ponomar-pwa/static/data/shared/menaion-daily/09-09/1.json

[
 {
  "type": "HEADER",
  "value": "Септе́мврїа ѳ҃"
 },
 {
  "type": "HEADER",
  "value": "Ст҃ы́хъ и҆ пра́ведныхъ бг҃оѻтє́цъ і҆ѡакі́ма и҆ а҆́нны:"
 },
 {
  "type": "HEADER",
  "value": "И҆ ст҃а́гѡ мч҃ника севирїа́на:"
 },
 {
  "type": "HEADER",
  "value": "На Гдⷭ҇и, воззва́хъ: стїхи̑ры пра́здника, г҃, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "І҆ѡакі́мъ и҆ а҆́нна торжествꙋ́ютъ, нача́токъ ро́ждше на́шегѡ спасе́нїѧ, є҆ди́нꙋ бцⷣꙋ: съ ни́миже и҆ мы̀ пра́зднꙋемъ дне́сь, ѿ ко́рене ѻ҆́нагѡ і҆ессе́ева, блажа́ще дв҃ꙋ чⷭ҇тꙋю."
 },
 {
  "type": "TEXT",
  "value": "Бг҃овмѣсти́маѧ ѻ҆трокови́ца, и҆ бцⷣа чⷭ҇таѧ, прⷪ҇ро́кѡвъ сла́ва, дв҃дова дщѝ, дне́сь ражда́етсѧ ѿ і҆ѡакі́ма и҆ а҆́нны цѣломꙋ́дренныѧ: и҆ а҆да́мова клѧ́тва ꙗ҆́же на на́съ, потреблѧ́етсѧ ржⷭ҇тво́мъ є҆ѧ̀."
 },
 {
  "type": "TEXT",
  "value": "Ꙗ҆́же пре́жде непло́днаѧ страна̀, зе́млю плодоно́снꙋ ражда́етъ: и҆ ѿ непло́дныѧ ᲂу҆тро́бы пло́дъ свѧ́тъ да́вши, млеко́мъ пита́етсѧ. Чꙋ́до стра́шно! Пита́тельница жи́зни на́шеѧ, ꙗ҆́же нбⷭ҇ный хлѣ́бъ во чре́вѣ прїе́мши, млеко́мъ ѿ сосцꙋ̑ пита́етсѧ."
 },
 {
  "type": "HEADER",
  "value": "И҆́ны стїхи̑ры, ст҃ы́хъ, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Прїиди́те, ны́нѣ ликꙋ́имъ пѣ́сненнѡ, ѽ празднолю́бцы. И҆ вѣ́рнѡ пра́зднꙋимъ, па́мѧть почита́юще і҆ѡакі́ма и҆ а҆́нны честны́ѧ дво́ицы: ті́и бо роди́ша на́мъ бг҃ома́терь, и҆ дв҃ꙋ чⷭ҇тꙋю. Тѣ́мже и҆ преста́вишасѧ ѿ привре́менныхъ къ нетлѣ̑ннымъ, и҆ присноживы̑мъ жили́щємъ, молѧ́щесѧ спасти́сѧ на́мъ."
 },
 {
  "type": "TEXT",
  "value": "Ве́селѡ красꙋ́етсѧ тва́рь всѧ̀ дне́сь, бцⷣе всепѣ́таѧ, лѣ́тнюю приносѧ́щи па́мѧть є҆диномꙋ́дреннѡ, твои́хъ роди́телей, і҆ѡакі́ма чꙋ́днагѡ, кꙋ́пнѡ и҆ а҆́нны торжествꙋ́ющи: ра́дость бо и҆схода́тайствоваша, тѧ̀ па́че наде́жды и҆зрасти́вше, свѣ́тъ ѡ҆блиста́вшꙋю, и҆ пита́тельницꙋ жи́зни на́шеѧ."
 },
 {
  "type": "TEXT",
  "value": "Ра́дꙋетсѧ дне́сь а҆́нна и҆гра́ющи дꙋ́хомъ, и҆ весели́тсѧ ра́дꙋющисѧ, ᲂу҆лꙋчи́вши жела́нїе, є҆гѡ́же жела́ше дре́вле благоча́дїѧ: ѡ҆бѣща́нїѧ бо пло́дъ и҆ бл҃гослове́нїѧ бжⷭ҇твенный прозѧбѐ, марі́ю всенепоро́чнꙋю, бг҃а на́шего ро́ждшꙋю, и҆ сл҃нце возсїѧ́вшꙋю, во тмѣ̀ спѧ́щымъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ є҃. Є҆фре́ма карі́а:"
 },
 {
  "type": "TEXT",
  "value": "Ѽ бл҃же́ннаѧ дво́ица, вы̀ всѣ́хъ роди́телей превзыдо́сте, ꙗ҆́кѡ тва́ри всеѧ̀ преимꙋ́щꙋю прозѧблѝ є҆стѐ. И҆́стиннѡ бл҃же́нъ є҆сѝ і҆ѡакі́ме, таковы̀ ѻ҆трокови́цы бы́въ роди́тель. Бл҃же́нна ложесна̀ твоѧ̑ а҆́нно, ꙗ҆́кѡ мт҃рь жи́зни на́шеѧ прозѧбла̀ є҆сѝ. Бл҃же́нни сосцы̀, и҆́миже воздои́ла є҆сѝ, млеко́мъ пита́вшꙋю, пита́ющаго всѧ́кое дыха́нїе, є҆го́же моли́ти ва́мъ всебл҃же́ннїи мо́лимсѧ, поми́ловатисѧ дꙋша́мъ на́шымъ."
 },
 {
  "type": "HEADER",
  "value": "(Зрѝ) А҆́ще ли слꙋчи́тсѧ въ пѧто́къ ве́чера: Сла́ва, пра́здника: И҆ ны́нѣ, бг҃оро́диченъ пе́рвый гла́са настоѧ́щагѡ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "А҆́нна бг҃омꙋ́дренна и҆́стиною, гнѣздо̀ пти́че ви́дѣвши на дре́вѣ пре́жде, своѐ безча́дїе помѧнꙋ́вши, вопїѧ́ше: ᲂу҆вы̀ мнѣ̀ гдⷭ҇и, гдⷭ҇и, а҆́зъ грѣ́шна є҆ди́на ѡ҆бнища́хъ плодотворе́нїѧ ѿ тебє̀. Тогда̀ чл҃вѣколю́бецъ бг҃ъ, пло́дъ є҆́й дв҃ꙋ, честнѣ́йшꙋю всеѧ̀ тва́ри, дадѐ."
 },
 {
  "type": "TEXT",
  "value": "Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ."
 },
 {
  "type": "TEXT",
  "value": "А҆́нна бг҃омꙋ́дренна вои́стиннꙋ, безча́дное болѣ́нїе непло́дїю познава́ше пе́рвѣе, тѣ́мже молѧ́щисѧ, вопїѧ́ше къ бг҃ꙋ: печа́льнꙋ и҆ непло́днꙋ ᲂу҆́зꙋ разрѣшѝ: и҆ рождꙋ̀ ст҃о́е роди́ти тѧ̀ и҆мꙋ́щꙋю сло́во, є҆́же влⷣко хрⷭ҇тѐ жизнода́телю да́рꙋеши є҆́й: роди́тъ бо тѧ̀ сп҃са всѣ̑мъ человѣ́кѡмъ."
 },
 {
  "type": "TEXT",
  "value": "Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи."
