ponomar-pwa/static/data/shared/menaion-daily/10-01/1.json

[
 {
  "type": "HEADER",
  "value": "Ѻ҆ктѡ́врїа а҃"
 },
 {
  "type": "HEADER",
  "value": "Ст҃а́гѡ а҆пⷭ҇ла а҆на́нїи, є҆ди́нагѡ ѿ седми́десѧти:"
 },
 {
  "type": "HEADER",
  "value": "И҆ прпⷣбнагѡ ѻ҆ц҃а̀ на́шегѡ рѡма́на сладкопѣ́вца:"
 },
 {
  "type": "HEADER",
  "value": "Ве́черъ, ѻ҆бы́чнаѧ каѳі́сма."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры а҆пⷭ҇ла, гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "И҆́же зарю̀ бжⷭ҇твеннꙋю прїе́мь, є҆гда̀ манове́нїемъ лꙋ́чшимъ ѡ҆слѣпле́нъ, пре́жде мра́комъ держи́мь, прїи́де къ тебѣ̀ са́ѵлъ, бжⷭ҇твеннагѡ просѧ̀ ѡ҆чище́нїѧ: тогда̀ всебл҃же́нне ꙗ҆́кѡ і҆ера́рхъ мꙋ́дръ, сынотвори́ши є҆го̀ креще́нїемъ, пото́мъ хотѧ́щаго вселе́ннꙋю всю̀ ѡ҆сынотвори́ти. Тѣ́мъ съ ни́мъ бл҃жи́мъ тѧ̀ хрⷭ҇то́ва а҆пⷭ҇ла, а҆на́нїе бг҃омꙋ́дре: моли́тесѧ, спасти́сѧ на́мъ."
 },
 {
  "type": "TEXT",
  "value": "Наꙋчи́всѧ бжⷭ҇твєннымъ пресла́внѡ, гро́ма крѣ́пльше, бл҃же́нне, вострꙋби́лъ є҆сѝ сло́во бж҃їе спаси́тельное, и҆ спѧ́щыѧ во гробѣ́хъ сꙋеты̀ возбꙋди́лъ є҆сѝ, ᲂу҆мерщвле́нїе ѿве́ргшыѧ, мє́ртвымъ соѡбита́ющее, и҆ во а҆́дѣ держи̑мыѧ воз̾ѡбраща́ющее, ꙗ҆̀же содѣ́лалъ є҆сѝ ᲂу҆мертви́вшагѡ ме́ртвость, сосꙋ́ды че́стны і҆и҃са влⷣки, и҆ сп҃са дꙋ́шъ на́шихъ."
 },
 {
  "type": "TEXT",
  "value": "Ꙗ҆́кѡ свѣтоно́сецъ, ꙗ҆́кѡ бжⷭ҇твенный проповѣ́дникъ, ꙗ҆́кѡ свидѣ́тель бг҃оизбра́нный стрⷭ҇те́й хрⷭ҇то́выхъ, и҆ бꙋ́дꙋщїѧ ꙗ҆ви́тисѧ неизрече́нныѧ сла́вы, снаслѣ́дникъ же и҆ сприча́стникъ, сы́й со влⷣкою, и҆ наслажда́ѧсѧ и҆стека́ющагѡ всегда̀ свѣтоли́тїѧ, ѿ незаходи́магѡ свѣ́та, бг҃оглаго́ливе, свѣ́тлый соверша́ющыѧ тво́й ны́нѣ пра́здникъ, моли́твами твои́ми, ѿ мра́чныхъ бѣ́дъ, а҆на́нїе, и҆зба́ви."
 },
 {
  "type": "HEADER",
  "value": "И҆́ны стїхи̑ры рѡма́на, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Краснопѣ́сниваѧ цѣвни́ца бжⷭ҇твеннагѡ дх҃а, славі́й и҆ щꙋ́ръ бжⷭ҇твенныхъ пѣ́сней, свирѣ́ль цр҃ко́внаѧ, всѣ̑мъ на́мъ своѧ̑ предлага́етъ сладкопѣ́снєннаѧ ᲂу҆чреждє́нїѧ, и҆ тѣ́ми весели́тъ бг҃омꙋ̑дрыѧ."
 },
 {
  "type": "TEXT",
  "value": "Свѣтлѣ́йшїй свѣти́льникъ и҆ проза́рнѣйшїй, сладковѣща́ннаѧ гꙋ́сль, стрꙋна̀ благознамени́тыхъ дх҃а слове́съ, пое́тъ ꙗ҆́снѡ наꙋча́ѧ концы̀, немо́лчными пѣ́сньми славосло́вити бжⷭ҇тва̀ є҆ди́нꙋ зарю̀."
 },
 {
  "type": "TEXT",
  "value": "Ты̀ влⷣцѣ всѣ́хъ ꙗ҆́кѡ предстоѧ̀, и҆ дерзнове́нїе, ѻ҆́ч҃е, къ немꙋ̀ стѧжа́въ, на́мъ соверша́ющымъ па́мѧть твою̀, и҆ свѣ́тлое твоѐ торжество̀, молѝ и҆зба́витисѧ бѣ́дъ и҆ напа́стей, рѡма́не бг҃облаже́нне."
 },
 {
  "type": "HEADER",
  "value": "Сла́ва, а҆пⷭ҇ла, гла́съ то́йже."
