ponomar-pwa/static/data/shared/services/canons/paraclete/tone1/wed.json

[
 {
  "type": "HEADER",
  "value": "Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, гла́съ а҃, творе́нїе і҆ѡ́сифово, є҆гѡ́же краегране́сїе:"
 },
 {
  "type": "TEXT",
  "value": "Крⷭ҇то́мъ сп҃са́емь є҆́смь, пострада́вшагѡ влⷣки."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Гѡ́рькїѧ рабѡ́ты и҆зба́вльсѧ і҆и҃ль, непроходи́мое про́йде ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь ꙗ҆́кѡ бл҃годѣ́телю пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ."
 },
 {
  "type": "TEXT",
  "value": "На крⷭ҇тѣ̀ воздвиза́емь хрⷭ҇тѐ, совоздви́глъ є҆сѝ па́дшаго человѣ́ка, и҆ всю̀ вра́жїю си́лꙋ низве́рглъ є҆сѝ сло́ве. Тѣ́мже твоѧ̀ стрⷭ҇ти воспѣва́ю пострада́вшагѡ, и҆ ѿ страсте́й и҆зба́вльшагѡ мѧ̀."
 },
 {
  "type": "TEXT",
  "value": "Сла́вы гдⷭ҇ь ты̀ є҆сѝ, и҆́же сла́вою вѣнча́вый человѣ́ка, те́рнїемъ вѣнча́лсѧ є҆сѝ, ꙗ҆́кѡ да терноно́сное є҆стество̀ на́ше сотвори́ши плодоно́сно, сади́телю бж҃е́ственныхъ дѣѧ́нїй."
 },
 {
  "type": "TEXT",
  "value": "Мч҃нченъ: Ст҃ы́хъ собо́ръ прест҃ы́й зако́ннѡ пострада́вый, всю̀ крове́й ст҃ы́хъ тече́ньми тва́рь ѡ҆свѧти́лъ є҆́сть, и҆ сквє́рныѧ бѣсѡ́мъ жє́ртвы принѡси́мыѧ, ѡ҆ бз҃ѣ ѻ҆ц҃ѣ̀ потреби́лъ є҆́сть."
 },
 {
  "type": "TEXT",
  "value": "Мч҃нченъ: Ва̑ша всест҃і́и мч҃нцы, ѻ҆́блацы мꙋче́нїй не скры́ша терпѣли̑внаѧ борє́нїѧ: тѣ́мже па́че со́лнечныхъ лꙋ́чь сла́внїи ꙗ҆ви́стесѧ, ѡ҆блиста́юще ꙗ҆́вѣ зари̑ сп҃се́нїѧ."
 },
 {
  "type": "TEXT",
  "value": "Бг҃оро́диченъ: Ѻ҆рꙋ́жїемъ снѣда́шесѧ пречⷭ҇таѧ, страсте́й сн҃а твоегѡ̀, ꙗ҆́кѡ зрѧ́ше того̀ копїе́мъ пробода́ема, є҆́же въ раѝ возбрани́тельное ѿрѣва́ющагѡ ѻ҆рꙋ́жїе, не даю́щее вѣ̑рнымъ бж҃е́ственнагѡ вхо́да."
 },
 {
  "type": "HEADER",
  "value": "Дрꙋгі́й канѡ́нъ прест҃ѣ́й бцⷣѣ, гла́съ а҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ, та́ бо безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ."
 },
 {
  "type": "TEXT",
  "value": "Стрꙋи̑ мнѣ̀ сле́зъ дꙋше́вныхъ да́рꙋй всенепоро́чнаѧ, ꙗ҆́же и҆сто́чникъ ѡ҆ставле́нїѧ ро́ждши, грѣхо́внꙋю скве́рнꙋ ѿмыва́юща, и҆ во смире́нїи жи́знь мою̀ и҆зводѧ́ща."
 },
 {
  "type": "TEXT",
  "value": "Превы́шши бы́сть чⷭ҇таѧ тва́ри, бг҃а вопло́щши. Тѣ́мже молю̀ тѧ̀: ѿ гно́ѧ страсте́й возста́ви мѧ̀, и҆ къ бж҃е́ственнѣй высотѣ̀ безстра́стїѧ возведѝ."
 },
 {
  "type": "TEXT",
  "value": "Млⷭ҇тива мѝ ꙗ҆ви́сѧ чⷭ҇таѧ, въ де́нь сꙋ́дный, молю́сѧ, всѧ́кагѡ и҆збавлѧ́ющи мѧ̀ стра́шнагѡ стоѧ́нїѧ и҆ лю́тагѡ мꙋче́нїѧ, прибѣга́ющаго под̾ кро́въ тво́й пречⷭ҇таѧ влⷣчце."
