ponomar-pwa/static/data/shared/menaion-daily/02-11/2.json

[
 {
  "type": "HEADER",
  "value": "Феѵрꙋа́рїа а҃і"
 },
 {
  "type": "HEADER",
  "value": "Прпⷣбнагѡ ѻ҆ц҃а̀ на́шегѡ дими́трїа, прилꙋ́цкагѡ чꙋдотво́рца:"
 },
 {
  "type": "HEADER",
  "value": "На ма́лѣй вече́рни стїхи̑ры на д҃, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Добродѣ́телїю бж҃е́ственною, преблаже́нне дими́трїе, на нбⷭ҇ныѧ сла̑вныѧ крꙋ́ги возше́лъ є҆сѝ: не во мра́цѣ заше́дъ невѣ́дѣнїѧ, но въ благода́ти бжⷭ҇твеннѣй ꙗ҆ви́лсѧ є҆сѝ, прїе́млѧ неизречє́ннаѧ сїѧ̑нїѧ."
 },
 {
  "type": "TEXT",
  "value": "Оу҆мо́мъ просвѣще́ннымъ дꙋ́шꙋ твою̀, ѻ҆́ч҃е, просвѣти́въ ѡ҆ст҃и́лсѧ, и҆ ѿ земны́хъ преста́вилсѧ є҆сѝ въ хрⷭ҇то́во црⷭ҇твїе, дими́трїе преблаже́нне, въ по́стницѣхъ ты̀ свѣ́телъ ꙗ҆ви́лсѧ є҆сѝ, пи́щи нестарѣ́емыѧ ны́нѣ насыща́ѧсѧ, бжⷭ҇твенною сла́вою ѡ҆блиста́емь."
 },
 {
  "type": "TEXT",
  "value": "Трⷪ҇ца безнача́льнаѧ и҆ є҆диносꙋ́щнаѧ, ꙗ҆ви́ тѧ себѣ̀ селе́нїе, бг҃оно́се дими́трїе, и҆ показа́ тѧ пресвѣ́тла свѣти́льника, ѿ жите́йскихъ мѧте́жей ᲂу҆клони́лсѧ є҆сѝ се́рдцемъ, и҆ житїѐ съ нбⷭ҇ными приѡбрѣ́лъ є҆сѝ."
 },
 {
  "type": "HEADER",
  "value": "Сла́ва, гла́съ г҃."
 },
 {
  "type": "TEXT",
  "value": "Преподо́бне ѻ҆́ч҃е дими́трїе, крѣ́пкимъ поще́нїемъ, и҆ жесто́кимъ воздержа́нїемъ, по́томъ и҆ трꙋды̀ стезю̀ сїю̀ соверши́лъ є҆сѝ, ꙗ҆́кѡ въ сла́достехъ почива́еши ра́дꙋѧсѧ: є҆ѵⷢ҇льски же моли́твою и҆ посто́мъ полкѝ дє́мѡнскїѧ прогонѧ́еши. Тѣ́мже со а҆́гг҃лы водворѧ́ешисѧ во црⷭ҇твїи нбⷭ҇нѣмъ: и҆ ны́нѣ хрⷭ҇та̀ бг҃а молѝ, ѡ҆ вѣ́рою хва́лѧщихъ всечестнꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Ꙗ҆́кѡ преходѧ́щꙋю жи́знь, ꙗ҆́же на землѝ, презрѣ́лъ є҆сѝ, блаже́нне: тѣ́мъ сподо́билсѧ є҆сѝ ᲂу҆лꙋчи́ти жи́зни бжⷭ҇твенныѧ, и҆ тогѡ̀ прїѧ́лъ є҆сѝ сїѧ́нїе, бг҃оно́се."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Любвѐ ра́ди хрⷭ҇то́вы, преподо́бне дими́трїе, пло́ти рачи́тельное ᲂу҆мертви́лъ є҆сѝ мꙋдрова́нїе, и҆ дꙋ́шꙋ ѿ страсте́й свобо́днꙋ бг҃ови предста́вилъ є҆сѝ."
 },
 {
  "type": "TEXT",
  "value": "Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Бо́дренными мл҃твами, и҆ сле́зными и҆стѡ́чники, це́ркви вѣ́рныхъ ѡ҆богати́лъ є҆сѝ, бг҃облаже́нне."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Вы́шнїи тѧ̀ ли́цы, бцⷣе дв҃о, пою́тъ съ ни́жними, сла́вѧще непреста́ннѡ ржⷭ҇тво̀ твоѐ пречⷭ҇тое."
 },
 {
  "type": "HEADER",
  "value": "Тропа́рь, гла́съ а҃:"
 },
 {
  "type": "TEXT",
  "value": "Свы́ше ѿ бг҃а, преподо́бне, бл҃года́ть прїѧ́лъ є҆сѝ дх҃о́внꙋю, и҆ ѿ негѡ̀ ᲂу҆́бѡ позна́лсѧ є҆сѝ, бл҃же́нне, тогѡ̀ ра́ди и҆ ты̀ дꙋ́хомъ позна́лъ є҆сѝ лꙋ̑чшаѧ є҆гѡ̀, бꙋ́дꙋщагѡ вѣ́ка пребыва́нїе, и҆ по́стнически и҆спыта́всѧ во свои́хъ ѻ҆би́телехъ. И҆ ны́нѣ со а҆́гг҃лы ликовствꙋ́ѧ, сп҃сꙋ всѣ́хъ за ны̀ моли́сѧ, свѧ́те дими́трїе, да всѝ вопїе́мъ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ."
 },
 {
  "type": "HEADER",
  "value": "На вели́цѣй вече́рни, Блаже́нъ мꙋ́жъ:"
 },
 {
  "type": "HEADER",
  "value": "На Гдⷭ҇и, воззва́хъ, поста́вимъ стїхѡ́въ и҃: и҆ пое́мъ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Свѣти́ло вели́кое ꙗ҆ви́сѧ на́мъ дне́сь, мі́ръ ве́сь просвѣща́ющо бг҃одарова́нными чꙋдесы̀, ѻ҆́ч҃е преподо́бне. Ꙗ҆́коже и҆сто́чникъ неисчерпа́емый показа́лсѧ є҆сѝ, ꙗ҆́кѡ стрꙋи̑ чꙋде́съ то́чиши и҆сцѣлє́нїѧ вѣ́рою приходѧ́щымъ тѝ, блаже́нне, и҆ припа́дающымъ ко гро́бꙋ твоемꙋ̀ свѧто́мꙋ, да́рꙋеши же дꙋша́мъ и҆ тѣлесє́мъ здра́вїе неѡскꙋ́дно, болѧ́щымъ вели́кое врачева́нїе, чꙋдотво́рче ѻ҆́ч҃е на́шъ дими́трїе, и҆ ѡ҆ на́съ ны́нѣ моли́сѧ ко сп҃сꙋ хрⷭ҇тꙋ̀, пра́зднꙋющихъ вѣ́рою честнꙋ́ю па́мѧть твою̀. Два́жды."
 },
 {
  "type": "TEXT",
  "value": "Сла́вы и҆ че́сти ны́нѣшнїѧ не восхотѣ́въ, тогѡ̀ ра́ди ѡ҆ста́вилъ є҆сѝ твоѐ ѻ҆те́чество, и҆ ѡ҆ бз҃ѣ всѧ́чески въ мі́рѣ просла́вивсѧ, чꙋдотво́рецъ ꙗ҆ви́лсѧ є҆сѝ: ѿтꙋ́дꙋ бо ѿбѣжа́въ, въ пꙋсты́ни при вода́хъ пре́былъ є҆сѝ, и҆ па́ки посредѝ мі́ра по́жилъ є҆сѝ, ᲂу҆едини́всѧ дꙋше́ю, блаже́нне, ѿ мїрски́хъ, и҆ бж҃їею благода́тїю ѻ҆би́тель соста́вивъ, въ не́йже потрꙋди́всѧ преста́вилсѧ є҆сѝ, и҆дѣ́же лежа́тъ честны̑ѧ мо́щи твоѧ̑, бг҃ꙋ бо тѧ̀ па́че прославлѧ́ющꙋ: ты́ же и҆сцѣле́нїѧ ѿ негѡ̀ просѧ̀ приходѧ́щымъ тѝ съ вѣ́рою, блаже́нне, и҆ на́съ ны́нѣ не забꙋ́ди въ моли́твахъ ко хрⷭ҇тꙋ̀ сп҃си́телю на́шемꙋ."