 },
 {
  "type": "TEXT",
  "value": "Вѷзанті́ево: Сосꙋ́дъ и҆збра́нный, вели́кое прїѧ́телище дх҃а, па́ѵла а҆пⷭ҇ла просвѣти́лъ є҆сѝ, прпⷣбне, бг҃омъ по ѿкрове́нїю навы́къ, ꙗ҆́кѡ самови́децъ сло́ва и҆ таи́нникъ чꙋде́съ є҆гѡ̀, а҆пⷭ҇лъ же пре́жде ᲂу҆ч҃никѡ́въ, и҆ вѣ́рный строи́тель но́вагѡ завѣ́та: тѣ́мъ подража́ѧ ᲂу҆ч҃телѧ хрⷭ҇та̀, твою̀ кро́вь пролїѧ́лъ є҆сѝ, мч҃ническою стра́стїю и҆сповѣ́дникъ бы́въ а҆на́нїе, свѧщеннонача́льниче хрⷭ҇то́въ. И҆ тече́нїе соверши́въ, вѣ́рꙋ же некра́домꙋ соблю́дъ, съ вы́шними слꙋжи́тєли въ высоча́йшихъ водворѧ́ѧсѧ, молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Прехва́льнїи мч҃ницы:"
 },
 {
  "type": "TEXT",
  "value": "При крⷭ҇тѣ̀ предстоѧ́щи сн҃а твоегѡ̀ и҆ бг҃а, и҆ долготерпѣ́нїе є҆гѡ̀ смотрѧ́ющи, глаго́лала є҆сѝ рыда́ющи мт҃и чⷭ҇таѧ: ᲂу҆вы̀ мнѣ̀, ча́до сладча́йшее, что̀ сїѧ̑ стра́ждеши непра́веднѡ, сло́ве бж҃їй, да спасе́ши человѣ́чество;"
 },
 {
  "type": "HEADER",
  "value": "Стїхо́вна ѻ҆ктѡ́иха: и҆ а҆пⷭ҇ла сті́хъ, гла́съ д҃, съ припѣ́вомъ:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Страстоте́рпческое прїѧ́телище, ꙗ҆ви́лсѧ є҆сѝ а҆на́нїе а҆пⷭ҇ле, ка́менїемъ ꙗ҆́кѡ цвѣ́ты ᲂу҆чаща́емь, за пострада́вшаго пло́тїю на́съ ра́ди распѧ́тїе во́льнѣ, кро́вь твою̀ пролїѧ́лъ є҆сѝ. Тѣ́мъ и҆ дама́скъ хва́литсѧ свѧще́ннымъ твои́мъ торжество́мъ дне́сь. Не то́чїю же то́й, но и҆ всѧ̀ подсо́лнечнаѧ чꙋде́съ твои́хъ зна́мєнїѧ ꙗ҆́вѣ проповѣ́дающи, вопїе́тъ: моли́сѧ къ бг҃ꙋ, дарова́ти на́мъ согрѣше́нїй проще́нїе."
 },
 {
  "type": "HEADER",
  "value": "Сла́ва, прпⷣбнагѡ, гла́съ ѕ҃:"
 },
 {
  "type": "TEXT",
  "value": "Пе́рвое до́брыхъ нача́ло ꙗ҆ви́лсѧ є҆сѝ спасе́нїѧ вина̀, рѡма́не ѻ҆́ч҃е на́шъ: а҆́гг҃льское бо соста́вивъ пѣснопѣ́нїе, бг҃олѣ́пїю показа́лъ є҆сѝ житїѐ твоѐ. Хрⷭ҇та̀ бг҃а молѝ, напа́стей и҆ бѣ́дъ и҆зба́вити пою́щыѧ тѧ̀."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Ви́дѧщи тѧ̀ распина́ема хрⷭ҇тѐ, тебѐ ро́ждшаѧ, вопїѧ́ше: что̀ стра́нное є҆́же ви́жꙋ та́инство сн҃е мо́й; ка́кѡ на дре́вѣ ᲂу҆мира́еши пло́тїю повѣ́шенъ, жи́зни пода́телю;"
 },
 {
  "type": "HEADER",
  "value": "Тропа́рь а҆пⷭ҇ла, гла́съ г҃:"
 },
 {
  "type": "TEXT",
  "value": "А҆пⷭ҇ле ст҃ы́й а҆на́нїе, молѝ ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ."
 },
 {
  "type": "HEADER",
  "value": "Сла́ва, прпⷣбнагѡ, гла́съ и҃:"
 },
 {
  "type": "TEXT",
  "value": "Въ тебѣ̀ ѻ҆́ч҃е, и҆звѣ́стнѡ спасе́сѧ є҆́же по ѻ҆́бразꙋ: прїи́мъ бо крⷭ҇тъ послѣ́довалъ є҆сѝ, хрⷭ҇тꙋ̀, и҆ дѣ́йствꙋѧ ᲂу҆чи́лъ є҆сѝ презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй. Тѣ́мже и҆ со а҆́гг҃лы сра́дꙋетсѧ прпⷣбне рѡма́не дх҃ъ тво́й."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:"
 },
 {
  "type": "HEADER",
  "value": "На ᲂу҆́трени, канѡ́нъ ѻ҆ктѡ́иха є҆ди́нъ, и҆ а҆пⷭ҇ла, на д҃, гла́съ и҃, творе́нїе і҆ѡа́нна мона́ха, є҆гѡ́же краегране́сїе:"
 },
 {
  "type": "TEXT",
  "value": "А҆на́нїи сла́ва да просла́витсѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Ѿве́рземъ ᲂу҆ста̀ похва̑льнаѧ, ᲂу҆ѧсни́мъ ѧ҆зы́къ въ па́мѧти всѝ вѣ́рнїи началопа́стырѧ а҆на́нїи, и҆ съ ни́мъ бг҃ꙋ на́шемꙋ воспои́мъ."
 },
 {
  "type": "TEXT",
  "value": "Женихꙋ̀ пречⷭ҇томꙋ невѣстово́дитъ нескве́рнꙋю невѣ́стꙋ а҆на́нїа пресла́вный, хрⷭ҇тꙋ̀ сꙋ́щꙋю здѣ̀ цр҃ковь: съ не́юже ꙗ҆́снѡ бг҃ꙋ на́шемꙋ воспои́мъ."
 },
 {
  "type": "TEXT",
  "value": "Пе́рвый бы́лъ є҆сѝ ᲂу҆ч҃ни́къ, но́вомꙋ дае́ши прозрѣ́нїе ᲂу҆ч҃никꙋ̀, дре́вле гони́телю, а҆на́нїе, и҆ пѣснопое́ши: воспои́мъ бг҃ꙋ на́шемꙋ."
