ponomar-pwa/static/data/shared/services/canons/paraclete/tone1/sat.json

[
 {
  "type": "HEADER",
  "value": "Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прпⷣбнымъ и҆ ᲂу҆со́пшымъ, гла́съ а҃, творе́нїе кѵ́ръ і҆ѡ́сифа, є҆гѡ́же краегране́сїе:"
 },
 {
  "type": "TEXT",
  "value": "Бг҃а возлю́бльшымъ бж҃е́ственнꙋю воспѣва́ю пѣ́снь."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Столпо́мъ ѻ҆́гненнымъ и҆ ѻ҆́блачнымъ і҆и҃лѧ наставле́й, ꙗ҆́кѡ бг҃ъ, мо́ре разве́рже, колесни̑цы же фараѡ́новы глꙋбино́ю покры̀. Пои́мъ пѣ́снь побѣ́днꙋю, ꙗ҆́кѡ є҆ди́нъ просла́висѧ."
 },
 {
  "type": "TEXT",
  "value": "Мч҃нкѡмъ: Щито́мъ бл҃гоче́стїѧ ѡ҆гра́ждшесѧ бж҃е́ственнїи страда́льцы, ᲂу҆стреми́шасѧ къ боре́нїю: погꙋби́ша же врага̀ всю̀ си́лꙋ, пою́ще пѣ́снь побѣ́днꙋю хрⷭ҇тꙋ̀ ᲂу҆крѣ́пльшемꙋ и҆̀хъ."
 },
 {
  "type": "TEXT",
  "value": "Ст҃и́телємъ: Оу҆пасо́сте бж҃е́ственнїи па́стырїе, ста́до бж҃їе на па́жити та́йнѣй, во́лки ѿгна́вше па́лицею слове́съ сщ҃е́нныхъ: и҆ всели́стесѧ ра́дꙋющесѧ во ѡ҆гра́дꙋ нбⷭ҇нꙋю, и҆дѣ́же є҆́сть вели́кїй па́стырь."
 },
 {
  "type": "TEXT",
  "value": "Прпⷣбнымъ: И҆́же стра̑сти поще́нїемъ и҆ болѣ́зньми ᲂу҆мертви́вше пло́ти, бж҃е́ственнымъ манове́нїемъ, живетѐ по сме́рти прпⷣбнїи: на́съ ра́ди ме́ртва бы́вшаго, хрⷭ҇та̀ всегда̀ моли́те ᲂу҆ще́дрити на́съ."
 },
 {
  "type": "TEXT",
  "value": "Сла́ва: Ме́ртвъ бы́въ, и҆ мє́ртвымъ дарова́лъ є҆сѝ бж҃е́ственный тво́й живо́тъ, и҆ безсме́ртнꙋю жи́знь. И҆̀же вѣ́рою преше́дшыѧ ѿ житїѧ̀ тлѣ́ннагѡ, црⷭ҇твїѧ твоегѡ̀ сотворѝ прича́стники, ꙗ҆́кѡ бл҃гоꙋтро́бенъ, и҆ є҆ди́нъ многомлⷭ҇тивъ."
 },
 {
  "type": "TEXT",
  "value": "Бг҃оро́диченъ: И҆́же любо́вїю хрⷭ҇то́вою ᲂу҆ѧзвлѧ́еми мч҃нцы, и҆ вѣнча́вшыѧсѧ ѿ бг҃а жєны̀, тебѐ всенепоро́чнꙋю и҆ до́брꙋю въ жена́хъ всѝ прпⷣбнїи почита́ютъ, ра́дꙋющесѧ вѣ́рнѡ, ꙗ҆́кѡ цр҃и́цꙋ всечестнꙋ́ю."
 },
 {
  "type": "HEADER",
  "value": "Дрꙋгі́й канѡ́нъ ᲂу҆со́пшымъ, пое́мъ є҆го̀ на рѧдꙋ̀, и҆дѣ́же нѣ́сть мине́и, и҆лѝ при возслѣ́дованїи ᲂу҆со́пшымъ над̾ кꙋтїе́ю, гла́съ а҃, є҆гѡ́же краегране́сїе: Вѣ́рою ᲂу҆со́пшымъ пе́рвꙋю пѣ́снь приноша́ю."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо безсме́ртне, ꙗ҆́кѡ всемогꙋ́щаѧ проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ."
 },
 {
  "type": "TEXT",
  "value": "Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ."
 },
 {
  "type": "TEXT",
  "value": "Врата̀ сме́рти и҆ верєѝ, твое́ю сме́ртїю сокрꙋши́лъ є҆сѝ безсме́ртне, врата̀ ѿве́рзи влⷣко, па́че ᲂу҆ма̀ безсме́ртїѧ ᲂу҆́спшымъ, мл҃твами стрⷭ҇тоте́рпєцъ твои́хъ."
