ponomar-pwa/static/data/shared/services/canons/paraclete/tone5/thu.json

[
 {
  "type": "HEADER",
  "value": "Канѡ́нъ ст҃ы̑мъ а҆пⷭ҇лѡмъ, творе́нїе ѳеофа́на, є҆пⷭ҇кпа нїкі́йскагѡ, гла́съ є҃:"
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ: і҆и҃лѧ же сп҃сѐ, побѣ́днꙋю пѣ́снь пою́ща."
 },
 {
  "type": "TEXT",
  "value": "Сїѧ́нїемъ первода́тнагѡ свѣтода́нїѧ, пло́тїю бесѣ́довати человѣ́кѡмъ сподо́бившагѡсѧ, ѡ҆богати́вшесѧ сла́внїи, дꙋшѝ моеѧ̀ разрꙋши́те всѧ́къ мра́къ, бж҃е́ственнїи а҆пⷭ҇ли. Два́жды."
 },
 {
  "type": "TEXT",
  "value": "Напрѧ́гъ бж҃е́ственный лꙋ́къ, ꙗ҆́коже стрѣ́лы ва́съ въ ве́сь мі́ръ посла̀ а҆пⷭ҇ли, стрѣ́лы сокрꙋша́ющыѧ ѕлоко́зненнагѡ всѧ̑, и҆ и҆сцѣлѧ́ющыѧ вѣ́рныхъ ꙗ҆́звы."
 },
 {
  "type": "TEXT",
  "value": "И҆мꙋ́ще премꙋ́дрость са́мꙋю ᲂу҆ч҃тлѧ, ᲂу҆мꙋдри́сте а҆пⷭ҇ли всѧ̑ концы̀. Тѣ́мже мѧ̀ ᲂу҆мꙋдри́те, вра́жїе всѧ́ко ѕлодѣ́йство ѿгонѧ́ти."
 },
 {
  "type": "TEXT",
  "value": "Бг҃оро́диченъ: Є҆ди́на бл҃гослове́ннаѧ, бг҃ора́дованнаѧ, бл҃гослове́ньми человѣ́ческїй ро́дъ ѡ҆бра́довавши, хрⷭ҇та̀ молѝ съ бж҃е́ственными, пречⷭ҇таѧ, а҆пⷭ҇лы, поми́ловатисѧ на́мъ."
 },
 {
  "type": "HEADER",
  "value": "Дрꙋгі́й канѡ́нъ, и҆́же во ст҃ы́хъ ѻ҆тцꙋ̀ на́шемꙋ нїкола́ю чꙋдотво́рцꙋ, гла́съ є҃, творе́нїе і҆ѡ́сифово, є҆гѡ́же краегране́сїе:"
 },
 {
  "type": "TEXT",
  "value": "Пѧ́тое принесꙋ̀ тебѣ̀ нїко́лае пѣ́нїе."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Вѣ́рою и҆ любо́вїю, ѻ҆́тче, присво́ивсѧ бг҃ови, всест҃а́ѧ сегѡ̀ и҆спо́лнилъ є҆сѝ хотѣ̑нїѧ: и҆́мже по всемꙋ̀ ст҃ъ бы́лъ є҆сѝ, ст҃и́телю мꙋ́дре нїко́лае."
 },
 {
  "type": "TEXT",
  "value": "И҆мꙋ́ще тѧ̀ предста́телѧ къ ще́дромꙋ, и҆̀же напа́стьми и҆ печа́льми ѡ҆держи́мїи, къ тебѣ̀ прибѣга́емъ: да́рꙋй рꙋ́кꙋ сп҃са́ющꙋю на́съ ѿ всѧ́кїѧ тѣсноты̀."
