ponomar-pwa/static/data/shared/menaion-daily/11-22/1.json

[
 {
  "type": "HEADER",
  "value": "Ное́мврїа к҃в"
 },
 {
  "type": "HEADER",
  "value": "Ст҃а́гѡ а҆пⷭ҇ла фїлимѡ́на, и҆ и҆̀же съ ни́мъ:"
 },
 {
  "type": "HEADER",
  "value": "Стїхи̑ры пра́здника, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Ѽ пресла́внагѡ чꙋдесѐ, предписꙋ́етсѧ ны́нѣ бꙋ́дꙋщее неизрече́нное, во ѻ҆́бразѣхъ дне́сь ви́димыхъ разꙋмѣва́емаѧ: свѣ́тъ бо мі́рꙋ бжⷭ҇твенный возсїѧ́вши, невѣстоприво́дитсѧ ко ст҃о́мꙋ хра́мꙋ. ю҆́же восхва́лимъ, ꙗ҆́кѡ хра́мъ бж҃їй пресвѣ́тлый, ст҃ы́й и҆ свѣтоза́рный, свѣтода́телѧ хрⷭ҇та̀."
 },
 {
  "type": "TEXT",
  "value": "Вои́стиннꙋ нача́токъ благопрїѧ́тенъ і҆ѡакі́мъ мꙋ́дрый со а҆́нною принесо́ша и҆зво́лившемꙋ бжⷭ҇твенный пло́дъ да́ти и҆̀мъ бг҃оѻтрокови́цꙋ дв҃ꙋ марі́ю ꙗ҆́вѣ, є҆́юже печа́ли ѿгна́сѧ до́лгъ. ю҆́же воспои́мъ благоче́стнѡ веселѧ́щесѧ, ра́дости бо хода́таица бы́сть всемꙋ̀ мі́рꙋ сїѧ̀."
 },
 {
  "type": "TEXT",
  "value": "Грѧди́те, та́инственнѡ стеце́мсѧ, и҆ предначне́мъ ны́нѣ, свѣща́ми вѣ́ры ᲂу҆краша́еми, дв҃ы предше́ствїе: во хра́мъ бо сла́внѡ вхо́дитъ бж҃їй, ѡ҆брꙋчена̀ хрⷭ҇тꙋ̀ всѣ́хъ цр҃ю̀. Є҆ѧ́же пра́зднꙋемъ кра́сное торжество̀, бг҃олѣ́пнѡ всѝ ᲂу҆чрежда́ющесѧ вхожде́нїемъ тоѧ̀."
 },
 {
  "type": "HEADER",
  "value": "Ст҃ы̑мъ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Розга̀ лозы̀ жи́зненныѧ, сла́вный фїлимѡ́не, сы́й, вїно̀ и҆ска́палъ є҆сѝ бжⷭ҇твеннагѡ позна́нїѧ сꙋ́щымъ въ болѣ́зни дꙋшѝ: и҆ сердца̀ возвесели́лъ є҆сѝ, сѣ̑тꙋющаѧ ле́сти ѡ҆мраче́нїемъ, и҆ ѡ҆держи̑маѧ тмо́ю і҆дѡлонеи́стовства, тѣ́мже веселѧ́щесѧ па́мѧть твою̀ бг҃оза́рнꙋю торжествꙋ́емъ."
 },
 {
  "type": "TEXT",
  "value": "Гра́дъ тѧ̀ га́зскїй почита́етъ, свѣ́тъ позна́нїѧ, бл҃же́нне, тобо́ю ᲂу҆зрѣ́въ: колосса́є же бжⷭ҇твенное твоѐ тѣ́ло, ꙗ҆́коже бога́тство и҆мꙋ́ще, ѡ҆б̾е́млютъ врачєва́нїѧ, и҆ и҆сточа́ющꙋ бл҃года́ть всегда̀. Тѣ́мже соверша́ющїи па́мѧть твою̀ сохранѧ́емсѧ ѿ бѣ́дъ, фїлимо́не сла́вне, моли́твами твои́ми."
 },
 {
  "type": "TEXT",
  "value": "Вѣ́рою, со а҆пфі́ею честно́ю, а҆рхі́ппа, мꙋ́драго і҆ера́рха восхва́лимъ, пою́ще фїлимѡ́на и҆ ѻ҆ни́сїма, свѧщє́нны бг҃опроповѣ́дники, честны̑ѧ ᲂу҆чи́тели, ле́сть многобо́жнꙋ и҆скорени́вшыѧ сло́вомъ, и҆ насади́вшыѧ всѣ̑мъ зна́нїе и҆́стины, чтꙋ́щымъ тѣ́хъ благоче́стнѡ па́мѧть всегда̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ а҃:"
 },
 {
  "type": "TEXT",
  "value": "Да ра́дꙋетсѧ дне́сь нб҃о свы́ше, и҆ ѻ҆́блацы весе́лїе да кропѧ́тъ ѡ҆ ѕѣлѡ̀ пресла́вныхъ вели́чїихъ бг҃а на́шегѡ: се́ бо две́рь, на восто́ки зрѧ́щаѧ, ро́ждшисѧ ѿ непло́дове безпло́дныѧ по ѡ҆бѣтова́нїю, и҆ бг҃ꙋ ѡ҆свѧще́нна бы́вши въ жили́ще, дне́сь въ хра́мъ, ꙗ҆́кѡ непоро́чное приноше́нїе, приво́дитсѧ. Да ра́дꙋетсѧ дв҃дъ, брѧца́ѧ въ гꙋ́сли: приведꙋ́тсѧ, речѐ, цр҃ю̀ дѣ̑вы въ слѣ́дъ є҆ѧ̀, бли̑жнѧѧ є҆ѧ̀ приведꙋ́тсѧ, внꙋ́трь ски́нїи бж҃їѧ, внꙋ́трь ѡ҆чисти́лища є҆гѡ̀, воспита́тисѧ въ жили́ще пре́жде вѣ̑къ ѿ ѻ҆ц҃а̀ нетлѣ́ннѡ ро́ждшагѡсѧ, во спасе́нїе дꙋ́шъ на́шихъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Дне́сь ѱало́мски собо́ръ дѣ́вственныхъ, свѣщы̀ вже́гше, свѣ́тлѡ предхо́дѧтъ є҆ди́нѣй всенепоро́чнѣй."
