ponomar-pwa/static/data/shared/services/canons/paraclete/tone1/fri.json

[
 {
  "type": "HEADER",
  "value": "Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, гла́съ а҃, творе́нїе гдⷭ҇и́на і҆ѡ́сифа, є҆гѡ́же краегране́сїе:"
 },
 {
  "type": "TEXT",
  "value": "Стра́сть чⷭ҇тнꙋ́ю хвалю̀ влⷣчню."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ, ꙗ҆́кѡ просла́висѧ."
 },
 {
  "type": "TEXT",
  "value": "Стрⷭ҇ти претерпѣ́въ на́съ ра́ди, и҆́же є҆стество́мъ безстра́стенъ, и҆ ра́спѧтъ бы́въ съ разбо́йникома, началоѕло́бнаго ѕмі́ѧ ᲂу҆мертви́лъ є҆сѝ сло́ве, и҆ сп҃слъ є҆сѝ покланѧ́ющыѧсѧ тебѣ̀."
 },
 {
  "type": "TEXT",
  "value": "Восто́къ восто́кѡвъ сы́й, къ за́падѡмъ ѿринове́номꙋ є҆стествꙋ̀ на́шемꙋ і҆и҃се прише́лъ є҆сѝ: тебе́ же сл҃нца зрѧ̀ распина́ема, свѣ́тъ сво́й сокры̀."
 },
 {
  "type": "TEXT",
  "value": "Мч҃нченъ: Сме́ртїю вре́менною жи́знь вѣ́чнꙋю премѣни́вше до́брѣ страда́льцы сла́внїи, црⷭ҇твїѧ нбⷭ҇нагѡ сподо́бистесѧ: сегѡ̀ ра́ди прославлѧ́етесѧ, и҆ бл҃жи́ми є҆стѐ."
 },
 {
  "type": "TEXT",
  "value": "Мч҃нченъ: И҆̀же стрⷭ҇те́мъ хрⷭ҇тѡ́вымъ ᲂу҆подо́бльшесѧ до́блественнѣ, стра̑сти и҆сцѣлева́ете земны́хъ, рꙋкодѣ́йствїемъ та́йнымъ, и҆ сло́вомъ прого́ните дꙋ́хи, ст҃і́и мч҃нцы."
 },
 {
  "type": "TEXT",
  "value": "Бг҃оро́диченъ: Ꙗ҆́коже а҆́гница зрѧ́щи на крⷭ҇тѣ̀ хрⷭ҇та̀ воздви́жена, и҆ взира́ющи а҆́гнца восклица́ющи вопїѧ́ше: гдѣ̀ твоѧ̀ за́йде добро́та, долготерпѣли́ве сн҃е пребезнача́льне;"
 },
 {
  "type": "HEADER",
  "value": "И҆́нъ канѡ́нъ прест҃ѣ́й бцⷣѣ. Гла́съ а҃."
 },
 {
  "type": "TEXT",
  "value": "І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ."
 },
 {
  "type": "TEXT",
  "value": "Ꙗ҆́же є҆ди́на безлѣ́тнаго бг҃а въ лѣ́то ро́ждши воплоще́нна, всест҃а́ѧ пречⷭ҇таѧ, вселѣ̑тныѧ стра̑сти преѻкаѧ́нныѧ моеѧ̀ дꙋшѝ и҆сцѣлѝ."
 },
 {
  "type": "TEXT",
  "value": "Стрꙋ́пы дꙋшѝ моеѧ̀, и҆ се́рдца недоꙋмѣ́нїе, помышле́нїй ѡ҆мраче́нїе, и҆ ᲂу҆́мное побѣжде́нїе потребѝ пречⷭ҇таѧ, ꙗ҆́кѡ млⷭ҇тиваѧ, твои́ми мл҃твами."
 },
 {
  "type": "TEXT",
  "value": "Ꙗ҆́же свѣ́тъ ро́ждшаѧ и҆зба́вителѧ моего̀, тьмы̀ и҆ мꙋ́къ вѣ́чныхъ и҆зба́ви мѧ̀ пречⷭ҇таѧ: ꙗ҆́кѡ да сп҃са́емь воспѣва́ю бл҃гоꙋтро́бїе твоѐ."
