ponomar-pwa/static/data/shared/services/canons/paraclete/tone2/thu.json

[
 {
  "type": "HEADER",
  "value": "Канѡ́нъ ст҃ы̑мъ а҆пⷭ҇лѡмъ, творе́нїе ѳеофа́ново. Гла́съ в҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "Свѣ́та бж҃е́ственнагѡ мо́лнїѧ вѣ́рою бы́вше, свѣтови́днїи сп҃сѡвы а҆пⷭ҇ли, всего́ мѧ просвѣти́те ѡ҆мрача́ема сласте́й че́рностїю, и҆ въ лѣ́ности всѐ моѐ житїѐ проше́дша. Два́жды."
 },
 {
  "type": "TEXT",
  "value": "Оу҆ч҃нцы̀ и҆ дрꙋ́зи хрⷭ҇тѡ́вы, дрꙋ́га мѧ̀ бы́вша врагꙋ̀, ѕлы́хъ ра́ди присвое́нїѧ, ѿ сегѡ́ мѧ и҆збавлѧ́йте сподви́жꙋще мою̀ дꙋ́шꙋ къ любвѝ, возлюби́вшагѡ ро́дъ человѣ́чь бл҃госты́ни ра́ди."
 },
 {
  "type": "TEXT",
  "value": "Смире́ннаѧ дꙋшѐ моѧ̀, пре́жде сме́рти потщи́сѧ пока́ѧтисѧ, и҆ себѐ ᲂу҆мерщвле́ннꙋю пла́чи: да ꙗ҆́кѡ ла́зарѧ четверодне́внаго воскр҃си́вый ꙗ҆́кѡ милосе́рдъ, и҆ тебѐ воскреси́тъ а҆пⷭ҇тѡлъ мольба́ми."
 },
 {
  "type": "TEXT",
  "value": "Бг҃оро́диченъ: Бл҃га́го ро́ждши бг҃а, пречⷭ҇таѧ, всѣ́хъ бл҃готворѧ́щаго, тлѣ́нїемъ содержи́мыхъ, того̀ молѝ пренепоро́чнаѧ, со прⷪ҇ро́ки, и҆ мч҃нки, и҆ а҆пⷭ҇лы, всѣ́хъ и҆зба́вити ѿ напа́стей."
 },
 {
  "type": "HEADER",
  "value": "И҆́нъ канѡ́нъ ст҃о́мꙋ и҆ вели́комꙋ чꙋдотво́рцꙋ мѷроточи́вомꙋ нїкола́ю, гла́съ в҃, творе́нїе і҆ѡ́сифово, є҆гѡ́же краегране́сїе:"
 },
 {
  "type": "TEXT",
  "value": "Мольбꙋ̀ любе́знꙋ нїко́лае прїимѝ."
 },
 {
  "type": "TEXT",
  "value": "І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ."
 },
 {
  "type": "TEXT",
  "value": "Всегда̀ бж҃е́ственномꙋ прⷭ҇то́лꙋ бл҃года́ти предстоѧ̀ нїко́лае, бл҃года́ть и҆ млⷭ҇ть дарова́ти моли́сѧ, тебѐ призыва́ющымъ вѣ́рою рабѡ́мъ твои̑мъ."
 },
 {
  "type": "TEXT",
  "value": "На землѝ вели́ка предста́телѧ тѧ̀ показа̀ бг҃ъ бѣ́дствꙋющымъ: тѣ́мже мѝ предста́ни въ нощѝ и҆ во днѝ, сохранѧ́ѧ мѧ̀ ѿ собла̑знъ борца̀."
 },
 {
  "type": "TEXT",
  "value": "Ꙗ҆́коже дневнꙋ́ю ѕвѣздꙋ̀ ᲂу҆вѣ́дѣвъ тѧ̀, твои́ми свѣтоза́рными лꙋча́ми тьмы̀ да и҆зба́влюсѧ и҆скꙋше́нїй, и҆ бѣ́дъ и҆ всѧ́кагѡ грѣха̀, ѻ҆́тче нїко́лае."