 },
 {
  "type": "TEXT",
  "value": "Припѣ́въ: Оу҆поко́й гдⷭ҇и дꙋ́шы ᲂу҆со́пшихъ ра̑бъ твои́хъ."
 },
 {
  "type": "TEXT",
  "value": "Да бж҃е́ственнагѡ живота̀ сподо́бимсѧ, соше́лъ є҆сѝ къ сме́рти, тоѧ́ же и҆спрове́ргъ сокрѡ́вища, на́съ ѿтꙋ́дꙋ и҆звле́клъ є҆сѝ: ны́нѣ же жизнода́вче, преста́влєнныѧ ᲂу҆поко́й."
 },
 {
  "type": "TEXT",
  "value": "Сла́ва: Ты̀ моѐ тлѣ́нное же и҆ ме́ртвенное воспрїи́мъ, въ нетлѣ́нїе ѡ҆бле́клъ є҆сѝ, и҆ къ безконе́чномꙋ житїю̀ и҆ бл҃же́нномꙋ возне́слъ є҆сѝ, и҆дѣ́же ꙗ҆́кѡ ще́дръ, и҆̀хже прїѧ́лъ є҆сѝ, ᲂу҆поко́й."
 },
 {
  "type": "TEXT",
  "value": "Бг҃оро́диченъ: Ро́ждшꙋю є҆́же ѿ бг҃а бж҃їе сло́во, вѣ́рнїи воспои́мъ: та́ бо всечⷭ҇таѧ пꙋ́ть жи́зни ᲂу҆ме́ршымъ бы́сть, ю҆́же ꙗ҆́кѡ бг҃опрїе́мницꙋ и҆ бцⷣꙋ просла́вимъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю всеси́льне."
 },
 {
  "type": "TEXT",
  "value": "Мнѡ́гїѧ мꙋ́ки претерпѣ́вше, и҆ бл҃ги́хъ мно́гихъ сподо́бистесѧ, мно́жество мч҃нкъ сщ҃е́нное: тѣ́мже мл҃твами ва́шими ѕѡ́лъ мои́хъ безмѣ́рное мно́жество ѡ҆чи́стите."
 },
 {
  "type": "TEXT",
  "value": "Сщ҃е́ннїи ѡ҆дѣ́ѧвшесѧ пра́ведною бл҃года́тїю, и҆ весе́лїе кра́сное прпⷣбныхъ собо́ръ стѧжа́вше, невеще́ственнымъ слꙋжи́телємъ ᲂу҆подо́бишасѧ."
 },
 {
  "type": "TEXT",
  "value": "Хрⷭ҇тѡ́вы прⷪ҇ро́цы, бж҃е́ственнїи мч҃нцы, сщ҃е́нныхъ же́нъ сосло́вїе, и҆̀же пострада́вше мꙋ́жески, и҆ въ постѣ̀ просла́вистесѧ: и҆́хже мл҃твами млⷭ҇ти твоѧ̑ сп҃се всѣ̑мъ да́рꙋй."
 },
 {
  "type": "TEXT",
  "value": "Сла́ва: И҆́же ѿ землѝ хрⷭ҇тѐ, человѣ́ка рꙋко́ю твое́ю созда́въ во́лею, и҆ ꙗ҆̀же ѿ на́съ всѧ̑ вѣ́рою преста́вльшыѧсѧ рабы̑ твоѧ̑ нбⷭ҇ныхъ бл҃гъ сподо́би."
 },
 {
  "type": "TEXT",
  "value": "Бг҃оро́диченъ: Бг҃ороди́тельнице неискꙋсобра́чнаѧ, прошє́нїѧ всѣ́хъ принесѝ содѣ́телю на́шемꙋ бг҃ꙋ, ро́ждшемꙋсѧ ѿ ᲂу҆тро́бы твоеѧ̀: ꙗ҆́кѡ да ѡ҆брѧ́щемъ соверше́нное лю́тыхъ и҆збавле́нїе."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀ ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀ чл҃вѣколю́бче."
 },
 {
  "type": "TEXT",
  "value": "Ꙗ҆́кѡ є҆ди́нъ бл҃гъ сы́й, ꙗ҆́кѡ є҆ди́нъ многомлⷭ҇тивъ, ꙗ҆́же бл҃гоче́стнѡ къ тебѣ̀ ѿше́дшыѧ, въ нбⷭ҇ныхъ селе́нїихъ ᲂу҆поко́й, и҆дѣ́же неизрече́ннаѧ ра́дость и҆ наслажде́нїе, и҆ и҆дѣ́же собо́ръ мч҃нческїй весели́тсѧ."
