ponomar-pwa/static/data/shared/services/canons/paraclete/tone4/sat.json

[
 {
  "type": "HEADER",
  "value": "Канѡ́нъ ст҃ы̑мъ мч҃нкѡмъ, и҆ ст҃и́телємъ, и҆ прⷪ҇ро́кѡмъ, и҆ прпⷣбнымъ, гла́съ д҃, творе́нїе і҆ѡ́сифово, є҆гѡ́же краегране́сїе:"
 },
 {
  "type": "TEXT",
  "value": "Свѣ́тлѡ похвалѧ́ю бж҃е́ствєнныѧ хрⷭ҇тѡ́вы дрꙋ́ги."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе."
 },
 {
  "type": "TEXT",
  "value": "Свѣтлѣ́етсѧ при́снѡ честна́ѧ цр҃ковь, по́двиги свѣ́тлыми гдⷭ҇нихъ страда́лєцъ, и҆ хрⷭ҇та̀ возсїѧ́вшаго сл҃нца ѿ дв҃ы, и҆ тьмꙋ̀ разгна́вшаго пре́лести, сла́витъ почита́ющи."
 },
 {
  "type": "TEXT",
  "value": "Восхва́лимъ вѣ́рнѡ хрⷭ҇тѡ́вы ст҃и́тели, и҆зрѧ̑дныѧ лю́ди ᲂу҆па́сшыѧ до́брѣ, и҆ свѣ́тлѡ да похва́лимъ собо́ръ ве́сь преподо́бнѡ пожи́вшихъ, и҆ тѣлє́сныѧ сла̑сти ᲂу҆мертви́вшихъ дꙋ́хомъ."
 },
 {
  "type": "TEXT",
  "value": "Крѣ́пость ѿ бг҃а жена́мъ дарова́сѧ, въ постѣ̀ и҆ крѣ́пкомъ страда́нїи врага̀ попра́вшымъ бл҃года́тїю: тѣ́хъ мл҃твами гдⷭ҇и, и҆ прⷪ҇рѡ́къ ст҃ы́хъ твои́хъ млⷭ҇ти твоѧ̑ всѣ̑мъ низпослѝ."
 },
 {
  "type": "TEXT",
  "value": "Сла́ва: Ѡ҆правда́й хрⷭ҇тѐ, рабы̑ твоѧ̑, ꙗ҆̀же пра́веднымъ промышле́нїемъ, ѿ житїѧ̀ тлѣ́ннагѡ къ нетлѣ́ннѣй жи́зни преве́лъ є҆сѝ: со всѣ́ми же твои́ми пра́ведными ликовствова́ти сподо́би, тѣ́хъ презира́ѧ прегрѣшє́нїѧ."
 },
 {
  "type": "TEXT",
  "value": "Бг҃оро́диченъ: И҆збавлѧ́ѧ на́съ ѿ ѡ҆сꙋжде́нїѧ пе́рвагѡ, сн҃ъ бж҃їй, бл҃гоизво́ли чⷭ҇таѧ, и҆ сн҃ъ бы́ти тво́й. Тѣ́мже и҆ всыни́вшесѧ тебѐ ра́ди нбⷭ҇наго бл҃гослови́мъ ѻ҆ц҃а̀, пою́ще тебѐ."
 },
 {
  "type": "HEADER",
  "value": "Дрꙋгі́й канѡ́нъ ᲂу҆со́пшымъ, є҆гѡ́же пое́мъ нарѧдꙋ̀, и҆дѣ́же нѣ́сть мине́и, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Пра́вило четве́ртое, кончи́нꙋ воспомина́ѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Припѣ́въ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ."
 },
 {
  "type": "TEXT",
  "value": "Держа́й за деснꙋ́ю рꙋ́кꙋ ра̑бъ твои́хъ, наста́ви и҆̀хъ на па́жить безсме́ртнꙋю сп҃се, на зрѣ́нїе добро́ты твоеѧ̀ стрⷭ҇тоно́сцы мч҃нки ᲂу҆моле́нъ быва́ѧ."
 },
 {
  "type": "TEXT",
  "value": "Припѣ́въ: Оу҆поко́й гдⷭ҇и, дꙋ́шы ᲂу҆со́пшихъ ра̑бъ твои́хъ."