 },
 {
  "type": "TEXT",
  "value": "Бг҃оро́диченъ: Тѣле́сныхъ болѣ́зней и҆зба́ви мѧ̀, и҆ дꙋшѝ моеѧ̀ и҆сцѣлѝ недовѣ́дѡмыѧ стрꙋ́пы, и҆ ѻ҆гнѧ̀ вѣ́чнагѡ и҆схити́ мѧ, є҆ди́на бг҃обл҃года́тнаѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Оу҆ч҃тлѧ стѧжа́вше ст҃і́и премⷣрость ѻ҆́ч҃ꙋю дх҃омъ, є҆́ллинскꙋю ѡ҆бꙋи́сте премⷣрость, бг҃ови́дцы досточꙋ́днїи."
 },
 {
  "type": "TEXT",
  "value": "Непло́дїе дꙋшѝ моеѧ̀ разрѣши́те всехва́льнїи, и҆ бл҃гоча́дїе дѣѧ́нїй, въ добродѣ́телехъ приноси́ти сотвори́те, ꙗ҆́кѡ сло́ва самови́дцы достобл҃же́ннїи."
 },
 {
  "type": "TEXT",
  "value": "Лю́тѣ мѧ̀ ᲂу҆ѧде́на ны́нѣ ꙗ҆дови́тымъ ᲂу҆грызе́нїемъ вра́жїимъ, и҆сцѣлѝ мольба́ми а҆пⷭ҇тѡлъ твои́хъ, бл҃годѣ́телю всѣ́хъ многомлⷭ҇тиве."
 },
 {
  "type": "TEXT",
  "value": "Бг҃оро́диченъ: Бг҃а пребл҃га́го ᲂу҆молѝ пречⷭ҇таѧ, со а҆пⷭ҇лы всѣ́ми, ѿ всѧ́кагѡ вре́да, и҆ ѡ҆бстоѧ́нїѧ, и҆ бѣ́дъ и҆зба́витисѧ чтꙋ́щымъ тѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Оу҆твердѝ на́съ въ тебѣ̀ гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀."
 },
 {
  "type": "TEXT",
  "value": "И҆сцѣле́нїй и҆сто́чникъ сы́й ст҃е, стра̑сти ᲂу҆врачꙋ́й дꙋшѝ моеѧ̀, и҆ жи́знь мою̀ соблюдѝ, невре́дна мѧ̀ сохранѧ́ѧ раба̀ твоего̀."
 },
 {
  "type": "TEXT",
  "value": "Оу҆ма̀ моегѡ̀ побѣжде́нїе и҆справлѧ́ѧ, ѿ вре́да ви́димыхъ и҆ неви́димыхъ борю́щихъ мѧ̀ сп҃са́й, ꙗ҆́кѡ предста́тель мо́й вели́кїй нїко́лае."
 },
 {
  "type": "TEXT",
  "value": "И҆́же є҆ди́нъ бл҃гі́й тѧ̀ бл҃га застꙋ́пника человѣ́кѡмъ дадѐ бл҃же́нне, сегѡ̀ ра́ди молю̀ тѧ̀: ѿ всѧ́кихъ мѧ̀ ѕѡ́лъ свободѝ."
 },
 {
  "type": "TEXT",
  "value": "Бг҃оро́диченъ: Крѣ́пость моѧ̀ и҆ ра́дость и҆ весе́лїе, и҆ стѣна̀ тве́рдаѧ и҆ предста́тельнице, ты̀ є҆сѝ всенепоро́чнаѧ, и҆скꙋше́нїй и҆ бѣ́дъ и҆збавлѧ́ющи мѧ̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы, не хода́тай ни а҆́гг҃лъ, но са́мъ гдⷭ҇и вопло́щьсѧ, и҆ сп҃слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й гдⷭ҇и."
