ponomar-pwa/static/data/shared/services/canons/paraclete/tone3/mon.json

[
 {
  "type": "HEADER",
  "value": "Канѡ́нъ ᲂу҆мили́тельный ко гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ ст҃ы̑мъ є҆гѡ̀ мч҃нкѡмъ. Творе́нїе кѵ́ръ і҆ѡ́сифа. Гла́съ г҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Фараѡ́ни колесни̑цы глꙋбино́ю покры́въ гдⷭ҇и, мо́ре разве́рглъ є҆сѝ: и҆ сп҃слъ є҆сѝ пѣ́сньми пою́щыѧ тѧ̀, лю́ди і҆и҃льтєскїѧ."
 },
 {
  "type": "TEXT",
  "value": "Прегрѣше́нїй тьмы̀ и҆зба́ви мѧ̀ безгрѣ́шне, ꙗ҆̀же без̾ ᲂу҆ма̀ содѣ́ѧхъ, подаѧ́ ми сле́зы ᲂу҆миле́нїѧ, ꙗ҆́коже и҆ногда̀ блꙋдни́цѣ."
 },
 {
  "type": "TEXT",
  "value": "Бы́вша мѧ̀ верте́пъ разбо́йникѡмъ безмѣ́стными дѣѧ́нїи, добродѣ́тельми ꙗ҆вѝ чл҃вѣколю́бче хра́мъ тво́й, и҆́же во́лею рожде́йсѧ въ верте́пѣ."
 },
 {
  "type": "TEXT",
  "value": "Мч҃нченъ: Ѡ҆кормле́нїемъ дх҃а бж҃е́ственнагѡ претеко́сте мꙋче́нїй бꙋ́рю, бг҃одохнове́ннїи мч҃нцы, и҆ къ бж҃е́ственномꙋ достиго́сте приста́нищꙋ."
 },
 {
  "type": "TEXT",
  "value": "Мч҃нченъ: Просвѣти́вшесѧ бл҃года́тїю дх҃а мч҃нцы, тьмы̀ глꙋбоча́йшїѧ і҆дѡлобѣ́сїѧ ᲂу҆бѣжа́сте, ра́дꙋющесѧ прехва́льнїи."
 },
 {
  "type": "TEXT",
  "value": "Бг҃оро́диченъ: Всест҃а́ѧ и҆ пречⷭ҇таѧ, грѣ̑шнымъ помо́щнице, па́дающымъ и҆справле́нїе, покаѧ́нїе мѝ да́ждь ᲂу҆миле́нїѧ многосогрѣши́вшемꙋ."
 },
 {
  "type": "HEADER",
  "value": "Дрꙋгі́й канѡ́нъ ст҃ы̑мъ безплѡ́тнымъ а҆́гг҃лѡмъ, гла́съ г҃, творе́нїе ѳеофа́ново, є҆гѡ́же краегране́сїе:"
 },
 {
  "type": "TEXT",
  "value": "Творю̀ тре́тїе пѣ́нїе безплѡ́тнымъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пѣ́снь но́вꙋю пои́мъ лю́дїе, ѿ дв҃ы ро́ждшемꙋсѧ во сп҃се́нїе на́ше, и҆ є҆ди́но сотво́ршемꙋ съ нбⷭ҇ными зємна́ѧ, ꙗ҆́кѡ просла́висѧ."
 },
 {
  "type": "TEXT",
  "value": "Безнача́ленъ свѣ́тъ, и҆ пода́теленъ свѣтоѧвле́нїѧ сы́й всегѡ̀ хрⷭ҇тѐ бж҃е, моѐ помышле́нїе просвѣтѝ предста́тельствомъ твои́хъ си́лъ."
 },
 {
  "type": "TEXT",
  "value": "Ра́дꙋющесѧ а҆гг҃лолѣ́пнѡ, всебога́тымъ прича́стїемъ а҆́гг҃льстїи ли́цы, твои́ми сп҃се кра́сными сїѧ́нїи та́йнѡ ѡ҆блиста́ютсѧ."
