ponomar-pwa/static/data/shared/menaion-daily/12-07/1.json

[
 {
  "type": "HEADER",
  "value": "Деке́мврїа з҃"
 },
 {
  "type": "HEADER",
  "value": "И҆́же во ст҃ы́хъ ѻ҆тца̀ на́шегѡ а҆мвро́сїа, є҆пі́скопа медїола́нскагѡ:"
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры а҆мвро́сїа, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Влⷣчества престо́лъ ᲂу҆краша́ѧ добродѣ́тельми, ѿ вдохнове́нїѧ бжⷭ҇твенна свѧщеннонача́лїе подо́бнѣ прїѧ́лъ є҆сѝ: тѣ́мже вѣ́ренъ строи́тель благода́ти во ѻ҆бои́хъ, а҆мвро́сїе, бы́въ, сꙋгꙋ́бъ вѣне́цъ наслѣ́довалъ є҆сѝ."
 },
 {
  "type": "TEXT",
  "value": "Въ воздержа́нїи и҆ болѣ́знехъ, и҆ во бдѣ́нїихъ мно́зѣхъ, и҆ моли́твахъ спротѧже́нныхъ, дꙋ́шꙋ и҆ тѣ́ло ѡ҆чи́стилъ є҆сѝ, бг҃омꙋ́дре: сосꙋ́дъ про́чее и҆збра́нъ ꙗ҆ви́всѧ хрⷭ҇тꙋ̀ бг҃ꙋ, а҆пⷭ҇лѡмъ ра́венъ ꙗ҆́вльсѧ, воспрїѧ́лъ є҆сѝ дарова̑нїѧ."
 },
 {
  "type": "TEXT",
  "value": "Благочести́ваго царѧ̀, согрѣши́вша и҆ногда̀, ꙗ҆́кѡ дв҃да наѳа́нъ, дерзнове́нїемъ ѡ҆бличи́лъ є҆сѝ, а҆мвро́сїе всеблаже́нне, сего̀ ꙗ҆́вѣ ѿлꙋче́нїю подложи́лъ є҆сѝ, и҆ покаѧ́нїемъ наказа́въ бг҃олѣ́пнѡ, сочи́слилъ є҆сѝ па́ствѣ твое́й."
 },
 {
  "type": "HEADER",
  "value": "И҆́ны стїхи̑ры бцⷣы, гла́съ и҆ подо́бенъ то́йже:"
 },
 {
  "type": "HEADER",
  "value": "(А҆́ще А҆ллилꙋ́їа, сі́и стїхи̑ры пою́тсѧ пре́жде.)"
 },
 {
  "type": "TEXT",
  "value": "Жезло́мъ твоегѡ̀ предста́тельства, бг҃ороди́тельнице чⷭ҇таѧ, ѕвѣри̑ныѧ стра̑сти ѻ҆каѧ́нныѧ дꙋшѝ моеѧ̀ ѿженѝ: и҆ ѿвсю́дꙋ ми́рнѡ къ жи́зни мѧ̀ ᲂу҆правлѧ́ющи: ст҃о́мꙋ ста́дꙋ и҆збра́нныхъ твои́хъ ѻ҆ве́цъ причтѝ."
 },
 {
  "type": "TEXT",
  "value": "Ꙗ҆́кѡ помо́щница ты̀ є҆сѝ безпомо́щныхъ человѣ́кѡвъ, ꙗ҆́кѡ наде́жда є҆сѝ всѣ́хъ ненаде́жныхъ, рѣше́нїе, бцⷣе, въ лю́тыхъ, и҆ по́мощь мнѣ̀ бꙋ́ди, грѣхѡ́въ и҆ бѣ́дъ, ꙗ҆́кѡ ми́лостива, и҆збавлѧ́ющи мѧ̀, пречⷭ҇таѧ."
 },
 {
  "type": "TEXT",
  "value": "Всегꙋби́тельныхъ страсте́й мои́хъ ѻ҆гнепа̑льнаѧ стремлє́нїѧ, росо́ю бжⷭ҇твенною, во́льнымъ ѡ҆дожде́нїемъ твои́мъ ᲂу҆гасѝ, дв҃о: да и҆ а҆́зъ, ꙗ҆́коже ѻ҆́троцы, бг҃а, и҆зъ тебє̀ рожде́ннаго, благодарю̀, и҆ сла́влю и҆ благословлю̀ бл҃года́ть твою̀, влⷣчце."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:"
 },
 {
  "type": "TEXT",
  "value": "Нра́вомъ гнилы́мъ попо́лзсѧ, ни́цъ лежꙋ̀, и҆ къ твое́й, дв҃о, притека́ю тишинѣ̀, ѿ бꙋ́ри сопроти́вныѧ и҆ и҆скꙋше́нїй многоѻбра́зныхъ мѧ̀ и҆зба́ви: да пою̀ твою̀ бл҃года́ть непреста́ннѡ, бцⷣе мт҃и, приснодв҃о."