 },
 {
  "type": "TEXT",
  "value": "Мѵ́рѧнѡмъ ст҃и́телѧ хрⷭ҇то́съ пома́за тѧ̀, бл҃гово́нїемъ чꙋде́съ на́съ ѡ҆бл҃гоꙋха́юща. Тѣ́мже мо́лимъ тѧ̀ нїко́лае, ѕлово́нїѧ грѣхо́внагѡ и҆зба́вити на́съ."
 },
 {
  "type": "TEXT",
  "value": "Бг҃оро́диченъ: Дре́вле прⷪ҇ро́ческїй тѧ̀ ли́къ пронаречѐ го́рꙋ бж҃е́ственнꙋю дв҃о, и҆ две́рь непроходи́мꙋю. Тѣ́мже мо́лимсѧ тѝ: покаѧ́нїѧ двє́ри бж҃е́ствєнныѧ, ѻ҆трокови́це, ѿве́рзи на́мъ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче."
 },
 {
  "type": "TEXT",
  "value": "И҆́же пло́тїю ѡ҆бнища́вый, премно́гїй бл҃гостїю, є҆гѡ̀ ра́ди ѡ҆бнища́вшыѧ, ѡ҆богатѝ ва́съ сла́внїи а҆пⷭ҇ли, дарова́ньми всѧ́кими, ѡ҆богаща́ющѧ концы̀ бж҃е́ственными и҆ чⷭ҇тны́ми ра́зꙋмы. Два́жды."
 },
 {
  "type": "TEXT",
  "value": "Оу҆ѧзви́хсѧ ꙗ҆дови́тымъ ѕмі́ѧ ᲂу҆грызе́нїемъ, ᲂу҆ѧ́звено се́рдце стѧжа́хъ. Тѣ́мже тѝ вопїю̀ хрⷭ҇тѐ, менѐ ра́ди ᲂу҆ѧзви́вшемꙋсѧ: а҆пⷭ҇лъ твои́хъ мольба́ми и҆сцѣлѝ, и҆ сп҃си́ мѧ, молю́сѧ."
 },
 {
  "type": "TEXT",
  "value": "Мре́жею мл҃твъ ва́шихъ всебл҃же́ннїи, ѿ глꙋбины̀ ѕло́бныѧ бори́телѧ, и҆ ѿ треволне́нїѧ помышле́нїй, и҆ ѿ страсте́й смертоно́сныхъ возве́дше мѧ̀, приведи́те бг҃ꙋ всѣ́хъ сп҃са́ема."
 },
 {
  "type": "TEXT",
  "value": "Бг҃оро́диченъ: Ꙗ҆́же до́ждь прїе́мшаѧ нбⷭ҇ный, со а҆пⷭ҇лы того̀ молѝ: ᲂу҆ста́вити пото́ки мои́хъ страсте́й, пꙋчи́нꙋ и҆зсꙋша́ющи грѣха̀ моегѡ̀, и҆ сп҃сти́ мѧ, чи́стѡ тебѐ сла́вѧщаго."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Стрѣ́лы лꙋка́вагѡ притꙋпи́лъ є҆сѝ прпⷣбне, противле́нїемъ бж҃е́ственныхъ твои́хъ трꙋдѡ́въ: но твои́ми мл҃твами премꙋ́дре, ѿ тогѡ̀ ѕлодѣ́йствїѧ и҆ наси́лїѧ соблюдѝ неврежде́нны, тебѐ воспѣва́ющыѧ, вели́кїй нїко́лае."
 },
 {
  "type": "TEXT",
  "value": "Житїѐ а҆́гг҃льское на землѝ показа́въ, ны́нѣ со а҆́гг҃лы при́снѡ предстои́ши прⷭ҇то́лꙋ трⷪ҇ческомꙋ, сщ҃е́нне, на́шихъ согрѣше́нїй и҆ напа́стей разрѣше́нїѧ просѧ̀, ѻ҆́тче первост҃и́телю нїко́лае."