 },
 {
  "type": "TEXT",
  "value": "Въ пꙋчи́нѣ лю́тыхъ, и҆ въ молвѣ̀ страсте́й потоплѧ́емь є҆́смь а҆́зъ, твою̀ пречⷭ҇таѧ призыва́ю тишинꙋ̀: сп҃си́ мѧ, приста́нище бо є҆сѝ вѣ́рныхъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне."
 },
 {
  "type": "TEXT",
  "value": "На крⷭ҇тѣ̀ дла̑ни распросте́рлъ є҆сѝ, и҆ пе́рсты бж҃е́ственныѧ ѡ҆кровави́въ, дѣ́ло рꙋкꙋ̀ твоє́ю влⷣко, а҆да́ма ᲂу҆бі́йственныѧ рꙋкѝ и҆збавлѧ́ѧ, ꙗ҆́кѡ є҆ди́нъ бл҃гъ и҆ чл҃вѣколю́бецъ."
 },
 {
  "type": "TEXT",
  "value": "Въ ре́бра прободе́нъ бы́лъ є҆сѝ копїе́мъ влⷣко, и҆справлѧ́ѧ ре́бренное поползнове́нїе, на дре́во возне́слсѧ є҆сѝ, дре́вле бѣдꙋ̀ прїе́мшаго дре́ва плодо́мъ, въ ра́й вводѧ̀ съ разбо́йникомъ бл҃горазꙋ́мнымъ."
 },
 {
  "type": "TEXT",
  "value": "Мч҃нченъ: Церкѡ́внаѧ ᲂу҆твержде́нїѧ, бл҃гоче́стїѧ пре́днїѧ столпы̀, потреби́тели вра́жїѧ, гдⷭ҇ни мч҃ники, мы́слїю чи́стою пѣ́сненнѡ да ᲂу҆бл҃жи́мъ."
 },
 {
  "type": "TEXT",
  "value": "Мч҃нченъ: Ꙗ҆́кѡ бж҃е́ственное сꙋ́ще ло́зїе мы́сленнагѡ вїногра́да мч҃ницы, гро́здїе и҆знесо́ша на́мъ ꙗ҆́вѣ, терпѣ́нїѧ и҆злива́ющее вїно̀, и҆ всѣ́хъ вѣ́рныхъ сердца̀ веселѧ́щее."
 },
 {
  "type": "TEXT",
  "value": "Бг҃оро́диченъ: Бл҃гослове́нъ пло́дъ чре́ва твоегѡ̀ дв҃о всепѣ́таѧ, и҆стлѣ́вшаѧ плодо́мъ дре́ва, ра́ди крⷭ҇та̀ своегѡ̀, нетлѣ́нїѧ ᲂу҆стро́ивый прича́стники, бж҃е́ственною бл҃года́тїю."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже"
 },
 {
  "type": "TEXT",
  "value": "Непло́дныѧ мы́сли моеѧ̀ безпло́дїе всѐ потребѝ, и҆ плодоно́снꙋ добродѣ́тельми дꙋ́шꙋ мою̀ покажѝ, пречⷭ҇таѧ бцⷣе, вѣ̑рнымъ помо́щнице."
 },
 {
  "type": "TEXT",
  "value": "И҆зба́ви мѧ̀ всенепоро́чнаѧ, всѧ́кагѡ ѡ҆бстоѧ́нїѧ, мно́гихъ собла́знъ ѕмїе́выхъ, и҆ вѣ́чнагѡ ѻ҆гнѧ̀, и҆ тьмы̀, ꙗ҆́же свѣ́тъ ро́ждшаѧ превѣ́чный."
 },
 {
  "type": "TEXT",
  "value": "Стра́шнымъ сꙋди́щемъ чⷭ҇таѧ, и҆ ѻ҆гне́мъ ѻ҆́нѣмъ неꙋгаси́мымъ, и҆ ѿвѣ́томъ лю́тымъ ве́сь ѡ҆сꙋжде́нъ є҆́смь: потщи́сѧ сп҃сти́ мѧ влⷣчце пречⷭ҇таѧ, раба̀ твоего̀."
 },
 {
  "type": "TEXT",
  "value": "Да ѡ҆божи́тъ человѣ́чество, бг҃ъ бы́сть чл҃вѣ́къ и҆з̾ тебѐ дв҃о чⷭ҇таѧ, па́че сло́ва и҆ смы́сла: сегѡ̀ ра́ди тѧ̀ согла́снѡ всѝ вѣ́рнїи ᲂу҆блажа́емъ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀."
