ponomar-pwa/static/data/shared/menaion-daily/01-29/1.json

[
 {
  "type": "HEADER",
  "value": "І҆аннꙋа́рїа к҃ѳ"
 },
 {
  "type": "HEADER",
  "value": "Пренесе́нїе моще́й ст҃а́гѡ сщ҃енномꙋ́ченика і҆гна́тїа бг҃оно́сца."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Бг҃осло́вѡвъ кра́йнїй бы́въ прее́мникъ, ѻ҆́ныхъ стопа́мъ послѣ́довалъ є҆сѝ, ѿ восто́ка ᲂу҆стреми́всѧ, и҆ на за́падѣ ꙗ҆влѧ́ѧсѧ, и҆ просвѣща́ѧ мо́лнїѧми бжⷭ҇твеннагѡ проповѣ́данїѧ: и҆дѣ́же, всемꙋ́дре, ѿ мі́ра ᲂу҆́бѡ заше́дъ, къ бг҃ꙋ же возсїѧ́лъ є҆сѝ, сїѧ́нїемъ вѣнча́емь благода́ти."
 },
 {
  "type": "TEXT",
  "value": "Свѧще́ннѣ ѿда́шасѧ твоѧ̑ гра́дꙋ твоемꙋ̀ мо́щи, бг҃оно́се всемꙋ́дре, страда́нїѧ ра́ди ѡ҆свѧщє́ны свѣтлѣ́е, и҆ благода́тїю сїѧ́ющыѧ, возвраще́нїемъ на́мъ, торжества̀ хода́таѧ содѣ́лавша, весе́лїѧ наполнѧ́юще бг҃одохнове́ннагѡ, и҆ ѡ҆бонѧ́нїемъ насыща́юще благоче́стнѡ тѧ̀ почита́ющыѧ."
 },
 {
  "type": "TEXT",
  "value": "Ѿ восто́ка ᲂу҆́бѡ пе́рвѣе денни́ца, і҆гна́тїе, на за́падѣхъ просїѧ́лъ є҆сѝ свѣтлѣ́йше: ны́нѣ же бжⷭ҇твенныхъ моще́й твои́хъ возвраще́нїемъ зарѝ на землѝ ѿ ве́чера просте́рлъ є҆сѝ, и҆ мо́лишисѧ хрⷭ҇тꙋ̀, ѿ тлѝ и҆ бѣ́дъ и҆зба́вити вѣ́рою соверша́ющихъ всечестнꙋ́ю па́мѧть твою̀."
 },
 {
  "type": "HEADER",
  "value": "Сла́ва, гла́съ и҃."
 },
 {
  "type": "TEXT",
  "value": "А҆нато́лїево: Бг҃оно́се і҆гна́тїе, твоего̀ жела́емаго хрⷭ҇та̀ впери́въ, мздꙋ̀ воспрїѧ́лъ є҆сѝ свѧщеннодѣ́йства є҆ѵⷢ҇лїа хрⷭ҇то́ва, є҆́же сконча́тисѧ кро́вїю. Тѣ́мъ пшени́ца бы́въ безсме́ртнагѡ дѣ́лателѧ, зꙋбы̀ ѕвѣре́й сомлѣ́лсѧ є҆сѝ, и҆ хлѣ́бъ сла́докъ томꙋ̀ показа́лсѧ є҆сѝ: молѝ ѡ҆ на́съ, страда́льче бл҃же́нне."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Что̀ зри́мое видѣ́нїе, є҆́же мои́ми ѻ҆чесы̀ ви́дитсѧ, ѽ влⷣко! Содержа́й всю̀ тва́рь на дре́во воздви́женъ бы́въ, и҆ ᲂу҆мира́еши всѣ̑мъ даѧ́й жи́знь, бцⷣа пла́чꙋщи глаго́лаше, є҆гда̀ ᲂу҆зрѣ̀ на крⷭ҇тѣ̀ возноси́ма, и҆зъ неѧ̀ неизрече́ннѡ возсїѧ́вшаго бг҃а и҆ чл҃вѣ́ка."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ а҃."
