ponomar-pwa/static/data/shared/services/canons/paraclete/tone8/wed.json

[
 {
  "type": "HEADER",
  "value": "Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, гла́съ и҃, творе́нїе і҆ѡ́сифово, є҆гѡ́же краегране́сїе без̾ бг҃оро́дичнѡвъ:"
 },
 {
  "type": "TEXT",
  "value": "Пригво́ждшемꙋсѧ на дре́вѣ бг҃ꙋ бл҃года́ть."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща."
 },
 {
  "type": "TEXT",
  "value": "И҆́же ѿ дре́ва сла́стною снѣ́дїю ме́ртва мѧ̀ бы́вшаго, на крⷭ҇тѣ̀ сло́ве ᲂу҆мертви́выйсѧ, ѡ҆живи́лъ є҆сѝ, и҆ сла́вою ᲂу҆добри́лъ є҆сѝ: покланѧ́юсѧ твое́й держа́вѣ, славосло́вѧ страда̑нїѧ, и҆ бл҃гоꙋтро́бїе неисче́тное."
 },
 {
  "type": "TEXT",
  "value": "Є҆гда̀ распростре́сѧ на дре́вѣ вїногра́дъ невоздѣ́ланный, вїно̀ на́мъ бж҃е́ственныѧ бл҃года́ти и҆сточѝ, сердца̀ веселѧ́щее, и҆ пре́лести пїѧ́нство ѿню́дъ потреблѧ́ющее, и҆ грѣхѝ ѡ҆чища́ющее."
 },
 {
  "type": "TEXT",
  "value": "Мч҃нченъ: Преиспещре́ни ра́нами великомч҃нцы, и҆ страда́нїй болѣ́зньми ᲂу҆краша́еми, красны̀ добротвори́тельномꙋ влⷣцѣ предста́сте со сла́вою, всесла́внѡ веселѧ́щесѧ, и҆ бг҃ови́дны познава́еми."
 },
 {
  "type": "TEXT",
  "value": "Мч҃нченъ: Си́лою бж҃е́ственною проѧвле́ннѡ ᲂу҆крѣплѧ́еми ст҃і́и, си́льнагѡ всю̀ крѣ́пость гꙋби́тельнꙋю мꙋ́жески низложи́сте: и҆ вѣнча́вшесѧ краснѡ̀ побѣди́тельными вѣнцы̀, ра́дꙋющесѧ бг҃ꙋ предста́сте."
 },
 {
  "type": "TEXT",
  "value": "Бг҃оро́диченъ: Предстоѧ́щи крⷭ҇тꙋ̀ твоемꙋ̀ гдⷭ҇и, неискꙋсобра́чнаѧ, и҆ твоѐ ᲂу҆ѧзвле́нїе зрѧ́щи влⷣко, ᲂу҆ѧзвлѧ́ема глаго́лаше: ᲂу҆вы̀ мнѣ̀ ча́до, болѣ́зни и҆збѣ́гши въ ржⷭ҇твѣ̀ твое́мъ, ны́нѣ болѣ́зненнѡ терза́юсѧ."
 },
 {
  "type": "HEADER",
  "value": "Дрꙋгі́й канѡ́нъ прест҃ѣ́й бцⷣѣ. Гла́съ и҃:"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "На тѧ̀ дв҃о, наде́ждꙋ возложи́хъ сп҃се́нїѧ моегѡ̀, грѣхо́вныѧ скве́рны всего́ мѧ ѡ҆мы́й, и҆ чи́ста содѣ́лай, бг҃ꙋ и҆ сн҃ꙋ твоемꙋ̀ бл҃гоꙋгожда́ти и҆ дѣ́ѧти, и҆ тогѡ̀ всест҃о́мꙋ и҆́мени."
 },
 {
  "type": "TEXT",
  "value": "Двє́ри свѣ́та, ѻ҆́чи моѝ просвѣтѝ, и҆̀же помрачѝ мра́чный ѕмі́й тьмо́ю прегрѣше́нїй, и҆ двє́ри мѝ ѿве́рзи покаѧ́нїѧ дв҃о, и҆ къ животꙋ̀ наста́ви мѧ̀, ѿ пла́мене и҆ тьмы̀ и҆схитѝ."
 },
 {
  "type": "TEXT",
  "value": "Мт҃и бж҃їѧ, ꙗ҆́кѡ дерзнове́нїе и҆мꙋ́щи къ ро́ждшемꙋсѧ и҆з̾ тебѐ, є҆диноро́дномꙋ сло́вꙋ, и҆ ѻ҆ц҃ꙋ̀ собезнача́льномꙋ, молѝ всенепоро́чнаѧ, дꙋ́шꙋ мою̀ и҆зба́вити ѿ бѣсо́вскагѡ ѡ҆ѕлобле́нїѧ, и҆ ѻ҆гнѧ̀, и҆ всѧ́кагѡ мꙋче́нїѧ."
