ponomar-pwa/static/data/shared/menaion-daily/10-23/1.json

[
 {
  "type": "HEADER",
  "value": "Ѻ҆ктѡ́врїа к҃г"
 },
 {
  "type": "HEADER",
  "value": "Ст҃а́гѡ а҆пⷭ҇ла і҆а́кѡва, бра́та бж҃їѧ:"
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Прїиди́те, па́мѧть бг҃обра́та почти́мъ свѧще́ннѡ, ѽ бг҃омꙋ́дрїи. И҆́го бо взе́мъ хрⷭ҇то́во ᲂу҆се́рднѡ, є҆ѵⷢ҇лїа бл҃гости є҆гѡ̀ и҆ црⷭ҇твїѧ проповѣ́дникъ показа́сѧ, и҆ тогѡ̀ неизрече́нное строе́нїе ᲂу҆вѣрѧ́етъ. Тѣ́мже и҆́мъ, всеси́льне, ѡ҆чище́нїе на́мъ да́рꙋй."
 },
 {
  "type": "TEXT",
  "value": "Всѧ̑ ѡ҆гласѝ вселе́нныѧ концы̀ глагѡ́лъ твои́хъ вѣща́нїе, и҆́миже просвѣща́емсѧ добродѣ́телей бжⷭ҇твенныѧ ко всѧ́комꙋ ви́дꙋ, и҆ наставлѧ́еми вѣ́рнѡ ст҃ы́ѧ трⷪ҇цы къ позна́нїю. Тѣ́мъ мо́лимъ тѧ̀ ꙗ҆́кѡ і҆ера́рха: моли́сѧ і҆и҃сꙋ чл҃вѣколю́бцꙋ, спастѝ дꙋ́шы на́шѧ."
 },
 {
  "type": "TEXT",
  "value": "И҆здале́ча прозрѧ̀ твоѐ жи́тельство і҆а́кѡве, бра́та тѧ̀ прїѧ̀ хрⷭ҇то́съ чл҃вѣколю́бецъ, премꙋ́дрый прови́децъ, і҆ерꙋсали́мѡвъ свѧщенноѧвле́нника вѣ́рна, и҆ пастыренача́льника поставлѧ́етъ и҆ таи́нника, неизречє́ннаѧ свѧщеннодѣ́йствꙋюща та̑инства. Є҆го́же и҆ ны́нѣ молѝ, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ ѕ҃: Самогла́сенъ:"
 },
 {
  "type": "TEXT",
  "value": "Кро́вїю мꙋче́нїѧ свѧще́нство ᲂу҆краси́лъ є҆сѝ, свѧщенномч҃ниче а҆пⷭ҇ле: на крилѣ́ бо ст҃и́лища предста́въ, бг҃а сло́ва проповѣ́далъ є҆сѝ, творца̀ сꙋ́ща всегѡ̀. Тѣ́мъ ѿ і҆ꙋдє́й све́рженъ, нбⷭ҇ныхъ черто́гѡвъ сподо́билсѧ є҆сѝ, бг҃обра́те і҆а́кѡве, хрⷭ҇та̀ бг҃а молѝ, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Кто̀ тебѐ не ᲂу҆блажи́тъ:"
 },
 {
  "type": "HEADER",
  "value": "На стїхо́внѣ стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Благоче́ствꙋющихъ мно́жєства, ны́нѣ сщ҃е́нный пра́здникъ ра́достнѡ соверша́юще, воскли́кнемъ всѝ, вѣ́рнѡ восхвалѧ́юще во ѱалмѣ́хъ и҆ пѣ́нїихъ бг҃обра́та дне́сь, и҆ ᲂу҆ченика̀ гдⷭ҇нѧ: при́снѡ бо мо́литъ спасти́сѧ на́мъ."
 },
 {
  "type": "TEXT",
  "value": "Сті́хъ: Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Є҆́же по пло́ти гдⷭ҇нѧ жела́нїѧ, мꙋ́дре, бра́тъ показа́лсѧ є҆сѝ, ᲂу҆чени́къ, и҆ самови́децъ бжⷭ҇твенныхъ та̑инъ, бѣ́гаѧй съ ни́мъ, и҆ въ є҆гѵ́птѣ бы́въ со і҆ѡ́сифомъ, мт҃рїю же і҆и҃совою: съ ни́миже молѝ спасти́сѧ на́мъ."