 },
 {
  "type": "TEXT",
  "value": "Стꙋді́тово: Ѽ тве́рдыѧ и҆ а҆дама́нтскїѧ твоеѧ̀ дꙋшѝ, достоблаже́нне і҆гна́тїе! Ты́ бо къ сꙋ́щемꙋ твоемꙋ̀ рачи́телю неѡсла́бно и҆мѣ́ѧ жела́нїе, глаго́лалъ є҆сѝ: нѣ́сть во мнѣ̀ ѻ҆́гнь любовеще́ственъ, вода́ же па́че жива́ѧ, и҆ глаго́лющаѧ во мнѣ̀, внꙋ́трь мѝ глаго́лющи: грѧдѝ ко ѻ҆ц҃ꙋ̀. Тѣ́мже бж҃е́ственнымъ дх҃омъ распалѧ́емь, ѕвѣ́ри и҆зво́лилъ є҆сѝ, мі́ра тѧ̀ скорѣ́е разлꙋчи́ти, и҆ къ жела́емомꙋ препосла́ти хрⷭ҇тꙋ̀. Є҆го́же молѝ, спастѝ дꙋ́шы на́шѧ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Всехва́льнїи мꙋ́чєницы:"
 },
 {
  "type": "TEXT",
  "value": "Оу҆ крⷭ҇та̀ предстоѧ́щи сн҃а и҆ бг҃а твоегѡ̀, и҆ долготерпѣ́нїе тогѡ̀ смотрѧ́ющи, глаго́лала є҆сѝ пла́чꙋщи, мт҃и чⷭ҇таѧ: ᲂу҆вы̀ мнѣ̀, ча́до сладча́йшее, что̀ сїѧ̑ стра́ждеши непра́веднѡ, сло́ве бж҃їй, да спасе́ши человѣ́чество;"
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "И҆ нра́вѡмъ прича́стникъ, и҆ прⷭ҇то́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче і҆гна́тїе, молѝ хрⷭ҇та̀ бг҃а спасти́сѧ дꙋша́мъ на́шымъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха: И҆ ст҃а́гѡ на ѕ҃, ѳеофа́ново, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "І҆гна́тїа восто́чнꙋю въ пѣ́снехъ ѕвѣздꙋ̀ пою̀."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Напра́вивъ къ добродѣ́тели житїѐ моѐ, свѣ́томъ ѡ҆зарѝ всели́вшїѧсѧ бл҃года́ти въ тебѣ̀, бг҃оно́се і҆гна́тїе, страсте́й смꙋще́нїе твои́ми моли́твами разорѝ."
 },
 {
  "type": "TEXT",
  "value": "Ꙗ҆́коже землѧ̀ ро́днѣйшаѧ бы́лъ є҆сѝ, стори́чествꙋющи плодоносѧ́й сѣ́мѧ хрⷭ҇тꙋ̀, бг҃оно́се і҆гна́тїе, дꙋ́шы напоѧ́ющемꙋ ѡ҆дожде́нїемъ дх҃а."
 },
 {
  "type": "TEXT",
  "value": "Разꙋмѣ́въ прозна́тельною си́лою твоеѧ̀ бл҃горо́дїе дꙋшѝ всѣ́хъ влⷣка и҆ бг҃ъ, бг҃оно́се і҆гна́тїе, сїѧ́ньми бл҃года́ти бг҃освѣ́тлыми просвѣтѝ."
 },
 {
  "type": "TEXT",
  "value": "Лꙋча́ми ᲂу҆́мнагѡ ѡ҆сїѧ́емь сл҃нца, всемꙋ́дре, ѿ восто́ка ᲂу҆стреми́всѧ свѣ́тлѡ, ꙗ҆́коже чꙋ́вственное со́лнце, мра́къ за́падный ѡ҆зарѧ́ѧ проповѣ́данїемъ."