 },
 {
  "type": "TEXT",
  "value": "Мра́комъ грѣхо́внымъ ѡ҆держи́ма мѧ̀, и҆ па́дша пречⷭ҇таѧ, воздви́гни, сле́зъ тꙋ́чꙋ даю́щи мѝ, и҆́миже ѡ҆мы́ю сквє́рнаѧ дѣла̀: тѧ́ бо є҆ди́нꙋ застꙋ́пницꙋ и҆́мамы бцⷣе."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Не мꙋ́дростїю и҆ бога́тствомъ да хва́литсѧ сме́ртный свои́мъ, но вѣ́рою гдⷭ҇нею правосла́внѡ взыва́ѧ хрⷭ҇тꙋ̀ бг҃ꙋ, и҆ поѧ̀ при́снѡ: на ка́мени твои́хъ за́повѣдей ᲂу҆тверди́ мѧ влⷣко."
 },
 {
  "type": "TEXT",
  "value": "И҆скопа́ша тѝ беззако́ннїи рꙋ́цѣ и҆ но́зѣ і҆и҃се мо́й, дла́нїю неизрече́ннѡ созда́вшагѡ пе́рвѣе хрⷭ҇тѐ бж҃е человѣ́ка, и҆ стрⷭ҇тїю страсте́й, и҆ тлѝ всѣ́хъ свобо́ждшагѡ."
 },
 {
  "type": "TEXT",
  "value": "Да ста́нетъ, вопїѧ́ше і҆и҃съ, лꙋна́ же и҆ сл҃нце, є҆́же на крⷭ҇тѣ̀ прописꙋ́ѧй пострада́вшаго влⷣкꙋ пло́тїю, свѣти́лѡмъ помраче́нїе. И҆́мже тмы̀ нача̑ла лꙋка̑ваѧ посра́млена бы́ша."
 },
 {
  "type": "TEXT",
  "value": "Мч҃нченъ: Терпѧ́хꙋ ᲂу҆се́рднѡ ра̑ны сла́внїи мч҃ницы, и҆ ᲂу҆ѧзвлѧ́еми, велїа́ра ѕмі́ѧ ᲂу҆ѧзви́ша крѣ́пкѡ: тѣ́мже дꙋ́шъ на́шихъ ра̑ны и҆сцѣлѧ́ютъ при́снѡ, бж҃е́ственнымъ манове́нїемъ."
 },
 {
  "type": "TEXT",
  "value": "Мч҃нченъ: Ка́пища бѣсѡ́вскаѧ и҆ хра́мы разори́сте мч҃ницы, болѣ́зньми же и҆ мꙋ́жествомъ са́ми себѐ пресла́внѡ хра́мы воздвиго́сте бл҃года́тїю, вмѣсти́тельны ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ."
 },
 {
  "type": "TEXT",
  "value": "Бг҃оро́диченъ: Въ ча́съ страсте́й, кра́снаго доброто́ю зрѧ́щи дв҃о, видѣ́нїѧ нижѐ добро́ты и҆мꙋ́ща, вопїѧ́ла є҆сѝ го́рькѡ чⷭ҇таѧ, восклица́ющи: ᲂу҆вы̀ мнѣ̀, ка́кѡ стра́ждеши сн҃е, ѿ страсте́й всѣ́хъ хотѧ́й и҆зба́вити;"
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ: препоѧ́ши мѧ̀ съ высоты̀ си́лою, є҆́же вопи́ти тебѣ̀ ст҃ы́й: ѡ҆дꙋшевле́нный хра́ме неизрече́нныѧ сла́вы твоеѧ̀, чл҃вѣколю́бче."
 },
 {
  "type": "TEXT",
  "value": "Хра́мъ была̀ є҆сѝ пречⷭ҇таѧ, всѣ́ми ца́рствꙋющагѡ, бы́вша мѧ̀ верте́пъ дꙋшетлѣ́нныхъ разбо́йникъ, и҆схитѝ ѿ тѣ́хъ ѡ҆ѕлобле́нїѧ, и҆ бж҃е́ственнагѡ дх҃а чи́сто жили́ще ꙗ҆ви́ мѧ. Два́жды."
 },
 {
  "type": "TEXT",
  "value": "Сле́зъ мѝ послѝ тꙋ́чꙋ, и҆зсꙋша́ющꙋ течє́нїѧ лꙋка́выхъ мои́хъ дѣѧ́нїй, молю́сѧ, ꙗ҆́же бл҃гоꙋтро́бїѧ ро́ждши ти́хꙋю пꙋчи́нꙋ, хрⷭ҇та̀ бг҃а на́шего, бцⷣе дв҃о всепѣ́таѧ."