 },
 {
  "type": "TEXT",
  "value": "Сті́хъ: Приведꙋ́тсѧ цр҃ю̀ дѣ̑вы во слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀."
 },
 {
  "type": "TEXT",
  "value": "Го́рꙋ разꙋ́мнꙋю, и҆ трапе́зꙋ бжⷭ҇твеннꙋю, мо́стъ ста́мнꙋ, прⷪ҇ро́че, прїимѝ, є҆ди́нꙋ всенепоро́чнꙋю."
 },
 {
  "type": "TEXT",
  "value": "Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ."
 },
 {
  "type": "TEXT",
  "value": "Двє́ри ст҃и́лища ѿве́рзъ, заха́рїе прⷪ҇ро́че, прїимѝ и҆́стиннѡ бж҃їю мт҃рь, и҆ є҆ди́нꙋ приснодв҃ꙋ."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже: Самогла́сенъ:"
 },
 {
  "type": "TEXT",
  "value": "Дне́сь въ хра́мъ приво́дитсѧ всенепоро́чнаѧ дв҃а, во ѻ҆би́телище всецр҃ѧ̀ бг҃а, и҆ всеѧ̀ жи́зни на́шеѧ пита́телѧ. Дне́сь чистѣ́йшаѧ ст҃ы́нѧ, ꙗ҆́кѡ трилѣ́тствꙋющаѧ ю҆́ница, во ст҃а̑ѧ ст҃ы́хъ вво́дитсѧ. То́й возопїи́мъ, ꙗ҆́кѡ а҆́гг҃лъ: ра́дꙋйсѧ, є҆ди́на въ жена́хъ бл҃гослове́ннаѧ."
 },
 {
  "type": "HEADER",
  "value": "Тропа́рь а҆пⷭ҇лѡвъ, гла́съ г҃:"
 },
 {
  "type": "TEXT",
  "value": "А҆пⷭ҇ли ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь пра́здника, два́жды."
 },
 {
  "type": "HEADER",
  "value": "Сла́ва, а҆пⷭ҇лѡвъ: И҆ ны́нѣ, пра́здника."
 },
 {
  "type": "HEADER",
  "value": "По а҃-й стїхосло́вїи, сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ка́мени запеча́танꙋ:"
 },
 {
  "type": "TEXT",
  "value": "Восхвали́те дѣ̑вы, ма́тєри пра́зднꙋйте, лю́дїе славосло́вите, свѧще́нницы благослови́те пречⷭ҇тꙋю мт҃рь бж҃їю: пло́тїю бо младе́нствꙋющи пре́жде, во хра́мъ принесе́сѧ, ꙗ҆́кѡ хра́мъ бж҃їй ст҃ѣ́йшїй. Тѣ́мже, пра́здникъ дꙋхо́вный соверша́юще, воспои́мъ ю҆̀, ꙗ҆́кѡ предста́тельницꙋ ро́да человѣ́ческагѡ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "По в҃-й стїхосло́вїи, сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопі́й: вни́ди, гпⷭ҇жѐ, въ хра́мъ цр҃е́въ, вни́ди, є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ хрⷭ҇то́съ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "Канѡ́на пра́здника, со і҆рмосо́мъ на и҃: и҆ ст҃ы́хъ на д҃. Канѡ́нъ пра́здника. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ вхожде́нїе."
 },
 {
  "type": "TEXT",
  "value": "Премꙋ́дрости, пречⷭ҇таѧ, тѧ̀ сокро́вище вѣ́мы, и҆ благода́ти точа́щꙋю и҆сто́чникъ приснотекꙋ́щїй ра́зꙋма, про́симъ: твоѧ̑ ка̑пли ѡ҆дождѝ, влⷣчце, є҆́же воспѣва́ти тѧ̀ при́снѡ."
 },
 {
  "type": "TEXT",
  "value": "Превы́шши, пречⷭ҇таѧ, нб҃съ бы́вши, хра́мъ и҆ пала́та, въ хра́мъ бж҃їй возложи́ласѧ є҆сѝ, томꙋ̀ ᲂу҆гото́ватисѧ въ бжⷭ҇твенное жили́ще прише́ствїѧ є҆гѡ̀."
 },
 {
  "type": "TEXT",
  "value": "Свѣ́тъ возсїѧ́вши бцⷣа благода́ти, всѧ̑ просвѣтѝ, и҆ совокꙋпѝ пресвѣ́тлое є҆ѧ̀ ᲂу҆краси́ти торжество̀ пѣ́сньми: прїиди́те, къ не́й стеце́мсѧ."
 },
 {
  "type": "TEXT",
  "value": "Две́рь сла́внаѧ, пѡ́мыслы непроходи́маѧ, двє́ри ѿве́рзши хра́ма бж҃їѧ, ны́нѣ повелѣва́етъ на́мъ совше́дшымъ, бжⷭ҇твенныхъ є҆ѧ̀ чꙋде́съ наслади́тисѧ."
 },
 {
  "type": "HEADER",
  "value": "Канѡ́нъ ст҃ы́хъ, творе́нїе і҆ѡ́сифово, гла́съ в҃, є҆гѡ́же краегране́сїе:"
 },
 {
  "type": "TEXT",
  "value": "Хрⷭ҇та̀ лю́бѧща просла́влю тѧ̀, фїлимѡ́не."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ."
 },
 {
  "type": "TEXT",
  "value": "Ликоходѧ̀ ра́достнѡ нбⷭ҇наѧ, свѧщеннодѣ́телю, селє́нїѧ, благода́ть пода́ждь мѝ, свѧтꙋ́ю твою̀ па́мѧть бжⷭ҇твеннѡ воспѣва́ющемꙋ: ты́ бо просла́вилсѧ є҆сѝ."