 },
 {
  "type": "TEXT",
  "value": "Неизрече́ннꙋю и҆ бл҃же́ннꙋю сла́вꙋ твою̀, преста́вльшыѧсѧ вѣ́рою наслѣ́довати сподо́би хрⷭ҇тѐ, презира́ѧ прегрѣшє́нїѧ и҆́хъ, и҆ ѡ҆правда́й бл҃года́тїю, и҆злїѧ́нїемъ твоеѧ̀ кро́ве."
 },
 {
  "type": "TEXT",
  "value": "Сла́ва: Ме́ртвостїю твое́ю живоно́сною ᲂу҆мертви́телѧ, ᲂу҆мертви́лъ є҆сѝ, хрⷭ҇тѐ бж҃е, и҆̀хже прїѧ́тъ, и҆ и҆́мже твою̀ воздаѧ̀ жи́знь, са́мъ ны́нѣ ᲂу҆поко́й вѣ̑рныѧ рабы̑ твоѧ̑."
 },
 {
  "type": "TEXT",
  "value": "И҆ ны́нѣ: Красе́нъ превысоча́йшими добро́тами, ꙗ҆́кѡ бж҃їй сн҃ъ: а҆ ꙗ҆́кѡ и҆з̾ тебѐ дв҃о воплоти́выйсѧ и҆ на дре́вѣ повѣ́шенъ бы́въ добро́ты не и҆мѣ́ѧше, сме́рть за всѣ́хъ прїѧ́тъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ."
 },
 {
  "type": "TEXT",
  "value": "Ꙗ҆́коже а҆́гнцы добропобѣ́днїи мч҃нцы, заколе́ни бы́вше, хрⷭ҇тꙋ̀ принесо́шасѧ, закла́вшемꙋсѧ а҆́гнцꙋ и҆ сло́вꙋ бж҃їю за всѣ́хъ и҆збавле́нїе."
 },
 {
  "type": "TEXT",
  "value": "Оу҆ста̀ бж҃їѧ бы́вше сщ҃еннотаи̑нницы, ѿ недосто́йныхъ и҆зведо́ша достѡ́йныѧ, ᲂу҆че́ньми сщ҃е́нными просвѣща́юще."
 },
 {
  "type": "TEXT",
  "value": "Ѡ҆брѣ́те прпⷣбныхъ сосло́вїе, воздержа́нїѧ ра́ди пи́щꙋ неиждива́емꙋю, наслади́вшесѧ зрѣ́ньми и҆ бж҃е́ственными восхожде́ньми."
 },
 {
  "type": "TEXT",
  "value": "Сла́ва: Всѧ̑ хрⷭ҇тѐ, ꙗ҆̀же въ вѣ́рѣ преста́вилъ є҆сѝ, мольба́ми всѣ́хъ ст҃ы́хъ твои́хъ, ᲂу҆поко́й, презрѣ́въ ꙗ҆̀же содѣ̑ѧннаѧ въ житїѝ тѣ́хъ прегрѣшє́нїѧ."
 },
 {
  "type": "TEXT",
  "value": "И҆ ны́нѣ: Бг҃оро́диченъ: Хвалꙋ̀ бг҃ꙋ принесе́мъ, ѿ дв҃ы ро́ждшемꙋсѧ пло́тїю, и҆ же́нъ ли́ки а҆́гг҃льскимъ ликѡ́мъ совокꙋ́пльшемꙋ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю хрⷭ҇тѐ: нѣ́сть бо ст҃ъ па́че тебѐ, чл҃вѣколю́бче."
 },
 {
  "type": "TEXT",
  "value": "Побѣди́вше і҆́дѡльскꙋю пре́лесть мч҃нцы, влⷣкꙋ и҆ бг҃а ны́нѣ мо́лѧтъ, дарова́ти пре́жде сконча́вшымсѧ бж҃е́ственный поко́й."