 },
 {
  "type": "TEXT",
  "value": "На землѝ ꙗ҆́кѡ а҆́гг҃лъ по́жилъ є҆сѝ въ тѣлесѝ, дꙋшѝ пло́ть повинꙋ́лъ є҆сѝ, поще́нїемъ же и҆ воздержа́нїемъ мно́гимъ свѣтлоѻбра́зенъ всегда̀ ꙗ҆влѧ́ѧсѧ: ᲂу҆краси́босѧ дꙋше́ю, блаже́нне, ст҃ѣ́й трⷪ҇цѣ ѻ҆би́тель тебѐ содѣ́лалъ є҆сѝ. И҆ дарова́нїѧ чꙋде́съ сподо́бисѧ, больны̑ѧ и҆ прокажє́нныѧ и҆сцѣлѧ́ѧ и҆ стра́ждꙋщымъ ѿ дꙋхѡ́въ нечи́стыхъ проще́нїе подава́ѧ, и҆ на́съ и҆зба́ви ѿ вра̑гъ ви́димыхъ и҆ неви́димыхъ всегда̀, пра́зднꙋющихъ ст҃ꙋ́ю па́мѧть твою̀."
 },
 {
  "type": "HEADER",
  "value": "И҆́ны стїхи̑ры, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Прпⷣбне ѻ҆́ч҃е дими́трїе, ты̀ є҆ѵⷢ҇льски гдⷭ҇а бг҃а возлюби́лъ є҆сѝ, бжⷭ҇твенное є҆гѡ̀ и҆́го на ра́мена своѧ̑ взѧ́лъ є҆сѝ, и҆ крⷭ҇тъ гдⷭ҇ень ꙗ҆́кѡ ле́гкое є҆гѡ̀ бре́мѧ поне́слъ є҆сѝ, не возвраща́ѧсѧ на сла̑сти вре́мєнныѧ, и҆ бы́лъ є҆сѝ ᲂу҆пра́вленъ въ црⷭ҇твїе бж҃їе. Тѣ́мже и҆ ны́нѣ непреста́ннѡ хрⷭ҇та̀ молѝ, спасти́сѧ дꙋша́мъ на́шымъ. Два́жды."
 },
 {
  "type": "TEXT",
  "value": "Преподо́бне ѻ҆́ч҃е дими́трїе, твоемꙋ̀ влⷣцѣ хрⷭ҇тꙋ̀ подража́тель бы́лъ є҆сѝ: ꙗ҆́кѡ бо бл҃года́ть ст҃а́гѡ дх҃а прїѧ́лъ є҆сѝ, та́кѡ и҆ подае́ши и҆сцѣле́нїе недꙋ́гꙋющымъ, разсла́блєнныѧ, моли́твами твои́ми къ бг҃ꙋ, сотворѧ́еши здра̑вы. И҆ бы́лъ є҆сѝ мона́хѡмъ похвала̀ и҆ ᲂу҆твержде́нїе, и҆ моле́бникъ ко сп҃сꙋ, ѡ҆ всѣ́хъ къ тебѣ̀ притека́ющихъ."
 },
 {
  "type": "TEXT",
  "value": "Прпⷣбне ѻ҆́ч҃е дими́трїе, бꙋ́дꙋщїѧ ра́ди жи́зни, до́блественнѣ моли́твою и҆ посто́мъ бг҃ꙋ ᲂу҆годи́лъ є҆сѝ, и҆ неви́димыхъ вра̑гъ шата̑нїѧ и҆ кѡ́зни попра́лъ є҆сѝ, си́лою крⷭ҇та̀ хрⷭ҇то́ва ᲂу҆крѣ́пльсѧ: тѣ́мже и҆ по сме́рти ны́нѣ ра́дꙋѧсѧ живе́ши, сегѡ̀ ра́ди и҆ мы̀ дне́сь вопїе́мъ тѝ, бл҃же́нне: молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Оу҆кра́шенъ добродѣ́тельми дх҃о́вными, преподо́бне ѻ҆́ч҃е на́шъ дими́трїе: просла́ви бо тѧ̀ гдⷭ҇ь бг҃ъ житїе́мъ же и҆ чꙋдесы̀, въ преставле́нїи же твое́мъ, дꙋ́шы вѣ́рныхъ ѡ҆благоꙋха́лъ є҆сѝ и҆ тѣлеса̀. И҆ ны́нѣ, блаже́нне, и҆ на́съ моли́твами твои́ми ѡ҆чи́сти ѿ всѧ́кихъ грѣхопаде́нїй, пра́зднꙋющихъ свѧтꙋ́ю па́мѧть твою̀, и҆ со стра́хомъ и҆ любо́вїю припа́дающихъ къ твоемꙋ̀ гро́бꙋ чꙋдотво́рномꙋ, ѻ҆́бразъ подо́бїѧ твоегѡ̀ любе́знѡ цѣлꙋ́юще, не преста́й молѧ́сѧ за твоѐ ста́до бг҃озва́нное, ꙗ҆́кѡ да ми́лостивый гдⷭ҇ь спасе́тъ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Цр҃ь нбⷭ҇ный за человѣколю́бїе:"
 },
 {
  "type": "HEADER",
  "value": "Вхо́дъ. Прокі́менъ днѐ. Чтє́нїѧ трѝ."
 },
 {
  "type": "HEADER",
  "value": "Премꙋ́дрости соломѡ́ни чте́нїе. (Глава̀ г҃.)"
 },
 {
  "type": "TEXT",
  "value": "Пра́ведныхъ дꙋ́ши въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "Премꙋ́дрости соломѡ́ни чте́нїе. (Глава̀ д҃.)"
 },
 {
  "type": "TEXT",
  "value": "Пра́ведникъ, а҆́ще пости́гнетъ сконча́тисѧ въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
 },
 {
  "type": "HEADER",
  "value": "Премꙋ́дрости соломѡ́ни чте́нїе. (Главы̑ є҃ и҆ ѕ҃.)"
 },
 {
  "type": "TEXT",
  "value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ ца́рствїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ разбѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жества, и҆ гордѧ́щїисѧ ѡ҆ наро́дѣхъ ꙗ҆зы̑къ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
 },
 {
  "type": "HEADER",
  "value": "На лїті́и стїхи̑ры, гла́съ а҃:"
 },
 {
  "type": "TEXT",
  "value": "На нб҃о текꙋ́щею, ѻ҆́ч҃е, стезе́ю ходи́ти и҆зво́лилъ є҆сѝ, бꙋ́дꙋщїѧ жи́зни жела́ѧ: тогѡ̀ ра́ди во вре́меннѣй се́й жи́зни пꙋ́ть ᲂу҆́зкїй ше́ствꙋѧ, простра̑ннаѧ же сладостра́стїѧ ѿрѣва́ѧ, кра́йнее же житїѐ воздержа́нїемъ препроводи́лъ є҆сѝ, смиреномꙋ́дрїемъ ни́жнїѧ сла́вы ѿбѣжѐ, вы́шнѧгѡ гра́да і҆ерⷭ҇ли́ма смотрѧ́ѧ сла́вы же и҆ красоты̀, и҆ вѣ̑чнымъ благи̑мъ наслѣ́дникъ ꙗ҆ви́лсѧ є҆сѝ, и҆ по́честь трꙋдѡ́въ твои́хъ ѿ хрⷭ҇та̀ прїѧ́тъ, є҆го́же, дими́трїе блаже́нне, молѝ ѡ҆ дꙋша́хъ на́шихъ."
 },
 {
  "type": "TEXT",
  "value": "По́стникѡмъ похвалꙋ̀ дне́сь дими́трїа почти́мъ, на земли́ бо ꙗ҆́кѡ а҆́гг҃ла пожи́вшаго, ревни́телѧ же и҆лїѝ ѳесві́тѧнина, ᲂу҆сꙋгꙋ́бившаго є҆лїссе́ю бл҃года́ть дх҃о́внꙋю. Се́й же своемꙋ̀ ста́дꙋ ѡ҆ста́ви сꙋгꙋ̑баѧ бл҃гоꙋха̑нїѧ, бжⷭ҇твенныхъ а҆рома̑тъ въ преставле́нїи свое́мъ и҆спо́лни: и҆ по сме́рти бо процвѣтѐ чꙋдесы̀, ꙗ҆́кѡ дре́во бг҃осажде́нно при и҆схо́дищихъ во́дъ, насыща́ѧ дне́сь вѣ́рою творѧ́щихъ па́мѧть є҆гѡ̀ пи́щею дх҃о́вною, и҆ сп҃сꙋ хрⷭ҇тꙋ̀ слꙋжа́щихъ преподо́бїемъ и҆ пра́вдою."
