ponomar-pwa/static/data/shared/services/canons/paraclete/tone8/sat.json

[
 {
  "type": "HEADER",
  "value": "Канѡ́нъ ст҃ы̑мъ мч҃нкѡмъ, і҆ера́рхѡмъ, прпⷣбнымъ и҆ ᲂу҆со́пшымъ, гла́съ и҃, трꙋ́дъ же і҆ѡ́сифовъ, є҆гѡ́же краестро́чїе си́це:"
 },
 {
  "type": "TEXT",
  "value": "Ѻ҆смогла́сника но́вагѡ бж҃е́ственный коне́цъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ."
 },
 {
  "type": "TEXT",
  "value": "Честні́и би́серїе ꙗ҆ви́стесѧ, вѣне́цъ просвѣща́юще чⷭ҇тны́ѧ цр҃кве, стрⷭ҇тоте́рпцы хрⷭ҇тѡ́вы до́блественнѣйшїи."
 },
 {
  "type": "TEXT",
  "value": "Ѡ҆блиста́ша догма́тъ добродѣ́телей бж҃е́ственными свѣтлостьмѝ премꙋ́дрїи ст҃и́телїе, и҆ вѣ́рныхъ сердца̀ просвѣти́ша."
 },
 {
  "type": "TEXT",
  "value": "Тебѐ въ прⷪ҇ро́цѣхъ и҆ въ прпⷣбныхъ чꙋ́днаго мо́лимъ сло́ве: тѣ́хъ мольба́ми сп҃сѝ на́съ."
 },
 {
  "type": "TEXT",
  "value": "Сла́ва: Є҆гда̀ сꙋ́дъ пра́ведный прїи́деши сотвори́ти пра́веднѣйшїй: неѡсꙋжде́ннѡ сло́ве, тѣ́хъ мольба́ми сп҃сѝ на́съ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Гдⷭ҇а ро́ждшꙋю тѧ̀ свѣ́дый, же́нскїй ли́къ тебѐ во слѣ́дъ дв҃о страда́льчествовавъ, томꙋ̀ приведе́сѧ."
 },
 {
  "type": "HEADER",
  "value": "Дрꙋгі́й канѡ́нъ ᲂу҆со́пшихъ, Гла́съ и҃, є҆гѡ́же краестро́чїе:"
 },
 {
  "type": "TEXT",
  "value": "Оу҆мира́ющымъ вѣ̑рнымъ ѻ҆сьмо́е плетꙋ̀ пѣ́нїе."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Сме́ртїю сме́рть хрⷭ҇то́вꙋ, и҆ страстьмѝ стрⷭ҇ть подража́вше чⷭ҇тнꙋ́ю, мч҃нцы всѝ, бж҃е́ственныѧ и҆ бл҃же́нныѧ жи́зни полꙋчи́ша."
 },
 {
  "type": "TEXT",
  "value": "Ю҆́ности прегрѣшє́нїѧ презрѧ̀, и҆ грѣхѝ превосходѧ̀ хрⷭ҇тѐ сп҃се, пре́жде ᲂу҆со́пшыѧ рабы̑ твоѧ̑ со и҆збра́нными твои́ми сопричтѝ."
 },
 {
  "type": "TEXT",
  "value": "Сла́ва: Ю҆́же полꙋчи́ша сла́вꙋ же и҆ ра́дость, и҆̀же бл҃же́нное стѧжа́вше пребыва́нїе, пода́ждь бога́тнѡ твои̑мъ рабѡ́мъ, ꙗ҆̀же прїѧ́лъ є҆сѝ многомлⷭ҇тиве."
 },
 {
  "type": "TEXT",
  "value": "И҆ ны́нѣ: Зачала̀ є҆сѝ сло́во ѻ҆́ч҃ее, пло́ти соеди́ншеесѧ по ѵ҆поста́си, є҆́же и҆з̾ тебѐ всенепоро́чнаѧ ѻ҆трокови́це, а҆́дъ бж҃е́ственною си́лою ᲂу҆праздни́вшее."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твержде́й въ нача́лѣ нб҃са̀, и҆ зе́млю ѡ҆снова́вый на вода́хъ мно́гихъ, ᲂу҆тверди́ мѧ къ пѣ́нїю славосло́вїѧ твоегѡ̀ гдⷭ҇и."