 },
 {
  "type": "TEXT",
  "value": "Ѡ҆браща́ющеесѧ ѻ҆рꙋ́жїе преминꙋ́ти бл҃говолѝ, и҆ дре́ва живо́тнагѡ подо́бно прича́стїе ᲂу҆лꙋчи́ти, ꙗ҆̀же преста́вилъ є҆сѝ рабы̑ твоѧ̑, влⷣко."
 },
 {
  "type": "TEXT",
  "value": "Сла́ва: Въ раѝ хрⷭ҇тѐ, пи́щи водвори́тисѧ рабѡ́мъ твои̑мъ сподо́би, и҆дѣ́же гла́съ чи́стъ пра́зднꙋющихъ, согрѣше́нїй ѡ҆ставле́нїе тѣ̑мъ да́рꙋѧ."
 },
 {
  "type": "TEXT",
  "value": "И҆ ны́нѣ: Бж҃е́ственномꙋ ржⷭ҇твꙋ̀ дв҃ство сочета́ла є҆сѝ пречⷭ҇таѧ: зижди́телѧ бо всѧ́ческихъ несказа́ннѡ родила̀ є҆сѝ, є҆гѡ́же хотѣ́нїю всѧ̑ повинꙋ́ютсѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ си́лѣ твое́й."
 },
 {
  "type": "TEXT",
  "value": "Сщ҃е́ннѣйшее просла́висѧ мч҃нкѡвъ сосло́вїе, сщ҃е́ннѡ просла́виша ᲂу҆́ды свои́ми гдⷭ҇а, ѿ всѣ́хъ а҆́гг҃лъ сла́вимаго: и҆ мо́лѧтсѧ и҆зба́витисѧ на́мъ ѿ всѧ́кїѧ ско́рби."
 },
 {
  "type": "TEXT",
  "value": "Оу҆́мъ невеще́ственнагѡ свѣтозаре́нїѧ сїѧ́ющъ, и҆мꙋ́ще бж҃е́ственнїи ст҃и́телїе, но́щь всѧ́кїѧ пре́лести разрꙋши́сте, и҆ неле́стнымъ наставле́нїемъ наста́висте бг҃оизбра́нное ста́до хрⷭ҇то́во къ ра́зꙋмꙋ."
 },
 {
  "type": "TEXT",
  "value": "Оу҆краси́сѧ прпⷣбныхъ многочи́сленное мно́жество, и҆ возвели́чисѧ бж҃е́ственныхъ же́нъ є҆ди́нственное торжество̀, и҆ прⷪ҇рѡ́къ почте́сѧ собо́ръ ст҃ы́й, со а҆́гг҃льскими собо́ры соедини́всѧ ра́дꙋѧсѧ."
 },
 {
  "type": "TEXT",
  "value": "Сла́ва: А҆́гг҃лѡмъ согра́ждане бы́вше ст҃і́и мч҃нцы, ᲂу҆со́пшымъ всѣ̑мъ и҆спроси́те ѡ҆слабле́нїе, и҆ раѧ̀ бж҃е́ственнагѡ вселе́нїе, и҆ прегрѣше́нїй коне́чное и҆збавле́нїе."
 },
 {
  "type": "TEXT",
  "value": "И҆ ны́нѣ: Бг҃оро́диченъ: И҆́же дв҃ꙋ тѧ̀ сохрани́въ по ржⷭ҇твѣ̀ нетлѣ́ннꙋ, дв҃ы всѧ̑ тебѐ ѡ҆бстоѧ́щыѧ просла́ви: съ ни́миже непреста́ннѡ моли́сѧ, сп҃сти́сѧ ѿ всѧ́кїѧ ско́рби и҆ напа́сти дꙋша́мъ на́шымъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и."
 },
 {
  "type": "TEXT",
  "value": "Ꙗ҆́вльшесѧ мч҃нцы ꙗ҆́кѡ свѣти̑льницы, не́бо просвѣща́ютъ цр҃ко́вное, и҆̀же и҆ ᲂу҆ сп҃са хрⷭ҇та̀ про́сѧтъ, дарова́ти ᲂу҆со́пшымъ ѡ҆слабле́нїе."
 },
 {
  "type": "TEXT",
  "value": "Же́злъ си́лы и҆мꙋ́ще крⷭ҇тъ тво́й рабѝ твоѝ, мїрско́е мо́ре проидо́ша: и҆̀хже вселѝ въ го́рꙋ твою̀ гдⷭ҇и, въ не́йже содѣ́лалъ є҆сѝ ст҃ы́ню."
