ponomar-pwa/static/data/shared/services/canons/paraclete/tone4/mon.json

[
 {
  "type": "HEADER",
  "value": "Канѡ́нъ покаѧ́ненъ ко гдⷭ҇ꙋ на́шемꙋ і҆и҃сꙋ хрⷭ҇тꙋ̀ и҆ ст҃ы̑мъ є҆гѡ̀ мч҃нкѡмъ, гла́съ д҃, є҆гѡ́же краестро́чїе:"
 },
 {
  "type": "TEXT",
  "value": "Сп҃си́ мѧ сп҃се, ꙗ҆́коже блꙋ́днаго дре́вле."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе."
 },
 {
  "type": "TEXT",
  "value": "Сп҃се мо́й і҆и҃се, и҆́же блꙋ́днаго сп҃сы́й, и҆ и҆́же блꙋдни́цы пла́чь прїе́мый, и҆́же мытарѧ̀ воздохнꙋ́вша, манове́нїемъ свои́мъ ѡ҆правда́вый, и҆ менѐ без̾ числа̀ согрѣши́вшаго, и҆ ѡ҆браща́ющасѧ прїимѝ, и҆ сп҃си́ мѧ."
 },
 {
  "type": "TEXT",
  "value": "Ꙗ҆́кѡ ве́щь снѣда́етъ дꙋ́шꙋ мою̀ ѕло́бный ѻ҆́гнь, и҆ пла́меню твори́тъ подгнѣще́нїе бꙋ́дꙋщемꙋ: чл҃вѣколю́бче, ᲂу҆гасѝ того̀, ѡ҆роше́нїемъ твои́хъ млⷭ҇тей долготерпѣли́ве, пода́въ мѝ сле́зы покаѧ́нїѧ."
 },
 {
  "type": "TEXT",
  "value": "Мч҃нченъ: Ра́зꙋма мно́га и҆спо́лненъ ли́къ ст҃ы́хъ страда́лєцъ, неразꙋ́менъ совѣ́тъ и҆ сопроти́вное мꙋдрова́нїе всѣ́хъ законопрестꙋ́пныхъ, цѣломꙋ́дреннѡ ᲂу҆клонѝ, и҆ бж҃е́ственныхъ по́честей полꙋчѝ."
 },
 {
  "type": "TEXT",
  "value": "Мч҃нченъ: И҆̀же мі́ра презрѣ́вше кра̑снаѧ вѣ́рою, и҆ премі́рнꙋю жи́знь наслѣ́довасте мꙋ́дрїи стрⷭ҇тоте́рпцы прехва́льнїи, всѧ́кагѡ мѧ̀ ᲂу҆́бѡ и҆зба́вите мїрска́гѡ смѣше́нїѧ, и҆́скреннѡ ва́съ бл҃жа́щаго."
 },
 {
  "type": "TEXT",
  "value": "Бг҃оро́диченъ: Пресвѣ́тлаѧ свѣщѐ со́лнца сла́вы, дꙋшѝ моеѧ̀ ѻ҆́гнь ᲂу҆ны́нїемъ ᲂу҆гаше́нный возжзѝ пречⷭ҇таѧ, при́снѡ бж҃е́ственныхъ дѣ́лъ є҆ле́емъ напоѧ́ющи, да вѣ́рою и҆ любо́вїю сла́влю тѧ̀."
 },
 {
  "type": "HEADER",
  "value": "Дрꙋгі́й канѡ́нъ безплѡ́тнымъ ст҃ы̑мъ а҆́гг҃лѡмъ. Гла́съ д҃."
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ꙗ҆́кѡ ᲂу҆́ми чⷭ҇тїи, а҆́гг҃ли, вели́комꙋ и҆ пе́рвомꙋ предстоѧ́ще ᲂу҆мꙋ̀, и҆ бж҃е́ственнагѡ сїѧ́нїѧ насыща́еми, лꙋче́ю мѧ̀ ва́шею ѡ҆зари́те, пою́ще всевино́внаго сло́ва пресла́внїи. Два́жды."