 },
 {
  "type": "TEXT",
  "value": "А҆́лчꙋща мѧ̀ всегда̀, и҆ гла́домъ и҆ста́ема, сп҃се́нїѧ снѣ́дьми насы́ти є҆ди́не чл҃вѣколю́бче, бж҃е́ственными мольба́ми а҆пⷭ҇тѡлъ, во все́мъ мі́рѣ проповѣ́давшихъ тѧ̀. Два́жды."
 },
 {
  "type": "TEXT",
  "value": "На мо́ре мїрско́е наве́лъ є҆сѝ всѣ́хъ, ꙗ҆́кѡ ко́ни чл҃вѣколю́бче, сла̑вныѧ а҆пⷭ҇лы твоѧ̑, тогѡ̀ возмꙋща́ющыѧ сла̑ныѧ невѣ́рствїѧ го́рькїѧ во́ды."
 },
 {
  "type": "TEXT",
  "value": "Сл҃нца хрⷭ҇та̀ сꙋ́щымъ во тьмѣ̀ возвѣсти́вше, во тьмѣ́ мѧ лежа́ща грѣхо́внѣй просвѣти́те а҆пⷭ҇толи прехва́льнїи, возбранѧ́юще лꙋка̑вымъ помыслѡ́мъ се́рдца моегѡ̀."
 },
 {
  "type": "TEXT",
  "value": "Бг҃оро́диченъ: Всепѣ́таѧ, ꙗ҆́же бг҃а препѣ́таго ро́ждшаѧ, ѡ҆ пою́щихъ тѧ̀ со а҆пⷭ҇лы молѝ, ꙗ҆́кѡ да и҆зба́вимсѧ ѿ грѣхѡ́въ, и҆ бѣ́дъ и҆ ѡ҆ѕлобле́нїѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Пою́ тѧ, слꙋ́хомъ бо гдⷭ҇и ᲂу҆слы́шахъ, и҆ ᲂу҆жасо́хсѧ: до мене́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю многомлⷭ҇тиве."
 },
 {
  "type": "TEXT",
  "value": "Оу҆краси́въ прⷭ҇то́лъ добродѣ́тельми нїко́лае, ᲂу҆краше́нїе ꙗ҆ви́лсѧ є҆сѝ ст҃и́телємъ честно́е. Тѣ́мже тѧ̀ молю̀: нелѣ́потꙋ дꙋшѝ моеѧ̀ ᲂу҆красѝ, и҆ ѿ мїрски́хъ собла̑знъ сп҃си́ мѧ."
 },
 {
  "type": "TEXT",
  "value": "Стезю̀ та́мѡ ведꙋ́щꙋю ᲂу҆гла́ди мѝ пребл҃же́нне: ѿ жите́йскихъ во́лнъ ѡ҆блегчи́ мѧ, и҆ ко приста́нищꙋ жи́зни возведѝ нїко́лае, ѿ тебѐ предста́телѧ вели́кагѡ ѡ҆богати́вшасѧ."
 },
 {
  "type": "TEXT",
  "value": "Глагѡ́лъ бж҃е́ственныхъ послꙋ́шателю, ᲂу҆слы́шавъ моѧ̑ глаго́лы, и҆зба́ви мѧ̀ ѿ бѣсо́вскихъ собла̑знъ, и҆ беззако́нныхъ мꙋже́й, и҆ всѧ́кихъ ѡ҆бстоѧ́нїй находѧ́щихъ, вели́кїй нїко́лае."
 },
 {
  "type": "TEXT",
  "value": "Бг҃оро́диченъ: Ста́ѧ бцⷣе влⷣчце, въ нощи́ мѧ и҆ во днѝ ѡ҆свѧтѝ, и҆ сохранѝ, и҆ наста́ви ко сп҃се́нїю мно́гими грѣхѝ па́дающа, и҆ прило́гми бѣсо́вскими низрѣ́ема."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ хрⷭ҇тѐ бж҃е: тобо́ю бо влⷣко къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы."
 },
 {
  "type": "TEXT",
  "value": "Вели́кїй па́стырь посредѣ̀ волкѡ́въ посла̀ ꙗ҆́кѡ ѻ҆́вцы, бж҃е́ствєнныѧ ᲂу҆ченикѝ своѧ̑, тѣ́хъ претворѧ́ющѧ бж҃їею си́лою креще́нїѧ, и҆ добро́тою слове́съ. Два́жды."