 },
 {
  "type": "TEXT",
  "value": "Ты̀ є҆ди́нъ ꙗ҆ви́лсѧ є҆сѝ на землѝ, сп҃се мо́й безгрѣ́шенъ, и҆́же грѣхѝ мі́ра взе́млѧй ꙗ҆́кѡ млⷭ҇рдъ: ѿ мі́ра сегѡ̀ преста́вльшихсѧ вѣ́рою, дꙋ́шы ᲂу҆поко́й во дво́рѣхъ ст҃ы́хъ твои́хъ, въ сла́дости ра́йстѣй чл҃вѣколю́бче."
 },
 {
  "type": "TEXT",
  "value": "Сла́ва: Сме́рти держа́вꙋ низло́жъ, живо́тъ неконча́емый всѣ̑мъ вѣ̑рнымъ и҆сточи́лъ є҆сѝ влⷣко: въ то́мъ ᲂу҆́бѡ ᲂу҆чинѝ бл҃гоче́стнѡ ѿше́дшыѧ, презира́ѧ безмѣ̑рнаѧ прегрѣшє́нїѧ, и҆ проща́ѧ грѣхѝ и҆́хъ чл҃вѣколю́бче."
 },
 {
  "type": "TEXT",
  "value": "Бг҃оро́диченъ: Без̾ сѣ́мене зача́тъ чⷭ҇таѧ, сло́во присносꙋ́щное, пло́тски къ на́мъ прише́дшее, и҆ сме́рти крѣ́пость разори́вшее, и҆ мє́ртвымъ воскрⷭ҇нїе и҆ жи́знь вѣ́чнꙋю свои́мъ млⷭ҇рдїемъ да́рꙋющее."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀."
 },
 {
  "type": "TEXT",
  "value": "Претерпѣ́вше мч҃нцы всѧ̑кїѧ ра̑ны, нра́вомъ до́блественнымъ, ꙗ҆́коже ѻ҆вча́та непорѡ́чнаѧ хрⷭ҇тꙋ̀ приведо́стесѧ, за всѣ́хъ закла́вшемꙋсѧ животꙋ̀."
 },
 {
  "type": "TEXT",
  "value": "Оу҆ста̀ бж҃е́ственнаѧ бы́вше ст҃и́телїе бж҃їимъ сло́вомъ наꙋча́еми, дꙋ́шы и҆зба́виша ѿ ᲂу҆́стъ льсти́вагѡ: и҆̀хже благочестномꙋ́дреннѣ почита́емъ."
 },
 {
  "type": "TEXT",
  "value": "Крѣ́пцы бж҃е́ственнымъ дх҃омъ бы́вше ѻ҆тцы̀ бж҃е́ственнїи, крѣ́пкѡ побѣди́сте дꙋхѡ́въ лꙋка̑вствїѧ, прпⷣбнїи бл҃года́тїю."
 },
 {
  "type": "TEXT",
  "value": "Сла́ва: Оу҆мертви́всѧ животѐ на́шъ во́лею на дре́вѣ, и҆̀же вѣ́рою преше́дшыѧ живота̀ сподо́би вѣ́чнаго чл҃вѣколю́бче."
 },
 {
  "type": "TEXT",
  "value": "Бг҃оро́диченъ: Не ѿверго́шасѧ гдⷭ҇а же́нскїй ли́къ, стра́ждꙋще мꙋ́жески: и҆ не побѣди́шасѧ тѣле́сными сластьмѝ ст҃і́и, споспѣ́шницꙋ тѧ̀ и҆мꙋ́ще пречⷭ҇таѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе."
 },
 {
  "type": "TEXT",
  "value": "Оу҆мертви́въ а҆́дъ непобѣди́мою твое́ю си́лою, вмѣне́нъ бы́лъ є҆сѝ въ ме́ртвыхъ, є҆ди́нъ сы́й свобо́дь хрⷭ҇тѐ, дꙋ́шы свободѝ бл҃гочести́выхъ, и҆ є҆́же въ не́мъ ѡ҆сꙋжде́нїѧ, ст҃ы́хъ мч҃нкъ мольба́ми."
 },
 {
  "type": "TEXT",
  "value": "И҆́же всѣ́хъ сы́й ꙗ҆́кѡ влⷣка, противодосто́йнꙋю и҆̀же ѿ а҆да́ма твоегѡ̀ заколе́нїѧ, и҆зба́вꙋ да́лъ є҆сѝ и҆ цѣ́нꙋ: тѣ́мже мо́лимсѧ твои̑мъ щедро́тамъ, преста́вльшыѧсѧ ᲂу҆поко́й, согрѣше́нїй подаѧ̀ ѡ҆ставле́нїе."