 },
 {
  "type": "TEXT",
  "value": "Сла́ва: Въ селє́нїѧ вои́стиннꙋ возлю́блєннаѧ, ꙗ҆̀же и҆збра́лъ є҆сѝ влⷣко, и҆ ꙗ҆̀же прїѧ́лъ є҆сѝ рабы̑ твоѧ̑, бл҃говолѝ всели́тисѧ ꙗ҆́кѡ млⷭ҇рдъ, и҆дѣ́же првⷣныхъ дꙋ́си."
 },
 {
  "type": "TEXT",
  "value": "И҆ ны́нѣ: И҆́же ме́ртвыми и҆ живы́ми ѡ҆блада́ѧй, вопло́щьсѧ ꙗ҆́кѡ человѣ́къ и҆з̾ тебѐ бг҃омт҃и, сме́рть претерпѣ̀ пло́тїю безсме́ртный, разрꙋши́въ сме́рти си́лꙋ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀ гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Возноси́ми на крⷭ҇тъ и҆ колесы̀ сокрꙋша́еми, ссѣца́еми же на ᲂу҆́ды крѣ́пцыи мч҃нцы, бг҃ꙋ ꙗ҆ви́шасѧ не ѿсѣ́чени."
 },
 {
  "type": "TEXT",
  "value": "Спаси́телїе вѣ̑рнымъ, ст҃и́телїе бы́вше, приведо́сте а҆́гнцꙋ и҆ влⷣцѣ, и҆̀хже пастѝ преподо́бнѣ ввѣ́ристесѧ."
 },
 {
  "type": "TEXT",
  "value": "Мѧте́жей мїрски́хъ ѿлꙋчи́вшесѧ прпⷣбнїи, ᲂу҆мири́сте сердца̀ ѿ страсте́й, и҆ всѣ́хъ бг҃ꙋ сы́нове бы́сте."
 },
 {
  "type": "TEXT",
  "value": "Сла́ва: Бж҃е́ственнїи прⷪ҇ро́цы, и҆ же́нъ сосло́вїе бг҃ꙋ ᲂу҆годи́вшїи, пре́жде ᲂу҆со́пшымъ проси́те поко́й."
 },
 {
  "type": "TEXT",
  "value": "И҆ ны́нѣ: Бг҃оро́диченъ: Бг҃ъ въ тѧ̀ всели́всѧ пречⷭ҇таѧ дв҃о, содѣ́ла человѣ́ки своеѧ̀ сла́вы бж҃е́ствєннаѧ жили̑ща."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ты̀ гдⷭ҇и, твоегѡ̀ влⷣчествїѧ просла́вилъ є҆сѝ мч҃нки: тѣ́хже ра́ди пре́жде ᲂу҆со́пшыѧ ᲂу҆поко́й, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Нерѣши́мый живо́тъ, кра́сное ра́дованїе, и҆ непрестаю́щее весе́лїе, пре́жде ᲂу҆ме́ршымъ пода́ждь, многомлⷭ҇тиве."
 },
 {
  "type": "TEXT",
  "value": "Сла́ва: Є҆ди́не бл҃же, и҆ и҆сто́чниче бл҃гости, ᲂу҆поко́й и҆̀же въ вѣ́рѣ, и҆ твое́мъ позна́нїи житїѐ сконча́вшихъ."
 },
 {
  "type": "TEXT",
  "value": "И҆ ны́нѣ: Пое́мъ тѧ̀ бг҃омт҃и, є҆́юже сꙋ́щымъ во тьмѣ̀ возсїѧ̀ неизрече́нный и҆ непристꙋ́пный свѣ́тъ, и҆ любо́вїю бл҃жи́мъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆з̾ глꙋбины̀ возведѝ живо́тъ мо́й, многомлⷭ҇тиве."
 },
 {
  "type": "TEXT",
  "value": "Ꙗ҆́кѡ прече́стно ка́менїе мч҃нцы, по землѝ премꙋ́дрѡ валѧ́ющесѧ, ѕлоче́стїѧ зда́нїе всѐ низверго́сте, и҆ хра́мы бж҃їѧ бы́сте."