 },
 {
  "type": "TEXT",
  "value": "И҆́стиннѡ влⷣка и҆ бг҃ъ же твою̀ моли́твꙋ ᲂу҆слы́шавъ, ꙗ҆́кѡ са́рринꙋ пре́жде, внегда̀ ᲂу҆слы́ша а҆́гг҃ловъ гла́съ, ра́дость тебѣ̀ проповѣ́дающь: бж҃їю мт҃рь роди́ши. И҆ возопи́ла є҆сѝ весе́лїемъ дꙋшѝ: влⷣка и҆ гдⷭ҇ь, бг҃ъ мо́й и҆ творе́цъ, и҆́стиною мнѣ̀ ѡ҆ста́ви ᲂу҆коре́нїе ро́ждшей приснодв҃ꙋ."
 },
 {
  "type": "HEADER",
  "value": "Сла́ва, и҆ ны́нѣ, гла́съ и҃:"
 },
 {
  "type": "TEXT",
  "value": "И҆̀же и҆зъ непло́дныхъ ложе́снъ, же́злъ ст҃ꙋ́ю бцⷣꙋ и҆зрасти́вше, и҆зъ неѧ́же спасе́нїе мі́рꙋ возсїѧ̀ хрⷭ҇то́съ бг҃ъ, сопрꙋ́гъ свѧ́тъ, и҆ сожи́тельство свѧ́то, і҆ѡакі́мъ и҆ а҆́нна: ті́и преста́вльшесѧ къ нбⷭ҇нымъ селе́нїємъ, съ свое́ю дще́рїю пречⷭ҇тою дв҃ою, со а҆́гг҃лы ликꙋ́ютъ ѡ҆ мі́рѣ моли̑твы творѧ́ще. Съ ни́миже и҆ мы̀ соше́дшесѧ благоче́стнѡ, воспѣва́юще глаго́лемъ: и҆̀же бг҃оѻтрокови́цею и҆ пречⷭ҇тою марі́ею, прароди́телє хрⷭ҇то́вы наре́кшесѧ, моли́тесѧ ѡ҆ дꙋша́хъ на́шихъ."
 },
 {
  "type": "HEADER",
  "value": "Тропа́рь ст҃ы́хъ, гла́съ в҃:"
 },
 {
  "type": "TEXT",
  "value": "Пра́ведныхъ твои́хъ гдⷭ҇и, па́мѧть пра́зднꙋюще, тѣ́ми мо́лимъ тѧ̀, спасѝ дꙋ́шы на́шѧ."
 },
 {
  "type": "HEADER",
  "value": "И҆лѝ се́й, гла́съ а҃:"
 },
 {
  "type": "TEXT",
  "value": "И҆̀же въ зако́ннѣй бл҃года́ти пра́ведни бы́вше, младе́нца бг҃ода́ннаго породи́ша на́мъ, і҆ѡакі́мъ и҆ а҆́нна. Тѣ́мже дне́сь свѣ́тлѡ торжествꙋ́етъ ве́селѡ пра́зднꙋющи бжⷭ҇твеннаѧ цр҃ковь, честнꙋ́ю ва́шꙋ па́мѧть, сла́вѧщи бг҃а, воздви́гшаго ро́гъ спасе́нїѧ на́мъ въ домꙋ̀ дв҃довѣ."
 },
 {
  "type": "HEADER",
  "value": "Сла́ва, и҆ ны́нѣ, пра́здника:"
 },
 {
  "type": "TEXT",
  "value": "Ржⷭ҇тво̀ твоѐ бцⷣе дв҃о, ра́дость возвѣстѝ все́й вселе́ннѣй: и҆зъ тебє́ бо возсїѧ̀ сл҃нце пра́вды, хрⷭ҇то́съ бг҃ъ на́шъ, и҆ разрꙋши́въ клѧ́твꙋ, дадѐ благослове́нїе, и҆ ᲂу҆праздни́въ сме́рть, дарова̀ на́мъ живо́тъ вѣ́чный."
 },
 {
  "type": "HEADER",
  "value": "Слꙋ́жба мꙋ́ченика пое́тсѧ на повече́рїи."
 },
 {
  "type": "HEADER",
  "value": "Канѡ́нъ. Гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Ѡ҆держа́ше велѣ́нїе нечести́вое, жре́ти і҆́дѡлѡмъ бездꙋ̑шнымъ же и҆ глꙋхи̑мъ: побѣжда́ше же хрⷭ҇то́съ. Мч҃ническими крѣ́пкими и҆ до́блими противлє́нїи."
 },
 {
  "type": "TEXT",
  "value": "Свобожда́ше ѿ ᲂу҆́зъ ѿмета́ющыѧсѧ хрⷭ҇та̀, и҆ всѧ̑, ꙗ҆̀же ѡ҆брѣ́те чтꙋ́щыѧ того̀ бг҃а, всѧ́чески начина́ше мꙋ́чити: но прилꙋ́чсѧ тебѣ̀, бг҃омꙋ́дре, посрами́сѧ."
 },
 {
  "type": "TEXT",
  "value": "Оу҆диви́лъ є҆сѝ мч҃ниче ѕлочести́ваго, до́блественнѣ ᲂу҆стреми́всѧ на сꙋди́щи: и҆ богѡ́въ ло́жныхъ ѡ҆бличи́лъ є҆сѝ со дерзнове́нїемъ не́мощь и҆ гни́лость, и҆ некрѣ́пость."
 },
 {
  "type": "TEXT",
  "value": "Бг҃оро́диченъ: Вмѣсти́ла є҆сѝ є҆ди́на, нб҃сы̀ невмѣсти́маго, ѻ҆трокови́це, во ᲂу҆тро́бѣ твое́й, бг҃олѣ́пнѣ все́льшагосѧ въ тѧ̀, и҆ є҆стество̀ человѣ́ческое ѿ тебє̀ прїе́мшаго."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Ра́довалсѧ є҆сѝ бїе́мь за хрⷭ҇та̀ мꙋ́дре, ра́нами неми́лостивнѡ: и҆мѣ́лъ є҆си́ бо и҆звѣ́стное болѣ́зней воздаѧ́нїе."
 },
 {
  "type": "TEXT",
  "value": "Жи́лами ссѣка́емь, и҆змѣне́нїемъ ча́стымъ, сла́вне, мꙋчи́телей, и҆ сїѐ ꙗ҆́коже въ чꙋжде́мъ тѣлесѝ не ѡ҆щꙋща́лъ є҆сѝ."
 },
 {
  "type": "TEXT",
  "value": "Ѡ҆брѣ́лъ є҆сѝ возме́здїе ѿ хрⷭ҇та̀, мꙋ́дре, вѣне́цъ прїе́мъ пра́вды, и҆ ра́дость несконча́емꙋю."
 },
 {
  "type": "TEXT",
  "value": "Бг҃оро́диченъ: Всѧ̀ бли́жнѧѧ моѧ̀, добра̀ и҆ непоро́чна бы́сть, тѧ̀ прови́дѧ дре́вле вопїѧ́ше соломѡ́нъ въ пѣ́снехъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Ласка̑нїи мꙋчи́тель твою̀ ᲂу҆мѧгчи́ти, мч҃ниче, крѣ́пость, и҆ побѣди́ти тѧ̀ надѣ́ѧсѧ, не́бо стрѣлѧ́ти мнѧ́ше."
 },
 {
  "type": "TEXT",
  "value": "Не чꙋ́вствꙋеши, безꙋ́мне, хрⷭ҇то́вꙋ си́лꙋ ᲂу҆крѣплѧ́ющꙋ мѧ̀, проти́вꙋ болѣ́знємъ и҆ трꙋдѡ́мъ, мꙋчи́телю взыва́лъ є҆сѝ, пресла́вне."