 },
 {
  "type": "TEXT",
  "value": "Лѣ́ствица бжⷭ҇твеннаѧ и҆ честна́ѧ, на высотꙋ̀ добродѣ́тели возводѧ́щаѧ, всѣ̑мъ ꙗ҆ви́сѧ бг҃опрїѧ́тное житїѐ твоѐ, тезоимени́тъ бы́въ селꙋ́нскомꙋ дими́трїю, въ ми́лости же рачи́тель тогѡ̀ милосе́рдїю бы́лъ є҆сѝ, преподо́бне: ѻ҆́нъ ᲂу҆́бѡ сво́й гра́дъ ѿ пога́ныхъ и҆зба́ви, ты́ же, свѧ́те, и҆ногда̀ сво́й гра́дъ ѿ междоꙋсо́бныѧ ра́ти сохрани́лъ є҆сѝ: ѻ҆́нъ нѣ́когда ѿ плѣне́нїѧ человѣ́ки и҆зносѧ̀ на пра́здникъ сво́й, ты́ же, блаже́нне, всегда̀ свобожда́ѧ стра́ждꙋщыѧ ѿ нечи́стыхъ бѣсѡ́въ, и҆́мѧ твоѐ нарица́ющыѧ то́кмѡ. Тѣ́мже и҆ мы̀ вопїе́мъ тѝ: ѻ҆́ч҃е на́шъ дими́трїе, со всѣ́ми ст҃ы́ми молѝ ѡ҆ на́съ є҆ди́наго чл҃вѣколю́бца хрⷭ҇та̀, спаса́ющаго дꙋ́шы на́шѧ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Ра́дꙋйсѧ и҆ весели́сѧ, рѡссі́йскаѧ всесщ҃е́ннаѧ цр҃ковь бж҃їѧ, со свѧще́нными и҆ съ кнѧ́зи благочести́выми, и҆́нѡки же и҆ просты̑ѧ блаже́ннагѡ дими́трїа дне́сь па́мѧть почита́юще, дх҃о́внѣ соше́дшесѧ пра́зднꙋемъ, и҆ честны́й гро́бъ є҆гѡ̀ ѡ҆бстоѧ́ще, любе́знѡ покланѧ́ющесѧ мо́лимсѧ, рекꙋ́ще: ра́дꙋйсѧ, преподо́бне дими́трїе, свѣти́льниче пресвѣ́тлый, и҆ врачꙋ̀ болѧ́щымъ, моли́твенниче ко сп҃сꙋ хрⷭ҇тꙋ̀ бг҃ꙋ на́шемꙋ, ѡ҆ и҆̀же вѣ́рою и҆ любо́вїю притека́ющихъ къ тебѣ̀, спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Творе́цъ и҆ и҆зба́витель:"
 },
 {
  "type": "HEADER",
  "value": "На стїхо́внѣ стїхи̑ры, гла́съ є҃."
 },
 {
  "type": "TEXT",
  "value": "Подо́бенъ: Ра́дꙋйсѧ:"
 },
 {
  "type": "TEXT",
  "value": "Ра́дꙋйсѧ, свѧще́ннаѧ главо̀, преподо́бне ѻ҆́ч҃е на́шъ дими́трїе, а҆́гг҃льскимъ ликѡ́мъ собесѣ́дниче въ вы́шнихъ: на земли́ бо добродѣ́тельнѡ пожи́лъ є҆сѝ, и҆ ꙗ҆ви́лсѧ пречи́сто и҆ нескве́рно зерца́ло, дх҃а ст҃а́гѡ зарѧ́ми блиста́ѧсѧ, пребога́те, и҆ ѡ҆зарѧ́емь зрѣ́лъ є҆сѝ бꙋ̑дꙋщаѧ. Тѣ́мже хрⷭ҇та̀ бг҃а молѝ, пода́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Ра́дꙋйсѧ, свѧще́ннаѧ главо̀, по́стникѡвъ непоколеби́мый сто́лпе и҆ непобѣди́мый побо́рниче, страсте́й посѣка́ѧ корє́нїѧ, бѣсѡ́въ стремлє́нїѧ погꙋби́лъ є҆сѝ, крⷭ҇тнымъ ѻ҆рꙋ́жїемъ всѧ̑ кознодѣ̑йства ѿгонѧ́ѧ, и҆ по преставле́нїи твое́мъ жи́въ ст҃ѣ́й трⷪ҇цѣ предстои́ши за ны̀ молѧ́сѧ, дарова́ти дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Ра́дꙋйсѧ, свѧще́ннаѧ главо̀, преблаже́нне дими́трїе, моли́твою врагѝ ᲂу҆страша́ѧ, и҆ неи́стѡвыѧ на ст҃ы́ню сꙋдо́мъ бж҃їимъ сме́рти предаѧ́й, съ вѣ́рою же приходѧ́щымъ стра̑стныѧ недꙋ́ги ѿгонѧ́ѧ, и҆ ко́рчащыѧсѧ рꙋ́цѣ и҆справлѧ́ѧ, и҆ бѣ́сы ѿ человѣ̑къ прогонѧ́ѧ, моли́твою же и҆ свѧще́нныѧ воды̀ кропле́нїемъ мнѡ́гимъ и҆сцѣлє́нїѧ подаѧ̀: хрⷭ҇тꙋ̀ помоли́сѧ дарова́ти дꙋша́мъ на́шымъ ве́лїю ми́лость."
 },
 {
  "type": "HEADER",
  "value": "Сла́ва, гла́съ и҃:"
 },
 {
  "type": "TEXT",
  "value": "Прпⷣбне ѻ҆́ч҃е на́шъ дими́трїе, твоѧ̑ мо́щи честны̑ѧ ѻ҆би́льнѡ и҆сточа́ютъ всегда̀ и҆сцѣлє́нїѧ, вѣ́рою приходѧ́щымъ къ твоемꙋ̀ гро́бꙋ, благоꙋха́нїѧ всѣ́хъ и҆сполнѧ́ѧ дх҃о́внагѡ, и҆ тмꙋ̀ бѣсо́вскꙋю дале́че ѿгонѧ́ѧ, свѣ́томъ благоче́стїѧ вѣ́рныхъ сердца̀ ѡ҆зарѧ́ѧ. Тѣ́мже мо́лимъ тѧ̀ рабѝ твоѝ, всѧ́кагѡ навѣ́та вра́жїѧ на́съ и҆зба́вити, ꙗ҆́кѡ да ра́достною дꙋше́ю свѧто́е твоѐ ᲂу҆спе́нїе дꙋхо́внѡ пра́зднꙋюще, прославлѧ́емъ сп҃са на́шего, тебѐ просла́вльшаго, є҆ди́наго во ст҃ы́хъ свои́хъ бг҃а на́шего."
 },
 {
  "type": "HEADER",
  "value": "И҆ ны́нѣ, бг҃оро́диченъ:"
 },
 {
  "type": "TEXT",
  "value": "Влⷣчце, прїимѝ моли́твꙋ ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли."
 },
 {
  "type": "HEADER",
  "value": "Тропа́рь, гла́съ а҃:"
 },
 {
  "type": "TEXT",
  "value": "Свы́ше ѿ бг҃а, преподо́бне, бл҃года́ть прїѧ́лъ є҆сѝ дх҃о́внꙋю, и҆ ѿ негѡ̀ ᲂу҆́бѡ позна́лсѧ є҆сѝ, бл҃же́нне, тогѡ̀ ра́ди и҆ ты̀ дꙋ́хомъ позна́лъ є҆сѝ лꙋ̑чшаѧ є҆гѡ̀, бꙋ́дꙋщагѡ вѣ́ка пребыва́нїе, и҆ по́стнически и҆спыта́всѧ во свои́хъ ѻ҆би́телехъ. И҆ ны́нѣ со а҆́гг҃лы ликовствꙋ́ѧ, сп҃сꙋ всѣ́хъ за ны̀ моли́сѧ, свѧ́те дими́трїе, да всѝ вопїе́мъ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Гаврїи́лꙋ вѣща́вшꙋ тебѣ̀, дв҃о:"
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь ст҃о́мꙋ, два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "HEADER",
  "value": "По а҃-й стїхоло́гїи сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ двⷭ҇тва:"
 },
 {
  "type": "TEXT",
  "value": "Ꙗ҆́кѡ безпло́тенъ на землѝ, ѻ҆́ч҃е, пожи́лъ є҆сѝ и҆ превозносѧ́щагосѧ врага̀ смири́лъ є҆сѝ: тѣ́мже и҆ ны́нѣ съ невеще́ственными во́инствы водворѧ́ешисѧ, блаже́нне: и҆́же та́мѡ блаже́нства наслажда́ѧсѧ, и҆ на́съ помина́й пра́зднꙋющихъ па́мѧть твою̀ дне́сь, да всѝ ра́достными гла́сы воспѣва́емъ сп҃са на́шего і҆и҃са хрⷭ҇та̀, благода́ть тебѣ̀ дарова́вшаго и҆сцѣле́нїй. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю млⷭ҇ть."
 },
 {
  "type": "HEADER",
  "value": "По в҃-й стїхоло́гїи сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь:"
 },
 {
  "type": "TEXT",
  "value": "Ꙗ҆́кѡ со́лнце возсїѧ́въ, зарѧ́ми блиста́еши всемꙋ̀ мі́рꙋ и҆здале́ча чꙋдесы̀ твои́ми, чꙋдотво́рче дими́трїе, свѣтоно́сче блаже́нне, преподѡ́бнымъ похвала̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Въ кро́въ тво́й, пречⷭ҇таѧ дв҃о, прибѣга́ющихъ, мольбꙋ̀ принесѝ ѡ҆ на́съ къ чл҃вѣколю́бцꙋ бг҃ꙋ, спасти́сѧ рабѡ́мъ твои̑мъ."
