ponomar-pwa/static/data/shared/menaion-daily/12-26/1.json

[
 {
  "type": "HEADER",
  "value": "Деке́мврїа к҃ѕ"
 },
 {
  "type": "HEADER",
  "value": "Собо́ръ прест҃ы́ѧ бцⷣы."
 },
 {
  "type": "HEADER",
  "value": "И҆ па́мѧть ст҃а́гѡ свѧщенномꙋ́ченика є҆ѵѳѵ́мїа, є҆пі́скопа сарді́йскагѡ."
 },
 {
  "type": "HEADER",
  "value": "Слꙋ́жба є҆гѡ̀ пое́тсѧ на повече́рїи."
 },
 {
  "type": "HEADER",
  "value": "Ве́черъ стїхоло́гїи не быва́етъ, кромѣ̀ недѣ́ли."
 },
 {
  "type": "HEADER",
  "value": "На Гдⷭ҇и, воззва́хъ: стїхи̑ры пра́здника, на ѕ҃. Гла́съ в҃, самогла́сны:"
 },
 {
  "type": "TEXT",
  "value": "Прїиди́те, возра́дꙋемсѧ гдⷭ҇еви, настоѧ́щꙋю та́йнꙋ сказꙋ́юще: средостѣ́нїе граде́жа разрꙋши́сѧ, пла́менное ѻ҆рꙋ́жїе плещы̀ дае́тъ, и҆ херꙋві́мъ ѿстꙋпа́етъ ѿ дре́ва жи́зни: и҆ а҆́зъ ра́йскїѧ пи́щи причаща́юсѧ, ѿ негѡ́же произгна́нъ бы́хъ преслꙋша́нїѧ ра́ди: неизмѣ́нный бо ѻ҆́бразъ ѻ҆ч҃ь, ѻ҆́бразъ присносꙋ́щїѧ є҆гѡ̀, зра́къ раба̀ прїе́млетъ, ѿ неискꙋсобра́чныѧ мт҃ре проше́дъ, не преложе́нїе претерпѣ́въ: є҆́же бо бѣ̀ пребы́сть, бг҃ъ сы́й и҆́стиненъ: и҆ є҆́же не бѣ̀ прїѧ́тъ, чл҃вѣ́къ бы́въ чл҃вѣколю́бїѧ ра́ди. Томꙋ̀ возопїи́мъ: рожде́йсѧ ѿ дв҃ы бж҃е, поми́лꙋй на́съ. Два́жды."
 },
 {
  "type": "TEXT",
  "value": "А҆нато́лїево: Гдⷭ҇ꙋ і҆и҃сꙋ ро́ждшꙋсѧ ѿ ст҃ы́ѧ дв҃ы, просвѣти́шасѧ всѧ́чєскаѧ. Па́стырємъ бо свирѧ́ющымъ, и҆ волхвѡ́мъ покланѧ́ющымсѧ, а҆́гг҃лѡмъ воспѣва́ющымъ, и҆́рѡдъ мѧтѧ́шесѧ, ꙗ҆́кѡ бг҃ъ во пло́ти ꙗ҆ви́сѧ, сп҃съ дꙋ́шъ на́шихъ. Два́жды."
 },
 {
  "type": "TEXT",
  "value": "Црⷭ҇тво твоѐ, хрⷭ҇тѐ бж҃е, црⷭ҇тво всѣ́хъ вѣкѡ́въ, и҆ влⷣчество твоѐ во всѧ́комъ ро́дѣ и҆ ро́дѣ. Воплоти́выйсѧ ѿ дх҃а ст҃а́гѡ, и҆ ѿ приснодв҃ы марі́и вочл҃вѣ́чивыйсѧ, свѣ́тъ на́мъ возсїѧ̀, хрⷭ҇тѐ бж҃е, твоѐ прише́ствїе: свѣ́тъ ѿ свѣ́та, ѻ҆́ч҃ее сїѧ́нїе, всю̀ тва́рь просвѣти́лъ є҆сѝ: всѧ́кое дыха́нїе хва́литъ тѧ̀, ѻ҆́бразъ сла́вы ѻ҆́ч҃їѧ. Сы́й и҆ пре́жде сы́й, и҆ возсїѧ́вый ѿ дв҃ы бж҃е, поми́лꙋй на́съ."
 },
 {
  "type": "TEXT",
  "value": "Что̀ тебѣ̀ принесе́мъ, хрⷭ҇тѐ, ꙗ҆́кѡ ꙗ҆ви́лсѧ є҆сѝ на землѝ, ꙗ҆́кѡ человѣ́къ на́съ ра́ди; ка́ѧждо бо ѿ тебє̀ бы́вшихъ тва́рей благодаре́нїе тебѣ̀ прино́ситъ: а҆́гг҃ли, пѣ́нїе: нб҃са̀, ѕвѣздꙋ̀: волсвѝ, да́ры: па́стырїе, чꙋ́до: землѧ̀, верте́пъ: пꙋсты́нѧ, ꙗ҆́сли: мы́ же, мт҃рь дв҃ꙋ. И҆́же пре́жде вѣ̑къ, бж҃е, поми́лꙋй на́съ."
 },
 {
  "type": "HEADER",
  "value": "Сла́ва, и҆ ны́нѣ: гла́съ ѕ҃:"
 },
 {
  "type": "TEXT",
  "value": "Сла́ва въ вы́шнихъ бг҃ꙋ, и҆ на землѝ ми́ръ, дне́сь воспрїе́млетъ виѳлее́мъ сѣдѧ́щаго при́снѡ со ѻ҆ц҃е́мъ, дне́сь а҆́гг҃ли млⷣнца рожде́ннаго бг҃олѣ́пнѡ славосло́вѧтъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ благоволе́нїе."
 },
 {
  "type": "HEADER",
  "value": "Вхо́дъ. Прокі́менъ, гла́съ з҃:"
 },
 {
  "type": "TEXT",
  "value": "Кто̀ бо́гъ ве́лїй, ꙗ҆́кѡ бг҃ъ на́шъ, ты̀ є҆сѝ бг҃ъ творѧ́й чꙋдеса̀."