 },
 {
  "type": "TEXT",
  "value": "Сті́хъ: Небеса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь."
 },
 {
  "type": "TEXT",
  "value": "А҆пⷭ҇льскїй ли́къ тебѐ и҆збра̀, свѧще́нствовати пе́рвѣе въ сїѡ́нѣ ст҃ѣ́мъ, хрⷭ҇тꙋ̀ бл҃годѣ́телю, ꙗ҆́кѡ сꙋ́ща тогѡ̀ по пло́ти сро́дствомъ и҆ бра́та, спꙋтеше́ственника и҆ наслѣ́дника слѣдѡ́въ тогѡ̀, і҆а́кѡве."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Началопа́стырѧ хрⷭ҇та̀ бра́тъ бы́лъ є҆сѝ и҆ прее́мникъ, и҆ во а҆пⷭ҇лѣхъ знамени́тъ, є҆́же за того̀ ᲂу҆мре́ти возлюби́лъ є҆сѝ, и҆ мꙋче́нїѧ не ᲂу҆стыдѣ́лсѧ є҆сѝ, і҆а́кѡве сла́вне: того̀ молѝ непреста́ннѡ, спастѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Влⷣчце, прїимѝ:"
 },
 {
  "type": "HEADER",
  "value": "Тропа́рь, гла́съ в҃:"
 },
 {
  "type": "TEXT",
  "value": "Ꙗ҆́кѡ гдⷭ҇ень ᲂу҆ч҃ни́къ, воспрїѧ́лъ є҆сѝ пра́ведне є҆ѵⷢ҇лїе: ꙗ҆́кѡ мч҃никъ и҆́маши, є҆́же неѡпи́санное: дерзнове́нїе, ꙗ҆́кѡ бра́тъ бж҃їй: є҆́же моли́тисѧ, ꙗ҆́кѡ і҆ера́рхъ. Молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Всѧ̑ па́че смы́сла:"
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й:"
 },
 {
  "type": "TEXT",
  "value": "А҆пⷭ҇ле хрⷭ҇то́въ, и҆ самови́дче и҆ мч҃ниче, і҆а́кѡве премꙋ́дре, бра́те бж҃їй бл҃же́нне, вѣ́рою пра́зднꙋющыѧ честнꙋ́ю твою̀ па́мѧть, свободѝ ѿ ѡ҆бдержа́щихъ прегрѣше́нїй моли́твами твои́ми, нб҃са̀ наслѣ́дꙋѧй си́лою дх҃а. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Кꙋпинꙋ̀, ю҆́же мѡѷсе́й неѡпа́льнꙋ ви́дѣ, го́рꙋ бж҃їю, ст҃ы́й ѻ҆́блакъ: сѣ́нь нескве́рнꙋю, бг҃опрїѧ́тнꙋю трапе́зꙋ: пала́тꙋ высо́кагѡ цр҃ѧ̀, всесвѣ́тлꙋю и҆ непроходи́мꙋю две́рь, дв҃о, пое́мъ тѧ̀."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ є҃."
 },
 {
  "type": "TEXT",
  "value": "Подо́бенъ: Собезнача́льное:"
 },
 {
  "type": "TEXT",
  "value": "Оу҆ч҃ни́къ словесѐ, и҆́стины проповѣ́дникъ, ꙗ҆́кѡ стрѣла̀ по́сланъ бы́лъ є҆сѝ, просвѣща́ѧ сꙋ́щыѧ во тмѣ̀ лю́тѣй, свѧ́те а҆пⷭ҇ле: и҆ безбо́жїѧ мглꙋ̀ ѿгонѧ̀ ѿ землѝ, всѧ̑ благовѣ́рꙋющыѧ сы́ны днѐ показа́лъ є҆сѝ, хрⷭ҇то́въ ви́дче, свѧ́те і҆а́кѡве. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "И҆́же ᲂу҆пова́нїе на тѧ̀, дв҃о пречⷭ҇таѧ, непреткнове́нное и҆мꙋ́ще, покро́въ сꙋ́щи, ѿ разли́чныхъ напа́стей и҆ ѡ҆бстоѧ́нїй, и҆ бѣ́дъ лю́тыхъ свободи́ ны, молѧ́щи сн҃а твоего̀, со а҆пⷭ҇лы є҆гѡ̀: и҆ спасѝ всѧ̑ воспѣва́ющыѧ тѧ̀."