 },
 {
  "type": "TEXT",
  "value": "Ѿ рꙋкѝ наси́льственныѧ сп҃са́ете подрꙋ́чники всѧ̑, ст҃и́телїе, првⷣнїи и҆ прпⷣбнїи, и҆̀же ѡ҆ хрⷭ҇тѣ̀ ста́до соблюда́юще: сегѡ̀ ра́ди ᲂу҆бл҃жа́етесѧ."
 },
 {
  "type": "TEXT",
  "value": "Рече́нїємъ прⷪ҇ро́чєскимъ послѣ́дꙋюще, же́нъ мно́жество, во страда́нїихъ же и҆ въ постѣ̀, ѿ жены̀ дв҃ы возсїѧ́вшемꙋ, бг҃ꙋ сло́вꙋ ᲂу҆годи́ша."
 },
 {
  "type": "TEXT",
  "value": "Сла́ва: Всѣ̑мъ животѐ ᲂу҆ме́ршымъ, ꙗ҆̀же ѿ на́съ въ вѣ́рѣ преше́дшыѧ къ тебѣ̀ зижди́телю, во свѣ́тѣ со ст҃ы́ми твои́ми многомлⷭ҇тиве, сподо́би."
 },
 {
  "type": "TEXT",
  "value": "И҆ ны́нѣ: Бг҃оро́диченъ: Оу҆сты̀, и҆ ѧ҆зы́комъ, и҆ се́рдцемъ и҆сповѣ́даю тѧ̀ ѻ҆трокови́це, бг҃а на́шегѡ чⷭ҇тꙋю мт҃рь: и҆ твои́мъ хода́тайствомъ и҆зба́ви мѧ̀ вѣ́чнагѡ ѡ҆сꙋжде́нїѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Копїѐ бж҃е́ствєннаѧ твоѧ̑ ре́бра пробо́дшее, ѡ҆браща́ющеесѧ ѻ҆рꙋ́жїе ᲂу҆ви́дѣвше сп҃се, да ѿстꙋ́питъ ѿ ра̑бъ твои́хъ мольба́ми стрⷭ҇тоте́рпєцъ твои́хъ."
 },
 {
  "type": "TEXT",
  "value": "На дре́вѣ повѣ́шенъ бы́въ сп҃се мо́й, ра́й ѿве́рзлъ є҆сѝ: въ вѣ́рѣ ᲂу҆́бѡ преста́влєныѧ во́нь вселѝ, ꙗ҆́кѡ ще́дръ, и҆ твоеѧ̀ жи́зни прича́стники покажѝ."
 },
 {
  "type": "TEXT",
  "value": "Сла́ва: Па́жити живо́тныѧ сподо́би наслади́тисѧ, и҆̀же къ тебѣ̀ влⷣко бл҃гоче́стнѡ преходѧ́щыѧ сме́ртїю, и҆ съ првⷣными и҆̀же ѿ вѣ́ка сопричтѝ."
 },
 {
  "type": "TEXT",
  "value": "И҆ ны́нѣ: Сло́во ꙗ҆́кѡ бг҃ъ сы́й неви́димь, и҆ вопло́щьсѧ ви́димь бы́сть, ѿ дв҃ы ѻ҆трокови́цы неискꙋсомꙋ́жныѧ, и҆ сме́ртїю свое́ю сме́рть разрꙋшѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Влⷣки хрⷭ҇та̀ ѡ҆свѧщє́нныѧ сосꙋ́ды, цр҃кве забра̑ла и҆ столпы̀ гдⷭ҇ни мч҃нки въ весе́лїи дꙋшѝ воспои́мъ согла́снѡ."
 },
 {
  "type": "TEXT",
  "value": "Ст҃и́телїе хрⷭ҇тѡ́вы, и҆ прпⷣбныхъ всѣ́хъ ли́къ бж҃е́ственный ра́дꙋетсѧ съ вы́шними си́лами: тѣ́хъ мл҃твами хрⷭ҇тѐ, сп҃са́й пою́щыѧ тѧ̀."