 },
 {
  "type": "TEXT",
  "value": "Сті́хъ а҃: Сказа́лъ є҆сѝ въ лю́дехъ си́лꙋ твою̀, и҆ и҆зба́вилъ є҆сѝ мы́шцею твое́ю лю́ди твоѧ̀."
 },
 {
  "type": "TEXT",
  "value": "Сті́хъ в҃: И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ."
 },
 {
  "type": "TEXT",
  "value": "Сті́хъ г҃: Помѧнꙋ́хъ дѣла̀ гдⷭ҇нѧ, ꙗ҆́кѡ помѧнꙋ̀ ѿ нача́ла чꙋдеса̀ твоѧ̑."
 },
 {
  "type": "HEADER",
  "value": "(Зрѝ) А҆́ще є҆́сть сꙋббѡ́та, ве́черъ пое́мъ прокі́менъ: Гдⷭ҇ь воцр҃и́сѧ въ лѣ́потꙋ ѡ҆блече́сѧ. Со стїхи̑ є҆гѡ̀. А҆ вели́кїй прокі́менъ: Кто̀ бо́гъ ве́лїй, ꙗ҆́кѡ бг҃ъ на́шъ: Со стїхи̑ є҆гѡ̀ пое́тсѧ тогда̀ въ на́вечерїи пра́здника: дневны́й же ѡ҆ставлѧ́етсѧ. Посе́мъ є҆ктенїа̀."
 },
 {
  "type": "HEADER",
  "value": "На стїхо́внѣ стїхи̑ры самогла́сны, гла́съ и҃."
 },
 {
  "type": "TEXT",
  "value": "І҆ѡа́нна мона́ха: Пресла́вное та́инство ᲂу҆строѧ́етсѧ дне́сь, ѡ҆бновлѧ́етсѧ є҆стество̀, и҆ бг҃ъ чл҃вѣ́къ быва́етъ: є҆́же бѣ̀ пребы́сть, и҆ є҆́же не бѣ̀ прїѧ́тъ, ни смѣше́нїѧ претерпѣ́въ, нижѐ раздѣле́нїѧ."
 },
 {
  "type": "TEXT",
  "value": "Сті́хъ: И҆зъ чре́ва пре́жде денни́цы роди́хъ тѧ̀: клѧ́тсѧ гдⷭ҇ь, и҆ не раска́етсѧ."
 },
 {
  "type": "TEXT",
  "value": "Гдⷭ҇и, въ виѳлее́мъ прише́дъ, въ верте́пъ всели́лсѧ є҆сѝ: нб҃о престо́лъ и҆мѣ́ѧ, въ ꙗ҆́слехъ положи́лсѧ є҆сѝ: є҆го́же вѡ́инства ѡ҆крꙋжа́ютъ а҆́гг҃лъ, па́стырємъ снизше́лъ є҆сѝ, да спасе́ши, ꙗ҆́кѡ милосе́рдъ, ро́дъ на́шъ, сла́ва тебѣ̀."
 },
 {
  "type": "TEXT",
  "value": "Сті́хъ: Речѐ гдⷭ҇ь гдⷭ҇еви моемꙋ̀: сѣдѝ ѡ҆деснꙋ́ю менє̀."
 },
 {
  "type": "TEXT",
  "value": "Ка́кѡ и҆зрекꙋ̀ вели́кое та́инство; безпло́тный воплоща́етсѧ, сло́во ѡ҆дебелѣва́етъ: неви́димый ви́дитсѧ, и҆ неѡсѧза́емый ѡ҆сѧза́етсѧ: и҆ безнача́льный начина́етсѧ. Сн҃ъ бж҃їй, сн҃ъ чл҃вѣ́чь быва́етъ: і҆и҃съ хрⷭ҇то́съ вчера̀ и҆ дне́сь, то́йже и҆ во вѣ́ки."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже:"
 },
 {
  "type": "TEXT",
  "value": "Въ виѳлее́мъ стеко́шасѧ па́стырїе, и҆́стиннаго возвѣща́юще па́стырѧ, сѣдѧ́щаго на херꙋві́мѣхъ, и҆ возлежа́щаго въ ꙗ҆́слехъ млⷣнца зра́къ воспрїи́мша на́съ ра́ди, гдⷭ҇и, сла́ва тебѣ̀."
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "Ржⷭ҇тво̀ твоѐ, хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѐ вѣ́дѣти съ высоты̀ восто́ка: гдⷭ҇и, сла́ва тебѣ̀."
 },
 {
  "type": "HEADER",
  "value": "Канѡ́нъ свѧщенномꙋ́ченикꙋ на повече́рїи пое́тсѧ во и҆́нъ де́нь. Ѳеофа́ново. Гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Рожде́нный тѧ̀ хрⷭ҇то́съ пелена́ми вѣнча́етъ, ѻ҆́ч҃е."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Припѣ́въ: Свѧщенномꙋ́чениче є҆ѵѳѵ́мїе молѝ бг҃а ѡ҆ на́съ."
 },
 {
  "type": "TEXT",
  "value": "Рожде́нномꙋ, присносꙋ́щемꙋ гдⷭ҇ꙋ, и҆ пелена́ми пови́томꙋ, спови́всѧ ꙗ҆́звенными ра́нами, благоче́стнѡ поклони́лсѧ є҆сѝ, и҆ къ немꙋ̀, є҆ѵѳѵ́мїе, со благодꙋ́шїемъ ѿше́лъ є҆сѝ."
 },
 {
  "type": "TEXT",
  "value": "Въ ꙗ҆́слехъ, поло́жсѧ гдⷭ҇ь, да́ръ ржⷭ҇тва̀ твои́хъ крове́й, ѻ҆́ч҃е, ка̑пли, и҆ ра́нъ твои́хъ ꙗ҆́звы, па́че зла́та и҆ лїва́на, и҆ па́че смѵ́рны прїѧ́тъ."
 },
 {
  "type": "TEXT",
  "value": "Зла́то ᲂу҆́бѡ ѿ волхвѡ́въ прїе́млетъ ро́ждсѧ гдⷭ҇ь, є҆́же къ немꙋ̀ любо́вь твою̀, ст҃и́телю, прилѣ́жнꙋю, и҆ тве́рдость, и҆ крѣ́пость при́снагѡ терпѣ́нїѧ твоегѡ̀."