 },
 {
  "type": "HEADER",
  "value": "Ѻ҆́ба канѡ́на ѻ҆ктѡ́иха, безъ мч҃ничнѡвъ. И҆ а҆пⷭ҇ла канѡ́нъ на ѕ҃. Ѳеофа́ново. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Даѧ́нїю благо́мꙋ, і҆а́кѡве, и҆ да́рꙋ соверше́ннꙋ ѿ ѻ҆ц҃а̀ свѣ́тѡвъ человѣ́кѡмъ подаѧ́тисѧ, ᲂу҆чи́ши ꙗ҆́вѣ, є҆мꙋ́же причасти́тисѧ, а҆пⷭ҇ле, тѧ̀ пою́щымъ, помоли́сѧ."
 },
 {
  "type": "TEXT",
  "value": "Свѣ́томъ просвѣще́нъ, до́блїй, бжⷭ҇твеннагѡ дх҃а, и҆ съ ни́мъ зако́ны и҆зложи́въ, цр҃кви ᲂу҆правлѧ́еши ꙗ҆зы́кѡвъ, ꙗ҆́кѡ хрⷭ҇то́въ а҆пⷭ҇лъ, свѧщеннотаи́нниче всеблаже́нне."
 },
 {
  "type": "TEXT",
  "value": "Ли́къ а҆пⷭ҇льскїй, всемꙋ́дре, ꙗ҆́вѣ ᲂу҆краси́лъ є҆сѝ, ꙗ҆́кѡ пе́рвый і҆ера́рхъ бы́въ, самодѣ́йствомъ сло́ва пома́занъ, ꙗ҆́кѡ ᲂу҆ч҃ни́къ и҆ бра́тъ бж҃їй, свѧщеннопроповѣ́дникъ свѧще́ннѣйшїй."
 },
 {
  "type": "TEXT",
  "value": "Бг҃оро́диченъ: И҆сто́чникъ тѧ̀ и҆сцѣле́нїй и҆мꙋ́ще, почерпа́емъ, ꙗ҆́кѡ и҆сто́чникъ ро́ждшꙋю жи́зни, бцⷣе дв҃о чⷭ҇таѧ, и҆ дꙋ́шъ врачевство̀, и҆ тѣле́съ ѡ҆бновле́нїе."
 },
 {
  "type": "TEXT",
  "value": "Катава́сїа: Ѿве́рзꙋ ᲂу҆ста̀ моѧ̑:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "Весели́тсѧ ѡ҆ тебѣ̀ колѣ́но і҆ꙋ́дово дне́сь, хрⷭ҇то́выми свѣтлостьмѝ ви́дѣ тѧ̀ свѣ́тлѡ ѡ҆блиста́юща."
 },
 {
  "type": "TEXT",
  "value": "Ѕвѣздꙋ̀ бг҃осїѧ́ннꙋ цр҃ковь ꙗ҆зы́чнаѧ и҆мꙋ́щи тѧ̀, бл҃госла́внаго проповѣ́дателѧ, и҆ бжⷭ҇твеннымъ свѣ́томъ ѡ҆зарѧ́етсѧ."
 },
 {
  "type": "TEXT",
  "value": "Зако́нъ ты̀ жи́зни цр҃кви хрⷭ҇то́вѣ положи́лъ є҆сѝ, жизнода́тельнымъ дх҃омъ ты̀ законополага́ѧ и҆ вѣща́ѧ."