 },
 {
  "type": "TEXT",
  "value": "Стрꙋѧ́ми твои́хъ слове́съ сердца̀ напои́въ, дѣ́лати нбⷭ҇наѧ, блаже́нне, разꙋмѣ̑нїѧ пригото́валъ є҆сѝ вѣ́рою, а҆пⷭ҇ле фїлимѡ́не досточꙋ́дне."
 },
 {
  "type": "TEXT",
  "value": "Сщ҃еннодѣ́йствꙋѧ свѧще́нное є҆ѵⷢ҇лїе, сїѧ̑нїи дх҃а дꙋ́шы просвѣти́лъ є҆сѝ, и҆зба́вивъ ѿ тмы̀ і҆дѡлонеи́стовства, мꙋ́дре а҆пⷭ҇ле."
 },
 {
  "type": "TEXT",
  "value": "Бг҃оро́диченъ: Тѧ̀ прⷪ҇ро́кѡвъ дре́вле бжⷭ҇твенное собра́нїе, многови́дными, чⷭ҇таѧ, ѻ҆́бразы, и҆здале́ча проначерта̀ и҆́стиннѡ є҆ди́нꙋ, влⷣкꙋ поро́ждшꙋю."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ честнѣ́мъ вхожде́нїи твое́мъ вѣнцє́въ сла́вы сподо́би."
 },
 {
  "type": "TEXT",
  "value": "Невѣстокраси́тель дне́сь ꙗ҆ви́сѧ, кра́сный дв҃ы хра́мъ и҆ черто́гъ, прїе́мь ѡ҆дꙋшевле́нный черто́гъ бж҃їй, чⷭ҇тꙋю и҆ непоро́чнꙋю, и҆ свѣтлѣ́йшꙋю всеѧ̀ тва́ри."
 },
 {
  "type": "TEXT",
  "value": "Дв҃дъ предначина́ѧ ликова́нїе, и҆гра́етъ и҆ ликовствꙋ́етъ съ на́ми, и҆ цр҃и́цꙋ зове́тъ тѧ̀ ᲂу҆кра́шенꙋ, пречⷭ҇таѧ, предстоѧ́щꙋ, всечⷭ҇таѧ, въ хра́мѣ цр҃ю̀ и҆ бг҃ꙋ."
 },
 {
  "type": "TEXT",
  "value": "И҆зъ неѧ́же престꙋпле́нїе произы́де дре́вле ро́дꙋ человѣ́ческомꙋ, и҆зъ тоѧ̀ и҆справле́нїе и҆ нетлѣ́нїе процвѣтѐ, бцⷣа дне́сь приводи́ма въ до́мъ бж҃їй."
 },
 {
  "type": "TEXT",
  "value": "И҆гра́ютъ а҆́гг҃льскаѧ вѡ́инства, и҆ всѣ́хъ человѣ̑къ мно́жество: и҆ предъ лице́мъ, пречⷭ҇таѧ, предтекꙋ́тъ твои́мъ дне́сь свѣщенѡ́сицы зовꙋ́ще, вели́чєствїѧ твоѧ̑ въ домꙋ̀ бж҃їи."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ твоѝ всадѝ въ сердца̀ на́съ пою́щихъ тѧ̀."
 },
 {
  "type": "TEXT",
  "value": "Стра̑сти хрⷭ҇тѡ́вы и҆ воста́нїе проповѣ́дꙋѧ, воздви́гнꙋлъ є҆сѝ ꙗ҆́кѡ ѿ гро́ба невѣ́рїѧ и҆ ме́ртвости человѣ́ки, фїлимѡ́не достосла́вне."
 },
 {
  "type": "TEXT",
  "value": "Ѻ҆ни́сїма бжⷭ҇твеннаго и҆ фїлимѡ́на, а҆пфі́ю и҆ а҆рхі́ппа, ѕвѣ́зды, просвѣща́ющыѧ концы̀, свѧще́нными пѣснопѣ́ньми восхва́лимъ."
 },
 {
  "type": "TEXT",
  "value": "Оу҆ма̀ зри́тельное ѡ҆чи́стивше, бжⷭ҇твеннагѡ полꙋчи́сте бг҃овидѣ́нїѧ, и҆ сердца̀ возврати́сте заблꙋ́ждшыѧ къ зна́нїю, свѧще́ннѣйшїи."
 },
 {
  "type": "TEXT",
  "value": "Бг҃оро́диченъ: Ꙗ҆́вльшисѧ, чⷭ҇таѧ и҆ всенетлѣ́ннаѧ, прїѧ́ла є҆сѝ во ᲂу҆тро́бѣ бг҃а сло́ва, ѡ҆чи́стившаго є҆стество̀ на́ше, ѡ҆скве́рншеесѧ, дв҃о, грѣхопаде́нїемъ."
 },
 {
  "type": "HEADER",
  "value": "Конда́къ а҆пⷭ҇толѡвъ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Ꙗ҆́кѡ ѕвѣ́зды всесвѣ̑тлыѧ просвѣща́ющыѧ концы̀, а҆пⷭ҇лы хрⷭ҇то́вы восхва́лимъ, фїлимѡ́на сла́внаго, и҆ а҆рхі́ппа свѧще́ннаго, и҆ ѻ҆ни́сїма, и҆ ма́рка и҆ а҆поллѡ́са, съ ни́миже и҆ а҆пфі́ю всемꙋ́дрꙋю, вопїю́ще: моли́те непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Та́же сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ра́ломъ сло́ва добродѣ́лаѧ ѡ҆лѧденѣ̑вшаѧ сердца̀, свѧщеннодѣ́телю, бжⷭ҇твенное позна́нїе дѣ́лати пригото́валъ є҆сѝ, и҆ низложи́въ і҆́дѡльскїѧ хра́мы, созда́лъ є҆сѝ цр҃кви, бл҃же́нне, въ сла́вꙋ созда́телѧ твоегѡ̀. Тѣ́мже соше́дшесѧ свѧтꙋ́ю твою̀ па́мѧть, фїлимѡ́не, сла́вимъ свѧщеннопросвѣща́еми, и҆ согла́снѡ вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, пра́здника, гла́съ то́йже."
