ponomar-pwa/static/data/shared/services/canons/paraclete/tone8/thu.json

[
 {
  "type": "HEADER",
  "value": "Въ четверто́къ канѡ́нъ ст҃ы̑мъ сла̑внымъ и҆ всехва̑льнымъ а҆пⷭ҇лѡмъ. Творе́нїе ѳеофа́ново. Гла́съ и҃:"
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ."
 },
 {
  "type": "TEXT",
  "value": "Ли́че а҆пⷭ҇льскїй свѣтови́дный, свѣ́тꙋ вели́комꙋ предстоѧ́й, моѐ ѡ҆мраче́ное ѡ҆зарѝ се́рдце, и҆ ко сп҃си́тєльнымъ стезѧ́мъ наста́ви. Два́жды."
 },
 {
  "type": "TEXT",
  "value": "И҆́скреннїи дрꙋ́зи и҆зба́вителѧ, страсте́й мѧ̀ любвѐ и҆зба́вите, мно́гими лестьмѝ житїѧ̀ прельще́наго, и҆ неразꙋ́мїѧ но́щїю покрыва́емаго."
 },
 {
  "type": "TEXT",
  "value": "Ѻ҆рꙋ́жїемъ ᲂу҆ѧ́звлєныѧ лꙋка́вагѡ и҆сцѣли́те, стрѣ́лы сꙋ́ще си́льнагѡ, а҆пⷭ҇ли бж҃е́ственнїи, вѣ́рою под̾ кро́въ ва́шъ прибѣга́ющыѧ."
 },
 {
  "type": "TEXT",
  "value": "Бг҃оро́диченъ: По́лный и҆стощава́етсѧ бг҃олѣ́пнѡ, и҆ ѿ твоегѡ̀ чре́ва плотоно́сецъ мт҃и чⷭ҇таѧ, происхо́дитъ, сп҃са́ѧй бл҃гоꙋтро́бїемъ прельщє́ныѧ ѕло́бою ѕмі́евою."
 },
 {
  "type": "HEADER",
  "value": "Дрꙋгі́й канѡ́нъ ст҃о́мꙋ чꙋдотво́рцꙋ нїкола́ю. Гла́съ и҃:"
 },
 {
  "type": "TEXT",
  "value": "І҆рмо́съ: Посѣ́ченый несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ: лю́таго врага̀ вода̀ потопѝ, и҆ непроходи́мое про́йде і҆и҃ль: пѣ́снь же воспѣва́шесѧ, гдⷭ҇еви пои́мъ, сла́внѡ бо просла́висѧ."
 },
 {
  "type": "TEXT",
  "value": "Съ ли́ки вы́шнихъ си́лъ, цр҃ю̀ всѣ́хъ бл҃же́нне предстоѧ́й, на́съ на землѝ при́снѡ призыва́ющихъ тѧ̀, всѧ́кагѡ и҆скꙋше́нїѧ ѕла́гѡ, нїко́лае сп҃са́й, разрѣше́нїѧ просѧ̀ прегрѣше́нїй на́шихъ."
 },
 {
  "type": "TEXT",
  "value": "И҆́же тобо́ю предста́телемъ ѡ҆бога́щшїисѧ нїко́лае, во дни́ же и҆ въ нощѝ вѣ́рою тебѣ̀ взыва́емъ: ны́нѣ предвари́ ны вельмѝ бѣ́дствꙋющыѧ бѣсо́вскими лꙋка́выми навѣ́ты, и҆ тлетво́рныхъ человѣ̑къ: ꙗ҆́кѡ да тишинꙋ̀ полꙋчи́вше, восхвалѧ́емъ тѧ̀."
 },
 {
  "type": "TEXT",
  "value": "Крѣ́пкими жи́лами мл҃твъ твои́хъ нїко́лае, ᲂу҆дави́ти на́съ тща́щихсѧ коне́чномꙋ ᲂу҆давле́нїю преда́ждь, и҆збавлѧ́ѧ на́съ ѿ тѣ́хъ лꙋка́вагѡ навѣ́та, во хвале́нїи зовꙋ́щыѧ: гдⷭ҇еви пои́мъ, сла́внѡ бо просла́висѧ."
