ponomar-pwa/static/data/shared/services/canons/paraclete/tone7/sat.json

[
 {
  "type": "HEADER",
  "value": "Канѡ́нъ ст҃ы̑мъ мч҃нкѡмъ, і҆ера́рхѡмъ, и҆ прпⷣбнымъ, и҆ ᲂу҆со́пшымъ, гла́съ з҃, є҆гѡ́же краегране́сїе сицево̀:"
 },
 {
  "type": "TEXT",
  "value": "Съ ли́ки воспѣва́ю па́стырей и҆ мч҃нкъ, а҆́зъ і҆ѡ́сифъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Поспѣ́шествовавшемꙋ бг҃ꙋ во є҆гѵ́птѣ мѡѷсе́ови, и҆звестѝ і҆и҃лѧ, томꙋ̀ є҆ди́номꙋ пои́мъ, ꙗ҆́кѡ просла́висѧ."
 },
 {
  "type": "TEXT",
  "value": "Ли́къ мч҃нкъ нельсти́выхъ всѧ̑ пре́лєсти побѣдѝ борца̀, ликꙋ́етъ ра́дꙋѧсѧ пред̾ лице́мъ созда́вшагѡ и҆̀."
 },
 {
  "type": "TEXT",
  "value": "Ст҃и́телїе хрⷭ҇тѡ́вы, и҆ прпⷣбнїи всѝ подви́гшїисѧ, пи́щи сподо́бишасѧ вѣ́чныѧ бл҃года́тїю."
 },
 {
  "type": "TEXT",
  "value": "И҆зба́ви на́съ хрⷭ҇тѐ, ѿ всѧ́кїѧ ꙗ҆́рости моле́нїемъ прⷪ҇рѡ́къ, и҆ прпⷣбныхъ, и҆ же́нъ сщ҃е́нныхъ, и҆ сп҃сѝ дꙋ́шы на́шѧ."
 },
 {
  "type": "TEXT",
  "value": "Сла́ва: Созда́вый мѧ̀ ѿ землѝ сло́ве, въ зе́млю па́ки возврати́тисѧ мѝ повелѣ́лъ є҆сѝ: ᲂу҆поко́й, ꙗ҆́же въ вѣ́рѣ преста́вилъ є҆сѝ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Пречⷭ҇таѧ мт҃и, ꙗ҆́же бг҃а прест҃о́е сло́во ро́ждшаѧ, ѡ҆ст҃ѝ всѧ̑ любо́вїю тѧ̀ сла́вѧщыѧ."
 },
 {
  "type": "HEADER",
  "value": "Дрꙋгі́й канѡ́нъ ᲂу҆со́пшымъ, пое́мъ на рѧдꙋ̀, и҆дѣ́же нѣ́сть мине́и, гла́съ з҃, творе́нїе ѳеофа́ново, є҆го́же краегране́сїе:"
 },
 {
  "type": "TEXT",
  "value": "Пра́вило седьмо́е, и҆з̾ѡбраже́нїе то́жде носѧ́щее."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ма́нїемъ твои́мъ на земны́й ѡ҆́бразъ преложи́сѧ, пре́жде ᲂу҆доборазлива́емое водно́е є҆стество̀, гдⷭ҇и: тѣ́мже немо́креннѡ пѣшеше́ствовавъ і҆и҃ль, пое́тъ тебѣ̀ пѣ́снь побѣ́днꙋю."
 },
 {
  "type": "TEXT",
  "value": "Сті́хъ: Ди́венъ бг҃ъ во ст҃ы́хъ свои́хъ, бг҃ъ і҆и҃левъ."
 },
 {
  "type": "TEXT",
  "value": "Добро́та ᲂу҆краше́ннаѧ добродѣ́тельными ѡ҆́бразы, и҆ бж҃е́ственное возложе́нїе разли́чными красота́ми, сїѧ́юще бл҃гоче́стїемъ, мч҃нцы, хрⷭ҇тꙋ̀ бг҃ꙋ принесо́стесѧ."
 },
 {
  "type": "TEXT",
  "value": "Сті́хъ: Поко́й гдⷭ҇и дꙋ́шы ᲂу҆со́пшихъ ра̑бъ твои́хъ."