 },
 {
  "type": "TEXT",
  "value": "Крѣ́пость на́мъ и҆ сто́лпъ непоколеби́мь бꙋ́ди бг҃ора́дованнаѧ, и҆ щи́тъ, и҆ ѻ҆рꙋ́жїе непобѣди́мое, мы́сленныхъ вра̑гъ полкѝ ѿ на́съ возбранѧ́ющи, бцⷣе пречⷭ҇таѧ, вѣ́рою и҆ любо́вїю почита́ющихъ тѧ̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Слы́ша дре́вле а҆ввакꙋ́мъ хрⷭ҇тѐ чꙋ́дный тво́й слꙋ́хъ, и҆ стра́хомъ взыва́ше: ѿ ю҆́га бг҃ъ прїи́детъ, и҆ ст҃ы́й ѿ горы̀ прїѡсѣне́нныѧ ча́щи, сп҃стѝ пома̑занныѧ: сла́ва си́лѣ твое́й гдⷭ҇и."
 },
 {
  "type": "TEXT",
  "value": "Ра̑ны и҆ ꙗ҆́звы хрⷭ҇тѐ претерпѣ́лъ є҆сѝ, ꙗ҆́звы се́рдца моегѡ̀ и҆сцѣлѧ́ѧ, же́лчи вкꙋси́въ го́рькїѧ, сла́дкагѡ вкꙋ́са тлетво́рнагѡ ѿе́млѧ вре́дъ: на дре́вѣ же пригво́ждсѧ дре́внюю клѧ́твꙋ потреби́лъ є҆сѝ."
 },
 {
  "type": "TEXT",
  "value": "Дале́че ѿриновє́нныѧ ѿ тебѐ ꙗ҆зы́ки, воздвиза́емь на крⷭ҇тѣ̀ бли́зъ привле́клъ є҆сѝ, примири́лъ же є҆сѝ на́съ ѻ҆ц҃ꙋ̀ долготерпѣли́ве, въ средꙋ̀ вве́лъ є҆сѝ ꙗ҆́кѡ хода́тай себѐ: и҆ посредѣ̀ землѝ стрⷭ҇ть претерпѣ́лъ є҆сѝ поно́снꙋю."
 },
 {
  "type": "TEXT",
  "value": "Мч҃нченъ: Въ мо́ре крове́й ва́шихъ та́йнѡ бг҃обл҃же́ннїи, со всѣ́ми свои́ми во́инствы, мы́сленный фараѡ́нъ впа́дъ потопи́сѧ. Тѣ́мже ра́достїю вы̀ сп҃сшесѧ прїидо́сте ко ѡ҆бѣтова́ннѣй землѝ, и҆ нбⷭ҇нїи гра́ждане бы́сте."
 },
 {
  "type": "TEXT",
  "value": "Мч҃нченъ: Возмого́ша вжилѧ́еми хрⷭ҇то́вою стрⷭ҇тїю бл҃же́ннїи, стрⷭ҇ти разли̑чныѧ воспрїѧ́ти на честнѣ́й пло́ти. Сегѡ̀ ра́ди ᲂу҆ставлѧ́ютъ стра̑сти дꙋ́шъ же и҆ тѣле́съ, восхвалѧ́ющихъ тѣ́хъ, и҆ бл҃жа́щихъ всегда̀."
 },
 {
  "type": "TEXT",
  "value": "Бг҃оро́диченъ: Непра́ведно зрѧ́щи заколе́нїе тѧ̀ хрⷭ҇тѐ ро́ждшаѧ, рыда́ющи вопїѧ́ше тѝ: правосꙋ́де сн҃е, ка́кѡ непра́веднѡ ѡ҆сꙋди́лсѧ є҆сѝ, хотѧ́й ѡ҆правда́ти престꙋпле́нїемъ ѡ҆сꙋждє́ныѧ дре́вле, и҆ къ тлѣ́нїю попо́лзшыѧсѧ;"
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Го́рꙋ тѧ̀ бл҃года́тїю бж҃їею прїѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆з̾ тебѐ и҆зы́ти і҆и҃левꙋ провозглаша́ше ст҃о́мꙋ, во сп҃се́нїе на́ше и҆ ѡ҆бновле́нїе."
 },
 {
  "type": "TEXT",
  "value": "Бѣсо́вскими лестьмѝ лю́тѣ ѿвлачи́маго мѧ̀ ѿ за́повѣдей бж҃їихъ, не пре́зри бл҃га́ѧ: но ᲂу҆ще́дри молю́сѧ, и҆ тогѡ̀ пре́лести покажи́ мѧ вы́шша, прибѣга́ющаго пречⷭ҇таѧ къ твое́й млⷭ҇ти. Два́жды."
 },
 {
  "type": "TEXT",
  "value": "Є҆ди́не сы́й млⷭ҇тивне хрⷭ҇тѐ бж҃е, тебѐ ро́ждшїѧ мл҃твами, на тѧ̀ ᲂу҆пова́ющихъ поми́лꙋй, и҆ ᲂу҆ще́дри, и҆ къ свѣ́тꙋ за́повѣдей твои́хъ наста́ви, и҆ вѣ́чныѧ жи́зни сподо́би."