 },
 {
  "type": "TEXT",
  "value": "Терпѣ́нїе бл҃го́е же́нъ преподо́бнѣ и҆ страда́льнѣ просїѧ́вшихъ и҆ вѣ́рою по́стничествовавшихъ, є҆́ѵꙋ послꙋша́нїемъ ᲂу҆ѧзви́вшаго низложѝ."
 },
 {
  "type": "TEXT",
  "value": "Сла́ва: Ты̀ и҆́же а҆́да разрꙋши́вый, и҆ сме́рть попра́вый, твое́ю сме́ртїю, ꙗ҆̀же преста́вилъ є҆сѝ въ вѣ́рѣ ᲂу҆поко́й, и҆ раѧ̀ покажѝ жи́тели."
 },
 {
  "type": "TEXT",
  "value": "И҆ ны́нѣ: Бг҃оро́диченъ: Пла́мень и҆́же кꙋпинꙋ̀ дре́вле не ѡ҆палѧ́ющїй, ви́дѧ законополо́жникъ, наꙋча́шесѧ ѡ҆́бразꙋ ржⷭ҇тва̀ твоегѡ̀, бг҃ороди́тельнице дв҃о, при́снѡ бл҃гослове́ннаѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и."
 },
 {
  "type": "TEXT",
  "value": "Терпѣ́нїе же и҆ пожда́нїе, и҆ крѡ́ви всѣ́хъ мч҃нкъ, и҆збавле́нїе прїе́мъ, бл҃гоче́стнѡ ᲂу҆со́пшыѧ ᲂу҆ тебѐ ᲂу҆поко́й, ꙗ҆́кѡ млⷭ҇тивъ и҆ бл҃гопремѣни́тель."
 },
 {
  "type": "TEXT",
  "value": "Причета́вый къ перворѡ́днымъ, и҆ првⷣнымъ твои̑мъ сп҃се, дꙋ́шы ра̑бъ твои́хъ къ тебѣ̀ преста́влєныѧ, сподо́би непреста́ннѡ тебѐ наслажда́тисѧ, всѣ́ми владꙋ́щагѡ."
 },
 {
  "type": "TEXT",
  "value": "Сла́ва: Съ весе́лїемъ и҆ со дерзнове́нїемъ и҆ свѣ́тлостїю сло́ве бж҃їй и҆зба́вителю, бл҃говолѝ ꙗ҆́кѡ бг҃ъ на ѻ҆́блацѣхъ срѣ́сти тѧ̀, и҆̀хже ты̀ прїѧ́лъ є҆сѝ ны́нѣ ꙗ҆́кѡ млⷭ҇тивъ."
 },
 {
  "type": "TEXT",
  "value": "И҆ ны́нѣ: Бл҃гослове́ннаѧ бг҃ороди́тельнице дв҃о мт҃и, ра́дꙋйсѧ: тебе́ бо ра́ди бы́сть вои́стиннꙋ сме́рти потребе́нїе, живо́тъ же неразори́мый ᲂу҆ме́ршымъ дарова́сѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а."
 },
 {
  "type": "TEXT",
  "value": "Ст҃и́телїе, прⷪ҇ро́цы, и҆ мч҃нцы, сщ҃е́нный по́двигъ сконча́вшїи, сщ҃е́нное ᲂу҆лꙋчи́ша водворе́нїе со а҆́гг҃лы: съ ни́миже про́сѧтъ ѡ҆чище́нїѧ на́мъ всѣ̑мъ и҆ ве́лїѧ млⷭ҇ти."
 },
 {
  "type": "TEXT",
  "value": "Просвѣти́вшесѧ дꙋ́хомъ прпⷣбнїи, бѣсо́вскꙋю тьмꙋ̀ погꙋби́ша: съ ни́миже сщ҃енномч҃нцы, и҆ ст҃и́телїе, прⷪ҇ро́цы съ првⷣными, бг҃а во хвале́нїи сла́вѧтъ."
 },
 {
  "type": "TEXT",
  "value": "И҆́же пре́жде безꙋ́мїемъ хвалѧ́йсѧ погꙋби́ти зе́млю и҆ мо́ре, жена́ми всегда̀ попира́етсѧ, страда́нїемъ же и҆ посто́мъ послꙋжи́вшими бг҃ꙋ со ᲂу҆се́рдїемъ."