 },
 {
  "type": "TEXT",
  "value": "Сме́ртїю сме́рти влⷣчнѣй подо́бѧсѧ, влⷣчни возгласи́лъ є҆сѝ гла́сы, ѡ҆ ᲂу҆бива́ющихъ тѧ̀ свѣ́тлѡ молѧ́сѧ, свѧщенноѧвле́нне всече́стне."
 },
 {
  "type": "TEXT",
  "value": "Бг҃оро́диченъ: И҆зъ тебє̀ бл҃гослове́ннаѧ дне́сь всѣ́хъ творе́цъ пло́тїю ражда́етсѧ по на́мъ, и҆ пелена́ми повива́етсѧ, пови́вый мо́ре мгло́ю, мт҃и приснодв҃о."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "Гноє́нїѧ мꙋ́ченичєскаѧ вмѣ́стѡ лїва́на, и҆ зла́та, и҆ смѵ́рны же, ꙗ҆́кѡ ст҃и́тель прине́слъ є҆сѝ, въ виѳлее́мѣ ро́ждшемꙋсѧ хрⷭ҇тꙋ̀."
 },
 {
  "type": "TEXT",
  "value": "Стефа́на подо́бникъ первомꙋ́ченика хрⷭ҇то́ва бы́лъ є҆сѝ, ѡ҆ спасе́нїи ᲂу҆бива́ющихъ тѧ̀ молѧ́сѧ, є҆ѵѳѵ́мїе."
 },
 {
  "type": "TEXT",
  "value": "Тве́рдостїю ᲂу҆ма̀ и҆ до́блестїю дꙋшѝ ѡ҆бличи́лъ є҆сѝ ѕлочести́ваго ле́онта, на сп҃са шата́ющагосѧ."
 },
 {
  "type": "TEXT",
  "value": "Соблю́лъ є҆сѝ прилѣ́жнѡ сп҃совꙋ за́повѣдь, прпⷣбне, и҆ дꙋ́шꙋ положи́лъ є҆сѝ по твои́хъ дрꙋзѣ́хъ, є҆ѵѳѵ́мїе."
 },
 {
  "type": "TEXT",
  "value": "Бг҃оро́диченъ: Село̀ вмѣсти́мое невмѣсти́магѡ содѣ́телѧ была̀ є҆сѝ, сего̀ пло́тїю вмѣсти́вши, ѡ҆бра́дованнаѧ всенепоро́чнаѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Заꙋша́емь по лицꙋ̀, ѿ бжⷭ҇твенныѧ благода́ти просвѣти́сѧ, и҆ слове́съ мꙋ́дростїю, бы́лъ є҆сѝ соприча́стникъ хрⷭ҇тꙋ̀, всеблаже́нне, на́съ ра́ди заꙋше́нномꙋ пло́тїю."
 },
 {
  "type": "TEXT",
  "value": "Свѧще́нства че́сти не постыдѣ́вшесѧ, и҆ сѣди́нъ честны́хъ не ᲂу҆сра́мльшесѧ, и҆ ста́рости твоеѧ̀ не почествова́вше безꙋ́мнїи, неми́лостивнѡ тѧ̀ ᲂу҆ранѧ́хꙋ."
 },
 {
  "type": "TEXT",
  "value": "Пелена́ми пови́томꙋ, и҆ въ ꙗ҆́слехъ возлежа́щемꙋ и҆зба́вителю, є҆ѵѳѵ́мїе, многоцѣ́ненъ да́ръ, ѻ҆́ч҃е, прине́слъ є҆сѝ честнꙋ́ю кро́вь твою̀, любо́вїю за него̀ и҆злїѧ́ннꙋю."
 },
 {
  "type": "TEXT",
  "value": "Бг҃оро́диченъ: Невеще́ствєннаѧ сꙋщєства̀ содѣ́лавый, пло́тїю ꙗ҆́кѡ чл҃вѣ́къ и҆зъ тебє̀, бг҃ома́ти, дне́сь ражда́етсѧ. Томꙋ̀ воспое́мъ: сла́ва въ вы́шнихъ хрⷭ҇тꙋ̀ бг҃ꙋ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Тебѣ̀ ѡ҆дꙋшевле́нъ ѻ҆́бразъ, сп҃се, прино́ситсѧ, поче́тшїй ѻ҆́бразъ честна́гѡ тѣ́ла твоегѡ̀, и҆ воѻбраже́нїе тѣле́сное."
 },
 {
  "type": "TEXT",
  "value": "Тебѣ̀, влⷣко, па́стырь благодꙋ́шїѧ тезоимени́тъ, ра̑ны тѣлесѐ твоегѡ̀ носѧ̀ на свое́мъ тѣ́лѣ, прино́ситсѧ."
 },
 {
  "type": "TEXT",
  "value": "Ѻ҆́гнь погаси́лъ є҆сѝ ꙗ҆́рости беззако́нныхъ, є҆ѵѳѵ́мїе, и҆злїѧ́нїемъ непра́веднѡ пролїѧ́нныхъ твои́хъ крове́й, свѧще́ннѣйшїй преблаже́нне."
 },
 {
  "type": "TEXT",
  "value": "Бг҃оро́диченъ: Тече́нїе ста̀ тлѣ́нїѧ, дв҃а бо нетлѣ́ннѡ родила̀ є҆́сть, и҆стлѣ́вшее человѣ́ческое є҆стество̀ ѿ тлѝ свобо́ждшаго."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Ѡ҆бнаже́нїемъ всѣ́хъ, сп҃совѣ наготѣ̀ ᲂу҆подо́бльсѧ, ѻ҆́ч҃е, и҆ ра́намъ, болѣ̑зни претерпѣ́въ, твою̀ кро́вь тогѡ̀ кро́ви спролїѧ́лъ є҆сѝ."
 },
 {
  "type": "TEXT",
  "value": "Любо́вь, и҆ наде́ждꙋ, и҆ вѣ́рꙋ бг҃омꙋ́дреннꙋ, во вѣ́ки пребыва́ющꙋю, добродѣ́тельми ѡ҆богати́всѧ, рожде́нномꙋ ѿ дв҃ы дароно́сиши, всеблаже́нне є҆ѵѳѵ́мїе."