 },
 {
  "type": "HEADER",
  "value": "Крⷭ҇тобг҃оро́диченъ. Подо́бенъ то́йже."
 },
 {
  "type": "TEXT",
  "value": "Оу҆ крⷭ҇та̀ предстоѧ́щи сн҃а и҆ бг҃а твоегѡ̀, и҆ долготерпѣ́нїе тогѡ̀ смотрѧ́ющи, глаго́лаше: пла́чꙋщи, мт҃и чⷭ҇таѧ: ᲂу҆вы̀ мнѣ̀, ча́до сладча́йшее, что̀ сїѧ̑ стра́ждеши непра́веднѡ, сло́ве бж҃їй, да спасе́ши человѣ́чество;"
 },
 {
  "type": "HEADER",
  "value": "На стїхо́внѣ, ѻ҆ктѡ́иха. Тропа́рь, гла́съ д҃:"
 },
 {
  "type": "TEXT",
  "value": "Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. Сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ: ѻ҆́ч҃е а҆мвро́сїе, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха."
 },
 {
  "type": "HEADER",
  "value": "И҆ ст҃а́гѡ канѡ́нъ на д҃, творе́нїе і҆ѡ́сифово, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Всевели́каго а҆мвро́сїа восхвалю̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Бжⷭ҇твенными свѣтоли̑тїи, прпⷣбне, ѡ҆блиста́емь, свѣ́тлое и҆ свѣтоно́сное и҆ ст҃о́е твоѐ ᲂу҆спе́нїе благоче́стнѡ чтꙋ́щыѧ твои́ми моли́твами просвѣтѝ."
 },
 {
  "type": "TEXT",
  "value": "Сло́во бж҃їе премꙋ́дрости тебѣ̀ сло́во дарова̀, ᲂу҆кра́шенное зна́нїемъ и҆́стиннымъ, і҆ера́рше а҆мвро́сїе, є҆реті́чествꙋющихъ безслове́сное ѿража́ѧ ѕломы́слїе."
 },
 {
  "type": "TEXT",
  "value": "Оу҆ма̀ твоегѡ̀ зри́тельное, пребога́те, пред̾ѡчи́стивъ ѿ стра́стныѧ мглы̀, прїѧ́тно чи́стыхъ блиста́нїй всест҃а́гѡ дх҃а содѣ́лалъ є҆сѝ, всеблаже́нне."
 },
 {
  "type": "TEXT",
  "value": "Всемꙋ́дрыми и҆ свѧще́нными твои́ми догма̑ты а҆рїемꙋ́дрственнꙋю ѿгна́въ па́гꙋбꙋ, ꙗ҆́кѡ па́стырь, на ѕла́цѣ ᲂу҆па́слъ є҆сѝ правосла́вїѧ, всемꙋ́дре, словє́сныѧ твоѧ̑ вѣ́рою ѻ҆́вцы."
 },
 {
  "type": "TEXT",
  "value": "Бг҃оро́диченъ: Безсѣ́меннѡ ѻ҆́ч҃ею во́лею, ѿ бжⷭ҇твеннагѡ дх҃а бж҃їѧ зачала̀ є҆сѝ сн҃а, и҆ пло́тїю родила̀ є҆сѝ и҆зъ ѻ҆ц҃а̀ безма́тернѧ, и҆ на́съ ра́ди и҆зъ тебє̀ без̾ѻ́тча."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче."
 },
 {
  "type": "TEXT",
  "value": "Велича́йшꙋ бл҃года́ть ѿ бг҃а прїе́мъ и҆ си́лꙋ, твои́мъ чꙋ́вственнымъ прикоснове́нїемъ разли̑чныѧ стра̑сти, ѻ҆́ч҃е а҆мвро́сїе, и҆сцѣлѧ́лъ є҆сѝ приходѧ́щихъ къ тебѣ̀."
 },
 {
  "type": "TEXT",
  "value": "Наꙋче́нъ, ꙗ҆́кѡ і҆ера́рхъ бжⷭ҇твенный, прпⷣбне, всѧ́кое разꙋмѣ́нїе писа́нїѧ, невѣ́дꙋщымъ, ѻ҆́ч҃е а҆мвро́сїе, неꙋдобопости̑жнаѧ ꙗ҆́вѣ ᲂу҆ѧсни́лъ є҆сѝ."