 },
 {
  "type": "TEXT",
  "value": "Мє́рзкїѧ жє́ртвы страда́льцы крѣпча́йшею мы́слїю ѿтрѧ́сше, же́ртва чистѣ́йша сло́вꙋ поже́ршемꙋсѧ бы́ша."
 },
 {
  "type": "TEXT",
  "value": "Ѡ҆бновлѧ́юще словесы̀ сщ҃еннодѣ́тельными ѡ҆бетша́вшаѧ всѧ́кими страстьмѝ, ѡ҆бнови́вшагѡ мі́ръ бж҃е́ственнїи ᲂу҆ч҃нцы̀ ꙗ҆ви́стесѧ."
 },
 {
  "type": "TEXT",
  "value": "Ꙗ҆́же прⷪ҇ро́кѡмъ пре́жде ꙗ҆вле́ннѡ, да́ннаѧ бл҃года́ть всест҃а́гѡ дх҃а, по́стники въ послѣ̑днѧѧ бж҃е́ственныхъ дарова́нїй и҆спо́лни."
 },
 {
  "type": "TEXT",
  "value": "Сла́ва: Ликѡ́мъ ст҃ы́хъ сочета́й бж҃е, вѣ́рнѡ ѿ житїѧ̀ преше́дшыѧ, и҆ раѧ̀ жи́тели сотворѝ, за неизрече́ннꙋю млⷭ҇ть."
 },
 {
  "type": "TEXT",
  "value": "И҆ ны́нѣ, бг҃оро́диченъ: И҆́же ника́коже вмѣща́емый і҆и҃съ и҆ гдⷭ҇ь, нетѣсновмѣ́стнѡ въ твоѐ всели́сѧ ѡ҆сщ҃е́нное чре́во пречⷭ҇таѧ дв҃о всепѣ́таѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
 },
 {
  "type": "TEXT",
  "value": "Ѡ҆чи́стившесѧ дре́внѧгѡ прароди́тельнагѡ паде́нїѧ, кр҃ще́нїемъ и҆ па́ки порожде́нїемъ, стрꙋѧ́ми же крове́й свои́хъ ѡ҆кропи́вшесѧ хрⷭ҇тꙋ̀ бл҃же́ннїи, сца́рствꙋете."
 },
 {
  "type": "TEXT",
  "value": "И҆́же ме́ртвъ во́лею поло́жьсѧ во гро́бѣ, и҆ живꙋ́щыѧ во гробѣ́хъ взыва́ѧй сп҃се, бл҃говолѝ, ꙗ҆̀же ѿ на́съ прїѧ́лъ є҆сѝ, въ селе́нїихъ првⷣныхъ твои́хъ си̑мъ водворѧ́тисѧ."
 },
 {
  "type": "TEXT",
  "value": "Сла́ва: Бл҃гоꙋтро́бїемъ бж҃е́ственныѧ твоеѧ̀ влⷣко, и҆ соесте́ственнѣ разꙋмѣва́емыѧ бл҃гости, ᲂу҆моле́нъ быва́ѧ, грѣхѡ́въ разрѣше́нїе пода́въ рабѡ́мъ твои̑мъ сп҃се, ᲂу҆поко́й."
 },
 {
  "type": "TEXT",
  "value": "И҆ ны́нѣ: Вопло́щьсѧ и҆з̾ чре́ва твоегѡ̀, и҆ бы́въ человѣ́къ, и҆́же и҆зрѧ́днѣ сы́й є҆ди́нъ чл҃вѣколю́бецъ, сп҃са́етъ человѣ́ка ѿ вра́тъ сме́ртныхъ, бг҃ома́ти пречⷭ҇таѧ є҆ди́на всепѣ́таѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Преше́дше по́прище мꙋче́нїѧ, теплото́ю дх҃о́вною страда́льцы бг҃обл҃же́ннїи, веще́ственнꙋю пре́лесть попали́сте."
 },
 {
  "type": "TEXT",
  "value": "Прпⷣбныѧ твоѧ̑ гдⷭ҇и, и҆ ст҃и́тели свѣ́тлѡ просла́вилъ є҆сѝ: тѣ́хъ бж҃е́ственными мольба́ми, прича́стника мѧ̀ сла́вы твоеѧ̀ сотворѝ."