 },
 {
  "type": "TEXT",
  "value": "Ꙗ҆́кѡ бл҃гі́й животво́рецъ бл҃годѣ́тельный дх҃ъ и҆сходѧ́й ѿ ѻ҆ц҃а̀, нбⷭ҇ныѧ си̑лы ᲂу҆твердѝ неприкоснове́нными бж҃е́ственными бл҃года́тьми."
 },
 {
  "type": "TEXT",
  "value": "Бг҃оро́диченъ: Чинонача́льниче бж҃їй гаврїи́ле безпло́тныхъ ликѡ́въ, и҆ ны́нѣ пребога́те, гла́съ ра́достенъ ѡ҆бра́дованнѣй возопі́й: ра́дꙋйсѧ всенепоро́чнаѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твердѝ менѐ гдⷭ҇и, є҆ди́не многомлⷭ҇тиве, и҆ простри́ ми рꙋ́кꙋ ꙗ҆́кѡ петро́ви, и҆ сп҃си́ мѧ."
 },
 {
  "type": "TEXT",
  "value": "Ꙗ҆́коже петра̀ погрꙋжа́ема сп҃слъ є҆сѝ чл҃вѣколю́бче: та́кѡ и҆ менѐ и҆з̾ глꙋбины̀ прегрѣше́нїй мои́хъ возведѝ."
 },
 {
  "type": "TEXT",
  "value": "Оу҆мертви́ мѧ льсти́вый страстьмѝ ᲂу҆би́въ: ты́ же мѧ̀ жизнода́телю покаѧ́нїѧ ѡ҆́бразы ѡ҆живѝ."
 },
 {
  "type": "TEXT",
  "value": "Мч҃нченъ: Ѻ҆гне́мъ веще́ственнымъ мч҃нцы непра́веднѡ ѡ҆палѧ́еми, невеще́ственнѣ невеще́ственнагѡ воспали́стесѧ жела́нїемъ."
 },
 {
  "type": "TEXT",
  "value": "Мч҃нченъ: Мч҃нцы растерза́еми, растерза̑нїѧ и҆ ловлє́нїѧ погꙋби́ша льсти́вагѡ, и҆ вѣнцє́въ сподо́бишасѧ."
 },
 {
  "type": "TEXT",
  "value": "Бг҃оро́диченъ: Мр҃і́е гдⷭ҇оимени́таѧ, мно́гими ѡ҆блада́ема мѧ̀ страстьмѝ дꙋшетлѣ́нными, свободѝ мл҃твами твои́ми."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Лꙋ́къ сокрꙋши́лъ є҆сѝ вра́жїи, и҆ щиты̀ сте́рлъ є҆сѝ крѣ́постїю влⷣко хрⷭ҇тѐ, ᲂу҆твержде́нїе на́ше, ст҃ъ є҆сѝ гдⷭ҇и."
 },
 {
  "type": "TEXT",
  "value": "Стрꙋи̑ текꙋ́щыѧ и҆ рѣ́ки бл҃гости, ꙗ҆ви́лъ є҆сѝ бл҃гі́й а҆́гг҃льскїѧ ли́ки, сокрове́ннагѡ твоегѡ̀ та́инства заре́ю сїѧ́ющихъ."
 },
 {
  "type": "TEXT",
  "value": "Да пока́жеши ꙗ҆́вѣ сокрѡ́вища бога́тства твоегѡ̀, и҆ крѣ́пости влⷣко хрⷭ҇тѐ, твоеѧ̀ сла́вы прича́стники ᲂу҆́мныѧ си̑лы приве́лъ є҆сѝ."
 },
 {
  "type": "TEXT",
  "value": "Съ тре́петомъ тебѣ̀ слꙋже́бнѣ а҆́гг҃льскїѧ свѣ́тлѡсти предстоѧ́ще, пою́тъ при́снѡ твою̀ си́лꙋ хрⷭ҇тѐ неисчетноси́льнꙋю."