 },
 {
  "type": "TEXT",
  "value": "Тебѣ̀, мꙋ́дростїю дꙋхо́вною сїѧ́ющꙋ, несмы́сленнѡ прибли́житисѧ де́рзостнѡ сквернѣ́йшꙋю ᲂу҆стре́мльшꙋюсѧ скорѣ́йше ᲂу҆мертви́лъ є҆сѝ бжⷭ҇твеннымъ приглаго́ланїемъ."
 },
 {
  "type": "TEXT",
  "value": "Бг҃оро́диченъ: Ро́дъ человѣ́ческїй ѡ҆бнови́ла є҆сѝ є҆ди́на, ро́ждши є҆стества̀ на́шегѡ содѣ́телѧ же и҆ гдⷭ҇а: тѣ́мже тѧ̀ сла́вимъ, бг҃ора́дованнаѧ."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Прⷪ҇ро́ка и҆лїю̀ ревноѡбразꙋ́ѧ, и҆ і҆ѡа́нна та́кожде крⷭ҇ти́телѧ, мꙋ́жески ѡ҆бличи́лъ є҆сѝ царѧ̀ беззако́нновавша, і҆ера́рше: прⷭ҇то́лъ бжⷭ҇твеннѣ ᲂу҆краси́лъ є҆сѝ, и҆ чꙋде́съ мно́жествомъ мі́ръ ѡ҆богати́лъ є҆сѝ. Тѣ́мже и҆ бжⷭ҇твенными писа̑нїи наꙋче́нъ, вѣ̑рныѧ ᲂу҆тверди́лъ є҆сѝ, и҆ невѣ̑рныѧ ѡ҆брати́лъ є҆сѝ, і҆ера́рше а҆мвро́сїе, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Помышле́ньми поползо́хсѧ лꙋка́выми, во глꙋбинꙋ̀ впадо́хъ грѣхо́внꙋю, и҆ стенѧ̀ взыва́ю тѝ ѿ се́рдца, пречⷭ҇таѧ: на мнѣ̀ ᲂу҆дивѝ бога́тꙋю ми́лость, и҆ твоегѡ̀ милосе́рдїѧ неизмѣ́рнꙋю пꙋчи́нꙋ, и҆ щедро́тъ твои́хъ неизче́тное бога́тство: и҆ да́ждь мѝ покаѧ́нїе, и҆ прегрѣше́нїй проще́нїе, да любо́вїю взыва́ю тебѣ̀: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мѝ: тѧ́ бо наде́ждꙋ и҆мѣ́ю ра́бъ тво́й."
 },
 {
  "type": "TEXT",
  "value": "Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе."
 },
 {
  "type": "TEXT",
  "value": "І҆ера́рхъ показа́лсѧ є҆сѝ, пома́завсѧ мѵ́ромъ свѧще́нства, соверша́ѧ свѧще́нники, всѣ̑мъ спаси́тельное да́рꙋѧ ѡ҆чище́нїе."
 },
 {
  "type": "TEXT",
  "value": "Соблю́лъ є҆сѝ па́ствꙋ твою̀ ѿ всѧ́кагѡ вре́да проти́вныхъ, бл҃же́нне, и҆ а҆́рїевꙋ ле́сть всю̀ ѡ҆мрачи́лъ є҆сѝ сїѧ́нїемъ слове́съ твои́хъ."
 },
 {
  "type": "TEXT",
  "value": "Дх҃а си́лою ѡ҆гражде́нъ, лꙋка́выѧ ѿгонѧ́еши ѕло́бы, всебл҃же́нне, дꙋ́хи, не терпѧ́щыѧ твоегѡ̀ запреще́нїѧ."
 },
 {
  "type": "TEXT",
  "value": "Бг҃оро́диченъ: Всѧ̑ во́лею содѣ́тельствовавый содѣ́тельствꙋетсѧ хотѧ̀ ѿ чⷭ҇тыхъ твои́хъ крове́й, спаса́ѧ вѣ́дꙋщыѧ тѧ̀, чⷭ҇тꙋю бг҃ома́терь."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Оу҆́мъ, сїѧ́ющъ свѣ́томъ невеще́ственнымъ, стѧжа́въ ѡ҆блиста́лъ є҆сѝ врачева́нїй и҆ чꙋде́съ зари̑, а҆мвро́сїе бл҃же́нне."
 },
 {
  "type": "TEXT",
  "value": "Воздви́глъ є҆сѝ тебѐ сама́го, сщ҃е́нное жили́ще дх҃а, разори́лъ є҆сѝ хра́мы і҆́дѡльскїѧ, а҆мвро́сїе бг҃одохнове́нне."