 },
 {
  "type": "TEXT",
  "value": "Оу҆ма̀ моегѡ̀ ѡ҆мраче́нїе всѐ ѿженѝ нїко́лае, твои́ми свѣтоно́сными мл҃твами, ᲂу҆ти́ши бꙋ́рю страсте́й, ᲂу҆пра́ви мѧ̀ ѻ҆́тче, къ безстра́стїѧ приста́нищꙋ, молю́сѧ, ꙗ҆́кѡ да во хвале́нїи сла́влю тѧ̀."
 },
 {
  "type": "TEXT",
  "value": "Бг҃оро́диченъ: Предстоѧ́щи ѡ҆деснꙋ́ю хрⷭ҇та̀, ꙗ҆́кѡ цр҃и́ца, рѧ́сны златы́ми бг҃оѡбра́дованнаѧ ѡ҆дѣ́ѧна вои́стиннꙋ, на́мъ црⷭ҇твїе нбⷭ҇ное мл҃твами твои́ми ѻ҆трокови́це, и҆схода́тай всенепоро́чнаѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Бж҃е́ственное твоѐ разꙋмѣ́въ и҆стоща́нїе, прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во сп҃се́нїе люде́й твои́хъ сп҃стѝ пома̑занныѧ твоѧ̑ прише́лъ є҆сѝ."
 },
 {
  "type": "TEXT",
  "value": "Две́рь сы́й і҆и҃съ бг҃ъ на́шъ и҆ гдⷭ҇ь, ѿве́рзлъ своѐ а҆пⷭ҇лѡмъ позна́нїе, всѣ̑мъ ꙗ҆зы́кѡмъ две́рь ѿве́рзе тѣ́хъ ᲂу҆че́ньми. Два́жды."
 },
 {
  "type": "TEXT",
  "value": "Сн҃е бж҃їй, сы́ны по прича́стїю нбⷭ҇нагѡ ѻ҆ц҃а̀ твоегѡ̀ а҆пⷭ҇лы ꙗ҆ви́лъ є҆сѝ: моле́нїемъ и҆́хъ сы́ны свѣ́та всѣ́хъ на́съ сотворѝ."
 },
 {
  "type": "TEXT",
  "value": "И҆̀же на прⷭ҇то́лѣхъ двоюна́десѧтихъ, съ сꙋдїе́ю и҆ цр҃е́мъ хотѧ́ще пресла́внѡ сѣ́сти, стра́шнагѡ и҆ ᲂу҆жа́снагѡ мѧ̀ а҆пⷭ҇ли, и҆зба́вите сꙋда̀."
 },
 {
  "type": "TEXT",
  "value": "Бг҃оро́диченъ: Бж҃е́ственнагѡ сщ҃е́нїѧ ковче́же, ѡ҆ст҃ѝ мою̀ дꙋ́шꙋ, помышле́нїе просвѣтѝ, всегда̀ молѧ́щи хрⷭ҇та̀ со а҆пⷭ҇лы, да сп҃се́тъ мѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Мимотекꙋ́щими и҆змѣни́лъ є҆сѝ бꙋ̑дꙋщаѧ, и҆́хже прича́стники и҆ на́съ ст҃ы́ми твои́ми мл҃твами сотворѝ нїко́лае, и҆ и҆скꙋше́нїѧ всѧ́кагѡ и҆збавлѧ́ѧ жите́йскагѡ."
 },
 {
  "type": "TEXT",
  "value": "Мѵ́рѧнѡмъ первопрⷭ҇то́льникъ бы́въ нїко́лае, всѧ̑ чꙋ̑вствїѧ се́рдца моегѡ̀ мѵ́ромъ ѡ҆бл҃гоꙋха́й ст҃е, и҆ стра̑сти ѕлосмра̑дныѧ ѿ сегѡ̀, мл҃твами твои́ми ѿгонѧ́й всегда̀."