 },
 {
  "type": "TEXT",
  "value": "Бл҃гослове́нъ пло́дъ бг҃оневѣ́сто твоегѡ̀ чре́ва, и҆́мже земні́и всѝ ѿ клѧ́твы и҆зба́вихомсѧ, бл҃гослове́ннаѧ, пречⷭ҇таѧ, несказа́нное чꙋ́до, недоразꙋмѣ́емое вѣ́дѣнїе, всѣ́хъ вѣ́рныхъ сп҃се́нїе."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀ хрⷭ҇тѐ за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебѐ є҆ди́не чл҃вѣколю́бче."
 },
 {
  "type": "TEXT",
  "value": "Оу҆твержде́й нб҃са̀, и҆ зе́млю ѡ҆снова́вый, и҆ мо́ре сло́вомъ свѧза́вый, ты̀ свѧ́занъ бы́лъ є҆сѝ менѐ ра́ди, и҆ на крⷭ҇тѣ̀ пригвожда́емь: ꙗ҆́кѡ да ѿ ᲂу҆́зъ грѣха̀ разрѣши́ши мѧ̀ чл҃вѣколю́бче."
 },
 {
  "type": "TEXT",
  "value": "Крⷭ҇тномꙋ дре́вꙋ вра́гъ прирази́всѧ, ᲂу҆мертви́сѧ съ бѣ́сы свои́ми ѕлодѣ́йственными: и҆ вкꙋше́нїемъ лꙋка́вымъ ѡ҆сꙋжде́нный, поми́лованъ бы́сть, и҆ ᲂу҆твержде́нїемъ бл҃гоче́стїѧ тва́рь ᲂу҆тверди́сѧ."
 },
 {
  "type": "TEXT",
  "value": "Мч҃нченъ: Многови̑днымъ ра́намъ, и҆ мечє́мъ, и҆ ѕвѣрє́мъ, и҆ ѡ҆бнаже́нїємъ тѣлє́снымъ вдава́еми, лꙋка̑вымъ гони́телємъ, бж҃е́ственнїи и҆ до́блїи страда́льцы, и҆ не ꙗ҆́ты пребы́ша манове́нїемъ лꙋ́чшимъ."
 },
 {
  "type": "TEXT",
  "value": "Мч҃нченъ: Взира́юще помышле́нїемъ, и҆ тре́звенною мы́слїю къ бꙋ́дꙋщымъ, и҆ текꙋ́щыѧ до конца̀ пренебрего́ша хрⷭ҇тѡ́вы мч҃нцы сла́внїи: тѣ́мже нестерпи́мыѧ болѣ̑зни претерпѣ́ша ра́дꙋющесѧ."
 },
 {
  "type": "TEXT",
  "value": "Бг҃оро́диченъ: Многопѣ́таѧ а҆́гница, а҆́гнца зрѧ́щи воздвиза́ема на дре́во непра́веднѣ, пла́чꙋщи восклица́ше, мт҃рски слезѧ́щи: и҆ долготерпѣ́нїе поѧ́ше, того̀ сла́вѧщи."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Всѐ моѐ жела́нїе къ тебѣ̀ движа̀, влⷣчце чⷭ҇таѧ, плотски́хъ мѧ̀ жела́нїй вско́рѣ премѣнѝ."
 },
 {
  "type": "TEXT",
  "value": "Возсїѧ́й мѝ покаѧ́нїѧ чи̑стыѧ зари̑, влⷣчце две́ре свѣ́та, и҆ грѣхѡ́въ мои́хъ мглꙋ̀ потребѝ."
 },
 {
  "type": "TEXT",
  "value": "Є҆ди́на всенепоро́чнаѧ, поро́ка всѧ́кагѡ на́съ и҆зба́ви, и҆ и҆скꙋше́нїй находѧ́щихъ, и҆ ѻ҆гнѧ̀ вѣ́чнꙋющагѡ."
 },
 {
  "type": "TEXT",
  "value": "Оу҆скорѝ посѣти́ти болѧ́щаго, пречⷭ҇таѧ, и҆ ѿ лю́тыѧ ра́ны и҆зба́ви мѧ̀, и҆ всѧ́кїѧ ско́рби."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Ты̀ моѧ̀ крѣ́пость гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ̑мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва чл҃вѣколю́бче."