 },
 {
  "type": "TEXT",
  "value": "Оу҆снꙋ́вша въ сме́рть, и҆ во гро́бѣ лежа́ща ѿча́ѧнїѧ пречⷭ҇таѧ, ѡ҆ко́вана желѣ́зы прегрѣше́нїй мои́хъ, твое́ю бо́дренною мл҃твою воздви́гни, и҆ къ покаѧ́нїю и҆спра́ви, молю́сѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́тъ тво́й незаходи́мый возсїѧ́й хрⷭ҇тѐ въ сердца̀ вѣ́рнѡ пою́щихъ тѧ̀, ми́ръ подава́ѧй на́мъ, па́че ᲂу҆ма̀. Тѣ́мъ ѿ но́щи невѣ́дѣнїѧ ко дню̀ свѣ́томъ твои́мъ текꙋ́ще, славосло́вимъ тѧ̀ чл҃вѣколю́бче."
 },
 {
  "type": "TEXT",
  "value": "Сл҃нце сп҃се ѡ҆бнажи́сѧ свѣ́та, на дре́вѣ на́га тебѐ зрѧ̀ ви́сѧща, на вода́хъ повѣ́сившаго зе́млю: ка́мени же, на ка́мени ꙗ҆́кѡ ѡ҆щꙋти́ша воздви́жена, распада́шесѧ стра́хомъ, и҆ ѡ҆снова̑нїѧ поколеба́шасѧ."
 },
 {
  "type": "TEXT",
  "value": "Воздви́женъ на дре́во, и҆ гвоздьмѝ пригво́ждсѧ, ѡ҆кровави́лъ є҆сѝ персты̀ долготерпѣли́ве, и҆ копїе́мъ пробода́емь въ ре́бра, и҆сцѣли́лъ є҆сѝ ꙗ҆́звꙋ а҆да́мовꙋ, ю҆́же прїѧ́тъ ребра̀ послꙋ́шавъ, и҆ преслꙋ́шавъ сотво́ршаго и҆̀."
 },
 {
  "type": "TEXT",
  "value": "Мч҃нченъ: Ра́й ꙗ҆ви́сѧ мч҃никъ мно́жество, живо́тное и҆мѣ́ѧ посредѣ̀ дре́во хрⷭ҇та̀: за него́же поно́снꙋю до́блественнымъ по́мысломъ сме́рть претерпѣ́вше, снѣ́дїю ро́дꙋ нача́льники ᲂу҆мертви́вшаго ѕмі́ѧ, бжⷭ҇твенною си́лою ᲂу҆мертви́ша."
 },
 {
  "type": "TEXT",
  "value": "Мч҃нченъ: Кро́вными ка́плѧми хрⷭ҇тѡ́вы страда́льцы, безбо́жїѧ глꙋбинꙋ̀ и҆зсꙋши́сте, и҆ бжⷭ҇твенными и҆сточе́нїи чꙋде́съ сщ҃е́нныхъ, страсте́й течє́нїѧ дꙋ́шъ же и҆ тѣле́съ загражда́ете. Тѣ́мже достодо́лжнѡ ᲂу҆бл҃жа́еми є҆стѐ."
 },
 {
  "type": "TEXT",
  "value": "Бг҃оро́диченъ: Оу҆дивлѧ́шесѧ непоро́чнаѧ, на дре́вѣ зрѧ́щи хрⷭ҇та̀ воздви́жена во́лею, и҆ пла́чꙋщи вопїѧ́ше: сн҃е мо́й и҆ бж҃е, болѣ́зни въ ржⷭ҇твѣ̀ и҆збѣ́гши, ны́нѣ болѣ́зни страждꙋ̀, непра́веднѡ ѿ беззако́нныхъ распина́емꙋ тѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Просвѣти́вый сїѧ́нїемъ прише́ствїѧ твоегѡ̀ хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀."
 },
 {
  "type": "TEXT",
  "value": "Пото́цы мно́гихъ мѝ прегрѣше́нїй приверго́шасѧ, и҆ хра́мъ дꙋшѝ моеѧ̀ низложи́ша пречⷭ҇таѧ: но ꙗ҆́же є҆сѝ и҆справле́нїе пра́ѻтцємъ бцⷣе, возста́ви мѧ̀ раба̀ твоего̀."
 },
 {
  "type": "TEXT",
  "value": "Въ тимѣ́нїи мѧ̀ страсте́й ᲂу҆глѣ́бнꙋвша ѻ҆каѧ́ннаго, и҆ бꙋ́рею мно́гихъ согрѣше́нїй потоплѧ́ема, рꙋ́кꙋ пода́вши влⷣчце, возведи́ мѧ, и҆ ко приста́нищꙋ покаѧ́нїѧ напра́ви."
