ponomar-pwa/static/data/shared/menaion-daily/12-03/1.json

[
 {
  "type": "HEADER",
  "value": "Деке́мврїа г҃"
 },
 {
  "type": "HEADER",
  "value": "Ст҃а́гѡ прⷪ҇ро́ка софо́нїи."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры прⷪ҇ро́ка г҃, гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "И҆́же зарю̀ бг҃онача́льнѣйшагѡ сїѧ́нїѧ прїи́мъ ᲂу҆ма̀ чистото́ю, и҆ бжⷭ҇твенныхъ слове́съ провозвѣ́стникъ и҆ прозна́менатель, и҆ прⷪ҇ро́къ бжⷭ҇твенный бы́въ, ᲂу҆ста̀ бг҃одви̑жимаѧ ꙗ҆ви́лсѧ є҆сѝ дх҃а: ꙗ҆̀же ѿ негѡ̀ тебѣ̀ показꙋ́ємаѧ проповѣ́дꙋѧ и҆ сказꙋ́ѧ всѣ̑мъ ꙗ҆зы́кѡмъ дае́мое спасе́нїе, и҆ црⷭ҇твїе хрⷭ҇то́во, всече́стне. Є҆го́же молѝ спастѝ и҆ просвѣти́ти дꙋ́шы на́шѧ."
 },
 {
  "type": "TEXT",
  "value": "И҆́же бг҃овидѣ́нїемъ сїѧ́ѧ досто́йнѡ, и҆ прⷪ҇ро́ческимъ предсѣда́тельствомъ, и҆ благода́тїю почествова́нъ, бг҃одохнове́нне, и҆ бжⷭ҇твеннагѡ сподо́бленъ блаже́нства, къ преблаго́мꙋ ны́нѣ дерзнове́нїемъ твои́мъ и҆ ми́лованїемъ ѡ҆держи́мь, молѧ́сѧ не преста́й ѡ҆ и҆̀же вѣ́рою тѧ̀ восхвалѧ́ющихъ, и҆ чтꙋ́щихъ, ꙗ҆́кѡ бг҃оглаго́лива, и҆ че́стна и҆ бг҃опрїѧ́тна, ѿ бѣ́дъ и҆зба́вити, и҆ спастѝ дꙋ́шы на́шѧ."
 },
 {
  "type": "TEXT",
  "value": "Твоего̀ прⷪ҇ро́ка, ꙗ҆́кѡ ѡ҆дꙋшевле́нна ѻ҆́блака, показа́лъ є҆сѝ, безсме́ртне, во́дꙋ точа́ща въ жи́знь во и҆́стиннꙋ вѣ́чнꙋю, посла́въ сего̀ бога́тнѡ, и҆ дарова́въ дх҃а всест҃а́го, є҆диносꙋ́щнаго тебѣ̀ ѻ҆ц҃ꙋ̀ вседержи́телю, и҆ сн҃ꙋ твоемꙋ̀, и҆зъ твоегѡ̀ сꙋщества̀ возсїѧ́вшемꙋ, и҆́мже проречѐ сп҃си́тельное прише́ствїе хрⷭ҇та̀ бг҃а на́шегѡ, и҆ ꙗ҆зы́кѡмъ всѣ̑мъ спасе́нїе провозвѣстѝ."
 },
 {
  "type": "HEADER",
  "value": "И҆́ны стїхи̑ры бцⷣы, гла́съ и҆ подо́бенъ то́йже:"
 },
 {
  "type": "HEADER",
  "value": "(А҆́ще а҆ллилꙋ́їа, пою́тсѧ сі́и стїхи̑ры пре́жде, пото́мъ ст҃а́гѡ)."
 },
 {
  "type": "TEXT",
  "value": "И҆́же благоче́стнѡ покланѧ́ющыѧсѧ твоемꙋ̀ ржⷭ҇твꙋ̀, ѿ всѧ́кагѡ спаса́й навѣ́та вра́жїѧ, бг҃ороди́тельнице всенепоро́чнаѧ, ꙗ҆́кѡ предста́тельница всегѡ̀ ро́да на́шегѡ сꙋ́щи: тѧ́ бо ны́нѣ по́мощь всѝ стѧжа́хомъ, прибѣ́жище же и҆ ᲂу҆твержде́нїе, и҆ хода́таицꙋ ко влⷣцѣ хрⷭ҇тꙋ̀ и҆ гдⷭ҇ꙋ. Є҆го́же молѝ, дарова́ти ми́ръ мі́рꙋ, мо́лимсѧ, и҆ грѣхѡ́въ разрѣше́нїе притека́ющымъ въ кро́въ тво́й."