 },
 {
  "type": "TEXT",
  "value": "Сла́ва: Прїѧ́лъ є҆сѝ сп҃се мо́й, є҆́же во гро́бѣ положе́нїе, и҆ ꙗ҆̀же во гробѣ́хъ жи́ти ѡ҆сꙋжде́нныѧ мертвецы̀, ꙗ҆́кѡ бг҃ъ воскр҃си́лъ є҆сѝ. Ны́нѣ же жи́зни присносꙋ́щныѧ сподо́би преста́влєнныѧ, ꙗ҆́кѡ є҆ди́нъ чл҃вѣколю́бецъ."
 },
 {
  "type": "TEXT",
  "value": "Бг҃оро́диченъ: Сп҃се́сѧ ро́дъ чл҃вѣ́ческїй рождество́мъ твои́мъ: ты́ бо родила̀ є҆сѝ на́мъ ѵ҆поста́сный живо́тъ, сме́рти потребле́нїе, и҆ къ жи́зни содѣ́ловающїй восхо́дъ, бг҃ороди́тельнице пренепоро́чнаѧ влⷣчце."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ."
 },
 {
  "type": "TEXT",
  "value": "Воѡрꙋжи́вшесѧ бл҃гоче́стїемъ, не ᲂу҆ѧ́звлени ꙗ҆ви́стесѧ мч҃нцы, борца̀ стрѣла́ми, и҆ побѣдоно́сцы бл҃года́тїю бы́вше, вѣнцы̀ полꙋчи́сте."
 },
 {
  "type": "TEXT",
  "value": "Пома́за ма́стїю бж҃е́ственною гдⷭ҇ь сщ҃е́нники своѧ̑, ᲂу҆па́сшыѧ въ преподо́бїи вѣ́рныхъ мно́жєства, и҆ наста́вльшыѧ ко ѻ҆гра́дѣ нбⷭ҇нѣй."
 },
 {
  "type": "TEXT",
  "value": "Сщ҃енномч҃нцы сщ҃е́ннѣйшїи, прпⷣбнїи всѝ, и҆̀же дх҃а ᲂу҆ста́вы соблю́дше, и҆ црⷭ҇твїю прича́стницы бы́вше, бж҃е́ственнѡ прославлѧ́етесѧ."
 },
 {
  "type": "TEXT",
  "value": "Сла́ва: И҆̀хже ны́нѣ преста́вилъ є҆сѝ повелѣ́нїемъ твои́мъ влⷣко гдⷭ҇и, сподо́би црⷭ҇твїѧ твоегѡ̀ со ст҃ы́ми, всѧ̑ презира́ѧ и҆̀мъ дрє́внѧѧ согрѣшє́нїѧ."
 },
 {
  "type": "TEXT",
  "value": "Бг҃оро́диченъ: И҆̀же посто́мъ и҆ страда́нїемъ сла́вꙋ ѡ҆брѣ́тше нбⷭ҇нꙋю жєны̀, пречⷭ҇таѧ, тебѐ предста́тельницꙋ и҆мꙋ́ще, ѕмі́евꙋ держа́вꙋ разрꙋши́ша."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀."
 },
 {
  "type": "TEXT",
  "value": "И҆сцѣлѧ́ѧй ѿ ꙗ҆́да сме́ртнагѡ, сме́рть прїѧ́тъ, и҆ сме́рти жа́ло притꙋпи́лъ є҆сѝ: но са́мъ ᲂу҆поко́й, и҆̀хже прїѧ́лъ є҆сѝ жизнода́вче, мч҃нкъ мольба́ми."
 },
 {
  "type": "TEXT",
  "value": "Оу҆мерщвле́нїѧ и҆ тлѣ́нїѧ человѣ́ки свободи́вый, дꙋ́шы вѣ́рнѡ преста́вленныхъ ᲂу҆чинѝ во дво́рѣхъ ст҃ы́хъ твои́хъ, ѿню́дꙋже ѿбѣжѐ всѧ́ка ско́рбь, и҆ весе́лїе водворѧ́етсѧ."
 },
 {
  "type": "TEXT",
  "value": "Сла́ва: Ра́й ᲂу҆́бѡ съ тобо́ю повѣ́шенномꙋ, ꙗ҆́кѡ ѿве́рзлъ є҆сѝ: ны́нѣ прїимѝ, дꙋ́шы влⷣко, къ тебѣ̀ вѣ́рою преста́вльшыѧсѧ, подаѧ̀ и҆̀мъ въ цр҃кви пе́рвенєцъ водвори́тисѧ."