 },
 {
  "type": "TEXT",
  "value": "Ро́дъ человѣ́ческїй ѿ паде́нїѧ призва́сѧ, є҆го́же под̾ѧ́тъ дре́вле первозда́нный: всѣ́хъ бо содѣ́тель воздви́женъ бы́сть на дре́во, пе́рсты ѡ҆кровавлѧ́емь, и҆ гвоздьмѝ во́лею пригвожда́емь въ рꙋ́цѣ, и҆ въ ре́бра копїе́мъ пробода́емь."
 },
 {
  "type": "TEXT",
  "value": "Ста̀ крⷭ҇тъ, и҆ ле́сть всѧ̀ низпаде́сѧ: тебѣ̀ сп҃се, ѡ҆бнаже́нꙋ бы́вшꙋ, ѡ҆бнажи́сѧ чꙋ́ждїй: и҆ а҆да́мъ бж҃е́ственнагѡ нетлѣ́нїѧ ри́зою ѡ҆дѣ́ѧнъ бы́сть, тва́рь просвѣти́сѧ помрача́емꙋ со́лнцꙋ, на дре́вѣ хрⷭ҇тѐ распина́емꙋ тѝ."
 },
 {
  "type": "TEXT",
  "value": "Мч҃нченъ: Но́вагѡ заколе́нїѧ, ꙗ҆́коже ѻ҆вча́та мч҃нцы, пожре́номꙋ сло́вꙋ принесо́стесѧ: кро́вными тече́нїи, пре́лести морѧ̀ и҆зсꙋши́вше бж҃е́ственною бл҃года́тїю, и҆злїѧ́нїе страсте́й ѡ҆дожде́нїемъ чꙋде́съ потреблѧ́ете всегда̀ сла́внїи."
 },
 {
  "type": "TEXT",
  "value": "Мч҃нченъ: Ѿсѣче́нїе ᲂу҆дѡ́въ всѣ́хъ под̾ѧ́сте мч҃нцы, и҆ зꙋбѡ́въ и҆ ногте́й и҆скорене́нїе, рꙋ́къ ѿрѣ́занїе неща́дно, ѧ҆зы́ка же и҆ но́гъ и҆ соста́вѡвъ тѣле́сныхъ: тѣ́мже превели́кїѧ сподо́бистесѧ сла́вы, всѣ́хъ бг҃ꙋ предстоѧ́ще."
 },
 {
  "type": "TEXT",
  "value": "Бг҃оро́диченъ: Своего́ си ю҆нца̀ непоро́чнаѧ ю҆́ница ви́дѣвши на дре́во воздви́жена, вопїѧ́ше со восклица́нїемъ: ча́до, ка́кѡ тѧ̀ законопрестꙋ́пныхъ со́нмъ ѿню́дъ не ᲂу҆ще́дри, ᲂу҆ще́дрившаго и҆̀; но ᲂу҆смотре́нїемъ льсти́вымъ сме́рти преда́ти непра́веднѡ произво́ли."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Оу҆слы́шахъ гдⷭ҇и, смотре́нїѧ твоегѡ̀ та́инство: разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀."
 },
 {
  "type": "TEXT",
  "value": "Дꙋ́шꙋ мою̀, ѡ҆мраче́ннꙋю прегрѣше́ньми, ѡ҆зарѝ свѣ́томъ приснодв҃о, ꙗ҆́же сл҃нце ро́ждшаѧ пра́вды."
 },
 {
  "type": "TEXT",
  "value": "И҆скꙋше́нїй мѧ̀ и҆схитѝ, и҆ житїѧ̀ дꙋшетлѣ́нныѧ бꙋ́ри, и҆ ѻ҆гнѧ̀ вѣ́чнагѡ свободи́ мѧ бг҃оневѣ́сто."
 },
 {
  "type": "TEXT",
  "value": "Дв҃ства сщ҃е́нный сосꙋ́де, и҆ невмѣсти́магѡ є҆стество́мъ вселе́нїе. Дꙋ́шꙋ мою̀ ѡ҆мраче́ннꙋю ѿ мно́гихъ страсте́й, просвѣтѝ."
 },
 {
  "type": "TEXT",
  "value": "Всест҃а́ѧ бг҃оневѣ́сто, влⷣчце мі́ра, ты́ мѧ сп҃сѝ, ѿ бѣ́дъ и҆збавлѧ́ющи, и҆ страсте́й молвꙋ̀ ѿгонѧ́ющи."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀ свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Да сла́стнагѡ вкꙋше́нїѧ и҆зба́виши мѧ̀, же́лчи долготерпѣли́ве вкꙋси́лъ є҆сѝ хотѧ̀: и҆ ꙗ҆́кѡ да ме́ртвости совлече́ши мѧ̀ і҆и҃се, страсте́й, на́гъ пригвозди́тисѧ и҆зво́лилъ є҆сѝ на дре́вѣ: пою̀ твоѐ бл҃гоꙋтро́бное."