 },
 {
  "type": "TEXT",
  "value": "Бг҃оро́диченъ: Є҆го́же родила̀ є҆сѝ пло́тїю, ѽ бг҃ома́ти! И҆зъ ѻ҆ц҃а̀ возсїѧ́вшаго: того̀, чⷭ҇таѧ, і҆а́кѡвъ, ꙗ҆́кѡ бг҃а всѣ́хъ, проповѣ́да."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Сро́дникъ по пло́ти і҆и҃совъ бы́лъ є҆сѝ, и҆ ѿ негѡ̀ а҆пⷭ҇ле, бл҃года́ть мно́гꙋ прїѧ́лъ є҆сѝ, и҆ всѣ̑мъ препо́далъ є҆сѝ просвѣще́нїе и҆ ра́зꙋмъ, всемꙋ́дре і҆а́кѡве, и҆ і҆́дѡльскꙋю ле́сть и҆зъ ко́рене и҆сто́ргнꙋвъ: тѣ́мъ и҆̀же тмы̀ предста́тели и҆ лестцы̀ непра́веднѡ тѧ̀ ᲂу҆бива́ютъ, сп҃са проповѣ́дающа. Сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Сл҃нца ѻ҆́блаче разꙋ́мнагѡ, бжⷭ҇твеннагѡ свѣ́та свѣти́льниче златокова́нный, нескве́рнаѧ, небла́знаѧ, всенепоро́чнаѧ влⷣчце, ѡ҆мраче́ннꙋю дꙋ́шꙋ мою̀ ѡ҆слѣпле́нїемъ страсте́й, безстра́стїѧ заре́ю просвѣтѝ, молю́сѧ: и҆ ѡ҆скверне́нное моѐ се́рдце ѡ҆мы́й потѡ́ки ᲂу҆миле́нїѧ, покаѧ́нїѧ же слеза́ми, и҆ ѿ тимѣ́нїѧ мѧ̀ ѡ҆чи́сти дѣ́лъ мои́хъ да любо́вїю зовꙋ́ ти: бцⷣе приснодв҃о, молѝ хрⷭ҇та̀ бг҃а прегрѣше́нїй ѡ҆ставле́нїе пода́ти мѝ, тебе́ бо и҆мѣ́ю наде́ждꙋ ра́бъ тво́й."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе."
 },
 {
  "type": "TEXT",
  "value": "Вве́лъ є҆сѝ въ мо́ре твоѧ̑ ко́ни, а҆пⷭ҇лы, сп҃се, и҆ просвѣти́ша ꙗ҆зы́ки, къ твоемꙋ̀ позна́нїю привле́кше, влⷣко."
 },
 {
  "type": "TEXT",
  "value": "Нескве́рно ꙗ҆́кѡ зерца́ло ꙗ҆́вльсѧ, и҆ перводѣ́тєльныѧ лꙋчы̀ несозда́нныѧ трⷪ҇цы и҆звѣ́стнѡ прїе́мъ, всѣ̑мъ возсїѧ́лъ є҆сѝ."
 },
 {
  "type": "TEXT",
  "value": "Валѧ́емаго тѧ̀ ка́менѧ прⷪ҇ро́чество ѡ҆свѧще́нное зри́тъ, и҆ сокрꙋша́юща пре́лести гнило́е сꙋ́етство си́лою дх҃а."
 },
 {
  "type": "TEXT",
  "value": "Бг҃оро́диченъ: Вше́дъ, ѽ бг҃ома́ти! Во чре́во твоѐ превѣ́чное сло́во, роди́выйсѧ и҆зъ ѻ҆ц҃а̀ неизрече́ннѡ, і҆а́кѡва а҆пⷭ҇ла ꙗ҆влѧ́етъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Ты̀ гдⷭ҇и свѣ́тъ, блиста́нїе і҆а́кѡва ꙗ҆ви́лъ є҆сѝ свѣтѧ́ща, зємны́ѧ невѣ̑дѣнїѧ и҆ тмы̑ и҆змѣнѧ́юща."
 },
 {
  "type": "TEXT",
  "value": "Тѧ̀, гдⷭ҇и, гла́сомъ свобо́днымъ проповѣ́да пра́ведный бра́тъ тво́й, подража́тель же стрⷭ҇ти бы́сть, ᲂу҆бива́емь."
 },
 {
  "type": "TEXT",
  "value": "Кі́й земны́й ᲂу҆́мъ похва́лъ пѣ́нїѧ тебѣ̀ принестѝ мо́жетъ, добродѣ́телей просвѣще́нномꙋ бл҃года́тьми, і҆а́кѡве."
 },
 {
  "type": "TEXT",
  "value": "Бг҃оро́диченъ: Тѧ̀ и҆́стиннѡ бжⷭ҇твенное ѡ҆брѣ́тъ жили́ще, всели́сѧ, ѽ дв҃о! На́ше спасе́нїе, сло́во, промышлѧ́ѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Ѻ҆де́ждею зако́нною ѡ҆блече́ тѧ лꙋ́чшею, и҆ і҆ера́рха ꙗ҆влѧ́етъ, а҆арѡ́на дре́внѧгѡ честнѣ́йша, и҆́же ми́лости ра́ди въ бра́тство прїе́мый тѧ̀."