 },
 {
  "type": "TEXT",
  "value": "Сѐ гноє́нїѧ ѡ҆бнажа́ю тебѣ̀ дꙋшѝ моеѧ̀, и҆ показꙋ́ю лю̑тыѧ ꙗ҆́звы, ꙗ҆̀же разбѡ́йницы наложи́ша мнѣ̀, лꙋка́вствїѧ по́мыслы, де́мѡнскими смꙋщє́нїи: влⷣчце всенепоро́чнаѧ, цѣли́телѧ дꙋ́шъ и҆ тѣле́съ ро́ждшаѧ, и҆сцѣле́нїе ты́ ми пода́ждь си̑мъ, и҆злива́ющи є҆ле́й милосе́рдїѧ твоегѡ̀ и҆ бла́гости, къ благорастворе́нїю спасе́нїѧ и҆ здра́вїѧ."
 },
 {
  "type": "TEXT",
  "value": "Не скры́ю ѻ҆каѧ́нный лю́тыхъ мои́хъ, ꙗ҆́кѡ всѧ̑ стѧжа́хъ, ꙗ҆́же ненави́дитъ бг҃ъ: пло́ть ѡ҆скверни́хъ и҆ дꙋ́хъ мо́й, и҆ ᲂу҆́мъ помышлє́нїи нечи́стыми, и҆ дѣ́лы и҆ словесы̀ скве́рными: ѧ҆зы́комъ ѡ҆сꙋжда́ю согрѣша́ющихъ, са́мъ гѡ́ршаѧ содѣва́ю, бг҃ороди́тельнице: всѣ́хъ мнѣ̀ си́хъ да́ждь и҆справле́нїе, да, восклони́всѧ ѕла́гѡ моегѡ̀ ѻ҆бы́чаѧ, припа́даю и҆ пла́чꙋсѧ, ѡ҆ ни́хже ѕлѣ̀ содѣ́лахъ въ жи́зни мое́й хожде́нїемъ."
 },
 {
  "type": "HEADER",
  "value": "Сла́ва, и҆ ны́нѣ: Подо́бенъ то́йже."
 },
 {
  "type": "TEXT",
  "value": "Ꙗ҆́кѡ во глꙋбинꙋ̀ мно́гихъ согрѣше́нїй впадо́хъ ѿ лѣ́ности моеѧ̀ и҆ ᲂу҆ны́нїѧ ѻ҆каѧ́нный и҆ невѣ́дѣнїѧ, и҆ ѿча́ѧнїемъ ны́нѣ ѡ҆держи́мь є҆́смь: бꙋ́ди мѝ по́мощь и҆ ѡ҆чище́нїе, и҆ спасе́нїе, пречⷭ҇таѧ, и҆ ᲂу҆тѣше́нїе благопремѣ́ннѡ подаю́щи мѝ. Тѧ̀ молю̀, и҆ тебѣ̀ ми́лсѧ дѣ́ю и҆ припа́даю, и҆ вѣ́рою зовꙋ́ ти, да не ꙗ҆влю́сѧ до конца̀ льсти́вомꙋ ѡ҆бра́дованїе."
 },
 {
  "type": "HEADER",
  "value": "Крⷭ҇тобг҃оро́диченъ, подо́бенъ то́йже:"
 },
 {
  "type": "TEXT",
  "value": "Не рыда́й менѐ, мт҃и, зрѧ́щи на дре́вѣ повѣ́шена твоегѡ̀ сн҃а и҆ бг҃а, на вода́хъ повѣ́сившаго зе́млю неѡдержи́мѡ, и҆ всю̀ тва́рь созда́вшаго: и҆́бо воста́нꙋ и҆ просла́влюсѧ, и҆ а҆́дѡва ца̑рствїѧ сокрꙋшꙋ̀ крѣ́постїю, и҆ погꙋблю̀ тогѡ̀ си́лꙋ, и҆ свѧ̑занныѧ и҆зба́влю ѿ ѕлодѣ́йства є҆гѡ̀, ꙗ҆́кѡ бл҃гоꙋтро́бенъ, и҆ ѻ҆ц҃ꙋ̀ моемꙋ̀ приведꙋ̀, ꙗ҆́кѡ чл҃вѣколю́бецъ."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Тропа́рь, гла́съ в҃:"
 },
 {
  "type": "TEXT",
  "value": "Прⷪ҇ро́ка твоегѡ̀ софо́нїи па́мѧть, гдⷭ҇и, пра́зднꙋюще: тѣ́мъ тѧ̀ мо́лимъ, спасѝ дꙋ́шы на́шѧ."