 },
 {
  "type": "TEXT",
  "value": "Є҆́же бж҃е́ственнагѡ дх҃а вдохнове́нїе, прⷪ҇ро́ки просвѣти́вшее, жена́мъ крѣ́пость дарова̀, врагѡ́въ погꙋблѧ́ти шата̑нїѧ."
 },
 {
  "type": "TEXT",
  "value": "Сла́ва: Сликовствова́ти сподо́би со всѣ́ми ст҃ы́ми, ꙗ҆̀же преста́вилъ є҆сѝ пребл҃гі́й рабы̑ твоѧ̑, въ селе́нїихъ ст҃ы́хъ твои́хъ, ᲂу҆моле́нъ быва́ѧй."
 },
 {
  "type": "TEXT",
  "value": "И҆ ны́нѣ: Зако́на бж҃е́ственнагѡ пода́телѧ, є҆стества̀ зако́на вы́ше родила̀ є҆сѝ, возсозида́юща всенепоро́чнаѧ, человѣ́ческое є҆стество̀ попо́лзшеесѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче."
 },
 {
  "type": "TEXT",
  "value": "Да твоеѧ̀ влⷣко сла́вы ᲂу҆́зрѧтъ, и҆ свѣ́тлость твою̀ свѣтода́тельнꙋю на нб҃сѣ́хъ полꙋча́тъ свѣ́тлѡ, всѧ́къ ви́дъ мꙋче́нїй носи́ти претерпѣ́ша, мч҃нцы бж҃е́ственнїи, тебѣ̀ хрⷭ҇тѐ пою́ще: си́лѣ твое́й сла́ва чл҃вѣколю́бче."
 },
 {
  "type": "TEXT",
  "value": "Мнѡ́ги ѻ҆би́тєли ᲂу҆ тебѐ сп҃се сꙋ́ть, по достоѧ́нїю всѣ̑мъ раздѣлѧ́емы, по мѣ́рѣ добродѣ́телей: ты̑ѧ ᲂу҆́бѡ ще́дре и҆спо́лнити си́хъ сподо́би, ꙗ҆̀же вѣ́рою преста́вльшыѧсѧ, бл҃гоче́стнѡ тебѣ̀ вопїю́щыѧ: си́лѣ твое́й сла́ва чл҃вѣколю́бче."
 },
 {
  "type": "TEXT",
  "value": "Сла́ва: Ра́венъ на́мъ человѣ́къ ꙗ҆ви́лсѧ є҆сѝ, безсме́ртне, всѣ̑мъ ра́внѡ сме́рть претерпѣ́лъ є҆сѝ, и҆ жи́зни показа́лъ є҆сѝ пꙋ́ть: є҆ѧ́же преста́вльшыѧсѧ сподо́би ꙗ҆́кѡ чл҃вѣколю́бецъ, проще́нїе согрѣше́нїй ꙗ҆́кѡ влⷣка подава́ѧ, и҆ свѣ́та прича́стїе да́рꙋй."
 },
 {
  "type": "TEXT",
  "value": "И҆ ны́нѣ: Ты̀ вѣ́рныхъ похвала̀ є҆сѝ безневѣ́стнаѧ, ты̀ предста́тельница, и҆ ты̀ прибѣ́жище хрⷭ҇тїа́нъ: стѣна̀ и҆ приста́нище, къ сн҃ꙋ твоемꙋ̀ мольбы̑ но́сиши всенепоро́чнаѧ, и҆ сп҃са́еши ѿ бѣ́дъ, и҆̀же вѣ́рою и҆ любо́вїю бцⷣꙋ чⷭ҇тꙋю тѧ̀ вѣ́дꙋщыѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче."
 },
 {
  "type": "TEXT",
  "value": "Претерпѣ́ша ꙗ҆́звы плотскі̑ѧ бж҃е́ственнїи мч҃нцы, и҆ сегѡ̀ ра́ди ꙗ҆́звы на́шѧ при́снѡ и҆сцѣлѧ́ютъ, ᲂу҆ѧзвлѧ́юще де́мѡны."