 },
 {
  "type": "TEXT",
  "value": "Бг҃оро́диченъ: Всего̀ прїѧ́тъ и҆з̾ тебѐ неизмѣ́ннѡ чл҃вѣ́ка, и҆́же влⷣка сегѡ̀ всегѡ̀ бг҃ома́ти, и҆ тебѐ и҆сто́чника бл҃года́ти ꙗ҆ви́лъ є҆́сть."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Є҆да̀ въ рѣка́хъ прогнѣ́ваешисѧ гдⷭ҇и; є҆да̀ въ рѣка́хъ ꙗ҆́рость твоѧ̀, и҆лѝ въ мо́ри ᲂу҆стремле́нїе твоѐ;"
 },
 {
  "type": "TEXT",
  "value": "Разрѣшѝ соꙋ́зы страсте́й мои́хъ гдⷭ҇и, покаѧ́нїемъ мѧ̀ свѧза́въ, и҆ прича́стника ꙗ҆вѝ бл҃ги́хъ твои́хъ."
 },
 {
  "type": "TEXT",
  "value": "Возсїѧ́й мѝ свѣтѡза́рныѧ покаѧ́нїѧ ѡ҆́бразы, со́лнце сы́й хрⷭ҇тѐ, ѕѡ́лъ мои́хъ ѿгонѧ́ѧ но́щь глꙋбо́кꙋю."
 },
 {
  "type": "TEXT",
  "value": "Мч҃нченъ: Ꙗ҆ви́стесѧ мꙋ́дрїи страда́льцы, ꙗ҆́коже ᲂу҆́глїе ве́щь безбо́жїѧ попалѧ́юще, и҆ сꙋ́щыѧ во тьмѣ̀ просвѣща́юще."
 },
 {
  "type": "TEXT",
  "value": "Мч҃нченъ: Ме́ртвости хрⷭ҇то́вѣ ᲂу҆подо́бистесѧ мч҃нцы, болѣ́знемъ примѣси́вшесѧ разли́чнымъ: тѣ́мже бж҃е́ственнꙋю жи́знь наслѣ́довасте."
 },
 {
  "type": "TEXT",
  "value": "Бг҃оро́диченъ: Да́ждь мѝ чⷭ҇таѧ и҆́стинное покаѧ́нїе, ᲂу҆ти́ши страсте́й мои́хъ молвꙋ̀, согрѣша́ющымъ предста́тельнице."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Стра́нна и҆ неизрече́нна ржⷭ҇тва̀ твоегѡ̀ та́йна: ᲂу҆слы́шахъ слꙋ́хъ тво́й, и҆ ᲂу҆боѧ́хсѧ, и҆ веселѧ́сѧ вопїю́ ти: си́лѣ твое́й сла́ва чл҃вѣколю́бче."
 },
 {
  "type": "TEXT",
  "value": "Ѻ҆́блацы и҆́же трисо́лнечное свѣтозаре́нїе прїе́млюще, принесо́стесѧ бж҃е́ственнымъ хотѣ́нїемъ, трⷪ҇ческаѧ ᲂу҆крашє́нїѧ, ѡ҆кормлѧ́еми си́лою дх҃а."
 },
 {
  "type": "TEXT",
  "value": "Въ мі́ръ посыла́ютсѧ къ хотѧ́щымъ вѣ́ровати тебѣ̀, ꙗ҆́коже храни́телїе сп҃се́нїѧ бл҃гочести́выхъ а҆́гг҃ли, соблюда́юще сп҃се рабы̑ твоѧ̑."
 },
 {
  "type": "TEXT",
  "value": "Просвѣща́ютсѧ та́йнѡ а҆́гг҃ли, чи́стымъ приближе́нїемъ, и҆ бг҃онача́льнымъ твои́мъ ѡ҆сїѧ́нїемъ: си́лѣ твое́й сла́ва, зовꙋ́ще, чл҃вѣколю́бче."
 },
 {
  "type": "TEXT",
  "value": "Бг҃оро́диченъ: Ра́бски моле́бникъ ны́нѣ прихождꙋ̀ въ кро́въ тво́й пренепоро́чнаѧ: и҆зба́ви мѧ̀ бг҃ороди́тельнице страсте́й смꙋще́нїѧ, ꙗ҆́же безстра́стїю вино́внаго ро́ждшаѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́томъ твои́мъ невече́рнимъ хрⷭ҇тѐ, ѡ҆зарѝ бж҃е смире́ннꙋю мою̀ дꙋ́шꙋ, и҆ наста́ви на стра́хъ тво́й: занѐ свѣ́тъ повелѣ̑нїѧ твоѧ̑."