 },
 {
  "type": "TEXT",
  "value": "Зако́ннѡ хрⷭ҇тꙋ̀ слꙋжи́въ, бжⷭ҇твенное свѧщеннодѣ́йство сло́во, мздꙋ̀ сегѡ̀, ѻ҆́ч҃е бг҃оглаго́ливе, прїѧ́лъ є҆сѝ, є҆́же тебѣ̀ сконча́тисѧ кро́вїю."
 },
 {
  "type": "TEXT",
  "value": "Бг҃оро́диченъ: Созда́вый по ѻ҆́бразꙋ своемꙋ̀ человѣ́ка, за мно́гое бл҃гоꙋтро́бїе ѡ҆бновлѧ́етъ сего̀, и҆зъ тебє̀, дв҃о бг҃ома́ти, соверше́ннѡ въ того̀ ѡ҆дѣ́ѧвсѧ."
 },
 {
  "type": "HEADER",
  "value": "Сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й, сп҃се:"
 },
 {
  "type": "TEXT",
  "value": "Прине́слъ є҆сѝ хрⷭ҇тꙋ̀ ѿ дв҃ы рожде́нномꙋ, є҆ѵѳѵ́мїе мꙋ́дре, ꙗ҆́кѡ волсвѝ да́ры, пострада́въ терпѣли́внѣйше, ст҃и́телю, кро́вь твою̀. Тѣ́мже прїѧ́лъ є҆сѝ сꙋгꙋ́бъ вѣне́цъ побѣ́ды, и҆ предстои́ши всест҃ѣ́й трⷪ҇цѣ, молѧ̀ спасти́сѧ на́мъ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Свѧще́нства свѧще́ннѣйше бг҃ода́нное пома́занїе, смѣси́въ съ кро́вїю твое́ю, свѧще́ннѣе показа́лъ є҆сѝ: бл҃гослове́нъ є҆сѝ, бж҃е мо́й, зовы́й, въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Поста́вивъ но́ги на ка́мени вѣ́ры, всѣ́ми прилѡ́ги, всеблаже́нне, и҆скꙋше́нїй непревраще́нъ пре́былъ є҆сѝ, бл҃гослове́нъ є҆сѝ, бж҃е мо́й, зовы́й, въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Спривле́клъ є҆сѝ благода́ть бжⷭ҇твеннагѡ первомꙋ́ченика, є҆гѡ́же показа́лсѧ є҆сѝ и҆зрѧ́днѣйшїй подража́тель, благослове́ньми возмє́здїѧ даѧ̀ ᲂу҆бива́ющымъ тѧ̀ неми́лостивнѡ, всеблаже́нне є҆ѵѳѵ́мїе."
 },
 {
  "type": "TEXT",
  "value": "Бг҃оро́диченъ: Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ: тобо́ю бо даде́сѧ ра́дость, бцⷣе, зовꙋ́щымъ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Ста́лъ є҆сѝ на сꙋди́щи, крѣ́пкѡ подвиза́ѧсѧ, ѻ҆́ч҃е є҆ѵѳѵ́мїе: соверше́ннѣйшемꙋ бо предѣ́лꙋ любвѐ поꙋчи́лсѧ є҆сѝ, ꙗ҆́кѡ и҆зво́лилъ є҆сѝ ᲂу҆мре́ти за дрꙋ́ги твоѧ̑, вопїю́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Свѣ́телъ и҆ сло́вомъ и҆ ᲂу҆мо́мъ, свѣ́тлꙋ стѧжа́лъ є҆сѝ дꙋ́шꙋ, свѣ́тло лицѐ, ны́нѣ же свѣтлѣ́е бы́лъ є҆сѝ да́же до кро́ве, є҆ѵѳѵ́мїе царє́мъ бг҃оненави̑стнымъ проти́вльсѧ, и҆ вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Нападо́ша, блаже́нне, на тѧ̀ крѣ́пцыи землѝ, ᲂу҆мертви́ти тѧ̀ беззакѡ́ннѣйшаѧ дѣ́лающїи: но ты̀, простира́ѧсѧ къ ро́ждшемꙋсѧ и҆зба́вителю ѿ дв҃ы чⷭ҇тыѧ, взыва́лъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Сѐ ны́нѣ ѡ҆скꙋдѣ̀ ꙗ҆́вѣ ѿ і҆ꙋ́дова колѣ́на кнѧ́зь и҆ и҆гꙋ́менъ: ты́ бо, всенепоро́чнаѧ, родила̀ є҆сѝ ꙗ҆́же томꙋ̀ пе́рвѣе ᲂу҆гото́вана, ча́ѧнїе ꙗ҆зы́кѡвъ хрⷭ҇та̀, є҆мꙋ́же пое́мъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Къ тиша́йшемꙋ приста́нищꙋ преста́вилсѧ є҆сѝ, ѻ҆́ч҃е, ѿ сꙋ́щихъ здѣ̀: ꙗ҆́коже бо вра́бїй и҆зба́вилсѧ є҆сѝ ѿ сѣ́ти ловѧ́щихъ тѧ̀, благословѧ̀ и҆зба́вльшаго, свѧщенномꙋ́чениче благодꙋ́шнѣйше."
 },
 {
  "type": "TEXT",
  "value": "Свѣ́тꙋ съ высоты̀ ꙗ҆́вльшꙋсѧ восто́ка, просвѣще́ннꙋ, и҆ свѣтоѧвле́нїемъ ѕвѣзды̀, ѿ і҆ꙋ́ды ны́нѣ возсїѧ́вшїѧ, преесте́ственнѡ сїѧ́ѧ, ко влⷣцѣ и҆зше́лъ є҆сѝ."
 },
 {
  "type": "TEXT",
  "value": "Ра́йскїѧ ны́нѣ широты̀ ликоходи́ти сподо́билсѧ є҆сѝ, и҆дѣ́же бл҃же́нныхъ свѣ́тлость и҆ ст҃ы́хъ ра́дованїе, ꙗ҆́кѡ страда́льца, є҆ѵѳѵ́мїе, тѧ̀ побѣдоно́сна прїѧ́ша."
 },
 {
  "type": "TEXT",
  "value": "И҆мѣ́ѧ къ бг҃ꙋ дерзнове́нїе, ꙗ҆́кѡ ст҃и́тель же и҆ мꙋ́ченикъ, ны́нѣ ѿ настоѧ́щїѧ зимы̀, цр҃кви тишинꙋ̀ и҆спросѝ, и҆ согрѣше́нїй ѡ҆ставле́нїе, тѧ̀ пою́щымъ, всебл҃же́нне."
