ponomar-pwa/static/data/shared/menaion-daily/02-13/1.json

[
 {
  "type": "HEADER",
  "value": "Феѵрꙋа́рїа г҃і"
 },
 {
  "type": "HEADER",
  "value": "Прпⷣбнагѡ ѻ҆ц҃а̀ на́шегѡ мартїнїа́на."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Прїиди́те, ꙗ҆́коже цвѣ́ты се́льными, и҆ раѧ̀ бжⷭ҇твеннагѡ бл҃гора́сленными цвѣ́ты, пѣ́сньми вѣнча́емъ страда́льца хрⷭ҇то́ва, правосла́вныхъ ѻ҆вча̀: чистоты́ бо добро́та, вѣ́ры же́ртва, сла́ва воздержа́нїѧ ꙗ҆ви́сѧ ꙗ҆́вственнѡ мі́рꙋ. Тѣ́мже прїѧ́тъ вѣне́цъ црⷭ҇твїѧ непремѣ́ненъ."
 },
 {
  "type": "TEXT",
  "value": "И҆мѣ́ѧ въ се́рдцы твое́мъ ѻ҆́гнь, мартїнїа́не бг҃облаже́нне, бжⷭ҇твеннагѡ дх҃а, си́мъ ѡ҆пали́въ нечистоты̀ ѻ҆́бразъ ѻ҆трокови́цы, ѡ҆брѣ́тесѧ ᲂу҆ѧзви́въ сопротивобо́рца мече́мъ є҆гѡ̀, ѿню́дꙋже прирази́всѧ тебѣ̀, ꙗ҆ви́сѧ смѣ́хъ предлежа̀ и҆́стиннѡ, и҆ посра́мленъ всескве́рненный."
 },
 {
  "type": "TEXT",
  "value": "Ѻ҆́гнь ᲂу҆́бѡ вже́глъ є҆сѝ чꙋ́вственнѣ, проти́вꙋ вра̑жїимъ ѡ҆полче́нїѧмъ, пребл҃же́нне, мы́сль стѧжа́въ вѣ́чнагѡ ѻ҆гнѧ̀, сласте́й твои́хъ разжже́нїе ᲂу҆вѧди́лъ є҆сѝ ѕѣлѡ̀: на ка́мени же но́зѣ твоѝ поста́вль, прпⷣбне, на се́мъ хра́минꙋ созда́лъ є҆сѝ: по страна́мъ ѡ҆бходѧ̀, ѻ҆́ч҃е, терпѣ́нїемъ твои́мъ вѣнча́лсѧ є҆сѝ."
 },
 {
  "type": "HEADER",
  "value": "Сла́ва, гла́съ в҃:"
 },
 {
  "type": "TEXT",
  "value": "Ра́дꙋйсѧ, честна́ѧ и҆ многочꙋ́днаѧ палесті́нскаѧ похвало̀: возсїѧ́ бо на́мъ ꙗ҆́кѡ пресвѣ́тло со́лнце, и҆ врага̀ ѡ҆пали́въ всю̀ си́лꙋ, ᲂу҆́ды твоѧ̑ соже́глъ є҆сѝ ѻ҆гне́мъ, бл҃же́нне: въ гора́хъ бо и҆ пꙋсты́нѧхъ и҆ ѡ҆стровѣ́хъ, всѧ́ко и҆скꙋше́нїе тебѣ̀ принесѐ. Въ пꙋсты́ни ᲂу҆́бѡ женꙋ̀ тебѣ̀ предста́ви, на ка́мени же въ мо́ри и҆скꙋси́тель и҆скꙋси́ти тѧ̀ покꙋша́шесѧ, мꙋ́дре. Но, ѽ мартїнїа́не треблаже́нне! Хрⷭ҇та̀ непреста́ннѡ ѡ҆ на́съ молѧ̀ не преста́й, творѧ́щихъ вѣ́рою твою̀ па́мѧть."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Гро́здъ всезрѣ́лый, чⷭ҇таѧ, є҆го́же невоздѣ́ланнѡ во ᲂу҆тро́бѣ младоноси́ла є҆сѝ, на дре́вѣ ꙗ҆́кѡ ᲂу҆зрѣ́ла є҆сѝ сего̀ ви́сѧща, рыда́ющи восклица́ла є҆сѝ, взыва́ющи: ча́до, сла́дость и҆ска́пай, є҆́юже пїѧ́нство всѧ́кое страсте́й ѿе́млетсѧ, бл҃годѣ́телю, менє̀ ра́ди тебѐ ро́ждшїѧ, бжⷭ҇твенными ᲂу҆тѣше́ньми, ꙗ҆́кѡ бл҃гоꙋтро́бенъ."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ ѕ҃. Самогла́сенъ:"