 },
 {
  "type": "TEXT",
  "value": "Сокрꙋшѝ вра̑жїѧ кѡ́зни ви̑димыѧ, и҆ неви̑димыѧ, нїко́лае, всегда̀ борю́щыѧ ны̀ на́шѧ врагѝ въ безконе́чнꙋю па́гꙋбꙋ послѝ."
 },
 {
  "type": "TEXT",
  "value": "Бг҃оро́диченъ: Ст҃а́ѧ бцⷣе, помози́ ми, сла́достьми вы́нꙋ потоплѧ́емꙋ тѣле́сными, и҆ на ѻ҆дрѣ̀ ᲂу҆ны́нїѧ при́снѡ слежа́щꙋ и҆ стенѧ́щꙋ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю хрⷭ҇тѐ, ꙗ҆́кѡ є҆ди́нъ бл҃гоꙋтро́бенъ."
 },
 {
  "type": "TEXT",
  "value": "Дх҃о́внїи виті́и, чⷭ҇тні́и а҆пⷭ҇ли, на го́рницѣ, во ѻ҆́гненнѣ ви́дѣ дх҃а ст҃а́го къ ни̑мъ прише́дша, стра́шнѡ прїѧ́ша. Два́жды."
 },
 {
  "type": "TEXT",
  "value": "Сокрꙋша́юще нечє́стїѧ, сокрꙋше́нꙋю прегрѣше́ньми мою̀ мы́сль, росо́ю и҆сцѣле́нїѧ а҆пⷭ҇ли и҆сцѣли́те."
 },
 {
  "type": "TEXT",
  "value": "Стрѣ́лы и҆збра̑нныѧ ва́съ хрⷭ҇то́съ посла̀ а҆пⷭ҇ли, сокрꙋша́ющыѧ стрѣ́лы лꙋка́вствїѧ: тѣ́мже мѧ̀ и҆сцѣли́те ᲂу҆ѧ́звеннаго вра́жїими стрѣла́ми."
 },
 {
  "type": "TEXT",
  "value": "Бг҃оро́диченъ: Не ѡ҆сꙋдѝ менѐ, ни ѿве́ржи менѐ ѿ лица̀ твоегѡ̀, многомлⷭ҇тиве: мо́литъ тѧ̀ чи́стѡ ро́ждшаѧ, и҆ а҆пⷭ҇льскїй собо́ръ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Кꙋмі́ры сокрꙋши́лъ є҆сѝ і҆́дѡльскїѧ ст҃е, и҆ совѣ́ты бездѣ́льны є҆реті́чествꙋющихъ показа́лъ є҆сѝ нїко́лае, и҆ ведѡ́мыѧ на сме́рть и҆зба́вилъ є҆сѝ."
 },
 {
  "type": "TEXT",
  "value": "Оу҆́треневавъ ко гдⷭ҇ꙋ и҆змла́да прпⷣбне, и҆ та́мѡ сꙋ́щими свѣтоли́тїи ве́сь просвѣти́лсѧ є҆сѝ. Тѣ́мже молю́сѧ: дꙋшѝ моеѧ̀ ѻ҆́блаки разженѝ."
 },
 {
  "type": "TEXT",
  "value": "Тебѐ мо́лимъ, ѻ҆́тче нїко́лае, въ ча́съ се́й посредѣ̀ бꙋ́ди всѣ́хъ призыва́ющихъ тѧ̀, и҆ ꙗ҆́же ко сп҃се́нїю да́рꙋй на́мъ прошє́нїѧ."
 },
 {
  "type": "TEXT",
  "value": "Бг҃оро́диченъ: Непости́жимый ᲂу҆мо́мъ, бг҃обл҃года́тнаѧ, ѡ҆бдержа́нїе тѧ̀, плотоно́сецъ бы́въ, прїѧ́тъ человѣ́ки, и҆збавлѧ́ѧ ѿ ѡ҆держа́щихъ скорбе́й."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Распространѧ́ющеесѧ ᲂу҆ста́вилъ є҆сѝ ѕло́бы согни́тїе, ꙗ҆зы́кѡвъ дꙋ́шы, чл҃вѣколю́бче, со́лїю ᲂу҆че́нїѧ сщ҃е́нныхъ ᲂу҆чєни́къ твои́хъ. Два́жды."