 },
 {
  "type": "TEXT",
  "value": "Дꙋше́вныхъ мѝ скве́рнъ ѡ҆чище́нїе да́рꙋй, и҆ плотски́хъ мѧ̀ болѣ́зней и҆сцѣлѝ молю́сѧ, и҆ ѿ ѡ҆бдержа́щагѡ лю́тагѡ ᲂу҆ны́нїѧ премѣнѝ мл҃твами твои́ми."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ве́сь ѿ страсте́й безмѣ́рныхъ содержꙋ́сѧ, и҆ ки́томъ ѕѡ́лъ снизпадо́хъ: но возведѝ и҆з̾ и҆стлѣ́нїѧ мѧ̀ бж҃е, ꙗ҆́коже пре́жде і҆ѡ́нꙋ, и҆ вѣ́рою безстра́стїе мѝ да́рꙋй, ꙗ҆́кѡ да во гла́сѣ хвале́нїѧ, и҆ сп҃се́нїѧ дх҃омъ пожрꙋ́ ти."
 },
 {
  "type": "TEXT",
  "value": "Є҆гда̀ мѡѷсе́й рꙋ́цѣ воздѣ́въ на высотꙋ̀, твою̀ стрⷭ҇ть воѡбража́ше, просте́ршагѡ на дре́вѣ дла̑ни, и҆ лꙋка́вагѡ разрꙋши́вша держа́вꙋ па́гꙋбнꙋю, тѣ́мже и҆зба́вителѧ вѣ́дꙋще тѧ̀ и҆ сп҃са пои́мъ, чл҃вѣколю́бче."
 },
 {
  "type": "TEXT",
  "value": "Ме́ртвость претерпѣ́лъ є҆сѝ воздвиза́емь на дре́во, и҆ ᲂу҆мертви́телѧ на́шего ᲂу҆мертви́лъ є҆сѝ: и҆ ѡ҆живи́въ рꙋкꙋ̀ твоє́ю хрⷭ҇тѐ созда́нїе, въ ре́бра же копїе́мъ пробода́емь, и҆сточи́лъ є҆сѝ двѣ̀ рѣцѣ̀ ѡ҆ставле́нїѧ, во двою̀ вѡ́лю воспѣва́емый."
 },
 {
  "type": "TEXT",
  "value": "Мч҃нченъ: Честна̀ ва́ша сме́рть ст҃і́и пред̾ гдⷭ҇емъ ны́нѣ бы́сть, поче́тшихъ всѣ́хъ честны́ми свои́ми страстьмѝ, и҆ безче́стнаго велїа́ра посрами́вшихъ, всѣ́ми приложе́нїи мꙋ́къ низложи́ти всѣ́хъ ва́съ ко́знствꙋющаго."
 },
 {
  "type": "TEXT",
  "value": "Мч҃нченъ: Все́ю дꙋше́ю ко всѣ̑мъ ѿлꙋчи́стесѧ многови́днымъ премꙋ́дрїи мꙋче́нїемъ, всю̀ ѡ҆брѣто́сте спосо́бствꙋющꙋю ва́мъ по́мощь, во всѐ человѣ́чество ѡ҆бо́лкшагосѧ. Тѣ́мже на ᲂу҆́ды ссѣка́еми: и҆ ѻ҆гню̀ приближа́ющесѧ веселѧ́стесѧ."
 },
 {
  "type": "TEXT",
  "value": "Бг҃оро́диченъ: Распѧ́тїе твоѐ зрѧ́щи пречⷭ҇таѧ, вопїѧ́ше: сн҃е, что̀ зри́мое стра́нное видѣ́нїе; и҆́же стра̑сти болѧ́щихъ и҆сцѣлѧ́ѧй, ка́кѡ стрⷭ҇ть хрⷭ҇тѐ терпи́ши новѣ́йшꙋю; что́ ти вразѝ возда́ша бл҃года́телю, за нѧ́же бл҃года́ть прїѧ́ша;"
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, сп҃сѝ лю́ди твоѧ̑ бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе."
 },
 {
  "type": "TEXT",
  "value": "Рꙋкописа́нїе пречⷭ҇таѧ, прегрѣше́нїй мои́хъ копїе́мъ расто́ргни, ро́ждшагѡсѧ ра́ди и҆з̾ безсѣ́меннагѡ твоегѡ̀ чре́ва: въ кни́зѣ мѧ̀ написа́ти сподо́би и҆збра́нныхъ, прибѣга́ющаго къ бж҃е́ственномꙋ покро́вꙋ твоемꙋ̀. Два́жды."
 },
 {
  "type": "TEXT",
  "value": "Ѡ҆чи́сти хрⷭ҇тѐ, рабы̑ твоѧ̑ мл҃твами ро́ждшїѧ тѧ̀, и҆ низпослѝ ꙗ҆́кѡ є҆ди́нъ бл҃гъ согрѣше́нїй проще́нїе: ты́ бо є҆сѝ сп҃съ, и҆ и҆зба́витель всѣ̑мъ надѣ́ющымсѧ на тѧ̀."