 },
 {
  "type": "TEXT",
  "value": "Не поста́ви менѐ на́га ѿ дѣ́лъ до́брыхъ, на сꙋди́щи твое́мъ чл҃вѣколю́бче: но во ѻ҆де́ждꙋ бж҃е́ственныхъ дѣѧ́нїй ѡ҆блецы̀ покаѧ́нїемъ."
 },
 {
  "type": "TEXT",
  "value": "Оу҆ѧзви́хсѧ ѻ҆рꙋ́жїемъ страсте́й, и҆ въ ро́въ ѿча́ѧнїѧ впадо́хъ: не пре́зри влⷣко, но и҆сцѣли́ мѧ ѡ҆браще́нїѧ бы́лїемъ."
 },
 {
  "type": "TEXT",
  "value": "Мч҃нченъ: И҆ ногтьмѝ стрꙋ́жеми лю́тѣ, и҆ мече́мъ страда́льцы ᲂу҆бива́еми, и҆ ра́нами и҆знꙋрѧ́еми, не поклони́сте и҆стꙋка̑ннымъ кѡлѣ́на."
 },
 {
  "type": "TEXT",
  "value": "Мч҃нченъ: Мі́ръ страда́ньми ва́шими красꙋ́етсѧ при́снѡ ст҃і́и мч҃нцы: премі́рное ꙗ҆́кѡ ѡ҆брѣто́сте пребыва́нїе со а҆́гг҃лы."
 },
 {
  "type": "TEXT",
  "value": "Бг҃оро́диченъ: Ꙗ҆́же є҆ди́на сло́вомъ на землѝ, пло́тїю сло́во ро́ждши, и҆ дв҃а пребы́вши, безслове́сныхъ мѧ̀ и҆зба́ви дѣѧ́нїѧ, ꙗ҆́кѡ да словесы̀ честны́ми воспѣва́ю тѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: На землѝ неви́димый ꙗ҆ви́лсѧ є҆сѝ, и҆ человѣ́кѡмъ во́лею сожи́лъ є҆сѝ непостижи́мый, и҆ къ тебѣ̀ ᲂу҆́тренююще, воспѣва́емъ тѧ̀ чл҃вѣколю́бче."
 },
 {
  "type": "TEXT",
  "value": "Со ѻ҆ц҃е́мъ сн҃а и҆ дх҃а, трисїѧ́ннымъ свѣ́томъ просвѣ́щшесѧ вѣ́рнїи, воспои́мъ є҆ди́но бж҃ество̀, со а҆́гг҃льскими во́инствы."
 },
 {
  "type": "TEXT",
  "value": "Свѣщы̀ соѡбраща́ющыѧсѧ, незаходи́мымъ сїѧ́нїемъ бж҃ества̀ пребж҃е́ственнагѡ, проѧвле́ннѣ ѡ҆бога́щшесѧ, а҆́гг҃льстїи чи́ни проповѣ́даютъ."
 },
 {
  "type": "TEXT",
  "value": "Є҆ди́но нача́ло пребезнача́льное честѝ серафі́мы ᲂу҆ча́тъ, вопїю́ще гла́съ трисвѧты́й ꙗ҆́вѣ, дх҃омъ просвѣща́еми а҆́гг҃ли бж҃ества̀."
 },
 {
  "type": "TEXT",
  "value": "Бг҃оро́диченъ: Без̾ сѣ́мене, ѻ҆трокови́це, тебѣ̀ а҆рха́гг҃лъ гаврїи́лъ роди́ти животода́вца бл҃говѣстѝ, бцⷣе всечⷭ҇таѧ, съ нб҃сѐ соше́дъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: И҆́же въ концы̀ вѣкѡ́въ доше́дшыѧ чл҃вѣколю́бче, и҆ треволне́ньми напа́стей поги́бнꙋти бѣ́дствꙋющыѧ, вопїю́щыѧ не пре́зри: сп҃сѝ сп҃се, ꙗ҆́коже сп҃слъ є҆сѝ ѿ ѕвѣ́рѧ прⷪ҇ро́ка."