 },
 {
  "type": "TEXT",
  "value": "Зарю̀ непристꙋ́пнагѡ и҆ трисо́лнечнагѡ сїѧ́нїѧ ᲂу҆лꙋчи́ти сподо́би преста́вльшыѧсѧ рабы̑ твоѧ̑, многомлⷭ҇тиве гдⷭ҇и, ѿню́дꙋже ѿбѣжѐ всѧ́ка болѣ́знь, и҆ печа́ль, и҆ воздыха́нїе."
 },
 {
  "type": "TEXT",
  "value": "Сла́ва: Оу҆мерщвле́нїемъ ѡ҆сꙋжде́ное є҆стество̀, живо́тъ ѵ҆поста́сный, жизнода́вче са́мъ сы́й хрⷭ҇тѐ, воздви́глъ є҆сѝ: тѣ́мже ꙗ҆́кѡ є҆ди́нъ ще́дръ, вѣ́рою къ тебѣ̀ преста́вльшыѧсѧ ᲂу҆поко́й."
 },
 {
  "type": "TEXT",
  "value": "И҆ ны́нѣ: И҆спра́вила є҆сѝ пречⷭ҇таѧ, прама́тернее паде́нїе, ро́ждши гдⷭ҇а сло́ва, сїю̀ воскр҃си́вшаго, и҆ сꙋ́щымъ во гробѣ́хъ вдохнꙋ́вша живо́тъ, вла́стїю бж҃е́ственною."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Нб҃са̀ ᲂу҆тверди́вый сло́вомъ, и҆ земно́е ѡ҆снова́нїе ᲂу҆крѣпи́вый на вода́хъ мно́гихъ, ᲂу҆твердѝ мо́й ᲂу҆́мъ въ во́лю твою̀, чл҃вѣколю́бче."
 },
 {
  "type": "TEXT",
  "value": "Сокрꙋша́еми ка́менїемъ, и҆ въ ро́въ вмета́еми, сокрꙋши́сте всю̀ льсти́вагѡ си́лꙋ, и҆ не сокрꙋше́ни ᲂу҆мо́мъ мч҃нцы пребы́сте."
 },
 {
  "type": "TEXT",
  "value": "Заре́ю бж҃е́ственныхъ ᲂу҆че́нїй, и҆ добродѣ́телей лꙋча́ми премꙋ́дрїи ст҃и́телїе, вѣ̑рныѧ просвѣща́юще, и҆ є҆ресе́й мглꙋ̀ всю̀ ѿгна́сте."
 },
 {
  "type": "TEXT",
  "value": "Оу҆мертви́вшесѧ мі́рꙋ прпⷣбнїи твоѝ, сло́ве, премі́рнꙋю вои́стиннꙋ жи́знь наслѣ́доваша: и҆́хже ра́ди ще́дре, всѣ́хъ на́съ ᲂу҆ще́дри."
 },
 {
  "type": "TEXT",
  "value": "Сла́ва, ме́ртвенъ: Ѡ҆ преста́вльшихсѧ въ вѣ́рѣ и҆ наде́жди мо́лимсѧ всѝ бл҃го́мꙋ влⷣцѣ, поми́ловати и҆̀хъ въ ча́съ сꙋда̀."
 },
 {
  "type": "TEXT",
  "value": "И҆ ны́нѣ, бг҃оро́диченъ: Не и҆стощи́въ нѣ́дръ ѻ҆́ч҃ихъ сло́во, во нѣ́дрѣхъ твои́хъ пречⷭ҇таѧ, млⷣнецъ держи́мь ꙗ҆ви́сѧ, нача́ло ѿ тебѐ прїе́мь безнача́льный."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Въ нача́лѣ нб҃са̀ всеси́льнымъ сло́вомъ твои́мъ ᲂу҆твержде́й, гдⷭ҇и сп҃се, и҆ вседѣ́тельнымъ и҆ бж҃їимъ дх҃омъ всю̀ си́лꙋ и҆́хъ: на недви́жимѣмъ мѧ̀ ка́мени и҆сповѣ́данїѧ твоегѡ̀ ᲂу҆твердѝ."
 },
 {
  "type": "TEXT",
  "value": "Ю҆́ношеско и҆ крѣ́пко терпѣ́нїе, мꙋ́жественнѣ показа́ша мч҃нкъ ли́цы: ра́нъ бо ᲂу҆стремле́нїе под̾ѧ́ша, и҆ мꙋче́нїй ꙗ҆́звы, нетлѣ́нныѧ твоеѧ̀ сла́вы, сп҃се, жела́юще, и҆ красоты̀."