 },
 {
  "type": "TEXT",
  "value": "Оу҆мерщвле́на мѧ̀ страстьмѝ пречⷭ҇таѧ дв҃о, ꙗ҆́же жизнода́вца ро́ждшаѧ, ѡ҆живѝ ны́нѣ твои́ми мл҃твами, и҆ побѣди́телѧ ꙗ҆ви́ мѧ на врага̀ ѕла́го: тѧ́ бо є҆ди́нꙋ и҆́мамы къ бг҃ꙋ помо́щницꙋ на́шꙋ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Проидо́ша ꙗ҆́кѡ черто́гъ пе́щный пла́мень нестерпи́мый, и҆̀же за бл҃гоче́стїе и҆ногда̀ ѻ҆́троцы ст҃і́и показа́вшесѧ ꙗ҆́вѣ, и҆ согла́снѡ воспѣва́юще, пѣ́снь поѧ́хꙋ: ѻ҆тцє́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "Влⷣка сы́й ѿ раба̀ прїѧ́тъ і҆и҃се мо́й, ᲂу҆даре́нїе, свободи́ти мѧ̀ хотѧ́й порабоще́ннаго врагꙋ̀, на крⷭ҇тѣ́ же пригво́ждсѧ сп҃са́еши мѧ̀ пою́ща: и҆́же ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Потрѧсе́сѧ всѧ̀ тва́рь, распина́емꙋ тѝ бл҃гоꙋтро́бне гдⷭ҇и, копїе́мъ пробода́емꙋ тѝ, вра́гъ всетѣле́снꙋю прїѧ́тъ ꙗ҆́звꙋ, ᲂу҆ѧ́звенный же а҆да́мъ и҆сцѣлѣ̀, вопїѧ̀: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Мч҃нченъ: Крⷭ҇то́мъ ѡ҆гражде́нное страстоте́рпєцъ во́инство сла́вное, ѡ҆полчє́нїѧ вра̑жїѧ погꙋбѝ бл҃года́тїю, и҆ побѣ́ды вѣнцы̀ прїѧ́тъ, вопїѧ̀: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Мч҃нченъ: Ѻ҆гнѧ̀ си́льнѣйше стѧжа́вше страда́льцы произволе́нїе, не ѡ҆па́льшесѧ ѻ҆гню̀ прїѡбща́ющесѧ, но попали́сте ѕлоче́стїѧ лꙋка́вꙋю ве́щь, вопїю́ще: ѻ҆тє́цъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Ржⷭ҇тво̀ твоѐ дв҃о, пресла́внѡ вѣ́ки породѝ: и҆ воздви́женъ на крⷭ҇тъ, па́дшыѧ совоздви́же, и҆ нбⷭ҇ныѧ жи́тели показа̀ вопїю́щыѧ: ѻ҆тцє́въ бж҃е бл҃гослове́нъ є҆сѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Тебѐ ᲂу҆́мнꙋю бцⷣе, пе́щь разсмотрѧ́емъ вѣ́рнїи: ꙗ҆́коже бо ѻ҆́троки сп҃сѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ, и҆ препросла́вленъ."
 },
 {
  "type": "TEXT",
  "value": "Ꙗ҆́кѡ и҆сто́чника жи́зни ро́ждшаѧ, ᲂу҆ме́ршꙋю мою̀ дꙋ́шꙋ живоно́сною десни́цею, пречⷭ҇таѧ, воскр҃сѝ, и҆ вопи́ти сподо́би во ᲂу҆миле́нїи се́рдца моегѡ̀: прехва́льный ѻ҆тцє́въ бж҃е бл҃гослове́нъ є҆сѝ.Два́жды."
 },
 {
  "type": "TEXT",
  "value": "Но́въ а҆да́мъ ѿ чи́стыхъ крове́й твои́хъ бы́ти и҆зво́лилъ є҆́сть, и҆́же пре́жде вѣ̑къ бг҃ъ. Є҆го́же ны́нѣ молѝ, ѡ҆бетша́вшаго мѧ̀ ѡ҆бнови́ти, зовꙋ́ща: прехва́льный ѻ҆тє́цъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Гнѣ́ва пꙋте́мъ вра́гъ приходѧ̀, восхи́тити хотѧ̀ неща́днѡ дꙋ́шꙋ мою̀ смире́ннꙋю, сегѡ̀ совѣ́ты, пречⷭ҇таѧ, разрꙋшѝ: и҆ пою́ща мѧ̀ ᲂу҆ще́дри: восхвалѧ́емый ѻ҆тцє́въ бж҃е бл҃гослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Чꙋ́да преесте́ственнагѡ показа̀ ѡ҆́бразъ, ѻ҆гнеро́снаѧ пе́щь дре́вле: ѻ҆́гнь бо не ѡ҆палѝ ю҆́ныѧ дѣ́ти, хрⷭ҇то́во ꙗ҆влѧ́ѧ безсѣ́менное ѿ дв҃ы бж҃е́ственное ржⷭ҇тво̀. Тѣ́мъ воспѣва́юще воспои́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки"
 },
 {
  "type": "TEXT",
  "value": "Ра́спѧтъ бы́лъ є҆сѝ на крⷭ҇тѣ̀ во́лею, и҆́же ма́нїемъ нб҃о простры́й: гвоздьми́ же пригвозди́сѧ, ᲂу҆праздни́ти хотѧ̀ поползнове́нїе стра́стное первозда́ннагѡ а҆да́ма. Тѣ́мъ воспѣва́юще пое́мъ: да бл҃гослови́тъ тва́рь всѧ́каѧ гдⷭ҇а: и҆ превозно́ситъ є҆го̀ во вѣ́ки."