 },
 {
  "type": "TEXT",
  "value": "Бг҃оро́диченъ: Же́злъ прозѧбла̀ є҆сѝ и҆зъ ко́рене і҆ессе́ева, бг҃ороди́тельнице, цвѣ́тъ бжⷭ҇тва̀, хрⷭ҇та̀ на́мъ ро́ждши, пречⷭ҇таѧ, дне́сь, ꙗ҆́кѡ бг҃а невмѣсти́маго, и҆ ны́нѣ ꙗ҆́кѡ млⷣнца повива́емаго."
 },
 {
  "type": "HEADER",
  "value": "Стїхи̑ры, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ:"
 },
 {
  "type": "TEXT",
  "value": "Є҆щѐ кро́вїю ка́паѧ и҆ ѡ҆блїѧ́нъ те́плою, и҆ па́ры и҆спꙋща́ѧ кро́ви, хрⷭ҇тꙋ̀ предста́лъ є҆сѝ, бг҃оглаго́ливе є҆ѵѳѵ́мїе, твои́хъ ᲂу҆́бѡ ра̑нъ, ѻ҆́ч҃е, ꙗ҆́звы, въ моли́твы мѣ́стѡ ны́нѣ простира́ѧ, томꙋ̀ моли́сѧ за пою́щыѧ тѧ̀, и҆ прилѣ́жнѡ, блаже́нне, молѝ ѡ҆ па́ствѣ твое́й."
 },
 {
  "type": "TEXT",
  "value": "Да́ръ прине́слъ є҆сѝ, прпⷣбне, ро́ждшемꙋсѧ хрⷭ҇тꙋ̀, и҆ пло́тїю младе́нствовавшꙋ, сѣди́нꙋ че́стнꙋ, ᲂу҆кра́шенꙋ дарова́ньми ст҃и́тельства, ѻ҆́ч҃е, и҆ кро́вїю ѡ҆червле́нꙋ твоегѡ̀ страда́нїѧ, вѣ́рꙋ правосла́внꙋ, и҆ наде́ждꙋ ᲂу҆се́рднꙋ и҆ нерасте́рзнꙋ и҆́стиннѡ, и҆ непоколе́бленнꙋ любо́вь, прпⷣбне."
 },
 {
  "type": "TEXT",
  "value": "Ꙗ҆зы́къ дви́жимь дх҃омъ, и҆ вѣща́ющь ꙗ҆́вѣ и҆́стины ᲂу҆чє́нїѧ, бг҃ода́нною бл҃года́тїю, бл҃голѣ́пнѡ и҆ска́пающь, благоче́стїѧ цѣвни́ца бг҃овѣща́нна, правосла́вїѧ ѡ҆снова́нїе недви́жимо, ᲂу҆ста̀ медотѡ́чна, сокро́вище премꙋ́дрости, це́рквей трꙋба̀ велегла́сна, показа́лсѧ є҆сѝ, прпⷣбне."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Пло́ть прїе́мъ ѿ крове́й твои́хъ превѣ́чный бг҃ъ, тѧ̀ предста́тельницꙋ показа̀ человѣ́кѡмъ, чⷭ҇таѧ: тѣ́мже и҆зба́ви рабы̑ твоѧ̑ ѿ всѧ́кїѧ нꙋ́жды и҆ ѡ҆бстоѧ́нїѧ, и҆ сѣте́й вселꙋка́вагѡ врага̀, и҆ ѡ҆сїѧ́нїѧ причасти́тисѧ сподо́би и҆збра́нныхъ, всѧ̑ сла́вѧщыѧ и҆ покланѧ́ющыѧсѧ тебѣ̀."
 },
 {
  "type": "HEADER",
  "value": "(Зрѝ) Подоба́етъ вѣ́дати, ꙗ҆́кѡ въ попра́зднство хрⷭ҇то́ва ржⷭ҇тва̀ и҆ бг҃оѧвле́нїѧ, повече́рїе пое́тсѧ ма́лое, безъ канѡ́на бг҃оро́дична."
 },
 {
  "type": "HEADER",
  "value": "На повече́рїи къ к҃ѕ числꙋ̀, по Досто́йнѣ, и҆ по трист҃о́мъ, глаго́лемъ: конда́къ бцⷣы, собо́рꙋ:"
 },
 {
  "type": "TEXT",
  "value": "И҆́же пре́жде денни́цы:"
 },
 {
  "type": "HEADER",
  "value": "На полꙋ́нощницѣ глаго́лемъ каѳі́смꙋ ѻ҆бы́чнꙋю."
 },
 {
  "type": "HEADER",
  "value": "По а҃ трист҃о́мъ, вмѣ́стѡ, Сѐ жени́хъ: глаго́лемъ тропа́рь пра́здника:"
 },
 {
  "type": "TEXT",
  "value": "Ржⷭ҇тво̀ твоѐ, хрⷭ҇тѐ бж҃е на́шъ:"
 },
 {
  "type": "HEADER",
  "value": "По в҃-мъ трист҃о́мъ глаго́лемъ конда́къ бцⷣы:"
 },
 {
  "type": "TEXT",
  "value": "И҆́же пре́жде денни́цы:"
 },
 {
  "type": "TEXT",
  "value": "Гдⷭ҇и, поми́лꙋй, в҃і."
 },
 {
  "type": "HEADER",
  "value": "И҆ ѿпꙋ́стъ."
 },
 {
  "type": "HEADER",
  "value": "Моли́твы же, Помѧнѝ, гдⷭ҇и: не глаго́лемъ."
 },
 {
  "type": "HEADER",
  "value": "На ᲂу҆́трени. На Бг҃ъ гдⷭ҇ь: тропа́рь пра́здника три́жды."