 },
 {
  "type": "TEXT",
  "value": "И҆спещре́нъ ѻ҆де́ждею чистоты̀, и҆ просвѣще́нъ моли́твою бжⷭ҇твенною, живꙋ́ща же и҆мѣ́ѧ хрⷭ҇та̀ въ себѣ̀, ѿ дв҃ы ро́ждшагосѧ, же́нскимъ ᲂу҆краше́нїемъ не восхи́тисѧ, ни сла́сти плотскі́ѧ прїѧ́тъ: но взы́де ᲂу҆се́рднѡ на тождерабо́тный ѻ҆́гнь: бжⷭ҇твенный ѻ҆́гнь въ се́рдцы и҆мѣ́ѧ, и҆ чꙋ́вственнымъ и҆ вре́меннымъ ѻ҆гне́мъ стра́стный ѻ҆́гнь попали́лъ є҆сѝ, и҆ гее́нскїй пла́мень ᲂу҆гаси́лъ є҆сѝ. Тѣ́мже моли́сѧ, мартїнїа́не бл҃же́нне, и҆ на́мъ всепа́гꙋбнагѡ и҆ вѣ́чнагѡ и҆зба́витисѧ ѻ҆гнѧ̀."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Тридне́венъ:"
 },
 {
  "type": "TEXT",
  "value": "Лю́ди беззако́ннѣйшыѧ, безъ пра́вды пригвожда́ющыѧ тѧ̀ на дре́вѣ, дв҃а и҆ чⷭ҇таѧ мт҃и твоѧ̀ зрѧ́щи, ꙗ҆́коже сѷмеѡ́нъ проречѐ, ᲂу҆тро́бою, сп҃се, ᲂу҆ѧзвлѧ́шесѧ."
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Пла́мень и҆скꙋше́нїй сле́зъ тече́ньми погаси́лъ є҆сѝ, блаже́нне, и҆ морска̑ѧ волнє́нїѧ, и҆ ѕвѣре́й стремлє́нїѧ ѡ҆бꙋзда́вый, взыва́лъ є҆сѝ: препросла́вленъ є҆сѝ, всеси́льне, ѻ҆гнѧ̀ и҆ бꙋ́ри спасы́й мѧ̀."
 },
 {
  "type": "HEADER",
  "value": "Канѡ́нъ. Гла́съ в҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь: сла́внѡ бо просла́висѧ."
 },
 {
  "type": "TEXT",
  "value": "Та́йными пѣ́сньми согла́снѡ, прїиди́те, восхва́лимъ по́стника благоче́стїѧ дне́сь мартїнїа́на вѣ́рнѡ, ꙗ҆́кѡ до́брѣ и҆ зако́ннѡ пости́вшасѧ: тѣ́мже и҆ побѣ́ды прїѧ́тъ ѿ хрⷭ҇та̀ вѣне́цъ."
 },
 {
  "type": "TEXT",
  "value": "Неꙋкло́ннѡ стра́хомъ хрⷭ҇то́вымъ, ѻ҆́ч҃е, ѡ҆гражда́емь, стра́ха вра́жїѧ ꙗ҆́коже мо́лнїѧ ѿгна́лъ є҆сѝ: стра́шенъ бо бы́лъ є҆сѝ на ни́хъ терпѣ́нїемъ воздержа́нїѧ, и҆ мечта́ньми непоколеби́мь пребы́лъ є҆сѝ, прехва́льне."
 },
 {
  "type": "TEXT",
  "value": "Сп҃си́тельною си́лою хрⷭ҇то́вою, и҆скꙋше́нїе тебѣ̀ де́мѡнское наше́дшее, ᲂу҆до́бь ми́мѡ течѐ, жены̀ наи́тїе, прпⷣбне, ю҆́же спасы́й, ᲂу҆ѧзви́лъ є҆сѝ сеѧ̀ ра́ди ѕлонача́льника."