 },
 {
  "type": "TEXT",
  "value": "Бг҃оро́диченъ: Чи́ни тѧ̀ а҆́гг҃льстїи, и҆ земны́хъ ро́ди, безневѣ́стнаѧ мт҃и, непреста́ннѡ хва́лѧтъ: зижди́телѧ бо и҆́хъ, ꙗ҆́коже младе́нца, на ѡ҆б̾ѧ́тїихъ твои́хъ носи́ла є҆сѝ."
 },
 {
  "type": "HEADER",
  "value": "И҆́нъ канѡ́нъ прпⷣбнагѡ, гла́съ ѕ҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
 },
 {
  "type": "TEXT",
  "value": "Свѣтосїѧ̑нныѧ лꙋчы̀ ѿ нб҃съ на́мъ низпослѝ, моли́твами твои́ми мꙋ́дре рѡма́не бжⷭ҇твенне, твою̀ похвали́ти свѧще́ннꙋю па́мѧть пѣ́сньми."
 },
 {
  "type": "TEXT",
  "value": "Ѿ ю҆́ности ве́сь ты̀ хрⷭ҇тꙋ̀, тѧ̀ сама́го предложи́въ, послѣ́довалъ є҆сѝ є҆мꙋ̀, свѣтоза́рными сїѧ́ньми ᲂу҆́мъ съ нб҃сѐ рѡма́не, ѡ҆блистава́ѧ."
 },
 {
  "type": "TEXT",
  "value": "Оу҆кра́шенъ добро́тою вседѣ́тельнагѡ и҆ ст҃а́гѡ дх҃а, ꙗ҆́кѡ ѕвѣзда̀ свѣтосїѧ́ннаѧ, добродѣ́телей свѣ́тлостїю мꙋ́дре, ꙗ҆ви́лсѧ є҆сѝ рѡма́не мі́ра концє́мъ."
 },
 {
  "type": "TEXT",
  "value": "Бг҃оро́диченъ: И҆зъ тебє̀ про́йде неизрече́ннѡ бж҃їе сло́во собезнача́льное, въ послѣ̑днѧѧ времена̀: и҆ пе́рвагѡ человѣ́ка а҆да́ма во тлю̀ па́дшаго бцⷣе, возспасѐ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Повелѣ́нїю послѣ́дꙋѧ ᲂу҆чи́телѧ твоегѡ̀, бы́лъ є҆сѝ а҆рхїере́й, страстоте́рпческое же приноше́нїе а҆пⷭ҇ле."
 },
 {
  "type": "TEXT",
  "value": "Ми́лостива моли́твами твои́ми бг҃оꙋвѣ́тливыми содѣ́лай и҆зба́вителѧ, тебѐ пою́щымъ, а҆на́нїе а҆пⷭ҇ле."
 },
 {
  "type": "TEXT",
  "value": "Всѐ тебѣ̀ свѧза̀ ѕвѣ́рѧ стремле́нїе гдⷭ҇ь ꙗ҆ви́всѧ, свѣ́томъ незрече́ннымъ ѡ҆мрачи́въ лицѐ."
 },
 {
  "type": "TEXT",
  "value": "Бг҃оро́диченъ: Тѧ̀ всѝ стѧжа́хомъ прибѣ́жище и҆ стѣ́нꙋ на́шꙋ, хрⷭ҇тїа́не: и҆ тѧ̀ славосло́вимъ немо́лчнѡ безневѣ́стнаѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Оу҆́мъ тво́й рѡма́не мꙋ́дре, бы́сть ѻ҆би́телище трⷪ҇цы ст҃ы́ѧ, и҆сполнѧ́емь благоче́стнѡ зна́нїѧ и҆́стиннагѡ, и҆сточа́ѧ бжⷭ҇твєннаѧ проповѣ̑данїѧ."
 },
 {
  "type": "TEXT",
  "value": "Стрꙋи̑ и҆скипѣ̀ тече́нїй честны́й тво́й ѧ҆зы́къ, поѧ̀ бжⷭ҇твєннаѧ, и҆ ᲂу҆ѧснѧ́ѧ мꙋ́дростнѡ хрⷭ҇то́во къ на́мъ ѿ дв҃ы ржⷭ҇тво̀ неизрече́нное."
 },
 {
  "type": "TEXT",
  "value": "Сѐ пита́еши ѻ҆би́льнѡ мꙋ́дрыми ᲂу҆че́ньми, и҆ кра́сными пѣснопѣ̑нїи, по́мыслы на́шѧ: и҆ и҆сполнѧ́еши сла́дости бж҃е́ственнѣйшїѧ, рѡма́не бг҃огла́се."
 },
 {
  "type": "TEXT",
  "value": "Бг҃оро́диченъ: Всѣ́хъ є҆сѝ во́инствъ вы́шши дв҃о, тѣ́хъ бо содѣ́телѧ, сн҃а бж҃їѧ зачала̀ є҆сѝ во ᲂу҆тро́бѣ, и҆ ро́ждши, пребыва́еши приснодв҃а."
 },
 {
  "type": "HEADER",
  "value": "Конда́къ прпⷣбнагѡ, гла́съ и҃:"
 },
 {
  "type": "TEXT",
  "value": "Бжⷭ҇твенными добродѣ́тельми дх҃а и҆змла́да ᲂу҆краси́всѧ рѡма́не премꙋ́дре, цр҃кви хрⷭ҇то́вѣ пречестно́е ᲂу҆краше́нїе бы́лъ є҆сѝ: пѣ́нїемъ бо прекра́снымъ ᲂу҆краси́въ ю҆̀ бл҃же́нне. Тѣ́мъ мо́лимъ тѧ̀: пода́ждь жела́ющымъ бж҃е́ственнагѡ дарова́нїѧ твоегѡ̀, ꙗ҆́кѡ да вопїе́мъ тѝ: ра́дꙋйсѧ ѻ҆́ч҃е пребл҃же́нне, красото̀ цр҃ко́внаѧ."