 },
 {
  "type": "TEXT",
  "value": "Въ вѣ́чный тво́й живо́тъ, ꙗ҆̀же въ наде́жди ᲂу҆со́пшихъ, млⷭ҇тиве, прїимѝ дꙋ́шы: и҆ жела́емыхъ и҆ бж҃е́ственныхъ влⷣко, нѣ́дръ бж҃е́ственнагѡ а҆враа́ма внꙋ́трь вселѝ, и҆ съ ла́заремъ бл҃же́ннымъ сопричтѝ."
 },
 {
  "type": "TEXT",
  "value": "Сла́ва: Соше́дый съ нб҃съ, во є҆́же сп҃стѝ ро́дъ чл҃вѣ́ческїй, бл҃гоꙋтро́бный сп҃се, невеще́ственнагѡ свѣ́та, и҆ бж҃е́ственныѧ сла́вы твоеѧ̀ насыща́тисѧ и҆ ра́дости, бл҃гоче́стнѡ преста́влєнныѧ, твои́мъ млⷭ҇рдїемъ сподо́би."
 },
 {
  "type": "TEXT",
  "value": "И҆ ны́нѣ: Зако́ни є҆стества̀ разрѣши́шасѧ въ тебѣ̀, непостижи́мое сло́во заче́ншей, чⷭ҇таѧ: и҆ зако́нъ на́мъ бж҃е́ственный даде́сѧ, всѣ̑мъ ѡ҆ставле́нїе подаѧ̀ ѿчаѧва́ємымъ прегрѣше́ньми, бл҃года́тїю бж҃е́ственныѧ любвѐ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Плотско́е прише́ствїе твоѐ хрⷭ҇тѐ, ᲂу҆вѣрѧ́ѧ прⷪ҇ро́къ а҆ввакꙋ́мъ, взыва́ше: сла́ва си́лѣ твое́й гдⷭ҇и."
 },
 {
  "type": "TEXT",
  "value": "Оу҆крѣплѧ́еми є҆́же ко гдⷭ҇ꙋ любо́вїю мч҃нцы, ѡ҆бнемощи́ша вра́жїю си́лꙋ: тѣ́мже ᲂу҆бл҃жа́ютсѧ."
 },
 {
  "type": "TEXT",
  "value": "Ꙗ҆́кѡ ѻ҆вча́та па́стырѧ и҆ а҆́гнцы, бл҃же́ннїи і҆ера́рси, слове́сномꙋ ста́дꙋ предста́сте бж҃е́ственною бл҃года́тїю."
 },
 {
  "type": "TEXT",
  "value": "Многосвѣ̑тлыѧ ꙗ҆́кѡ ѕвѣ́зды, добродѣ́тели свѣ́тлостїю, ѡ҆зари́сте вѣ́рныхъ и҆сполне́нїе, прпⷣбнїи ѻ҆тцы̀ на́ши."
 },
 {
  "type": "TEXT",
  "value": "Сла́ва: Є҆ди́нственное торжество̀ крѣ́пкихъ же́нъ, и҆ сосло́вїе ст҃ы́хъ прⷪ҇рѡ́къ, ᲂу҆лꙋчи́ша нбⷭ҇ныѧ бл҃гости."
 },
 {
  "type": "TEXT",
  "value": "И҆ ны́нѣ, бг҃оро́диченъ: Молѝ, є҆го́же родила̀ є҆сѝ сн҃а всепѣ́таѧ, и҆скꙋше́нїй всѧ́ческихъ и҆ скорбе́й и҆зба́витисѧ рабѡ́мъ твои̑мъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѻ҆́ч҃а нѣ́дра не ѡ҆ста́вль, и҆ соше́дъ на зе́млю хрⷭ҇тѐ бж҃е, та́йнꙋ ᲂу҆слы́шахъ смотре́нїѧ твоегѡ̀, и҆ просла́вихъ тѧ̀ є҆ди́не чл҃вѣколю́бче."
 },
 {
  "type": "TEXT",
  "value": "Страда́льчєскїѧ болѣ̑зни терпѣли́внѡ показа́вше хрⷭ҇тѐ, мч҃нцы, вѣнцы̀ ᲂу҆вѧзо́шасѧ пра́вды твоеѧ̀, и҆ сла́вѧтъ твою̀ си́лꙋ."