 },
 {
  "type": "TEXT",
  "value": "Ѿню́дъ къ бг҃ꙋ прекло́ньшесѧ любо́вїю, и҆ бж҃е́ственными добро́тами воѡбража́еми ꙗ҆́вѣ, ѽ а҆рха́гг҃ли сла́внїи, стоѧ́нїемъ прилѣ́жнымъ ѡ҆бстоитѐ, зовꙋ́ще побѣ́днꙋю пѣ́снь зижди́телю."
 },
 {
  "type": "TEXT",
  "value": "Бг҃оро́диченъ: Ꙗ҆́же є҆ди́на во чре́вѣ прїе́мши сло́во, є҆го́же а҆́гг҃льскаѧ вѡ́инства сла́вѧтъ при́снѡ, дꙋ́шꙋ мою̀ ѡ҆зарѝ, рѣша́щи грѣхо́вное мра́чное ѕломышле́нїе всенепоро́чнаѧ, и҆ просвѣща́ющи ра́зꙋмомъ ржⷭ҇тва̀ твоегѡ̀."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Съ высоты̀ снизше́лъ є҆сѝ во́лею на зе́млю, превы́ше всѧ́кагѡ нача́ла, и҆ смире́нное возне́слъ є҆сѝ и҆з̾ а҆́да преиспо́днѧгѡ є҆стество̀ человѣ́ческое: нѣ́сть бо ст҃ъ па́че тебѐ, чл҃вѣколю́бче."
 },
 {
  "type": "TEXT",
  "value": "Но́щїю мѧ̀ житїѧ̀ тьма̀ страсте́й ѡ҆б̾ѧ́ла є҆́сть, хрⷭ҇тѐ бж҃е, свѣ́тъ сы́й незаходи́мый, лꙋча́ми покаѧ́нїѧ ѡ҆зари́въ мѧ̀ сп҃сѝ, ꙗ҆́кѡ чл҃вѣколю́бецъ, да сла́влю тѧ̀."
 },
 {
  "type": "TEXT",
  "value": "Ча́сти мѧ̀ покажѝ хрⷭ҇тѐ, и҆збра́нныхъ наслѣ́дника, сопроти́вныѧ ча́сти ѿлꙋчи́въ сп҃се, слеза́ми и҆ млⷭ҇тынею ѡ҆чище́на, ꙗ҆́кѡ да во хвале́нїи тѧ̀ сла́влю всегда̀."
 },
 {
  "type": "TEXT",
  "value": "Мч҃нченъ: Ѡ҆червлени́шасѧ вои́стиннꙋ кро́вїю ва́ши но́ги, и҆ быстрѣ́йше къ нб҃сѝ потеко́ша, со грѣхо́мъ зе́млю ѡ҆ста́вльше, мч҃нцы, собесѣ̑дницы бж҃є́ственнымъ си́ламъ."
 },
 {
  "type": "TEXT",
  "value": "Мч҃нченъ: Оу҆дрꙋча́емо тѣ́ло ва́ше ра́нами раста́ѧшесѧ, хрⷭ҇тѡ́вы страда́льцы: дꙋше́внаѧ же ᲂу҆крѣплѧ́шесѧ си́ла, любо́вїю привѧзꙋ́ема нерѣши́мѡ къ созда́вшемꙋ всѧ́чєскаѧ хотѣ́нїемъ."
 },
 {
  "type": "TEXT",
  "value": "Бг҃оро́диченъ: Мр҃і́е гпⷭ҇жѐ, ꙗ҆́кѡ сꙋ́щи всѣ̑мъ гдⷭ҇а ро́ждши, ѡ҆блада́ема страстьмѝ ᲂу҆ма̀ моегѡ̀, и҆ ѕло́бою ѡ҆черне́на, свобо́дна сотворѝ и҆ просвѣтѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "И҆́же премі́рными ли́ки воспѣва́емый хрⷭ҇тѐ, чи́номъ тѣ́хъ вѣ́рныхъ составлє́нїѧ воспѣва́ти бг҃омꙋ́дреннѡ сотворѝ, сло́ве: нѣ́сть бо ст҃ъ па́че тебѐ чл҃вѣколю́бче. Два́жды."