 },
 {
  "type": "TEXT",
  "value": "Ст҃і́и бж҃їи ст҃и́тели, моли́те со всѣ́ми прпⷣбными хрⷭ҇та̀, грѣхѡ́въ ѡ҆ставле́нїе дарова́ти на́мъ."
 },
 {
  "type": "TEXT",
  "value": "Пло́ть ра́нами и҆ ѡ҆бꙋче́нїемъ и҆знꙋри́вше, жєны̀ прпⷣбныѧ чл҃вѣколю́бче, въ наде́ждахъ бл҃ги́хъ сподо́бишасѧ."
 },
 {
  "type": "TEXT",
  "value": "Сла́ва: Сме́рть погꙋби́въ, сме́ртїю твое́ю безсме́ртне, ᲂу҆ме́ршыѧ въ наде́жди и҆ жи́зни, вѣ̑рныѧ твоѧ̑ рабы̑ ꙗ҆́кѡ чл҃вѣколю́бецъ ᲂу҆поко́й."
 },
 {
  "type": "TEXT",
  "value": "И҆ ны́нѣ, бг҃оро́диченъ: Оу҆праздни́ла є҆сѝ чⷭ҇таѧ пра́ѻтєцъ ѡ҆сꙋжде́нїе, всѣ́хъ ѡ҆правда́вшаго пло́тїю ро́ждши і҆и҃са є҆ди́наго гдⷭ҇а."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Несказа́нныѧ твоеѧ̀ сла́вы, и҆ є҆́же па́че сло́ва твоегѡ̀ бл҃же́нства, въ селе́нїихъ ст҃ы́хъ, и҆дѣ́же гла́съ красе́нъ пра́зднꙋющихъ, преста́влєнныѧ къ безстра́стнѣй жи́зни ᲂу҆ще́дривъ, сподо́би є҆ди́не чл҃вѣколю́бче."
 },
 {
  "type": "TEXT",
  "value": "И҆дѣ́же чи́ни а҆́гг҃льстїи, и҆дѣ́же пра́ведныхъ собо́ри ра́дꙋютсѧ, а҆враа́ма въ нѣ́дрѣхъ вселѝ сп҃се рабы̑ твоѧ̑, и҆ со дерзнове́нїемъ стра́шномꙋ и҆ бж҃е́ственномꙋ прⷭ҇то́лꙋ предста́ти бл҃говолѝ бл҃гоꙋтро́бне."
 },
 {
  "type": "TEXT",
  "value": "Сла́ва: Ѡ҆чище́нїе на́мъ ꙗ҆ви́лсѧ є҆сѝ, пра́вда же и҆ и҆збавле́нїе, и҆ ꙗ҆́звою твое́ю на́шѧ не́мѡщи ᲂу҆врачева́лъ є҆сѝ. Ты̀ ᲂу҆́бѡ ще́дре, ꙗ҆́кѡ бл҃гъ, преста́вльшыѧсѧ въ сла́дости ра́йстѣй ᲂу҆чинѝ."
 },
 {
  "type": "TEXT",
  "value": "И҆ ны́нѣ: Млⷭ҇тивнѡ млⷭ҇тиве, чл҃вѣ́чества мѣ́рꙋ воспрїѧ́лъ є҆сѝ, и҆́же бж҃е́ственныѧ сла́вы превы́шшими ᲂу҆краша́ѧй возвыше́ньми, ѿ дв҃и́ческихъ ложе́снъ пло́ть прїе́мъ ѡ҆дꙋшевле́нꙋ, слове́снꙋ, є҆́юже сме́рть погꙋби́лъ є҆сѝ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀."
 },
 {
  "type": "TEXT",
  "value": "Гное́нїи ва́шими чⷭ҇тны́ми дꙋ́шъ и҆сцѣлѧ́ете недꙋ́ги ст҃і́и мч҃нцы, и҆ согни̑тїѧ тѣле́съ при́снѡ ѿе́млете, ᲂу҆ѧзвлѧ́юще лꙋка́выхъ де́мѡновъ мно́жество."