 },
 {
  "type": "HEADER",
  "value": "Сѣда́ленъ а҆пⷭ҇ла, гла́съ то́йже."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Просвѣще́нъ позна́нїемъ бжⷭ҇твеннымъ свѧще́нникъ же и҆ мꙋ́ченикъ і҆и҃совъ, и҆ бжⷭ҇твенный а҆пⷭ҇лъ а҆на́нїе, бы́лъ є҆сѝ. И҆ и҆ногда̀ гони́телѧ са́ѵла нарица́ема, ѡ҆слѣпле́на манове́нїемъ вы́шнимъ, сла́вне, въ водѣ̀ погрꙋзи́въ, бг҃осодѣ́тельнымъ наꙋче́нїемъ лꙋ́чша є҆го̀ показа́лъ є҆сѝ, просвѣти́телѧ дꙋша́мъ на́шымъ. Сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чествꙋ́ющымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, прпⷣбнагѡ, гла́съ є҃."
 },
 {
  "type": "TEXT",
  "value": "Подо́бенъ: Собезнача́льное сло́во:"
 },
 {
  "type": "TEXT",
  "value": "Насажде́нъ, ꙗ҆́коже дре́во ѻ҆́ч҃е блаже́нне, при и҆схо́дищихъ во́дъ по́стническихъ, бжⷭ҇твеннымъ содѣ́йствомъ плоды̀ болѣ́зней твои́хъ во вре́мѧ ꙗ҆́вственнѡ садодѣ́лателю и҆ творцꙋ̀ ѿда́лъ є҆сѝ. Сегѡ̀ ра́ди свѧтꙋ́ю твою̀ пое́мъ па́мѧть, чествꙋ́юще тѧ̀ рѡма́не прпⷣбне."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное, и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀ приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рꙋ, и҆ спасе́нїе, и҆ ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: На крⷭ҇тѣ̀ зрѧ́щи тѧ̀ хрⷭ҇тѐ, мт҃и твоѧ̀, во́льнѡ посредѣ̀ разбо́йникѡвъ ви́сѧща, растерза́ющисѧ ᲂу҆тро́бою мт҃рски, гл҃го́лаше: безгрѣ́шный сн҃е, ка́кѡ непра́веднѡ на крⷭ҇тѣ̀ ꙗ҆́коже ѕлодѣ́й пригвожде́нъ є҆сѝ, человѣ́ческїй ро́дъ хотѧ̀ ѡ҆живи́ти, ꙗ҆́кѡ бл҃гоꙋтро́бенъ;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
 },
 {
  "type": "TEXT",
  "value": "Тобо́ю хрⷭ҇тѐ, наказꙋ́емь, страда́льчески побѣжда́етъ сме́рть, а҆на́нїа приснопа́мѧтный ѿ тебє̀ по́чєсти воспрїима́ѧ."
 },
 {
  "type": "TEXT",
  "value": "Оу҆ч҃ни́къ бы́лъ є҆сѝ гони́магѡ сло́ва, приснопа́мѧтне а҆на́нїе, и҆ ᲂу҆чи́тель бг҃оче́стїѧ гонѧ́щемꙋ."
 },
 {
  "type": "TEXT",
  "value": "Ꙗ҆ви́ тѧ гдⷭ҇ь са́ѵлꙋ без̾ѻче́снꙋ кры́ющасѧ, и҆ показа́ тѧ хода́таѧ а҆на́нїе, тогѡ̀ и҆сцѣле́нїѧ."
 },
 {
  "type": "TEXT",
  "value": "Бг҃оро́диченъ: Бг҃а є҆го́же родила̀ є҆сѝ, пречⷭ҇таѧ дв҃о, того̀ молѝ ѿ всѧ́кагѡ ѡ҆бстоѧ́нїѧ и҆зба́вити всѧ̑ пою́щыѧ тѧ̀."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Прїѧ́телище бы́лъ є҆сѝ бжⷭ҇твеннагѡ дх҃а, и҆ ѻ҆гнедохновє́ннаѧ ᲂу҆ста̀, возглаша̑ющаѧ бжⷭ҇твєннаѧ пѣснопѣ̑нїѧ, и҆ наслажда̑ющаѧ дꙋ́шы, рѡма́не, притека́ющихъ тѝ."
 },
 {
  "type": "TEXT",
  "value": "Ꙗ҆́кѡ цѣвни́ца ты̀ бы́лъ є҆сѝ небе́снаѧ, и҆ гꙋ́сль, всѧ́кꙋю къ себѣ̀ влекꙋ́щи мы́сль повѣстьмѝ твои́ми, и҆ кра́сными твои́ми пѣснопѣ̑нїи."
 },
 {
  "type": "TEXT",
  "value": "Бл҃года́ть дхнѐ, и҆ всели́сѧ въ свѣтоно́снꙋю твою̀ дꙋ́шꙋ, вседѣ́тельнагѡ и҆ прест҃а́гѡ дх҃а, прехва́льне, и҆ тѧ̀ прїѧ́телище и҆ мꙋ́дра бг҃овѣща́телѧ содѣ́ла."
 },
 {
  "type": "TEXT",
  "value": "Бг҃оро́диченъ: Ꙗ҆́дъ и҆злїѧ̀ въ прама́тєрнїѧ ᲂу҆́бѡ слꙋ́хи ѕмі́й, но ты̀, чⷭ҇таѧ, сего̀ и҆стрѧсла̀ є҆сѝ, а҆рха́гг҃ловымъ гла́сомъ заче́нши, и҆ ро́ждши хрⷭ҇та̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Въ бꙋ́ри сꙋ́щымъ приста́нище бжⷭ҇твенное, приснотекꙋ́щїй и҆сто́чникъ показа̀ тѧ̀: во тмѣ́ же сꙋ́щымъ зарю̀, непристꙋ́пный свѣ́тъ, содѣ́ла тѧ̀, а҆на́нїе бл҃же́нне, и҆ ꙗ҆́кѡ ᲂу҆ч҃ника̀ достоѧвле́нна, ми́лостивнѡ въ тебѣ̀ воспочива́ѧй."