 },
 {
  "type": "TEXT",
  "value": "Є҆гда́ тѧ ка́менѧ на ка́мени каменосерде́чный собо́ръ воздви́же, го́ры поколеба́шесѧ. Землѧ̀ потрѧсе́сѧ, сло́ве бж҃їй: и҆ дꙋ́шы коле́блємыѧ ᲂу҆тверди́шасѧ къ бж҃е́ственнѣй жи́зни, вопїю́щыѧ всегда̀, да бл҃гослови́тъ тва́рь всѧ́каѧ гдⷭ҇а, и҆ превозно́ситъ є҆го̀ во вѣ́ки."
 },
 {
  "type": "TEXT",
  "value": "Мч҃нченъ: И҆стка́ша ѻ҆де́ждꙋ сп҃си́тельнꙋю себѣ̀ ꙗ҆́вѣ ст҃і́и страстоте́рпцы: въ наготѣ̀ тѣле́снѣй стра́ждꙋще терпѣли́внѡ, и҆ посы́панїе ра́намъ прїе́млюще. Тѣ́мъ воспѣва́юще пою́тъ: да бл҃гослови́тъ тва́рь всѧ́каѧ гдⷭ҇а, и҆ превозно́ситъ є҆го̀ во вѣ́ки."
 },
 {
  "type": "TEXT",
  "value": "Мч҃нченъ: Ноготьмѝ неми́лостивнѡ страстоте́рпцы стрꙋ́жеми, и҆ неща́днѡ на ᲂу҆́ды ссѣца́еми, и҆ ра́намъ всѧ́чєскимъ прїѡбща́ющесѧ, и҆стꙋка̑ннымъ не пожро́ша, мꙋ́жества же столпѝ вѣ̑рнымъ ꙗ҆ви́шасѧ: бл҃гослови́те хрⷭ҇та̀ дѣла̀ всѧ̑, зовꙋ́ще, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Да тѧ̀ преѡгорчева́ѧй безꙋ́мный собо́ръ: ꙗ҆́коже возмнѧ́ше ѿ землѝ взѧ́ти тѧ̀: безча́дна бы́хъ и҆ смꙋща́юсѧ, и҆ ма́терски се́рдцемъ болѣ́знꙋю, неискꙋсомꙋ́жнаѧ вопїѧ́ше и҆ногда̀: на крⷭ҇тѣ̀ ви́дѧщи тѧ̀ воздви́жена: съ не́юже тва́рь сла́витъ тѧ̀, всѣ́хъ и҆зба́вителѧ і҆и҃се во вѣ́ки."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Въ пещѝ ѻ҆́троцы і҆и҃лєвы, ꙗ҆́коже въ горни́лѣ добро́тою бл҃гоче́стїѧ, чистѣ́е зла́та блеща́хꙋсѧ, глаго́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Просвѣти́ ми ѻ҆́чи сердє́чныѧ, ꙗ҆́же две́рь свѣ́та чⷭ҇таѧ, ѻ҆́блакъ страсте́й, и҆ тьмꙋ̀ глꙋбо́кꙋю разгонѧ́ющи, да пою̀: всѧ̑ дѣла̀ гдⷭ҇нѧ гдⷭ҇а по́йте, и҆ превозноси́те є҆го̀ во вѣ́ки. Два́жды."
 },
 {
  "type": "TEXT",
  "value": "Ѡ҆ всѣ́хъ влⷣчце чⷭ҇таѧ, не преста́й молѧ́щисѧ тебѐ призыва́ющихъ ꙗ҆́кѡ мт҃рь бж҃їю, дв҃о всенепоро́чнаѧ, и҆ вопїю́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Сп҃се́нїѧ винꙋ̀ хрⷭ҇та̀ неизрече́ннѡ ро́ждшаѧ, молѝ ѡ҆ всѣ́хъ вопїю́щихъ прилѣ́жнѡ дв҃о всепѣ́таѧ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "HEADER",
  "value": "Та́же пое́мъ пѣ́снь бцⷣы:"
 },
 {
  "type": "TEXT",
  "value": "Вели́читъ дꙋша̀ моѧ̀ гдⷭ҇а: И҆ покло́ны."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Неизглаго́ланное дв҃ы та́инство: нб҃о бо сїѧ̀, и҆ прⷭ҇то́лъ херꙋві́мскїй, и҆ свѣтоно́сный черто́гъ показа́сѧ. Хрⷭ҇та̀ бг҃а вседержи́телѧ. Сїю̀ бл҃гоче́стнѡ ꙗ҆́кѡ бцⷣꙋ велича́емъ."