 },
 {
  "type": "TEXT",
  "value": "И҆стлѣ́вшꙋю страстьмѝ дꙋ́шꙋ мою̀, сло́ве, но́вꙋ творѧ̀, дꙋ́шꙋ пре́далъ є҆сѝ ѻ҆ц҃ꙋ̀, на дре́вѣ ви́сѧ, и҆ не терпи́тъ бездꙋ́шнаѧ землѧ̀ сїѧ̑ поразꙋмѣва́ющи, но стра́хомъ коле́блетсѧ воспѣва́ющи тѧ̀."
 },
 {
  "type": "TEXT",
  "value": "Мч҃нченъ: Оу҆краси́стесѧ мч҃нцы бж҃е́ственными стрⷭ҇тьмѝ ᲂу҆добрѧ́еми, и҆ стопа́мъ послѣ́довавше стрⷭ҇тьмѝ всѣ̑мъ безстра́стїе пода́вшемꙋ, сло́вꙋ є҆диноро́дномꙋ, ѻ҆тца̀ безнача́льнагѡ: сегѡ̀ ра́ди съ ни́мъ прославлѧ́етесѧ."
 },
 {
  "type": "TEXT",
  "value": "Мч҃нченъ: Оу҆страни́вшесѧ до́льнихъ, неви̑димыѧ наслѣ́довасте, въ нбⷭ҇ныхъ водворѧ́ющесѧ бж҃е́ственныхъ селе́нїихъ, и҆ прича́стїемъ бж҃е́ственнымъ ѡ҆божа́еми невеще́ственнѡ, сп҃совы непобѣди́мїи мч҃нцы."
 },
 {
  "type": "TEXT",
  "value": "Бг҃оро́диченъ: Стра́нно видѣ́нїе, ви́жꙋ, взыва́ше препѣ́таѧ: ка́кѡ и҆́же зрѣ́нїемъ всю̀ зе́млю коле́блѧй, на дре́вѣ возвыша́емь ᲂу҆снꙋ́лъ є҆сѝ, спѧ́щыѧ ѿ вѣ́ка хотѧ̀ возбꙋди́ти; покланѧ́юсѧ сн҃е, твоемꙋ̀ долготерпѣ́нїю."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Оу҆́тренююще вопїе́мъ тѝ, гдⷭ҇и, сп҃си́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы."
 },
 {
  "type": "TEXT",
  "value": "Пое́мъ тѧ̀ дв҃о всепѣ́таѧ, ꙗ҆́же сло́во бж҃їе вмѣсти́вшаѧ во чре́вѣ твое́мъ пренепоро́чнаѧ."
 },
 {
  "type": "TEXT",
  "value": "Ѻ҆гнѧ̀ негаси́магѡ, и҆ че́рвїѧ и҆зба́ви мѧ̀ мт҃и бж҃їѧ, ꙗ҆́кѡ и҆мꙋ́щаѧ є҆́же ми́ловати цѣле́бнѡ."
 },
 {
  "type": "TEXT",
  "value": "Стѣна̀ ты̀ вѣ́рныхъ и҆ держа́ва всест҃а́ѧ є҆сѝ, сп҃са́ющи ѿ и҆скꙋше́нїй пою́щыѧ тѧ̀."
 },
 {
  "type": "TEXT",
  "value": "Недꙋ́гꙋющꙋю дꙋ́шꙋ мою̀ и҆сцѣлѝ, ро́ждшаѧ всѣ́хъ сп҃се́нїе, и҆ взе́млющаго недꙋ́ги, пречⷭ҇таѧ влⷣчце."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю, и҆ сп҃сѝ."
 },
 {
  "type": "TEXT",
  "value": "Воспѣ́ша нбⷭ҇ныѧ си̑лы всѧ̑ и҆ ᲂу҆диви́шасѧ, на крⷭ҇тѣ́ тѧ сло́ве взира́юще ви́сѧща: и҆ а҆да́мъ ᲂу҆ѧ́звленный сп҃се, и҆сцѣлѣ̀ ꙗ҆́звою твое́ю, и҆ клѧ́тва прогна́на бы́сть."