 },
 {
  "type": "TEXT",
  "value": "Пачеесте́ственныѧ свѣ́тлости твоеѧ̀ преста́влєныѧ бл҃гоче́стнѡ сподо́би, є҆гда̀ прїи́деши во сла́вѣ твое́й со а҆́гг҃лы твои́ми, всеще́дре и҆ многомлⷭ҇тиве."
 },
 {
  "type": "TEXT",
  "value": "Сла́ва: Трисвѣ́тлыѧ зарѝ бл҃же, и҆ є҆ди́нственнагѡ ѡ҆блиста́нїѧ бж҃ества̀ наслади́тисѧ сподо́би пре́жде ѿше́дшыѧ, и҆ сла́вѧщыѧ тѧ̀ чл҃вѣколю́бче."
 },
 {
  "type": "TEXT",
  "value": "И҆ ны́нѣ: И҆́же ѻ҆́ч҃а нѣ́дра не ѡ҆ста́вль, въ дв҃и́ческихъ нѣ́дрѣхъ хрⷭ҇то́съ водвори́сѧ, и҆ сме́рти и҆зба́вилъ є҆́сть тебѐ бл҃жа́щыѧ, бг҃ома́ти, є҆ди́на всепѣ́таѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆́тренюетъ дꙋ́хъ мо́й къ тебѣ̀, бж҃е, занѐ свѣ́тъ є҆сѝ, и҆ твоѧ̑ повелѣ̑нїѧ бы́ша и҆сцѣлє́нїѧ рабѡ́мъ твои̑мъ, чл҃вѣколю́бче."
 },
 {
  "type": "TEXT",
  "value": "Ѡ҆ ꙗ҆́звахъ плотски́хъ неради́вше крѣ́пцыи страда́льцы, и҆ ꙗ҆́звы всѣ́хъ и҆сцѣлѧ́ете и҆ стра̑сти, бж҃е́ственными ва́шими ꙗ҆́звами."
 },
 {
  "type": "TEXT",
  "value": "Прїѧ́сте вла́сть рѣши́ти и҆ вѧза́ти на землѝ, ст҃и́телїе хрⷭ҇тѡ́вы: тѣ́мже на́шѧ грѣхѡ́вныѧ плєни́цы нерѣши́мыѧ разрѣши́те."
 },
 {
  "type": "TEXT",
  "value": "Оу҆мо́мъ чⷭ҇тымъ бг҃ꙋ соедини́вшесѧ ли́цы по́стничестїи, прⷪ҇рѡ́къ, и҆ пра́ведныхъ, и҆ же́нъ чⷭ҇тны́хъ ликꙋ́ютъ, ра́дꙋющесѧ ликова́нїемъ неразори́мымъ."
 },
 {
  "type": "TEXT",
  "value": "Сла́ва, ме́ртвенъ: Ꙗ҆́кѡ є҆ди́нъ сы́й многомлⷭ҇тивъ, вѣ́рою хрⷭ҇тѐ, преста́влєныѧ ѿ житїѧ̀, раѧ̀ сотворѝ жи́тели, чл҃вѣколю́бче."
 },
 {
  "type": "TEXT",
  "value": "И҆ ны́нѣ, бг҃оро́диченъ: Черто́гъ неразори́мь ꙗ҆́вльшисѧ бг҃ꙋ, молѝ того̀ всест҃а́ѧ дв҃о, черто́га мѧ̀ мы́сленнагѡ жи́телѧ содѣ́лати."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Гдⷭ҇и бж҃е мо́й, ѿ но́щи ᲂу҆́треневавъ тебѣ̀ молю́сѧ: пода́ждь мѝ ѡ҆ставле́нїе прегрѣше́нїй мои́хъ, и҆ къ свѣ́тꙋ твои́хъ повелѣ́нїй пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Ме́ртвостїю живоно́сною, и҆стка́нною мꙋче́нїй ра́ди, всехва́льнїи мч҃нцы ѡ҆дѣ́ѧни свѣ́тлѡ, дꙋша́мъ пре́жде ᲂу҆со́пшымъ бж҃е́ственный и҆спроси́те поко́й."