 },
 {
  "type": "TEXT",
  "value": "Глꙋбинꙋ̀ вѣ́си ѕѡ́лъ мои́хъ влⷣко хрⷭ҇тѐ, да́ждь мѝ рꙋ́кꙋ, и҆ сп҃си́ мѧ чл҃вѣколю́бче, мольба́ми сщ҃е́нныхъ а҆пⷭ҇лъ твои́хъ."
 },
 {
  "type": "TEXT",
  "value": "Сꙋдїѐ пра́веднѣйшїй, въ де́нь сꙋда̀ стра́шнагѡ, тре́петнагѡ мѧ̀ и҆зба́ви ѡ҆сꙋжде́нїѧ, бл҃госла́вныхъ а҆пⷭ҇лъ твои́хъ мольба́ми."
 },
 {
  "type": "TEXT",
  "value": "Бг҃оро́диченъ: Ѿча́ѧннаго мѧ̀ ѿ мно́жества беззако́нїй, сп҃се́нїѧ гдⷭ҇и сподо́би, ᲂу҆чєни́къ и҆ мт҃ре твоеѧ̀ мольба́ми."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Млⷭ҇тива содѣ́лай влⷣкꙋ, твои́ми мл҃твами, всѣ̑мъ чтꙋ́щымъ тѧ̀ нїко́лае, ꙗ҆́кѡ да на́шихъ прегрѣше́нїй разрѣше́нїе да́рꙋетъ."
 },
 {
  "type": "TEXT",
  "value": "Недꙋ̑гъ и҆зба́ви и҆ собла̑знъ жите́йскихъ, напа́стей же и҆ скорбе́й нїко́лае, тѧ̀ мл҃твенника ко гдⷭ҇ꙋ стѧжа́вшихъ."
 },
 {
  "type": "TEXT",
  "value": "Врача̀ тѧ̀ и҆зѧ́щна влⷣка показа̀ хрⷭ҇то́съ: тѣ́мже недꙋ́ги и҆сцѣлѝ, бл҃гоче́стнѡ къ тебѣ̀ пристꙋпа́ющихъ, нїко́лае."
 },
 {
  "type": "TEXT",
  "value": "Бг҃оро́диченъ: Роди́тельница безмꙋ́жнаѧ, бг҃омт҃и была̀ є҆сѝ, чⷭ҇таѧ. Сегѡ̀ ра́ди вѣ́рою молю̀ тѧ̀: дꙋшѝ моеѧ̀ ᲂу҆ны̑нїѧ разженѝ."
 },
 {
  "type": "HEADER",
  "value": "Пѣ́снь з҃"
 },
 {
  "type": "TEXT",
  "value": "І҆рмо́съ: Превозноси́мый ѻ҆тцє́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ согла́снѡ пою́щыѧ: бж҃е, бл҃гослове́нъ є҆сѝ."
 },
 {
  "type": "TEXT",
  "value": "Превозноси́мый ѻ҆тцє́въ гдⷭ҇ь, ва́съ превознесѐ, всю̀ низве́рже вра́жїю си́лꙋ, ᲂу҆ч҃нцы̀ хрⷭ҇тѡ́вы бг҃ови́дцы."
 },
 {
  "type": "TEXT",
  "value": "Скве́рнꙋ се́рдца моегѡ̀ стрꙋѧ́ми ᲂу҆миле́нїѧ, ва́шими мольба́ми, а҆пⷭ҇ли, ѡ҆мы́йте, ᲂу҆ча́ще взыва́ти: бж҃е, бл҃гослове́нъ є҆сѝ."