 },
 {
  "type": "TEXT",
  "value": "Бж҃е́ственнымъ свѣ́томъ, ꙗ҆̀же во тьмѣ̀ пре́лести просвѣти́сте а҆пⷭ҇ли сердца̀. Тѣ́мже молю̀ вы̀, ѡ҆темне́наго мѧ̀ сластьмѝ мра́чными, просвѣти́те бг҃облаже́ннїи."
 },
 {
  "type": "TEXT",
  "value": "Ѻ҆каѧ́ннаѧ дꙋшѐ, пре́жде конца̀ потщи́сѧ и҆ пока́йсѧ, гдⷭ҇еви зовꙋ́щи: согрѣши́хъ тѝ влⷣко, простѝ а҆пⷭ҇тѡлъ ра́ди, и҆ сп҃си́ мѧ ꙗ҆́кѡ милосе́рдъ."
 },
 {
  "type": "TEXT",
  "value": "Бг҃оро́диченъ: Свѣ́томъ твои́мъ ѡ҆зарѝ во тьмѣ̀ лежа́ща мѧ̀, свѣ́та жили́ще, и҆ со а҆пⷭ҇лы моли́сѧ пренепоро́чнаѧ, ѿ всѧ́кїѧ нꙋ́жды и҆зба́вити мѧ̀ твои́ми мл҃твами."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Свѣ́та пода́телю, и҆ вѣкѡ́въ тво́рче гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебѐ и҆но́гѡ бг҃а не зна́емъ."
 },
 {
  "type": "TEXT",
  "value": "Зако́на бж҃їѧ и҆спо́лнителю, молѝ бл҃га́го бг҃а, зако́ны бж҃е́ствєнныѧ мѝ соблюда́ти, и҆ беззако́ннꙋющихъ вра̑гъ и҆зми́ мѧ, и҆ бѣсо́вскагѡ вре́да, всебл҃же́нне нїко́лае."
 },
 {
  "type": "TEXT",
  "value": "Ꙗ҆́коже дре́вле предста́въ ст҃е, и҆збавлѧ́ѧ ю҆́ношы трѝ: си́це и҆ менѐ ѿ всѧ́кагѡ грѣха̀ и҆зба́ви твои́ми къ бг҃ꙋ мл҃твами, бг҃омꙋ́дре нїко́лае."
 },
 {
  "type": "TEXT",
  "value": "Сщ҃еннодѣ́лателю хрⷭ҇то́въ, грѣ́шникѡмъ и҆спорꙋ́чниче, вели́кїй чꙋдотво́рче, бл҃года́вца молѝ бг҃а, да не посрами́тъ менѐ въ ча́съ сꙋ́дный."
 },
 {
  "type": "TEXT",
  "value": "Бг҃оро́диченъ: Гдⷭ҇ороди́тельнице чⷭ҇таѧ, ѡ҆блада́ема мѧ̀ мно́гими страстьмѝ, ꙗ҆́кѡ бл҃га̀ предста́вши и҆зба́ви ѿ си́хъ: ꙗ҆́кѡ да тѧ̀ воспѣва́ю дꙋше́ю и҆ се́рдцемъ и҆ ѧ҆зы́комъ, сп҃са́емь."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ."
 },
 {
  "type": "TEXT",
  "value": "И҆̀же во́дꙋ живо́тнꙋю носѧ́ще, та́емꙋю дꙋ́шꙋ мою̀ зно́емъ грѣхо́внымъ молю́сѧ, ᲂу҆ч҃нцы̀ сп҃сѡвы напо́йте."
 },
 {
  "type": "TEXT",
  "value": "Нб҃са̀ мы́слєннаѧ бы́вше, бг҃оза́рнїи а҆пⷭ҇толи, сла́вꙋ бж҃їю и҆сповѣ́дасте неизрече́ннꙋю, ю҆́же ᲂу҆лꙋчи́ти на́мъ всѣ̑мъ моли́тесѧ."