 },
 {
  "type": "TEXT",
  "value": "Разрѣша́етсѧ ѿ ᲂу҆́зъ нерѣши́мыхъ человѣ́чество, тебѣ̀ сло́ве пло́тїю свѧ́занꙋ бы́вшꙋ: и҆ свѧзꙋ́етсѧ мꙋчи́тель ꙗ҆́кѡ пти́ца, и҆ ѿ всѣ́хъ вѣ́рныхъ нарꙋга́емь: сла́ва хрⷭ҇тѐ бл҃гоꙋтро́бїю твоемꙋ̀."
 },
 {
  "type": "TEXT",
  "value": "Мч҃нченъ: Ꙗ҆ви́стесѧ бг҃озра́чнїи стрⷭ҇тоте́рпцы ꙗ҆́коже ᲂу҆́глїе, всѧ́кꙋ ѕлоче́стїѧ ве́щь попалѧ́юще бл҃года́тїю, на ᲂу҆́глїѧхъ же ѻ҆гнѧ̀ всесожига́еми, и҆ бж҃е́ственное прохлажде́нїе прїе́млюще."
 },
 {
  "type": "TEXT",
  "value": "Мч҃нченъ: Ѻ҆вча́та и҆́стиннагѡ па́стырѧ стрⷭ҇тоно́сцы ꙗ҆влѧ́еми, посредѣ̀ ди́вїихъ волкѡ́въ неврежде́ни пребы́сте, и҆ сконча́вше до́брѣ тече́нїе бж҃е́ственнїи, во ѡ҆гра́дꙋ нбⷭ҇нꙋю всели́стесѧ."
 },
 {
  "type": "TEXT",
  "value": "Бг҃оро́диченъ: Гдⷭ҇а тѧ̀ живота̀ породи́хъ, и҆ кра́сна добро́тою па́че сынѡ́въ человѣ́ческихъ, дв҃а взыва́ше: и҆ ка́кѡ ны́нѣ ᲂу҆мира́еши сн҃е, добро́ты не и҆мѣ́ѧ въ распѧ́тїи, ᲂу҆добри́вый всѧ̑ манове́нїемъ;"
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀ сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀."
 },
 {
  "type": "TEXT",
  "value": "Мр҃і́е, чи́стое и҆ всечестно́е жили́ще всѣ́хъ содѣ́телѧ, дꙋ́шꙋ ѡ҆чища́ющыѧ пода́ждь мѝ сле́зы, и҆ бꙋ́дꙋщагѡ сꙋда̀ и҆ мꙋ́ки и҆схити́ мѧ."
 },
 {
  "type": "TEXT",
  "value": "Двє́ри бж҃їѧ, вхо́ды бж҃е́ственныѧ покажѝ смире́ннѣй мое́й дꙋшѝ: въ нѧ́же вше́дъ и҆сповѣ́даѧсѧ, ѕлы́хъ разрѣше́нїе бцⷣе воспрїимꙋ̀."
 },
 {
  "type": "TEXT",
  "value": "Пꙋчи́на грѣхѡ́въ, и҆ во́лны ѿча́ѧнїѧ ѡ҆бꙋрева́ютъ мо́й ᲂу҆́мъ: ᲂу҆млⷭ҇рдисѧ влⷣчце, и҆ рꙋ́кꙋ мѝ прострѝ, и҆ сп҃си́ мѧ, ꙗ҆́же сп҃са ро́ждшаѧ."
 },
 {
  "type": "TEXT",
  "value": "Тѧ̀ предста́тельницꙋ и҆ стѣ́нꙋ вѣ́рнїи всѝ и҆́мамы, и҆̀же во глꙋбинѣ̀ ѕлы́хъ, и҆ мѧте́жей и҆ скорбе́й при́снѡ бѣ́дствꙋющїи, бцⷣе, є҆ди́на вѣ́рныхъ прибѣ́жище."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. Сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ."