 },
 {
  "type": "TEXT",
  "value": "А҆́ще не бы̀ си́ла свы́ше пода́ннаѧ мнѣ̀, мꙋчи́телю взыва́ше севирїа́нъ, ка́кѡ ᲂу҆́бѡ бы́хъ мо́глъ, пло́ть сы́й, претерпѣ́ти ѿсѣчє́нїѧ ᲂу҆де́съ;"
 },
 {
  "type": "TEXT",
  "value": "Бг҃оро́диченъ: Прест҃а́ѧ бг҃оневѣ́сто, да́ждь мѝ по́мощь мольба́ми твои́ми, и҆зба́витисѧ льсти́вагѡ, да тѧ̀ сла́влю наде́ждꙋ мою̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы."
 },
 {
  "type": "TEXT",
  "value": "На дре́во воздви́женъ бы́лъ є҆сѝ, сла́вне, и҆ по тѣ́лꙋ стро́ганъ ногтьмѝ, за всѣ́хъ влⷣчествꙋющаго."
 },
 {
  "type": "TEXT",
  "value": "Бж҃е мо́й, вопїѧ́лъ є҆сѝ, ᲂу҆крѣпѝ по́двигъ се́й сконча́ти мнѣ̀ мꙋче́нїѧ, стрꙋ́жемꙋ."
 },
 {
  "type": "TEXT",
  "value": "Ꙗ҆́кѡ ви́дѣ тѧ̀ мꙋчи́тель, сла́вне, неѡсла́бне, мꙋ̑ки терпѧ́ще, ᲂу҆жасе́сѧ ѻ҆каѧ́нный."
 },
 {
  "type": "TEXT",
  "value": "Бг҃оро́диченъ: Наде́жда и҆ предста́тельнице, и҆ покро́ве мо́й бцⷣе, спаса́й мольба́ми твои́ми ѿ собла̑знъ ѕмїи́ныхъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ."
 },
 {
  "type": "TEXT",
  "value": "Въ темни́цѣ тѧ̀ заключѝ лю́тый, и҆ гла́домъ понꙋ́ди тѧ̀ ѿврещи́сѧ хрⷭ҇та̀, є҆го́же возлюби́лъ є҆сѝ, бл҃же́нне, ѿ ю҆́ности."
 },
 {
  "type": "TEXT",
  "value": "Ведо́мъ, мꙋ́дре, въ темни́цꙋ, всѧ̑ зрѧ́щыѧ тѧ̀, хрⷭ҇та̀ не ѿстꙋпи́ти, со дерзнове́нїемъ ᲂу҆чѧ̀, нака́зовалъ є҆сѝ."
 },
 {
  "type": "TEXT",
  "value": "Мече́мъ ᲂу҆сѣщи́ тѧ, мч҃нче, лю́тый и҆ безꙋ́мный мꙋчи́тель повелѣ̀, не поже́рша і҆́дѡлѡмъ, но ты̀ небре́глъ є҆сѝ."
 },
 {
  "type": "TEXT",
  "value": "Бг҃оро́диченъ: Въ ри́зꙋ мѝ ѡ҆блещи́сѧ свѣ́та, твои́ми моли́твами сотворѝ, бг҃оневѣ́сто влⷣчце, въ де́нь сꙋ́дный, пою́ща тѧ̀."
 },
 {
  "type": "HEADER",
  "value": "Сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ли́къ а҆́гг҃льскїй:"
 },
 {
  "type": "TEXT",
  "value": "До́блестїю дꙋшѝ воѡрꙋже́нъ, бг҃омꙋ́дре, и҆зда́лъ є҆сѝ себѐ къ разли̑чнымъ мꙋ́камъ, любо́вїю распала́емь влⷣки, пребога́те. Тѣ́мъ ѡ҆бличи́лъ є҆сѝ мꙋчи́телей неи́стовство, и҆ вѣне́цъ ѿ бг҃а прїѧ́лъ є҆сѝ побѣ́ды нетлѣ́нный."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ нача́лѣ зе́млю ѡ҆снова́вый, и҆ небеса̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ка́менїемъ ѻ҆́стрымъ ᲂу҆ста̀ твоѧ̑ сокрꙋшѝ нечести́вый, проповѣ́дающа со дерзнове́нїемъ хрⷭ҇та̀ посредѣ̀ пребеззако́нникѡвъ. Є҆гѡ́же сла́вы полꙋчи́въ, ны́нѣ ликꙋ́еши та́мѡ."
 },
 {
  "type": "TEXT",
  "value": "Повѣ́шенъ на стѣнѣ̀ страстоте́рпче, мꙋчи́телѧ мно́гимъ гнѣ́вомъ, къ ка́мени тѧ́жкꙋ привѧ́занъ, не ѿве́рглсѧ є҆сѝ хрⷭ҇та̀, ѻ҆тцє́въ бг҃а препросла́вленна."
 },
 {
  "type": "TEXT",
  "value": "Ѽ тве́рдагѡ противле́нїѧ твоегѡ̀ бл҃же́нне! Ѽ те́плыѧ любвѐ къ зижди́телю! Є҆ѧ́же ра́ди вѣнце́мъ ᲂу҆краси́ тѧ нетлѣ́ннымъ, до́брѣ пострада́вша."
 },
 {
  "type": "TEXT",
  "value": "Бг҃оро́диченъ: Ты̀ мо́й є҆сѝ свѣ́тъ, дв҃о бцⷣе, ты̀ є҆сѝ ра́дость и҆ покро́въ, и҆ приста́нище моѐ бл҃гослове́ннаѧ, и҆ тѧ̀ сла́влю, ꙗ҆́кѡ ро́ждшꙋю бг҃а ѻ҆тцє́въ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Претерпѣ́лъ є҆сѝ ра̑ны до конца̀, во́ине хрⷭ҇то́въ, и҆ преста́вилсѧ є҆сѝ ра́дꙋѧсѧ къ вы́шнемꙋ, пребл҃же́нне, црⷭ҇твїю."
 },
 {
  "type": "TEXT",
  "value": "Не посрами́лсѧ є҆сѝ хрⷭ҇та̀ ра́ди, доблемꙋ́дренне, претерпѣ́въ мꙋ̑ки разли̑чныѧ: тѣ́мже и҆ просла́вилсѧ є҆сѝ во всѧ̑ вѣ́ки."
 },
 {
  "type": "TEXT",
  "value": "Вѣнцено́сецъ со страда́льцы ны́нѣ ликꙋ́ѧ и҆́стиннѡ ѡ҆крꙋ́гъ цр҃ѧ̀, помина́й вѣ́рою твою̀ па́мѧть творѧ́щихъ."
 },
 {
  "type": "TEXT",
  "value": "Бг҃оро́диченъ: Бг҃ороди́тельнице, хрⷭ҇тїа́нъ предста́тельнице, и҆зми́ ны всѧ́кїѧ нꙋ́жды, да тѧ̀ пое́мъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще."
 },
 {
  "type": "TEXT",
  "value": "Рꙋка́ми тебѐ лю́бѧщихъ, бл҃же́нне, твоѐ тѣ́ло ѡ҆прѧ́тано погребе́сѧ, ꙗ҆́кѡ ст҃о, и҆ и҆сцѣле́нїй и҆сточа́етъ стрꙋи̑, въ сла́вꙋ бж҃їю."