 },
 {
  "type": "TEXT",
  "value": "Подо́бенъ: Повелѣ́нное та́йнѡ."
 },
 {
  "type": "TEXT",
  "value": "Да ра́дꙋетсѧ дв҃дъ пѣснопи́сецъ, и҆ да ликовствꙋ́етъ і҆ѡакі́мъ со а҆́нною, ꙗ҆́кѡ пло́дъ ст҃ы́й и҆зъ ни́хъ произы́де, марі́а свѣтоно́снаѧ, бжⷭ҇твеннаѧ свѣща̀, и҆ ра́дꙋетсѧ, входѧ́щи въ хра́мъ: ю҆́же и҆ зрѧ̀ благословѝ варахі́инъ сы́нъ, и҆ ра́дꙋѧсѧ взыва́ше: ра́дꙋйсѧ, чꙋ́до всемі́рное."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Две́рь непрохо́днꙋю, бж҃їй до́мъ прїе́млѧ дне́сь, преста́ти сотворѝ всѧ́кой слꙋ́жбѣ зако́нной, ꙗ҆́кѡ и҆́стиннѡ ꙗ҆ви́сѧ, зовы́й, сꙋ́щымъ на землѝ и҆́стина."
 },
 {
  "type": "TEXT",
  "value": "Гора̀ присѣ́ннаѧ, ю҆́же прови́дѣ дре́вле а҆ввакꙋ́мъ, предпроповѣ́да внꙋ́трь вмѣсти́вшꙋюсѧ въ нехо́дныхъ хра́ма, добродѣ́тєли процвѣ́тши, и҆ покрыва́етъ концы̀."
 },
 {
  "type": "TEXT",
  "value": "Ви́дѣвши пресла̑внаѧ всѧ̀ землѧ̀, стра́нныѧ же и҆ ди̑вныѧ вє́щи, ка́кѡ дв҃а, ѿ а҆́гг҃ла пи́щꙋ прїе́млющи, ѻ҆́бразы строе́нїѧ но́ситъ."
 },
 {
  "type": "TEXT",
  "value": "Хра́мъ и҆ пала́та, и҆ нб҃о ѡ҆дꙋшевле́нное ꙗ҆́вльшисѧ, бг҃оневѣ́сто цр҃е́ва, въ хра́мъ зако́нный приводи́ма дне́сь, томꙋ̀ соблюда́ема, пречⷭ҇таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве."
 },
 {
  "type": "TEXT",
  "value": "Вѣ́триломъ крⷭ҇та̀ вперѧ́емь, преплы́лъ є҆сѝ небꙋ́рнѡ лю́тꙋю пꙋчи́нꙋ, и҆скꙋше́нїй житїѧ̀, блаже́нне, мнѡ́гїѧ ᲂу҆пра́вивъ пла́вающыѧ къ спасе́нїѧ приста́нищꙋ бжⷭ҇твенною благода́тїю."
 },
 {
  "type": "TEXT",
  "value": "Свѣти̑ла свѣтоза̑рнаѧ предлага́етъ бжⷭ҇твенный гра́дъ колосса́йскїй: свѧще́ннаго а҆рхі́ппа, фїлимѡ́на же и҆ а҆пфі́ю ꙗ҆́вѣ, и҆ ѻ҆ни́сїма сла́внаго, просвѣща́ющыѧ мі́ра концы̀."
 },
 {
  "type": "TEXT",
  "value": "Бжⷭ҇твеннаѧ рѣка̀ воскипѣ̀ въ се́рдцѣ твое́мъ, бг҃оглаго́ливе, и҆ рѣ́ки ᲂу҆ста́ви, и҆ течє́нїѧ безбо́жїѧ, дꙋ́шы же и҆ста́ѧвшыѧ зно́емъ невѣ́дѣнїѧ, напоѝ благода́тїю, сла́вне."
 },
 {
  "type": "TEXT",
  "value": "Бг҃оро́диченъ: Пою́ тѧ, и҆́стиннѡ всепѣ́таѧ, препѣ́таго бг҃а сло́ва преесте́ственнѡ роди́вшꙋю, и҆ молю́сѧ, смире́нныѧ моеѧ̀ дꙋшѝ и҆сцѣли́ти недꙋ́ги, ꙗ҆́кѡ блага̀ сꙋ́щи, бг҃оневѣ́стнаѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ въ чⷭ҇тнѣ́мъ вхожде́нїи твое́мъ: ты́ бо, неискꙋсобра́чнаѧ дв҃о, внꙋ́трь вошла̀ є҆сѝ въ хра́мъ бж҃їй, ꙗ҆́коже чⷭ҇тѣ́йшїй хра́мъ, всѣ́мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Свѧще́нїе сла́вное и҆ свѧще́нное возложе́нїе дне́сь пречⷭ҇таѧ дв҃а, возложи́вшисѧ въ хра́мъ бж҃їй, всецр҃ю̀ на́шемꙋ, бг҃ꙋ є҆ди́номꙋ въ жили́ще соблюда́етсѧ, ꙗ҆́кѡ вѣ́сть са́мъ."
 },
 {
  "type": "TEXT",
  "value": "Добро́тꙋ, пречⷭ҇таѧ, дꙋшѝ твоеѧ̀ зрѧ̀ нѣ́когда вѣ́рою заха́рїа возопѝ: ты̀ є҆сѝ и҆збавле́нїе, ты̀ є҆сѝ всѣ́хъ ра́дость: ты̀ є҆сѝ воззва́нїе на́ше, є҆́юже невмѣ́стный вмѣще́нъ мнѣ̀ ꙗ҆ви́тсѧ."
 },
 {
  "type": "TEXT",
  "value": "Ѽ па́че ᲂу҆ма̀ чꙋде́съ твои́хъ, всечⷭ҇таѧ. Стра́нное твоѐ ржⷭ҇тво̀ є҆́сть, стра́ненъ ѻ҆́бразъ возраще́нїѧ твоегѡ̀, стра̑нна и҆ пресла̑вна твоѧ̑, бг҃оневѣ́сто, всѧ̑, и҆ человѣ̑ки несказа̑нна."