 },
 {
  "type": "TEXT",
  "value": "Бг҃оро́диченъ: И҆збавлѧ́ющи на тѧ̀ наде́жды держа́вꙋ и҆мꙋ́щихъ, къ приста́нищꙋ бж҃е́ственныѧ во́ли ти́хѡ наста́ви, мт҃рнимъ твои́мъ дерзнове́нїемъ къ сн҃ꙋ твоемꙋ̀, бл҃гослове́ннаѧ всенепоро́чнаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ вопїю̀: живо́тъ мо́й бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Оу҆мерщвле́ни бы́вше ра́нъ мно́гихъ наведе́ньми, жи́знь и҆́стиннꙋю наслѣ́довасте вкꙋ́пѣ, молѧ́щесѧ сп҃сти́сѧ всѣ̑мъ на́мъ, ст҃і́и мч҃нцы."
 },
 {
  "type": "TEXT",
  "value": "Денни́цы свѣтоза̑рныѧ позна́ни бы́сте на землѝ, благоче́стїѧ свѣ́томъ ѡ҆зари́сте вѣ̑рныѧ, пресла́внїи хрⷭ҇тѡ́вы ѻ҆рꙋ́жницы, и҆ ст҃и́телїе премꙋ́дрїи."
 },
 {
  "type": "TEXT",
  "value": "Стра́нни ꙗ҆ви́стесѧ на землѝ, и҆ гра́ждане нбⷭ҇нїи, бг҃оно́снїи по́стницы, ᲂу҆мертви́вше пло́ти мꙋдрова̑нїѧ воздержа́нїемъ и҆ смире́нїемъ."
 },
 {
  "type": "TEXT",
  "value": "Сла́ва: Невече́рнемꙋ твоемꙋ̀ свѣ́тꙋ, и҆ сла́дости и҆́стиннѣй, ꙗ҆̀же преста́вилъ є҆сѝ вѣ̑рныѧ, покажѝ прича́стники чл҃вѣколю́бче, и҆ ст҃ы́хъ собо́рѡмъ си́хъ сопричтѝ."
 },
 {
  "type": "TEXT",
  "value": "Бг҃оро́диченъ: И҆́же пострада́вшыѧ крѣ́пкѡ, и҆ пости́вшыѧсѧ те́плѣ, тобо́ю ѱало́мски во слѣ́дъ приведо́шасѧ хрⷭ҇тꙋ̀, всепѣ́таѧ бг҃ороди́тельнице, всѧ́ческихъ цр҃ю̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑ бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе."
 },
 {
  "type": "TEXT",
  "value": "Ꙗ҆́кѡ млⷭ҇рдъ, преста́влєннымъ да́рꙋй прегрѣше́нїй проще́нїе, и҆ вѣ́чное наслажде́нїе подаѧ̀, и҆дѣ́же сїѧ́етъ лица̀ твоегѡ̀ свѣ́тлость, и҆ ѡ҆зарѧ́етъ стрⷭ҇тоте́рпцы твоѧ̑."
 },
 {
  "type": "TEXT",
  "value": "И҆́же кро́вїю ѿ ре́бръ твои́хъ и҆сте́кшею мі́ръ и҆скꙋпи́лъ є҆сѝ, вѣ́рою ᲂу҆со́пшыѧ ᲂу҆́бѡ хрⷭ҇тѐ и҆зба́ви честны́ми страстьмѝ твои́ми: ты́ бо цѣ́нꙋ за всѣ́хъ себѐ да́лъ є҆сѝ."
 },
 {
  "type": "TEXT",
  "value": "И҆́же созда́вый мѧ̀ рꙋка́ма пречⷭ҇тыми пе́рвѣе и҆ дꙋ́хъ дарова́вый, и҆ къ землѝ низпа́дша ѕлѣ̀, па́ки ѡ҆бнови́вый краснѣ́йше, ны́нѣ дꙋ́шы преста́вльшихсѧ са́мъ ᲂу҆поко́й."
 },
 {
  "type": "TEXT",
  "value": "Сла́ва: Черто́гꙋ твоемꙋ̀ свѣтоно́сномꙋ гдⷭ҇и, всели́ти сподо́би, ꙗ҆̀же въ вѣ́рѣ къ тебѣ̀ ᲂу҆со́пшыѧ, тѣ́хъ презира́ѧ прегрѣшє́нїѧ, ꙗ҆́кѡ бл҃гъ и҆ млⷭ҇рдъ и҆ многомлⷭ҇тивъ."