 },
 {
  "type": "HEADER",
  "value": "На ᲂу҆́трени канѡ́нъ, ѳеофа́ново, гла́съ ѕ҃, є҆гѡ́же краегране́сїе:"
 },
 {
  "type": "TEXT",
  "value": "Софо́нїева мѧ̀ сла́ва да ᲂу҆ѧсни́тъ. Пѣ́снь а҃."
 },
 {
  "type": "TEXT",
  "value": "І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше."
 },
 {
  "type": "TEXT",
  "value": "Тѧ̀ мо́лимъ, прⷪ҇ро́че, бж҃їю прⷭ҇то́лꙋ предстоѧ́ща моли́ти прилѣ́жнѡ, просвѣще́нїе дарова́ти на́мъ, вѣ́рою честнꙋ́ю пою́щымъ па́мѧть твою̀."
 },
 {
  "type": "TEXT",
  "value": "Ѻ҆рга́нъ бжⷭ҇твенный ꙗ҆ви́лсѧ є҆сѝ, вмѣща́ющь бжⷭ҇твеннагѡ дх҃а просвѣще́нїй и҆ дарѡ́въ, софо́нїе всемꙋ́дре: тѣ́мъ, ра́дꙋющесѧ, вѣ́рнїи тѧ̀ ᲂу҆блажа́емъ."
 },
 {
  "type": "TEXT",
  "value": "Бг҃оро́диченъ: Свѣтлѣ́йшими зарѧ́ми всю̀ зе́млю возсїѧ́вшее сл҃нце и҆зъ ст҃а́гѡ чре́ва твоегѡ̀ ѡ҆зарѧ́етъ, влⷣчце: и҆́миже просвѣ́щшесѧ, тѧ̀ бж҃їю мт҃рь почита́емъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
 },
 {
  "type": "TEXT",
  "value": "Всѧ̑ ви́дѧй, ꙗ҆́кѡ бг҃ъ, бꙋ́дꙋщихъ зна́нїе, и҆ хотѧ́щихъ бы́ти вѣ́дѣнїе тебѣ̀ ꙗ҆вле́ннѡ проѧвлѧ́етъ бг҃олѣ́пнѡ и҆ показꙋ́етъ, бл҃же́нне досточꙋ́дне."
 },
 {
  "type": "TEXT",
  "value": "Вжили́въ, бл҃же́нне, тво́й ᲂу҆́мъ благоче́стнымъ дерзнове́нїемъ, дх҃ꙋ бжⷭ҇твенномꙋ подклони́лъ є҆сѝ тебѐ, и҆ бы́лъ є҆сѝ прїѧ́тенъ та́мѡ сꙋ́щихъ бжⷭ҇твенныхъ вдохнове́нїй."
 },
 {
  "type": "TEXT",
  "value": "Бг҃оро́диченъ: Сѐ, тебѐ всѝ ро́ди блажа́тъ вѣ́рою, безлѣ́тное сло́во пло́тїю въ лѣ́то ро́ждшꙋю преесте́ственнѡ и҆ дв҃ꙋ па́ки пребы́вшꙋю."
 },
 {
  "type": "HEADER",
  "value": "Сѣда́ленъ, гла́съ ѕ҃."
 },
 {
  "type": "TEXT",
  "value": "Подо́бенъ: Милосе́рдїѧ двє́ри:"
 },
 {
  "type": "TEXT",
  "value": "Ѡ҆чи́стивъ ѿ скве́рнъ ᲂу҆́мъ, всемꙋ́дре, зерца́ло бжⷭ҇твенное содѣ́лалъ є҆сѝ, лꙋ́чъ прїѧ́тно бжⷭ҇твеннагѡ дх҃а. И҆ ны́нѣ ко и҆сто́чникꙋ ра́дꙋѧсѧ ѿше́лъ є҆сѝ сїѧ́нїй, прⷪ҇ро́че софо́нїе."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ѿ се́рдца стена́нїе и҆ ѿ ᲂу҆тро́бы приноша́ю тѝ, пренепоро́чнаѧ, твоѐ просѧ̀ благопребы́тное застꙋпле́нїе: поми́лꙋй всестра́стнꙋю мою̀ дꙋ́шꙋ. Оу҆ми́лостиви многоми́лостиваго бг҃а, и҆зба́вити мѧ̀ сꙋда̀ и҆ є҆́зера ѻ҆́гненнагѡ, є҆ди́на бл҃гослове́ннаѧ."