 },
 {
  "type": "TEXT",
  "value": "Любо́вїю те́плою, привѧза́нїемъ рачи́тельнымъ причаща́ющесѧ пе́рвомꙋ и҆сто́чникꙋ слꙋжи́тельнѣ предстоитѐ, пою́ще немо́лчнѡ, є҆ди́но сꙋщество̀ бж҃ества̀ безнача́льнагѡ, бж҃е́ственнїи а҆рха́гг҃ли."
 },
 {
  "type": "TEXT",
  "value": "Бг҃оро́диченъ: Є҆́ѵинꙋ дре́внюю клѧ́твꙋ, хрⷭ҇та̀ ро́ждши мт҃и чⷭ҇таѧ, пресвѣ́тлѡ разрѣши́ла є҆сѝ, всѣ́хъ вѣнча́ющаго бл҃гослове́ньми: нѣ́сть бо пречⷭ҇таѧ, ра́звѣ тебѐ помо́щницы."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Ꙗ҆́кѡ сꙋдїѝ пра́веднѣйшемꙋ ны́нѣ припа́даю тѝ гдⷭ҇и, ѡ҆сꙋжде́нна и҆ ѿча́ѧннаго мѧ̀ ᲂу҆ще́дри, и҆ пра́веднагѡ твоегѡ̀ и҆зба́ви и҆зрече́нїѧ, и҆ стоѧ́нїѧ и҆збра́нныхъ сподо́би."
 },
 {
  "type": "TEXT",
  "value": "Въ разбо́йники впа́дша неꙋкроти̑мыѧ чл҃вѣколю́бче, и҆ ᲂу҆ѧ́звлена бы́вша и҆сцѣлѝ хрⷭ҇тѐ, возлива́ѧ на мѧ̀ покаѧ́нїѧ вїно̀ и҆ є҆ле́й и҆ ѡ҆дѣва́ѧ мѧ̀ ѻ҆де́ждою сп҃се́нїѧ моегѡ̀."
 },
 {
  "type": "TEXT",
  "value": "Мч҃нченъ: Ѡ҆блеко́стесѧ свы́ше ри́зою сп҃се́нїѧ, въ совлече́нїи тѣле́снѣмъ всехва́льнїи мч҃нцы, и҆ совле́кшаго пре́жде пра́ѻтца ѡ҆бнажи́сте, без̾ дыха́нїѧ ме́ртва сотво́рше."
 },
 {
  "type": "TEXT",
  "value": "Мч҃нченъ: Виті́йствꙋюще пред̾ беззако́нными мч҃нцы, бж҃їѧ сло́ва ра́зꙋмомъ бл҃гоче́стїѧ ᲂу҆краша́еми, мꙋдрецы̀ и҆ виті̑и всѧ̑ посрами́сте нече́ствꙋющыѧ, и҆ врага̀ ᲂу҆мертви́вше."
 },
 {
  "type": "TEXT",
  "value": "Бг҃оро́диченъ: На тѧ̀ ꙗ҆́коже до́ждь, премꙋ́дрости бе́здна і҆и҃съ сни́де, є҆ди́нꙋ чⷭ҇тꙋю тебѐ ѡ҆брѣ́тъ бг҃ороди́тельнице дв҃о, и҆ заградѝ нече́стїѧ пото́ки лю̑тыѧ, бж҃е́ственною бл҃года́тїю."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Непостижи́мою си́лою ѿ небытїѧ̀ приве́лъ є҆сѝ нбⷭ҇ныѧ ᲂу҆мы̀, сло́ве бж҃їй пресꙋ́щественный, и҆ неизрече́нною твое́ю сла́вою ᲂу҆краси́лъ є҆сѝ, зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Оу҆правлѧ́еми вы́шнїѧ си̑лы дх҃омъ, и҆ брозда́ми є҆гѡ̀, и҆ бж҃е́ственными зарѧ́ми ѡ҆блиста́еми, неѿпа́дающыѧ чи́ны наслѣ́доваша, є҆ди́но чтꙋ́ще всѣ́хъ нача́ло и҆ бж҃ество̀."