 },
 {
  "type": "TEXT",
  "value": "Превозне́ссѧ мы́слїю, ꙗ҆́коже дре́внїй фарїсе́й прегрѣше́нїемъ низпадо́хсѧ лю́тѣ, и҆ зрѧ́ мѧ льсти́вый, весели́тсѧ, хрⷭ҇тѐ: и҆́мже смири́вый сего̀ крⷭ҇то́мъ, смири́вшасѧ ны́нѣ ᲂу҆ще́дри мѧ̀."
 },
 {
  "type": "TEXT",
  "value": "Грѣхолюби́въ въ житїѝ бы́въ, ꙗ҆́коже и҆́нъ никто́же влⷣко, и҆жди́хъ твоѐ долготерпѣ́нїе ѻ҆каѧ́нный, и҆ є҆щѐ є҆́смь нечꙋ́вственъ, но ѡ҆брати́ мѧ твои́мъ бл҃гоꙋтро́бїемъ."
 },
 {
  "type": "TEXT",
  "value": "Мч҃нченъ: Ꙗ҆́ростнымъ произволе́нїемъ, законопрестꙋ́пницы бг҃омꙋ́дренныхъ ѡ҆сꙋжда́юще, ѻ҆гне́мъ и҆ сожже́нїемъ и҆ прободе́ньми, зла́та свѣтлѣ́йше ꙗ҆́кѡ вои́стиннꙋ показа́ша, и҆ хрⷭ҇тꙋ̀ снаслѣ́дники."
 },
 {
  "type": "TEXT",
  "value": "Мч҃нченъ: Сꙋди́ще и҆спо́лнено боре́нїй, и҆ по́двигѡвъ превели́кихъ, и҆ па́че є҆стества̀ ра̑ны преше́дше, побѣди́сте кнѧ́зѧ тьмы̀, и҆ ѿ бг҃а прїѧ́сте страда́льцы вѣнцы̀."
 },
 {
  "type": "TEXT",
  "value": "Бг҃оро́диченъ: Ковче́гъ завѣ́та, ст҃ꙋ́ю вои́стиннꙋ трапе́зꙋ, ѡ҆чисти́лище на́ше, цр҃ковь бж҃їю ѡ҆дꙋшевле́ннꙋю, всезлаты́й свѣ́щникъ, и҆́стиннꙋю мт҃рь зижди́телѧ воспѣва́емъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Селе́нїѧ і҆ѡ́на, є҆́же въ преиспо́днѣмъ а҆́дѣ, є҆сте́ственный ѡ҆́бразъ бы́въ, вопїѧ́ше: возведѝ ѿ тлѝ живо́тъ мо́й, чл҃вѣколю́бче."
 },
 {
  "type": "TEXT",
  "value": "Пе́рвое и҆ вседѣ́тельное бг҃онача́лїѧ сїѧ́нїе, а҆рха́гг҃ли и҆ а҆́гг҃ли, си́льнѡ пою́тъ зовꙋ́ще, съ нача́лы и҆ властьмѝ и҆ си́лами, гла́сы немо́лчными гдⷭ҇а. Два́жды."
 },
 {
  "type": "TEXT",
  "value": "И҆́же мі́ръ ᲂу҆́мный всесли́чнымъ чи́номъ по чинꙋ̀ ᲂу҆краше́й неви́димѡ, семꙋ̀ ᲂу҆подоблѧ́тисѧ бл҃гочи́нїю, честнꙋ́ю цр҃ковь бл҃говолѝ."
 },
 {
  "type": "TEXT",
  "value": "Бг҃оро́диченъ: И҆сцѣле́нїй тѧ̀ и҆сто́чникъ приснотекꙋ́щъ, є҆́же въ тѧ̀ все́льшеесѧ сло́во показа̀: моеѧ̀ ᲂу҆́бѡ дꙋшѝ ꙗ҆́звы бцⷣе дв҃о и҆сцѣлѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Трїѐ ѻ҆́троцы въ пещѝ трⷪ҇цꙋ проѡбрази́вше, преще́нїе ѻ҆́гненное попра́ша, и҆ пою́ще вопїѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Вре́мѧ моѐ скончава́етсѧ ѽ дꙋшѐ, при две́рехъ и҆схо́дъ, покаѧ́нїѧ ᲂу҆́бѡ плоды̀ покажѝ, пре́жде да́же двє́ри не затворѧ́тсѧ, возопі́й хрⷭ҇тѐ: гдⷭ҇и, сп҃си́ мѧ."