 },
 {
  "type": "TEXT",
  "value": "Бг҃оро́диченъ: Пое́мъ тѧ̀ бл҃гослове́ннаѧ чⷭ҇таѧ, є҆ѧ́же ра́ди на́мъ возсїѧ̀ сꙋ́щымъ во тьмѣ̀ и҆ сѣ́ни сме́ртнѣй, пра́вды незаходи́мое сл҃нце: ты̀ бо на́шегѡ сп҃се́нїѧ хода́таица была̀ є҆сѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ сп҃се, не прикоснꙋ́сѧ, нижѐ стꙋжѝ ѻ҆́гнь. Тогда̀ трїѐ ꙗ҆́кѡ є҆ди́нѣми ᲂу҆сты̀ поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "И҆скꙋси́вшесѧ ꙗ҆́кѡ зла́то во ѻ҆гнѝ мч҃нцы всѣ́ми мꙋ́ками, свѣтлѣ́йше всѧ́кагѡ зла́та въ любвѝ бж҃е́ственнѣй ꙗ҆ви́шасѧ, и҆ въ сокро́вищахъ нбⷭ҇ныхъ сохране́ни бы́ша."
 },
 {
  "type": "TEXT",
  "value": "Ꙗ҆́кѡ сщ҃е́нницы, ꙗ҆́кѡ бж҃е́ственнїи слꙋгѝ бы́вше, всѝ ст҃и́телїе сщ҃е́ннїи принесо́сте бг҃ꙋ жє́ртвы безкрѡ́вныѧ, и҆ лю́ди ᲂу҆па́сше, и҆дѣ́же вели́кїй па́стырь всели́стесѧ."
 },
 {
  "type": "TEXT",
  "value": "Не покори́вшесѧ страсте́мъ пло́ти, безстра́стїемъ ꙗ҆́кѡ въ ри́зꙋ та́йнꙋ прпⷣбнїи ѡ҆бле́кшесѧ, сожи́телїе а҆́гг҃лѡмъ ꙗ҆ви́шасѧ: и҆́хже мл҃твами хрⷭ҇тѐ, и҆зба́ви на́съ ѿ и҆скꙋше́нїй."
 },
 {
  "type": "TEXT",
  "value": "Сла́ва: И҆дѣ́же пи́ща є҆́сть та́йнаѧ, и҆дѣ́же сїѧ́етъ свѣ́тъ лица̀ твоегѡ̀ хрⷭ҇тѐ, ꙗ҆̀же ѿ на́съ преста́вльшыѧсѧ въ вѣ́рѣ бл҃года́телю вселѝ, сла́вити бл҃гоче́стнѡ твою̀ бл҃госты́ню."
 },
 {
  "type": "TEXT",
  "value": "Бг҃оро́диченъ: Тебѐ всест҃а́ѧ, пречⷭ҇таѧ, ст҃ы̑ѧ жєны̀ и҆мꙋ́ще добро́тꙋ, ликꙋ́ютъ со а҆́гг҃лы ра́достнѡ, и҆ бг҃а сло́ва сла́вѧтъ ро́ждшагосѧ пло́тїю и҆з̾ тебѐ, за млⷭ҇рдїе мно́гое."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Тебѐ ᲂу҆́мнꙋю бцⷣе, пе́щь разсмотрѧ́емъ вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ."
 },
 {
  "type": "TEXT",
  "value": "Сїѧ́нїи пречⷭ҇тыѧ сла́вы твоеѧ̀, ѡ҆зари́тисѧ хрⷭ҇тѐ подава́й, ѿ бꙋ́ри мїрскі́ѧ къ тебѣ̀ ѿше́дшымъ, и҆ тѣ́хъ сподо́би съ мч҃нки взыва́ти тебѣ̀: хвали́мый ѻ҆тцє́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Но́въ а҆да́мъ вои́стиннꙋ бы́въ, а҆да́мовъ содѣ́телю, и҆́же клѧ́твꙋ бо а҆да́мовꙋ є҆ди́нъ потреби́лъ є҆сѝ. Тѣ́мже мо́лимсѧ тебѣ̀: преста́влєнныѧ ᲂу҆поко́й въ сла́дости ра́йстѣй хрⷭ҇тѐ, ꙗ҆́кѡ є҆ди́нъ млⷭ҇рдъ."
 },
 {
  "type": "TEXT",
  "value": "Сла́ва: И҆́же на́шꙋ є҆сте́ственнꙋю не́мощь є҆ди́нъ свѣ́дый ꙗ҆́кѡ бг҃ъ, бл҃гъ же и҆ млⷭ҇тивъ, всѧ̑ и҆̀хже преста́вилъ є҆сѝ, и҆дѣ́же свѣ́тъ незаходи́мый присѣща́етъ лица̀ твоегѡ̀, ᲂу҆чинѝ хрⷭ҇тѐ, хвали́мый ѻ҆тцє́въ бж҃е и҆ препросла́вленъ."