 },
 {
  "type": "TEXT",
  "value": "Законода́вецъ пра́веденъ сы́й, со беззако́нники вмѣне́нъ бы́лъ є҆сѝ, на дре́во возне́слсѧ є҆сѝ бл҃годѣ́телю гдⷭ҇и, всѣ́хъ ѡ҆правда́ти хотѧ̀."
 },
 {
  "type": "TEXT",
  "value": "Си̑лы всѧ̑ ᲂу҆диви́шасѧ а҆́гг҃льскїѧ, на крⷭ҇тѣ̀ тебѐ зрѧ́щи возноси́ма сл҃нце, и҆ тьмы̀ нача́льныѧ си̑лы побѣжде́ни бы́ша."
 },
 {
  "type": "TEXT",
  "value": "Мч҃нченъ: И҆сцѣле́нїй бл҃года́ть ѿ дꙋхо́вныхъ дарова́нїй поче́рпше мч҃нцы, всѣ̑мъ ѿмыва́ютъ стра̑сти дꙋшетлѣ̑нныѧ бж҃їею бл҃года́тїю."
 },
 {
  "type": "TEXT",
  "value": "Мч҃нченъ: Дрема́нїе ѿри́нꙋвше нерадѣ́нїѧ стрⷭ҇тоте́рпцы, бо́дростїю бж҃е́ственною, и҆ вѣ́рою ѕвѣре́й ᲂу҆спи́ша стремлє́нїѧ, и҆ ра́дꙋющесѧ пострада́ша."
 },
 {
  "type": "TEXT",
  "value": "Бг҃оро́диченъ: Оу҆вы̀ мнѣ̀ ча́до, что̀ бꙋ́дꙋ; ка́кѡ зрю́ тѧ на дре́во воздви́жена, и҆ без̾ пра́вды ᲂу҆мерщвлѧ́ема живо́тъ подаю́щаго; дв҃а пла́чꙋщи глаго́лаше."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Дх҃омъ прови́дѧ прⷪ҇ро́че а҆ввакꙋ́ме словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ: сла́ва си́лѣ твое́й гдⷭ҇и."
 },
 {
  "type": "TEXT",
  "value": "Дв҃о бцⷣе, нескве́рнаѧ сѣ́не, ѡ҆скверне́на мѧ̀ прегрѣше́ньми ѡ҆чи́сти щедро́тами твои́ми, чистѣ́йшими кропле́ньми: да́ждь мѝ рꙋ́кꙋ по́мощи, да зовꙋ̀: сла́ва тебѣ̀ чⷭ҇таѧ бг҃оневѣ́сто."
 },
 {
  "type": "TEXT",
  "value": "Хра́мъ ѡ҆свѧще́нъ ꙗ҆ви́лсѧ є҆сѝ бг҃ꙋ, въ тѧ̀ все́льшемꙋсѧ па́че ᲂу҆ма̀: того̀ молѝ, грѣхо́вныхъ скве́рнъ на́съ ѡ҆чи́стити, ꙗ҆́кѡ да хра́мъ позна́емсѧ, и҆ ѻ҆би́телище дх҃о́вное."
 },
 {
  "type": "TEXT",
  "value": "Поми́лꙋй мѧ̀ бцⷣе, ꙗ҆́же є҆ди́на млⷭ҇тей и҆сто́чникъ ро́ждшаѧ, и҆ разрѣшѝ дꙋшѝ моеѧ̀ лю́тꙋю болѣ́знь, и҆ недоꙋмѣ́нїе серде́чное: сле́зъ стрꙋю̀ и҆ ᲂу҆миле́нїе пре́жде конца̀ пода́ждь, и҆ лю́тыхъ и҆збавле́нїе."
 },
 {
  "type": "TEXT",
  "value": "Ст҃а́ѧ бцⷣе, ѡ҆свѧтѝ на́съ, прест҃а́го ро́ждши пло́тїю, ᲂу҆подо́битисѧ хотѧ́щаго человѣ́кѡмъ, и҆ нбⷭ҇номꙋ црⷭ҇твїю прича́стники всѣ́хъ покажѝ, пречⷭ҇таѧ, твои́ми мл҃твами."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ."