 },
 {
  "type": "TEXT",
  "value": "Бг҃оро́диченъ: Зако́нѡвъ є҆сте́ственныхъ кромѣ̀, родила̀ є҆сѝ бг҃а и҆ законода́вца, чл҃вѣ́ка бы́вша. Того̀ ꙗ҆́кѡ бл҃га молѝ всенепоро́чнаѧ, на̑ша беззакѡ́нїѧ презрѣ́ти, вопїю́щихъ всегда̀: гдⷭ҇еви пои́мъ, сла́внѡ бо просла́висѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и: ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Си́лою препоѧ́шите. Сп҃сѡвы а҆пⷭ҇ли, и҆знемо́гшее страстьмѝ и҆ помышле́ньми се́рдце моѐ. Два́жды."
 },
 {
  "type": "TEXT",
  "value": "Є҆ди́но возвѣща́юще ᲂу҆ч҃нцы̀, трисвѣ́тлое бж҃їе сїѧ́нїе, многобо́жїѧ мглꙋ̀ потреби́ша."
 },
 {
  "type": "TEXT",
  "value": "Гно́й лꙋка́вый се́рдца моегѡ̀ ᲂу҆толи́те, ꙗ҆́кѡ вра́чеве бж҃е́ственнагѡ рꙋкодѣ́йствїѧ, ᲂу҆ч҃нцы̀ бг҃а на́шегѡ."
 },
 {
  "type": "TEXT",
  "value": "Бг҃оро́диченъ: Сп҃си́ мѧ чⷭ҇таѧ влⷣчце, ро́ждшаѧ па́че є҆стества̀ и҆зба́вителѧ всѣ́хъ, и҆ влⷣкꙋ, и҆ сп҃са и҆ гдⷭ҇а."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Да тѧ̀ почита́емъ, да пое́мъ тѧ̀ всегда̀, пода́ждь на́мъ рꙋ́кꙋ по́мощи, ст҃и́телю нїко́лае."
 },
 {
  "type": "TEXT",
  "value": "Оу҆спѝ, нїко́лае, твои́ми неꙋсыпа́ющими моли́твами, ꙗ҆̀же на ны̀ востаю́щыѧ напа̑сти, мо́лимъ тѧ̀."
 },
 {
  "type": "TEXT",
  "value": "Всего́ мѧ страстьмѝ напа́ствꙋема, и҆ и҆скꙋше́нїй лꙋка́выхъ человѣ̑къ, хода́тайствомъ твои́мъ ст҃е нїко́лае и҆зба́ви."
 },
 {
  "type": "TEXT",
  "value": "Бг҃оро́диченъ: Разрѣше́нїе грѣхѡ́въ чⷭ҇таѧ, дарова́ти мѝ, молѝ и҆зба́вителѧ, и҆ жите́йскихъ лю́тыхъ напа́стей."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Оу҆краси́стесѧ сла́внїи а҆пⷭ҇ли, бж҃е́ственными свѣ́тлостьми ᲂу҆добрѧ́еми, и҆ зарѧ́ми просвѣща́еми ва́съ свѣти̑ла показа́вшагѡ. Два́жды."
 },
 {
  "type": "TEXT",
  "value": "Бꙋ́ри всѧ́кїѧ и҆зба́вите мѧ̀, всѣ́хъ ко́рмчїи, бж҃е́ственнїи а҆пⷭ҇ли, въ пꙋчи́нѣ бѣ́дствꙋющаго, и҆ напа́стьми жите́йскими коле́блемаго."
 },
 {
  "type": "TEXT",
  "value": "Мо́ре смꙋща́юще многобо́жїѧ, ко́ни бг҃оизбра́ннїи, прегрѣше́нїй мои́хъ бе́зднꙋ ва́шими мл҃твами потопи́те."