 },
 {
  "type": "TEXT",
  "value": "Ѽ чꙋ́до, ка́кѡ воста̀ ᲂу҆ме́рый ѻ҆́трокъ, и҆ срѣта́ше твоѐ тѣ́ло на пꙋтѝ, къ погребе́нїю несо́мо, мꙋ́чениче всечꙋ́дне."
 },
 {
  "type": "TEXT",
  "value": "Полꙋчи́въ вѣ́чное, бл҃же́нне, ца́рство, и҆ влⷣцѣ че́стнѣ предстоѧ̀, ѡ҆ пою́щихъ тѧ̀ те́плѣ моли́сѧ."
 },
 {
  "type": "TEXT",
  "value": "Бг҃оро́диченъ: Диви́шасѧ а҆́гг҃лѡвъ чинонача̑лїѧ, воплоще́нна зрѧ́ще, тѧ̀ носѧ́щꙋю творца̀ вѣкѡ́въ приснодв҃ꙋ."
 },
 {
  "type": "HEADER",
  "value": "Стїхи̑ры, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Жи́лами ссѣка́емь, хрⷭ҇та̀ ра́ди сла́вне, и҆ на дре́вѣ повѣ́шенъ, и҆ пло́тїю стрꙋ́жемь неми́лостивнѡ бичмѝ, жре́ти же і҆́дѡлѡмъ повелѣва́емь мꙋ́дре, не ѿве́рглсѧ є҆сѝ всѣ́хъ гдⷭ҇а: но ѡ҆бличи́лъ є҆сѝ болѣ́зньми твои́ми не́мощь и҆ хꙋ́дость і҆́дѡльскꙋю, и҆ бы́лъ є҆сѝ а҆́гг҃лѡвъ собесѣ́дникъ."
 },
 {
  "type": "TEXT",
  "value": "Ра́дꙋѧсѧ ѿлꙋчи́лсѧ є҆сѝ къ по́двигꙋ, ꙗ҆́кѡ зако́нный страда́лецъ досточꙋ́дне, до́блимъ смы́сломъ, ѡ҆ мꙋ́кахъ мч҃ниче неради́въ, сме́ртїю же хрⷭ҇тꙋ̀ ᲂу҆подо́битисѧ тща́сѧ, чꙋ́дне. Тѣ́мъ тѧ̀ вѣнце́мъ црⷭ҇твїѧ ᲂу҆красѝ і҆и҃съ чл҃вѣколю́бецъ, и҆ сп҃съ дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ то́йже:"
 },
 {
  "type": "TEXT",
  "value": "Оу҆́зникъ ведо́мъ, и҆ ꙗ҆́звами красѧ́сѧ, зрѧ́щымъ повелѣва́лъ є҆сѝ подо́битисѧ нра́вꙋ твоемꙋ̀, къ нбⷭ҇нымъ, бл҃же́нне, воздаѧ́нїємъ смотрѧ́щымъ, ꙗ҆̀же мно́го весе́лїе и҆ красотꙋ̀ подаю́тъ, ꙗ҆́кѡ нетлѣ̑ннаѧ, и҆ во вѣ́ки пребыва̑ющаѧ, въ ни́хъ пребыва́ющыѧ творѧ́ще наслѣ́дники дх҃омъ."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "TEXT",
  "value": "Дне́сь и҆злїѧ́сѧ бжⷭ҇твенное бога́тство бл҃года́ти влⷣки, во всѧ̑ мі́ра концы̀, ѿ и҆сто́чника непло́дныѧ, дарова̑нїѧ и҆сточа́ющагѡ и҆́стиннѡ, и҆ возвѣща́ющагѡ сегѡ̀ происхожде́нїе, любо́вїю ржⷭ҇тво̀ є҆ѧ̀ чтꙋ́щымъ, и҆ вопїю́щымъ: і҆и҃се всеси́льне, ты̀ є҆сѝ сп҃съ дꙋ́шъ на́шихъ."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь: тропа́рь пра́здника, два́жды."
 },
 {
  "type": "HEADER",
  "value": "Сла́ва, бг҃оѻтцє́въ. И҆ ны́нѣ, пра́здника."
 },
 {
  "type": "HEADER",
  "value": "По а҃-мъ стїхосло́вїи сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Дв҃а дне́сь и҆ бцⷣа марі́а, черто́гъ неразори́мый нбⷭ҇нагѡ жениха̀, ражда́етсѧ ѿ непло́дныѧ а҆́нны бж҃їею во́лею, носи́ло бж҃їѧ сло́ва ᲂу҆гото́вльшисѧ: въ сїе́ бо предповелѣ́сѧ бы́ти ѻ҆трокови́ца, и҆ мт҃и сꙋ́щаѧ жи́зни."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "По в҃-мъ стїхосло́вїи сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Дв҃де, ꙗ҆̀же клѧ́тсѧ тебѣ̀ дре́вле пома́завый тѧ̀, пло́дъ ѿ чресла̀ твоегѡ̀ на престо́лѣ твое́мъ и҆спо́лни, да́лъ марі́ю. Зри́ши бо ю҆́же ѿ а҆́нны і҆ꙋ́довы, и҆ ра́дꙋешисѧ: и҆зъ неѧ́же хрⷭ҇то́съ воплоти́сѧ, сп҃съ всѧ́ческихъ, безмѣ́рною бл҃гостїю спаса́ѧ ро́дъ на́шъ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "Канѡ́нъ пра́здника, со і҆рмосо́мъ на ѕ҃: и҆ ст҃ы́хъ на ѕ҃ же. Канѡ́нъ пра́здника. Гла́съ в҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ."
 },
 {
  "type": "TEXT",
  "value": "Грѧди́те вѣ́рнїи, дх҃омъ бжⷭ҇твеннымъ ра́дꙋющесѧ, ю҆́же ѿ непло́дове дне́сь прише́дшꙋю, человѣ́кѡвъ на спасе́нїе, приснодв҃ꙋ ѻ҆трокови́цꙋ пѣ́сньми почти́мъ."
 },
 {
  "type": "TEXT",
  "value": "Ра́дꙋйсѧ, чⷭ҇таѧ, мт҃и и҆ рабо̀ хрⷭ҇та̀ бг҃а, ꙗ҆́же пе́рвомꙋ хода́таица бл҃же́нствꙋ: человѣ́ческїй ро́дъ тѧ̀, всѝ досто́йнѡ пѣ́сньми сла́вимъ."
 },
 {
  "type": "TEXT",
  "value": "Жи́зни ражда́етсѧ дне́сь мо́стъ, и҆́мже человѣ́цы воззва́нїе паде́нїѧ, є҆́же ѿ а҆́да, ѡ҆брѣ́тшїи, хрⷭ҇та̀ жизнода́вца пѣ́сньми прославлѧ́ютъ."
 },
 {
  "type": "HEADER",
  "value": "И҆́нъ канѡ́нъ ст҃ы́хъ, гла́съ в҃, є҆гѡ́же краегране́сїе:"
 },
 {
  "type": "TEXT",
  "value": "Твоѧ̑ роди́тєли, всечⷭ҇таѧ, пою̀ цѣломꙋ́дреннѡ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "Свѣщꙋ̀ мы́сленное сл҃нце возблиста́вшꙋю, пло́тїю ѿ неѧ̀ возсїѧ́вшее, добродѣ́телей свѣ́тлостьми просїѧва́юще, роди́ти сподо́бистесѧ, а҆́нно бг҃омꙋ́драѧ, и҆ і҆ѡакі́мъ приснобл҃же́нный."