 },
 {
  "type": "TEXT",
  "value": "Ѡ҆бнови́мъ сердца̀ ра́ломъ и҆́стиннагѡ позна́нїѧ, покаѧ́нїѧ пшени́цꙋ сѣ́юще, ꙗ҆́кѡ да по́жнемъ кла́съ пра́вды, ѡ҆ хрⷭ҇тѣ̀ воздѣ́лателѣ дꙋ́шъ на́шихъ."
 },
 {
  "type": "TEXT",
  "value": "Мч҃нченъ: Свѣти̑ла бл҃гоче́стїѧ, нече́стїѧ сопротивобо́рцы, ни́щихъ ѡ҆богати́телїе, гдⷭ҇ни мч҃нцы, преѻкаѧ́ннꙋю мою̀ дꙋ́шꙋ лише́ннꙋю, добродѣ́тельми ѡ҆богати́те."
 },
 {
  "type": "TEXT",
  "value": "Мч҃нченъ: И҆́же сп҃сы́й мытарѧ̀ и҆з̾ глꙋбины̀ воздохнꙋ́вша, и҆ моѐ ма́лое воздыха́нїе прїимѝ, и҆ сп҃си́ мѧ стрⷭ҇тоте́рпєцъ ра́ди, просла́вльшихъ тѧ̀ хрⷭ҇тѐ свои́ми ᲂу҆́ды."
 },
 {
  "type": "TEXT",
  "value": "Бг҃оро́диченъ: И҆сто́чниче, и҆́же во́дꙋ ѡ҆ставле́нїѧ и҆сточа́ющи, течє́нїѧ мои́хъ прегрѣше́нїй и҆зсꙋшѝ, подаю́щи мѝ тꙋ́чꙋ сле́зъ, да тѧ̀ при́снѡ ꙗ҆́кѡ бцⷣꙋ пою̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Го́рдый мꙋчи́тель, но дѣте́й бы́сть и҆гра́лище: ꙗ҆́коже бо пе́рсть попра́вше седмери́чный пла́мень, поѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Тве́рдымъ ᲂу҆мо́мъ и҆ до́блественнымъ ѻ҆́комъ, зрѧ́ще первонача̑льныѧ свѣ́тлѡсти, прича́стїемъ быва́ете свѣ́ти вторі́и, а҆́гг҃льстїи ли́цы, бл҃гослове́нъ є҆сѝ, зовꙋ́ще, бж҃е ѻ҆тє́цъ на́шихъ. Два́жды."
 },
 {
  "type": "TEXT",
  "value": "Неꙋкло́ннымъ жела́нїемъ, и҆ неизда́тельною любо́вїю води́ми сꙋ́ще, добро́тами зижди́телѧ, положе́нїемъ бы́сте свѣти̑ла втора̑ѧ, ли́цы а҆́гг҃льстїи, бл҃гослове́нъ є҆сѝ зовꙋ́ще, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Воплоще́нное родила̀ є҆сѝ бцⷣе, сло́во безнача́льное, є҆́же и҆з̾ ѻ҆ц҃а̀ без̾ мт҃ре предвѣ́чное бж҃е́ственнымъ ржⷭ҇тво́мъ. Бл҃гослове́нъ влⷣчце, пло́дъ твоегѡ̀ чре́ва."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Въ пла́мень ко ѻ҆трокѡ́мъ є҆врє́йскимъ снизше́дшаго бж҃їею си́лою, и҆ ꙗ҆́вльшагосѧ гдⷭ҇а, сщ҃е́нницы бл҃гослови́те, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Ѿ посмѣ́шства ха́мъ ѻ҆те́ческимъ и҆зрече́нїемъ ра́бъ бы́сть: что̀ сотвори́ши дꙋшѐ моѧ̀, поработи́вшисѧ страсте́мъ и҆ безчи́ннѡ смѣю́щисѧ, и҆ не стыдѧ́щисѧ нбⷭ҇нагѡ ѻ҆ц҃а̀;"
 },
 {
  "type": "TEXT",
  "value": "Враждова́въ ка́їнъ безꙋ́мнѡ братоꙋбі́йца бы́сть: семꙋ̀ подо́бна ꙗ҆ви́ласѧ є҆сѝ, и҆ не и҆на́го ᲂу҆би́вши, но себѐ са́мꙋю дꙋшѐ моѧ̀, сластолю́бїемъ и҆ пре́лестьми житїѧ̀."