 },
 {
  "type": "TEXT",
  "value": "Свѣ́щникъ многосвѣ́тлый сꙋ́щи, бг҃оневѣ́сто, дне́сь возсїѧ́ла є҆сѝ въ домꙋ̀ гдⷭ҇ни, и҆ ѡ҆зарѧ́еши ны̀ честны́ми дарова̑нїи, чⷭ҇таѧ, чꙋде́съ твои́хъ, бцⷣе всепѣ́таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ."
 },
 {
  "type": "TEXT",
  "value": "Недꙋ́гꙋющыѧ ви́дѧ ѡ҆стрꙋпле́нїемъ ѕлы́хъ, сла́вне, и҆ дѣ́тельнымъ твои́мъ сло́вомъ и҆сцѣли́лъ є҆сѝ, фїлимѡ́не, и҆ногда̀, і҆дѡлонеи́стовствомъ лю́тѣ бѣ́дствꙋющыѧ."
 },
 {
  "type": "TEXT",
  "value": "Спаси́тєльныѧ пꙋти̑, заблꙋ́ждшымъ лю́тѣ, показа́лъ є҆сѝ, ꙗ҆́кѡ неле́стный пꙋтево́ждь, фїлимѡ́не, є҆ди́нъ пꙋ́ть хрⷭ҇та̀ возлюби́ти, ди́внѡ пꙋтево́дствилъ є҆сѝ."
 },
 {
  "type": "TEXT",
  "value": "Пое́тъ свѣ́тлый пра́здникъ колосса́йскаѧ честна́ѧ дне́сь ра́достнѡ хрⷭ҇то́ва цр҃ковь, бжⷭ҇твеннаго а҆рхі́ппа, и҆ бг҃оглаго́ливаго чтꙋ́щи фїлимѡ́на."
 },
 {
  "type": "TEXT",
  "value": "Бг҃оро́диченъ: Влⷣчце, спаси́ ны ѡ҆бꙋрева́ємыѧ лю́тымъ волне́нїемъ и҆скꙋше́нїй, и҆ некро́ткихъ ва́рварскихъ нахожде́нїй, и҆ де́мѡнскихъ лю́тыхъ навѣ́тѡвъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Всѧ́чєскаѧ носѧ́й глаго́ломъ, моли́твꙋ пра́ведныхъ ᲂу҆слы́ша: тѣ́мже непло́дныѧ разрѣши́лъ є҆сѝ недꙋ́гъ, ꙗ҆́кѡ бл҃гоꙋтро́бенъ, ра́дости вино́внꙋю си̑мъ дарова̀."
 },
 {
  "type": "TEXT",
  "value": "Сказа́ти хотѧ̀ гдⷭ҇ь ꙗ҆зы́кѡмъ своѐ спасе́нїе, неискꙋсобра́чнꙋю ны́нѣ ѿ человѣ̑къ прїѧ́тъ, примире́нїѧ зна́менїе и҆ ѡ҆бновле́нїѧ."
 },
 {
  "type": "TEXT",
  "value": "Ꙗ҆́кѡ до́мъ сꙋ́щи благода́ти, въ не́мже сокрѡ́вища лежа́тъ неизрече́ннагѡ бж҃їѧ строе́нїѧ, всечⷭ҇таѧ, въ хра́мѣ причасти́ласѧ є҆сѝ нетлѣ́нныѧ сла́дости."
 },
 {
  "type": "TEXT",
  "value": "Дїади́мꙋ тѧ̀ ца́рскꙋю прїе́мъ хра́мъ, бг҃оневѣ́сто, просвѣща́шесѧ, и҆ подстꙋпа́ше лꙋ́чшымъ, предрече́нныхъ зрѧ̀ на тебѣ̀ сбытїѐ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Нб҃о ꙗ҆ви́лсѧ є҆сѝ, всѣ̑мъ вѣща́ѧ сла́вꙋ спаси́тельнꙋю, тебє̀ просла́вльшагѡ, и҆ ᲂу҆ч҃никѡ́мъ сочета́вшагѡ седмодесѧ́тнымъ, мч҃ниче всебога́те."
 },
 {
  "type": "TEXT",
  "value": "Оу҆страни́всѧ ѻ҆те́чества, стра́ннымъ твои́мъ сло́вомъ ᲂу҆страни́вшыѧсѧ бг҃а ᲂу҆лови́лъ є҆сѝ, и҆ сїѡ́на жи́тели, і҆ера́рше фїлимѡ́не, показа́лъ є҆сѝ."
 },
 {
  "type": "TEXT",
  "value": "Добродѣ́тельми свѧще́нными сїѧ́ющи, и҆ свѣ́тлѡ бг҃ꙋ ᲂу҆гожда́ющи, къ нб҃сє́мъ востекла̀ є҆сѝ, со а҆́гг҃лы а҆пфі́а ликꙋ́ющи."
 },
 {
  "type": "TEXT",
  "value": "Бг҃оро́диченъ: Воплоща́етсѧ сло́во во чре́вѣ твое́мъ, и҆ за бл҃гоꙋтро́бїе познава́етсѧ чл҃вѣ́къ, да бо́га человѣ́ка содѣ́лаетъ, ѻ҆трокови́це всенепоро́чнаѧ."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆́же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное."
 },
 {
  "type": "TEXT",
  "value": "І҆́косъ: Неизрече́нныхъ бж҃їихъ, и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋю, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ, чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆дивлѧ́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ."
 },
 {
  "type": "TEXT",
  "value": "Сѐ дне́сь возсїѧ̀ концє́мъ весна̀ ра́достнаѧ, просвѣща́ющи на́шѧ дꙋ́шы, и҆ помышлє́нїѧ, и҆ ᲂу҆́мъ благода́тїю, торжество́мъ бцⷣы дне́сь та́инственнѡ да ᲂу҆чреди́мсѧ."
 },
 {
  "type": "TEXT",
  "value": "Да дароно́сѧтъ дне́сь всѧ́чєскаѧ цр҃и́цѣ и҆ мт҃ри бж҃їи, нб҃о и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ мно́жество, и҆ да вопїю́тъ: во хра́мъ вво́дитсѧ ра́дость и҆ и҆збавле́нїе."