 },
 {
  "type": "TEXT",
  "value": "Ѿ неизнꙋри́мыхъ сокро́вищъ, пролива́ѧй бл҃гоꙋтро́бїе сп҃се, дꙋ́шы ꙗ҆̀же преста́вилъ є҆сѝ, съ перворо́дными твои́ми въ жили́щахъ нбⷭ҇ныхъ бл҃говолѝ водвори́тисѧ."
 },
 {
  "type": "TEXT",
  "value": "Сла́ва: Тѧготꙋ̀ ѿложи́вшыѧ, и҆ ѿ ᲂу҆́зъ разрѣши́вшыѧсѧ, и҆ къ вы́шнемꙋ животꙋ̀ рабы̑ твоѧ̑ преше́дшыѧ хрⷭ҇тѐ, наслажда́тисѧ твои́хъ ст҃ы́хъ свѣ́тлостей сп҃се, бл҃гоизво́ли."
 },
 {
  "type": "TEXT",
  "value": "И҆ ны́нѣ: Влⷣчце бг҃ома́ти, мои́хъ согрѣше́нїй разрѣше́нїе пода́ждь, и҆ да́рꙋй мѝ проще́нїе грѣхѡ́въ мои́хъ, ꙗ҆́же жи́знь ѵ҆поста́снꙋю мі́рꙋ ро́ждши, всенепоро́чнаѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: І҆ѡ́на и҆з̾ чре́ва а҆́дова вопїѧ́ше: возведѝ ѿ тлѝ живо́тъ мо́й. Мы́ же тебѣ̀ вопїе́мъ: всеси́льне сп҃се, поми́лꙋй на́съ."
 },
 {
  "type": "TEXT",
  "value": "Низложи́сте вра̑жїѧ возвышє́нїѧ, возвыша́еми къ бг҃ꙋ въ страда́нїихъ, всесла́внїи ѻ҆рꙋ́жницы, и҆ гра́ждане нбⷭ҇нїи бы́сте."
 },
 {
  "type": "TEXT",
  "value": "Є҆ресе́й зи́мꙋ ѿгонѧ́юще, хрⷭ҇тѡ́вы и҆́стиннїи ст҃и́телїе, къ веснѣ̀ и҆́стиннѣй мно́жество бл҃гочести́выхъ приведо́ша."
 },
 {
  "type": "TEXT",
  "value": "Крѣ́постїю твое́ю хрⷭ҇тѐ, прпⷣбныхъ мно́жество, и҆ прⷪ҇рѡ́къ, и҆ же́нъ ст҃ы́хъ, ѡ҆правда́шасѧ, и҆ незаходи́магѡ свѣ́та наслажда́ютсѧ."
 },
 {
  "type": "TEXT",
  "value": "Сла́ва, ме́ртвенъ: Преста́вилъ є҆сѝ ще́дре, ѿ вре́менныхъ рабы̑ твоѧ̑: но сїѧ̑ вѣ́чнагѡ весе́лїѧ, и҆ живота̀ и҆́стиннагѡ прича́стники сподо́би."
 },
 {
  "type": "TEXT",
  "value": "И҆ ны́нѣ, бг҃оро́диченъ: Ѡ҆свѧтѝ всест҃а́ѧ дв҃о, рабы̑ твоѧ̑, прест҃о́е сло́во пло́тїю ро́ждшаѧ, є҆го́же пое́тъ всѧ́кое дыха́нїе, ѡ҆сщ҃а́ющи."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Пла́вающаго въ молвѣ̀ жите́йскихъ попече́нїй, съ корабле́мъ потоплѧ́ема грѣхѝ, и҆ дꙋшетлѣ́нномꙋ ѕвѣ́рю примета́ема, ꙗ҆́кѡ і҆ѡ́на хрⷭ҇тѐ, вопїю́ ти: и҆з̾ смертоно́сныѧ глꙋбины̀ возведи́ мѧ."
 },
 {
  "type": "TEXT",
  "value": "Ли́къ мч҃ническїй, неꙋдо́бь носи̑мыѧ болѣ̑зни крѣ́пкѡ претерпѣ́вшїй, неболѣ́знєнныѧ сла́дѡсти наслѣ́дова, пра́вды вѣнцы̀ ѿ живоно́сныѧ десни́цы прїе́мъ. Два́жды."