 },
 {
  "type": "HEADER",
  "value": "По полѷеле́и сѣда́ленъ гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Сладостра́стїѧ но́щь посто́мъ, ѻ҆́ч҃е, ᲂу҆толи́въ, и҆ бг҃ꙋ дꙋ́шꙋ свою̀ непоро́чнꙋ соблю́лъ є҆сѝ, и҆ прїе́мъ ѿ сп҃са бл҃года́ть ст҃а́гѡ дх҃а и҆сцѣлѧ́ти стра́ждꙋщихъ тѣлесы̀, и҆ дꙋ́шы вѣ́рныхъ просвѣща́ти. Сегѡ̀ ра́ди бл҃года́рственнѡ вопїе́мъ тѝ: дими́трїе, ѻ҆́ч҃е на́шъ, молѝ хрⷭ҇та̀ бг҃а, согрѣше́нїй проще́нїе дарова́ти чтꙋ́щымъ любо́вїю ст҃ꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Воплоще́ннаго бг҃а ѿ твоеѧ̀ ᲂу҆тро́бы ро́ждши, пречⷭ҇таѧ, менѐ растлѣ́ннаго грѣхи̑ ѿ прилѡ́гъ лꙋка́вагѡ ᲂу҆крѣпѝ, мт҃и бж҃їѧ, и҆ се́рдце моѐ ѡ҆чи́сти, бг҃обл҃года́тнаѧ, мт҃рними твои́ми моли́твами, да и҆ а҆́зъ бл҃года́рнѡ зовꙋ́ ти: молѝ хрⷭ҇та̀ бг҃а, сн҃а твоего̀, мр҃і́е бцⷣе, поми́ловати ста́до твоѐ, є҆́же стѧжа́ла є҆сѝ, всенепоро́чнаѧ."
 },
 {
  "type": "HEADER",
  "value": "Степє́нна, а҃-й а҆нтїфѡ́нъ д҃-гѡ гла́са."
 },
 {
  "type": "TEXT",
  "value": "Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "Є҆ѵⷢ҇лїе ѿ матѳе́а, зача́ло м҃г."
 },
 {
  "type": "HEADER",
  "value": "По н҃-мъ ѱалмѣ̀ стїхи́ра, гла́съ ѕ҃:"
 },
 {
  "type": "TEXT",
  "value": "Возлю́бленъ бы́сть бг҃омъ ѿ чре́ва ма́тернѧ, ꙗ҆́коже дрꙋгі́й се́ргїй прпⷣбный вели́кїй, ѻ҆́ч҃е дими́трїе, и҆ съ ни́мъ благодꙋ́шственнѡ сп҃си́телю бг҃ꙋ ᲂу҆годи́лъ є҆сѝ, и҆ ст҃а́гѡ дх҃а сосꙋ́дъ ꙗ҆ви́лсѧ є҆сѝ и҆збра́нный, и҆́нокꙋющымъ же́злъ крѣ́пости, и҆ всѣ̑мъ тре́бꙋющымъ чꙋдотво́рный пода́тель, и҆спросѝ на́мъ ѿ хрⷭ҇та̀ сп҃са чтꙋ́щымъ тѧ̀ ве́лїю ми́лость."
 },
 {
  "type": "HEADER",
  "value": "Канѡ́нъ прпⷣбнагѡ дими́трїа. Гла́съ в҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь: сла́внѡ бо просла́висѧ."
 },
 {
  "type": "TEXT",
  "value": "Тебѣ̀ твоегѡ̀, бл҃же́нне, ᲂу҆че́нїѧ до́лгъ приносѧ́ще, возда̑нїѧ простира́емъ, вѣне́цъ похвала́ми плетꙋ́ще: ты́ же ми́лостивъ ꙗ҆ви́сѧ, пребога́те: твои́ми мольба́ми бл҃года́ть на́мъ пода́ждь дх҃о́внꙋю."
 },
 {
  "type": "TEXT",
  "value": "Всегꙋби́тельное стремле́нїе страсте́й, ѻ҆́ч҃е, ᲂу҆вѧди́лъ є҆сѝ, слове́снымъ ѡ҆б̾ѧ́тъ бг҃омꙋ́дрїемъ: благопребы́тенъ бо бы́лъ є҆сѝ и҆ благогла́сенъ, кро́токъ же и҆ смире́нъ, сло́вомъ премꙋ́дрости, дими́трїе, и҆ ра́зꙋма вѣнча́нъ."
 },
 {
  "type": "TEXT",
  "value": "Сщ҃енноꙋкраси́лъ є҆сѝ себѐ, ѻ҆́ч҃е, ра́зꙋмомъ, и҆ дѣ́тельнымъ видѣ́нїемъ благода́ти, бг҃оглаго́ливе дими́трїе, жела́ѧ вѣнца̀ сла́вы хрⷭ҇то́вы, и҆ твою̀ наде́ждꙋ и҆зрѧ́днѡ, преблаже́нне, не погрѣши́лъ є҆сѝ."
 },
 {
  "type": "TEXT",
  "value": "Цѣломꙋ́дрїе ᲂу҆держа́лъ є҆сѝ ꙗ҆́вѣ, кра́йнюю же кро́тость, и҆ высо́кое, бг҃оно́се, смире́нїе, и҆́миже возвыша́емь, трꙋдѡ́въ твои́хъ дѣ́йствомъ и҆ видѣ́нїемъ ра́дꙋѧсѧ принесе́сѧ, вѣне́цъ неꙋвѧда́емый прїе́мъ."
 },
 {
  "type": "TEXT",
  "value": "Бг҃оро́диченъ: Тва́рей ꙗ҆ви́ласѧ є҆сѝ, чⷭ҇таѧ, всѣ́хъ ви́димыхъ и҆ неви́димыхъ превы́шши, всенепоро́чнаѧ: зижди́телѧ бо родила̀ є҆сѝ, ꙗ҆́коже и҆зво́ли воплоти́тисѧ во ᲂу҆тро́бѣ твое́й. Є҆го́же со дерзнове́нїемъ молѝ спастѝ пою́щыѧ тѧ̀."
 },
 {
  "type": "HEADER",
  "value": "Дрꙋгі́й канѡ́нъ преподо́бнагѡ. Гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ."
 },
 {
  "type": "TEXT",
  "value": "Да́ждь мѝ, хрⷭ҇тѐ мо́й сп҃се, проще́нїе мно́гихъ мѝ согрѣше́нїй, ꙗ҆́кѡ да и҆ мы̀ почита́емъ па́мѧть твоегѡ̀ ᲂу҆го́дника преподо́бнагѡ дими́трїѧ: є҆гѡ́же моли́твами, бж҃е, спасѝ на́съ."
 },
 {
  "type": "TEXT",
  "value": "Твои́ми моли́твами же и҆ мольба́ми ми́лостиваго ᲂу҆молѧ́й бг҃а, преподо́бне ѻ҆́ч҃е на́шъ дими́трїе, и҆ грѣхо́вный мра́къ печа́ли на́шеѧ разорѝ, и҆ благодꙋ́шїѧ ᲂу҆тѣше́нїѧ на́съ дꙋхо́внагѡ и҆спо́лни."
 },
 {
  "type": "TEXT",
  "value": "Ѿ младе́нства ты̀, блаже́нне дими́трїе, позна́нъ бы́сть бг҃омъ, и҆ на него̀ надѣ́ѧсѧ наставлѧ́емь на спаси́тєльнаѧ є҆гѡ̀ повелѣ̑нїѧ: є҆мꙋ́же ны́нѣ предстоѧ̀ со дерзнове́нїемъ ѡ҆ на́съ помоли́сѧ."
 },
 {
  "type": "TEXT",
  "value": "Бг҃оро́диченъ: Є҆ди́наго ѿ ст҃ы́ѧ трⷪ҇цы, сло́ва и҆ сн҃а родила̀ є҆сѝ, дв҃о пречⷭ҇таѧ, є҆го́же съ преподо́бными и҆ пра́ведными молѝ ѡ҆ рабѣ́хъ твои́хъ, вѣ́рою просѧ́щихъ грѣхѡ́въ проще́нїѧ."
 },
 {
  "type": "TEXT",
  "value": "Катава́сїа: Ѿве́рзꙋ ᲂу҆ста̀ моѧ̑:"
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Просїѧ́лъ є҆сѝ въ житїѝ твое́мъ, бг҃оно́се дими́трїе, ꙗ҆́коже всесвѣ́тлое со́лнце въ мі́рѣ, и҆ просвѣтѝ и҆̀же къ тебѣ̀ вѣ́рою и҆ любо́вїю приходѧ́щыѧ и҆ пою́щыѧ тѧ̀."
 },
 {
  "type": "TEXT",
  "value": "Просвѣща́ютсѧ концы̀ ᲂу҆чє́нїи твои́ми, преподо́бне: ꙗ҆́коже бо свѣти́льникъ просвѣти́лъ є҆сѝ, бг҃оно́се, цр҃ковь хрⷭ҇то́вꙋ, ѡ҆ не́йже ᲂу҆тверди́сѧ моѐ се́рдце."