 },
 {
  "type": "TEXT",
  "value": "Сла́ва: Ѡ҆ всѣ́хъ хрⷭ҇тѐ, мо́лимсѧ тѝ, вѣ́рою ᲂу҆со́пшихъ, ꙗ҆́кѡ млⷭ҇рдъ си́хъ къ ликѡ́мъ причтѝ сп҃са́емыхъ, непреста́ннѡ вопїю́щихъ: всѧ̑ дѣла̀ бл҃гослови́те гдⷭ҇нѧ гдⷭ҇а."
 },
 {
  "type": "TEXT",
  "value": "И҆ ны́нѣ: Бг҃оро́диченъ: Млⷭ҇ти твоеѧ̀ сподо́би мѧ̀, бл҃гомлⷭ҇тивное сло́во ро́ждшаѧ, бг҃ороди́тельнице влⷣчце, и҆ вопїю́ща мѧ̀ сп҃сѝ: всѧ̑ дѣла̀ бл҃гослови́те гдⷭ҇нѧ гдⷭ҇а."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Мч҃нкѡвъ прїе́млѧ молє́нїѧ, и҆ ми́лованїе къ є҆диноплеме́нномꙋ, дꙋ́шы ᲂу҆поко́й влⷣко, въ вѣ́рѣ твое́й ᲂу҆со́пшихъ, грѣхѝ презрѧ̀ си́хъ вопїю́щихъ тѝ: всѧ̑ дѣла̀ бл҃гослови́те гдⷭ҇нѧ гдⷭ҇а."
 },
 {
  "type": "TEXT",
  "value": "Ме́ртвъ со беззако́нникома вмѣни́всѧ, мє́ртвымъ и҆сточи́лъ є҆сѝ жи́знь безсме́ртнꙋю, преста́влєныѧ ᲂу҆́бѡ рабы̑ твоѧ̑ ѡ҆ наде́жди воскрⷭ҇нїѧ, црⷭ҇твїе твоѐ ᲂу҆лꙋчи́ти сподо́би сп҃се, тебѣ̀ вопїю́щихъ: всѧ̑ дѣла̀ бл҃гослови́те гдⷭ҇нѧ гдⷭ҇а."
 },
 {
  "type": "TEXT",
  "value": "Сла́ва: Вои́стиннꙋ приснотекꙋ́щїй и҆сто́чниче бл҃гости, въ нбⷭ҇ныхъ селе́нїихъ сконча́вшыѧсѧ рабы̑ твоѧ̑, и҆ житїѐ тлѣ́нное ѡ҆ста́вльшыѧ, кро́ткѡ сп҃се, примирѝ, тебѣ̀ вопїю́щыѧ: всѧ̑ дѣла̀ бл҃гослови́те гдⷭ҇нѧ гдⷭ҇а."
 },
 {
  "type": "TEXT",
  "value": "И҆ ны́нѣ: Є҆ди́на ты̀ ꙗ҆ви́ласѧ є҆сѝ на землѝ дв҃о пречⷭ҇таѧ, и҆ мт҃и безмꙋ́жнаѧ: бг҃а бо родила̀ є҆сѝ влⷣчце па́че сло́ва и҆ смы́сла, и҆ вѣ́чнꙋю жи́знь мє́ртвымъ и҆сточи́ла є҆сѝ. Тѣ́мже вси́ тѧ бл҃гослови́мъ, мр҃і́е бг҃оневѣ́сто."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Ви́дѣвше бж҃е́ствєнныѧ да́ры мч҃нцы, и҆ по́чєсти прїе́млюще вели́кихъ свои́хъ болѣ́зней, ра́дꙋютсѧ хрⷭ҇та̀ велича́юще, си́хъ вои́стиннꙋ возвели́чившаго, и҆ побѣдоно́сцы показа́вшаго."