 },
 {
  "type": "TEXT",
  "value": "Бг҃оро́диченъ: Равнодѣ́йственно роди́телю сло́во, и҆з̾ бокꙋ̀ твоє́ю воплоти́ла є҆сѝ дв҃о: тѣ́мже ꙗ҆ви́ласѧ є҆сѝ превы́шши всѣ́хъ тва́рей влⷣчце."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ѿ мно́жества прегрѣше́нїй мои́хъ, во мнѡ́гїѧ впа́даю безчи́слєнныѧ скѡ́рби: потщи́сѧ ст҃е нїко́лае помощи́ ми, бл҃года́телю подо́бѧсѧ."
 },
 {
  "type": "TEXT",
  "value": "Себѐ самого̀ пла́чꙋсѧ погиба́юща, живы́й въ лѣ́ности, мл҃твами твои́ми нїко́лае, къ покаѧ́нїю рꙋководи́ мѧ."
 },
 {
  "type": "TEXT",
  "value": "И҆́же трѝ ю҆́ношы и҆збавле́й, ѻ҆́тче нїко́лае, ᲂу҆мре́ти хотѧ́щыѧ, всѧ́кїѧ мѧ̀ и҆зба́ви тѣсноты̀, и҆ вѣ́чнагѡ ѡ҆сꙋжде́нїѧ."
 },
 {
  "type": "TEXT",
  "value": "Бг҃оро́диченъ: Дѣ́лати мѝ ра́зꙋмы нбⷭ҇ныѧ, пречⷭ҇таѧ ᲂу҆крѣпи́ мѧ, и҆ дꙋшѝ моеѧ̀ направлѧ́ющи къ живѡ́тнымъ вхо́дѡмъ движє́нїѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ: ра́звѣ тебѐ и҆но́гѡ не вѣ́мы."
 },
 {
  "type": "TEXT",
  "value": "Стѣснѧ́ема мѧ̀ мно́гими прегрѣше́ньми, къ сп҃си́тельной широтѣ̀ и҆спра́вите, ꙗ҆́кѡ ѡ҆корми́телїе а҆пⷭ҇ли. Два́жды."
 },
 {
  "type": "TEXT",
  "value": "Почита́ющаго мѧ̀ всечестны́й собо́ръ ва́шъ, бг҃ови́дцы а҆пⷭ҇ли, всѧ́кагѡ и҆зба́вите безче́стнагѡ дѣѧ́нїѧ, молю́сѧ."
 },
 {
  "type": "TEXT",
  "value": "Ꙗ҆́кѡ стрⷭ҇тє́мъ ᲂу҆подо́бльшесѧ ст҃і́и сп҃сѡвымъ, всѧ́кое сладостра́стїе ѿ дꙋшѝ моеѧ̀ ѿжени́те а҆пⷭ҇ли."
 },
 {
  "type": "TEXT",
  "value": "Бг҃оро́диченъ: Болѧ́щꙋю дꙋ́шꙋ мою̀ и҆сцѣлѝ, ро́ждшаѧ всѣ́хъ взе́млющаго недꙋ́ги, пречⷭ҇таѧ влⷣчце."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Оу҆крѣпѝ на́съ мл҃твами твои́ми бг҃обл҃же́нне нїко́лае, соблюда́ти повелѣ̑нїѧ хрⷭ҇та̀, є҆ди́нагѡ бг҃а на́шегѡ."
 },
 {
  "type": "TEXT",
  "value": "Въ мѵ́рѣхъ пожи́въ нїко́лае, бл҃гоꙋха́нїѧ бж҃е́ственнагѡ на́съ и҆спо́лни, бл҃гоче́стнѡ воспѣва́ющихъ тѧ̀."
 },
 {
  "type": "TEXT",
  "value": "Оу҆ще́дри на́съ мл҃твами твои́ми ст҃и́телю, бг҃а всеще́драгѡ ᲂу҆молѧ́ѧ нїко́лае, да и҆зба́вимсѧ бѣ́дъ и҆ скорбе́й."