 },
 {
  "type": "TEXT",
  "value": "Ѻ҆рга́нъ, дѣ́йствы ᲂу҆дарѧ́емь дх҃а всѐ помышле́нїе наслажда́ѧ, и҆ бг҃ꙋ приве́дъ спаса́ємыѧ ѿ рабо́ты лютѣ́йшїѧ, бы́лъ є҆сѝ и҆зрѧ́днѣйшїй."
 },
 {
  "type": "TEXT",
  "value": "Возжажда́въ, жи́зненныѧ и҆спи́лъ є҆сѝ воды̀, и҆ рѣ́ки и҆сточа́еши бг҃оглаго́ливагѡ твоегѡ̀ чре́ва, текꙋ́щыѧ вселе́ннѣй бжⷭ҇твеннымъ дх҃омъ."
 },
 {
  "type": "TEXT",
  "value": "Бг҃оро́диченъ: Є҆́ѵа ᲂу҆́бѡ преслꙋша́нїемъ сме́рть родѝ, бцⷣа же жи́знь заче́нши родѝ нестарѣ́ющꙋюсѧ, и҆ дре́внїй за всѣ́хъ ѿдадѐ до́лгъ."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Ѻ҆́ч҃ее є҆диноро́дное бг҃ъ сло́во, прише́дшее къ на́мъ въ послѣ̑днїѧ дни̑, і҆а́кѡве бжⷭ҇твенне, пе́рваго тѧ̀ показа̀ і҆ерꙋсалѵ́млѧнъ па́стырѧ и҆ ᲂу҆чи́телѧ, и҆ вѣ́рнаго строи́телѧ та́инствъ дх҃о́вныхъ: тѣ́мже тѧ̀ всѝ чти́мъ, а҆пⷭ҇толе."
 },
 {
  "type": "TEXT",
  "value": "І҆́косъ: Рожде́нїе тѧ̀ і҆ѡ́сифово, і҆ерꙋсалѵ́мѡвъ пе́рваго і҆ера́рха, і҆а́кѡве бг҃ови́дче, и҆ гдⷭ҇нѧ бра́та, пѣ́сньми похва́льными воспое́мъ вѣ́рнѡ, и҆ къ тебѣ̀ возопїе́мъ: да́рꙋй на́мъ да́ръ соверше́нъ ѿ ѻ҆ц҃а̀ свѣ́тѡвъ, и҆ ѿженѝ ско́рбь, настоѧ́щꙋю ѿ мно́жества прегрѣше́нїй. Поднесо́ша бо вразѝ на ны̀ пѧ́тꙋ, и҆ ѡ҆бстꙋпи́ша на́съ і҆сма́ильтѧне, и҆́хже сокрꙋшѝ вско́рѣ лꙋ́ки, свѧщенноѧвле́нне, ꙗ҆́кѡ да тѧ̀ всѝ почита́емъ, а҆пⷭ҇толе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Ꙗ҆́кѡ въ пещѝ на го́рницѣ просвѣща́емь бжⷭ҇твеннымъ прише́ствїемъ дх҃а, та́инственнѡ, бг҃оглаго́ливе, возопи́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Свы́ше дыха́нїе ѕѣ́льное, а҆пⷭ҇тола ѧ҆зы́комъ ѻ҆гнеѻбра́знымъ вѣща́ти бж҃їѧ вели́чєствїѧ ᲂу҆стро́и: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Видѣ́нїѧ дѣ́ѧтельнагѡ и҆злага́ѧ дщи́цꙋ, ѿ скрижа́ли же ꙗ҆́кѡ дꙋхо́вныѧ, человѣ́ки наꙋчи́лъ є҆сѝ: бл҃гослове́нъ є҆сѝ, бж҃е мо́й, зовы́й, гдⷭ҇и."