 },
 {
  "type": "TEXT",
  "value": "Лица̀ твоегѡ̀ добро́тꙋ кра́снꙋю зрѣ́ти, сподо́бишасѧ слꙋжи́тєльныѧ твоѧ̑ свѣ́тлѡсти, и҆ ѿѻнꙋ́дꙋ разꙋмѣ̑нїѧ воспрїе́млюще, тебѣ̀ вопїю́тъ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Бг҃оро́диченъ: Цр҃и́ца дв҃о, злато́ю ѻ҆де́ждою ᲂу҆кра́шена, сн҃ꙋ цр҃ю̀ ны́нѣ предстои́тъ, ꙗ҆́же без̾ сравне́нїѧ а҆́гг҃лъ превы́шши, зовꙋ́щихъ: сла́ва хрⷭ҇тѐ си́лѣ твое́й."
 },
 {
  "type": "HEADER",
  "value": "Пѣ́снь є҃"
 },
 {
  "type": "TEXT",
  "value": "І҆рмо́съ: Ны́нѣ воста́нꙋ, прⷪ҇ро́чески речѐ бг҃ъ, ны́нѣ просла́влюсѧ, ны́нѣ вознесꙋ́сѧ, па́дшаго прїе́мъ ѿ дв҃ы, и҆ къ свѣ́тꙋ ᲂу҆́мномꙋ возносѧ́й моегѡ̀ бж҃ества̀."
 },
 {
  "type": "TEXT",
  "value": "Ѽ ка́кѡ ѡ҆сꙋжде́нъ хощꙋ̀ предста́ти тебѣ̀, сꙋдїѝ бг҃ꙋ всѣ́хъ, и҆ ѡ҆бличе́нъ бы́ти ѡ҆ всѣ́хъ ѕлы́хъ, и҆̀хже без̾ ᲂу҆ма̀ согрѣши́хъ во́лею, и҆ всего̀ себѐ непотре́бна сотвори́хъ!"
 },
 {
  "type": "TEXT",
  "value": "Сп҃си́ мѧ гдⷭ҇и, ꙗ҆́кѡ ѕѡ́лъ и҆спо́лнихсѧ мно́гихъ, и҆ молю́сѧ: и҆сцѣлѝ грѣхѝ моѧ̑ и҆ гноє́нїѧ лю̑таѧ, и҆ не ѡ҆ста́ви поги́бнꙋти мѧ̀ є҆ди́наго і҆и҃се мо́й, мно́гѡ тѝ согрѣши́вшаго."
 },
 {
  "type": "TEXT",
  "value": "Мч҃нченъ: Кончи́нꙋ бл҃же́ннꙋ ѡ҆брѣ́тше страда́льцы ꙗ҆́вѣ, сла́вꙋ ᲂу҆лꙋчи́ша, хрⷭ҇та̀ прославлѧ́юще свои́ми ᲂу҆́ды, стрⷭ҇тоположи́телѧ, ꙗ҆́звамъ и҆ ра́намъ причаща́тисѧ мꙋ́жески предразсꙋжда́юще."
 },
 {
  "type": "TEXT",
  "value": "Мч҃нченъ: Бога́тство нбⷭ҇ное, житїе́мъ бж҃е́ственнымъ и҆ кра́снымъ, вѣне́цъ неꙋвѧда́емый, и҆ свѣ́тъ невече́рнїй, и҆ жили́ще ника́коже ѡ҆бетша́емое нерꙋкотворе́нно наслѣ́довасте, страда́льцы хрⷭ҇тѡ́вы бл҃же́ннїи."