 },
 {
  "type": "TEXT",
  "value": "Писа́нїе мимотечѐ, и҆ ѡ҆скꙋдѣ̀ зако́нъ, ꙗ҆́коже сѣ́нь, и҆ благода́ти лꙋчѝ возсїѧ́ша, въ хра́мъ бж҃їй вше́дшей тебѣ̀, дв҃о мт҃и чⷭ҇таѧ, въ не́мъ бл҃гослове́ннаѧ."
 },
 {
  "type": "TEXT",
  "value": "Повине́сѧ ржⷭ҇твꙋ̀ твоемꙋ̀, всечⷭ҇таѧ, ꙗ҆́кѡ творцꙋ̀ и҆ бг҃ꙋ, нб҃о и҆ землѧ̀ и҆ преиспо́днѧѧ, и҆ всѧ́къ ѧ҆зы́къ земны́хъ и҆сповѣ́даетъ, ꙗ҆́кѡ гдⷭ҇ь ꙗ҆ви́сѧ сп҃съ дꙋ́шъ на́шихъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѡ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ."
 },
 {
  "type": "TEXT",
  "value": "Кра̑сны твоѧ̑, фїлимѡ́не, бы́вше честны̑ѧ но́зѣ, стєзѝ кро́ткѡ ше́ствꙋющыѧ є҆ѵⷢ҇лїа, и҆ всѣ̑мъ ра̑тнымъ ми́ръ свѧще́нный возвѣща́ющыѧ, и҆ де́мѡнскаѧ стремлє́нїѧ запина́ющыѧ."
 },
 {
  "type": "TEXT",
  "value": "Твои́хъ слове́съ свѣ́томъ га́зѧнъ глꙋбо́каѧ тма̀ прогна́сѧ, свѧщеннодѣ́латель ꙗ҆́кѡ свѧще́ннѣйшїй, въ си́хъ бы́лъ є҆сѝ и҆зѧ́щнѣйшїй, всѧ̑ ᲂу҆па́съ, и҆ наꙋчи́въ пѣ́ти, а҆пⷭ҇ле: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Въ пе́рвыхъ твои́хъ приѡбщи́сѧ до́брыхъ га́зскїй гра́дъ: тогѡ́ бо ꙗ҆ви́лсѧ є҆сѝ первопресто́льникъ, и҆ і҆ера́рхъ спаси́тельный, ꙗ҆́кѡ свѧщенновѣща́тель, фїлимѡ́не, вопи́ти повелѣва́ѧ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Возлюби́въ хрⷭ҇та̀ возлюби́вшаго земны̑ѧ за бл҃гоꙋтро́бїе, любо́вїю врага̀ ненави̑димыѧ сꙋ́щѧ, люби́мичи содѣ́ѧлъ є҆сѝ, фїлимѡ́не, бг҃а воспѣва́ющыѧ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Крѣ́пость смире́нныхъ, и҆ свѣ́щникъ свѣ́тлый, бжⷭ҇твеннаѧ трапе́за, гора̀ и҆ две́рь непрохо́днаѧ, прⷭ҇то́лъ бж҃їй и҆ пала́та, же́злъ же а҆арѡ́новъ, и҆ ста́мна златоза́рна сꙋ́щи, хрⷭ҇та̀ ма́ннꙋ жи́зни, дв҃о, носѧ́щи."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Слы́ши, ѻ҆трокови́це дв҃о чⷭ҇таѧ, да рече́тъ ᲂу҆́бѡ гаврїи́лъ, совѣ́тъ вы́шнѧгѡ дре́внїй и҆́стинный, бꙋ́ди къ прїѧ́тїю гото́ва бж҃їю: тобо́ю бо невмѣсти́мый съ человѣ́ки поживѐ. Тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Пречⷭ҇тый хра́мъ въ до́мъ бж҃їй приводѧ́щи а҆́нна и҆ногда̀, вопїю́щи, съ вѣ́рою речѐ свѧще́нникꙋ: ча́до, ѿ бг҃а да́нное мнѣ̀, прїи́мъ ны́нѣ, введѝ во хра́мъ зижди́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Речѐ, ви́дѣвъ, а҆́ннѣ и҆ногда̀ дх҃омъ заха́рїа: жи́зни мт҃рь вво́диши и҆́стиннꙋю, ю҆́же свѣ́тлѡ прⷪ҇ро́цы бж҃їи бцⷣꙋ проповѣ́даша, и҆ ка́кѡ хра́мъ вмѣсти́тъ ю҆̀: тѣ́мъ чꙋдѧ́сѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Раба̀ бж҃їѧ бы́хъ а҆́зъ, ѿвѣща̀ а҆́нна є҆мꙋ̀, призыва́юще сего̀ вѣ́рою и҆ моли́твою, прїѧ́ти моеѧ̀ болѣ́зни пло́дъ, по прїѧ́тїи же рожде́ннꙋю привестѝ да́вшемꙋ ю҆̀. Тѣ́мъ зовѧ̀ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Зако́нное вои́стиннꙋ дѣ́ло є҆́сть, свѧще́нникъ речѐ є҆́й, стра́ннꙋ же весьма̀ ве́щь поразꙋмѣва́ю, зрѧ̀ приводи́мꙋю въ до́мъ бж҃їй, пресла́внѡ превосходѧ́щꙋю ст҃а̑ѧ благода́тїю. Тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Возмога́ю, речѐ а҆́нна є҆мꙋ̀, зна́ющи, ꙗ҆̀же глаго́леши, разꙋмѣ́еши бо сїѧ̑ дх҃омъ бж҃їимъ, ꙗ҆́снѡ ꙗ҆̀же дв҃ы проповѣ́далъ є҆сѝ. Прїимѝ ᲂу҆́бѡ пречⷭ҇тꙋю въ хра́мъ созда́телѧ твоегѡ̀, и҆ ра́дꙋѧсѧ по́й є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Свѣтоно́сна на́мъ возжже́сѧ свѣща̀, возопѝ свѧще́нникъ, ра́дость велича́йшꙋю свѣтѧ́щи во хра́мѣ: дꙋ́шы прⷪ҇ро́чєскїѧ да сра́дꙋютсѧ мнѣ̀, ꙗ҆́кѡ пресла̑внаѧ зрѧ́ще, соверша́ємаѧ въ домꙋ̀ бж҃їи, и҆ да вопїю́тъ при́снѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Сло́во, ꙗ҆́кѡ свѣти́льникъ свѣ́тлый, возже́нъ въ твое́мъ се́рдцы носѧ̀, пре́жде ᲂу҆гашє́нныѧ, и҆ во тмѣ̀ мно́зѣй лежа́щыѧ невѣ́дѣнїѧ, сла́вне, къ бг҃озна́нїѧ воздви́глъ є҆сѝ дню̀."