 },
 {
  "type": "TEXT",
  "value": "Крⷭ҇тобг҃оро́диченъ: Тѧ̀ ро́ждшаѧ, хрⷭ҇тѐ, приснодв҃а ѻ҆трокови́ца, на крⷭ҇тѣ̀ зрѧ́щи, на́съ ра́ди вознесе́на, ᲂу҆ѧзвлѧ́ше своѐ печа́ли ѻ҆рꙋ́жїемъ се́рдце и҆ дꙋ́шꙋ, и҆ пла́каше, рыда́ющи мт҃рски: тоѧ̀ моли́твами поми́лꙋй ны̀, гдⷭ҇и ми́лостиве."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи."
 },
 {
  "type": "TEXT",
  "value": "Всѣ́хъ гдⷭ҇ь на́мъ ꙗ҆ви́сѧ по прⷪ҇ро́чествꙋ, бл҃же́нне, твоемꙋ̀, всѧ̑ призыва́ѧ къ позна́нїю своемꙋ̀, и҆ рабо́ты свободѝ."
 },
 {
  "type": "TEXT",
  "value": "Бл҃года́тїю ѡ҆зарѧ́емь, провозгласи́лъ є҆сѝ глаго́лѧ, подъ и҆́го є҆ди́но подкланѧ́ющымсѧ рабо́тати, послѣ́дꙋющымъ вѣ́рѣ и҆ гдⷭ҇ꙋ слꙋжа́щымъ."
 },
 {
  "type": "TEXT",
  "value": "Бг҃оро́диченъ: Марі́е всечⷭ҇таѧ, страсте́й смꙋще́нїе моегѡ̀ по́мысла и҆ напа́стей бꙋ́рю разорѝ, безстра́стїѧ и҆сто́чникъ ро́ждши, мт҃и дв҃о."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща."
 },
 {
  "type": "TEXT",
  "value": "Ѿ непра́вды къ добродѣ́тели, и҆ ѿ страсте́й плѣне́нїѧ мѧ̀, бл҃же́нне, ѡ҆братѝ твои́ми мольба́ми, прⷪ҇ро́че сла́вне, и҆ къ свѣ́тꙋ благоче́стїѧ дѣ́лъ ᲂу҆пра́ви."
 },
 {
  "type": "TEXT",
  "value": "Просвѣти́въ твою̀ дꙋ́шꙋ добродѣ́телей благоѻбра́зїѧми, ᲂу҆го́днꙋ показа́лъ є҆сѝ къ сїѧ́нїємъ бжⷭ҇твеннагѡ дх҃а, ѿ негѡ́же и҆ проро́чества бл҃года́тїю ѡ҆богати́лсѧ є҆сѝ."
 },
 {
  "type": "TEXT",
  "value": "Бг҃оро́диченъ: Возглаша́ютъ проро́чєскаѧ речє́нїѧ, пречⷭ҇таѧ, мно́гими ѻ҆́бразы ржⷭ҇тво̀ твоѐ, и҆́хже мы̀ ны́нѣ сбытїѐ зрѧ́ще, и҆́стиннѡ бцⷣꙋ тѧ̀ возвѣща́емъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве."
 },
 {
  "type": "TEXT",
  "value": "Прїе́мъ, сла́вне, дх҃а зари̑ ꙗ҆вле́нїемъ, ꙗ҆́кѡ зерца́ло проро́чєствїѧ бжⷭ҇твеннагѡ сїѧ́нїѧ, ѡ҆блиста́лъ є҆сѝ, ꙗ҆́кѡ сꙋ̑щаѧ, проро́чествꙋѧ бꙋ̑дꙋщаѧ."
 },
 {
  "type": "TEXT",
  "value": "Тво́й прїи́де цр҃ь, ра́дꙋйсѧ, сїѡ́не, и҆ красꙋ́йсѧ, ви́дѧ, и҆ мі́ръ просвѣтѝ блиста́ньми своегѡ̀ бжⷭ҇тва̀, и҆ де́мѡнскꙋю ле́сть посрамѝ."