 },
 {
  "type": "TEXT",
  "value": "Въ пꙋчи́нѣ лю́тѣ волнꙋ́ющїйсѧ, къ тебѣ̀ хрⷭ҇тѐ, и҆́же всѣ́хъ ѡ҆корми́телю прихождꙋ̀, ра́ди а҆пⷭ҇тѡлъ твои́хъ, ко сп҃си́тельномꙋ приста́нищꙋ ᲂу҆пра́ви мѧ̀."
 },
 {
  "type": "TEXT",
  "value": "Бг҃оро́диченъ: Со всѣ́ми вы́шними си́лами, со прⷪ҇ро́ки, и҆ а҆пⷭ҇лы, и҆ мч҃нки, ѡ҆ на́съ молѝ сн҃а твоего̀ бг҃оневѣ́сто."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже"
 },
 {
  "type": "TEXT",
  "value": "И҆́же мѵ́рѧнѡмъ бы́въ первопресто́льникъ нїко́лае, и҆ ѡ҆благоꙋха́лъ є҆сѝ вѣ́рныхъ составлє́нїѧ бл҃ги́ми твои́ми дѣѧ́нїи: ѿ ѕлосмра́дна прегрѣше́нїѧ и҆зба́ви мѧ̀."
 },
 {
  "type": "TEXT",
  "value": "Свѣтлѣ́йше со́лнца стѧжа́въ ѻ҆́тче се́рдце, всего́ мѧ просвѣтѝ, и҆скꙋше́нїй и҆ скорбе́й ѿгонѧ́ѧ тьмꙋ̀ нїко́лае."
 },
 {
  "type": "TEXT",
  "value": "Ѿ всѧ́кїѧ и҆зба́ви мѧ̀ тѣсноты̀, простра́нство ꙗ҆́кѡ и҆мѣ́ѧ млⷭ҇ти нїко́лае, тѣ́снымъ ше́ствовати мѧ̀ ᲂу҆крѣпѝ пꙋте́мъ ко гдⷭ҇ꙋ."
 },
 {
  "type": "TEXT",
  "value": "Бг҃оро́диченъ: На всѧ́ко вре́мѧ тебѐ призыва́ю пречⷭ҇таѧ, да ѡ҆брѧ́щꙋ тѧ̀ помо́щницꙋ, и҆з̾има́ющꙋю мѧ̀ ѿ всѧ́кагѡ ѡ҆ѕлобле́нїѧ и҆ стра́шныхъ мꙋ́къ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ."
 },
 {
  "type": "TEXT",
  "value": "Ѻ҆гне́мъ бж҃е́ственнагѡ дх҃а предвозжже́ни бы́вше а҆пⷭ҇ли, пре́лести ᲂу҆́глїе ᲂу҆гаси́сте, бж҃їе же раче́нїе во ᲂу҆мѣ́хъ всѣ́хъ вѣ́рныхъ воспали́сте: тѣ́мже велегла́снѡ ва́съ чти́мъ. Два́жды."
 },
 {
  "type": "TEXT",
  "value": "Мі́ръ возненави́дѣсте, и҆ ꙗ҆̀же въ мі́рѣ, хрⷭ҇та̀ возлюби́сте, въ мі́рѣ пло́тїю человѣ́кѡмъ примѣси́вшасѧ: є҆го́же моли́те бж҃е́ственнїи а҆пⷭ҇толи, ꙗ҆̀же въ житїи́ мѧ всѣ́хъ лю́тыхъ свободи́ти."
 },
 {
  "type": "TEXT",
  "value": "Сꙋдїѐ пра́ведне сердцевѣ́дче, и҆́же є҆ди́нъ сокровє́ннаѧ вѣ́дый моѧ̑ согрѣшє́нїѧ, въ ча́съ сꙋда̀ не ѡ҆сꙋдѝ менѐ, нижѐ ѿсле́ши мѧ̀ во ѻ҆́гнь, мл҃твами а҆пⷭ҇тѡлъ твои́хъ."