 },
 {
  "type": "TEXT",
  "value": "Бг҃оро́диченъ: Твоѧ̑ чꙋдеса̀ прⷪ҇ро́честїи прореко́ша гла́си, го́рꙋ нарица́юще тѧ̀ пречⷭ҇таѧ, и҆ две́рь, и҆ свѣти́льникъ свѣ́телъ: и҆з̾ негѡ́же вои́стиннꙋ свѣ́тъ чꙋ́дный просвѣща́етъ чⷭ҇таѧ, мі́ръ ве́сь."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Тре́петнѡ сла́вѧтъ херꙋві́ми, и҆ серафі́ми, со прⷭ҇то́лы, и҆ бж҃е́ственнїи а҆рха́гг҃ли, и҆ гдⷭ҇ьствїѧ, и҆ си̑лы, и҆ нача̑ла, и҆ вла̑сти со а҆́гг҃лы, честно́е є҆ди́но и҆ трⷪ҇ческое бж҃ество̀. Два́жды."
 },
 {
  "type": "TEXT",
  "value": "Ꙗ҆ви́шасѧ а҆́гг҃ли свѣтови́днѡ сїѧ́юще хрⷭ҇тѐ, твоѐ воскрⷭ҇нїе проповѣ́дающе въ мі́рѣ прпⷣбнымъ жена́мъ, и҆ врагѡ́въ твои́хъ сотрѧса́юще ᲂу҆́мъ блиста́ньми твоегѡ̀ бж҃ества̀."
 },
 {
  "type": "TEXT",
  "value": "Бг҃оро́диченъ: Ны́нѣ сохранѝ ѡ҆полче́нїе а҆рха́гг҃льскими цр҃ковь твою̀, тебѐ сла́вѧщꙋю правосла́вными гла́сы, и҆́же ѿ дв҃ы неизрече́ннѡ рожде́йсѧ, и҆ человѣ́ки ѿ тлѝ и҆збавлѧ́ѧй."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прїидо́хъ во глꙋбины̑ мѡрскі́ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве."
 },
 {
  "type": "TEXT",
  "value": "Ме́ртвъ сы́й не разꙋмѣ́ю, не чꙋ́вствꙋѧ ѻ҆каѧ́нный, и҆ со́вѣсть ѡ҆скверне́нꙋ носѧ̀ при́снѡ: бж҃е созда́телю мо́й, да не до конца̀ погꙋби́ши менѐ."
 },
 {
  "type": "TEXT",
  "value": "Дѣѧ̑нїѧ моѧ̑ ꙗ҆́коже вразѝ ѡ҆клевета́ти мѧ̀ хотѧ́тъ на сꙋди́щи твое́мъ, ще́дре: ѿ ни́хже ско́рѡ и҆зба́ви хрⷭ҇тѐ, наставлѧ́ѧ мѧ̀ къ покаѧ́нїю."
 },
 {
  "type": "TEXT",
  "value": "Мч҃нченъ: Сокрꙋшѝ кѡ́сти страстоно́сєцъ, собо́ръ законопрестꙋ́пныхъ, но не сокрꙋшѝ тѣ́хъ вѣ́рꙋ, є҆ѧ́же ра́ди наслѣ̑дницы ꙗ҆ви́шасѧ бг҃ꙋ, и҆ сп҃сꙋ дꙋ́шъ на́шихъ."
 },
 {
  "type": "TEXT",
  "value": "Мч҃нченъ: Ꙗ҆́кѡ честно́е ка́менїе, на ка́мени непоколе́блемѣ наде́жди бг҃омꙋ́дреннѡ назда́шасѧ стрⷭ҇тоно́сцы, и҆ ꙗ҆́кѡ хра́мы ст҃а́гѡ дх҃а, въ хра́мъ бж҃їй всели́шасѧ."
 },
 {
  "type": "TEXT",
  "value": "Бг҃оро́диченъ: Ѡ҆мрачи́вшеесѧ се́рдце моѐ те́мными наи̑тїи грѣха̀, свѣ́томъ и҆́же въ тебѣ̀ бг҃оневѣ́стнаѧ ѡ҆зарѝ, ꙗ҆́кѡ сл҃нце хрⷭ҇та̀ ро́ждшаѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ѻ҆́крестъ влⷣки предстоѧ́ще а҆́гг҃льскаѧ вѡ́инства, и҆ чи́стѣ наслажда́ющесѧ сїѧ́нїемъ нача́ла свѣ́тлагѡ, просвѣти́те вѣ́рою ва́съ пою́щихъ. Два́жды."