 },
 {
  "type": "TEXT",
  "value": "Бг҃оро́диченъ: Возсозда́вый мі́ръ, во ᲂу҆тро́бѣ твое́й, бг҃оневѣ́сто, бжⷭ҇твеннагѡ слꙋже́нїѧ показꙋ́етъ соверши́телѧ і҆а́кѡва, взыва́юща: бл҃гослове́на ты̀ въ жена́хъ, всенепоро́чнаѧ влⷣчце."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Рꙋ́ки распросте́ръ крѣ̑пкїѧ, а҆пⷭ҇толы твоѧ̑, сп҃се, бл҃гослови́лъ є҆сѝ, восходѧ̀, влⷣко, къ безнача́льномꙋ ѻ҆ц҃ꙋ̀ твоемꙋ̀, и҆ ᲂу҆стро́илъ є҆сѝ ты́ѧ съ весе́лїемъ вопи́ти: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Ꙗ҆́коже ѡ҆бѣща́лсѧ є҆сѝ нело́жнѡ а҆пⷭ҇толѡмъ твои̑мъ, дх҃а посла́лъ є҆сѝ, сегѡ̀ і҆а́кѡвъ, влⷣко, свѣ́тлостїю просвѣща́емь, вселе́ннꙋю мо́лнїѧми просвѣща́етъ ꙗ҆́вѣ, и҆ вопїе́тъ тебѣ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Мꙋ́дрость, і҆а́кѡве мꙋ́дре, ѵ҆поста́снꙋю и҆мѣ́лъ є҆сѝ ᲂу҆чи́телѧ, ᲂу҆ча́щꙋ тѧ̀ неизречє́ннымъ и҆ неизглагѡ́ланнымъ та́йнамъ, и҆ къ благоче́стїю лю́ди зва́ти воздви́глъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Го́рꙋ ꙗ҆вле́ннꙋ мы́сленнꙋю, дв҃о чⷭ҇таѧ, прⷪ҇ро́къ ви́дѣ тѧ̀: и҆зъ тебє́ бо пречестны́й ка́мень ѿсѣче́сѧ, спаса́ѧ вселе́ннꙋю вои́стиннꙋ, бжⷭ҇твеннѡ пою́щꙋю: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Прїиди́те, первопресто́льника всѝ, цр҃кве свѣти́льника, свѧще́нными і҆а́кѡва пѣ́сньми, ꙗ҆́кѡ і҆ера́рха и҆ хрⷭ҇топроповѣ́дника, тезоиме́ннѣ пра́веднаго и҆менова́нна, велича́емъ."
 },
 {
  "type": "TEXT",
  "value": "Бжⷭ҇твеннаго ѻ҆́бщника ꙗ҆́кѡ ꙗ҆́вльшасѧ безконе́чнагѡ црⷭ҇твїѧ, и҆ бж҃їѧ нарече́нна бра́та, и҆ житїе́мъ и҆́стинствꙋюща, и҆менова́нїе прїе́мша, свѧщеннотаи́нника, тѧ̀ велича́емъ, і҆а́кѡве."
 },
 {
  "type": "TEXT",
  "value": "Прⷭ҇то́лꙋ предстоѧ̀, бл҃же́нне, вѣнцено́сецъ трⷪ҇цы, вѣ́рою почита́ющихъ твою̀ па́мѧть, нетлѣ́ющихъ наслади́тисѧ че́стей, ꙗ҆́кѡ і҆ера́рхъ, і҆а́кѡве, благопрїѧ́тенъ, твоего̀ влⷣкꙋ ᲂу҆молѝ."
 },
 {
  "type": "TEXT",
  "value": "Бг҃оро́диченъ: Ты̀ ѿ дв҃ы рожде́ннаго неискꙋсобра́чнѡ, бг҃оѧвле́нне, ᲂу҆чє́нїи твои́ми ꙗ҆́вѣ честѝ бг҃а наꙋча́еши, воплоще́нное сло́во: въ него́же мы̀ вѣ́рꙋюще ны́нѣ, досто́йнѡ велича́емъ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Дх҃омъ во ст҃и́лищи:"
 },
 {
  "type": "TEXT",
  "value": "Ꙗ҆́кѡ гдⷭ҇нѧ бра́та бы́вша, блаже́нне і҆а́кѡве бг҃одохнове́нне, вѣ́рнїи по до́лгꙋ хва́лимъ тѧ̀, сла́вѧще свѣ́тлꙋю и҆ всечестнꙋ́ю и҆ свѣтоно́снꙋю твою̀ па́мѧть, моли́сѧ прилѣ́жнѡ за чтꙋ́щихъ тѧ̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Моли́твенницꙋ тебѣ̀ приво́димъ, и҆ те́плꙋю предста́тельницꙋ, чⷭ҇тꙋю мт҃рь твою̀, вѣ́рнїи, по до́лгꙋ: сподо́би рабы̑ твоѧ̑ причасти́тисѧ сла́вы твоеѧ̀, и҆ пра́ведныхъ ча́сти, и҆ сла́дости ра́йскїѧ, и҆ ᲂу҆лꙋчи́ти на́мъ нбⷭ҇ное црⷭ҇твїе."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ и҃."