 },
 {
  "type": "TEXT",
  "value": "На крⷭ҇тѣ̀ пло́тїю воздвиза́емь, ꙗ҆зы́ки призва́лъ є҆сѝ невѣ́дꙋющыѧ тебѐ, къ твоемꙋ̀ позна́нїю, сꙋдїѐ всѣ́хъ, є҆ди́не млⷭ҇тиве хрⷭ҇тѐ бж҃е на́шъ."
 },
 {
  "type": "TEXT",
  "value": "Тебѣ̀ на сꙋди́щи ста́вшꙋ непра́веднѣмъ, пра́ведне гдⷭ҇и, ѡ҆правда́сѧ пре́жде ѡ҆сꙋжде́нный а҆да́мъ, и҆ зове́тъ: сла́ва распѧ́тїю твоемꙋ̀, долготерпѣли́ве гдⷭ҇и."
 },
 {
  "type": "TEXT",
  "value": "Мч҃нченъ: Ꙗ҆́коже ра́й бг҃онасажде́нный ꙗ҆ви́стесѧ мꙋ́чєницы, стрⷭ҇ти чⷭ҇тны́ѧ ꙗ҆́кѡ цвѣ́ты бл҃гоꙋха́нныѧ и҆мꙋ́ще, и҆́миже бл҃гоꙋха́етсѧ вѣ́рныхъ дꙋша̀ всѧ́каѧ."
 },
 {
  "type": "TEXT",
  "value": "Мч҃нченъ: Бл҃гоцвѣ̑тнаѧ и҆ бл҃гоплодѡви́таѧ древеса̀, и҆̀же вѣ́ры безсме́ртїѧ пло́дъ процвѣто́ша, и҆ ѕло́бы корє́нїѧ и҆сторго́ша, воспои́мъ мꙋ́ченики гдⷭ҇ни."
 },
 {
  "type": "TEXT",
  "value": "Бг҃оро́диченъ: Же́злъ чⷭ҇тны́й, ꙗ҆́же прозѧ́бшїй цвѣ́тъ неꙋвѧда́ющїй, ꙗ҆́кѡ ᲂу҆зрѣ̀ на дре́во возноси́ма того̀, вопїѧ́ше: влⷣко, не безча́днꙋ ꙗ҆ви́ мѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Тво́й ми́ръ да́ждь на́мъ сн҃е бж҃їй, и҆но́гѡ бо ра́звѣ тебѐ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ."
 },
 {
  "type": "TEXT",
  "value": "Ме́ртва мѧ̀ содѣ́ла и҆ногда̀ во є҆де́мѣ вкꙋше́нїе лꙋка́вое: но ꙗ҆́же жи́знь ро́ждшаѧ пречи́стаѧ, дре́вле дре́вомъ ᲂу҆ме́ршаго ѡ҆живи́ мѧ ны́нѣ, и҆ пода́ждь ᲂу҆миле́нїе."
 },
 {
  "type": "TEXT",
  "value": "Сп҃си́ мѧ пречⷭ҇таѧ, ѿ бѣ́дъ лю́тыхъ и҆ воздви́гни мѧ̀ ѿ гно́ѧ страсте́й, и҆ и҆зба́ви мѧ̀ плѣне́нїѧ и҆ ѡ҆ѕлобле́нїѧ лꙋка́выхъ бѣсѡ́въ, твоего̀ непотре́бнаго раба̀."
 },
 {
  "type": "TEXT",
  "value": "Зѣ̑ницы дꙋшѝ моеѧ̀ ѡ҆зарѝ чⷭ҇таѧ, зрѣ́ти мѝ при́снѡ бж҃е́ственнꙋю свѣ́тлость, и҆ твою̀ сла́вꙋ всенепоро́чнаѧ, ꙗ҆́кѡ да полꙋчꙋ̀ млⷭ҇ть и҆ вѣ́чнꙋю сла́вꙋ."