 },
 {
  "type": "TEXT",
  "value": "Бг҃оро́диченъ: Ѻ҆гне́мъ бж҃ества̀ не ѡ҆пали́ласѧ є҆сѝ, неизрече́ннѡ ро́ждши дв҃о, бра́кꙋ неискꙋ́сна бы́вши. Тѣ́мже со а҆пⷭ҇лы моли́сѧ чⷭ҇таѧ, вѣ́чнагѡ мѧ̀ пла́мене свободи́ти, тебѐ сла́вѧщаго."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ."
 },
 {
  "type": "TEXT",
  "value": "Ѻ҆гню̀ и҆скꙋше́нїй на всѧ́къ де́нь примѣша́юсѧ, ѻ҆́тче нїко́лае, посредѣ̀ сѣ́тей мимохождꙋ̀, ꙗ҆́коже пти́ца, под̾ тво́й ще́дрый покро́въ притека́ю: невре́дна мѧ̀ сохранѝ, бл҃га́го молѧ̀ бг҃а и҆ гдⷭ҇а."
 },
 {
  "type": "TEXT",
  "value": "Глаго́лы моѧ̑ ᲂу҆слы́шавъ спѣ́шнѡ, ѻ҆́тче нїко́лае, потщи́сѧ прїити́ ми на по́мощь, ѡ҆бꙋрева́емꙋ скорбьмѝ и҆ нꙋ́ждами жите́йскими. И҆ бѣсо́вскими ѡ҆ѕлобле́нїи: ꙗ҆́кѡ да сп҃са́емь пою̀ предста́тельство твоѐ."
 },
 {
  "type": "TEXT",
  "value": "И҆́же дре́вле ꙗ҆́вльсѧ во снѣ̀ царю̀, непови̑нныѧ и҆мꙋ́щыѧ ᲂу҆мре́ти и҆збавлѧ́ѧ, напа́стей мѧ̀ и҆зба́ви находѧ́щихъ всегда̀, и҆ недꙋ̑гъ тѣле́сныхъ, и҆ дꙋше́вныхъ болѣ́зней, ѻ҆́тче нїко́лае."
 },
 {
  "type": "TEXT",
  "value": "Бг҃оро́диченъ: Тебѐ є҆ди́нꙋ пречⷭ҇таѧ и҆мѣ́ю помо́щницꙋ, тебѐ написꙋ́ю мнѣ̀ всѣ́хъ житїѧ̀ храни́тельницꙋ, не пре́зри менѐ раба̀ твоегѡ̀, є҆ди́на предста́тельнице мі́ра, но сп҃си́ мѧ пою́ща: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Тѣлови́днѡ на ва́съ наше́дъ во ѻ҆́гненномъ ви́дѣ прест҃ы́й дх҃ъ, содѣ́ла ꙗ҆́кѡ свѣти̑ла, попалѧ́юща ᲂу҆́бѡ безбо́жїе, просвѣща̑юща же всѧ̑ бл҃гоче́ствꙋющыѧ, бж҃е́ственнїи сло́ва а҆пⷭ҇ли. Два́жды."
 },
 {
  "type": "TEXT",
  "value": "Страстьмѝ лю́тѣ ѡ҆бꙋрева́емое неиспра́вленное се́рдце моѐ и҆сцѣлѝ ще́дре, молю́сѧ: дꙋ́шꙋ мою̀ просвѣтѝ, и҆ ᲂу҆́мъ мо́й напра́ви прекло́ншїйсѧ въ ѕло́бꙋ, ᲂу҆ч҃нкѡ́въ твои́хъ мольба́ми."
 },
 {
  "type": "TEXT",
  "value": "Воздохнѝ дꙋшѐ моѧ̀, и҆ прослези́сѧ прилѣ́жнѡ, и҆ себѐ пре́жде конца̀ воспла́чи, пре́жде да́же не пости́гнетъ тебѐ пла́чь неꙋтѣ́шимый, и҆ возопі́й гдⷭ҇еви: сп҃си́ мѧ млⷭ҇тиве, мл҃твами а҆пⷭ҇лъ твои́хъ."