 },
 {
  "type": "TEXT",
  "value": "Бг҃оро́диченъ: Зако́на сѣ̑ни, и҆ дрє́внѧѧ гада̑нїѧ твои́мъ преидо́ша рождество́мъ бг҃омт҃и, ты́ бо на́мъ бж҃е́ственныѧ бл҃года́ти свѣ́тъ возсїѧ́ла є҆сѝ: и҆́мже дре́внихъ и҆зба́вихомсѧ долгѡ́въ чⷭ҇таѧ, воспѣва́юще бг҃а препросла́вленнаго."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Львѡ́въ зїѧ̑нїѧ преидо́ша невре́днѡ, и҆ коно́бѡвъ врѣ̑нїѧ претеко́ша крѣ́пкѡ мч҃нцы всѝ, прохлажда́еми ѻ҆гне́мъ бж҃е́ственнагѡ дх҃а пресла́внѡ."
 },
 {
  "type": "TEXT",
  "value": "Даѧ̀ прⷪ҇ро́кѡмъ свои̑мъ предвѣ́дѣти да̑льнѧѧ, и҆ ст҃и́тели твоѧ̑ ᲂу҆мꙋдри́лъ є҆сѝ сщ҃е́ннѡ: тѣ́хъ мл҃твами хрⷭ҇тѐ бж҃е, просвѣтѝ сердца̀ вѣ́рнѡ пою́щихъ тѧ̀."
 },
 {
  "type": "TEXT",
  "value": "Распе́нше себѐ прпⷣбнїи мі́рови, живо́тъ премі́рный наслѣ́довасте по́стницы, съ сꙋ́щими ѿ вѣ́ка всѣ́хъ бг҃ꙋ ᲂу҆годи́вшими преподо́бнѡ и҆ пра́веднѡ."
 },
 {
  "type": "TEXT",
  "value": "Сла́ва: И҆́же созда́вый человѣ́ка ѿ землѝ бг҃одѣ́льнѡ, ꙗ҆̀же ѿ землѝ преста́вилъ є҆сѝ вѣ̑рныѧ, ꙗ҆́кѡ бл҃гъ, пи́щи ра́йскїѧ сподо́би, всѧ̑ презира́ѧ ꙗ҆̀же ѿ ни́хъ содѣ̑ѧннаѧ."
 },
 {
  "type": "TEXT",
  "value": "Бг҃оро́диченъ: До́брꙋю и҆ непоро́чнꙋю чⷭ҇таѧ въ жена́хъ, жєны̀ пострада́вшыѧ зна́юще тѧ̀ ꙗ҆́вѣ дв҃о, мл҃твы творѧ́тъ съ тобо́ю къ бг҃ꙋ, сп҃сти́сѧ ѿ бѣ́дъ рабѡ́мъ твои̑мъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Скве́рнꙋ всю̀ твои́хъ рабѡ́въ ᲂу҆со́пшихъ, твоегѡ̀ человѣколю́бїѧ росо́ю ѿмы́въ, тѧ̀ пѣ́сньми воспѣва́ти сподо́би: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Предстоѧ́тели сп҃се десны́ѧ, вѣ́рою ѡ҆правда́въ мл҃твами стрⷭ҇тоте́рпєцъ, ꙗ҆̀же преста́вилъ є҆сѝ вѣ̑рныѧ, покажѝ пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Сла́ва: И҆́же сме́рти и҆ живота̀ и҆мѣ́ѧй всѧ́кꙋю вла́сть, ꙗ҆̀же вѣ́рою ᲂу҆со́пшыѧ твоегѡ̀ сїѧ́нїѧ ᲂу҆лꙋчи́ти бл҃говолѝ, взыва́ющыѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Сп҃се́нїѧ хода́таица на́мъ была̀ є҆сѝ всенепоро́чнаѧ, и҆ въ непреходи́мыѧ вѣ́ки пребыва́нїѧ же и҆ свѣ́тлости: тебѐ дв҃о чⷭ҇таѧ, при́снѡ всѧ̑ дѣла̀ бл҃гослови́мъ, и҆ превозно́симъ во всѧ̑ вѣ́ки."
 },
 {
  "type": "TEXT",
  "value": "Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ про́чыѧ стїхѝ, съ припѣ́вы."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ вѣ́рнїи велича́емъ."
 },
 {
  "type": "TEXT",
  "value": "Сщ҃е́нныхъ мч҃нкъ почти́мъ сщ҃є́ннаѧ борє́нїѧ ра́дꙋющесѧ, страда̑нїѧ же и҆ ра̑ны, пригвождє́нїѧ и҆ и҆згна̑нїѧ, и҆ заколе́нїе блаже́нное, и҆́мже хрⷭ҇тꙋ̀ наслѣ̑дницы ꙗ҆ви́шасѧ."