 },
 {
  "type": "TEXT",
  "value": "Оу҆ра́ненъ бы́лъ є҆сѝ въ рꙋ́цѣ твоѝ хрⷭ҇тѐ, и҆́маже содѣ́лалъ є҆сѝ чꙋдеса̀: и҆ ра̑ны претерпѣ́лъ є҆сѝ, ра̑ны моѧ̑ всѧ̑ и҆сцѣлѧ́ѧ. Пою́ тѧ є҆ди́не долготерпѣли́ве, зовы́й: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Пригвожде́нъ бы́лъ є҆сѝ въ рꙋ́цѣ твоѝ и҆ но́зѣ гвоздьмѝ сп҃се, распина́емь, и҆ въ ре́бра прободе́нъ бы́въ, ка̑пли и҆сточа́ѧ всѣ̑мъ ѡ҆ставле́нїѧ пою́щымъ непреста́ннѡ, и҆ глаго́лющымъ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Мч҃нченъ: Ли́къ соста́вимъ пѣсносло́вѧще бж҃їѧ мч҃нки, и҆̀же ликѡ́мъ а҆́гг҃льскимъ сопричтє́ныѧ, и҆ зємны́ѧ просвѣща́ющыѧ, и҆ всегда̀ пою́щыѧ: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Мч҃нченъ: Во ст҃ы́хъ свѣ́тлостехъ ѡ҆ст҃и́вшесѧ всели́стесѧ, посыла́юще всѣ̑мъ ѡ҆сщ҃е́нїе же и҆ и҆збавле́нїе, восхвалѧ́ющымъ ва́съ бж҃е́ственнїи мч҃нцы, и҆ воспѣва́ющымъ хрⷭ҇та̀, ѻ҆тє́цъ на́шихъ бж҃е бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Незаходи́мое сл҃нце, ка́кѡ за́йде на дре́вѣ распина́емь; дв҃а вопїѧ́ше тѝ сло́ве: и҆ ви́дѣвъ со́лнце, ѡ҆ста́ви тече́нїе, свѣти́ти не могі́й, тебѣ̀ стра́ждꙋщꙋ влⷣко. Пѣсносло́влю твоѐ сн҃е безѕло́бїе."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ гдⷭ҇и бж҃е во вѣ́ки."
 },
 {
  "type": "TEXT",
  "value": "Молю́ тѧ пречⷭ҇таѧ, ᲂу҆мертвѝ живꙋ́щїй во мнѣ̀ грѣ́хъ, и҆ живота̀ полꙋчи́ти сподо́би мѧ̀ дв҃о: и҆ ча́сти мѧ̀ и҆зба́ви та́мѡ мꙋ́чимыхъ."
 },
 {
  "type": "TEXT",
  "value": "Стра̑сти разли̑чныѧ мѧ̀ ѡ҆бꙋрева́ютъ, ро́ждшаѧ чⷭ҇таѧ, и҆сто́чника безстра́стїѧ, тѣ́хъ ѡ҆держа́нїѧ, и҆ ѻ҆гнѧ̀ вѣ́чнагѡ и҆зба́ви мѧ̀ бцⷣе, мл҃твами твои́ми."
 },
 {
  "type": "TEXT",
  "value": "Нра́вомъ во́льнымъ согрѣша́ю, и҆ порабоща́емь є҆́смь безмѣ́стнымъ ѻ҆бы́чаемъ, ны́нѣ ко ѻ҆бы́чнѣй твое́й млⷭ҇ти притека́ю: ѿча́ѧннаго сп҃си́ мѧ всест҃а́ѧ бцⷣе."
 },
 {
  "type": "TEXT",
  "value": "Оу҆гасѝ пла́мень страсте́й мои́хъ, и҆ ᲂу҆тишѝ бꙋ́рю се́рдца моегѡ̀, бг҃ома́ти чⷭ҇таѧ: и҆ и҆зба́ви мѧ̀ пречⷭ҇таѧ, ѿ бѣсѡ́въ мꙋчи́тельства, и҆ ѻ҆гнѧ̀ вѣ́чнагѡ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃се́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "И҆з̾ ко́рене хрⷭ҇тѐ, прозѧ́блъ є҆сѝ і҆ессе́ова воплоща́емь, и҆ и҆скоренѧ́еши и҆зра́стшее те́рнїе а҆да́мова престꙋпле́нїѧ, вѣне́цъ носѧ́й терно́въ: на дре́вѣ же пригво́ждьсѧ, ю҆́же ѿ дре́ва и҆сцѣлѧ́еши и҆зра́стшꙋю клѧ́твꙋ, и҆ пою́щыѧ сп҃са́еши: сщ҃е́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Да бг҃а человѣ́ка содѣ́лаеши чл҃вѣколю́бче, бы́лъ є҆сѝ чл҃вѣ́къ, и҆ крⷭ҇тꙋ̀ прїѡбщи́всѧ въ ре́бра пробода́емь, и҆ ѻ҆́цтомъ съ же́лчїю напоѧ́емь, ѿѻнꙋ́дꙋже сп҃сшїисѧ твои́ми стрⷭ҇тьмѝ сло́ве, вопїе́мъ бл҃года́рственнѡ: сщ҃е́нницы воспо́йте, лю́дїе превозноси́те хрⷭ҇та̀ во всѧ̑ вѣ́ки."