 },
 {
  "type": "TEXT",
  "value": "Бг҃оро́диченъ: Во чре́вѣ поноси́вши безъ мꙋ́жа, чⷭ҇таѧ, и҆ дв҃а же мт҃и въ жена́хъ є҆сѝ нетлѣ́нна, дх҃омъ ст҃ы́мъ сн҃а бж҃їѧ заче́нши во ᲂу҆тро́бѣ: є҆го́же по благоволе́нїю ѻ҆ц҃а̀ родила̀ є҆сѝ безъ сѣ́мене."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и."
 },
 {
  "type": "TEXT",
  "value": "Пло́ти воздержа́нїемъ ѿмы́лъ є҆сѝ ме́рзости ѕло́бꙋ ꙗ҆́коже ти́нꙋ, и҆ ѡ҆брѣ́лъ є҆сѝ чистото́ю ᲂу҆ма̀ стези̑, преподо́бне, пра́ведныхъ, гла́дкихъ пꙋте́й ѿбѣ́гъ грѣхо́вныхъ, мꙋ́дре."
 },
 {
  "type": "TEXT",
  "value": "Вжили́въ се́рдце твоѐ, и҆ разже́гъ стра́хомъ и҆ любо́вїю гдⷭ҇нею, пло́ть твою̀ ѡ҆пали́лъ є҆сѝ во́лею ѻ҆гне́мъ невеще́ственнымъ, мꙋ́дре, си́мъ прописꙋ́ѧ на́мъ гее́нны, преподо́бне, негаси́мый ѻ҆́гнь."
 },
 {
  "type": "TEXT",
  "value": "Оу҆ранѧ́ѧ твоѐ тѣ́ло ѻ҆гне́мъ всеѧдꙋ́щимъ, гони́тель ꙗ҆ви́лсѧ є҆сѝ и҆ вѣне́чникъ, ᲂу҆ѧзвлѧ́ѧ сꙋпоста́та терпѣ́нїемъ, ѡ҆чища́ѧ же помышле́нїй скве́рнꙋ, прпⷣбне, и҆ ᲂу҆бѣлѧ́ѧ дꙋ́хомъ, и҆ дѣ́вствꙋѧ пло́тїю."
 },
 {
  "type": "TEXT",
  "value": "Бг҃оро́диченъ: Зача́тїе неискꙋсомꙋ́жно, бжⷭ҇твенное рожде́нїе несказа́нно, па́че ᲂу҆ма́ бо бг҃ъ же ражда́емый вы́ше є҆стества̀. Ѽ ржⷭ҇тва̀ твоегѡ̀! Ѽ чистоты̀ твоеѧ̀! Тобо́ю бо ꙗ҆ви́сѧ мнѣ̀ бг҃ъ въ ра́бїи ѻ҆́бразѣ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Преподо́бный тво́й, гдⷭ҇и, въ поще́нїи свое́мъ по́двиги показꙋ́ѧ ᲂу҆се́рдїемъ мно́гимъ, хрⷭ҇тѐ бж҃е на́шъ: и҆мѣ́ѧ бо крѣ́пость твою̀ преѡби́дѧще бѣ́сы, посѣчѐ сло́вомъ некрѣ́пкꙋю горды́ню. Тѣ́мже тѧ̀ мо́лимъ, спасѝ дꙋ́шы на́шѧ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ."
 },
 {
  "type": "TEXT",
  "value": "Подо́бенъ: Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ."
 },
 {
  "type": "HEADER",
  "value": "И҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Оу҆мертви́сѧ томи́телѧ ле́сти ѡ҆брѣ́тенїе, и҆ побѣжде́нїе прїѧ́тъ: є҆ѧ́же бо ра́ди побѣди́ти надѣ́ѧшесѧ, се́ю низложи́сѧ, и҆ попира́етсѧ до́блѣ нога́ми крѣ́пкѡ."
 },
 {
  "type": "TEXT",
  "value": "Претерпѣ́лъ є҆сѝ до́блественнымъ нра́вомъ гдⷭ҇а, стєзѝ ᲂу҆пра́вилъ є҆сѝ, и҆ на ка́мень всели́лсѧ є҆сѝ, преподо́бне, безъ покро́ва лежа́щъ, ꙗ҆́кѡ на нб҃о возше́дъ, въ ма́лый ѻ҆́стровъ."