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ка́мени запеча́танꙋ:"
 },
 {
  "type": "TEXT",
  "value": "І҆и҃сꙋ ро́ждшꙋсѧ въ виѳлее́мѣ і҆ꙋде́йстѣмъ, тва́рь просвѣти́сѧ, позна́вши зижди́телѧ: ᲂу҆диви́шасѧ а҆́гг҃льстїи ли́цы, зрѧ́ще влⷣкꙋ на землѝ зра́къ ра́бїй прїе́мша, и҆ ѿ ѻ҆ц҃а̀ неразлꙋ́чна сꙋ́ща. Сла́ва вопло́щшемꙋсѧ бг҃ꙋ: сла́ва рожде́нномꙋ на землѝ: сла́ва бл҃говоли́вшемꙋ спастѝ ро́дъ на́шъ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "И҆ чте́мъ сло́во є҆пїфа́нїа кѵ́прскагѡ, похвалꙋ̀ прест҃ы́ѧ бцⷣы, на трѝ ча́сти."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Что̀ чꙋди́шисѧ марїа́мъ; что̀ ᲂу҆жаса́етъ є҆́же въ тебѣ̀; ꙗ҆́кѡ безлѣ́тна сн҃а въ лѣ̑та роди́хъ, речѐ: рожде́ннагѡ зача́тїѧ не навы́кши, безмꙋ́жна є҆́смь, и҆ ка́кѡ рождꙋ̀ сн҃а; безсѣ́менно рожде́нїе кто̀ ви́дѣ; и҆дѣ́же бо бг҃ъ хо́щетъ, побѣжда́етсѧ є҆стества̀ чи́нъ, ꙗ҆́коже пи́шетъ: хрⷭ҇то́съ роди́сѧ, пре́жде па́дшїй возста́вити ѻ҆́бразъ."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "Канѡ́ны пра́здника, і҆рмосы̀ ѻ҆бою̀ канѡ́нѡвъ по два́жды: тропари́ же на в҃і. Катава́сїа, і҆рмосы̀ ѻ҆бою̀ канѡ́нѡвъ. По г҃-й пѣ́сни, конда́къ пра́здника: Дв҃а дне́сь: и҆ і҆́косъ, и҆ ѵ҆пакоѝ. По ѕ҃-й пѣ́сни, конда́къ, гла́съ ѕ҃:"
 },
 {
  "type": "TEXT",
  "value": "И҆́же пре́жде денни́цы ѿ ѻ҆ц҃а̀ безъ мт҃ре роди́выйсѧ, на землѝ безъ ѻ҆тца̀ воплоти́сѧ дне́сь и҆зъ тебє̀. Тѣ́мже ѕвѣзда̀ бл҃говѣствꙋ́етъ волхвѡ́мъ, а҆́гг҃ли же съ па́стырьми пою́тъ несказа́нное ржⷭ҇тво̀ твоѐ, бл҃года́тнаѧ."
 },
 {
  "type": "TEXT",
  "value": "І҆́косъ: Невоздѣ́ланный гро́здъ возрасти́вшаѧ, та́йный вїногра́де: ꙗ҆́кѡ на вѣ́твїихъ на ѡ҆б̾ѧ́тїихъ ноша́ше, и҆ глаго́лаше: ты̀ є҆сѝ пло́дъ мо́й: ты̀ є҆сѝ жи́знь моѧ̀. Ѿне́лѣже позна́хъ, ꙗ҆́кѡ и҆ є҆́же бѣ́хъ, є҆́смь. Ты̀ мо́й бг҃ъ: печа́ть бо дѣ́вства моегѡ̀ зрѧ́щи неразрꙋши́мꙋ, проповѣ́дꙋю тѧ̀ непрело́жнаго сло́ва пло́ть бы́вша. Не вѣ́мъ сѣ́мене, вѣ́мъ тѧ̀ рѣши́телѧ тлѣ́нїѧ: чиста́ бо є҆́смь, тебѣ̀ проше́дшꙋ и҆зъ менє̀, ꙗ҆́коже бо ѡ҆брѣ́тъ, ѡ҆ста́вилъ є҆сѝ ᲂу҆тро́бꙋ мою̀, зрѧ́щи ю҆̀ цѣ́лꙋ. Сегѡ̀ ра́ди сликовствꙋ́етъ всѧ̀ тва́рь, вопїю́щи мнѣ̀: ра́дꙋйсѧ, бл҃года́тнаѧ."
 },
 {
  "type": "HEADER",
  "value": "И҆ чте́мъ про́логъ."
 },
 {
  "type": "HEADER",
  "value": "На ѳ҃-й пѣ́сни Честнѣ́йшꙋю не пое́мъ, но пое́мъ припѣ́вы, ꙗ҆́коже на са́мый пра́здникъ."
 },
 {
  "type": "TEXT",
  "value": "Свѣти́ленъ: Посѣти́лъ ны̀ є҆́сть свы́ше сп҃съ на́шъ, восто́къ восто́кѡвъ, и҆ сꙋ́щїи во тмѣ̀ и҆ сѣ́ни ѡ҆брѣто́хомъ и҆́стинꙋ: и҆́бо ѿ дв҃ы роди́сѧ гдⷭ҇ь. Три́жды."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ д҃. Самогла́сны."
 },
 {
  "type": "TEXT",
  "value": "Весели́тесѧ пра́веднїи, нб҃са̀ ра́дꙋйтесѧ, взыгра́йте го́ры хрⷭ҇тꙋ̀ ро́ждшꙋсѧ, дв҃а сѣди́тъ, херꙋві́мѡмъ подо́бѧщисѧ, носѧ́щи въ нѣ́дрѣхъ бг҃а сло́ва воплоще́нна. Па́стырїе рожде́нномꙋ дивѧ́тсѧ: волсвѝ влⷣцѣ да́ры прино́сѧтъ: а҆́гг҃ли воспѣва́юще глаго́лютъ: непостижи́ме гдⷭ҇и, сла́ва тебѣ̀."
 },
 {
  "type": "TEXT",
  "value": "Бцⷣе дв҃о, ро́ждшаѧ сп҃са, ᲂу҆праздни́ла є҆сѝ пе́рвꙋю клѧ́твꙋ є҆́ѵинꙋ: ꙗ҆́кѡ мт҃и была̀ є҆сѝ благоволе́нїѧ ѻ҆́ч҃а, носѧ́щи въ нѣ́дрѣхъ бж҃їе сло́во воплоще́нное. Не терпи́тъ та́йна и҆спыта́нїѧ, вѣ́рою є҆ди́ною сїю̀ всѝ сла́вимъ, зовꙋ́щи съ тобо́ю, и҆ глаго́люще: неизрече́нне гдⷭ҇и, сла́ва тебѣ̀."