 },
 {
  "type": "TEXT",
  "value": "Мч҃нченъ: И҆збра̑нныѧ би́серы гдⷭ҇ни, сосꙋ́ды честны̑ѧ, свѣтѧ́щыѧсѧ свѣщы̀ заре́ю бж҃е́ственныѧ бл҃года́ти, хрⷭ҇тѡ́вы стрⷭ҇тоте́рпцы, вѣ́рою соше́дшесѧ почти́мъ досто́йнѡ."
 },
 {
  "type": "TEXT",
  "value": "Мч҃нченъ: И҆́же мꙋ́дрыхъ стрⷭ҇тоте́рпєцъ кро́вь, па́че кади́ла прїе́мъ сло́ве, тѣ́хъ мольба́ми покаѧ́нїемъ къ тебѣ̀ припа́дающихъ сп҃сѝ, ꙗ҆́кѡ є҆ди́нъ млⷭ҇тивъ."
 },
 {
  "type": "TEXT",
  "value": "Бг҃оро́диченъ: И҆зли́шествомъ блꙋ́днагѡ житїѧ̀, ко а҆́дꙋ ны́нѣ прибли́жихсѧ: премно́гое бл҃гоꙋтро́бїе ѻ҆трокови́це и҆мꙋ́щи, ꙗ҆́кѡ бг҃а бл҃гоꙋтро́бнаго ро́ждши неизрече́ннѡ, ᲂу҆ще́дривши сп҃си́ мѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Веще́ственнагѡ ѻ҆гнѧ̀ пла́мень невеще́ственнымъ ᲂу҆вѧди́ша, бг҃озри́мїи ѻ҆́троцы, и҆ поѧ́хꙋ: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Ꙗ҆́кѡ всѣ́хъ содѣ́тель, а҆́гг҃лы ᲂу҆мы́слилъ є҆сѝ, и҆ предста́ша тѝ со стра́хомъ, зовꙋ́ще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Прича́стїемъ бж҃е́ственнагѡ ѻ҆гнѧ̀, ꙗ҆́коже пла́мень бы́вше нбⷭ҇ныѧ ᲂу҆мы̀ зовꙋ́тъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Невеще́ствєнныѧ и҆ ᲂу҆́мныѧ а҆́гг҃лы пре́жде соста́вилъ є҆сѝ ви́димыхъ всѣ́хъ, непреста́ннѡ тебѣ̀ зовꙋ́щихъ: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Сло́во ѻ҆́ч҃ее, па́че сло́ва воплоще́нное бг҃ороди́тельнице дв҃о родила̀ є҆сѝ: є҆го́же пою́тъ всѧ̑ дѣла̀ ꙗ҆́кѡ гдⷭ҇а, и҆ превозно́сѧтъ во всѧ̑ вѣ́ки."
 },
 {
  "type": "TEXT",
  "value": "Та́же пѣ́снь бцⷣы: Вели́читъ дꙋша̀ моѧ̀ гдⷭ҇а:"
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: На сїна́йстѣй горѣ̀ ви́дѣ тѧ̀ въ кꙋпинѣ̀ мѡѷсе́й, неѡпа́льнѡ ѻ҆́гнь бж҃ества̀ заче́ншꙋю во чре́вѣ: данїи́лъ же тѧ̀ ви́дѣ го́рꙋ несѣко́мꙋю, же́злъ прозѧ́бшїй, и҆са́їа взыва́ше, ѿ ко́рене дв҃дова."
 },
 {
  "type": "TEXT",
  "value": "І҆а́кѡвъ пе́рвенство прїѧ́тъ, ра́ди воздержа́нїѧ и҆ногда̀, и҆са́ѵъ же старѣ́йшинство ѿдадѐ, не ᲂу҆держа́въ чре́во. Ко́ль ѕло̀ невоздержа́нїе, и҆ ко́ль вели́ко воздержа́нїе! Бѣ́гай неподо́бїѧ, возлюбѝ, ѽ дꙋшѐ, до́брыхъ прибавле́нїе."