 },
 {
  "type": "TEXT",
  "value": "Бг҃оро́диченъ: Во́дъ живото́чныхъ и҆спо́лнена сꙋ́щи ѻ҆трокови́це, всѣ́хъ на́съ напо́й, бл҃гочестномꙋ́дреннѣ пою́щыѧ тѧ̀."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑: ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ бж҃е, возведи́ мѧ."
 },
 {
  "type": "TEXT",
  "value": "Сотрѧ́сше мл҃твъ призыва́нїемъ, низложи́сте хра́мы і҆́дѡльскїѧ, ᲂу҆ч҃нцы̀ хрⷭ҇тѡ́вы. Но молю́сѧ вѣ́рою: ᲂу҆ма̀ моегѡ̀ сокрꙋши́те і҆́дѡлы, и҆ покажи́те хра́мъ бж҃їй мно́гими грѣхѝ пови́ннаго. Два́жды."
 },
 {
  "type": "TEXT",
  "value": "И҆́же на ка́мени непоколеби́мѣмъ созда́вшесѧ, ꙗ҆́кѡ ка́менїе, и҆збра́ннїи бг҃ови́дцы, моѐ се́рдце въ песцѣ̀ ᲂу҆мовре́днѡ созда́нное сп҃си́те: стека́ютсѧ бо напа́стей рѣ́ки, и҆ лю́тѣ мѧ̀ ѡ҆бꙋрева́ютъ."
 },
 {
  "type": "TEXT",
  "value": "Любвѐ льсти́выѧ ꙗ҆́же къ пло́ти, и҆ ме́рзка мно́гїѧ ра́ди ѕло́бы ꙗ҆́вльшагосѧ, и҆зба́вите мѧ̀ дрꙋ́зи сло́ва: и҆ къ любвѝ привѧжи́те возлюби́вшагѡ грѣ̑шныѧ, мно́гїѧ ра́ди млⷭ҇ти ѡ҆ставле́нїѧ."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ ши́покъ, ꙗ҆́кѡ чистѣ́йшїй крі́нъ, ꙗ҆́кѡ бл҃гоꙋха́нное ѡ҆бонѧ́нїе ѿ кра́сныхъ ᲂу҆до́лїй мїрски́хъ, творе́цъ и҆збра́въ тѧ̀ ѻ҆трокови́це, всели́всѧ во ᲂу҆тро́бꙋ твою̀, и҆ роди́всѧ, бл҃гоꙋха́нїѧ всѧ́чєскаѧ и҆спо́лнилъ є҆́сть."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ра́й се́рдце твоѐ ꙗ҆ви́сѧ нїко́лае, жи́зни дре́во посредѣ̀ и҆мѣ́ѧ и҆зба́вителѧ хрⷭ҇та̀: є҆го́же молѝ непреста́ннѡ, раѧ̀ сотвори́ти жи́тели всѧ̑ ны̀, те́плымъ застꙋ́пникомъ тобо́ю ѡ҆бога́щшыѧсѧ."
 },
 {
  "type": "TEXT",
  "value": "Въ лѣ́ности жи́знь мою̀ прехождꙋ̀, и҆ безбоѧ́зненнѡ согрѣша́ю ѻ҆каѧ́нный: и҆ та́мѡ неѿрица́емое сꙋди́ще помышлѧ́ѧ, стра́хомъ содержи́мь є҆́смь: ᲂу҆ще́дри мѧ̀ бж҃е, нїкола́а мл҃твами, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Внеза́пꙋ находѧ́щꙋю мѝ бꙋ́рю и҆скꙋше́нїй многоѡбра́зныхъ, за мно́жество мои́хъ согрѣше́нїй, вопїю̀: не ѡ҆ста́ви менѐ бл҃же́нне без̾ застꙋпле́нїѧ, но простри́ ми ꙗ҆́кѡ млⷭ҇тивъ по́мощи рꙋ́кꙋ, и҆ сп҃си́ мѧ."