 },
 {
  "type": "TEXT",
  "value": "Всеѻбра́знымъ зрѣ́нїемъ къ бг҃ꙋ, и҆́стиннѡ бг҃опрїѧ́тный і҆ѡакі́мъ и҆ а҆́нна бжⷭ҇твеннаѧ, неꙋкло́ннѡ молѧ́щесѧ, пречⷭ҇тꙋю бцⷣꙋ роди́ша, пребо́льшꙋю всеѧ̀ тва́ри свѧ́тостїю."
 },
 {
  "type": "TEXT",
  "value": "Превысокꙋ̀ и҆мꙋ́ще жи́знь, житїѧ́ же свѣ́тлость, всѣ́хъ вкꙋ́пѣ роди́телей бы́сте земны́хъ превы́шшїи, нетлѣ́ннꙋ дв҃ꙋ ꙗ҆́кѡ роди́вше, и҆ бг҃оѻтцы̀ и҆́стиннѡ тоѧ̀ ра́ди бы́вше."
 },
 {
  "type": "TEXT",
  "value": "Бг҃оро́диченъ: Спасе́нїѧ всегѡ̀ нача́льницы, бл҃же́ннѣйшїй і҆ѡакі́мъ, и҆ а҆́нна сла́внаѧ, чⷭ҇тꙋю и҆ непоро́чнꙋю, и҆ пречⷭ҇тꙋю бцⷣꙋ роди́ша, бг҃оче́стїѧ сїю̀ прїе́мше воздаѧ́нїе."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀."
 },
 {
  "type": "TEXT",
  "value": "Непоро́чнѡ бг҃ꙋ пожи́вшїи, всѣ́хъ роди́сте спасе́нїе, бг҃омꙋ́дрїи роди́телє зижди́телѧ ро́ждшїѧ и҆ бг҃а на́шегѡ."
 },
 {
  "type": "TEXT",
  "value": "Всѣ̑мъ жи́знь и҆сточа́ѧй гдⷭ҇ь, ѿ непло́дове произведѐ дв҃ꙋ, въ ню́же всели́тисѧ и҆зво́ли, и҆ по ржⷭ҇твѣ̀ сохрани́въ нетлѣ́ннꙋ."
 },
 {
  "type": "TEXT",
  "value": "А҆́ннинъ пло́дъ, марі́ю дне́сь, гро́здъ ро́ждшꙋю живоно́сный, ꙗ҆́кѡ бцⷣꙋ воспои́мъ, предста́тельницꙋ же всѣ́хъ и҆ помо́щницꙋ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и."
 },
 {
  "type": "TEXT",
  "value": "Непло́дствꙋющаѧ и҆ дѣте́й лише́ннаѧ, и҆ слеза́ми содѣ́телѧ молѧ́щаѧ, є҆ди́нꙋ бл҃гослове́ннꙋю сподо́биласѧ є҆сѝ роди́ти, благопрїѧ́тнаѧ а҆́нно, зовꙋ́щи: ꙗ҆́кѡ нѣ́сть свѧ́тъ ра́звѣ тебє̀, гдⷭ҇и."
 },
 {
  "type": "TEXT",
  "value": "И҆́же сожи́тельницꙋ ѡ҆богати́въ бжⷭ҇твенною бл҃года́тїю, і҆ѡакі́мъ бжⷭ҇твенный и҆ бг҃оглаго́ливый, хода́таицꙋ спасе́нїѧ человѣ́кѡмъ роди́ти сподо́бисѧ. Къ не́йже взыва́емъ: ꙗ҆́кѡ нѣ́сть непорѡ́чны, па́че тебє̀, влⷣчце."
 },
 {
  "type": "TEXT",
  "value": "Воспое́мъ всечестнꙋ́ю сопрꙋ́гꙋ, ѿ неѧ́же возсїѧ̀ на́мъ дв҃а, всѣ́хъ тва́рей превы́шши сꙋ́щи, бг҃а бо родѝ, къ немꙋ́же возопїи́мъ: ꙗ҆́кѡ нѣ́сть свѧ́тъ па́че тебє̀, гдⷭ҇и."
 },
 {
  "type": "TEXT",
  "value": "Непло́днагѡ поно́са и҆збѣ́гши, родѝ а҆́нна бцⷣꙋ, є҆́ѵы бо поно́съ пресла́внѡ потре́бльшꙋю, къ не́йже взыва́емъ: ꙗ҆́кѡ нѣ́сть непоро́чны, па́че тебє̀, влⷣчце."
 },
 {
  "type": "HEADER",
  "value": "Конда́къ пра́здника, гла́съ д҃:"
 },
 {
  "type": "TEXT",
  "value": "І҆ѡакі́мъ и҆ а҆́нна, поноше́нїѧ безча́дства, и҆ а҆да́мъ и҆ є҆́ѵа, ѿ тлѝ сме́ртныѧ свободи́стасѧ пречⷭ҇таѧ, во ст҃ѣ́мъ ржⷭ҇твѣ̀ твое́мъ. То̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ, и҆ пита́тельницꙋ жи́зни на́шеѧ."
 },
 {
  "type": "TEXT",
  "value": "І҆́косъ: Моли́тва кꙋ́пнѡ и҆ воздыха́нїе, непло́дства и҆ безча́дства, і҆ѡакі́ма же и҆ а҆́нны благопрїѧ́тное, и҆ во ᲂу҆́ши гдⷭ҇ни вни́де, и҆ прозѧбѐ пло́дъ живоно́сенъ мі́рꙋ. ѻ҆́въ бо моли́твꙋ на горѣ̀ творѧ́ще, ѻ҆́ва же въ садѣ̀ поноше́нїе ноша́ше: но съ ра́достїю непло́ды ражда́етъ бцⷣꙋ, и҆ пита́тельницꙋ жи́зни на́шеѧ."
 },
 {
  "type": "HEADER",
  "value": "Сѣда́ленъ, гла́съ є҃."
 },
 {
  "type": "TEXT",
  "value": "Подо́бенъ: Собезнача́льное:"
 },
 {
  "type": "TEXT",
  "value": "І҆ѡакі́мъ и҆ а҆́нна торжествꙋ́ютъ, по бз҃ѣ бо досто́йнѡ бл҃года́ть ѡ҆брѣто́ша, и҆ роди́ша пло́дъ, бг҃опрїѧ́тенъ хра́мъ, дв҃ꙋ и҆ чⷭ҇тꙋю мт҃рь бж҃їю, є҆ди́нꙋ бл҃гослове́ннꙋю, молѧ́щꙋюсѧ непреста́ннѡ, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ, то́йже:"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀ є҆ди́не чл҃вѣколю́бче."
 },
 {
  "type": "TEXT",
  "value": "Воспѣва́емъ тѧ̀, гдⷭ҇и, вѣ̑рнымъ спаси́тельное приста́нище, пода́вшаго всѣ̑мъ тебѐ ро́ждшꙋю."
 },
 {
  "type": "TEXT",
  "value": "Тѧ̀, бг҃оневѣ́сто, похвалꙋ̀ всѣ̑мъ хрⷭ҇то́съ ꙗ҆вѝ и҆ держа́вꙋ, пою́щымъ вѣ́рнѡ твоѐ та́инство."