 },
 {
  "type": "TEXT",
  "value": "Свѧще́нное твоѐ къ бг҃ꙋ и҆зше́ствїе, свѧще́нными возвели́чисѧ провожде́ньми а҆пⷭ҇лѡвъ, и҆ безпло́тныхъ ᲂу҆мѡ́въ, и҆́хже и҆мѣ́лъ є҆сѝ на землѝ житїѐ, ꙗ҆́кѡ свѧщеннотаи́нникъ, фїлимѡ́не бг҃оглаго́ливе."
 },
 {
  "type": "TEXT",
  "value": "Мѵ́ро сладково́нное ꙗ҆́вѣ и҆ска́павъ свѧще́нныхъ чꙋде́съ, блаже́нне, ѡ҆благово́нилъ є҆сѝ смы́слы и҆ помышлє́нїѧ бл҃гочести̑вымъ, и҆ стра̑сти ѕлосмра̑дныѧ ѿгна́лъ є҆сѝ превозносѧ́щихъ хрⷭ҇та̀, мꙋ́дре фїлимѡ́не."
 },
 {
  "type": "TEXT",
  "value": "Ꙗ҆́коже ѕвѣ̑зды свѣ̑тлыѧ тве́рди, цр҃кве при́снѡ сїѧ́юще, кꙋ́пнѡ а҆рхі́ппъ чꙋ́дный, а҆пфі́а, фїлимѡ́нъ и҆ ѻ҆ни́сїмъ, помышлє́нїѧ на̑ша просвѣща́ютъ."
 },
 {
  "type": "TEXT",
  "value": "Бг҃оро́диченъ: Но́въ ра́й на́мъ чре́во твоѐ и҆́стиннѡ, чⷭ҇таѧ, ꙗ҆ви́сѧ, жи́зни дре́во возраща́ѧ, и҆ ᲂу҆ме́ршыѧ плодо́мъ дре́ва, па́ки въ ра́й ѡ҆животвори́вши введѐ, бцⷣе."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ, ᲂу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла, воспѣва́юще, съ ра́достїю да вопїю́тъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Ꙗ҆́кѡ пресвѣ́тлꙋю, бцⷣе чⷭ҇таѧ, дꙋше́вныѧ чистоты̀ и҆мꙋ́щи добро́тꙋ, бл҃года́тїю же бж҃їею и҆сполнѧ́ема съ нб҃сѐ, свѣ́томъ присносꙋ́щнымъ просвѣща́еши всегда̀ съ весе́лїемъ вопїю́щыѧ: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Прелета́етъ, бцⷣе чⷭ҇таѧ, чꙋ́до твоѐ си́лꙋ слове́съ: тѣ́ло бо въ тебѣ̀ поразꙋмѣва́ю, па́че сло́ва, тече́нїѧ грѣхо́внагѡ непрїѧ́тно. Тѣ́мже благода́рственнѡ вопїю́ ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Пресла́внѡ проѡбразова́ше, чⷭ҇таѧ, зако́нъ тѧ̀ ски́нїю, и҆ бжⷭ҇твеннꙋю ста́мнꙋ, стра́ненъ кївѡ́тъ, и҆ катапета́смꙋ, и҆ же́злъ, хра́мъ неразрꙋши́мый, и҆ две́рь бж҃їю. Тѣ́мже наꙋча́ютъ тебѣ̀ зва́ти: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Пѣснопоѧ̀ тебѣ̀ провозглаша́ше дв҃дъ, глаго́лѧ тѧ̀ дще́рь цр҃е́вꙋ, красото́ю добродѣ́телей ѡ҆деснꙋ́ю предстоѧ́щꙋю бг҃а, ви́дѣвъ тѧ̀ ᲂу҆пещре́ннꙋ. Тѣ́мже, прⷪ҇ро́чествꙋѧ, вопїѧ́ше: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Бг҃опрїѧ́тнꙋ предзрѧ̀ соломѡ́нъ, проповѣ́да тѧ̀ ѻ҆́дръ цр҃е́въ, живы́й и҆сто́чникъ запеча́тствованъ, и҆зъ негѡ́же немꙋ́тнаѧ на́мъ произы́де вода̀, вѣ́рою вопїю́щымъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "TEXT",
  "value": "Подае́ши дарова́нїй твою̀ тишинꙋ̀, бцⷣе, дꙋшѝ мое́й, точа́щи жи́знь тебѐ чтꙋ́щымъ по до́лгꙋ, сама̀ защища́ющи, и҆ покрыва́ющи, и҆ соблюда́ющи, вопи́ти тебѣ̀: и҆́стиннѡ вы́шши всѣ́хъ є҆сѝ, дв҃о чⷭ҇таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ."
 },
 {
  "type": "TEXT",
  "value": "Со свѧще́ннѣйшимъ ли́комъ свѧще́нныхъ а҆пⷭ҇лъ, подо́бнѡ жи́тельствꙋеши на нб҃сѣ́хъ, бжⷭ҇твеннымъ прича́стїемъ ѡ҆божа́емь, и҆ свѣ́томъ сїѧ́ѧ неизрече́ннымъ, и҆ ра́достїю дꙋхо́вною, фїлимѡ́не, при́снѡ и҆сполнѧ́емь."
