆гаша́етъ, и҆ свѣ́тлыми лꙋча́ми бж҃їѧ бл҃года́ти ᲂу҆мы̀ просвѣща́етъ и҆ сердца̀ весели́тъ: вои́стиннꙋ бо торжество̀ бл҃гоче́стїѧ ꙗ҆вле́нїе і҆кѡ́ны твоеѧ̀ познава́ѧ, пра́зднꙋемъ сїѐ въ пѣ́снехъ дꙋхо́вныхъ ра́достнѡ, и҆ тѧ̀, бг҃облагода́тнаѧ дв҃о, вино́вницꙋ ра́дости на́шеѧ, славословле́нїѧ гла́сы восхвалѧ́емъ и҆ ᲂу҆бл҃жа́емъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ. Гла́съ то́йже:"
|
|
},
|
|
{
|
|
"type": "TEXT",
|
|
"value": "Ѽ чꙋ́до чꙋде́съ, бг҃оневѣ́стнаѧ мт҃и и҆ дв҃о: чꙋдотвори́ти не престае́ши и҆ ны́нѣ і҆кѡ́ною твое́ю пречестно́ю, ѻ҆тра́дꙋ и҆ ᲂу҆тѣше́нїе є҆́ю да́рꙋѧ стра́нникѡмъ земны́мъ, въ ю҆до́ли ско́рби и҆ пла́ча: и҆зъ тебе́ бо воплоти́сѧ ѡ҆бнови́тель па́дшагѡ є҆стества̀ человѣ́ча, сы́й бг҃ъ на́шъ, дарова́вый на́мъ тебѐ въ покро́въ и҆ защи́тꙋ, и҆́же слы́шитъ моли́твꙋ твою̀ за на́съ приноси́мꙋю, и҆ преклонѧ́етсѧ къ моле́нїю твоемꙋ̀ ма́тернемꙋ, є҆гда̀ ᲂу҆молѧ́еши бл҃гость є҆гѡ̀ за лю́ди согрѣши́вшыѧ. Тѣ́мже не преста́й, бл҃госе́рдаѧ влⷣчце, предста́тельствовати за всѧ̑ ны̀, чтꙋ́щыѧ тѧ̀, ꙗ҆́кѡ вои́стиннꙋ є҆сѝ хода́таица непосты́днаѧ на́шегѡ спасе́нїѧ."
|
|
},
|
|
{
|
|
"type": "HEADER",
|
|
"value": "Славосло́вїе вели́кое."
|
|
},
|
|
{
|
|
"type": "HEADER",
|
|
"value": "На лїтꙋргі́и бл҃жє́нна ѿ канѡ́на, пѣ̑сни г҃ и҆ ѕ҃."
|
|
},
|
|
{
|
|
"type": "HEADER",
|
|
"value": "Прокі́менъ, гла́съ г҃, пѣ́снь бцⷣы:"
|
|
},
|
|
{
|
|
"type": "TEXT",
|
|
"value": "Вели́читъ дꙋша̀ моѧ̀ гдⷭ҇а, и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ:"
|
|
},
|
|
{
|
|
"type": "TEXT",
|
|
"value": "Сті́хъ: Ꙗ҆́кѡ призрѣ̀ на смире́нїе рабы̀ своеѧ̀, се́ бо ѿ ны́нѣ ᲂу҆блажа́тъ мѧ̀ всѝ ро́ди."
|
|
},
|
|
{
|
|
"type": "HEADER",
|
|
"value": "А҆пⷭ҇лъ къ фїлїпписі́ємъ, зача́ло с҃м."
|
|
},
|
|
{
|
|
"type": "HEADER",
|
|
"value": "А҆ллилꙋ́їа, гла́съ и҃."
|
|
},
|
|
{
|
|
"type": "TEXT",
|
|
"value": "Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе ѿ лꙋкѝ, зача́ло н҃д."
|
|
},
|
|
{
|
|
"type": "TEXT",
|
|
"value": "Прича́стенъ: Ча́шꙋ спасе́нїѧ прїимꙋ̀, и҆ и҆́мѧ гдⷭ҇не призовꙋ̀."