 },
 {
  "type": "TEXT",
  "value": "Непорабоще́нꙋ соблю́лъ є҆сѝ дꙋ́шꙋ твою̀ страстьмѝ, и҆ сластьмѝ тѣле́сными, бг҃оно́се дими́трїе всече́стне: тѣ́мже ны́нѣ по достоѧ́нїю восхвалѧ́емъ тѧ̀."
 },
 {
  "type": "TEXT",
  "value": "Бг҃оро́диченъ: Сказа̀ и҆ногда̀ сокрове́нное та́инство, ѻ҆трокови́це, тебѣ̀ дре́вле гаврїи́лъ зовѧ́ше: ра́дꙋйсѧ, бж҃їѧ пала́то, въ ню́же всели́сѧ, всѧ̑ человѣ́ки ѡ҆божѝ, ꙗ҆́кѡ милосе́рдъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й."
 },
 {
  "type": "TEXT",
  "value": "Ты̀ є҆сѝ, преподо́бне ѻ҆́ч҃е дими́трїе, послꙋ́шатель є҆ѵⷢ҇льскихъ слове́съ, самагѡ̀ гдⷭ҇а рече́нїю, всѧ̑ любы̀ мі́ра сегѡ̀ ѿве́ргъ, и҆ послѣ́довалъ є҆сѝ стопа́мъ хрⷭ҇тѡ́вымъ: є҆мꙋ́же съ ли́ки а҆́гг҃лъ ны́нѣ слꙋжѧ̀, и҆ ѡ҆ на́съ моли́сѧ чтꙋ́щихъ тѧ̀."
 },
 {
  "type": "TEXT",
  "value": "Въ зако́нѣхъ по́стныхъ поꙋча́ѧсѧ преподо́бный, не ѡ҆сла́бисѧ въ нача́льныхъ соверше́нныхъ нача́лѣхъ, хотѧ̀ ᲂу҆годи́ти своемꙋ̀ гдⷭ҇ꙋ: є҆мꙋ́же жела́тельнѣ ѡ҆бѣща́сѧ ᲂу҆се́рднѡ да́же и҆ до кончи́ны, до́ндеже сы́нъ црⷭ҇твїѧ є҆гѡ̀ показа́сѧ."
 },
 {
  "type": "TEXT",
  "value": "Воздержа́нїемъ кра́йнимъ пло́ть твою̀ ᲂу҆мертви́лъ є҆сѝ, дими́трїе: сегѡ̀ ра́ди дх҃омъ бжⷭ҇твеннымъ ѡ҆крыли́всѧ, дости́глъ є҆сѝ свѧщеннонача́льныхъ слꙋжи́телей, и҆дѣ́же нбⷭ҇ныхъ бж҃їихъ слꙋ́гъ безпло́тныхъ ра́дѡванїѧ."
 },
 {
  "type": "TEXT",
  "value": "Бг҃оро́диченъ: Бл҃гослове́ннаѧ, всенепоро́чнаѧ бцⷣе дв҃о мр҃і́е, сло́во бж҃їе на́мъ ро́ждшаѧ, свобожда́ющаго свои́хъ преподо́бныхъ ѿ тлѣ́ннагѡ мі́ра, и҆́хже ра́ди на́съ спаса́ющаго."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ дѣ́вства:"
 },
 {
  "type": "TEXT",
  "value": "И҆справле́нїѧ житїѧ̀ твоегѡ̀ всѣ̑мъ просвѣща́етъ стопы̑, дими́трїе ѻ҆́ч҃е, вои́стиннꙋ вѣ́рою подо́бѧщымтисѧ: тѣ́мже и҆̀же любо́вїю блажа́тъ тѧ̀ всегда̀, спаса́й моли́твами твои́ми ѿ всѧ́кїѧ тѣсноты̀, хрⷭ҇та̀ пребл҃га́го молѧ̀, преподо́бне блаже́нне досточꙋ́дне. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. Тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, благода́тнаѧ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Ты̀, дими́трїе, и҆́нокꙋющымъ бы́сть вѣне́цъ, не ка́менїемъ многоцѣ́ннымъ ᲂу҆кра́шенъ, но добродѣ́телїю ѡ҆бложе́нъ, ꙗ҆ви́лсѧ є҆сѝ, бл҃же́нне, бг҃ора́дованное вои́стиннꙋ ᲂу҆краше́нїе."
 },
 {
  "type": "TEXT",
  "value": "Бжⷭ҇твеннꙋю, бг҃омꙋ́дре, поче́лъ є҆сѝ премꙋ́дрость: тѣ́мже дарова̑нїи тѧ̀ сїѧ̀ ѡ҆дарѝ, сла́вꙋ вѣ́чнꙋю тебѣ̀ хода́тайствовавшꙋ, ѻ҆́ч҃е дими́трїе всече́стне."
 },
 {
  "type": "TEXT",
  "value": "Свѣ́тлостїю нра̑въ твои́хъ, и҆ ѻ҆́бразы бла́гости, преподо́бне дими́трїе, подо́бнѣ пожи́лъ є҆сѝ: тѣ́мже пристꙋ́пенъ ты̀ всѣ̑мъ бы́сть, всебл҃же́нне, и҆ пречꙋ́дне."
 },
 {
  "type": "TEXT",
  "value": "Бг҃оро́диченъ: Оу҆мерщвле́нїѧ пло́дъ на́мъ є҆́ѵа принесѐ, ты́ же жи́знь ро́ждши ѵ҆поста́снꙋю, а҆́бїе и҆спра́вила є҆сѝ ро́дъ на́шъ, бг҃оневѣ́сто пречⷭ҇таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀."
 },
 {
  "type": "TEXT",
  "value": "Рачи́тель сы́й ми́лостивагѡ сп҃си́телѧ хрⷭ҇та̀ твоегѡ̀, є҆́же ми́лостивнѡ къ немꙋ̀ наказꙋ́ѧ не ктомꙋ̀ согрѣша́ти, разсла́бленнꙋю женꙋ̀ и҆сцѣли́лъ є҆сѝ, ꙗ҆́коже при кꙋпѣ́ли и҆ногда̀."
 },
 {
  "type": "TEXT",
  "value": "Ꙗ҆́коже дре́во воздержа́нїѧ при вода́хъ насажде́нъ бы́лъ є҆сѝ, ѻ҆́ч҃е бл҃же́нне, и҆ благора́слена лоза̀ ꙗ҆ви́лсѧ є҆сѝ, и҆зносѧ̀ бл҃гоче́стїѧ гро́зды."
 },
 {
  "type": "TEXT",
  "value": "Не восхотѣ̀ сла́вы сеѧ̀ тлѣ́нныѧ, па́че кнѧ́зѧ всѧ́чески благочести́вагѡ, цр҃ю̀ нбⷭ҇номꙋ хотѧ̀ ᲂу҆годи́ти, ѿ негѡ́же по́честь трꙋдѡ́въ свои́хъ прїѧ́тъ нетлѣ́ннꙋю."
 },
 {
  "type": "TEXT",
  "value": "Бг҃оро́диченъ: Бы́вшее подъ лѣ́томъ сло́во, возсїѧ́вшаго ѿ ѻ҆ц҃а̀ безлѣ́тнѡ, бг҃ома́ти, на́мъ родила̀ є҆сѝ: є҆го́же молѝ спастѝ пою́щыѧ тѧ̀."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы."
 },
 {
  "type": "TEXT",
  "value": "Стремле́нїе страсте́й безстра́стїемъ ᲂу҆держа́лъ є҆сѝ, бг҃оно́се дими́трїе: видѣ̑нїи и҆ дѣѧ̑нїи просвѣти́лъ є҆сѝ, ѻ҆́ч҃е, дꙋше́вное ᲂу҆строе́нїе."
 },
 {
  "type": "TEXT",
  "value": "Оу҆мо́мъ чи́стымъ и҆ писа̑нїи дх҃о́вными бесѣ́довалъ є҆сѝ, бг҃оглаго́ливе дими́трїе, видѣ́нїѧ и҆ дѣѧ́нїѧ собра́въ бога́тство, ѻ҆́ч҃е преподо́бне."
 },
 {
  "type": "TEXT",
  "value": "Премꙋ́дрости глꙋбинꙋ̀ и҆спыта́въ, дими́трїе, дости́глъ є҆сѝ ѡ҆брѣстѝ є҆ли́кѡ бл҃гопотре́бно, и҆ би́серъ многоцѣ́нный болѣ́зньми стѧжа́лъ є҆сѝ, преблаже́нне, ра́зꙋма."
 },
 {
  "type": "TEXT",
  "value": "Бг҃оро́диченъ: Сѐ во чре́вѣ, бцⷣе пречⷭ҇таѧ, хрⷭ҇та̀ бг҃а па́че сло́ва и҆мѣ́ла є҆сѝ, ꙗ҆́коже и҆са́їа провозгласѝ: вы́ше є҆стества̀ сего̀, бг҃ороди́тельнице, родила̀ є҆сѝ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀, и҆но́гѡ не вѣ́мы."