 },
 {
  "type": "TEXT",
  "value": "Ѻ҆гне́мъ бж҃е́ственнагѡ дх҃а ве́щь попали́сте всѧ́кагѡ сꙋ́етства: тѣ́мже палѧ́щїѧ мѧ̀ и҆зба́вите гее́нны, ᲂу҆ч҃нцы̀ бг҃а сло́ва."
 },
 {
  "type": "TEXT",
  "value": "Бг҃оро́диченъ: Ꙗ҆́же паде́нїѧ а҆да́мова и҆справле́нїе, воздви́гни па́дшаго мѧ̀ въ про́пасть ѕло́бнꙋю, мл҃твами твои́ми дв҃о, и҆ бж҃е́ственныхъ а҆пⷭ҇лъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ве́сь возложи́всѧ бг҃ꙋ нїко́лае, всего́ мѧ сп҃сѝ, жите́йскими страстьмѝ ѻ҆каѧ́ннѡ всегда̀ впа́дающа, бг҃омꙋ́дре."
 },
 {
  "type": "TEXT",
  "value": "Свѣти́ло бг҃оза́рнѣйшее, ᲂу҆ма̀ моегѡ̀ ѡ҆зарѝ, страсте́й мра́комъ при́снѡ помрача́ема, и҆ дава́й бл҃гоѡбра́знѡ ходи́ти въ житїѝ."
 },
 {
  "type": "TEXT",
  "value": "Всѧ̑каѧ ѿверза́ємаѧ на мѧ̀ нїко́лае, ᲂу҆ста̀ лꙋка̑ваѧ, твои́ми мл҃твами заградѝ: и҆ и҆зба́ви мѧ̀ ви́димыхъ вра̑гъ и҆ неви́димыхъ."
 },
 {
  "type": "TEXT",
  "value": "Бг҃оро́диченъ: И҆з̾ тебѐ на́мъ возсїѧ̀ невече́рнее сл҃нце, ѻ҆́блаче всесвѣ́тлый, хрⷭ҇то́съ бг҃ъ на́шъ, просвѣща́ѧ и҆̀же во тьмѣ̀ невѣ́дѣнїѧ бцⷣе."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Тебѣ̀ вседѣ́телю, въ пещѝ ѻ҆́троцы, всемі́рный ли́къ спле́тше поѧ́хꙋ: дѣла̀ всѧ̑каѧ гдⷭ҇а по́йте. И҆ превозноси́те во всѧ̑ вѣ́ки."
 },
 {
  "type": "TEXT",
  "value": "Ты̀ мы́слєнныѧ ѻ҆́блаки, а҆пⷭ҇лы сло́ве распросте́рлъ є҆сѝ, кропѧ́щыѧ на ны̀ до́ждь премꙋ́дрыхъ и҆ бж҃е́ственныхъ ᲂу҆че́нїй, и҆ напоѧ́ющыѧ на́съ во всѧ̑ вѣ́ки."
 },
 {
  "type": "TEXT",
  "value": "Преꙋдо́бреннїи столпѝ цр҃ко́внїи, и҆̀же сїю̀ держа́щїи вѣ́ры ᲂу҆че́ньми, согни́вшꙋюсѧ дꙋшѝ моеѧ̀ хра́минꙋ, бж҃е́ственнымъ хитродѣ́йствїемъ ᲂу҆тверди́те, бг҃ови́дцы."
 },
 {
  "type": "TEXT",
  "value": "Стенѝ дꙋшѐ, и҆ сле́зъ пото́ки ѿ всегѡ̀ се́рдца принесѝ гдⷭ҇еви, зовꙋ́щи: є҆ди́не ще́дрый, сп҃сѝ и҆ ѡ҆чи́сти мѧ̀, всесла́вныхъ а҆пⷭ҇лъ мл҃твами бл҃гопрїѧ́тными."