 },
 {
  "type": "TEXT",
  "value": "Прпⷣбныхъ ли́къ, ст҃и́телей же сосло́вїе, и҆ же́нъ сщ҃е́нныхъ бж҃е́ственное сочета́нїе, тве́рдѡ страда́льчествовавше, на нб҃сѣ́хъ наслаждє́нїѧ наслѣ́доваша."
 },
 {
  "type": "TEXT",
  "value": "Оу҆мертви́вше пѡ́стницы пло́ть, живо́тъ ᲂу҆лꙋчи́сте: па́сше же до́брѣ хрⷭ҇то́во ста́до, ст҃и́телїе премꙋ́дрїи, безсме́ртныѧ сла́вы по кончи́нѣ сподо́бистесѧ."
 },
 {
  "type": "TEXT",
  "value": "Сла́ва: Живы́хъ сло́ве живо́тъ, и҆ ᲂу҆ме́ршихъ поко́й сы́й, ꙗ҆̀же ѿ на́съ бж҃е́ственнымъ твои́мъ манове́нїемъ, преста́влєныѧ рабы̑ твоѧ̑, а҆враа́ма въ нѣ́дра ᲂу҆го́дника твоегѡ̀ вселѝ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Всели́сѧ въ тѧ̀ чⷭ҇таѧ, ѻ҆́ч҃ее сїѧ́нїе, и҆ невеще́ственными зарѧ́ми своегѡ̀ бж҃ества̀, тьмꙋ̀ разрꙋшѝ многобо́жїѧ, и҆ мі́ръ просвѣтѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Мч҃нцы твоѝ сп҃се, мнѡ́гїѧ мꙋ̑ки претерпѣ́ша, любо́вїю твое́ю дꙋша́ми ᲂу҆ѧзви́вшесѧ ст҃і́и, твоеѧ̀ жела́юще присносꙋ́щныѧ сла́вы, и҆ сла́дкагѡ твоегѡ̀ прича́стїѧ."
 },
 {
  "type": "TEXT",
  "value": "Чре́во врага̀ сме́ртїю растерза́лъ є҆сѝ сп҃се, и҆ всѧ̑ ꙗ҆̀же въ не́мъ ю҆́зники воскрⷭ҇и́лъ є҆сѝ, живо́тъ дарова́вый: є҆гѡ́же преста́влєныѧ бл҃годѣ́телю, сподо́би."
 },
 {
  "type": "TEXT",
  "value": "Сла́ва: Сле́зъ и҆ воздыха́нїѧ сꙋ́щыѧ во а҆́дѣ рабы̑ твоѧ̑ свободѝ сп҃се: ꙗ҆́кѡ є҆ди́нъ бо бл҃гоꙋтро́бенъ, ѿѧ́лъ є҆сѝ всѧ́кꙋ сле́зꙋ ѿ всѧ́кагѡ лица̀, вѣ́рнѡ бл҃гословѧ́щихъ тѧ̀."
 },
 {
  "type": "TEXT",
  "value": "И҆ ны́нѣ: И҆́же є҆стество́мъ содѣ́тель, содѣ́тельствꙋетсѧ въ ложесна́хъ твои́хъ, по́лный ꙗ҆́кѡ бг҃ъ, и҆стощава́етсѧ всенепоро́чнаѧ: є҆ди́нъ безсме́ртный, за всѣ́хъ сп҃се́нїе ᲂу҆мира́етъ сме́ртїю."
 },
 {
  "type": "TEXT",
  "value": "Конда́къ, гла́съ и҃: Со ст҃ы́ми ᲂу҆поко́й хрⷭ҇тѐ дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воздыха́нїе, но жи́знь безконе́чнаѧ."
 },
 {
  "type": "TEXT",
  "value": "І҆́косъ: Са́мъ є҆ди́нъ є҆сѝ безсме́ртный, сотвори́вый и҆ созда́вый человѣ́ка: земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ, созда́вый мѧ̀, и҆ рекі́й мѝ: ꙗ҆́кѡ землѧ̀ є҆сѝ, и҆ въ зе́млю ѿи́деши, а҆́може всѝ человѣ́цы по́йдемъ, надгро́бное рыда́нїе творѧ́ще пѣ́снь, а҆ллилꙋ́їа."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы бг҃очести́вїи въ вавѷлѡ́нѣ ѡ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Разрꙋши́вше ѡ҆пло́тъ ѕлоче́стїѧ вѧза́ньми сщ҃е́нными ва́шими всехва́льнїи, мои́хъ согрѣше́нїй бре́мѧ расточи́те, и҆ вопїю́ща мч҃нцы сп҃си́те: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Тꙋ́чами сщ҃е́нныхъ ва́шихъ крове́й, є҆ресе́й ѻ҆́гнь ᲂу҆гаси́сте: и҆ пла́менемъ ст҃и́телїе премꙋ́дрїи попали́сте нече́стїѧ пре́лести пле́велы, и҆ вѣ́рныхъ дꙋ́шы просвѣти́сте."