 },
 {
  "type": "TEXT",
  "value": "Неискꙋсобра́чнаѧ влⷣчце, твои́ми моли́твами и҆збавлѧ́еми прегрѣше́нїй, благоразꙋ́мнѡ вси́ тѧ ᲂу҆блажа́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Ра́дꙋѧсѧ дв҃ꙋ ѿ непло́дове прїе́млетъ, є҆ѧ́же ра́ди непло́дїе мїрско́е разрѣши́сѧ ржⷭ҇тво́мъ, дѣ́вствꙋющꙋю, і҆ѡакі́мъ бг҃омꙋ́дрый и҆ бг҃опрїѧ́тный."
 },
 {
  "type": "TEXT",
  "value": "Пра́ѻтецъ бж҃їй і҆ѡакі́мъ, ны́нѣ предлага́етъ на́мъ трапе́зꙋ дꙋхо́внꙋю, пребога́тый: ꙗ҆́кѡ бг҃ома́терь, и҆ пренетлѣ́ннꙋю ѻ҆трокови́цꙋ роди́лъ є҆́сть."
 },
 {
  "type": "TEXT",
  "value": "Оу҆мерщвле́нїѧ и҆ тлѝ человѣ́ки спа́сшꙋю, бл҃года́ть предлага́етъ, хотѧ́щꙋю бы́ти мт҃рь бж҃їю, сло́во присносꙋ́щное прїе́мшꙋю, несказа́ннѡ воплоща́емое."
 },
 {
  "type": "TEXT",
  "value": "Ѿ ко́рене і҆ессе́ева сопрꙋ́гъ возсїѧ̀, ѿ негѡ́же прозѧбѐ же́злъ, цвѣ́тъ носѧ́щїй, всего́ мѧ человѣ́ка ѡ҆благово́нствꙋющь мѵ́ромъ бжⷭ҇тва̀."
 },
 {
  "type": "TEXT",
  "value": "Напра́ви моѐ, бцⷣе, житїѐ, повелѣ̑нїи бжⷭ҇твенными наставлѧ́ющи вопло́щшагѡсѧ сло́ва и҆зъ тебє̀, и҆ къ свѣ́тꙋ наста́ви дв҃о мт҃и марі́е бг҃оневѣ́сто."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Сѣннопи́санный мра́къ гада́нїй разори́въ, и҆ вѣ́рныхъ прибы́тїемъ и҆́стины, бг҃оѻтрокови́цею ѡ҆зари́въ сердца̀, и҆ на́съ свѣ́томъ твои́мъ, хрⷭ҇тѐ, наста́ви."
 },
 {
  "type": "TEXT",
  "value": "Воспои́мъ лю́дїе всѣ́хъ винꙋ̀, сꙋ́щаго по на́мъ бы́ти вино́внаго: є҆ѧ́же ѻ҆́бразꙋ ра́довахꙋсѧ сподоблѧ́еми прⷪ҇ро́цы, ꙗ҆вле́нное спасе́нїе ѿ тоѧ̀ плодѧ́ще."
 },
 {
  "type": "TEXT",
  "value": "Ѿ сꙋ́ха прозѧбе́нїе жезла̀ і҆ере́ева, і҆и҃лю показа̀ проразсꙋжде́нїе: и҆ ны́нѣ свѣ́тлость прозѧ́бшихъ пресла́внѡ свѣ́титъ, ѿ непло́дове всесла́вное рожде́нїе."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ, и҆но́гѡ бо, ра́звѣ тебє̀, бо́га не зна́ю."
 },
 {
  "type": "TEXT",
  "value": "Цѣломꙋ́дреннаѧ дво́ица, чистоты̀ зарѧ̀ сїѧ́ющаѧ, ю҆́же дѣ́вства бжⷭ҇твеннымъ сїѧ́нїемъ ᲂу҆краси́вшꙋю непло́дное є҆стество̀ человѣ́ческое, на́мъ породѝ, а҆́нна и҆ і҆ѡакі́мъ бг҃опрїѧ́тный."
 },
 {
  "type": "TEXT",
  "value": "Дѣ́вственный бг҃оꙋкра́шенный престо́лъ, и҆́же всѣ́хъ превы́шши дла́нїю бжⷭ҇твенною, цѣломꙋ́дрїѧ честны́й сопрꙋ́гъ, и҆ бг҃омꙋ́драѧ дво́ица породѝ, а҆́нна и҆ і҆ѡакі́мъ всехва́льнїи."
 },
 {
  "type": "TEXT",
  "value": "Восто́кꙋ свы́ше ꙗ҆́вльшꙋсѧ, въ наставле́нїе заблꙋ́ждшихъ, свѣтоно́снꙋю две́рь, бжⷭ҇твенный і҆ѡакі́мъ и҆ а҆́нна, бг҃омꙋ́дреннѡ пожи́вшїи, роди́ти бг҃ови́дцы ꙗ҆́вѣ сподо́бишасѧ."
 },
 {
  "type": "TEXT",
  "value": "Зако́на но́вагѡ бг҃опи́саннꙋю скрижа́ль, на не́йже рѣше́нїе грѣхѡ́въ ве́тхагѡ зако́на, бжⷭ҇твенное сло́во проѡбразѝ пре́жде, ꙗ҆́кѡ ѿ ка́мене ны́нѣ ᲂу҆сѣчѐ, манове́нїемъ вседержи́тель ѿ непло́дове."
 },
 {
  "type": "TEXT",
  "value": "Бг҃оро́диченъ: Заре́ю твое́ю бг҃ома́ти, ᲂу҆мꙋ̀ моемꙋ̀ ѡ҆зари́тисѧ ѡ҆мраче́нномꙋ грѣхо́мъ, повелѝ дв҃о, невѣ́дѣнїѧ мра́къ и҆ прегрѣше́нїй потреблѧ́ющи: и҆ны́ѧ бо па́че тебє̀ храни́тельницы не вѣ́мъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀."
 },
 {
  "type": "TEXT",
  "value": "Ко гдⷭ҇ꙋ въ ско́рби непло́дства возопи́ша, бг҃ома́тере бг҃омꙋ́дрїи роди́тели: и҆ сїю̀ въ ро́ды родѡ́въ роди́ша: на ѻ҆́бщее спасе́нїе и҆ похвалꙋ̀."
 },
 {
  "type": "TEXT",
  "value": "Прїѧ́ша нбⷭ҇ный да́ръ ѿ бг҃а досто́инъ, бг҃омт҃ре бг҃омꙋ́дрїи роди́тели, самѣ́хъ херꙋві́мѡвъ превы́шшее носи́ло, сло́ва и҆ зижди́телѧ роди́тельницꙋ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Плодови́тое сѣ́мѧ, є҆́же дре́вле непло́ды а҆́нна воспрїе́мши, ѿ бжⷭ҇твеннагѡ ѡ҆сїѧ́нїѧ ѻ҆трокови́цꙋ роди́ти сподо́бисѧ, всѣ́ми тварьмѝ влады́чествꙋющꙋю."
 },
 {
  "type": "TEXT",
  "value": "Ны́нѣ непло́ды ро́ждши во́лею бж҃їею, покоре́нїемъ прїѧ́ти дв҃ꙋ, ро́ждшꙋю кромѣ̀ плотскі́ѧ во́ли, самомꙋ̀ восхотѣ́вшꙋ бг҃ꙋ проѧвле́ннѡ."
 },
 {
  "type": "TEXT",
  "value": "Ѡ҆зари́всѧ и҆са́їа дх҃омъ, і҆ѡакі́ма и҆ а҆́нны ржⷭ҇тво̀, сви́токъ но́въ ви́дѣ, въ не́мже написа́сѧ сло́во воплоща́емо."