 },
 {
  "type": "TEXT",
  "value": "Ѻ҆́блакъ и҆ ра́й, и҆ две́рь тѧ̀ свѣ́та, трапе́зꙋ, и҆ рꙋно̀ вѣ́мы, рꙋ́чкꙋ внꙋ́трь ма́ннꙋ носѧ́щꙋ, сла́дость мі́рꙋ, чⷭ҇таѧ дв҃о мт҃и."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка сп҃слъ є҆сѝ ѿ ки́та чл҃вѣколю́бче, и҆ менѐ и҆з̾ глꙋбины̀ прегрѣше́нїй возведѝ, молю́сѧ."
 },
 {
  "type": "TEXT",
  "value": "И҆́же че́сти всѧ́кїѧ превы́шши, безче́стїе претерпѣ́лъ є҆сѝ хрⷭ҇тѐ, на крⷭ҇тѣ̀ воздви́женъ, чл҃вѣ́ки почестѝ хотѧ̀."
 },
 {
  "type": "TEXT",
  "value": "Подписꙋ́еши мнѣ̀ ѡ҆ставле́нїе, порабоще́нномꙋ льсти́вымъ, тро́стїю бїе́мь хрⷭ҇тѐ бж҃е на́шъ пребл҃гі́й."
 },
 {
  "type": "TEXT",
  "value": "Мч҃нченъ: Болѣ́зньми страда́нїй къ неболѣ́зненнѣй преидо́сте ст҃і́и кончи́нѣ, и҆ неизрече́нныѧ ра́дости сподо́бльшесѧ."
 },
 {
  "type": "TEXT",
  "value": "Мч҃нченъ: Разжего́стесѧ ᲂу҆́гльми хрⷭ҇то́вы любвѐ премꙋ́дрїи: тѣ́мже во ѻ҆́гнь вмета́еми не ѡ҆палѧ́еми пребы́сте."
 },
 {
  "type": "TEXT",
  "value": "Бг҃оро́диченъ: По ржⷭ҇твѣ̀ всенепоро́чнаѧ, ꙗ҆́коже и҆ пре́жде ржⷭ҇тва̀ пребыла̀ є҆сѝ: бг҃а бо родила̀ є҆сѝ дре́вомъ человѣ́ка сп҃сшаго."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же свободѝ и҆з̾ тлѝ, и҆ сп҃си́ мѧ сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Ѡ҆скверне́на мѧ̀ мно́гими грѣхѝ, молю́сѧ тебѣ̀ є҆ди́ной бл҃го́й, и҆ нескве́рнѣй сѣ́ни: ѡ҆мы́й ѿ всѧ́кїѧ скве́рны, хода́тайствомъ твои́мъ."
 },
 {
  "type": "TEXT",
  "value": "Ѡ҆корми́тельница мѝ бꙋ́ди чⷭ҇таѧ, вла́емꙋ въ пꙋчи́нѣ лю́тыхъ, жите́йскими нꙋ́ждами, и҆ и҆спра́ви, къ при́сномꙋ приста́нищꙋ, и҆ сп҃си́ мѧ."
 },
 {
  "type": "TEXT",
  "value": "Треволне́нїе помышле́нїй, и҆ страсте́й нахождє́нїѧ, и҆ глꙋбина̀ грѣхо́внаѧ, ѻ҆каѧ́ннꙋю мою̀ дꙋ́шꙋ ѡ҆бꙋрева́ютъ: помози́ ми ст҃а́ѧ влⷣчце."
 },
 {
  "type": "TEXT",
  "value": "Сщ҃е́ннаѧ сѣ́не показа́ннаѧ, мр҃і́е, ѡ҆скверне́ннꙋю сластьмѝ ѻ҆каѧ́ннꙋю мою̀ дꙋ́шꙋ ѡ҆свѧтѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Пе́щь сп҃се ѡ҆роша́шесѧ, ѻ҆́троцы же ликꙋ́юще поѧ́хꙋ: ѻ҆тцє́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Распина́емь тва́рь поколеба́лъ є҆сѝ: ᲂу҆мерщвлѧ́емь ѕмі́ѧ ᲂу҆мертви́лъ є҆сѝ: бл҃гослове́нъ є҆сѝ хрⷭ҇тѐ бж҃е ѻ҆тє́цъ на́шихъ."
 },
 {
  "type": "TEXT",
  "value": "Напоѧ́етсѧ же́лчїю долготерпѣли́вый, и҆сточа́ѧ мѝ сла́дость сп҃си́тельнꙋю, сла́достною снѣ́дїю лише́нномꙋ ра́йскїѧ пи́щи."