 },
 {
  "type": "TEXT",
  "value": "Ви́дѧй сокровє́ннаѧ, и҆ пре́жде бытїѧ̀ вѣ́дый всѧ́чєскаѧ, тебѣ̀ таѧ́щемꙋсѧ таѧ́щагосѧ сл҃нца ꙗ҆вѝ, и҆ногда̀ гони́телѧ, не по мно́зѣ вре́мени разорѧ́емыѧ ѿ негѡ̀ и҆́стины а҆пⷭ҇тола."
 },
 {
  "type": "TEXT",
  "value": "Постиже́нїѧ коне́цъ, неизслѣ́димый твоегѡ̀ строе́нїѧ: тѣ́мъ бо, сп҃се, стра́шнаѧ и҆зничто́жисѧ сме́рть. Сегѡ̀ ра́ди а҆на́нїа, ꙗ҆́кѡ побѣди́тель и҆ і҆ера́рхъ, за тѧ̀ ра́дꙋѧсѧ закала́етсѧ."
 },
 {
  "type": "TEXT",
  "value": "Бг҃оро́диченъ: Мт҃рнее дерзнове́нїе є҆́же къ сн҃ꙋ твоемꙋ̀ и҆мꙋ́щи, пречⷭ҇таѧ, сро́днагѡ промышле́нїѧ є҆́же ѡ҆ на́съ, не пре́зри мо́лимсѧ: ꙗ҆́кѡ тебѐ и҆ є҆ди́нꙋ хрⷭ҇тїа́не ко влⷣцѣ ѡ҆чище́нїе ми́лостивнѡ предлага́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Ꙗ҆́кѡ благолѣ́пнѣйшо ст҃и́лище, сосꙋ́дъ ꙗ҆́кѡ чистѣ́йшїй ᲂу҆тѣ́шителева бл҃года́ть ѡ҆брѣ́тши тѧ̀, рѡма́не бг҃омꙋ́дре, хра́мъ содѣ́ла, свѣ́томъ ᲂу҆кра́шенъ, и҆ всели́сѧ."
 },
 {
  "type": "TEXT",
  "value": "Воплоще́ннаго сн҃а бж҃їѧ ро́ждшаѧ и҆́стиннѡ, твою̀ дꙋ́шꙋ просвѣтѝ, и҆ ᲂу҆́мъ бжⷭ҇твеннагѡ зна́нїѧ и҆спо́лни, въ нощѝ предста́вши тебѣ̀ приснодв҃а."
 },
 {
  "type": "TEXT",
  "value": "Списа́ньми твои́хъ свѧще́нныхъ слове́съ, приснопа́мѧтне, ꙗ҆ви́всѧ всѣ̑мъ вои́стиннꙋ сладча́йшїй, всѧ̑ ᲂу҆веселѧ́еши, всѣ́хъ просвѣща́ѧ ᲂу҆́мъ, и҆ всѧ̑ наꙋча́ѧ зна́нїю спаси́тельномꙋ."
 },
 {
  "type": "TEXT",
  "value": "Бг҃оро́диченъ: Свѣ́тъ ро́ждшаѧ, ѻ҆́ч҃ее сло́во присносꙋ́щное, чⷭ҇таѧ, свѣща́тельными моли́твами твои́ми просвѣтѝ ᲂу҆́мъ мо́й, и҆ ѿженѝ тмꙋ̀ дꙋшѝ моеѧ̀, пречⷭ҇таѧ влⷣчце."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀."
 },
 {
  "type": "TEXT",
  "value": "Слꙋжи́ти навы́къ бг҃ꙋ жи́вꙋ свѧще́ннѣйше, разрꙋши́лъ є҆сѝ многоча́стное безꙋ́мныхъ ѕлонра́вїе, є҆ди́номꙋ наꙋча́ѧ а҆на́нїе, покланѧ́тисѧ трїѷпоста́сномꙋ бж҃ествꙋ̀."
 },
 {
  "type": "TEXT",
  "value": "Прїе́мъ въ рꙋ́цѣ твоѝ цр҃кѡ́внаѧ корми̑ла, къ ко́рмчїю хрⷭ҇тꙋ̀ прише́лъ є҆сѝ а҆пⷭ҇ле: и҆ сїю̀ дꙋ́хомъ ꙗ҆́кѡ кора́бль бжⷭ҇твенный, а҆на́нїе, ᲂу҆пра́вилъ є҆сѝ."
 },
 {
  "type": "TEXT",
  "value": "Созда́вый пра́вый пꙋ́ть, правоше́ствꙋющемꙋ посыла́емꙋ бы́ти, сла́вномꙋ твоемꙋ̀ ᲂу҆ч҃никꙋ̀ повелѣ́лъ є҆сѝ, влⷣко, пра́веднѣйшагѡ твоегѡ̀ и҆збра́нїѧ сосꙋ́дъ, ѿкрыва́ѧ молѧ́щасѧ."
 },
 {
  "type": "TEXT",
  "value": "Бг҃оро́диченъ: Да и҆зба́вимсѧ ѿ лю́тыхъ прегрѣше́нїй, мольба́ми твои́ми, бг҃ороди́тельнице чⷭ҇таѧ: и҆ да ᲂу҆лꙋчи́мъ, пречⷭ҇таѧ, бжⷭ҇твенное сїѧ́нїе, и҆зъ тебє̀ неизрече́ннѡ воплоще́ннагѡ сн҃а бж҃їѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Просвѣще́нїѧ и҆сполнѧ́емь, и҆ къ высотѣ̀ добродѣ́телей бжⷭ҇твеннѡ возводи́мъ, небре́глъ є҆сѝ ѡ҆ всѣ́хъ земны́хъ: и҆ сто́лпъ нбⷭ҇ный и҆ свѣти́льникъ благоче́стїѧ бы́лъ є҆сѝ."
 },
 {
  "type": "TEXT",
  "value": "Пло́ти ᲂу҆вѧди́лъ є҆сѝ жела̑нїѧ, и҆ дꙋ́шꙋ твою̀ ᲂу҆краси́лъ є҆сѝ свѣтлѣ́йшими чистоты̀ ѡ҆заре́ньми. И҆ добро́тꙋ рачи́тельнꙋю добродѣ́телей благолѣ́пїемъ ѡ҆бложи́лъ є҆сѝ."