 },
 {
  "type": "TEXT",
  "value": "Та́инствꙋ предтече́тъ та́инство: пре́жде бо неплодѧ́щаѧ благода́ть породѝ, спасе́нїѧ хода́таицꙋ, дѣ́вства рожде́нїемъ ꙗ҆́вльшꙋюсѧ на́мъ."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Ра́дꙋетсѧ ны́нѣ а҆́нна, непло́дства разрѣши́вшисѧ соꙋ́зъ, и҆ пита́етъ пречⷭ҇тꙋю, созыва́ющи всѧ̑ воспѣ́ти дарова́вшаго ѿ чре́ва є҆ѧ̀ человѣ́кѡмъ, є҆ди́нꙋ мт҃рь и҆ неискꙋсомꙋ́жнꙋю."
 },
 {
  "type": "TEXT",
  "value": "І҆́косъ: Ꙗ҆́же ᲂу҆́зъ пре́жде безча́дства моли́твою и҆зба́вльшисѧ, призыва́етъ ны̀ спра́здновати чꙋдесѝ, и҆ да́ры принестѝ рожде́ннѣй, молѧ́щыѧсѧ предъ не́ю съ любо́вїю, є҆́йже ꙗ҆́кѡ и҆ногда̀ дѣ́вы предтеча́хꙋ ско́рѡ ликꙋ́юще и҆ вопїю́ще: сѐ прїи́де всѣ́хъ воззва́нїе, сѐ а҆да́мъ свободи́сѧ, ꙗ҆́кѡ а҆́нна пло́дъ прозѧбѐ, є҆ди́нꙋ мт҃рь и҆ неискꙋсомꙋ́жнꙋю."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ, ѻ҆́гнь неѡпа́льнѡ прїѧ́ла є҆сѝ. Тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Твоѐ въ веще́ственныхъ ꙗ҆вле́нїихъ законополо́жникъ возбрани́сѧ разꙋмѣ́ти, и҆ вели́кое пречⷭ҇таѧ та́инство, не мꙋ́дрствовати земнорє́вностнаѧ, ѻ҆бра́знѡ наказꙋ́емь и҆ногда̀. Тѣ́мже ᲂу҆ди́вльсѧ чꙋдесѝ, глаго́лаше: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Го́рꙋ и҆ две́рь нбⷭ҇нꙋю, и҆ мы́сленнꙋю тѧ̀ лѣ́ствицꙋ бг҃олѣ́пнѡ, ли́къ бжⷭ҇твенный пронаречѐ: ѿ тебє̀ ка́мень ѿсѣче́сѧ, не рꙋка́ми мꙋ́жескими, и҆ две́рь є҆́юже про́йде гдⷭ҇ь, и҆́же чꙋде́съ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ."
 },
 {
  "type": "TEXT",
  "value": "Ѿ ко́рене прозѧ́бши дво́ице ст҃а́ѧ дв҃да бг҃омꙋ́драгѡ, же́злъ всесвѧще́нный, дв҃ꙋ чⷭ҇тꙋю мі́рꙋ породи́сте, цвѣ́тъ свѧще́ннѣйшїй на́мъ хрⷭ҇та̀ безсѣ́меннѡ возсїѧ́вшꙋю."
 },
 {
  "type": "TEXT",
  "value": "Свѣщꙋ̀ многосвѣ́тлꙋю бцⷣꙋ, а҆́нна бжⷭ҇твеннаѧ, ꙗ҆́коже златоза́ренъ свѣ́щникъ носѧ́щи, мі́ръ ве́сь просвѣтѝ бжⷭ҇твеннымъ свѣ́томъ, и҆ дѣ́вства свѣ́тлыми сїѧ́ньми."
 },
 {
  "type": "TEXT",
  "value": "Прароди́телїе сла́внїи, воплоти́вшагосѧ, за неизрече́ннꙋю ми́лость, бг҃а вседержи́телѧ, ѿ дще́ре бг҃омꙋ́дрыѧ ва́шеѧ, пребога́тїи, ны́нѣ мнѣ̀ прибѣ́гшемꙋ къ ва́мъ, согрѣше́нїй разрѣше́нїе и҆спроси́те."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ сꙋ́ще пребо́льшїи роди́телей, всѣ́ми влⷣчествꙋющꙋю тва́рьми роди́сте, марі́ю пречⷭ҇тꙋю, ро́ждшꙋю бг҃а, пло́тїю ѡ҆бложе́на, на́мъ ᲂу҆подо́бльшасѧ, за бл҃гоꙋтро́бїе мно́гое."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки."
 },
 {
  "type": "TEXT",
  "value": "Ꙗ҆́же къ бг҃ꙋ на́шегѡ примире́нїѧ, пред̾ѡпредѣле́ннаѧ ски́нїѧ, є҆́же бы́ти ны́нѣ начина́етъ, и҆мꙋ́щи роди́ти сло́ва, на́мъ дебельство́мъ пло́ти ꙗ҆́вльшасѧ. Є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки."
 },
 {
  "type": "TEXT",
  "value": "Непло́дства преложе́нїе, мїрско́е благи́хъ разрѣшѝ непло́дство, и҆ ꙗ҆́сно чꙋ́до хрⷭ҇та̀ показа̀, къ земны̑мъ прише́дша. Є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Бога́тствомъ кипѧ́щїи добродѣ́телей, сла́вою бжⷭ҇твенною ᲂу҆кра́шеннꙋю цр҃и́цꙋ дв҃ꙋ, і҆ѡакі́мъ чⷭ҇тны́й, и҆ а҆́нна цѣломꙋ́дреннаѧ роди́ша. ю҆́же всѧ̀ тва́рь пое́тъ ꙗ҆́кѡ бцⷣꙋ."
 },
 {
  "type": "TEXT",
  "value": "Же́злъ си́лы на́мъ, ва́ми дрꙋ́ги бж҃їими по́сланъ бы́сть, всенепоро́чнаѧ невѣ́ста. Є҆́юже посредѣ̀ врагѡ́въ, безбо́жныхъ ѡ҆долѣва́емъ, кова̑рствїѧ тѣ́хъ попира́юще."
 },
 {
  "type": "TEXT",
  "value": "Ѻ҆рꙋ́жїе на́мъ ѿ бг҃а бл҃говоле́нїѧ, тобо́ю сопрꙋ́же свѧще́ннѣйшїй, дарова́сѧ, и҆́мже ны́нѣ мы̀ вѣ́рнїи кра́снѣ при́снѡ вѣнча́емсѧ, бг҃а ро́ждшаѧ, чⷭ҇таѧ дв҃о мт҃и."
 },
 {
  "type": "TEXT",
  "value": "Си́ла бж҃їѧ плодоноше́нїемъ непло́дствꙋющее чре́во ѿве́рзе: и҆ предгрѧде́тъ две́рь дѣ́вства свѣ́тлостьми, є҆ѧ́же ра́ди сло́во прїи́де къ зємны́мъ, вопло́щсѧ неизрече́ннымъ сло́вомъ."
 },
 {
  "type": "TEXT",
  "value": "Свѣтоли̑тїи и҆зъ тебє̀ воплоще́ннагѡ на́съ ра́ди, просвѣще́ннаѧ дво́ица и҆зрѧ́днаѧ роди́телей твои́хъ, да бꙋ́детъ пренепоро́чнаѧ влⷣчце, хода́тайство на́мъ бла̑гъ небе́сныхъ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ, всечⷭ҇таѧ, тѧ̀, бцⷣꙋ, велича́емъ."