 },
 {
  "type": "TEXT",
  "value": "Ꙗ҆́кѡ мнѡ́гаѧ претерпѣ́въ непоро́чный, вѣнча́сѧ і҆́ѡвъ: и҆скꙋше́нїй бо сте́кшесѧ пото́цы, не поколеба́ша є҆мꙋ̀ серде́чнагѡ столпа̀. Томꙋ̀ ревнꙋ́й всегда̀, непрело́жна пребыва́ющи, ѽ дꙋшѐ, лꙋка́вагѡ козньмѝ."
 },
 {
  "type": "TEXT",
  "value": "Мч҃нченъ: Ѡ҆бостри́вшесѧ ѻ҆гне́мъ бж҃е́ственнагѡ дх҃а, мечѝ ꙗ҆ви́стесѧ ꙗ҆́вѣ, сѣкꙋ́ще полкѝ проти́вныѧ, стрⷭ҇тоно́сцы хрⷭ҇тѡ́вы, и҆ вели́кими побѣ́дами прославлѧ́еми, вѣнча́стесѧ всеси́льною рꙋко́ю всѣ́хъ цр҃ѧ̀."
 },
 {
  "type": "TEXT",
  "value": "Мч҃нченъ: Мно́жество мч҃нкъ непоро́чное, безмѣ́рныхъ мои́хъ ѕѡ́лъ мно́жество, ѡ҆чи́стити моли́те влⷣкꙋ и҆ бг҃а, ва́шѧ неизречє́нныѧ трꙋды̀ прїе́мшаго, и҆ со безпло́тныхъ во́инствы ва́съ сочета́вшаго."
 },
 {
  "type": "TEXT",
  "value": "Бг҃оро́диченъ: Свѣ́тлаѧ влⷣчнѧѧ пала́та, до́мъ мѧ̀ покажѝ свѣ́та, непроходи́маѧ две́ре, ѿве́рзи мѝ покаѧ́нїѧ пꙋти̑, землѐ свѧта́ѧ, къ земли́ мѧ кро́ткихъ наста́ви влⷣчце, всѧ́кагѡ мѧ̀ влады́чества страсте́й ꙗ҆вѝ свобо́дна."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Сла́дкою пречⷭ҇тагѡ твоегѡ̀ ржⷭ҇тва̀ стрѣло́ю ᲂу҆ѧ́звлени чⷭ҇таѧ, твое́й достожела́ннѣй добро́тѣ дивѧ́щесѧ, пѣ́сньми а҆́гг҃льскими досто́йнѡ тѧ̀, ꙗ҆́кѡ мт҃рь бж҃їю велича́емъ."
 },
 {
  "type": "TEXT",
  "value": "И҆̀же свѣ́тꙋ вели́комꙋ и҆ пе́рвомꙋ ны́нѣ предстоѧ́ще ли́цы, мл҃твенницы сильнѣ́йшїи бы́сте ѡ҆ всѣ́хъ на́съ, ва́съ, ꙗ҆́коже мо́щно, ѽ бж҃е́ственнѣйшїи а҆́гг҃ли бж҃їи, велича́ющихъ. Два́жды."
 },
 {
  "type": "TEXT",
  "value": "Равноси́льнꙋю трⷪ҇цꙋ сла́вити сподо́бльшесѧ ꙗ҆́снѡ, тоѧ̀ сїѧ́нїемъ пе́рвѣе ѡ҆свѣща́еми, ѡ҆свѣти́тисѧ вторы́мъ сїѧ́нїемъ сподо́бите на́съ, и҆̀же ва́съ бл҃гоче́стнѡ велича́ющихъ."
 },
 {
  "type": "TEXT",
  "value": "Бг҃оро́диченъ: Тѧ̀ на́шегѡ сп҃се́нїѧ ѡ҆снова́нїе всѝ вѣ́мы: твое́ бо пречⷭ҇тое ржⷭ҇тво̀ сп҃сло̀ є҆́сть, кро́вїю бг҃одѣ́тельною, пою́щыѧ тѧ̀ бцⷣе, и҆ вѣ́рнѡ сла́вѧщыѧ."
 }
]