 },
 {
  "type": "TEXT",
  "value": "Бг҃оро́диченъ: Пе́щь и҆ногда̀ неѡпа́льшаѧ дѣте́й, твоѐ ржⷭ҇тво̀ проѡбража́ше дв҃о всенепоро́чнаѧ. Сегѡ̀ ра́ди молю́ тѧ: со а҆пⷭ҇лы моли́сѧ, со всѣ́ми прⷪ҇ро́ки, ѻ҆гнѧ̀ гее́нны и҆зба́вити мѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Вѧза́ти и҆ рѣша́ти прїи́мъ вла́сть ѿ бг҃а, ѻ҆́тче бг҃омꙋ́дре нїко́лае, ѕѡ́лъ мои́хъ соꙋ́зы разрѣшѝ твои́ми мл҃твами: и҆ бж҃е́ственнѣй мѧ̀ привѧжѝ любвѝ вочл҃вѣ́читисѧ восхотѣ́вшагѡ влⷣки."
 },
 {
  "type": "TEXT",
  "value": "Посѣще́нїемъ твои́мъ бж҃е́ственнымъ во днѝ и҆ въ нощѝ посѣща́й мѧ̀, ᲂу҆глажда́ѧ стезю̀ смире́ннѣй мое́й дꙋшѝ, и҆ сохранѧ́й мѧ̀ ст҃е нїко́лае, неꙋѧ́звлена ѿ находѧ́щихъ лꙋка́вагѡ собла̑знъ."
 },
 {
  "type": "TEXT",
  "value": "Рꙋ́кꙋ мѝ пода́ждь къ бж҃їей по́мощи нїко́лае, и҆ сохранѝ ѿ лю́тагѡ вра́жїѧ ча́ѧнїѧ, и҆́же ю҆́ношы и҆ногда̀ сме́рти го́рькїѧ и҆зба́вилъ є҆сѝ: да почита́ю тѧ̀ ꙗ҆́кѡ бл҃га́го предста́телѧ."
 },
 {
  "type": "TEXT",
  "value": "Є҆гда̀ сѧ́деши бж҃е, на престо́лѣ стра́шнѣмъ сꙋди́ти мі́рꙋ, не вни́ди въ сꙋ́дъ съ рабо́мъ твои́мъ: но ча́сти сподо́би сп҃са́емыхъ, мл҃твами нїкола́а."
 },
 {
  "type": "TEXT",
  "value": "Бг҃оро́диченъ: Па́че є҆стества̀ твои́мъ ржⷭ҇тво́мъ бг҃ороди́тельнице возвели́чила є҆сѝ на́съ ᲂу҆ма́ленныхъ вели́кими неисче́тными ѕлы́ми. Тѣ́мже мо́лимсѧ тѝ пречⷭ҇таѧ: возвели́чи въ на́съ бога̑тыѧ твоѧ̑ млⷭ҇ти."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ: тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "А҆пⷭ҇ли сла́внїи, а҆пⷭ҇ли бл҃же́ннїи, ᲂу҆ч҃нцы̀ сп҃сѡвы, проповѣ́дницы всемꙋ́дрїи, ѿ всѧ́кагѡ мѧ̀ и҆зба́вите вре́да, всѧ́кагѡ гнѣ́ва, всѧ́кагѡ грѣха̀, всѧ́кагѡ ѡ҆бстоѧ́нїѧ, и҆ разли́чныхъ напа́стей. Два́жды."
 },
 {
  "type": "TEXT",
  "value": "Менѐ ѡ҆сꙋжде́ннаго, менѐ неиспра́вленнаго, твоѧ̑ повелѣ̑нїѧ небре́гшаго, и҆ бѣсѡ́вскимъ прельще́нїємъ ᲂу҆мовре́днѡ послѣ́довавша, возвратѝ гдⷭ҇и, мл҃твами а҆пⷭ҇тѡлъ твои́хъ."