 },
 {
  "type": "TEXT",
  "value": "Бг҃оро́диченъ: Трⷪ҇цы пребжⷭ҇твенныѧ, всечⷭ҇таѧ, є҆ди́наго родила̀ є҆сѝ, и҆зъ тебє̀ пло́тїю ꙗ҆́вльшагосѧ по на́мъ, благоволе́нїемъ роди́телѧ и҆ содѣ́йствомъ дх҃а всест҃а́гѡ, бг҃оневѣ́сто."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе."
 },
 {
  "type": "TEXT",
  "value": "И҆сцѣлѝ ᲂу҆́мъ мо́й, ѡ҆ѕло́бленный лю́тыми страстьмѝ плотски́ми, і҆гна́тїе мч҃ниче хрⷭ҇то́въ всеприснопа́мѧтне."
 },
 {
  "type": "TEXT",
  "value": "Є҆диномꙋ́дренна тѧ̀ хрⷭ҇то́съ а҆пⷭ҇лѡвъ до́брѣ вѣ́дый, поста́ви бж҃е́ственнымъ свѣ́томъ сїѧ́юща всѣ̑мъ цр҃квамъ ᲂу҆чи́телѧ."
 },
 {
  "type": "TEXT",
  "value": "Оу҆мерщвлѧ́ема тебє̀ ра́ди жизнода́вца зрѧ̀, поте́клъ є҆сѝ тогѡ̀ ра́ди сме́рть любо́вїю претерпѣ́ти, і҆гна́тїе."
 },
 {
  "type": "TEXT",
  "value": "Бг҃оро́диченъ: Сло́во ѻ҆́ч҃ее, пред̾ѡчи́стившисѧ, ѽ чⷭ҇таѧ! Дх҃омъ, слове́снагѡ є҆стества̀ на благодѣѧ́нїе родила̀ є҆сѝ."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Бж҃е́ственныѧ вѣ́ры:"
 },
 {
  "type": "TEXT",
  "value": "Бж҃е́ственнымъ дх҃омъ просвѣще́нъ, свирѣ́пство мꙋчи́телей дерзнове́нїемъ па́стырскимъ велемꙋ́дреннѡ посрами́лъ є҆сѝ, и҆ преве́зсѧ пре́лести пꙋчи́нꙋ, ко приста́нищꙋ бжⷭ҇твенномꙋ дости́глъ є҆сѝ, ѻ҆́ч҃е преподо́бне, хрⷭ҇та̀ бг҃а молѝ дарова́ти на́мъ ве́лїю ми́лость. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Бж҃е́ственнагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ, но бг҃ъ вочеловѣ́чсѧ пребы́сть, и҆́же по рождествѣ̀ мт҃рь тѧ̀ дв҃ꙋ, ꙗ҆́кѡ пре́жде ржⷭ҇тва̀ сохрани́въ всенепоро́чнꙋ, є҆ди́нъ гдⷭ҇ь: того̀ прилѣ́жнѡ молѝ, дарова́ти на́мъ ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃ома́ти, на крⷭ҇тѣ̀ зрѧ́щи повѣ́шена, и҆́же и҆зъ неѧ̀ безболѣ́зненнѡ прозѧ́бшаго, матеролѣ́пнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Бг҃оно́сецъ нарица́емь тезоиме́ннѡ, во хрⷭ҇та́ бо ѡ҆дѣ́ѧсѧ житїе́мъ, всѧ̑ помазꙋ́еши свѣ́тлѡ, мч҃никѡвъ ᲂу҆твержде́нїе, жела́нїемъ вѣнцы̀ воспрїѧ́ти."
 },
 {
  "type": "TEXT",
  "value": "Вжилѧ́емь, і҆гна́тїе, си́лою на крⷭ҇тѣ̀ пригво́ждшагѡсѧ тебє̀ ра́ди, бг҃оно́се: ѕвѣ́ри бо и҆зво́лилъ є҆сѝ мі́ра ѿлꙋчи́ти тѧ̀ къ твоемꙋ̀ жела́емомꙋ рачи́телю."