 },
 {
  "type": "TEXT",
  "value": "Сла́ва: Съ пра́ведными, и҆дѣ́же ст҃ы́хъ ли́цы, и҆ и҆дѣ́же свѣ́тлость прпⷣбныхъ и҆ вѣ́чныѧ жи́зни наслажде́нїе, пре́жде ᲂу҆со́пшыѧ твоѧ̑ рабы̑ ᲂу҆чинѝ млⷭ҇тиве, ꙗ҆́кѡ бг҃ъ безсме́ртенъ."
 },
 {
  "type": "TEXT",
  "value": "И҆ ны́нѣ: И҆́же во́лею бж҃е́ственною, и҆ содѣ́тельною си́лою, всѧ̑ составле́й ѿ небытїѧ̀, и҆з̾ ᲂу҆тро́бы твоеѧ̀, чⷭ҇таѧ, произы́де, и҆ сꙋ́щыѧ во тьмѣ̀ сме́ртнѣй, бг҃онача́льными блиста́ньми просвѣти́ла є҆́сть."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ сꙋ́ще халде́йстѣй, а҆враа́мстїи ѻ҆́троцы ликова́хꙋ со а҆́гг҃ломъ, глаго́люще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Тече́нїи кро́вными стрⷭ҇тоте́рпцы, нече́стїѧ ᲂу҆гаси́ша пла́мень, пою́ще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "І҆ера́рхи восхвалѧ́емъ, просвѣти́тели мі́ра бы́вшыѧ, пою́ще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Пѣ́сньми да почтꙋ́тсѧ прⷪ҇рѡ́къ и҆ прпⷣбныхъ ст҃ы́й собо́ръ, пою́щихъ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Сла́ва: И҆зба́ви гее́нны, ꙗ҆̀же прїѧ́лъ є҆сѝ хрⷭ҇тѐ ще́дрый, вѣ̑рныѧ рабы̑ твоѧ̑, вопїю́щыѧ: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Ꙗ҆́кѡ а҆́гг҃лъ чⷭ҇тнѣ́йшꙋю, бцⷣꙋ пѣсносло́вимъ, вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Пе́щь ѻ҆́троцы ѻ҆гнепа́льнꙋ дре́вле росоточа́щꙋ показа́ша, є҆ди́наго бг҃а воспѣва́юще, и҆ глаго́люще: превозноси́мый ѻ҆тцє́въ бг҃ъ и҆ препросла́вленъ."
 },
 {
  "type": "TEXT",
  "value": "Вѣнцы̀ носѧ́ще ли́цы мч҃нкъ, цр҃ѧ̀ хрⷭ҇та̀ ꙗ҆́снѡ ѡ҆бстоѧ́тъ мы́сленнѡ, со а҆́гг҃льскими ликостоѧ́ньми, бл҃гослове́нъ є҆сѝ, зовꙋ́ще, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ты̀ сме́рти и҆ живота̀ вла́сть и҆мѣ́ѧй ще́дре, пи́щи бж҃е́ственныѧ сподо́би ꙗ҆̀же въ вѣ́рѣ твое́й сп҃се, преложє́нныѧ, бл҃гослове́нъ є҆сѝ, зовꙋ́щыѧ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Сла́ва: Просвѣща́ѧ свѣ́томъ невеще́ственнагѡ свѣтоли́тїѧ хрⷭ҇тѐ, дꙋ́шы, ꙗ҆̀же преста́вилъ є҆сѝ, въ селе́нїихъ небе́сныхъ вселѝ, славосло́вити тѧ̀ непреста́ннѡ со ᲂу҆го́дники твои́ми."
 },
 {
  "type": "TEXT",
  "value": "И҆ ны́нѣ: И҆́же пре́жде без̾ мт҃ре и҆з̾ ѻ҆ц҃а̀, ны́нѣ же без̾ ѻ҆ц҃а̀ и҆з̾ тебѐ дв҃о, хрⷭ҇то́съ неизрече́ннѡ роди́сѧ, на́съ ра́ди человѣ̑къ въ пло́ть ѡ҆бо́лксѧ: бл҃гослове́нъ пречⷭ҇таѧ, пло́дъ твоегѡ̀ чре́ва."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Въ пещѝ ѻ҆́троки подража́юще, дх҃о́внꙋю ро́сꙋ прїе́мшїи, вѣ́рою зове́мъ: бл҃гослови́те дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Хра́мы і҆́дѡльскїѧ разверго́сте, всесла́внїи: и҆ хра́мы созда́сте себѐ дх҃ꙋ, стрⷭ҇тоте́рпцы, хра́брски тече́нїе сконча́вше."