 },
 {
  "type": "TEXT",
  "value": "Мч҃нченъ: Мч҃нцы ноготьмѝ стрꙋ́жеми, ме́ртвости дебельство̀ ѿложи́вше, красотꙋ́ же бж҃е́ственнꙋю ѿ бг҃а прїѧ́ша."
 },
 {
  "type": "TEXT",
  "value": "Мч҃нченъ: Стрⷭ҇тьмѝ стрⷭ҇ти хрⷭ҇то́вѣй пречⷭ҇тѣй подо́бѧщесѧ, до́блїи мч҃нцы, ра̑ны вра́жїѧ ᲂу҆до́бь претерпѣ́сте."
 },
 {
  "type": "TEXT",
  "value": "Бг҃оро́диченъ: Распина́ема зрѧ́щи гдⷭ҇а непоро́чнаѧ бг҃оро́дица, глаго́лаше: ᲂу҆вы̀ мнѣ̀ сн҃е мо́й, ка́кѡ ᲂу҆мира́еши, животѐ и҆ наде́ждо вѣ́рныхъ;"
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. Тогда̀ трїѐ, ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Ѡ҆скве́рншꙋюсѧ страстьмѝ дꙋ́шꙋ мою̀ ѡ҆свѧтѝ, пречⷭ҇таѧ бг҃оневѣ́сто, и҆ ᲂу҆ма̀ моегѡ̀ лю́тое плѣне́нїе, и҆ се́рдца недоꙋмѣ́нїе, и҆ бѣсѡ́вскаѧ ᲂу҆стремлє́нїѧ вско́рѣ потребѝ чⷭ҇таѧ."
 },
 {
  "type": "TEXT",
  "value": "Оу҆мерщвле́нный страстьмѝ плотски́ми, всенепоро́чнаѧ, ѡ҆живѝ ᲂу҆́мъ мо́й, и҆ бг҃ꙋ ᲂу҆гѡ́днаѧ соверша́ти ᲂу҆крѣпѝ мѧ̀: да велича́ю тѧ̀, и҆ сла́влю при́снѡ бл҃гоꙋтро́бїе твоѐ."
 },
 {
  "type": "TEXT",
  "value": "Дв҃о мт҃и, ꙗ҆́же є҆ди́на бг҃а ро́ждшаѧ, ᲂу҆мертвѝ плотскі̑ѧ моѧ̑ сла̑сти, и҆ дꙋше́внꙋю мою̀ скве́рнꙋ ѿмы́й вско́рѣ: и҆ и҆стѧза́нїѧ бѣсѡ́въ лꙋка́выхъ и҆зба́ви, и҆ сп҃си́ мѧ."
 },
 {
  "type": "TEXT",
  "value": "Преиспещре́на бж҃е́ственными добродѣ́тельми, родила̀ є҆сѝ сло́во собезнача́льно ѻ҆ц҃ꙋ̀, чⷭ҇таѧ дв҃о, добродѣ́тельми нб҃са̀ вои́стиннꙋ покры́вшаго: є҆го́же молѝ при́снѡ ᲂу҆ще́дрити на́съ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пѣсносло́вцы въ пещѝ сп҃сшагѡ дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Є҆гда̀ на крⷭ҇тѣ̀ сп҃сѐ пригвозди́лсѧ є҆сѝ, колеба́шесѧ тва́рь: сл҃нце ᲂу҆ста́ви лꙋчы̀, и҆ ка́менїе распада́шесѧ, и҆ а҆́дъ ско́рѡ ѡ҆бнажа́шесѧ, не терпѧ̀ держа́вы твоеѧ̀."
 },
 {
  "type": "TEXT",
  "value": "За ѡ҆сꙋжде́нїе ѿринове́ннагѡ ѡ҆сꙋжде́нїе пострада́въ, за прїе́мшаго наготꙋ̀, на́гъ на дре́вѣ ви́сѣлъ є҆сѝ ще́дре: ве́лїѧ твоѧ̀ держа́ва и҆ долготерпѣ́нїе."