 },
 {
  "type": "TEXT",
  "value": "Бг҃оро́диченъ: Пала́та высо́кагѡ цр҃ѧ̀, и҆ ѻ҆гнеѡбра́зный была̀ є҆сѝ прⷭ҇то́лъ дв҃о, херꙋві̑мъ превы́шши, и҆ серафі̑мъ, па́че ᲂу҆ма̀ бы́вшаѧ. Тѣ́мже тѧ̀ всѧ́кое дыха́нїе сла́витъ, ꙗ҆́кѡ мт҃рь зижди́телѧ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Но́щь мѧ̀ содержи́тъ лѣ́ностей, и҆ покрыва́етъ мѧ̀ тьма̀ грѣхо́внаѧ: свѣ́тъ мі́ра премꙋ́дрїи а҆пⷭ҇ли ꙗ҆́вльшесѧ, ѡ҆зари́ти потщи́тесѧ ѡ҆мраче́нное моѐ се́рдце. Два́жды."
 },
 {
  "type": "TEXT",
  "value": "Дрꙋго́е нб҃о ꙗ҆́вльшесѧ, повѣ́дающе бг҃а на́шегѡ сла́вꙋ, безсла́вїѧ страсте́й и҆зба́вите бг҃оглаго́ливїи, вѣ́рою прибѣга́ющыѧ къ держа́вномꙋ ва́шемꙋ покро́вꙋ."
 },
 {
  "type": "TEXT",
  "value": "Ѻ҆́гненное ᲂу҆́глїе ꙗ҆́вльшесѧ а҆пⷭ҇ли, возжига́еми ѻ҆гне́мъ ᲂу҆тѣ́шителѧ, всѧ́кꙋ ве́щь попали́те на́шеѧ ѕло́бы, и҆ ѻ҆гнѧ̀ негаси́магѡ и҆зба́вите на́съ во вѣ́ки."
 },
 {
  "type": "TEXT",
  "value": "Бг҃оро́диченъ: Гора̀ присѣ́ннаѧ ꙗ҆ви́ласѧ є҆сѝ нерꙋкосѣ́чнаѧ, ѿ неѧ́же ѿсѣче́сѧ ка́мень: тѣ́мже влⷣчце, ᲂу҆миле́нїе дꙋшѝ мое́й пода́ждь ѡ҆мраче́ннѣй, и҆ ѡ҆камене́ннѣй го́рькими любосла́стьми."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "И҆сточи́лъ є҆сѝ стрꙋи̑ ᲂу҆че́нїй, є҆ресе́й и҆зсꙋша́ѧ пото́ки, и҆ вѣ́рныхъ дꙋ́шы напоѧ́ющїй бога́тнѡ, сщ҃еннодѣ́йственниче нїко́лае: сегѡ̀ ра́ди тѧ̀ почита́емъ."
 },
 {
  "type": "TEXT",
  "value": "Оу҆крѣпи́лсѧ є҆сѝ си́лою трⷪ҇ческою возмога́емь, кꙋмі́ры лє́стныѧ погꙋби́ти, тѣ́мже вѣ́рнѡ молю́сѧ тѝ ѻ҆́тче: ᲂу҆ма̀ моегѡ̀ і҆́дѡлы стра̑стныѧ ѿженѝ."
 },
 {
  "type": "TEXT",
  "value": "Мѵ́рѧнѡвъ прпⷣбне первопресто́льникъ бы́въ, по сме́рти и҆сточа́еши бж҃е́ственное мѵ́ро, ѕлосмра̑дныѧ на́шѧ ѿгонѧ́ѧ недꙋ́ги, нїко́лае всебл҃же́нне, вѣ́рнѡ къ тебѣ̀ пристꙋпа́ющымъ."