 },
 {
  "type": "TEXT",
  "value": "Ꙗ҆ви́стесѧ ꙗ҆́кѡ цвѣ́ти бл҃гоꙋха́ннїи, ст҃и́телїе, ра́зꙋмомъ дꙋ́шы вѣ́рныхъ веселѧ́ще бл҃гоче́стїѧ: тѣ́мже досто́йнѡ бл҃жи́ми є҆стѐ."
 },
 {
  "type": "TEXT",
  "value": "Зе́млю всю̀ проше́дше прпⷣбнїи, и҆ бж҃їи прише́льцы прⷪ҇ро́цы бы́сте, вы́шнее соблюда́юще наслажде́нїе, и҆ сла́вꙋ при́снѡ пребыва́ющꙋю."
 },
 {
  "type": "TEXT",
  "value": "Сла́ва, поко́инъ: Ꙗ҆́кѡ живы́хъ и҆ ме́ртвыхъ сло́ве гдⷭ҇и, и҆̀же вѣ́рою ᲂу҆со́пшыѧ рабы̑ твоѧ̑, ликѡ́мъ сочета́й сп҃са́емыхъ всѣ́хъ, ꙗ҆́кѡ є҆ди́нъ чл҃вѣколю́бецъ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Же́нъ всѣ́хъ сосло́вїе, посто́мъ и҆ страда́нїемъ взыска́вшихъ гдⷭ҇а, мо́литсѧ непреста́ннѡ бж҃е́ственномꙋ лицꙋ̀ твоемꙋ̀, пречⷭ҇таѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Є҆ди́наго безнача́льнаго цр҃ѧ̀ сла́вы, є҆го́же бл҃гословѧ́тъ нбⷭ҇ныѧ си̑лы, и҆ трепе́щꙋтъ чи́ни а҆́гг҃льстїи, по́йте сщ҃е́нницы, лю́дїе превозноси́те є҆го̀ во вѣ́ки."
 },
 {
  "type": "TEXT",
  "value": "Къ нбⷭ҇нѣй зрѧ́ще сла́вѣ мч҃нцы, хрⷭ҇то́ва прише́ствїѧ, ѡ҆ земнѣ́й неради́ша сла́вѣ, пою́ще бл҃гоче́стнѡ того̀ ꙗ҆́кѡ цр҃ѧ̀, во всѧ̑ вѣ́ки."
 },
 {
  "type": "TEXT",
  "value": "И҆́же земнꙋ́ю разрꙋши́вый хра́минꙋ, є҆́же ѡ҆ наде́жди жи́зни ᲂу҆со́пшымъ нбⷭ҇нꙋю хра́минꙋ пода́ждь, въ пра́ведныхъ селе́нїихъ си́хъ ᲂу҆поко́й во всѧ̑ вѣ́ки."
 },
 {
  "type": "TEXT",
  "value": "Сла́ва: Мє́ртвымъ воскрⷭ҇нїе, ꙗ҆́кѡ бг҃ъ подава́ѧй, и҆́же и҆сто́чникъ жи́зни и҆мы́й: ты̀ напо́й пи́щными пото́ки, ꙗ҆́кѡ є҆ди́нъ бл҃гъ, пре́жде ᲂу҆со́пшыѧ, во всѧ̑ вѣ́ки."
 },
 {
  "type": "TEXT",
  "value": "И҆ ны́нѣ: Свѣ́тъ непристꙋ́пный, бцⷣе дв҃о, во чре́вѣ твое́мъ прїе́мши неизрече́ннѡ, просвѣти́ла є҆сѝ сꙋ́щыѧ во тьмѣ̀ житїѧ̀, сла́вити бл҃гоче́стнѡ хрⷭ҇та̀, проше́дшаго и҆з̾ тебѐ несказа́ннѡ."
 },
 {
  "type": "TEXT",
  "value": "Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:"
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Па́че є҆стества̀ мт҃рь, и҆ по є҆стествꙋ̀ дв҃ꙋ, є҆ди́нꙋ въ жена́хъ бл҃гослове́ннꙋю, пѣ́сньми вѣ́рнїи бцⷣꙋ велича́емъ."