 },
 {
  "type": "TEXT",
  "value": "Пѡ́стницы воздержа́нїемъ плѡ́ти ᲂу҆мертви́вше, живꙋ́тъ по сме́рти: прⷪ҇рѡ́къ же првⷣныхъ ли́къ, и҆ сочета́нїе же́нское страда́льчествовавшее просла́висѧ. Тѣ́хъ мл҃твами хрⷭ҇тѐ, ѿ бѣ́дъ и҆зба́ви на́съ."
 },
 {
  "type": "TEXT",
  "value": "Сла́ва: Всѣ́хъ въ наде́жди жи́зни ᲂу҆со́пшихъ дꙋ́шы хрⷭ҇тѐ, ᲂу҆поко́й, презира́ѧй ꙗ҆̀же въ житїѝ тѣ́хъ согрѣшє́нїѧ, за мно́гое бл҃гоꙋтро́бїе твоѐ, бл҃гоꙋтро́бне є҆ди́не сп҃се, ѻ҆тцє́въ бж҃е бл҃гослове́нъ є҆сѝ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Всѧ̀ ꙗ҆́кѡ чⷭ҇таѧ воспрїѧ́ла є҆сѝ во ᲂу҆тро́бꙋ сло́во воплоща́емо: того̀ молѝ пречⷭ҇таѧ, прегрѣше́нїй ѡ҆чи́стити мѧ̀ дꙋшѝ и҆ тѣ́ла, къ тебѣ̀ чи́стою вѣ́рою притека́ющаго."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Всѐ жела́нїе мч҃нкѡвъ простре́сѧ ко є҆ди́номꙋ влⷣцѣ, любо́вїю томꙋ̀ соединѧ́емое, и҆ пою́щее: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Подае́ши вѣ́рою преста́вльшымсѧ свѣ́тлость бж҃е́ственнагѡ црⷭ҇твїѧ, нетлѣ́нїѧ ѻ҆де́ждꙋ да́рꙋѧй вопїю́щымъ: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Сла́ва: И҆спо́лни ра́дости и҆ весе́лїѧ, ꙗ҆̀же преста́вилъ є҆сѝ рабы̑ твоѧ̑ ще́дре, сподо́бивый и҆́хъ взыва́ти тебѣ̀ и҆ пѣ́ти: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "И҆ ны́нѣ: Разрѣша́ѧ є҆́ѵинꙋ клѧ́твꙋ, въ пренепоро́чнꙋю всели́лсѧ є҆сѝ дв҃ꙋ, бл҃гослове́нїѧ и҆сто́чникъ и҆сточа́ѧ вопїю́щымъ: бл҃гослове́нъ пречⷭ҇таѧ пло́дъ твоегѡ̀ чре́ва."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Бг҃оглаго́ливїи ѻ҆́троцы въ пещѝ со ѻ҆гне́мъ пла́мень попира́юще поѧ́хꙋ: бл҃гослови́те дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Хра́мы і҆́дѡльскїѧ низложи́сте страда́льчествꙋюще, и҆ себѐ трⷪ҇цы бж҃е́ствєнныѧ хра́мы созда́сте, стрⷭ҇тоте́рпцы гдⷭ҇ни а҆́гг҃лѡмъ собесѣ̑дницы."
 },
 {
  "type": "TEXT",
  "value": "Сщ҃е́нницы твоѝ хрⷭ҇тѐ, въ пра́вдꙋ ѡ҆бле́кшесѧ прпⷣбнѡ съ сꙋ́щими ѿ вѣ́ка ны́нѣ ра́дꙋютсѧ, твою̀ добро́тꙋ зрѧ́ще бж҃е́ственнꙋю ꙗ҆снѣ́йше."