 },
 {
  "type": "TEXT",
  "value": "Ꙗ҆́коже ви́дѣ тѧ̀ дре́вле на дре́вѣ повѣ́шена сп҃се, зе́млю повѣ́сившаго на вода́хъ безмѣ́рныхъ, разбо́йникъ бл҃горазꙋ́мный, вѣ́рнѡ вопїѧ́ше тѝ: помѧни́ мѧ, съ ни́мже бл҃гоче́стнѡ твоѧ̑ страда̑нїѧ прославлѧ́емъ."
 },
 {
  "type": "TEXT",
  "value": "Распина́емь поколеба́лъ є҆сѝ землѝ ѡ҆снова̑нїѧ, копїе́мъ же пробода́емь и҆сточа́еши безсме́ртныѧ ка̑пли, кро́вь и҆ во́дꙋ, и҆́миже человѣ́чество ѡ҆чи́стилъ є҆сѝ ѿ страсте́й і҆и҃се: тѣ́мже тѧ̀ воспѣва́юще велича́емъ."
 },
 {
  "type": "TEXT",
  "value": "Мч҃нченъ: Веселѧ́хꙋсѧ въ мꙋче́нїихъ ст҃і́и, са́ми себѐ поѡщрѧ́юще ꙗ҆́коже на сла́дость, до́блїи: ста́немъ, вопїю́ще: сѐ ѿве́рзе по́прище хрⷭ҇то́съ, вѣнцы̀ ны́нѣ подае́тъ тѣ̑мъ, и҆̀хже возлюбѝ."
 },
 {
  "type": "TEXT",
  "value": "Мч҃нченъ: Просвѣща́етсѧ всѧ́ко вѣ́рныхъ є҆ди́нственное торжество̀, страда̑нїѧ почита́ющее всѣ́хъ непобѣди́мыхъ мч҃нкъ, и҆ тьмы̑ болѣ́зней: и҆́хже ра́ди неболѣ́зненныѧ сподо́бишисѧ сла́дости и҆ жи́зни, и҆ присносꙋ́щнаго наслажде́нїѧ."
 },
 {
  "type": "TEXT",
  "value": "Бг҃оро́диченъ: Чл҃вѣколю́бца сло́ва неизрече́ннѡ поро́ждшаѧ, є҆го́же зрѧ́щи ѻ҆трокови́ца ѿ человѣ̑къ во́лею стра́ждꙋща, что̀ сїѐ, вопїѧ́ше; бг҃ъ безстра́стенъ стра́сть прїе́млетъ: ꙗ҆́кѡ да ѿ страсте́й и҆зба́витъ вѣ́рою покланѧ́ющихсѧ є҆мꙋ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆́бразъ чи́стагѡ ржⷭ҇тва̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь, да тѧ̀ бцⷣе непреста́ннѡ велича́емъ."
 },
 {
  "type": "TEXT",
  "value": "Возмѝ тѧ́жкое бре́мѧ мои́хъ согрѣше́нїй, бцⷣе всепѣ́таѧ, и҆ легча́йшее и҆́го сн҃а и҆ бг҃а твоегѡ̀ сподо́би мѧ̀ носи́ти, и҆ по стезѝ ше́ствовати къ го́рнемꙋ соверше́нїю возводѧ́щей. Два́жды."
 },
 {
  "type": "TEXT",
  "value": "Трепе́щꙋ помышлѧ́ѧ, всенепоро́чнаѧ, стра́шный де́нь прише́ствїѧ хрⷭ҇то́ва: всѧ́ бо жи́знь моѧ̀ во грѣсѣ́хъ сконча́сѧ, и҆ страсте́й дꙋша̀ моѧ̀ и҆спо́лнисѧ. Но ᲂу҆ще́дри мѧ̀ и҆ всѧ́кагѡ и҆зба́ви тогда̀ ѡ҆сꙋжде́нїѧ."
 },
 {
  "type": "TEXT",
  "value": "Прїимѝ пречⷭ҇таѧ влⷣчце, непотре́бнагѡ раба̀ твоегѡ̀ молє́нїѧ, и҆ дꙋшѝ моеѧ̀ и҆ тѣ́ла смꙋще́нїе во глꙋбо́кꙋю тишинꙋ̀ преложѝ: ꙗ҆́кѡ да тѧ̀ велича́ю сп҃са́емь."
 }
]