 },
 {
  "type": "TEXT",
  "value": "Велича́йшихъ добродѣ́телей свѣтозаре́нїемъ сїѧ́юща, постыдѣ́шасѧ ца́рїе тебє̀, и҆ предѣ́ла ѧ҆зы́ка твоегѡ̀ не поколеба́ша."
 },
 {
  "type": "TEXT",
  "value": "Бг҃оро́диченъ: Хотѣ́нїемъ всѐ мꙋ́дрѣ содѣ́ловаѧ, хотѧ̀ ѡ҆бнови́ти человѣ́ки, дв҃о, въ твою̀ ᲂу҆тро́бꙋ всели́сѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Ри́мъ твоѧ̑ честна̑ѧ благохва́литъ и҆справлє́нїѧ: ꙗ҆́кѡ бо ѕвѣзда̀ свѣтови́дна, всю́дꙋ лꙋчы̀ чꙋде́съ твои́хъ, і҆ера́рше, и҆спꙋсти́лъ є҆сѝ, вѣ́рнѡ ᲂу҆дивлѧ́емь."
 },
 {
  "type": "TEXT",
  "value": "Оу҆́треневавъ ко хрⷭ҇тꙋ̀, та́мѡ сꙋ́щими свѣтлостьмѝ ѡ҆зари́лсѧ є҆сѝ бога́тнѡ, и҆ свѣ́та напо́лнилсѧ є҆сѝ бжⷭ҇твеннѣйшагѡ, и҆ просвѣща́еши вѣ́рнѡ чтꙋ́щыѧ тѧ̀ всегда̀."
 },
 {
  "type": "TEXT",
  "value": "Тѣ́ло и҆ дꙋ́шꙋ твою̀ бг҃ꙋ ѡ҆свѧти́въ, и҆ прїѧ́тнѡ содѣ́лалъ є҆сѝ дарова́нїй, ѻ҆́ч҃е, твоѐ се́рдце, непреста́ннѡ вне́млющее сла́дкомꙋ жела́нїю."
 },
 {
  "type": "TEXT",
  "value": "Бг҃оро́диченъ: И҆сцѣлѝ дꙋшѝ моеѧ̀, дв҃о, ꙗ҆́звы, ѡ҆сѣне́нїемъ твои́мъ бжⷭ҇твеннымъ, и҆ ᲂу҆́мъ мо́й просвѣтѝ, ѡ҆мраче́нный лѣ́ностїю и҆ ѕло́бою врага̀ борца̀."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Бжⷭ҇твенныѧ вѣ́ры:"
 },
 {
  "type": "TEXT",
  "value": "Бжⷭ҇твенными догма̑ты ѡ҆блиста́ѧ, помрачи́лъ є҆сѝ а҆́рїевꙋ пре́лесть, свѧщеннотаи́нниче и҆ па́стырю а҆мвро́сїе: чꙋдодѣ́йствꙋѧ же си́лою дх҃а, стра̑сти разли̑чныѧ ꙗ҆́вѣ и҆сцѣли́лъ є҆сѝ, ѻ҆́ч҃е прпⷣбне, хрⷭ҇та̀ бг҃а молѝ, спасти́сѧ дꙋша́мъ на́шымъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Бжⷭ҇твенное вѣща́нїе твои́хъ догма́тѡвъ, ѻ҆́ч҃е всемꙋ́дре, ꙗ҆́коже мо́лнїѧ, про́йде всю̀ зе́млю: и҆ чꙋде́съ показа́ньми, ꙗ҆́кѡ свѣ́тъ ѡ҆блиста̀, ꙗ҆̀же во мра́цѣ сердца̀ просвѣща́ющее."
 },
 {
  "type": "TEXT",
  "value": "Законоположе́нїємъ сп҃са ты̀ послѣ́дꙋѧ, ѻ҆́ч҃е, да́нный тебѣ̀ тала́нтъ, ꙗ҆́кѡ ра́бъ блажа́йшїй, тща́тельнѡ ᲂу҆многосꙋгꙋ́билъ є҆сѝ, влⷣчнїѧ сподоблѧ́емь ра́дости."
 },
 {
  "type": "TEXT",
  "value": "И҆з̾ѡстри́въ бг҃осло́вный тво́й ᲂу҆́мъ, стрꙋи̑ свѧще́нныхъ догма́тѡвъ, ꙗ҆́кѡ рѣкꙋ̀, и҆спꙋсти́лъ є҆сѝ напоѧ́ѧ вѣ́рныхъ и҆сполне́нїе, свѧщеннотаи́нниче ѻ҆́ч҃е а҆мвро́сїе."