 },
 {
  "type": "TEXT",
  "value": "Премꙋ́дростїю твое́ю сотвори́вый а҆́гг҃льскїѧ ли́ки, гдⷭ҇ьствїѧ же и҆ си̑лы, и҆ серафі́мы, ꙗ҆́кѡ влⷣка показа́лъ є҆сѝ, хвала́ми тѧ̀ чтꙋ́щыѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ на престо́лѣхъ превознесе́нныхъ, хрⷭ҇тѐ, почива́ѧй, и҆ всѧ́чєскаѧ бж҃е́ственнымъ про́мысломъ соблюда́ѧй, на рꙋкꙋ̀ дв҃и́чєскꙋю влⷣко почи́лъ є҆сѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Комꙋ́ тѧ ᲂу҆подо́блю, дꙋшѐ моѧ̀ ѻ҆каѧ́ннаѧ, ᲂу҆вы̀ мнѣ̀, лю́бѧщꙋю безмѣ̑стнаѧ, а҆ не дѡ́браѧ взыскꙋ́ющꙋю; тѣ́мже пре́жде конца̀ потщи́сѧ ѡ҆́бразы бл҃гі̑ѧ показа́ти."
 },
 {
  "type": "TEXT",
  "value": "Тꙋ́чꙋ мѝ хрⷭ҇тѐ сле́зъ да́ждь, ꙗ҆́кѡ да ѿ лю́тыхъ мои́хъ и҆змы́юсѧ, и҆ не ѡ҆ста́ви менѐ сп҃се, ны́нѣ поги́бнꙋти, согрѣши́вшаго тѝ мно́гѡ па́че человѣ̑къ."
 },
 {
  "type": "TEXT",
  "value": "Мч҃нченъ: Ме́ртвость ᲂу҆мерщвле́ннагѡ сло́ва носѧ́ще на тѣ́лѣ свое́мъ, пре́лесть ᲂу҆мертви́сте: живете́ же и҆ ᲂу҆ме́рше сла́внїи, и҆ ᲂу҆мерщвлє́нныѧ страстьмѝ страда́льцы врачꙋ́ете."
 },
 {
  "type": "TEXT",
  "value": "Мч҃нченъ: Ко́е мѣ́сто ны́нѣ не и҆́мать ва́съ мч҃нцы просвѣти́тели, и҆ предгра́дїе; ка́ѧ страна̀ не ѡ҆свѧща́етсѧ ва́шими страда́ньми сла́внїи, и҆ восто́ками и҆сцѣле́нїй;"
 },
 {
  "type": "TEXT",
  "value": "Бг҃оро́диченъ: Є҆ди́на пребыва́еши по ржⷭ҇твѣ̀ влⷣчце, дѣ́вственною добро́тою сїѧ́ющи, є҆ди́на мт҃рнихъ и҆збѣ́гла є҆сѝ болѣ́зней: бг҃а бо є҆ди́на родила̀ є҆сѝ, и҆зба́вителѧ дꙋ́шъ на́шихъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Свидѣ́тели содѣ̑ѧннымъ и҆мꙋ́ще мы́слєнныѧ а҆́гг҃лы, и҆збере́мъ чи́стое житїѐ дꙋшѐ моѧ̀, вопїю́ще: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ. Два́жды."
 },
 {
  "type": "TEXT",
  "value": "Оу҆́глемъ ѡ҆чище́нный, престо́лꙋ твоемꙋ̀ предстоѧ́щыѧ зри́тъ серафі́мы, бж҃е́ственный вопїѧ̀ и҆са́їа: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
 },
 {
  "type": "TEXT",
  "value": "Бг҃оро́диченъ: Чи́ны всѣ́хъ безпло́тныхъ, дв҃о, ꙗ҆́вѣ превосхо́диши, ꙗ҆́кѡ творца̀ ро́ждши и҆ гдⷭ҇а: бл҃гослове́нъ пречⷭ҇таѧ, пло́дъ твоегѡ̀ чре́ва."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а."