 },
 {
  "type": "TEXT",
  "value": "Мч҃нченъ: Свѧ́зани бы́вше мч҃нцы, и҆ ꙗ҆́кѡ а҆́гнцы закала́еми, и҆ на ѻ҆гнѝ немлⷭ҇тивнѡ и҆спеца́еми, ѕвѣрє́мъ же ѿдава́еми, и҆ въ главы̑ ᲂу҆сѣка́еми, ра́довастесѧ ра́достїю неизглаго́ланною, вопїю́ще: дѣ́ти бл҃гослови́те, сщ҃е́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Мч҃нченъ: Вѣнцено́сцы мч҃нцы, а҆́гг҃лѡмъ соприча̑стницы, и҆̀же безплѡ́тныѧ врагѝ попра́вше, мл҃твꙋ сотвори́те ѡ҆ на́съ ко гдⷭ҇ꙋ, ꙗ҆́кѡ да въ любвѝ и҆ во мно́зѣ є҆диномы́слїи поживе́мъ, вопїю́ще несꙋмнѣ́ннымъ се́рдцемъ: дѣ́ти бл҃гослови́те, сщ҃е́нницы воспо́йте, лю́дїе превозноси́те хрⷭ҇та̀ во вѣ́ки."
 },
 {
  "type": "TEXT",
  "value": "Бг҃оро́диченъ: Болѣ́зненнѣ стеню́щи, ма́терски восклица́ше, и҆ ᲂу҆тро́бнагѡ смꙋще́нїѧ не терпѧ́щи на крⷭ҇тѣ̀, взира́ше къ ро́ждшемꙋсѧ и҆з̾ твоегѡ̀ чре́ва, вопїю́щи: что̀ зрѣ́нїе сїѐ ча́до, ка́кѡ стра́ждеши, и҆́же є҆стество́мъ безстрⷭ҇тный, всѧ́кѡ хотѧ̀ ро́дъ человѣ́ческїй ѿ страсте́й свободи́ти;"
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃ороди́тельнице дв҃о, ты̀ моѧ̑ грѣхѝ и҆ бре́мѧ ѡ҆блегчѝ ѿ прегрѣше́нїй, ꙗ҆́кѡ да тѧ̀ велича́ю."
 },
 {
  "type": "TEXT",
  "value": "Ꙗ҆́же сꙋдїю̀ ро́ждши и҆ бг҃а, мольба́ми бл҃гопремѣни́тельными твои́ми млⷭ҇тива мнѣ̀ того̀ покажѝ, чⷭ҇таѧ: ꙗ҆́кѡ да сп҃се́тъ мѧ̀ ѿ вѣ́чнагѡ ѻ҆гнѧ̀."
 },
 {
  "type": "TEXT",
  "value": "Прегрѣшє́нїѧ моѧ̑ мнѡ́га превзыдо́ша бцⷣе, да́ждь мѝ ны́нѣ рꙋ́кꙋ по́мощи, и҆ ѿ пла́мене негаси́магѡ и҆зба́ви мѧ̀ непотре́бнаго."
 },
 {
  "type": "TEXT",
  "value": "Просвѣтѝ пречⷭ҇таѧ, се́рдца моегѡ̀ ѻ҆́чи молю́сѧ, че́рностїю грѣхо́вною ѡ҆слѣплє́ныѧ, и҆ прїѧ́тны бж҃е́ственнагѡ сїѧ́нїѧ покажѝ, ꙗ҆́кѡ да ꙗ҆влю́сѧ тебѐ ра́ди твоемꙋ̀ сн҃ꙋ чи́стъ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. Тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ."
 },
 {
  "type": "TEXT",
  "value": "И҆сцѣли́лъ є҆сѝ влⷣко моѧ̑ ꙗ҆́звы, ᲂу҆ѧзви́всѧ и҆ ѡ҆кровави́въ рꙋ́цѣ своѝ, и҆ къ пꙋтє́мъ ходи́ти сп҃си́тєльнымъ, ꙗ҆́кѡ бл҃гъ напра́вилъ мѧ̀ є҆сѝ гдⷭ҇и, но́зѣ и҆скопа́въ своѧ̑ на крⷭ҇тѣ̀, и҆́хже дре́вле родонача́льницы ви́дѣвше ходѧ́ща тѧ̀ въ раѝ, сокрыва́хꙋсѧ."
 },
 {
  "type": "TEXT",
  "value": "И҆спра́вившꙋсѧ тѝ на крⷭ҇тѣ̀, и҆спра́висѧ пады́й паде́нїемъ ве́лїимъ первозда́нный. Крѣ́пость же всѧ̀ паде́сѧ вра́жїѧ, всѧ́ же землѧ̀ ѡ҆ст҃и́сѧ кро́вїю и҆ водо́ю, ѿ ре́бръ твои́хъ и҆злїѧ́нною. Тѣ́мже тѧ̀ всеще́дре, непреста́ннѡ велича́емъ."