 },
 {
  "type": "TEXT",
  "value": "Сщ҃е́ннѣйшихъ мл҃твами прⷪ҇рѡ́къ твои́хъ, и҆ же́нъ присносла́вныхъ, сꙋ́щихъ ѿ вѣ́ка првⷣныхъ, млⷭ҇ти твоѧ̑ сло́ве мі́рꙋ твоемꙋ̀ да́рꙋй."
 },
 {
  "type": "TEXT",
  "value": "Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а."
 },
 {
  "type": "TEXT",
  "value": "Правосꙋ́де, є҆гда̀ хо́щеши сꙋди́ти, ꙗ҆̀же ѿ на́съ прїѧ́лъ є҆сѝ, неѡсꙋжде́ны соблюдѝ, презрѣ́въ тѣ́хъ согрѣшє́нїѧ влⷣко."
 },
 {
  "type": "TEXT",
  "value": "Бг҃оро́диченъ: Ꙗ҆́вльшисѧ дв҃о, дꙋшѝ моеѧ̀ темнѣ́йшыѧ ѻ҆́блаки просвѣще́нїемъ твои́мъ ѿженѝ, пра́вды сл҃нца ро́ждшаѧ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѡ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ, и҆ славосло́влѧхꙋ во всѧ̑ вѣ́ки."
 },
 {
  "type": "TEXT",
  "value": "Землены̑ѧ по́двиги проше́дше, нбⷭ҇ныѧ прїѧ́ша вѣнцы̀ мч҃нцы и҆́стиннїи, вопїю́ще тѝ непреста́ннѡ: гдⷭ҇а по́йте, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Соше́дъ въ ро́въ преиспо́днѣйшїй, и҆̀же во гробѣ́хъ живꙋ́щыѧ воскр҃си́лъ є҆сѝ живонача́льною дла́нїю, и҆ по́далъ є҆сѝ рабѡ́мъ твои̑мъ, вѣ́рою пре́жде ᲂу҆со́пшымъ поко́й ще́дре."
 },
 {
  "type": "TEXT",
  "value": "Сла́ва: Ꙗ҆́кѡ и҆сто́чникъ жи́зни присносꙋ́щныѧ, ꙗ҆́кѡ сла́дости сы́й пото́къ, рабы̑ твоѧ̑ бл҃гоче́стнѡ къ тебѣ̀ преста́влєныѧ сподо́би пѣ́ти, и҆ славосло́вити тѧ̀ во всѧ̑ вѣ́ки."
 },
 {
  "type": "TEXT",
  "value": "И҆ ны́нѣ: Мр҃і́е дв҃о бцⷣе, ꙗ҆́же бг҃а сп҃са человѣ́кѡмъ ро́ждшаѧ тѣле́снѡ, сп҃са́й вѣ́рою пою́щыѧ твоѐ ржⷭ҇тво̀, и҆ превозносѧ́щыѧ во всѧ̑ вѣ́ки."
 },
 {
  "type": "TEXT",
  "value": "Та́же, пѣ́снь бцⷣы: Вели́читъ дꙋша̀ моѧ̀ гдⷭ҇а:"
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословле́нїи велича́емъ."
 },
 {
  "type": "TEXT",
  "value": "Стоѧ́хꙋ мч҃нцы пред̾ непра́ведными сꙋди́щи, всю̀ непра́вдꙋ бл҃года́тїю хрⷭ҇то́вою ѡ҆сꙋди́вше, и҆ ꙗ҆̀же ѿ ни́хъ держи̑мыѧ и҆з̾е́млюще, и҆ вѣнцы̀ пра́вды прїе́млюще."
 },
 {
  "type": "TEXT",
  "value": "Ꙗ҆ви́стесѧ ꙗ҆́коже корми̑ла цр҃кве, кора́бль ве́сь бл҃гоче́стнѡ напра́вивше бж҃їихъ за́повѣдей, всѝ первосщ҃еннонача́льницы и҆ па́стырїе бл҃же́ннїи: сегѡ̀ ра́ди ꙗ҆́кѡ ѡ҆корми́тели ва́съ чти́мъ."