 },
 {
  "type": "TEXT",
  "value": "Бг҃оро́диченъ: Сїѡ́не и҆збра́нный, црⷭ҇кїй гра́де, вы́шнѧгѡ мѧ̀ гра́да граждани́на сотворѝ, съ бж҃е́ственными ᲂу҆ч҃нкѝ молѧ́щи пречⷭ҇таѧ дв҃о, безлѣ́тнаго сн҃а твоего̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Въ мѵ́рѣхъ первост҃и́тель бы́въ вели́кїй, дꙋшѝ моеѧ̀ нїко́лае, чꙋ̑вствїѧ мѵ́ромъ ѡ҆бл҃гоꙋха́й: ꙗ҆́кѡ да и҆збѣ́гнꙋ страсте́й ѕлово́нїѧ, и҆ ᲂу҆тѣ́шителевꙋ прїимꙋ̀ бл҃года́ть."
 },
 {
  "type": "TEXT",
  "value": "Оу҆ста́вилъ є҆сѝ премꙋ́дре твоегѡ̀ ст҃а́гѡ ѧ҆зы́ка стрꙋѧ́ми, стрꙋи̑ а҆́рїєвы хꙋ̑льныѧ. Тѣ́мже вопїю́ ти: то́ки страсте́й мои́хъ и҆зсꙋшѝ мл҃твами твои́ми, нїко́лае всебл҃же́нне."
 },
 {
  "type": "TEXT",
  "value": "И҆зба́ви на́съ согрѣше́нїй мл҃твами твои́ми, де́мѡнскагѡ ѡ҆ѕлобле́нїѧ, ꙗ҆зы́ческагѡ плѣне́нїѧ, и҆ всѣ́хъ человѣ̑къ лꙋка́внѣйшагѡ ѕла́гѡ вре́да, да тѧ̀ ꙗ҆́кѡ и҆зба́вителѧ на́шего восхвалѧ́емъ."
 },
 {
  "type": "TEXT",
  "value": "Трⷪ҇ченъ: И҆̀же трⷪ҇чески є҆динонача́лїе непреста́ннѡ вѣ́рою сла́вѧще, возопїи́мъ: ѻ҆́тче, и҆ сло́ве, и҆ всест҃ы́й дш҃е, пѣсносло́вимъ тѧ̀ во всѧ̑ вѣ́ки"
 },
 {
  "type": "TEXT",
  "value": "Бг҃оро́диченъ: Въ пло́ть на́съ ра́ди и҆з̾ тебѐ бг҃ъ ѡ҆бле́ксѧ, чⷭ҇тꙋю тебѐ всенепоро́чнꙋю, всемꙋ̀ ро́дꙋ на́шемꙋ бж҃е́ственнꙋю показа̀ дв҃о предста́тельницꙋ. Тѣ́мже тѧ̀ вѣ́рнїи велегла́снѡ воспѣва́емъ."
 },
 {
  "type": "TEXT",
  "value": "Та́же пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: И҆ покло́ны."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: И҆са́їе ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆бл҃жа́емъ."
 },
 {
  "type": "TEXT",
  "value": "Нб҃са̀ ᲂу҆ѕвѣ́здены свѣтлостьмѝ бж҃е́ственныхъ добродѣ́телей ᲂу҆́мнѡ ꙗ҆ви́стесѧ, посредѣ̀, хрⷭ҇та̀, ꙗ҆́кѡ со́лнце и҆мꙋ́ще, и҆ зємны́ѧ концы̀ премꙋ́дрїи ѡ҆бнови́сте: сегѡ̀ ра́ди бл҃жи́ми є҆стѐ."
 },
 {
  "type": "TEXT",
  "value": "Хрⷭ҇тѡ́вы ꙗ҆́звы на бж҃е́ственнѣмъ тѣлесѝ ва́шемъ, ꙗ҆́кѡ ᲂу҆́тварь всебл҃голѣ́пнꙋ носѧ́ще премꙋ́дрїи, ᲂу҆ѧ́звленꙋю мою̀ дꙋ́шꙋ де́мѡнскими стрѣла́ми, ꙗ҆̀же ко гдⷭ҇ꙋ хода́тайствы и҆сцѣли́те."