 },
 {
  "type": "TEXT",
  "value": "Сщ҃е́нныхъ мч҃нкъ, и҆ прⷪ҇рѡ́къ, и҆ пра́ведныхъ, ѿ вѣ́ка до́брѣ жи́вшихъ, мл҃твами и҆́хъ, хрⷭ҇тѐ, дꙋ́шы на́шѧ поми́лꙋй."
 },
 {
  "type": "TEXT",
  "value": "Ꙗ҆́кѡ слꙋжи́тели влⷣцѣ, сщ҃еннотаи́нницы ꙗ҆́вльшесѧ, совокꙋпи́стесѧ слꙋга́мъ нбⷭ҇нымъ: съ ни́миже ѡ҆ на́съ молє́нїѧ принеси́те."
 },
 {
  "type": "TEXT",
  "value": "Съ жена́ми бл҃же́нное сконча́вшыѧ тече́нїе, почти́мъ по́стничєскїѧ ли́ки ст҃ы̑ѧ: ꙗ҆́кѡ да тѣ́хъ мл҃твами ᲂу҆лꙋчи́мъ сщ҃е́нїе."
 },
 {
  "type": "TEXT",
  "value": "Сла́ва, ме́ртвенъ: Є҆ѧ́же сподо́бишасѧ сла́вы, ст҃ы́хъ всѣ́хъ ликостоѧ́нїѧ, хрⷭ҇тѐ, преста́влєныѧ сподо́би причасти́тисѧ, правосла́внѡ тебѣ̀ послꙋжи́вшыѧ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Грѣхолюби́въ сы́й, сꙋди́ща стра́шнагѡ трепе́щꙋ, ро́ждшагѡсѧ и҆з̾ тебѐ чⷭ҇таѧ, въ не́мже мѧ̀, ꙗ҆́кѡ бл҃га́ѧ, неѡсꙋжде́на соблюдѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Мт҃и бж҃їѧ и҆ дв҃а, ро́ждшаѧ и҆ дв҃ствꙋющаѧ па́ки, не є҆стества̀ дѣ́ло, но бж҃їѧ снизхожде́нїѧ: тѣ́мъ ꙗ҆́кѡ є҆ди́нꙋ бж҃їихъ чꙋде́съ сподо́бльшꙋюсѧ, тѧ̀ при́снѡ велича́емъ."
 },
 {
  "type": "TEXT",
  "value": "Ꙗ҆вле́ннѡ до́блїи мч҃нцы просвѣща́ютъ мі́ръ, вѣ́ры сꙋ́ще столпѝ, цр҃квамъ непоколеби́маѧ тверды́нѧ, и҆ предгра̑дїѧ бл҃гоче́стїѧ: тѣ́хъ по достоѧ́нїю вѣ́рнїи ᲂу҆бл҃жа́емъ."
 },
 {
  "type": "TEXT",
  "value": "И҆зба́ви ѻ҆гнѧ̀ вѣ́чнагѡ, влⷣко, ѿ на́съ преста́вльшыѧсѧ: ре́бръ твои́хъ копїе́мъ грѣхо́вное рꙋкописа́нїе растерза́въ си́хъ, ꙗ҆́кѡ є҆ди́нъ чл҃вѣколю́бецъ, и҆ ст҃ы́хъ свѣ́тлости сподо́би."
 },
 {
  "type": "TEXT",
  "value": "Сла́ва: Ꙗ҆́кѡ бл҃гъ бг҃ъ, и҆ чл҃вѣколю́бецъ є҆стество́мъ, ꙗ҆́кѡ млⷭ҇тивъ, и҆ ще́дръ, ꙗ҆́кѡ живота̀ безсме́ртнагѡ сы́й сокро́вище неистощи́мое, сп҃се, вѣ́рою пре́жде ᲂу҆со́пшыѧ нетлѣ́нныѧ сла́дости твоеѧ̀ сподо́би."
 },
 {
  "type": "TEXT",
  "value": "Бг҃оро́диченъ: Зако́на сѣ̑ни, и҆ прє́жднѧѧ гада̑нїѧ твои́мъ ржⷭ҇тво́мъ преидо́ша, и҆́бо и҆сполне́нїе зако́на и҆ прⷪ҇ро́кѡвъ хрⷭ҇то́съ бы́сть: є҆го́же во двою̀ сꙋщєствꙋ̀ пою́ще, тебѐ приснодв҃ꙋ чⷭ҇тꙋю ᲂу҆бл҃жа́емъ."
 }
]