 },
 {
  "type": "TEXT",
  "value": "Ꙗ҆ви́хсѧ скотѡ́мъ подо́бенъ безсловє́снымъ, подклони́всѧ страсте́мъ. Сло́ве бж҃їй пребезнача́льне, ѡ҆брати́въ мѧ̀, сп҃сѝ вопїю́ща: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Ѡ҆зоба̀ ве́прь, позоба̀ є҆ди́нокъ мѧ̀ сп҃се, ꙗ҆́коже вїногра́дъ воздѣ́ланный дх҃омъ: ѿ негѡ́же и҆зба́ви мѧ̀ сло́ве, и҆ плодоно́сна добродѣ́тельми а҆́бїе тебѣ̀ покажѝ."
 },
 {
  "type": "TEXT",
  "value": "Мч҃нченъ: Ѡ҆брощє́нїѧ крѡ́внаѧ ѡ҆червлени́ша багрѧни́цꙋ ва́мъ бг҃отка́ннꙋю, є҆́юже ᲂу҆краси́стесѧ мч҃нцы, вѣнцы̀ носѧ́ще побѣ́ды, и҆̀же въ вы́шнихъ цр҃ю̀ вѣ́чномꙋ предстоитѐ."
 },
 {
  "type": "TEXT",
  "value": "Мч҃нченъ: Сщ҃е́нное мч҃нкѡвъ сосло́вїе несвѧще́нное разрꙋшѝ согла́сїе, беззако́нновати повелѣва́ющее, и҆ зако́ннѡ пострада́въ, ѿ влⷣки всѣ́хъ зако́ннѡ вѣнча́сѧ."
 },
 {
  "type": "TEXT",
  "value": "Бг҃оро́диченъ: Бл҃гослови́тъ всѧ̀ тва́рь ржⷭ҇тво̀ твоѐ, бл҃гослове́ньми на́съ вѣнча́вшее, и҆ ѿ клѧ́твы и҆з̾е́мшее, всебл҃гослове́ннаѧ є҆ди́на, и҆ препросла́вленнаѧ, ꙗ҆́же ро́дъ на́шъ ѡ҆бл҃года́тившаѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ꙗ҆́кѡ сы́й живо́тъ безсме́ртный, безсме́ртномꙋ животꙋ̀ причаща́тисѧ зижди́тельнѣ сотвори́лъ є҆сѝ а҆́гг҃лы, и҆ наꙋчи́лъ є҆сѝ пѣ́ти: бл҃гослови́те, по́йте гдⷭ҇а. Два́жды."
 },
 {
  "type": "TEXT",
  "value": "Мы́сленнѡ ѡ҆бстоѧ́ще тѧ̀ а҆рха́гг҃ли, непреста́нными гла́сы воспѣва́ютъ, бг҃олѣ́пнѡ чтꙋ́ще тѧ̀ ꙗ҆́кѡ влⷣкꙋ всѣ́хъ: бл҃гослови́те, по́йте гдⷭ҇а."
 },
 {
  "type": "TEXT",
  "value": "Бг҃оро́диченъ: Зако́ннїи ѡ҆́брази проѡбража́хꙋ тѧ̀ всеблаже́ннаѧ, ро́ждшꙋю бг҃а, ве́щи пло́тстѣй соединѧ́ема, пре́жде невеще́ственна сꙋ́ща бж҃е́ственнымъ є҆стество́мъ: бл҃гослови́мъ дв҃о, ржⷭ҇тво̀ твоѐ."
 },
 {
  "type": "TEXT",
  "value": "Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆́сть: тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Сѐ покаѧ́нїѧ вре́мѧ, что̀ лѣни́мсѧ, что̀ сно́мъ погрꙋжа́емсѧ; ᲂу҆ны́нїѧ да ѿстꙋ́пимъ, ᲂу҆краси́мъ свѣщы̀, ꙗ҆́коже пи́шетъ, є҆ле́емъ бл҃готворе́нїѧ: да не ѡ҆ста́немъ внѣꙋ́дꙋ двере́й рыда́ющи."