 },
 {
  "type": "TEXT",
  "value": "До́блественнѣи и҆ кра́снїи твоѝ но́зѣ, прехва́льне, къ тече́нїю просте́рлъ є҆сѝ, ѿ страны̀ въ странꙋ̀ преходѧ̀: бѣжа́лъ бо ѿ гра́да страсте́й, и҆ въ безстра́стїе дости́глъ є҆сѝ."
 },
 {
  "type": "TEXT",
  "value": "Бг҃оро́диченъ: Пребыла̀ є҆сѝ по ржⷭ҇твѣ̀ дв҃а, препѣ́таѧ, бг҃ъ бо безнача́льный ꙗ҆ви́сѧ и҆зъ тебє̀ проходѧ̀: є҆мꙋ́же вчл҃вѣ́чшꙋсѧ, подо́бїѧ ѻ҆́бразъ цѣлꙋ́емъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ."
 },
 {
  "type": "TEXT",
  "value": "Две́рь ѡ҆брѣ́тъ добродѣ́тели, кова́рство врага̀, преподо́бне, ꙗ҆ви́лсѧ є҆сѝ и҆ жи́зни мое́й предста́тель, дꙋши́ же наста́вникъ погрꙋже́ннѣй лю́тѣ бꙋ́рею."
 },
 {
  "type": "TEXT",
  "value": "Да́ръ бж҃їй ꙗ҆́кѡ прїѧ́тъ, моли́твъ твои́хъ крѣ́пость, всѧ̑ соверша́еши, мꙋ́дре, пресла́внѡ, и҆ спаса́еши ѿ глꙋбины̀, и҆ ѿ бꙋ́ри и҆збавлѧ́еши страсте́й дꙋ́шы на́шѧ."
 },
 {
  "type": "TEXT",
  "value": "Бг҃оро́диченъ: Во двою̀ є҆стєствꙋ̀, и҆ ѵ҆поста́си є҆ди́ной бы́лъ є҆сѝ, и҆ соверше́нъ сы́й чл҃вѣ́къ: несмѣ́шенъ ѻ҆́бразъ, и҆лѝ зра́къ не пострада̀ сло́ве, воплоща́ѧсѧ, гдⷭ҇и."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀."
 },
 {
  "type": "TEXT",
  "value": "Си́лою бж҃їею ᲂу҆крѣ́пль твою̀ дꙋ́шꙋ, прехва́льне, не ᲂу҆жа́слсѧ є҆сѝ наде́ждею ѡ҆гражда́емь, непрепла́ваемꙋ глꙋбинꙋ̀, мꙋ́дре, прейтѝ: но спасе́сѧ, делфі́нми носи́мь."
 },
 {
  "type": "TEXT",
  "value": "Житїѐ твоѐ а҆́гг҃лы и҆́стиннѡ ᲂу҆дивѝ, де́мѡны посрамѝ, и҆ человѣ́ки просвѣтѝ, и҆ женꙋ̀ па́че спа́слъ є҆сѝ, и҆ на стезю̀ поще́нїѧ привле́клъ є҆сѝ."
 },
 {
  "type": "TEXT",
  "value": "Подо́бїе твои̑мъ трꙋдѡ́мъ, и҆ честны̑мъ подвигѡ́мъ, мꙋ́дре, твоѐ преи́тїе по достоѧ́нїю и҆́стиннѡ бы́сть: и҆ взѧ́тъ на врагѝ цѣломꙋ́дрїѧ побѣ́дꙋ, воздержа́нїемъ ѕмі́ѧ ᲂу҆би́въ."
 },
 {
  "type": "TEXT",
  "value": "Бг҃оро́диченъ: Зако́ны ѡ҆ тебѣ̀ и҆знемого́ша, вои́стиннꙋ є҆стества̀, дв҃о чⷭ҇таѧ, дѣ́вствꙋеши бо, ро́ждши сопресто́льна ѻ҆ц҃ꙋ̀, и҆ бжⷭ҇твенномꙋ дх҃ꙋ, сло́во сꙋ́ща, бг҃а же и҆ чл҃вѣ́ка."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Твє́рдыѧ:"
 },
 {
  "type": "TEXT",
  "value": "Ꙗ҆́кѡ подви́жника благоче́стїѧ и҆скꙋ́сна, и҆ страда́льца произволе́нїемъ честна́го, и҆ пꙋсты́ни жи́телѧ и҆ все́льника, въ пѣ́снехъ досто́йнѡ восхва́лимъ мартїнїа́на присночестна́го: то́й бо ѕмі́ѧ попра̀."