 },
 {
  "type": "TEXT",
  "value": "Дꙋ́шꙋ неиспра́вленꙋ приношꙋ̀, и҆ со́вѣсть погребе́нꙋю съ вещмѝ прегрѣше́нїй, и҆ ѡ҆скверне́нное се́рдце, и҆ по́мыслъ ѡ҆калѧ́нъ, вопїю́ ти чл҃вѣколю́бче: а҆пⷭ҇тѡлъ ра́ди ᲂу҆ще́дри мѧ̀ млⷭ҇тїю твое́ю."
 },
 {
  "type": "TEXT",
  "value": "Бг҃оро́диченъ: А҆пⷭ҇ли пречⷭ҇таѧ, твоего̀ сн҃а проповѣ́даша во все́мъ мі́рѣ, бг҃а и҆ человѣ́ка. Тѣ́мже съ ни́ми моли́сѧ, во стра́шномъ днѝ сꙋда̀ и҆зба́витисѧ мꙋ́къ, вѣ́рою тебѐ велича́ющымъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѿ бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ."
 },
 {
  "type": "TEXT",
  "value": "Сщ҃е́нства пра́вило, и҆ кро́тости ѡ҆́бразъ, вѣ́мъ тѧ̀ нїко́лае мꙋ́дре: на мѧ̀ возстаю́щꙋю бꙋ́рю по всѧ̑ дни̑ страсте́й и҆ бѣ́дъ, ᲂу҆кротѝ мл҃твами твои́ми, и҆ соблюди́ мѧ неврежде́нна сщ҃е́ннѣйшїй ѻ҆́тче."
 },
 {
  "type": "TEXT",
  "value": "Ꙗ҆́кѡ сщ҃е́ннѣйшїй сосꙋ́дъ прїѧ́тенъ бж҃е́ственнагѡ мѵ́ра, млⷭ҇тивнѡ и҆злїѧ́вшагѡсѧ на зе́млю, всѣ́хъ на́съ ѡ҆бл҃гоꙋха́й сердца̀, мѵ́рѧнѡмъ бы́въ мꙋ́дре первост҃и́тель, и҆скꙋше́нїѧ ѕлово́нїе ѿгонѧ̀ мл҃твами твои́ми."
 },
 {
  "type": "TEXT",
  "value": "Ты̀ мою̀ ᲂу҆тѣ́ши ѻ҆́тче дꙋ́шꙋ, неви́димѡ мно́жествомъ ѡ҆ѕло́бленнꙋю лю́тѣ: ты̀ безмѣ̑рнаѧ мѝ ᲂу҆кротѝ и҆скꙋшє́нїѧ, ꙗ҆̀же льсти́вый подви́жетъ мѝ во днѝ и҆ въ нощѝ, ꙗ҆́кѡ бл҃гі́й мо́й предста́тель ꙗ҆влѧ́ѧсѧ нїко́лае."
 },
 {
  "type": "TEXT",
  "value": "Стра́шный влⷣчнїй де́нь при две́рехъ приближа́етсѧ, что̀ сотвори́ши ѽ дꙋшѐ, грѣхѡ́въ мно́жество и҆мꙋ́щи; потщи́сѧ ᲂу҆́бѡ пре́жде конца̀, и҆ возопі́й гдⷭ҇ꙋ прилѣ́жнѡ: мл҃твами нїкола́а ст҃и́телѧ твоегѡ̀ сп҃си́ мѧ."
 },
 {
  "type": "TEXT",
  "value": "Бг҃оро́диченъ: Пощади́ мѧ гдⷭ҇и, пощадѝ, є҆гда̀ хо́щеши сꙋди́ти и҆ не ѡ҆сꙋдѝ менѐ во ѻ҆́гнь, нижѐ ꙗ҆́ростїю твое́ю ѡ҆бличѝ менѐ: мо́литъ тѧ̀ дв҃а ро́ждшаѧ тѧ̀ хрⷭ҇тѐ, и҆ а҆пⷭ҇лъ мно́жество, и҆ сла́вный нїкола́й."
 }
]