 },
 {
  "type": "TEXT",
  "value": "Бг҃оро́диченъ: Пло́ти бре́ннѣй соедини́сѧ, и҆́же и҆зъ ѻ҆ц҃а̀ є҆диноро́дный въ ложесна́хъ твои́хъ, є҆ди́нъ и҆зъ двꙋ́хъ про́йде безъ тлѣ́нїѧ, соблю́дъ неврежде́нно чⷭ҇тое дѣ́вство твоѐ, всепѣ́таѧ."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ:"
 },
 {
  "type": "TEXT",
  "value": "Ꙗ҆ви́лсѧ є҆сѝ свѣтоза́ренъ бжⷭ҇твеннымъ дх҃омъ, прⷪ҇ро́че софо́нїе, бж҃їе ꙗ҆вле́нїе возгласи́въ: ра́дꙋйсѧ ѕѣлѡ̀, дщѝ сїѡ́нѧ і҆ерꙋсали́мова, проповѣ́ждь: сѐ цр҃ь тво́й грѧде́тъ, спаса́ѧй."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Возсїѧ̀ па́мѧть твоѧ̀, прⷪ҇ро́че, мі́рꙋ, ꙗ҆́коже со́лнце, ѡ҆зарѧ́ющи проро́чества бл҃года́тїю твое́ю согла́снѡ пою́щыѧ вѣ́рнѡ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Тꙋ́чнѣйшїй ѻ҆́блакъ ты̀ ꙗ҆ви́всѧ, тꙋ́чꙋ бг҃оразꙋ́мїѧ на́мъ возсїѧ́лъ є҆сѝ ѿ спаси́тельныхъ, бл҃же́нне, и҆сто́чникѡвъ, и҆́миже просвѣща́емсѧ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Сло́во, дре́вле є҆́же бы́ти подаю́щее всѣ̑мъ бжⷭ҇твеннымъ хотѣ́нїемъ, воззва́ти восхотѣ́въ человѣ́ка, чⷭ҇таѧ, въ твою̀ всели́сѧ ᲂу҆тро́бꙋ, бл҃гослове́ннаѧ, ꙗ҆́же бг҃а пло́тїю ро́ждши."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки."
 },
 {
  "type": "TEXT",
  "value": "Возложе́нъ ве́сь вседержи́телю, промышле́нїѧ ѻ҆бразѡ́мъ тайнонаꙋчи́лсѧ є҆сѝ, строи́тельнѡ ꙗ҆зы́ки наказꙋ́ѧ. Тѣ́мъ тѧ̀ пое́мъ прⷪ҇ро́че, бг҃оглаго́ливе."
 },
 {
  "type": "TEXT",
  "value": "Моле́бное пѣ́нїе бг҃ꙋ принесѝ ѡ҆ пою́щихъ тѧ̀, бг҃облаже́нне, и҆ напа́стей разорѝ смꙋще́нїе да тѧ̀ пое́мъ, прⷪ҇ро́че бг҃оглаго́ливе."
 },
 {
  "type": "TEXT",
  "value": "Бг҃оро́диченъ: Жизнода́вца ро́ждши бг҃а и҆ гдⷭ҇и, сме́ртное гꙋби́тельство неꙋде́ржное ᲂу҆ста́вила є҆сѝ, пречⷭ҇таѧ, сїѐ ᲂу҆мертви́вши. Тѣ́мъ тѧ̀ пое́мъ во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. Є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ."
 },
 {
  "type": "TEXT",
  "value": "На землѝ кро́ткихъ ты̀ всели́лсѧ є҆сѝ, и҆дѣ́же по кончи́нѣ а҆́гг҃льскїѧ зри́ши свѣ́тлѡсти, софо́нїе всемꙋ́дре, прⷪ҇ро́че бж҃їй, кро́токъ бы́въ, сїѧ́ѧ бл҃года́тїю. Тѣ́мже ра́дꙋющесѧ вѣ́рнїи тѧ̀ ᲂу҆блажа́емъ."
 },
 {
  "type": "TEXT",
  "value": "Твои́хъ прорече́нїй, пресла́вне, свѣ́тлѡ ви́дѧще бы́вшее сбытїѐ, да́ннѣй тебѣ̀ бл҃года́ти чꙋди́мсѧ, и҆ ᲂу҆ма̀ твоегѡ̀ чистотѣ̀, и҆ дꙋшѝ бг҃ови́дномꙋ ᲂу҆дивлѧ́емсѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ ты̀, никогда́же и҆́на дарова́сѧ ѿ родѡ́въ дре́внихъ, бг҃ома́ти всенепоро́чнаѧ: ты́ бо є҆ди́на всѣ́хъ несравне́ннꙋю и҆мѣ́ла є҆сѝ ст҃ы́ню и҆ чⷭ҇тотꙋ̀. Тѣ́мже прїѧ́ла є҆сѝ бг҃а, въ тебѣ̀ воплоща́ема."
 },
 {
  "type": "HEADER",
  "value": "Свѣти́ленъ днѐ."
 }
]