 },
 {
  "type": "TEXT",
  "value": "Мч҃нченъ: И҆́же безплѡ́тнымъ сожи́телїе, хрⷭ҇тѡ́вы во́ини, крⷭ҇то́мъ ꙗ҆́кѡ бронѧ́ми ѡ҆болче́ни, къ сопротивобо́рцꙋ ѡ҆полчи́шасѧ, и҆ того̀ кра́сными нога́ми попра́ша."
 },
 {
  "type": "TEXT",
  "value": "Мч҃нченъ: Стоѧ́хꙋ посредѣ̀ сꙋди́ща съ закле́пми до́блїи, на ᲂу҆́ды раздроблѧ́еми, и҆ зда́нїе разорѧ́юще пре́лести, и҆ бѣсѡ́вскаѧ трє́бища разбива́юще."
 },
 {
  "type": "TEXT",
  "value": "Бг҃оро́диченъ: Ꙗ҆́же нб҃съ превы́шшаѧ, воздви́жена на дре́вѣ, и҆ низлага́ющаго воздвижє́нїѧ вра̑жїѧ, зрѧ́щи є҆ди́наго вы́шнѧго, воспѣва́ше того̀ велегла́снѡ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Воплоща́етсѧ безпло́тный и҆з̾ тебѐ бг҃олѣ́пнѡ: є҆го́же молѝ пречⷭ҇таѧ, стра̑сти моѧ̑ плотскі̑ѧ ᲂу҆мертви́ти, и҆ ѡ҆живи́ти дꙋ́шꙋ мою̀ ᲂу҆мерщвле́ннꙋю грѣха́ми."
 },
 {
  "type": "TEXT",
  "value": "И҆сцѣлѧ́ющаго сокрꙋше́нїе а҆да́ма пе́рстнагѡ, сп҃са родила̀ є҆сѝ пречⷭ҇таѧ и҆ бг҃а: того̀ ᲂу҆молѝ, ꙗ҆́звы дꙋшѝ моеѧ̀ и҆сцѣли́ти, ꙗ҆́же неисцѣ́льнѡ болѧ́щыѧ."
 },
 {
  "type": "TEXT",
  "value": "Воздви́гни слежа́ща мѧ̀ во глꙋбинѣ̀ ѕлы́хъ, и҆ ны́нѣ борю́щаго мѧ̀ побѣдѝ, чⷭ҇таѧ, и҆ ᲂу҆ѧ́звленнꙋю безмѣ́стными сластьмѝ дꙋ́шꙋ мою̀ пречⷭ҇таѧ не пре́зри, но ᲂу҆ще́дри, и҆ сп҃си́ мѧ."
 },
 {
  "type": "TEXT",
  "value": "И҆збавлѧ́емсѧ всѧ́ческихъ и҆скꙋше́нїй, пречⷭ҇таѧ, твои́ми къ бг҃ꙋ бо́дренными мл҃твами, тебѐ бцⷣꙋ свѣ́дꙋщїи бл҃гослове́ннꙋю и҆ ѡ҆бра́дованнꙋю."
 },
 {
  "type": "TEXT",
  "value": "Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ покло́ны."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Тѧ̀, ю҆́же ви́дѣ мѡѷсе́й неѡпали́мꙋю кꙋпинꙋ̀, и҆ лѣ́ствицꙋ ѡ҆дꙋшевле́ннꙋю, ю҆́же і҆а́кѡвъ ви́дѣ, и҆ две́рь нбⷭ҇нꙋю, є҆́юже про́йде хрⷭ҇то́съ бг҃ъ на́шъ, пѣ́сньми мт҃и чⷭ҇таѧ велича́емъ."
 },
 {
  "type": "TEXT",
  "value": "Ѽ ка́кѡ лю́дїе непокори́вїи преда́ша тѧ̀ крⷭ҇тꙋ̀, є҆ди́наго долготерпѣли́ваго во́лею ѡ҆бнища́вшаго, и҆ стра̑сти прїе́мшаго, и҆ безстра́стїю хода́таѧ бы́вша, всѣ̑мъ ѿ а҆да́ма попо́лзшымсѧ!"
 },
 {
  "type": "TEXT",
  "value": "Распѧ́тїе безче́стное прїѧ́тъ хрⷭ҇тѐ пло́тїю, почестѝ хотѧ̀ ѡ҆безче́ствованнаго чл҃вѣ́ка страстьмѝ безслове́сными, и҆ дре́внюю добро́тꙋ погꙋ́бльша: сла́ва па́че ᲂу҆ма̀ милосе́рдїю твоемꙋ̀."