 },
 {
  "type": "TEXT",
  "value": "Прїиди́те, воспои́мъ, мт҃рь сп҃совꙋ, по ржⷭ҇твѣ̀ па́ки ꙗ҆́вльшꙋюсѧ дв҃ꙋ: ра́дꙋйсѧ, гра́де ѡ҆дꙋшевле́нный цр҃ѧ̀ и҆ бг҃а, въ не́мже хрⷭ҇то́съ пожи́въ спасе́нїе содѣ́ла. Съ гаврїи́ломъ воспое́мъ, съ па́стырьми просла́вимъ, зовꙋ́ще: бцⷣе, молѝ и҆зъ тебє̀ воплоще́ннаго, спасти́сѧ на́мъ."
 },
 {
  "type": "TEXT",
  "value": "Ѻ҆ц҃ъ бл҃гоизво́ли, сло́во пло́ть бы́сть, дв҃а родѝ бг҃а вочл҃вѣ́чшасѧ: ѕвѣзда̀ возвѣща́етъ: волсвѝ покланѧ́ютсѧ: па́стырїе чꙋдѧ́тсѧ: и҆ тва́рь ра́дꙋетсѧ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Дне́сь неви́димое є҆стество̀ человѣ́кѡмъ ѿ дв҃ы совокꙋплѧ́етсѧ. Дне́сь безмѣ́рное сꙋщество̀ въ виѳлее́мѣ пелена́ми ѡ҆бвива́етсѧ. Дне́сь бг҃ъ ѕвѣздо́ю волхвы̀ въ поклоне́нїе приво́дитъ, провозвѣща́ѧ своѐ тридне́вное погребе́нїе, ꙗ҆́кѡ въ зла́тѣ и҆ смѵ́рнѣ и҆ лїва́нѣ. Є҆мꙋ́же пое́мъ: воплоти́выйсѧ ѿ дв҃ы хрⷭ҇тѐ бж҃е, спасѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, гла́съ в҃."
 },
 {
  "type": "TEXT",
  "value": "І҆ѡа́нна мона́ха: Дне́сь хрⷭ҇то́съ въ виѳлее́мѣ ражда́етсѧ ѿ дв҃ы, дне́сь безнача́льный начина́етсѧ, и҆ сло́во воплоща́етсѧ. Си̑лы нбⷭ҇ныѧ ра́дꙋютсѧ, и҆ землѧ̀ съ человѣ̑ки весели́тсѧ: волсвѝ влⷣцѣ да́ры прино́сѧтъ: па́стырїе рожде́нномꙋ дивѧ́тсѧ. Мы́ же непреста́ннѡ вопїе́мъ: сла́ва въ вы́шнихъ бг҃ꙋ и҆ на землѝ ми́ръ, къ человѣ́цѣхъ благоволе́нїе."
 },
 {
  "type": "HEADER",
  "value": "Славосло́вїе вели́кое. По трист҃о́мъ тропа́рь пра́здника, и҆ є҆ктєнїѝ и҆ ѿпꙋ́стъ. И҆ ча́съ а҃, и҆ коне́чный ѿпꙋ́стъ."
 },
 {
  "type": "HEADER",
  "value": "На часѣ́хъ тропа́рь пра́здника, конда́къ бцⷣы."
 },
 {
  "type": "HEADER",
  "value": "На лїтꙋргі́и блажє́нна ѿ канѡ́нѡвъ пра́здника, пѣ́снь г҃-ѧ и҆ ѕ҃-ѧ."
 },
 {
  "type": "TEXT",
  "value": "По вхо́дѣ: Спаси́ ны, сн҃е бж҃їй, рожде́йсѧ ѿ дв҃ы, пою́щыѧ тѝ: А҆ллилꙋ́їа."
 },
 {
  "type": "HEADER",
  "value": "Си́це пое́мъ и҆ до ѿда́нїѧ пра́здника."
 },
 {
  "type": "HEADER",
  "value": "Тропа́рь пра́здника:"
 },
 {
  "type": "TEXT",
  "value": "Ржⷭ҇тво̀ твоѐ, хрⷭ҇тѐ бж҃е на́шъ:"
 },
 {
  "type": "HEADER",
  "value": "Сла́ва, и҆ ны́нѣ, конда́къ:"
 },
 {
  "type": "TEXT",
  "value": "И҆́же пре́жде денни́цы:"
 },
 {
  "type": "HEADER",
  "value": "Та́же трист҃о́е. Прокі́менъ, гла́съ г҃, пѣ́снь бцⷣы:"
 },
 {
  "type": "TEXT",
  "value": "Вели́читъ дꙋша̀ моѧ̀ гдⷭ҇а:"
 },
 {
  "type": "TEXT",
  "value": "Сті́хъ: Ꙗ҆́кѡ призрѣ̀ на смире́нїе рабы̀ своеѧ̀:"
 },
 {
  "type": "HEADER",
  "value": "А҆пⷭ҇лъ къ є҆вре́ємъ, зача́ло т҃ѕ."
 },
 {
  "type": "TEXT",
  "value": "А҆ллилꙋ́їа, гла́съ и҃: Воскрⷭ҇нѝ, гдⷭ҇и, въ поко́й тво́й:"
 },
 {
  "type": "TEXT",
  "value": "Сті́хъ: Клѧ́тсѧ гдⷭ҇ь дв҃дꙋ и҆́стиною, и҆ не ѿве́ржетсѧ є҆ѧ̀."
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло д҃."
 },
 {
  "type": "TEXT",
  "value": "Прича́стенъ: И҆збавле́нїе посла̀ гдⷭ҇ь лю́демъ свои̑мъ."