 },
 {
  "type": "TEXT",
  "value": "Собо́ръ мо́литъ тѧ̀ гдⷭ҇и прⷪ҇рѡ́къ, и҆ прпⷣбныхъ, сосло́вїе же́нъ страда́льчествовавшихъ свѣтлѣ́йше, и҆ возсїѧ́вшихъ во ѡ҆бꙋче́нїи чл҃вѣколю́бче, мо́литъ тѧ̀, щедрѡ́ты твоѧ̑ на́мъ да́рꙋй."
 },
 {
  "type": "TEXT",
  "value": "Сла́ва: Є҆ѧ́же сподо́бишасѧ че́сти и҆ сла́вы вѣ́чныѧ всѝ ст҃і́и хрⷭ҇тѡ́вы: ꙗ҆̀же вѣ́рнѡ ѿше́дшыѧ житїѧ̀ сꙋ́етнагѡ, причасти́тисѧ рабы̑ твоѧ̑ сподо́би, млⷭ҇тиве, мл҃твами ст҃ы́хъ твои́хъ."
 },
 {
  "type": "TEXT",
  "value": "И҆ ны́нѣ, бг҃оро́диченъ: Носѧ́щи и҆сполне́нїе бл҃ги́хъ во ѡ҆б̾ѧ́тїихъ всенепоро́чнаѧ, и҆спо́лни на́съ мольбы̑ ра̑бъ твои́хъ: и҆ ꙗ҆̀же къ бг҃ꙋ шє́ствїѧ на̑ша и҆спра́ви, добродѣ́тельнѣ ᲂу҆крѣплѧ́ющи жи́тельствовати."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шшїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ человѣ́къ. Тѣ́мже пречⷭ҇тꙋю бцⷣꙋ вѣ́рнїи велича́емъ."
 },
 {
  "type": "TEXT",
  "value": "И҆мꙋ́ще мч҃нцы хрⷭ҇тѡ́вы непобѣди́мꙋю крѣ́пость, и҆ неѡдолѣ́емꙋю, ᲂу҆ничижи́сте мꙋчи́телей безбо́жное велѣ́нїе, и҆ црⷭ҇твїѧ нбⷭ҇нагѡ ꙗ҆́вѣ сподо́бистесѧ, просвѣща́еми трⷪ҇чными зарѧ́ми достохва́льнїи."
 },
 {
  "type": "TEXT",
  "value": "Разрꙋши́сѧ а҆́дъ го́рькїй, разрꙋши́вшꙋ тѝ є҆го̀ чл҃вѣколю́бче, и҆ воскр҃си́вшꙋ ꙗ҆̀же ѿ вѣ́ка та́мѡ спѧ́щыѧ: но и҆ ны́нѣ ꙗ҆́кѡ бл҃гъ преше́дшыѧ къ тебѣ̀ бл҃гоꙋтро́бне, невече́рнѧгѡ свѣ́та твоегѡ̀ сподо́би."
 },
 {
  "type": "TEXT",
  "value": "Сла́ва: Ве́сь є҆сѝ сп҃се сла́дость: ве́сь є҆сѝ жела́нїе, и҆ любо́вь вои́стиннꙋ ненасы́тнаѧ: ве́сь є҆сѝ добро́та несказа́ннаѧ: преста́вльшыѧсѧ ᲂу҆́бѡ къ тебѣ̀, твоеѧ̀ красоты̀ наслажда́тисѧ бл҃говолѝ, и҆ бж҃е́ственныѧ добро́ты твоеѧ̀ сподо́би."
 },
 {
  "type": "TEXT",
  "value": "И҆ ны́нѣ: Сп҃си́ мѧ мт҃и бж҃їѧ, ро́ждшаѧ хрⷭ҇та̀ сп҃са моего̀, бг҃а и҆ человѣ́ка, сꙋгꙋ́ба є҆стество́мъ, не ѵ҆поста́сїю: є҆диноро́дна ᲂу҆́бѡ ѿ ѻ҆ц҃а̀, и҆з̾ тебе́ же перворо́дна всеѧ̀ тва́ри: є҆го́же въ сꙋгꙋ́бомъ є҆стествѣ̀ велича́емъ."
 }
]