 },
 {
  "type": "TEXT",
  "value": "Ꙗ҆́кѡ сщ҃е́нницы бж҃їи, ѡ҆блеко́шасѧ въ пра́вдꙋ бж҃е́ственнїи ᲂу҆гѡ́дницы: ꙗ҆́кѡ въ преподо́бїи пожи́вше, и҆̀же въ постѣ̀ ꙗ҆́вѣ сконча́вшїисѧ, ра́дꙋютсѧ хрⷭ҇та̀ велича́юще."
 },
 {
  "type": "TEXT",
  "value": "Оу҆ста̀ бж҃е́ствєннаѧ гдⷭ҇нѧ бы́вше, прⷪ҇ро́цы всѝ, всѣ̑мъ є҆гѡ̀ провозвѣсти́ша свѣ́тъ: съ ни́миже ны́нѣ веселѧ́тсѧ и҆ жєны̀, крѣ́пкѡ подвиза́вшыѧсѧ, и҆ посто́мъ бг҃ꙋ ᲂу҆годи́вшыѧ."
 },
 {
  "type": "TEXT",
  "value": "Сла́ва: И҆́же всѣ́ми ца́рствꙋющаѧ си́ло, твоегѡ̀ ца́рствїѧ покажѝ прича́стники, со ст҃ы́ми твои́ми, ꙗ҆̀же ѿ землѝ преста́вилъ є҆сѝ: и҆ ꙗ҆̀же содѣ̑ѧннаѧ и҆́ми, бж҃е всѣ́хъ пре́зри премно́гою бла́гостїю твое́ю."
 },
 {
  "type": "TEXT",
  "value": "Бг҃оро́диченъ: Ꙗ҆́же свѣ́тъ ро́ждшаѧ бж҃е́ственный, безлѣ́тный, всѧ̑ моѧ̑ разрѣшѝ лѣ̑тнаѧ прегрѣшє́нїѧ, твои́ми мольба́ми: и҆ ᲂу҆́мъ мо́й просвѣтѝ, ѡ҆мрача́емый при́снѡ лѣ́ностїю, да тѧ̀ пою̀, и҆ вѣ́рнѡ велича́ю."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆́бразъ чⷭ҇тагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ."
 },
 {
  "type": "TEXT",
  "value": "Пощадѝ ꙗ҆́кѡ бг҃ъ чл҃вѣколюби́въ, и҆ млⷭ҇тивъ, твоѐ созда́нїе: и҆ ᲂу҆поко́й въ селе́нїихъ ст҃ы́хъ твои́хъ, и҆дѣ́же мч҃нцы всѝ веселѧ́тсѧ, вѣ́рою преста́влєныѧ ѿ вре́менныхъ, многомлⷭ҇тиве."
 },
 {
  "type": "TEXT",
  "value": "И҆мѣ́ѧй млⷭ҇тей бе́зднꙋ, препобѣжда́ющꙋю рабѡ́въ твои́хъ прегрѣшє́нїѧ, и҆̀хже прїе́мъ и҆збра̀, ᲂу҆поко́й въ нѣ́дрѣхъ а҆враа́млихъ чл҃вѣколю́бче, и҆ съ ла́заремъ во свѣ́тъ тво́й вселѝ."
 },
 {
  "type": "TEXT",
  "value": "Сла́ва: И҆зба́витель и҆ сп҃съ бы́въ ро́дꙋ человѣ́ческомꙋ, распѧ́тїѧ ра́ди, ꙗ҆̀же ны́нѣ ѿ на́съ преста́вилъ є҆сѝ, ꙗ҆́кѡ бл҃года́тель, наслажде́нїѧ бж҃е́ственнагѡ сподо́би, и҆ живота̀ нетлѣ́ннагѡ, и҆ весе́лїѧ и҆ свѣ́тлости."
 },
 {
  "type": "TEXT",
  "value": "Бг҃оро́диченъ: Ѽ ꙗ҆̀же па́че ᲂу҆ма̀ чꙋде́съ твои́хъ! Ты́ бо дв҃о є҆ди́на всѣ̑мъ, и҆̀же под̾ со́лнцемъ, подала̀ є҆сѝ разꙋмѣ́ти новѣ́йшее чꙋ́до пречⷭ҇таѧ, твоегѡ̀ ржⷭ҇тва̀ недоꙋмѣ́ннагѡ: тѣ́мже тѧ̀ всѝ велича́емъ."
 }
]