|
|
},
|
|
{
|
|
"type": "HEADER",
|
|
"value": "Моли́тва:"
|
|
},
|
|
{
|
|
"type": "TEXT",
|
|
"value": "Ѽ прест҃а́ѧ и҆ пребл҃гослове́ннаѧ мт҃и сладча́йшагѡ гдⷭ҇а на́шегѡ і҆и҃са хрⷭ҇та̀: припа́даемъ и҆ покланѧ́емсѧ тебѣ̀ предъ ст҃о́ю и҆ пречестно́ю і҆кѡ́ною твое́ю, є҆́юже ди̑внаѧ и҆ прєсла́внаѧ чꙋдеса̀ содѣва́еши, ѿ ѻ҆́гненнагѡ запале́нїѧ и҆ молнїено́снагѡ гро́ма жили̑ща на̑ша спаса́еши, недꙋ̑жныѧ и҆сцѣлѧ́еши, и҆ всѧ́ко благо́е проше́нїе на́ше во бл҃го и҆сполнѧ́еши. Смире́ннѡ мо́лимъ тѧ̀, всеси́льнаѧ ро́да на́шегѡ застꙋ́пнице, сподо́би на́съ немощны́хъ и҆ грѣ́шныхъ, твоегѡ̀ ма́тернѧгѡ ᲂу҆ча́стїѧ и҆ бл҃гопопече́нїѧ. Спасѝ и҆ сохранѝ, влⷣчце, подъ кро́вомъ ми́лости твоеѧ̀ цр҃ковь ст҃ꙋ́ю, ѻ҆би́тель сїю̀, всю̀ странꙋ̀ на́шꙋ правосла́внꙋю, и҆ всѧ̑ ны̀ припа́дающыѧ къ тебѣ̀ съ вѣ́рою и҆ любо́вїю, и҆ ᲂу҆миле́ннѡ просѧ́щыѧ со слеза́ми твоегѡ̀ застꙋпле́нїѧ. Є҆́й, гпⷭ҇жѐ всеми́лостиваѧ, ᲂу҆милосе́рдисѧ на на́съ, ѡ҆бꙋрева́емыхъ грѣха́ми мно́гими, и҆ не и҆мꙋ́щихъ дерзнове́нїѧ ко хрⷭ҇тꙋ̀ гдⷭ҇ꙋ, проси́ти є҆го̀ ѡ҆ поми́лованїи и҆ проще́нїи: но тебѐ предлага́емъ къ немꙋ̀ на ᲂу҆моле́нїе, ма́терь є҆гѡ̀ по пло́ти: ты́ же, всебл҃га́ѧ, прострѝ къ немꙋ̀ бг҃опрїи́мнїи рꙋ́цѣ твоѝ, и҆ предста́тельствꙋй за на́съ предъ бла́гостїю є҆гѡ̀, просѧ̀ на́мъ проще́нїѧ прегрѣше́нїй на́шихъ, бл҃гоче́стнагѡ ми́рнагѡ житїѧ̀, благі́ѧ хрⷭ҇тїа́нскїѧ кончи́ны, и҆ до́брагѡ ѿвѣ́та на стра́шнѣмъ сꙋдѣ̀ є҆гѡ̀. Наипа́че же въ ча́съ гро́знагѡ посѣще́нїѧ бж҃їѧ, є҆гда̀ ѻ҆гне́мъ возгорѧ́тсѧ до́мы на́шѧ, и҆лѝ молнїено́снымъ гро́момъ ᲂу҆страша́еми бꙋ́демъ, ꙗ҆вѝ на́мъ ми́лостивное твоѐ застꙋпле́нїе и҆ держа́вное вспоможе́нїе: да спаса́еми всеси́льными твои́ми ко гдⷭ҇ꙋ моли́твами, вре́меннагѡ наказа́нїѧ бж҃їѧ здѣ̀ и҆збѣ́гнемъ, вѣ́чное же бл҃же́нство ра́йское та́мѡ ᲂу҆наслѣ́дꙋемъ, и҆ со всѣ́ми ст҃ы́ми воспое́мъ пречестно́е и҆ великолѣ́пое и҆́мѧ поклонѧ́емыѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, и҆ твоѐ ве́лїе къ на́мъ милосе́рдїе, во вѣ́ки вѣкѡ́въ, а҆ми́нь."
|
|
}
|
|
] |