 },
 {
  "type": "TEXT",
  "value": "Мч҃нченъ: Сл҃нце незаходи́мое хрⷭ҇тѐ, ᲂу҆́треневавшыѧ къ тебѣ̀, и҆ тьмꙋ̀ страда́нїй преше́дшыѧ ма́нїемъ тѝ, къ свѣ́тꙋ наста́вилъ є҆сѝ твоеѧ̀ неизрече́нныѧ сла́вы и҆ свѣ́тлости: просвѣтѝ ᲂу҆̀бо на́съ тѣ́хъ мл҃твами."
 },
 {
  "type": "TEXT",
  "value": "Мч҃нченъ: По́лкъ мч҃нкъ сщ҃е́нныхъ, тьмы̑ мы́сленныхъ врагѡ́въ побѣдѝ, и҆ тьма́мъ примѣни́сѧ ст҃ы́хъ си́лъ, и҆ тьмы̑ страсте́й дꙋ́шъ на́шихъ, манове́нїемъ вседѣ́тельнымъ и҆сцѣлѧ́ютъ при́снѡ."
 },
 {
  "type": "TEXT",
  "value": "Бг҃оро́диченъ: Свѣ́томъ дв҃о, и҆з̾ тебѐ возсїѧ́вшагѡ свѣ́та пло́тїю, ᲂу҆́мъ мо́й, ѡ҆зарѝ, и҆ се́рдце просвѣтѝ, тьмꙋ̀ ѿгонѧ́ющи грѣхо́внꙋю, и҆ ᲂу҆ны́нїѧ моегѡ̀ всѧ́кꙋ мглꙋ̀ прогонѧ́ющи."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ человѣ́къ, безнача́льный, велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю."
 },
 {
  "type": "TEXT",
  "value": "Грѣхолюби́въ сы́й въ лѣ́ности пребыва́ю, и҆ сꙋди́ща, чⷭ҇таѧ, неꙋмы́тнагѡ трепе́щꙋ: въ не́мже мѧ̀ соблюдѝ твои́ми ст҃ы́ми мл҃твами бг҃оневѣ́сто, неѡсꙋжде́нна, да ꙗ҆́кѡ предста́тельницꙋ мою̀ ᲂу҆бл҃жа́ю тѧ̀, пречⷭ҇таѧ."
 },
 {
  "type": "TEXT",
  "value": "Оу҆жаса́юсѧ сꙋди́ща дв҃о, и҆ незабве́ннагѡ ѻ҆́ка твоегѡ̀ сн҃а, содѣ́ѧвъ мнѡ́гїѧ грѣхѝ на землѝ, и҆ сегѡ̀ ра́ди тебѣ̀ вопїю̀: всемлⷭ҇рдаѧ влⷣчце помози́ ми, и҆ тогда́шнїѧ бѣды̀ и҆зба́ви мѧ̀, и҆ сп҃сѝ, чⷭ҇таѧ."
 },
 {
  "type": "TEXT",
  "value": "Ко́ль стра́шенъ де́нь и҆спыта́нїѧ, ѻ҆трокови́це! Ко́ль ᲂу҆жа́сенъ ѿвѣ́тъ! Ко́ль горька̀ бѣда̀! Кто̀ постои́тъ про́чее пречⷭ҇таѧ влⷣчце; поми́лꙋй стра́стнꙋю мою̀ дꙋ́шꙋ, и҆ пре́жде конца̀ да́ждь мѝ ѡ҆ставле́нїе, пречⷭ҇таѧ."
 },
 {
  "type": "TEXT",
  "value": "Ꙗ҆́же свѣ́тъ ро́ждшаѧ бж҃е́ственный, и҆з̾ ѻ҆ц҃а̀ возсїѧ́вшїй, ѡ҆мраче́ннꙋю мою̀ дꙋ́шꙋ лестьмѝ жите́йскими, и҆ бы́вшꙋю врагѡ́въ порꙋга́нїе всенепоро́чнаѧ ᲂу҆ще́дри, и҆ свѣ́тꙋ покаѧ́нїѧ сп҃си́тельнагѡ сподо́би, чⷭ҇таѧ."
 }
]