 },
 {
  "type": "TEXT",
  "value": "А҆́ще и҆ земно́е ѻ҆те́чество, бл҃же́нне дими́трїе, ѡ҆ста́вилъ є҆сѝ, всѧ́чески бг҃оимени́тнꙋ ѻ҆би́тель совокꙋпи́лъ є҆сѝ: тѣ́мже пе́рвое ѻ҆ч҃ество нбⷭ҇ное прїѧ́тъ, со дерзнове́нїемъ хрⷭ҇тꙋ̀ за ны̀ моли́сѧ."
 },
 {
  "type": "TEXT",
  "value": "Бл҃гоче́стїѧ па́ки на стезю̀, дими́трїе, наста́вленъ бы́лъ є҆сѝ, ѻ҆́ч҃е, ѿ бг҃а къ неги́блемомꙋ наслажде́нїю, посто́мъ и҆ моли́твою въ вы̑шнѧѧ приве́дсѧ."
 },
 {
  "type": "TEXT",
  "value": "Ѕѣлѡ̀ ми́лостива и҆ страннопрїи́мца показа́ тѧ сп҃съ на́шъ мі́рови, ѻ҆́ч҃е, врача̀ болѧ́щымъ, дими́трїе, си̑рымъ и҆ ᲂу҆бѡ́гимъ застꙋ́пника любе́зна."
 },
 {
  "type": "TEXT",
  "value": "Бг҃оро́диченъ: Вои́стиннꙋ тѧ̀ мт҃рь бж҃їю и҆сповѣ́дꙋемъ и҆́стиннꙋю бцⷣꙋ, твои́мъ ржⷭ҇тво́мъ тлѣ́ннагѡ ѡ҆сꙋжде́нїѧ и҆зба́вльшїисѧ, милосе́рдїѧ ра́ди чл҃вѣколю́бца бг҃а, къ жи́зни нетлѣ́ннѣй по́звани бы́хомъ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Вселе́ннѣй свѣти́ло пресвѣ́тлое, ѻ҆́ч҃е, ꙗ҆ви́лсѧ є҆сѝ, дими́трїе, слове́съ свѣ́тлостїю просвѣща́ѧ вѣ́рою и҆ любо́вїю къ тебѣ̀ притека́ющыѧ."
 },
 {
  "type": "TEXT",
  "value": "Бл҃же́нное житїѐ проше́лъ є҆сѝ, назда́въ ᲂу҆́бѡ чꙋ̑вства, внѣ̀ бы́лъ є҆сѝ мїрска́гѡ мѧте́жа, и҆ бг҃ꙋ прибли́жилсѧ є҆сѝ, дими́трїе."
 },
 {
  "type": "TEXT",
  "value": "Ꙗ҆́кѡ до́бръ, ꙗ҆́кѡ красе́нъ вѣне́цъ, и҆́мже ны́нѣ вѣнча́лсѧ є҆сѝ, премꙋ́дре дими́трїе, добродѣ́тельми вѣнча́емь, и҆ надъ страстьмѝ ца́рствовавъ, преизрѧ́дне."
 },
 {
  "type": "TEXT",
  "value": "Бг҃оро́диченъ: Вы́ше є҆стества̀ родила̀ є҆сѝ, дв҃о, и҆ вѣ́чнꙋеши дв҃а, ꙗ҆́вльши и҆́стиннагѡ бжⷭ҇тва̀ сн҃а и҆ бг҃а твоегѡ̀ ѻ҆́бразы."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ, бж҃е на́шъ."
 },
 {
  "type": "TEXT",
  "value": "Въ дꙋшѝ свое́й бжⷭ҇твєннаѧ бога̑тства дх҃а ст҃а́гѡ собра́въ, непоро́чнꙋ мл҃твꙋ, и҆ чистотꙋ̀ краснолѣ́пнꙋ, бдѣ́нїе и҆ воздержа́нїе: сегѡ̀ ра́ди жили́ще ст҃ѣ́й трⷪ҇цѣ ꙗ҆ви́сѧ."
 },
 {
  "type": "TEXT",
  "value": "Ри́знꙋю хꙋ́дость и҆мѣ́лъ є҆сѝ, пребога́те, въ зимѣ́ же и҆ лѣ́тѣ не премѣнѧ́ѧ, болѣ́зненнѡ претерпѣ́лъ є҆сѝ бг҃а ра́ди соверше́ннѡ: тѣ́мже нбⷭ҇нагѡ прїѧ́тїѧ наслѣ́дникъ бы́ти сподо́билсѧ є҆сѝ."
 },
 {
  "type": "TEXT",
  "value": "На землѝ ꙗ҆́кѡ а҆́гг҃лъ бг҃ꙋ послꙋжи́лъ є҆сѝ всѧ́чески, и҆ ны́нѣ ᲂу҆ негѡ̀ со безпло́тными и҆ съ преподо́бными ра́достнѡ ликꙋ́еши, преблаже́нне дими́трїе, бл҃гоꙋха̑нїѧ же чꙋде́съ на́мъ и҆спꙋсти́лъ є҆сѝ."
 },
 {
  "type": "TEXT",
  "value": "Бг҃оро́диченъ: Бжⷭ҇твенное сло́во въ ложесна́хъ твои́хъ прїѧ́ла є҆сѝ, бцⷣе дв҃о мр҃і́е, и҆ па́че є҆стества̀ родила̀ є҆сѝ: є҆го́же молѝ, ѿ бѣ́дъ всѧ́кихъ на́съ и҆зба́вити, рабы̑ твоѧ̑ пою́щыѧ тѧ̀."
 },
 {
  "type": "HEADER",
  "value": "Конда́къ, гла́съ и҃."
 },
 {
  "type": "TEXT",
  "value": "Подо́бенъ: Взбра́нной:"
 },
 {
  "type": "TEXT",
  "value": "Ѿ ю҆́ности, прпⷣбне, крⷭ҇тъ тво́й взе́мъ, хрⷭ҇тꙋ̀ послѣ́довалъ є҆сѝ, въ моли́твахъ и҆ поще́нїихъ, во бдѣ́нїихъ же и҆ ѕлострада́нїихъ пло́ть твою̀ и҆знꙋрѧ́ѧ: тѣ́мже и҆ всеви́дѧщее ѻ҆́ко твоѧ̑ трꙋды̀ ви́дѣвъ, чꙋдесы́ тѧ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, преподо́бне ѻ҆́ч҃е дими́трїе, по́стникѡвъ ᲂу҆добре́нїе."
 },
 {
  "type": "TEXT",
  "value": "І҆́косъ: Бжⷭ҇твенными добродѣ́тельми твои́ми себѐ, мꙋ́дре, ᲂу҆краси́лъ є҆сѝ, сп҃сꙋ хрⷭ҇тꙋ̀ жили́ще содѣ́лавъ, ѻ҆́ч҃е мꙋ́жественнѣ: ꙗ҆́коже зла́то и҆скꙋси́лсѧ є҆сѝ вѣ́рою къ бг҃ꙋ, и҆ наде́ждею и҆ любо́вїю ѻ҆бѣ́ты полага́ѧ, воздержа́нїемъ пости́всѧ ꙗ҆́кѡ безпло́тенъ, въ цѣломꙋ́дрїи и҆ во смире́нїи возне́слсѧ є҆сѝ. Тѣ́мже и҆ мы̀ моли́твами твои́ми просвѣ́щшесѧ, прпⷣбне дими́трїе, вопїе́мъ тѝ: ра́дꙋйсѧ, ꙗ҆́кѡ и҆зъ мла́да бг҃ꙋ послꙋжи́лъ є҆сѝ: ра́дꙋйсѧ, притека́ющымъ къ тебѣ̀ спасе́нїѧ хода́таю: ра́дꙋйсѧ, хрⷭ҇тоимени̑тымъ лю́демъ похвала̀ и҆ ᲂу҆твержде́нїе: ра́дꙋйсѧ, ꙗ҆́кѡ твои́ми моли́твами сопроти́внїи побѣжда́ютсѧ: ра́дꙋйсѧ, ꙗ҆́кѡ всѣ̑мъ просѧ́щымъ дае́ши да́ръ, ѿ гдⷭ҇а дарова́нный тѝ и҆сцѣле́нїй: ра́дꙋйсѧ, ꙗ҆́кѡ и҆ чꙋдесы́ тѧ бг҃ъ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, прпⷣбне ѻ҆́ч҃е дими́трїе, по́стникѡвъ ᲂу҆добре́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й благослове́нъ и҆ препросла́вленъ."
 },
 {
  "type": "TEXT",
  "value": "Бл҃гоꙋха́ютъ, прпⷣбне, твои́хъ ᲂу҆че́нїй словеса̀, бл҃года́тїю дх҃а сїѧ́юще: бжⷭ҇тво́ бо є҆ди́но чты́й въ тре́хъ ли́цѣхъ, сло́ва же воплоще́нїе поѧ̀, бл҃гоꙋха́еши на́съ, пребога́те."