 },
 {
  "type": "TEXT",
  "value": "Бг҃оро́диченъ: Оу҆кроти́ла є҆сѝ тече́нїе сме́ртное, безсме́ртнаго бг҃а ро́ждшаѧ: є҆го́же молѝ чⷭ҇таѧ, стра̑сти ᲂу҆мертви́ти смире́ннагѡ моегѡ̀ тѣлесѐ, и҆ жи́зни мѧ̀ сподо́бити."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Коле́блемꙋю страстьмѝ дꙋ́шꙋ мою̀ ᲂу҆крѣпи́те, цр҃кве неразори̑маѧ ѡ҆снова̑нїѧ сꙋ́ще, и҆ столпѝ непоколеби́мїи, вѣ́рныхъ предгра̑дїѧ, ловцы̀ сꙋ́щихъ во глꙋбинѣ̀ поги́бели, бл҃гоꙋти̑шнаѧ приста̑нища вѣ́рнѡ пою́щихъ: дѣ́ти бл҃гослови́те, сщ҃е́нницы воспо́йте, лю́дїе превозноси́те є҆го̀ во вѣ́ки. Два́жды."
 },
 {
  "type": "TEXT",
  "value": "И҆́же во гро́бѣ те́мнагѡ ѿча́ѧнїѧ, и҆ въ преиспо́днихъ паде́нїѧ сласте́й лежа́щаго мѧ̀, ва́шими мл҃твами возвестѝ, ᲂу҆млⷭ҇рдитесѧ ᲂу҆ч҃нцы̀ сп҃сѡвы, и҆́же ᲂу҆чи́телева бл҃гоꙋтро́бїѧ ѡ҆богати́тисѧ ꙗ҆́вѣ сподо́бистесѧ, а҆пⷭ҇ли бг҃ови́дцы во всѧ̑ вѣ́ки. Два́жды."
 },
 {
  "type": "TEXT",
  "value": "Бг҃оро́диченъ: Ꙗ҆́кѡ свѣтла̀ въ красота́хъ добродѣ́тели ꙗ҆ви́ласѧ є҆сѝ всечⷭ҇таѧ, добротвори́тельное вседѣ́телево бл҃голѣ́пїе во ᲂу҆тро́бꙋ вмѣсти́ла є҆сѝ: є҆го́же прилѣ́жнѡ молѝ, грѣха́ми страсте́й содержи́мꙋю, и҆ добро́ты дре́внїѧ и҆́щꙋщꙋю чⷭ҇таѧ, ѕѣлѡ̀ бл҃голѣ́пнѣйше дꙋ́шꙋ мою̀ просвѣти́ти во всѧ̑ вѣ́ки."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те дѣла̀ гдⷭ҇нѧ гдⷭ҇а."
 },
 {
  "type": "TEXT",
  "value": "Просвѣще́нъ сы́й бг҃омꙋ́дре ст҃и́телю, свѣтоза́рными лꙋча́ми трисо́лнечнагѡ бж҃ества̀, страсте́й мои́хъ тьмꙋ̀ мл҃твами твои́ми разорѝ нїко́лае."
 },
 {
  "type": "TEXT",
  "value": "И҆́же воево́ды трѝ и҆збавле́й ѿ сме́рти, прише́ствїемъ стра́шнымъ твои́мъ, сщ҃еннотаи́нниче нїко́лае, ѿ всѧ́кагѡ смертоно́снагѡ вре́да и҆ на́съ и҆зба́ви."
 },
 {
  "type": "TEXT",
  "value": "Коле́блющыѧсѧ бѣсо́вскими и҆скꙋше́нїи, и҆ ѿ ѡ҆би́дѧщихъ человѣ̑къ, твои́ми мл҃твами ᲂу҆твердѝ на́съ, и҆ невре́дны сп҃сѝ всебл҃же́нне нїко́лае."
 },
 {
  "type": "TEXT",
  "value": "Бг҃оро́диченъ: Мольбꙋ̀ принесѝ гдⷭ҇еви, ᲂу҆ще́дрити и҆ сп҃стѝ вѣ́рою къ тебѣ̀ притека́ющыѧ, прест҃а́ѧ дв҃о, человѣ́кѡмъ помо́щнице."
 },
 {
  "type": "TEXT",
  "value": "Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а:"
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. Тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ."