 },
 {
  "type": "TEXT",
  "value": "Ꙗ҆́кѡ чꙋ́дный тво́й нра́въ, ꙗ҆́кѡ добро̀ и҆ красно̀ житїѐ твоѐ, ꙗ҆́кѡ пресла́вно и҆ ᲂу҆спе́нїе твоѐ, блаже́нне а҆пⷭ҇ле: ꙗ҆́кѡ свѣ́тлый де́нь, въ не́мже ѡ҆ста́вивъ ꙗ҆̀же на землѝ, на нбⷭ҇ныѧ крꙋ́ги возше́лъ є҆сѝ веселѧ́сѧ."
 },
 {
  "type": "TEXT",
  "value": "Дне́сь весели́тсѧ всѧ̀ хрⷭ҇то́ва цр҃ковь, пра́зднственнꙋю ра́дость дꙋхо́внѡ соста́вльши въ па́мѧти твое́й, ю҆́же непоколе́бленꙋ спасѝ твои́ми къ сп҃сꙋ и҆ бг҃ꙋ благопрїѧ́тными моли́твами, фїлимѡ́не свѧще́ннѣйше."
 },
 {
  "type": "TEXT",
  "value": "Ра́ка моще́й твои́хъ врачева́нїй ка̑пли и҆сточа́етъ приходѧ́щымъ свѧще́ннѡ, бл҃же́нне фїлимѡ́не а҆пⷭ҇ле, недꙋ́ги ᲂу҆ставлѧ́етъ, и҆ всѣ́хъ дꙋ́шы ѡ҆свѧща́етъ, бжⷭ҇твеннꙋю твою̀ па́мѧть пра́зднꙋющихъ всегда̀."
 },
 {
  "type": "TEXT",
  "value": "Бг҃оро́диченъ: Но́сиши носѧ́щаго всѧ̑, и҆ пита́еши пита́ющаго, ѻ҆́бразъ ржⷭ҇тва̀ ника́коже вѣ́дѧщи, всенепоро́чнаѧ, па́че ᲂу҆ма̀ твоѐ чꙋ́до, а҆́гг҃лы ᲂу҆жаса́ющее и҆ человѣ́ки, вѣ́дꙋщыѧ тѧ̀ є҆ди́нꙋ дв҃ꙋ бг҃ома́терь."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Ю҆́же дре́вле предвозвѣстѝ прⷪ҇ро́ческое сосло́вїе ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ, воспита́тисѧ гдⷭ҇еви."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "На стїхо́внѣ стїхи̑ры, гла́съ ѕ҃"
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Дѣ̑вы, сликовствꙋ́йте, ѻ҆трокови̑цы, взыгра́йте, свѣщы̀ носѧ́ще, воспо́йте свѣ́тлѡ є҆ди́нꙋ бцⷣꙋ чⷭ҇тꙋю прест҃ꙋ́ю, и҆ нбⷭ҇наѧ воспо́йте."
 },
 {
  "type": "TEXT",
  "value": "Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀: и҆́скрєннїѧ є҆ѧ̀ приведꙋ́тсѧ тебѣ̀."
 },
 {
  "type": "TEXT",
  "value": "А҆́гг҃ловою тѧ̀ рꙋко́ю, дв҃о, пи́щею всѣ́хъ творе́цъ сн҃ъ тво́й пита́етъ, влⷣчце чⷭ҇таѧ, ст҃ы́хъ во ст҃а̑ѧ, ꙗ҆влѧ́ѧ твоѐ мі́рꙋ вели́чествїе пребо́льшее."
 },
 {
  "type": "TEXT",
  "value": "Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ."
 },
 {
  "type": "TEXT",
  "value": "Ст҃ы́хъ прест҃а́ѧ, дв҃о бг҃оневѣ́сто, ро́ждшаѧ влⷣкꙋ всѣ́хъ, є҆ди́наго ѿ трⷪ҇цы, того̀ молѝ, всѣ́хъ воспѣва́ющихъ тѧ̀ и҆зба́вити ѿ бѣ́дъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ д҃:"
 },
 {
  "type": "TEXT",
  "value": "Дне́сь бг҃овмѣсти́мый хра́мъ бцⷣа въ хра́мъ гдⷭ҇ень приво́дитсѧ, и҆ заха́рїа сїю̀ прїе́млетъ: дне́сь ст҃а̑ѧ ст҃ы́хъ ра́дꙋютсѧ, и҆ ли́къ а҆́гг҃льскїй та́инственнѡ торжествꙋ́етъ. Съ ни́миже и҆ мы̀, пра́зднꙋюще дне́сь, съ гаврїи́ломъ возопїи́мъ: ра́дꙋйсѧ, бл҃года́тнаѧ, гдⷭ҇ь съ тобо́ю, и҆мѣ́ѧй ве́лїю ми́лость."
 },
 {
  "type": "HEADER",
  "value": "На лїтꙋргі́и: Бл҃жє́нна пра́здника, пѣ́снь а҃-ѧ, на ѕ҃."
 },
 {
  "type": "HEADER",
  "value": "Прокі́менъ, гла́съ и҃:"
 },
 {
  "type": "TEXT",
  "value": "Во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ."
 },
 {
  "type": "TEXT",
  "value": "Сті́хъ: Нб҃са̀ повѣ́даютъ сла́вꙋ бж҃їю:"
 },
 {
  "type": "HEADER",
  "value": "А҆пⷭ҇лъ къ фїлимѡ́нꙋ, по́слѣ т҃в-гѡ зача́ла:"
 },
 {
  "type": "TEXT",
  "value": "Па́ѵелъ, ю҆́зникъ і҆и҃съ хрⷭ҇то́въ:"
 },
 {
  "type": "TEXT",
  "value": "А҆ллилꙋ́їа, гла́сꙋ а҃: И҆сповѣ́дѧтъ нб҃са̀ чꙋдеса̀ твоѧ̑, гдⷭ҇и."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло н҃."
 },
 {
  "type": "TEXT",
  "value": "Прича́стенъ: Во всю̀ зе́млю и҆зы́де вѣща́нїе и҆́хъ:"
 }
]