 },
 {
  "type": "TEXT",
  "value": "Мч҃нченъ: Вѧ́жеми ст҃і́и мч҃нцы, вѧза̑нїѧ лꙋка́вагѡ разрꙋши́сте, и҆ ᲂу҆́зами, ꙗ҆̀же претерпѣ́сте терпѣли́внѡ, того̀ свѧза́сте, и҆ покори́сте под̾ но́зѣ, стꙋда̀ и҆спо́лнена, и҆ смѣ́хъ зрѧ́щымъ сотвори́сте, бл҃года́тїю бж҃е́ственною."
 },
 {
  "type": "TEXT",
  "value": "Мч҃нченъ: Землѧ̀ положе́нїемъ сщ҃е́нныхъ мч҃нкъ моще́й ѡ҆ст҃и́сѧ: и҆́бо и҆сто́чникъ и҆сточа́ющъ и҆сцѣле́нїй всѧ́ческихъ сїѧ̀ бж҃е́ственнагѡ стѧжава́етъ, стра̑сти тѣлє́сныѧ и҆ дꙋшє́вныѧ непреста́ннѡ и҆сцѣлѧ́ющи, и҆ врежде́нїе бѣсо́вское ѿрѣва́ющи бж҃е́ственною бл҃года́тїю."
 },
 {
  "type": "TEXT",
  "value": "Бг҃оро́диченъ: И҆збѣ́гши болѣ́зней ма́тернихъ во вре́мѧ рожде́нїѧ, долготерпѣли́ве, є҆гда́ же тѝ ны́нѣ стрⷭ҇ти во́льнѣй причасти́вшꙋсѧ, и҆ болѣ̑зни прїи́мшꙋ, поболѣ́хъ ᲂу҆тро́бою, и҆ дꙋше́ю болѣ́зни и҆спо́лнихсѧ, пречⷭ҇таѧ вопїѧ́ше, ю҆́же досто́йнѡ велича́емъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ."
 },
 {
  "type": "TEXT",
  "value": "Оу҆ще́дри пречⷭ҇таѧ, ѻ҆каѧ́ннꙋю мою̀ дꙋ́шꙋ, и҆ ᲂу҆мертвѝ стра̑сти гꙋби́тєльныѧ, и҆ мꙋчи́тельное недоꙋмѣ́нїе ѿженѝ: стрꙋи̑ же сле́зъ ст҃ы̑ѧ да́рꙋй присноживѡ́тныѧ, и҆́миже и҆зба́влюсѧ ждꙋ́щагѡ мѧ̀ лю́тагѡ ѡ҆сꙋжде́нїѧ."
 },
 {
  "type": "TEXT",
  "value": "Стѣна̀ хрⷭ҇тїа́нѡмъ, и҆ прибѣ́жище тве́рдое мі́рꙋ, въ не́мже сп҃са́емсѧ, ты̀ є҆сѝ дв҃о чⷭ҇таѧ бг҃оневѣ́сто: и҆з̾ тебе́ бо бг҃ъ воплоти́всѧ, тебѐ всѣ̑мъ подадѐ покро́въ сп҃си́тельный. Тѣ́мже чⷭ҇таѧ, сп҃си́ мѧ недосто́йнаго."
 },
 {
  "type": "TEXT",
  "value": "Безнача́льне сло́ве ѻ҆́ч҃їй, и҆ сн҃е мо́й, и҆ ст҃о́мꙋ дх҃ꙋ сопрⷭ҇то́льный, ка́кѡ своѝ пречⷭ҇тѣи дла̑ни на крⷭ҇тѣ̀ просте́рлъ є҆сѝ; что̀ ны́нѣ толи́каѧ твоѧ̀ нищета̀, пребл҃гі́й; предстоѧ́щи твоемꙋ̀ распѧ́тїю, вопїѧ́ше всенепоро́чнаѧ."
 },
 {
  "type": "TEXT",
  "value": "И҆ска́пающи бж҃е́ственнꙋю сла́дость, ꙗ҆́же всѣ́хъ сла́дость ро́ждшаѧ, ᲂу҆сладѝ дꙋ́шꙋ мою̀, ѡ҆горче́ннꙋю ꙗ҆́домъ ѕмі́ѧ, ѿчꙋжда́ющи мѧ̀ го́рькагѡ грѣха̀ всегда̀ хода́тайствомъ твои́мъ, предста́тельнице вѣ́рныхъ непосты́днаѧ."
 }
]