 },
 {
  "type": "TEXT",
  "value": "Въ ро́вѣ преиспо́днѣмъ мѧ̀ грѣха̀ слежа́ща, хрⷭ҇тѐ, и҆ лѣ́ности лю́тыѧ сно́мъ дꙋ́шꙋ ѡ҆тѧгчи́вшаго, твои́ми сло́ве, ᲂу҆ч҃нкѝ, ꙗ҆́коже ла́зарѧ воздви́гнꙋвый, сп҃сѝ гдⷭ҇и."
 },
 {
  "type": "TEXT",
  "value": "Бг҃оро́диченъ: Дꙋшѝ моеѧ̀ напра́ви шє́ствїѧ сло́ве бж҃їй, къ стезѧ́мъ за́повѣдей твои́хъ незаблꙋ́дныхъ, и҆мѣ́ѧ молѧ́щꙋюсѧ ро́ждшꙋю тѧ̀ пречⷭ҇тꙋю дв҃ꙋ, и҆ премꙋ̑дрыѧ а҆пⷭ҇лы твоѧ̑ многомлⷭ҇тиве."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ст҃и́тель бж҃е́ственъ бы́въ, всѧ̑ за́пѡвѣди сохрани́лъ є҆сѝ хрⷭ҇тѡ́вы: тѣ́мже вѣ̑рнымъ храни́тель бж҃е́ственный бы́лъ є҆сѝ, ѻ҆́тче нїко́лае, соблюда́й тѣ́хъ ѿ всѧ́кихъ напа́стей и҆ ѡ҆ѕлобле́нїѧ."
 },
 {
  "type": "TEXT",
  "value": "Ꙗ҆́коже и҆ногда̀ препита́лъ є҆сѝ гра́дъ тво́й и҆знемога́ющъ гла́домъ, ꙗ҆́кѡ до́бръ па́стырь, прпⷣбне: та́кожде и҆ ны́нѣ препита́й дꙋ́шꙋ мою̀ хлѣ́бомъ разꙋ́мнымъ, ѻ҆́тче нїко́лае, тѧ̀ застꙋ́пника бл҃га стѧжа́вшагѡ."
 },
 {
  "type": "TEXT",
  "value": "Тѧ̀ вели́кое со́лнце, на высотѣ̀ лежа́щее при́снѡ цр҃кве хрⷭ҇то́вы, прпⷣбне па́стырю, вѣ́рнѡ мо́лимъ тѧ̀: свѣтоно́сными блиста́ньми свѣ́та, глꙋбо́кꙋю тьмꙋ̀ ѿженѝ грѣха̀ дꙋ́шъ на́шихъ."
 },
 {
  "type": "TEXT",
  "value": "Прибли́жисѧ, ꙗ҆́коже пи́шетсѧ, де́нь стра́шный прише́ствїѧ хрⷭ҇то́ва. Подви́гнисѧ дꙋшѐ, ѿри́ни лѣ́ность, и҆ ᲂу҆се́рднѡ хрⷭ҇тꙋ̀ возопі́й: сп҃си́ мѧ гдⷭ҇и, нїкола́а твоегѡ̀ моле́нїемъ."
 },
 {
  "type": "TEXT",
  "value": "Бг҃оро́диченъ: Свѣ́телъ тѧ̀ свѣ́щникъ прⷪ҇ро́къ прови́дѧше пречⷭ҇таѧ, свѣщꙋ̀ разꙋ́мнꙋю, носѧ́щꙋю хрⷭ҇та̀, и҆́мже просвѣти́хомсѧ, и҆̀же во тьмѣ̀ лежа́щїи и҆ страсте́хъ, тѧ̀ ᲂу҆бл҃жа́емъ бцⷣе приснодв҃о."
 }
]