 },
 {
  "type": "TEXT",
  "value": "До́ндеже є҆́сть вре́мѧ пока́ѧтисѧ, ѡ҆брати́сѧ ѿ ѕѡ́лъ твои́хъ дꙋшѐ моѧ̀, ꙗ҆̀же содѣ́лала є҆сѝ вѣ́дѣнїемъ и҆ невѣ́дѣнїемъ, и҆ возопі́й къ вѣ́дꙋщемꙋ всѧ̑: согрѣши́хъ тѝ, простѝ влⷣко, и҆ не гнꙋша́йсѧ менѐ недосто́йнагѡ."
 },
 {
  "type": "TEXT",
  "value": "Мч҃нченъ: Собра̀ хрⷭ҇то́съ страда́вшыѧ ст҃ы̑ѧ ꙗ҆вле́ннѣйше, ѿ всѧ́кїѧ страны̀ и҆ гра́да на мѣ́ста сла̑внаѧ, въ чєстна́ѧ покѡ́ища, и҆ ны́нѣ перворо́дныхъ цр҃ковь просвѣща́ютъ веселѧ́щесѧ."
 },
 {
  "type": "TEXT",
  "value": "Мч҃нченъ: Всечестна́ѧ ра́ка честны́хъ мч҃нкъ твои́хъ гдⷭ҇и, лꙋча́ми бж҃е́ственнагѡ дх҃а ѡ҆зарѧ́ема, пресла́внѣ и҆сцѣле́нїѧ и҆спꙋща́етъ свѣ́тлость, и҆ разорѧ́етъ недꙋ́гѡвъ болѣ̑зни, є҆ди́не многомлⷭ҇тиве."
 },
 {
  "type": "TEXT",
  "value": "Бг҃оро́диченъ: Ѿ свѣ́та и҆́же въ тебѣ̀ бг҃оневѣ́сто, зарѧ́ми дꙋ́шꙋ мою̀ просвѣтѝ, лежа́щꙋю въ ро́вѣ поги́бели возста́ви, врагѝ сокрꙋша́ющи, ѡ҆скорблѧ́ющыѧ се́рдце моѐ при́снѡ, и҆ къ страсте́мъ порѣва́ющыѧ мѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Сокрове́нное бж҃їе неизрече́нное въ тебѣ̀ соверша́етсѧ, ꙗ҆́вственное та́инство, дв҃о пречⷭ҇таѧ: и҆́бо бг҃ъ и҆з̾ тебѐ воплоти́сѧ за млⷭ҇рдїе. Тѣ́мже тѧ̀ ꙗ҆́кѡ бцⷣꙋ велича́емъ."
 },
 {
  "type": "TEXT",
  "value": "И҆̀же ᲂу҆ма̀ роди́телѧ, и҆ предложи́телѧ сн҃ꙋ и҆ дх҃ꙋ пою́ще а҆́гг҃ли, ны́нѣ къ на́мъ бж҃е́ственныѧ бл҃года́ти подаѧ̑нїѧ, прилѣ́жнѡ прїе́мше посыла́ти ᲂу҆се́рдствꙋйте."
 },
 {
  "type": "TEXT",
  "value": "Краснѡ̀ ᲂу҆добрѧ́еми нетлѣ́нїѧ да́ромъ и҆ бл҃года́тїю, бж҃е́ственнїи а҆рха́гг҃ли, тебѐ и҆сто́чника хрⷭ҇тѐ присносꙋ́щна нетлѣ́нїѧ, пою́ще ꙗ҆́кѡ бл҃года́телѧ велича́ютъ."
 },
 {
  "type": "TEXT",
  "value": "Бг҃оро́диченъ: Невѣ́стникъ воплоще́нїѧ неизрече́ннагѡ, и҆ черто́гъ ѡ҆дꙋшевле́нный, и҆ ковче́гъ зако́на бл҃года́ти тѧ̀ бг҃омт҃и, вѣ́рнїи свѣ́мы: тѣ́мже тѧ̀ непреста́ннѡ велича́емъ."
 }
]