 },
 {
  "type": "TEXT",
  "value": "Ꙗ҆́кѡ ст҃и́тельствꙋюще лю́демъ, поста́влени бы́вше ст҃и́телїе бг҃опроповѣ̑дницы, ꙗ҆́кѡ просвѣти́вшесѧ посто́мъ, со́лнца свѣтлѣ́йше прпⷣбнїи просїѧ́сте, вѣ́рныхъ ѡ҆зарѧ́юще дѣ́лъ вели́кихъ ꙗ҆вле́нїемъ."
 },
 {
  "type": "TEXT",
  "value": "Со сщ҃енномч҃нки кꙋ́пнѡ, и҆ со всѣ́ми прⷪ҇ро́ки, ᲂу҆бл҃жи́мъ всѧ̑ прпⷣбныѧ и҆ првⷣники, и҆ жєны̀ свѣ́тлѡ ᲂу҆годи́вшыѧ, тѣ́хъ мольба́ми хрⷭ҇тѐ, вопїю́ще: и҆зба́ви гее́нны дꙋ́шы на́шѧ."
 },
 {
  "type": "TEXT",
  "value": "Сла́ва: Є҆ѧ́же сподо́бишасѧ ра́дости ст҃і́и, и҆̀же до́брѣ тебѣ̀ хрⷭ҇тѐ ᲂу҆годи́вшїи, тоѧ̀ преста́вльшыѧсѧ къ тебѣ̀ вѣ́рою сподо́би, тѣ́хъ презира́ѧ согрѣшє́нїѧ, гдⷭ҇и є҆ди́не многомлⷭ҇тиве."
 },
 {
  "type": "TEXT",
  "value": "Бг҃оро́диченъ: Ꙗ҆́вльшисѧ вы́шнихъ херꙋві̑мъ всенепоро́чнаѧ превы́шши, ꙗ҆́кѡ ро́ждши содержи́телѧ всѧ́ческихъ, вы́шши ᲂу҆́мъ мо́й содѣ́лай, на стра̑сти плѡтскі́ѧ ᲂу҆крѣплѧ́ющи мѧ̀, влⷣчнѧѧ твори́ти хотѣ̑нїѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Да́лъ є҆сѝ и҆́стиннымъ страда́льцємъ, и҆ мч҃нкѡмъ дерзнове́нїе моли́ти тѧ̀ гдⷭ҇и: да́ждь же вѣ́рою преста́вльшымсѧ, бж҃е́ственное тѣ́хъ ра́ди и҆збавле́нїе, въ мѣ́сто селе́нїѧ ст҃а́гѡ всели́тисѧ да́рꙋѧ."
 },
 {
  "type": "TEXT",
  "value": "Манове́нїемъ вседѣ́тельнымъ, и҆́же всѧ́чєскаѧ поле́знѣ содѣ́ловаѧ, живы́ми и҆мѣ́ѧ ѻ҆́бласть, и҆ ме́ртвыми гдⷭ҇ьствꙋѧ, ꙗ҆́кѡ всеси́ленъ, ᲂу҆чинѝ, ꙗ҆̀же преста́вилъ є҆сѝ рабы̑ твоѧ̑ на вода́хъ поко́йныхъ."
 },
 {
  "type": "TEXT",
  "value": "Сла́ва: И҆́же є҆стество́мъ сы́й ꙗ҆́кѡ бл҃гъ, и҆́же бога́тый въ ми́лостехъ и҆ въ бл҃гости, и҆зба́ви ѿ тьмы̀ кромѣ́шнїѧ, призыва́ющыѧ твоѐ и҆́мѧ, вѣ́рою ѡ҆правда́въ и҆ бл҃года́тїю, си́хъ просвѣтѝ, ꙗ҆́кѡ чл҃вѣколю́бецъ."
 },
 {
  "type": "TEXT",
  "value": "Бг҃оро́диченъ: Ѡ҆́бразы, всенепоро́чнаѧ, твоегѡ̀ ржⷭ҇тва̀ прⷪ҇ро́цы проповѣ́даша, и҆́накѡ же дрꙋзі́и пресла́внѡ тебѣ̀ нарица̑нїѧ слага́юще: живо́тъ бо во а҆́дѣ сꙋ́щымъ родила̀ є҆сѝ, держа́вꙋ сме́рти разрꙋша́ющїй."
 }
]