 },
 {
  "type": "TEXT",
  "value": "Возжела́въ красоты̀ влⷣчни, и҆ къ немꙋ̀ раче́нїе неѡсла́бно и҆мѣ́ѧ, сегѡ̀ страда́нїємъ ᲂу҆се́рднѡ поревнова́лъ є҆сѝ, мч҃ниче бг҃оно́се і҆гна́тїе."
 },
 {
  "type": "TEXT",
  "value": "Оу҆кра́шенъ багрѧни́цею твои́хъ крове́й, ст҃и́телю, и҆ ма́стїю свѧще́нства, таи́нниче, сїѧ́еши, хрⷭ҇тꙋ̀ зовы́й ра́дꙋѧсѧ: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Бг҃оро́диченъ: И҆зъ не сꙋ́щихъ всѧ́чєскаѧ бжⷭ҇твенною си́лою содѣва́ѧ, роди́сѧ и҆зъ тебє̀, бг҃ома́ти, мі́ръ просвѣща́ѧ свѣ́тлыми лꙋча́ми бжⷭ҇тва̀, и҆ бг҃оразꙋ́мїѧ свѣ́тлостїю."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Ны́нѣ ты̀ лице́мъ къ лицꙋ̀ хрⷭ҇та̀ зрѧ̀, і҆гна́тїе, зерца́лѡмъ вои́стиннꙋ разрѣ́шшымсѧ, соедини́лсѧ є҆сѝ твоемꙋ̀ рачи́телю."
 },
 {
  "type": "TEXT",
  "value": "Привле́клъ є҆сѝ просвѣще́нїе, ѿ и҆сто́чника свѣтода́тельнагѡ, і҆гна́тїе, пречⷭ҇тыми бо тѧ̀ хрⷭ҇то́съ дла́ньми держа́въ ѡ҆свѧтѝ."
 },
 {
  "type": "TEXT",
  "value": "Оу҆́мъ дх҃омъ бж҃їимъ стѧжа́въ просвѣще́нъ, і҆гна́тїе, бг҃опи̑санныѧ посыла́еши ꙗ҆́кѡ скрижа̑ли зако́ны бл҃года́ти."
 },
 {
  "type": "TEXT",
  "value": "Бг҃оро́диченъ: Свы́ше тебѣ̀ гла́съ ра́достнѡ возопѝ а҆́гг҃лъ, бцⷣе, влⷣки неизрече́нно возвѣща́ѧ тебѣ̀ зача́тїе."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Мꙋ́дрости є҆́ллинскїѧ разори́лъ є҆сѝ догма́ты, ѵ҆поста́снꙋю и҆мѣ́ѧ бж҃їю мꙋ́дрость, сщ҃еннотаи́нниче, и҆ съ шꙋ́момъ пре́лести па́мѧть погꙋби́лъ є҆сѝ."
 },
 {
  "type": "TEXT",
  "value": "Не преста́й ѡ҆ соверша́ющихъ па́мѧть твою̀ молѧ́сѧ, всебл҃же́нне, напа́стей и҆зба́витисѧ лютѣ́йшихъ и҆ бѣ́дъ, свѧще́нникъ ꙗ҆ви́всѧ благопрїѧ́тенъ."
 },
 {
  "type": "TEXT",
  "value": "Мꙋ́жествомъ и҆ мꙋ́дростїю преизѧ́ществовавъ, прпⷣбне, пра́вды же добро́тою, бг҃оно́се мч҃ниче, и҆ цѣломꙋ́дрїѧ, и҆ ѡ҆крꙋже́нїемъ добродѣ́телей ꙗ҆ви́лсѧ є҆сѝ ᲂу҆краша́емь."