 },
 {
  "type": "TEXT",
  "value": "Возненави́дѣвъ привре́менное и҆ сꙋ́етное, и҆ гнило́е и҆ те́чное наслажде́нїе, къ хра́мꙋ бцⷣы прилѣжѧ̀, ᲂу҆́мъ ѡ҆свѧти́лъ є҆сѝ, и҆ дꙋ́шꙋ и҆ тѣ́ло, достосла́вне."
 },
 {
  "type": "TEXT",
  "value": "Бг҃оро́диченъ: Всѝ предзрѧ́ще прⷪ҇ро́цы свѣ́тлѡ бꙋ́дꙋщее по́слѣжди ѿ дв҃ы, хрⷭ҇тѐ мо́й, твоѐ на землѝ пренепоро́чное ржⷭ҇тво̀, ꙗ҆́вственнѡ бг҃ови́дцы провѣща́ша."
 },
 {
  "type": "HEADER",
  "value": "Конда́къ а҆пⷭ҇ла, гла́съ в҃."
 },
 {
  "type": "TEXT",
  "value": "Подо́бенъ: Въ мл҃твахъ:"
 },
 {
  "type": "TEXT",
  "value": "Въ моли́твахъ теплѣ́йшїй застꙋ́пниче, и҆ просѧ́щымъ скорѣ́йшїй послꙋ́шателю, прїимѝ моле́нїе, а҆на́нїе, на́ше, и҆ хрⷭ҇та̀ молѝ поми́ловати ны̀, є҆ди́наго во ст҃ы́хъ почива́ющаго."
 },
 {
  "type": "TEXT",
  "value": "І҆́косъ: Просвѣще́нїемъ сїѧ́нїѧ твоегѡ̀ просвѣти́въ, хрⷭ҇тѐ мо́й, мра́къ моегѡ̀ се́рдца и҆ слѣпотꙋ̀, да́ждь мѝ сло́во, похвали́ти чи́стымъ смы́сломъ а҆пⷭ҇ла бг҃оза̑рныѧ добродѣ́тєли, и҆ стра̑сти блаже́ннагѡ: и҆сто́чникъ бо ты̀ є҆сѝ мꙋ́дрости, и҆ пода́тель благи́хъ, многоблагоꙋтро́бне. Тѣ́мъ ᲂу҆ѧсни́въ ѧ҆зы́къ мо́й, пѣ́сненное прїимѝ похвале́нїе, є҆ди́не во ст҃ы́хъ почива́ѧй."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Да вострꙋ́битъ мꙋ́дреннѡ бг҃оизбра́нное ста́до, бл҃гогла́сною трꙋбо́ю, страда̑нїѧ па́стырѧ а҆на́нїи, вопїѧ̀ своемꙋ̀ началопа́стырю хрⷭ҇тꙋ̀: ѻ҆тцє́въ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Да сла́витъ тѧ̀ ᲂу҆ч҃ника̀ бж҃їѧ, а҆на́нїе, и҆ і҆ера́рха вѣ́рна, и҆ свидѣ́телѧ бжⷭ҇твенныхъ страда́нїй, возглаша́ющи честна́ѧ цр҃ковь хрⷭ҇то́ва: ѻ҆тцє́въ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Не сме́рти боѧ́знїю, по любо́вїю па́ствы скрыва́ѧсѧ, во́лка ꙗ҆́коже а҆́гнца зрѧ̀ ᲂу҆кроти́вшасѧ, а҆на́нїа зовѧ́ше: ѻ҆тцє́въ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Ѿ двⷭ҇твенныхъ ложе́снъ вопло́щсѧ, ꙗ҆ви́лсѧ є҆сѝ, хрⷭ҇тѐ, на спасе́нїе на́ше. Тѣ́мже твою̀ мт҃рь вѣ́дѧще бцⷣꙋ, правосла́внѡ зове́мъ: ѻ҆тцє́въ на́шихъ бж҃е бл҃гослове́нъ є҆сѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бцⷣꙋ марі́ю бг҃омꙋ́дра и҆мѣ́лъ є҆сѝ ᲂу҆чи́телѧ, вразꙋмлѧ́ющꙋю тѧ̀ и҆ наꙋча́ющꙋю, и҆ пѣ́ти повелѣва́ющꙋю: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Возсїѧ́лъ є҆сѝ въ мі́рѣ ꙗ҆́кѡ свѣтлѣ́йшее со́лнце, рѡма́не бг҃омꙋ́дре, и҆ свѣ́тлѡ просвѣща́ѧ вѣ́рою зовꙋ́щыѧ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Твои́хъ глагѡ́лъ вѣща́нїе вселе́ннꙋю и҆спо́лни, и҆ краснѡ̀ пѣснопѣ́ти хрⷭ҇тꙋ̀ человѣ́ки наꙋчѝ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Ны́нѣ блажа́тъ тѧ̀ всѝ ро́ди человѣ́честїи, бцⷣе чⷭ҇таѧ, ꙗ҆́коже прорекла̀ є҆сѝ, и҆ вѣ́рою сла́вѧтъ: бл҃гослове́нъ пречⷭ҇таѧ, пло́дъ чре́ва твоегѡ̀."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Стра́нно слы́шати мнѧ́ше а҆на́нїа сла́вный, ѿ восхити́тельныѧ гꙋби́телѧ ста́да твоегѡ̀ си́лы, влⷣко, па́че сло́въ премѣне́нїе къ па́стырскомꙋ чи́нꙋ. Тѣ́мъ и҆гра́ѧ вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Да ра́дꙋетсѧ дне́сь, и҆ да и҆гра́етъ дх҃омъ всесла́вный и҆ блаже́нный гра́дъ тво́й, твоегѡ̀ благополꙋчи́въ застꙋпле́нїѧ сла́вне, и҆ благодарѧ̀ сп҃са да вопїе́тъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Животворѧ́щимъ повелѣ́нїемъ а҆на́нїе прече́стне, свѣтотвори́вꙋю ви́дѣннагѡ си́лꙋ са́ѵлꙋ проповѣ́далъ є҆сѝ: и҆ ѿрази́лъ є҆сѝ ѡ҆слѣпле́нїе, враче́вствєнныѧ твоѧ̑ возложи́въ дла̑ни, стрѣ́лы ѕмїи̑ныѧ и҆сто́рглъ є҆сѝ ꙗ҆́кѡ чешꙋи̑, вопїѧ̀: превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Трⷪ҇ченъ: Трисвѣ́тлое бжⷭ҇тво̀, є҆ди́нственнꙋю сїѧ́ющꙋю зарю̀, ѿ є҆ди́нагѡ трїѷпоста́снагѡ є҆стества̀ роди́телѧ безнача́льна, є҆диноесте́ственно же сло́во ѻ҆́ч҃ее, и҆ сца́рствꙋющаго є҆диносꙋ́щнаго дх҃а, ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Въ нꙋ́ждахъ спаса́ющаѧ, и҆ те́плѣ предста́тельствꙋющаѧ, всѣ̑мъ сꙋ́щымъ въ печа́ли всест҃а́ѧ влⷣчце, ᲂу҆милосе́рдисѧ, спаси́ мѧ, и҆ лю́тѣ па́дша воздви́гни, рꙋ́кꙋ по́мощи пре́жде конца̀ подаю́щи, да не но́щь мѧ̀ сме́ртнаѧ ѡ҆бы́метъ спѧ́ща: да тѧ̀ по до́лгꙋ сла́влю во вѣ́ки."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: За зако́ны ѻ҆ч҃єскїѧ бл҃же́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь, гдⷭ҇а по́йте дѣла̀, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Всю̀ мі́ра красотꙋ̀ и҆ сла́дость и҆ сла́вꙋ ѿтрѧ́съ, дꙋ́шꙋ твою̀ впери́лъ є҆сѝ къ вы̑шнимъ ликѡ́мъ, къ та́мѡшнимъ сла́вамъ и҆ свѣ́тлостѧмъ мꙋ́дре, къ добро́тамъ неизречє́ннымъ, къ пребыва́нїємъ та́мѡшнимъ, къ свѣ́тꙋ бг҃онача́лїѧ, зовѧ̀: тѧ̀ превозно́симъ хрⷭ҇тѐ, во вѣ́ки."
 },
 {
  "type": "TEXT",
  "value": "Бжⷭ҇твеннымъ жела́нїемъ распалѧ́емь, восхождє́нїѧ положи́лъ є҆сѝ въ се́рдцы твое́мъ, и҆ безпло́тное во пло́ти житїѐ стѧжа́лъ є҆сѝ: а҆́гг҃льскимъ чинѡ́мъ подо́бѧсѧ мꙋ́дре, та́мѡ сꙋ̑щаѧ возлюби́лъ є҆сѝ въ мі́рѣ пѣснопѣ̑нїѧ, вѣ́рою, рѡма́не, взыва́ѧ: тѧ̀ превозно́симъ хрⷭ҇тѐ, во вѣ́ки."
 },
 {
  "type": "TEXT",
  "value": "Высоковѣща́нїемъ бжⷭ҇твенныхъ твои́хъ, и҆ сладча́йшихъ слове́съ, блаже́ннѣйше рѡма́не, всѧ́къ по́мыслъ весели́ши человѣ́кѡвъ, и҆ ᲂу҆слажда́еши ꙗ҆́коже нѣ́кїй пита́тель богатотво́рный, и҆ просвѣща́еши свѣ́тлѡ, и҆ наꙋча́еши вопи́ти: гдⷭ҇а по́йте дѣла̀, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Равнобо́жїемъ прельсти́въ мѧ̀, человѣкоꙋбі́йца ѕмі́й лꙋка́внѣйшїй, ꙗ҆́кѡ плѣ́нника и҆схитѝ сла́дости ра́йскїѧ. Но влⷣка є҆стество́мъ сн҃ъ бж҃їй, вопло́щсѧ, прїи́де ѿ дв҃ы марі́и, и҆ взѧ́тъ мѧ̀ на высотꙋ̀ ѡ҆божи́въ: є҆го́же превозно́симъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ."
 },
 {
  "type": "TEXT",
  "value": "Разрꙋши́лъ є҆сѝ всехва́льне, тмꙋ̀ невѣ́дѣнїѧ, свѣ́тъ же и҆́стинный возсїѧ́лъ є҆сѝ дама́скꙋ трїѷпоста́сный: но ꙗ҆́кѡ чадолюби́вый ѻ҆ц҃ъ, и҆ любо́вный пастыренача́льникъ въ правосла́внѣй вѣ́рѣ того̀ сохранѝ."
 },
 {
  "type": "TEXT",
  "value": "Сїѐ лѣ́тное соверша́юще торжество̀, прїиди́те свѣтоза́рнѡ сїѧ́юще дꙋше́внымъ досто́инствомъ, трⷪ҇цы слꙋжи́телѧ же, и҆ проповѣ́дника а҆на́нїи трїсїѧ́ннꙋю добродѣ́тель воспои́мъ."
 },
 {
  "type": "TEXT",
  "value": "Ѽ па́че человѣ́ча досто́инства твоегѡ̀ бл҃же́нне а҆на́нїе. Ꙗ҆́кѡ ᲂу҆ч҃ни́къ бо возлю́бленъ бы́лъ є҆сѝ: ꙗ҆́кѡ па́стырь почи́лъ є҆сѝ: и҆ ꙗ҆́кѡ страда́лецъ хрⷭ҇тꙋ̀ спросла́вилсѧ є҆сѝ, вѣнцы̑ мч҃нически ᲂу҆краша́емь."
 },
 {
  "type": "TEXT",
  "value": "Бг҃оро́диченъ: Пречⷭ҇таѧ, всенепоро́чнаѧ, сосꙋ́де благово́нїѧ, и҆спросѝ ᲂу҆ хрⷭ҇та̀, є҆го́же родила̀ є҆сѝ, дарова́ти во́инствꙋ на́шемꙋ на врагѝ побѣ́дꙋ, и҆ ѿ рабо́тнагѡ и҆́га да́ти ѡ҆сла́бꙋ лю́демъ твои̑мъ: тѧ́ бо непреста́ннѡ велича́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. Тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь правосла́внѡ велича́емъ."