 },
 {
  "type": "TEXT",
  "value": "Оу҆ма̀ чистото́ю и҆ по́мысла, бг҃оразꙋ́мїѧ свѣ́тлостїю житїѐ преше́лъ є҆сѝ, чистото́ю же тѣлесѐ, и҆ дѣ́вства сїѧ́нїемъ и҆зрѧ́дно возложе́нїе ꙗ҆́вльсѧ всеви́дцꙋ и҆ вседержи́телю."
 },
 {
  "type": "TEXT",
  "value": "Сло́во твоѐ со́лїю растворе́но, и҆ житїѐ твоѐ бл҃года́тїю, пребл҃же́нне, сїѧ́ѧ ꙗ҆ви́сѧ, пречꙋ́дне: тѣ́мже въ вы́шнїѧ ѻ҆би́тєли ра́дꙋѧсѧ всели́лсѧ є҆сѝ, хрⷭ҇тꙋ̀ со дерзнове́нїемъ ны́нѣ предстоѧ̀."
 },
 {
  "type": "TEXT",
  "value": "Бг҃оро́диченъ: Оу҆правлѧ́ющи, пречⷭ҇таѧ, моѐ житїѐ, къ твоемꙋ̀ всети́хомꙋ приста́нищꙋ напра́ви, бг҃а ро́ждши, бл҃ги́хъ и҆сто́чника, всѣ̑мъ подаю́ща вѣ̑рнымъ нетлѣ́нїѧ бл҃года̑ти."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "И҆̀же и҆ногда̀ притека́ющихъ, прпⷣбне дими́трїе, къ твоемꙋ̀ чꙋдотво́рномꙋ гро́бꙋ съ вѣ́рою, ка́ющихсѧ къ бг҃ꙋ грѣхѡ́въ свои́хъ, мольба́ми твои́ми ско́рченыхъ человѣ̑къ рꙋ́цѣ и҆спра́вилъ є҆сѝ, бл҃же́нне."
 },
 {
  "type": "TEXT",
  "value": "И҆̀же и҆ногда̀ ѕлочести́ваго ра́тника бжⷭ҇твенною си́лою ѿри́нꙋлъ є҆сѝ ѿ ст҃а́гѡ твоегѡ̀ гро́ба, и҆ не ᲂу҆лꙋчи́вшъ поми́лованїѧ вско́рѣ ѻ҆бою̀ животꙋ̀ лиши́сѧ таковы́й."
 },
 {
  "type": "TEXT",
  "value": "И҆̀же и҆ногда̀ бл҃гоче́стнѡ бл҃гоговѣ́йнїи лю́дїе, твои́ми, свѧ́те дими́трїе, моли́твами, и҆ногда́ же кропле́нїемъ ст҃ы́ѧ воды̀ сщ҃е́нныѧ, разли̑чныѧ и҆сцѣлє́нїѧ прїе́млютъ припа́дающїи къ чꙋдотво́рномꙋ твоемꙋ̀ гро́бꙋ."
 },
 {
  "type": "TEXT",
  "value": "Бг҃оро́диченъ: И҆зба́вихомсѧ всѝ ѿ страсте́й и҆ бѣ́дъ, и҆ ѡ҆бстоѧ́нїй и҆ недꙋ́гѡвъ многоѻбра́зныхъ, мольба́ми твои́ми, пречⷭ҇таѧ бг҃ома́ти, сп҃сꙋ хрⷭ҇тꙋ̀ зовꙋ́ще: ѻ҆тє́цъ на́шихъ бж҃е, благослове́нъ є҆сѝ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ, халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Вѣне́цъ благолѣ́пенъ хрⷭ҇то́съ живода́вецъ на ве́рхъ тво́й положѝ тезоимени́те дими́трїе: и҆́бо дѣѧ́ньми просїѧ́лъ є҆сѝ, и҆ видѣ̑нїи ꙗ҆ви́лсѧ є҆сѝ зовы́й: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Всѐ преше́дъ чꙋ́вство, преблаже́нне, ᲂу҆мꙋ̀ пе́рвомꙋ прибли́жилсѧ є҆сѝ дꙋшѝ твоеѧ̀ чистото́ю, житїѧ́ же свѣ́тлостїю, вѣнцено́сче дими́трїе, зовы́й: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Жела́нїемъ ѕѣ́льнымъ, преблаже́нне, и҆зслѣ́дилъ є҆сѝ бг҃оно́снагѡ се́ргїа вели́кагѡ житїѐ бжⷭ҇твенное, жи́зни свѣ́тлостїю поревнова́лъ є҆сѝ, прехва́льне, бы́въ ᲂу҆́бѡ и҆ собесѣ́дникъ сегѡ̀ и҆зрѧ́денъ вои́стиннꙋ."
 },
 {
  "type": "TEXT",
  "value": "Бг҃оро́диченъ: Оу҆́мъ безстра́стенъ во ᲂу҆тро́бѣ твое́й соединѧ́етсѧ человѣ́ческомꙋ ᲂу҆мꙋ̀, пречⷭ҇таѧ, пло́ти же дебельство́мъ подъ лѣ́томъ бы́въ лѣ́тъ превы́шшїй. Тѣ́мъ тѧ̀, бцⷣе, вѣ́рою и҆ любо́вїю сла́вимъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Сто́лпъ ѡ҆дꙋшевле́нный, ѻ҆́ч҃е дими́трїе, и҆ и҆сто́чникъ неѡскꙋ́дный вои́стиннꙋ, слѣпы̑ѧ просвѣща́ѧ, разсла́блєнныѧ ᲂу҆крѣплѧ́ѧ, и҆ бѣ́сы прогонѧ́ѧ, не то́кмѡ ᲂу҆ гро́ба, но и҆ на мѣ́стѣхъ, и҆дѣ́же и҆́мѧ твоѐ нарица́ютъ съ любо́вїю."
 },
 {
  "type": "TEXT",
  "value": "Ꙗ҆́коже дрꙋгі́й и҆лїа̀ ꙗ҆ви́всѧ, сꙋгꙋ́бꙋ благода́ть на́мъ да́лъ є҆сѝ, твоѧ̑ честны̑ѧ мо́щи, точи́ти и҆сцѣлє́нїѧ тре́бꙋющымъ, ꙗ҆вле́нїемъ же твои́мъ и҆ по сме́рти, преподо́бне ѻ҆́ч҃е дими́трїе, и҆ны́хъ ѕлы́хъ ᲂу҆страша́ѧ, и҆ па́че и҆ны̑мъ и҆сцѣлє́нїѧ творѧ̀ вѣ̑рнымъ."
 },
 {
  "type": "TEXT",
  "value": "И҆ногда̀ прⷪ҇ро́ческимъ да́ромъ ѿ бг҃а, блаже́нне, почте́нъ бы́лъ є҆сѝ, всѧ́чески же тре́бꙋющымъ ми́лостивъ пока́зовалсѧ є҆сѝ: и҆ ны́нѣ, ѻ҆́ч҃е дими́трїе, ми́лостивомꙋ сп҃сꙋ за ны̀ моли́сѧ, воспѣва́ющыѧ и҆ превозносѧ́щыѧ є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ, прⷭ҇то́ле гдⷭ҇ень ѻ҆гнезра́чный, ра́дꙋйсѧ, две́ре невеще́ственнагѡ блиста́нїѧ: ра́дꙋйсѧ, ѻ҆́блаче, сл҃нце возсїѧ́вшїй пра́ведное хрⷭ҇та̀ сп҃са на́шего: є҆го́же превозно́симъ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "Пречестны́й дими́трїе, ны́нѣ чи́стѡ ᲂу҆слажда́ѧсѧ и҆ пи́щꙋ прїе́млѧ па́че ᲂу҆́мныѧ, и҆дѣ́же собо́ри ст҃ы́хъ ѻ҆́крестъ гдⷭ҇а ликꙋ́ютъ, блаже́нне, и҆̀же тѧ̀ ны́нѣ чтꙋ́щыѧ хода́тайствꙋѧ къ себѣ̀ привлецы̀."
 },
 {
  "type": "TEXT",
  "value": "Преше́лъ є҆сѝ ра́дꙋѧсѧ жела́нїемъ въ ра́й къ є҆ди́номꙋ вои́стиннꙋ блаже́нствꙋ, къ пребо́льшей добро́тѣ, и҆ къ жи́зни вои́стиннꙋ нестарѣ́ющейсѧ, и҆ свѣ́тꙋ невече́рнемꙋ, бг҃оно́се ѻ҆́ч҃е дими́трїе."
 },
 {
  "type": "TEXT",
  "value": "Ꙗ҆́кѡ со́лнце просїѧ́лъ є҆сѝ въ мона́шескихъ собо́рѣхъ, ѿ млады́хъ ногте́й ѡ҆свѧще́нъ бы́лъ є҆сѝ, ꙗ҆́коже зарю̀ и҆спꙋща́ѧ добродѣ́тєли твоегѡ̀ житїѧ̀, пресла́дкїй дими́трїе, бг҃оно́се ѻ҆́ч҃е прпⷣбне."
 },
 {
  "type": "TEXT",
  "value": "Бг҃оро́диченъ: Разꙋмѣ́вше и҆здале́ча прозорли́выма ѻ҆чи́ма прⷪ҇ро́цы, тѧ̀ ꙗ҆́вѣ провозвѣсти́ша хотѧ́щꙋю мт҃рь бы́ти вседѣ́телю влⷣцѣ всѣ́хъ: тѣ́мъ тѧ̀, всепѣ́таѧ, бцⷣꙋ и҆сповѣ́дꙋемъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще."
 },
 {
  "type": "TEXT",
  "value": "Ꙗ҆вле́нїемъ бжⷭ҇твеннымъ сїѧ́еши, ѻ҆́ч҃е дими́трїе преподо́бне, ꙗ҆́коже ѡ҆бѣща́лсѧ є҆сѝ, блаже́нне, моли́твою гра́дъ тво́й сохрани́лъ є҆сѝ ѿ хотѧ́щихъ воева́ти безъ вины̀ лю́ди твоѧ̑, свѧ́те."
 },
 {
  "type": "TEXT",
  "value": "Ѿ бг҃а показа́лсѧ є҆сѝ на́мъ цѣли́тель недꙋ́гꙋющымъ въ паде́нїихъ, ѡ҆чи́стникъ же, блаже́нне, и҆ прогони́тель лꙋка́выхъ дꙋхѡ́въ: тѣ́мъ тѧ̀ всѝ велича́емъ."
 },
 {
  "type": "TEXT",
  "value": "А҆́ще и҆ преста́вилсѧ є҆сѝ ѿ на́съ, ѻ҆́ч҃е дими́трїе, въ хра́мѣхъ бжⷭ҇твенныхъ ст҃ѣ́й трⷪ҇цѣ предстоѧ̀, хра́мъ дх҃ꙋ ст҃о́мꙋ бы́лъ є҆сѝ: моли́сѧ за всѧ̑ хрїстїа́ны, и҆́ноки же и҆ простцы̀, тебѐ велича́ющыѧ."
 },
 {
  "type": "TEXT",
  "value": "Бг҃оро́диченъ: Вои́стиннꙋ, бцⷣе, тобо́ю спа́сшїисѧ и҆сповѣ́дꙋемъ тѧ̀, дв҃о влⷣчце, ꙗ҆́кѡ родила̀ є҆сѝ на́мъ бг҃а сп҃си́телѧ, є҆ди́наго ѿ трⷪ҇цы сн҃а и҆ сло́ва, крⷭ҇то́мъ разо́ршаго сме́рть: є҆го́же ѡ҆ на́съ съ преподо́бнымъ дими́трїемъ молѝ тебѐ велича́ющихъ."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Мїрска́гѡ пристра́стїѧ ꙗ҆́кѡ ѿ скве́рны ᲂу҆клони́лсѧ є҆сѝ, и҆ а҆́лчбою пло́ть ᲂу҆вѧди́лъ є҆сѝ, ѻ҆́ч҃е, и҆ нбⷭ҇ною сла́вою со а҆́гг҃лы ѡ҆богати́лсѧ є҆сѝ: тѣ́мже непреста́ннѡ молѝ ѡ҆ на́съ хрⷭ҇та̀ бг҃а, преподо́бне дими́трїе. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Тѧ̀ предста́тельницꙋ и҆́мамы всѝ грѣ́шнїи ѽ прест҃а́ѧ дв҃о! Ты̀ благопремѣ́нна сотворѝ сн҃а твоего̀ ма́терними твои́ми моли́твами."
 },
 {
  "type": "HEADER",
  "value": "На хвали́техъ стїхи̑ры, на д҃, гла́съ є҃."
 },
 {
  "type": "TEXT",
  "value": "Подо́бенъ: Преподо́бне ѻ҆́ч҃е:"
 },
 {
  "type": "TEXT",
  "value": "Преподо́бне ѻ҆́ч҃е, дꙋ́шꙋ твою̀ съ тѣ́ломъ ѡ҆чи́стивъ, и҆ ст҃о́мꙋ дх҃ꙋ прекра́снаѧ ѻ҆би́тель ꙗ҆ви́сѧ, и҆ сла́вна тѧ̀ концє́мъ, преблаже́нне дими́трїе, содѣ́ла: въ чꙋдесѣ́хъ же вели́каго свѣти́льника, просвѣти́вшаго сꙋ́щихъ во мра́цѣ, ꙗ҆́кѡ наста́вника и҆́нокѡмъ соше́дшесѧ велемꙋ́дреннѡ ᲂу҆блажи́мъ. Два́жды."
 },
 {
  "type": "TEXT",
  "value": "Ꙗ҆ви́лсѧ є҆сѝ, бг҃облаже́нне, мꙋ́драѧ плени́ца, свѧзꙋ́ѧ мнѡ́гаѧ вра̑гъ ѡ҆полчє́нїѧ: тѣ́мже и҆ вѣнце́мъ ᲂу҆вѧ́злсѧ є҆сѝ неꙋвѧда́ющимъ, весе́лїе и҆ ра́дость, и҆ сла́вꙋ вѣ́чнꙋю воспрїѧ́лъ є҆сѝ, бг҃омꙋ́дре дими́трїе, молѝ хрⷭ҇та̀ бг҃а, дарова́ти ми́ръ мі́рови, и҆ дꙋша́мъ на́шымъ ве́лїю ми́лость."
 },
 {
  "type": "TEXT",
  "value": "Преподо́бне ѻ҆́ч҃е, тѣлє́сныѧ стра̑сти ѕѣ́льнымъ воздержа́нїемъ, и҆ по́стническими моли́твами же и҆ трꙋды̀, сле́зными пото́ки и҆ по́ты, ᲂу҆́глїѧ сла́дости погаси́лъ є҆сѝ, и҆ въ чꙋдесѣ́хъ сла́вна тѧ̀ показа̀ гдⷭ҇ь рѡссі̑йскимъ лю́демъ, дими́трїе блаже́нне. И҆ ᲂу҆краси́ тѧ вы́шними дарова̑нїи: є҆мꙋ́же слꙋ́жиши съ нбⷭ҇ными си́лами, і҆и҃сꙋ чл҃вѣколю́бцꙋ, и҆ сп҃сꙋ дꙋ́шъ на́шихъ."
 },
 {
  "type": "HEADER",
  "value": "Сла́ва, гла́съ ѕ҃:"
 },
 {
  "type": "TEXT",
  "value": "Прїиди́те празднолю́бцы, и҆ пѡ́стникъ сосло́вїе вѣ́рою соше́дшесѧ, и҆́стиннаго по́стника дне́сь почита́юще: ра́дꙋйсѧ, ше́ствовавъ по стопа́мъ влⷣки хрⷭ҇та̀ ᲂу҆́зкїй пꙋ́ть, и҆ безстра́стно житїѐ, ꙗ҆́коже дре́вле а҆враа́мъ пра́ведный, ѻ҆́ч҃е дими́трїе, страннолю́бїе притѧжа́въ, пресели́лсѧ є҆сѝ ѿ ѻ҆те́чества твоегѡ̀ до мѣ́ста, и҆дѣ́же ны́нѣ благоꙋха́етъ и҆сцѣлє́нїѧ честно́е тѣ́ло твоѐ всѣ̑мъ притека́ющымъ и҆ вопїю́щымъ: ѽ всеблаже́нне и҆ преподо́бне! По́стникѡмъ похвало̀ и҆ собесѣ́дниче безплѡ́тнымъ, благочести́вомꙋ же і҆мпера́торꙋ на́шемꙋ на пога̑ныѧ спосо́бниче, и҆ наста́вниче и҆́нокѡмъ, и҆ ѡ҆ на́съ моли́сѧ хрⷭ҇тꙋ̀ бг҃ꙋ, спастѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ."
 },
 {
  "type": "HEADER",
  "value": "Славосло́вїе вели́кое, и҆ ѿпꙋ́стъ."
 },
 {
  "type": "HEADER",
  "value": "На лїтꙋргі́и бл҃жє́нна, ѿ канѡ́на а҃-гѡ пѣ́снь г҃- ѧ, и҆ в҃-гѡ пѣ́снь ѕ҃-ѧ."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть преподо́бныхъ є҆гѡ̀:"
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇толъ къ гала́тѡмъ, зача́ло сг҃і."
 },
 {
  "type": "TEXT",
  "value": "А҆ллилꙋ́їа: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
 },
 {
  "type": "TEXT",
  "value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
 },
 {
  "type": "HEADER",
  "value": "Є҆ѵⷢ҇лїе ѿ лꙋкѝ, зача́ло к҃д."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]