 },
 {
  "type": "TEXT",
  "value": "Подо́бенъ: Гдⷭ҇и, а҆́ще и҆ на сꙋди́щи:"
 },
 {
  "type": "TEXT",
  "value": "Гдⷭ҇и, а҆́ще и҆ на крилѣ̀ предста̀ ст҃и́лища і҆а́кѡвъ, но дерзнове́нїемъ возопи́въ, бг҃а сло́ва тѧ̀ проповѣ́да, содѣ́телѧ всѣ́хъ, въ мі́ръ прише́дшаго: є҆гѡ́же моли́твами и҆ ны́нѣ пода́ждь просвѣще́нїе дꙋша́мъ на́шымъ. Два́жды."
 },
 {
  "type": "TEXT",
  "value": "Гдⷭ҇и, а҆́ще и҆ дре́вомъ глава̀ а҆пⷭ҇лова сокрꙋше́на бы́сть, но въ раѝ дре́во жи́зненное є҆мꙋ̀ даде́сѧ, и҆ ѿ привре́менныхъ ѿрѣши́всѧ, вѣ́чнѡ весели́тсѧ: є҆гѡ́же моли́твами цр҃квамъ ми́ръ тво́й низпослѝ."
 },
 {
  "type": "TEXT",
  "value": "Гдⷭ҇и, тѧ̀ и҆сповѣ́давъ на землѝ до́блественнѣ бра́тъ бж҃їй, сн҃а бг҃а вы́шнѧгѡ, и҆́скреннѡ приснопа́мѧтный, ѕлосла̑вныѧ врагѝ посра́ми и҆ ᲂу҆кротѝ: сегѡ̀ ра́ди и҆ пострада́въ, тебѣ̀ предстои́тъ ра́дꙋѧсѧ."
 },
 {
  "type": "TEXT",
  "value": "Гдⷭ҇и, а҆́ще и҆ сверго́ша і҆ꙋде́и съ высоты̀ пра́веднаго, но нбⷭ҇ныхъ черто́гѡвъ съ весе́лїемъ сподо́бисѧ, и҆ въ пи́щи наслажде́нїѧ досто́йнѡ весели́тсѧ. Тѣ́мъ ᲂу҆́бѡ подае́ши ми́ръ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ а҃."
 },
 {
  "type": "TEXT",
  "value": "Вѷзанті́ево: Во ѻ҆́гненнѣй зарѝ бжⷭ҇твеннагѡ дх҃а просвѣти́всѧ, благоче́стїѧ ꙗ҆ви́лсѧ є҆сѝ бжⷭ҇твенный ревни́тель, бра́те бж҃їй і҆а́кѡве. Тѣ́мъ и҆ ѻ҆де́ждею тѧ̀ зако́ннагѡ свѧще́нства, ꙗ҆́кѡ а҆арѡ́на дре́внѧго, честнѣ́йшею ѡ҆дѣ́ѧ, и҆́же милосе́рдїѧ ра́ди въ бра́тство тѧ̀ прїе́мый: того̀ молѝ, а҆пⷭ҇лѡвъ похвало̀, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Славосло́вїе вели́кое и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и, Бл҃жє́нна ѿ канѡ́на а҆пⷭ҇ла, пѣ́снь г҃ и҆ ѕ҃."
 },
 {
  "type": "HEADER",
  "value": "Прокі́менъ, гла́съ и҃:"
 },
 {
  "type": "TEXT",
  "value": "Во всю̀ землю̀ и҆зы́де вѣща́нїе и҆́хъ."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю:"
 },
 {
  "type": "HEADER",
  "value": "А҆пⷭ҇лъ къ гала́тѡмъ, зача́ло с҃."
 },
 {
  "type": "TEXT",
  "value": "А҆ллилꙋ́їа, гла́съ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и."
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло н҃ѕ."
 },
 {
  "type": "TEXT",
  "value": "Прича́стенъ: Во всю̀ зе́млю и҆зы́де вѣща́нїе и҆́хъ:"
 }
]