 },
 {
  "type": "TEXT",
  "value": "Бг҃оро́диченъ: Тѧ̀ є҆ди́нꙋ посредѣ̀ те́рнїѧ ѡ҆брѣ́тъ, ꙗ҆́кѡ пречи́стый крі́нъ, и҆ ᲂу҆до́льный цвѣ́тъ, ѽ бг҃ома́ти! Жени́хъ и҆зъ ᲂу҆тро́бы твоеѧ̀ сло́во происхо́дитъ."
 },
 {
  "type": "HEADER",
  "value": "Конда́къ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь."
 },
 {
  "type": "TEXT",
  "value": "Ѿ восто́ка дне́сь возсїѧ́лъ є҆сѝ, и҆ тва́рь всю̀ просвѣти́вый ᲂу҆че́ньми, мꙋ́ченичествомъ ᲂу҆краси́сѧ, бг҃оно́сный и҆ бж҃е́ственный і҆гна́тїй."
 },
 {
  "type": "TEXT",
  "value": "І҆́косъ: І҆еремі́ю бг҃ъ и҆зъ ᲂу҆тро́бы ѡ҆свѧти́въ, и҆ пре́жде є҆́же роди́тисѧ вѣ́дый, ꙗ҆́кѡ провѣ́децъ, прїѧ́телище бы́ти того̀ дх҃а ст҃а́гѡ, наполнѧ́етъ сего̀ а҆́бїе ѿ ю҆́ностна житїѧ̀, и҆ прⷪ҇ро́ка же сего̀ и҆ проповѣ́дника, всѣ̑мъ предвозвѣща́ти посыла́етъ ст҃о́е на зе́млю своѐ прише́ствїе: ро́ждсѧ ᲂу҆́бѡ и҆ са́мъ бг҃ъ ѿ дв҃ы, къ про́повѣди прише́дъ, ѡ҆брѣ́те ѿ младе́нства досто́йна своеѧ̀ бл҃года́ти ᲂу҆ченика̀, бг҃оно́снаго и҆ бж҃е́ственнаго і҆гна́тїа."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Сщ҃е́нства ᲂу҆кра́шенъ мѵ́ромъ, преподо́бне, бж҃е́ственнымъ, и҆ мꙋ́ченическою кро́вїю ᲂу҆добре́нъ, во ѻ҆бои́хъ просїѧ́лъ є҆сѝ, благослове́нъ є҆сѝ въ хра́мѣ, зовы́й, сла́вы твоеѧ̀, гдⷭ҇и."
 },
 {
  "type": "TEXT",
  "value": "Законоположе́нїемъ просвѣти́въ мі́ръ ве́сь, хлѣ́бомъ нбⷭ҇нымъ напита́лъ є҆сѝ вѣ̑рныѧ, влⷣцѣ твоемꙋ̀ зовꙋ́щыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Свѣтолꙋ́чными зарѧ́ми, всебл҃же́нне, просвѣща́емь, заре́ю свѣтонача́льнагѡ ли́тїѧ ѡ҆сїѧ́всѧ, нбⷭ҇ное прїѧ́лъ є҆сѝ ра́дꙋѧсѧ наслажде́нїе, бг҃оно́се, мꙋ́ченикѡвъ похвало̀."
 },
 {
  "type": "TEXT",
  "value": "Пшени́ца сы́й бж҃їѧ, ꙗ҆́коже ре́клъ є҆сѝ, всеприснопа́мѧтне, челюстьмѝ сомле́нъ бы́лъ є҆сѝ, мꙋ́чениче, ѕвѣре́й, и҆ пита́ющемꙋ всѧ́чєскаѧ бж҃е́ственною бл҃гостїю, чистѣ́йшїй хлѣ́бъ бы́лъ є҆сѝ."