 },
 {
  "type": "TEXT",
  "value": "Го́рнѣйшымъ сла́вне ликѡ́мъ совокꙋпи́лсѧ є҆сѝ безплѡ́тнымъ, и҆дѣ́же неизрече́ннаѧ пребыва́етъ ра́дость, и҆ всегда́шнее наслажде́нїе, и҆дѣ́же ѻ҆́ный бг҃онача́лїѧ свѣ́тъ є҆́сть и҆ весе́лїе, и҆дѣ́же неизглаго́ланнаѧ сла́ва, блаже́ннѣйше."
 },
 {
  "type": "TEXT",
  "value": "Съ првⷣными внꙋ́трь бжⷭ҇твенныѧ сла́вы всели́всѧ, зри́ши красотꙋ̀ неизрече́ннꙋю ѻ҆́нꙋю, зри́ши сла́дость неконча́емꙋю, зри́ши добрѡ́ты нбⷭ҇ныѧ, и҆́стиннѡ жела̑нныѧ, мꙋ́дре, ви́диши патрїа́рхѡвъ ли́ки, рѡма́не сла́вне."
 },
 {
  "type": "TEXT",
  "value": "Твою̀ свѣтоно́снꙋю па́мѧть вѣ́рнѡ соверша́ющыѧ ѿ бѣ́дъ и҆зба́ви, моли́твами твои́ми, бг҃омꙋ́дре, и҆ ѿ всѧ́кагѡ вре́да, рѡма́не, и҆ ско́рби чꙋжда́гѡ, и҆ нбⷭ҇ныѧ сла́вы полꙋчи́ти сподо́би и҆ црⷭ҇твїѧ го́рнѧгѡ, бл҃же́ннѣйше."
 },
 {
  "type": "TEXT",
  "value": "Бг҃оро́диченъ: Ѿ дре́внѧгѡ паде́нїѧ человѣ́ческїй ро́дъ первозда́ннагѡ бы́сть тлѣ́ненъ, дв҃о бцⷣе, и҆ порабоще́нъ страстьмѝ грѣхо́вными: но и҆зъ тебє̀ рожде́йсѧ пребл҃гі́й бг҃ъ свои́мъ бл҃гоꙋтро́бїемъ того̀ воззва̀."
 },
 {
  "type": "TEXT",
  "value": "Свѣти́ленъ ѻ҆ктѡ́иха. Сла́ва, а҆пⷭ҇ла. Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Дама́скъ, а҆пⷭ҇ле, ны́нѣ ѡ҆ тебѣ̀ хва́литсѧ, є҆мꙋ́же ᲂу҆пространи́лъ є҆сѝ крѣ́пость мꙋче́нїемъ, а҆на́нїе, ᲂу҆чи́тель бы́въ хрⷭ҇та̀ гонѧ́щемꙋ, ꙗ҆́кѡ ᲂу҆ч҃ни́къ наро́читъ хрⷭ҇та̀ гони́магѡ, къ немꙋ́же ѡ҆ на́съ моли́сѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Ѽ та́инствъ твои́хъ! Ѽ чꙋде́съ твои́хъ! Ка́кѡ по ржⷭ҇твѣ̀ дв҃а пребыла̀ є҆сѝ, ꙗ҆́коже пре́жде ржⷭ҇тва̀; ка́кѡ бг҃а вмѣсти́ла є҆сѝ, нигдѣ́же вмѣсти́маго; но вои́стиннꙋ несказа̑нна твоѧ̑ сꙋ́ть всѧ̑, бл҃гослове́ннаѧ дв҃о мт҃и марі́е."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, а҆пⷭ҇ла, гла́съ и҃."
 },
 {
  "type": "TEXT",
  "value": "А҆нато́лїево: Оу҆ч҃ничѐ сп҃совъ, і҆ера́рше сла́вне, сла́во мꙋ́ченикѡвъ, а҆на́нїе, свѣти́льниче свѣтлѣ́йшїй, на́шъ же градоде́ржче, прилѣ́жнѡ моли́сѧ и҆зба́вити ста́до твоѐ ѿ бѣ́дъ, и҆ спастѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Тѧ̀ ви́дѧщи пригвожда́ема на крⷭ҇тѣ̀ і҆и҃се, и҆ стрⷭ҇ти прїе́млюща во́лею, дв҃а и҆ мт҃и твоѧ̀, влⷣко, ᲂу҆вы̀ мнѣ̀, вопїѧ́ше, ча́до сла́дкое, ра̑ны непра́веднѡ ка́кѡ терпи́ши, врачꙋ̀, и҆сцѣли́вый человѣ́ческое неможе́нїе, и҆ ѿ тлѝ всѣ́хъ и҆зба́вивый, милосе́рдїемъ твои́мъ;"
 },
 {
  "type": "HEADER",
  "value": "На лїтꙋргі́и бл҃жє́нна гла́са на д҃: и҆ а҆пⷭ҇ла пѣ́снь г҃, на д҃."
 },
 {
  "type": "HEADER",
  "value": "Прокі́менъ а҆пⷭ҇ла, гла́съ и҃:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ:"
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю:"
 },
 {
  "type": "HEADER",
  "value": "А҆пⷭ҇лъ дѣѧ́нїй зача́ло к҃а, ѿ полꙋ̀."
 },
 {
  "type": "TEXT",
  "value": "А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и."
 },
 {
  "type": "TEXT",
  "value": "Сті́хъ: Бг҃ъ прославлѧ́емь въ совѣ́тѣ ст҃ы́хъ."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло н҃а."
 },
 {
  "type": "TEXT",
  "value": "Слꙋ́шаѧй ва́съ:"
 },
 {
  "type": "TEXT",
  "value": "Прича́стенъ: Во всю̀ зе́млю:"
 }
]