 },
 {
  "type": "TEXT",
  "value": "Львѡ́въ дꙋшетлѣ́нныхъ си́лою бж҃їею сокрꙋши́вше чє́люсти а҆пⷭ҇ли, ꙗ҆́кѡ ѿ хрⷭ҇та̀ кнѧ́зи поста́влени бы́сте на землѝ, ѱало́мски дꙋ́хꙋ сїю̀ покарѧ́юще бл҃гоче́стнѡ: тѣ́мже безчи̑ннаѧ двиза̑нїѧ моегѡ̀ се́рдца зако́нѡмъ бж҃е́ственнымъ покори́те."
 },
 {
  "type": "TEXT",
  "value": "Кра́снаго па́че всѣ́хъ сынѡ́въ человѣ́ческихъ, ꙗ҆́вльшагосѧ въ мі́рѣ проповѣ́давше, сло́ва бж҃їѧ, но́зѣ ᲂу҆краси́сте ꙗ҆́кѡ бл҃говѣствꙋ́ющїи всемꙋ́дрїи, ми́ръ же и҆ живо́тъ. Тѣ́мже смꙋща́емꙋю страстьмѝ дꙋ́шꙋ мою̀ ва́шими мл҃твами ᲂу҆мири́те."
 },
 {
  "type": "TEXT",
  "value": "Оу҆мертви́вше ᲂу҆́ды ꙗ҆̀же на землѝ, въ живо́тъ всѧ́ческїй ѡ҆блеко́стесѧ, страстьмѝ стрⷭ҇ть и҆з̾ѡбразꙋ́юще честнꙋ́ю. Тѣ́мже ᲂу҆мерщвле́ннаго мѧ̀ стрѣло́ю ѕло́бы лꙋка́вагѡ, ѡ҆живи́те лѣчьба́ми и҆́стиннагѡ покаѧ́нїѧ, бг҃обл҃же́ннїи а҆пⷭ҇ли."
 },
 {
  "type": "TEXT",
  "value": "Бг҃оро́диченъ: Недꙋ́гꙋющꙋю дꙋ́шꙋ мою̀ стра́стїю лю́тою, ро́ждшаѧ бг҃а пребл҃га́го, ꙗ҆́кѡ млⷭ҇тива и҆сцѣлѝ, и҆ и҆зба́ви мѧ̀ при́снѡ пречⷭ҇таѧ, подстрека́ющихъ и҆ находѧ́щихъ мѝ врагѡ́въ, ꙗ҆́кѡ да сп҃са́емь ᲂу҆се́рднѡ тѧ̀ велича́ю, возвели́чившꙋю ро́дъ на́шъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю дв҃о чⷭ҇таѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Ꙗ҆́кѡ и҆зба́витель въ ско́рби вѣ́рою тѧ̀ молѧ́щымъ, и҆зба́ви мѧ̀ ѕло́бы всѧ́кїѧ нїко́лае, бл҃га́го молѧ̀ бг҃а и҆ гдⷭ҇а."
 },
 {
  "type": "TEXT",
  "value": "Сы́й съ нбⷭ҇ными ны́нѣ ликостоѧ́ньми, ст҃ѣ́йшїй ѻ҆́тче нїко́лае, бл҃га́го ᲂу҆молѝ бг҃а, сп҃стѝ на́съ."
 },
 {
  "type": "TEXT",
  "value": "Сꙋ́дъ при две́рехъ, блюдѝ дꙋшѐ моѧ̀, и҆ сꙋдїѝ бг҃ꙋ возопі́й: нїкола́а мл҃твами сп҃си́ мѧ гдⷭ҇и."
 },
 {
  "type": "TEXT",
  "value": "Бг҃оро́диченъ: Свѣ́та сꙋ́щи прїѧ́телище дв҃о, просвѣтѝ ѡ҆мраче́ннꙋю страстьмѝ дꙋ́шꙋ мою̀: ꙗ҆́кѡ да вѣ́рою и҆ любо́вїю при́снѡ сла́влю тѧ̀."
 }
]