 },
 {
  "type": "TEXT",
  "value": "І҆́косъ: Ѿ конє́цъ да́же до конє́цъ про́йде вѣща́нїе кра́сныхъ добродѣ́телей, и҆ бжⷭ҇твенныхъ пѡ́двигъ твои́хъ: мла́дъ сы́й во́зрастомъ, въ пꙋсты́нѧхъ возжела́лъ є҆сѝ пожи́ти, пѣ̑нїѧ хрⷭ҇тꙋ̀, ѱалмы̀ и҆ моли̑твы воспꙋща́ѧ при́снѡ: де́нь же и҆ но́щь возраста́ѧ въ болѣ́знехъ и҆ слеза́хъ, чи́стѣ житїѐ твоѐ сконча́лъ є҆сѝ, и҆ мꙋ́дрѣ ѕлонача́льнаго посрами́лъ є҆сѝ, ты́ бо ѕмі́ѧ попра́лъ є҆сѝ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ве́щнагѡ житїѧ̀ ᲂу҆ста́вль себѐ, мона́шествꙋй, бѣ́гай крѣ́пкѡ, гра́ды всѧ̑ и҆ страны̑ ѡ҆бходѝ, ꙗ҆́кѡ досто́йнѡ: мартїнїа́нъ бо ᲂу҆чи́тъ безъ печа́ли пѣ́ти: бл҃гослове́нъ бг҃ъ ѻ҆тє́цъ на́шихъ."
 },
 {
  "type": "TEXT",
  "value": "Тве́рдымъ хожде́нїемъ па́ѵловꙋ бы́лъ є҆сѝ, мꙋ́дре, ше́ствїю ѻ҆́бразъ, любо́вїю гонѧ̀, є҆го́же пости́глъ є҆сѝ воздержа́нїѧ тече́нїемъ твои́мъ: тѣ́мже и҆ ꙗ҆́кѡ стра́ненъ мі́ра позна́лсѧ є҆сѝ, прехва́льне, цр҃ю̀ нбⷭ҇номꙋ, и҆ просла́вилсѧ є҆сѝ вѣ́рнѡ."
 },
 {
  "type": "TEXT",
  "value": "Тече́нїе скончава́ѧ поще́нїѧ твоегѡ̀, ᲂу҆чени́къ хрⷭ҇то́въ дх҃омъ бжⷭ҇твеннымъ проꙋвѣ́дѣвъ ѿше́ствїе є҆́же ѿ тѣ́ла, поѧ́ше дꙋше́ю несомнѣ́нною: ꙗ҆́кѡ въ рꙋ́цѣ твоѝ, влⷣко, дꙋ́хъ мо́й, и҆ дꙋ́шꙋ мою̀ ны́нѣ предаю̀."
 },
 {
  "type": "TEXT",
  "value": "Бг҃оро́диченъ: Во́дꙋ жи́вꙋ подаѧ̀ ѿ и҆сто́чника хрⷭ҇то́съ и҆сточѝ, въ твою̀ ст҃ꙋ́ю, пресла́внаѧ, ᲂу҆тро́бꙋ всели́сѧ, пребы́въ неслїѧ́ненъ, всѣ́хъ нетлѣ́нїѧ напои́въ вѣ́рою зовꙋ́щихъ: бл҃гослове́нна є҆сѝ бг҃а пло́тїю ро́ждши."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Совле́кшисѧ чꙋ́вственнѣ плотскі́ѧ немощны́ѧ ри́зы, и҆ мꙋ́жества взе́мши ѻ҆де́ждꙋ и҆ ра́зꙋмъ, ѻ҆трокови́ца вопїѧ́ше постѧ́щисѧ: тѧ̀ превозноша́ю, і҆и҃се, во вѣ́ки всѧ̑."