 },
 {
  "type": "TEXT",
  "value": "Бг҃оро́диченъ: Сѐ, дв҃о, во ᲂу҆тро́бѣ твое́й зачала̀ є҆сѝ сло́во, ѻ҆ц҃ꙋ̀ собезнача́льно: и҆ пло́тїю породила̀ є҆сѝ да́рꙋющее всѣ̑мъ воззва́нїе, сꙋ́щымъ и҆зъ а҆да́ма па́дшымъ, всенепоро́чнаѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆мертви́въ ᲂу҆́ды и҆ ме́ртво плотско́е мꙋдрова́нїе содѣ́лавъ, дꙋ́шꙋ ѡ҆живи́лъ є҆сѝ, прпⷣбне, и҆ и҆сто́чникъ чꙋде́съ и҆сточи́лъ є҆сѝ ᲂу҆мерщвлє́ннымъ ѿ страсте́й, жи́знь подаю́щи вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆вѣ́дѣлъ є҆сѝ преставле́нїе, мꙋ́дре, є҆́же ѿ тѣлесѐ, бжⷭ҇твеннымъ дх҃омъ: прⷪ҇ро́чески бо сїѐ сꙋ́щымъ съ тобо́ю сказа́лъ є҆сѝ, и҆ ра́достнѡ на нб҃са̀ вопїѧ̀ восте́клъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Тѣ́ло, и҆ се́рдце, и҆ ᲂу҆́мъ пред̾ѡчи́стивъ ѿ страсте́й смѣше́нїѧ, ѻ҆гнено́снꙋ лꙋчꙋ̀ свы́ше прїѧ́лъ є҆сѝ дх҃а, ꙗ҆́коже бжⷭ҇твеннїи ᲂу҆ч҃ницы̀ вопїѧ̀, а҆мвро́сїе: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Ꙗ҆ви́ласѧ є҆сѝ превы́шши нб҃съ, бг҃а нбⷭ҇наго поро́ждши, земна̑ѧ, пречⷭ҇таѧ, нбⷭ҇нымъ совокꙋ́пльшаго, и҆ позна́нїе своѐ всѣ̑мъ подаю́щаго, вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ, веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Ви́дѣлъ є҆сѝ, во и҆зстꙋпле́нїи бы́въ, вѣ̑чныѧ ст҃ы̑мъ, ѻ҆́ч҃е, лежа́щыѧ по́чєсти: къ ни́мже преше́лъ є҆сѝ, воспрїе́мъ твои́хъ трꙋдѡ́въ, сла́вне, воздаѧ̑нїѧ, веселѧ́сѧ."
 },
 {
  "type": "TEXT",
  "value": "Ꙗ҆́кѡ гро́здъ зрѣ́лъ, бг҃омꙋ́дре, въ точи́лѣхъ го́рнихъ досто́йнѡ сокро́вищствовалсѧ є҆сѝ, и҆сточа́ѧ безсме́ртїѧ вїно̀, а҆мвро́сїе, и҆ врачева́нїй дарова̑нїѧ благоче́стнѡ къ тебѣ̀ притека́ющымъ."
 },
 {
  "type": "TEXT",
  "value": "Тѧ̀, златоза́рный, ѻ҆́ч҃е, бжⷭ҇твеннагѡ дх҃а свѣти́льникъ, свѣ́тъ благочести́выхъ ᲂу҆че́нїй, и҆ врачева́нїй лꙋчꙋ̀ и҆спꙋща́ющъ, и҆ вѣ̑рныѧ просвѣща́ющъ, велегла́снѡ ᲂу҆блажа́емъ."
 },
 {
  "type": "TEXT",
  "value": "Днесвѣ́тлꙋю тѧ̀ ѕвѣздꙋ̀ цр҃ковь стѧжа́вши, тмы̀ и҆збѣга́етъ всѧ́кїѧ, всеблаже́нне, льстѝ, и҆ свѣ́тлостьми сщ҃е́нныхъ твои́хъ догма́тѡвъ ѡ҆зарѧ́ема, блажи́тъ тѧ̀."
 },
 {
  "type": "TEXT",
  "value": "Бг҃оро́диченъ: Гла́съ тебѣ̀ вопїе́мъ, дв҃о, ра́достнѣ а҆рха́гг҃ловъ: ра́дꙋйсѧ, проклѧ́тства разрѣше́нїе, лю́тыхъ всѣ́хъ, ра́дꙋйсѧ, и҆збавле́нїе, земны̑ѧ ѡ҆божи́вшаѧ па́че ᲂу҆ма̀ рождество́мъ твои́мъ."
 }
]