 },
 {
  "type": "HEADER",
  "value": "(Зрѝ) Подоба́етъ вѣ́дати, ꙗ҆́кѡ а҆́ще слꙋчи́тсѧ ржⷭ҇тво̀ хрⷭ҇то́во въ недѣ́лю:"
 },
 {
  "type": "HEADER",
  "value": "Не соверша́емъ па́мѧти ст҃ы́хъ бг҃оѻтє́цъ во грѧдꙋ́щꙋю недѣ́лю зане́же нача́ло прїѧ́ти і҆аннꙋа́рїю мѣ́сѧцꙋ, и҆ пра́здникъ хрⷭ҇то́ва ржⷭ҇тва̀ ᲂу҆жѐ ѿдае́тсѧ: но соверша́емъ сїю̀ недѣ́лю, въ к҃ѕ деке́мврїа мѣ́сѧца, наꙋ́трїе пра́здника въ понедѣ́льникъ пое́мъ же си́це:"
 },
 {
  "type": "TEXT",
  "value": "Въ недѣ́лю ве́чера: На Гдⷭ҇и, воззва́хъ: стїхи̑ры на ѕ҃: пра́здника г҃, гла́съ в҃: Прїиди́те, возра́дꙋемсѧ гдⷭ҇еви: и҆ ст҃ы́хъ г҃, гла́съ а҃, подо́бенъ: Нбⷭ҇ныхъ чинѡ́въ: Бг҃оѻтца̀ всѝ: Сла́ва, ст҃ы́хъ, гла́съ ѕ҃: Па́мѧть соверша́емъ: И҆ ны́нѣ, пра́здника, гла́съ то́йже: Сла́ва въ вы́шнихъ: Вхо́дъ. Прокі́менъ вели́кїй, гла́съ з҃: Кто̀ бо́гъ ве́лїй: со стїхи̑ є҆гѡ̀: и҆ є҆ктєнїѝ. На стїхо́внѣ стїхи̑ры пра́здника самогла́сны г҃, гла́съ и҃, съ припѣ̑вы и҆́хъ. Сла́ва, гла́съ ѕ҃: Ст҃и́телей па́мѧть: И҆ ны́нѣ, пра́здника. Тропа́рь ст҃ы́хъ, гла́съ в҃: Благовѣствꙋ́й, і҆ѡ́сифе: Сла́ва, и҆ ны́нѣ, пра́здника. На повече́рїи по трист҃о́мъ конда́къ бг҃оѻтцє́въ: Сла́ва, и҆ ны́нѣ, бцⷣы: И҆́же пре́жде денни́цы:"
 },
 {
  "type": "TEXT",
  "value": "На ᲂу҆́трени: На Бг҃ъ гдⷭ҇ь, тропа́рь пра́здника два́жды: Сла́ва, ст҃ы́хъ: И҆ ны́нѣ, пра́здника. По каѳі́смахъ сѣда́льны пра́здника, и҆ чте́мъ во є҆ѵⷢ҇лїи толково́мъ, недѣ́лѧ по ржⷭ҇твѣ̀ хрⷭ҇то́вѣ. Канѡ́нъ пра́здника а҃-й со і҆рмосо́мъ на ѕ҃: і҆рмосы̀ по два́жды, тропарѝ на д҃: и҆ дрꙋгі́й канѡ́нъ пра́здника на д҃: и҆ ст҃ы́хъ на д҃. Катава́сїа, і҆рмосы̀ ѻ҆бою̀ канѡ́нѡвъ. По г҃ пѣ́сни, конда́къ бцⷣы, гла́съ ѕ҃: И҆́же пре́жде денни́цы: и҆ і҆́косъ є҆гѡ̀, и҆ сѣда́ленъ ст҃ы́хъ: Сла́ва, и҆ ны́нѣ, пра́здника, и҆ чте́нїе. По ѕ҃-й пѣ́сни конда́къ ст҃ы́хъ: Весе́лїѧ дне́сь: и҆ і҆́косъ. И҆ чте́мъ про́логъ. На ѳ҃ пѣ́сни, Честнѣ́йшꙋю, не пое́мъ, но пое́мъ припѣ́вы пра́здника. Свѣти́ленъ ст҃ы́хъ, два́жды: Сла́ва, и҆ ны́нѣ, пра́здника. На хвали́техъ стїхи̑ры пра́здника на д҃, гла́съ д҃, самогла́сны. Сла́ва, ст҃ы́хъ, гла́съ и҃: Кро́вь и҆ ѻ҆́гнь: И҆ ны́нѣ, пра́здника, гла́съ в҃: Дне́сь хрⷭ҇то́съ: Славосло́вїе вели́кое. По трист҃о́мъ тропа́рь ст҃ы́хъ: Сла́ва, и҆ ны́нѣ, пра́здника. Є҆ктєнїѝ, и҆ ѿпꙋ́стъ, и҆ ча́съ а҃, и҆ коне́чный ѿпꙋ́стъ. На часѣ́хъ тропа́рь пра́здника: Сла́ва, ст҃ы́хъ: и҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ бцⷣы: И҆́же пре́жде денни́цы: и҆ ст҃ы́хъ конда́къ, премѣнѧ́юще глаго́лемъ."
 },
 {
  "type": "TEXT",
  "value": "На лїтꙋргі́и: Бл҃жє́нна ѿ канѡ́на пра́здника пѣ́снь г҃, на д҃: и҆ ст҃ы́хъ пѣ́снь ѕ҃-ѧ, на д҃. По вхо́дѣ тропа́рь пра́здника, и҆ ст҃ы́хъ: Сла́ва, конда́къ ст҃ы́хъ: И҆ ны́нѣ, бцⷣы: И҆́же пре́жде денни́цы: Прокі́менъ, гла́съ г҃, пѣ́снь бцⷣы: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: Дрꙋгі́й ст҃ы́хъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. А҆пⷭ҇лъ ко є҆вре́ємъ, зача́ло т҃ѕ: Дрꙋгі́й а҆пⷭ҇лъ ст҃ы́хъ, къ гала́тѡмъ, зача́ло с҃. А҆ллилꙋ́їа, бцⷣы, гла́съ и҃: Воскрⷭ҇нѝ, гдⷭ҇и, въ поко́й тво́й: Сті́хъ: Помѧнѝ, гдⷭ҇и, дв҃да: Є҆ѵⷢ҇лїе же є҆ди́но бцⷣы, и҆ ст҃ы́хъ, матѳе́а, зача́ло д҃. Прича́стенъ: И҆збавле́нїе посла̀ гдⷭ҇ь лю́демъ свои̑мъ: Дрꙋгі́й: Ра́дꙋйтесѧ:"
 }
]