 },
 {
  "type": "TEXT",
  "value": "Ра́дꙋетсѧ ᲂу҆се́рднѡ вои́стиннꙋ на ка́мени хрⷭ҇то́вѣ ᲂу҆твержде́на, и҆ посто́мъ и҆ вѣ́рою воѡрꙋжи́вшисѧ крѣ́пкѡ, ѻ҆трокови́ца вопїѧ́ше въ пѣ́снехъ: тѧ̀ превозноша́ю, і҆и҃се, во вѣ́ки."
 },
 {
  "type": "TEXT",
  "value": "Ꙗ҆́кѡ преложе́нъ ѿ тлѣ́нныхъ, и҆ вы́шнѧгѡ нетлѣ́нїѧ прича́стникъ бы́въ, бг҃оно́се, и҆ бжⷭ҇твенное тече́нїе сконча́въ, вѣне́цъ прїе́мъ, вопїѧ́лъ є҆сѝ: тѧ̀ превозноша́ю, і҆и҃се во вѣ́ки."
 },
 {
  "type": "TEXT",
  "value": "Бг҃оро́диченъ: Сше́дый съ нб҃сѐ за милосе́рдїе, ще́дре, бж҃е всѧ́ческихъ, и҆ ро́ждсѧ ѿ дв҃ы, спасѝ пою́щыѧ: по́йте, всѧ̑ дѣла̀, гдⷭ҇а, и҆ превозноси́те є҆го̀ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Что̀ ѡ҆ тебѣ̀ ве́лїѧ и҆ пресла́внаѧ та́йна, а҆да́мова дщѝ и҆ вы́шнѧгѡ мт҃и, є҆ди́ный къ бг҃ꙋ небла́зненный вѣ́рныхъ мо́стъ; тѧ̀ немо́лчными пѣ́сньми вѣ́рнїи бцⷣꙋ велича́емъ."
 },
 {
  "type": "TEXT",
  "value": "Зако́ны превозше́дъ, ѻ҆́ч҃е, поще́нїѧ, просїѧ́лъ є҆сѝ въ воздержа́нїи всѧ́цѣмъ, и҆ моли́твѣ бдѧ̀, посто́мъ же вкꙋ́пѣ и҆ чистото́ю и҆ говѣ́нїемъ. Тѣ́мже тво́й вѣнча́тель при кончи́нѣ страда́нїй тѧ̀ проповѣ́дꙋетъ хрⷭ҇то́съ."
 },
 {
  "type": "TEXT",
  "value": "Досто́инъ бг҃ꙋ ꙗ҆ви́всѧ, ꙗ҆́кѡ до́брѣ подви́глсѧ є҆сѝ: всѧ́ко бо бре́мѧ ѿве́ргъ, ле́гкѡ преплы́лъ є҆сѝ, ѻ҆́ч҃е, вели́кꙋю и҆ тѧ́жкꙋю житїѧ̀ сегѡ̀ пꙋчи́нꙋ, и҆ прише́лъ є҆сѝ въ приста́нище ти́хо, преше́дъ твоѐ тече́нїе, мꙋ́дре."
 },
 {
  "type": "TEXT",
  "value": "Бг҃оро́диченъ: Ты̀ є҆сѝ и҆́стиннѡ є҆ди́на, бцⷣе приснодв҃о, хрⷭ҇тїа́нъ направле́нїе, грѣ́шникѡвъ предста́тельница: и҆зъ тебє́ бо благоче́стнѡ возсїѧ̀ и҆збавле́нїе. Съ ни́мже тебѣ̀ по до́лгꙋ въ вѣ́рѣ пѣ́снь скончава́ю."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Нб҃о ѕвѣзда́ми:"
 },
 {
  "type": "TEXT",
  "value": "А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ въ пꙋсты́нѧхъ: и҆ стра̑сти покори́въ пло́ти, равноа́гг҃ленъ ꙗ҆ви́лсѧ є҆сѝ, мартїнїа́не бг҃оно́се."
 },
 {
  "type": "TEXT",
  "value": "Бг҃оро́диченъ: Гора̀, ю҆́же предви́дѣ дре́вле бжⷭ҇твенный а҆ввакꙋ́мъ, присѣ́нна, часта̀, ты̀ ꙗ҆ви́ласѧ є҆сѝ, дв҃о, и҆ тѧ̀ дв҃дъ и҆менꙋ́етъ ᲂу҆сыре́нꙋ и҆ тꙋ́чнꙋ."
 }
]