 },
 {
  "type": "TEXT",
  "value": "И҆́же непокори̑вымъ лю́демъ и҆зъ ка́мене и҆сточи́въ во́дꙋ, благопокори̑вымъ же ꙗ҆зы́кѡмъ, да́рꙋетъ ѿ чре́слъ непло́дныхъ, пло́дъ на весе́лїе на́мъ, тѧ̀ бг҃ома́ти пречⷭ҇таѧ: ю҆́же досто́йнѡ велича́емъ."
 },
 {
  "type": "TEXT",
  "value": "Напра́снагѡ дре́внѧгѡ ѿѧ́тельницꙋ ѡ҆сꙋжде́нїѧ, и҆ прама́тере и҆справле́нїе, ю҆́же ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀ бцⷣе велича́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "Є҆диномꙋ́дреннїи, и҆ є҆динодꙋ́шнїи добродѣ́телїю сꙋ́ще, пречⷭ҇тыѧ дв҃ы честні́и роди́телїе, соверша́ющымъ ᲂу҆се́рднѡ прехва́льнꙋю и҆ сла́внꙋю па́мѧть ва́шꙋ свѧще́ннѣйшїи, спасти́сѧ моли́тесѧ."
 },
 {
  "type": "TEXT",
  "value": "Па́жить разрꙋши́сте сме́ртнꙋю сла́внїи, жи́зни мт҃рь свѣ́тлѡ ро́ждшїи, потре́бльшꙋю сеѧ̀ прило́гъ и҆ безсме́ртныѧ жи́зни и҆схода́таившꙋю, наде́ждꙋ вѣ́ры ра́ди."
 },
 {
  "type": "TEXT",
  "value": "Кра́сное ꙗ҆́кѡ со́лнце і҆ѡакі́мъ, є҆динѧ́ѧсѧ свѣтоно́снѣй лꙋнѣ̀ а҆́ннѣ, породѝ дѣ́вства лꙋчꙋ̀, є҆́юже зарѧ̀ бжⷭ҇твеннагѡ сꙋщества̀, пло́ти по ѵ҆поста́си соедини́вшисѧ, на́мъ возсїѧ̀."
 },
 {
  "type": "TEXT",
  "value": "Цѣломꙋ́дреннѡ пожи́вше и҆ благоче́стнѡ бл҃же́ннїи, ны́нѣ сла́дости несказа́нныѧ сподо́бистесѧ, бг҃оѧвле́нїѧ полꙋчи́вше, и҆́же ѿ ва́съ мі́рꙋ ꙗ҆́вльшагосѧ є҆го́же моли́те, спасти́сѧ дꙋша́мъ на́шымъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Посѣти́лъ ны̀ є҆́сть:"
 },
 {
  "type": "TEXT",
  "value": "Ꙗ҆́же є҆́ѵы клѧ́твꙋ потре́бльшаѧ, ны́нѣ ражда́етсѧ ѿ ста́рєцъ непло́дныхъ, ѿ а҆́нны и҆ і҆ѡакі́ма. ю҆́же со а҆́гг҃лы всѝ по до́лгꙋ въ пѣ́снехъ вѣ́рнїи да восхва́лимъ."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Ꙗ҆́кѡ ѿ со́лнца со́лнце, и҆ ѿ лꙋны̀ лꙋна̀, ѿ а҆́нны и҆ і҆ѡакі́ма всенепоро́чнаѧ ѻ҆трокови́ца роди́сѧ, и҆ просвѣтѝ мі́ра концы̀ свои́мъ сїѧ́нїемъ, ю҆́же пою́ще досто́йнѡ ᲂу҆блажи́мъ, соверша́юще честнꙋ́ю и҆́хъ па́мѧть."
 },
 {
  "type": "HEADER",
  "value": "На стїхо́внѣ стїхи̑ры пра́здника, гла́съ ѕ҃."
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Ны́нѣ и҆гра́й прⷪ҇ро́че дв҃де, се́ бо ѿ чре́слъ твои́хъ дв҃а, бг҃оѻтрокови́ца марі́а роди́сѧ пресла́внѡ: є҆ѧ́же ра́ди земні́и бжⷭ҇твеннѡ ѡ҆брѣто́ша воззва́нїе паде́нїѧ."
 },
 {
  "type": "TEXT",
  "value": "Сті́хъ: Слы́ши дщѝ, и҆ ви́ждь, и҆ приклонѝ ᲂу҆́хо твоѐ."
 },
 {
  "type": "TEXT",
  "value": "Оу҆мерщвле́нїѧ совлачи́тсѧ ти́ны, бл҃года́тїю, а҆да́мъ со є҆́ѵою, и҆ ѡ҆живлѧ́ютсѧ всерѡ́днаѧ, ѿ непло́дныѧ бо ро́ждшисѧ и҆́стиннѡ бцⷣа, мїрско́е разрѣшѝ непло́дство."
 },
 {
  "type": "TEXT",
  "value": "Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи."
 },
 {
  "type": "TEXT",
  "value": "Всечестно́е твоѐ ржⷭ҇тво̀ свѣ́тлѡ торжествꙋ́емъ со а҆́гг҃лы, мт҃и дв҃о чⷭ҇таѧ, но ѽ бг҃ороди́тельнице. Не преста́й защища́ти, хрⷭ҇тїа́нъ воспѣва́ющихъ тѧ̀."
 },
 {
  "type": "HEADER",
  "value": "Сла́ва, и҆ ны́нѣ, пра́здника, гла́съ в҃:"
 },
 {
  "type": "TEXT",
  "value": "Дне́сь всенепоро́чнаѧ чⷭ҇таѧ произы́де ѿ непло́дове, дне́сь всѧ́чєскаѧ ра́дꙋютсѧ въ тоѧ̀ ржⷭ҇твѣ̀, а҆да́мъ ᲂу҆́зъ разрѣша́етсѧ, и҆ є҆́ѵа клѧ́твы свободи́сѧ, нбⷭ҇наѧ всѧ̑ веселѧ́тсѧ, и҆ ми́ръ человѣ́кѡмъ да́рꙋетсѧ. Мы́ же славосло́вѧще вопїе́мъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ благоволе́нїе."
 },
 {
  "type": "HEADER",
  "value": "На лїтꙋргі́и: Бл҃жє́нна пра́здника, пѣ́снь а҃, втора́гѡ гла́са, на д҃: и҆ ст҃ы́хъ, пѣ́снь ѕ҃, на д҃."
 },
 {
  "type": "HEADER",
  "value": "Прокі́менъ пра́здника, и҆ до ѿда́нїѧ. Та́же ст҃ы́хъ, гла́съ д҃:"
 },
 {
  "type": "TEXT",
  "value": "Ди́венъ бг҃ъ во ст҃ы́хъ свои́хъ:"
 },
 {
  "type": "TEXT",
  "value": "Сті́хъ: Въ цр҃квахъ благослови́те бг҃а:"
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло с҃і, ѿ полꙋ̀."
 },
 {
  "type": "TEXT",
  "value": "А҆ллилꙋ́їа, гла́съ а҃: Спасе́нїе првⷣныхъ ѿ гдⷭ҇а."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло л҃ѕ."
 },
 {
  "type": "HEADER",
  "value": "Прича́стенъ пра́здника, и҆ ст҃ы́хъ:"
 },
 {
  "type": "TEXT",
  "value": "Ра́дꙋйтесѧ првⷣнїи ѡ҆ гдⷭ҇ѣ:"
 }
]