 },
 {
  "type": "TEXT",
  "value": "Бг҃оро́диченъ: Вы́шнѧгѡ ѡ҆свѧще́нное бж҃е́ственное селе́нїе, ра́дꙋйсѧ, тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Стоѧ̀ на сꙋди́щи, мꙋ́дре, трⷪ҇цꙋ несозда́ннꙋю бг҃осло́вилъ є҆сѝ ᲂу҆ма̀ чистото́ю, ст҃е: мы́сленною же свѣ́тлостїю не ᲂу҆страши́всѧ мꙋчи́тельскихъ престо́лѡвъ сꙋровства̀, но вопїѧ́лъ є҆сѝ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆пра́вивъ разꙋ́мнѣ тво́й ᲂу҆́мъ бж҃е́ственными догма́ты, бл҃же́нне і҆гна́тїе, ѕлоде́мѡна томи́телѧ, пре́лести предста́телѧ, мꙋ́дрости то́ки весьма̀ потопи́лъ є҆сѝ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Безмѣ́рнымъ сїѧ́ѧ свѣ́томъ бж҃ества̀, мꙋ́чениче непобѣди́ме, безбо́жїѧ непостоѧ́ннꙋю прогна́лъ є҆сѝ тмꙋ̀, посла̑нїѧ свѣтови̑днаѧ посыла́ѧ пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Неи́стовства и҆ зїѧ́нїѧ ѕвѣре́й не ᲂу҆страши́лсѧ є҆сѝ, бжⷭ҇твенный і҆гна́тїе: высоча́йшагѡ бо си́ла и҆зъ дв҃ы возсїѧ́вши, всеѻрꙋ́жїемъ крⷭ҇та́ тѧ ѡ҆бложѝ, пою́ща: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Ты̀ є҆ди́на во всѣ́хъ ро́дѣхъ, дв҃а пречⷭ҇таѧ, мт҃и ꙗ҆ви́ласѧ є҆сѝ бж҃їѧ, ты̀ бжⷭ҇тва̀ была̀ є҆сѝ жили́ще, всенепоро́чнаѧ, не ѡ҆пали́вшисѧ ѻ҆гне́мъ непристꙋ́пнагѡ свѣ́та. Тѣ́мже вси́ тѧ бл҃гослови́мъ, мр҃і́е бг҃оневѣ́стнаѧ."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Раче́нїе бжⷭ҇твеннѣйшее, бл҃же́нне, ᲂу҆держа́въ дꙋшѝ твоеѧ̀, мі́ра веще́ствєнныѧ печа̑ли ѻ҆гне́мъ невеще́ственнымъ всѧ̑ попалѝ: и҆ жела́нїй кра́ю вѣнцено́сца тѧ̀ предста́ви."
 },
 {
  "type": "TEXT",
  "value": "Въ приста́нище свѣ́тло ᲂу҆стреми́лсѧ є҆сѝ тиша́йшее, бг҃оно́се, бꙋ́ри волне́нїй и҆збѣ́гъ, стремле́нїѧ свирѣ́пыхъ и҆ слове́сныхъ ѕвѣре́й, и҆ ны́нѣ наслажда́ешисѧ, прїи́мъ вѣ́чное наслажде́нїе."
 },
 {
  "type": "TEXT",
  "value": "И҆спещре́ннымъ ᲂу҆краша́емь вѣнце́мъ, свѧщеннотаи́нниче преизѧ́ществꙋеши: сщ҃е́нства бо въ тебѣ̀ въ є҆ди́но сни́десѧ, и҆ свидѣ́тельства сла́ва, и҆ ѻ҆бои́ми ꙗ҆́кѡ прича́стникъ твоемꙋ̀ влⷣцѣ спросла́вилсѧ є҆сѝ."
 },
 {
  "type": "TEXT",
  "value": "Ꙗ҆́кѡ свѧщенноѧвле́нъ сы́й, дерзнове́нїе и҆мѣ́ѧ къ твоемꙋ̀ влⷣцѣ и҆ бг҃ꙋ, соверша́ющымъ вѣ́рою па́мѧть твою̀, ѿ напа́стей, і҆гна́тїе, ны́нѣ и҆зба́витисѧ, моли́сѧ."
 },
 {
  "type": "TEXT",
  "value": "Бг҃оро́диченъ: Оу҆гасѝ страсте́й мои́хъ пла́мень росолꙋ́чною твое́ю моли́твою, ꙗ҆́же во ᲂу҆тро́бѣ прїе́мши ѻ҆́гнь бж҃е́ственный неѡпа́льнѡ, всечⷭ҇таѧ: тѧ́ бо наде́ждꙋ и҆́мамъ спасе́нїѧ моегѡ̀, бг҃оневѣ́сто."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Свѣ́те неизмѣ́нный:"
 },
 {
  "type": "TEXT",
  "value": "И҆́мать свѣ́тлый пра́здникъ тво́й хрⷭ҇то́ва цр҃ковь, ꙗ҆́кѡ неѿе́млемое бога́тство, твоѧ̑ прїе́мши бж҃е́ствєнныѧ мо́щи, и҆дѣ́же и҆ мѵ́ро и҆сточа́ютъ всѣ̑мъ, і҆гна́тїе бг҃оно́се."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Свѣ́тъ возсїѧ́вый безлѣ́тнѣ ѿ ѻ҆ц҃а̀ пре́жде вѣ̑къ, въ лѣ̑та ны́нѣ напослѣ́докъ и҆зъ тебє̀, дв҃о, и҆зы́де на спасе́нїе мі́ра: къ немꙋ́же не преста́й ѡ҆ лю́дехъ твои́хъ моли́ти."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ а҃."
 },
 {
  "type": "TEXT",
  "value": "Стꙋді́тово: Сто́лпъ ѡ҆дꙋшевле́нъ и҆ вдохнове́нный ѻ҆́бразъ, лѣ́тнїй тво́й наста̀ пра́здникъ, бг҃оно́се і҆гна́тїе, та̑инства твоѧ̑ и҆ до́блєсти твоѧ̑ проповѣ́дающїй, є҆́же за вѣ́рꙋ да́же до кро́ве противостоѧ́нїе: блаже́нный ѻ҆́нъ и҆ приснопа́мѧтный гла́съ, и҆́же ꙗ҆́кѡ пшени́ца є҆́смь бж҃їѧ, глаго́лющїй, и҆ зꙋбы̀ ѕвѣре́й мелю́сѧ. Тѣ́мже подража́тель стра́сти хрⷭ҇та̀ твоегѡ̀ бы́въ, молѝ спасти́сѧ дꙋша́мъ на́шымъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Всехва́льнїи мч҃ницы:"
 },
 {
  "type": "TEXT",
  "value": "Заколе́нїе твоѐ непра́ведное, хрⷭ҇тѐ, дв҃а зрѧ́щи, пла́чꙋщи вопїѧ́ше тѝ: ча́до сладча́йшее, ка́кѡ безъ пра́вды ᲂу҆мира́еши; ка́кѡ на дре́вѣ ви́сиши, всю̀ зе́млю повѣ́сивый на вода́хъ; не ѡ҆ста́ви менє̀ є҆ди́нꙋ, бл҃годѣ́телю многоми́лостиве, мт҃рь и҆ рабꙋ̀ твою̀, молю́сѧ."
 },
 {
  "type": "HEADER",
  "value": "На лїтꙋргі́и, Бл҃жє́нна ѻ҆ктѡ́иха, на д҃: и҆ ст҃а́гѡ пѣ́снь г҃-ѧ, на д҃."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀."
 },
 {
  "type": "TEXT",
  "value": "Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀."
 },
 {
  "type": "HEADER",
  "value": "А҆пⷭ҇лъ къ є҆вре́ємъ, зача́ло та҃і."
 },
 {
  "type": "TEXT",
  "value": "А҆ллилꙋ́їа, гла́съ д҃: Пра́ведникъ, ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
 },
 {
  "type": "HEADER",
  "value": "Є҆ѵⷢ҇лїе ма́рка, зача́ло м҃а."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю бꙋ́детъ пра́ведникъ:"
 }
]