734 lines
68 KiB
JSON
734 lines
68 KiB
JSON
[
|
|
{
|
|
"type": "HEADER",
|
|
"value": "Ма́їа є҃і"
|
|
},
|
|
{
|
|
"type": "HEADER",
|
|
"value": "Оу҆бїе́нїе благовѣ́рнагѡ царе́вича кнѧ́зѧ дими́трїа моско́вскагѡ и҆ всеѧ̀ рѡссі́и, но́вагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "На Гдⷭ҇и, воззва́хъ, стїхи̑ры, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ца́рствовавшагѡ на землѝ ѻ҆́трасль бы́въ, пострада́лъ є҆сѝ терпѣли́внѡ, и҆ кро́вїю свое́ю ѡ҆багри́лъ є҆сѝ зе́млю: тлѣ́ннагѡ ра́ди и҆ мимотекꙋ́щагѡ ца́рства, ѿ твои́хъ ра̑бъ ᲂу҆бїе́нъ бы́въ, нетлѣ́нное црⷭ҇тво воспрїѧ́лъ є҆сѝ на нб҃сѣ́хъ: въ не́мже ра́дꙋѧсѧ предстои́ши хрⷭ҇тꙋ̀, вѣне́цъ носѧ̀ ѿ вседержи́телевы рꙋкѝ на версѣ̀ твое́мъ, всече́стне. Тѣ́мъ моли́сѧ, дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ѻ҆смолѣ́тнымъ ю҆́ностнымъ цвѣ́томъ ᲂу҆краша́емь, мꙋче́нїѧ ра́ною просвѣща́емь, пресвѣ́тлѡ, премꙋ́дре, сїѧ́еши. И҆ вмѣ́стѡ тлѣ́нныхъ и҆ мимотекꙋ́щихъ, нетлѣ̑ннаѧ и҆ превѣ̑чнаѧ воспрїе́мъ, хрⷭ҇тꙋ̀ предстоѧ̀, моли́сѧ ѡ҆ на́съ, премꙋ́дре, и҆ посѣща́й творѧ́щихъ вѣ́рнѡ твою̀ свѣтоно́снꙋю па́мѧть, дарова́ти на́мъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Прїиди́те ᲂу҆́бѡ, моско́встїи наро́ди, страстоте́рпца и҆ мч҃ника дими́трїа царе́вича торжество̀ соста́вимъ: и҆ свѣ́тлѡ того̀ ѱалмы̑ и҆ пѣ́сньми ликовствꙋ́юще, пра́зднꙋемъ съ похвала́ми: созыва́етъ бо на́съ дꙋхо́внѣ де́нь страда́нїѧ є҆гѡ̀ торжествова́ти, въ ѻ҆́ньже восхо́дитъ ѿ землѝ къ нбⷭ҇нымъ, и҆ ви́дитъ, ꙗ҆̀же а҆́гг҃ли ви́дѧтъ, и҆ хвала́ми ѿ а҆́гг҃лъ вѣнча́етсѧ, и҆ предстои́тъ прⷭ҇то́лꙋ хрⷭ҇то́вꙋ, и҆ мо́литъ дарова́ти на́мъ ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆́ны стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: Кі́ими похва́льными:"
|
|
},
|
|
{
|
|
"type": "TEXT",
|
|
"value": "Кі́ими дꙋхо́вными похвала́ми восхва́лимъ чꙋдотво́рца и҆ мꙋ́ченика дими́трїа, въ настоѧ́щее сїѐ торжество̀; въ пречестнѣ́мъ хра́мѣ се́мъ вѣ́рою и҆ любо́вїю возопїе́мъ пра́зднствєннаѧ: ра́дꙋйсѧ, вѣ́рныхъ люде́й те́плый застꙋ́пниче, и҆ землѝ рѡссі́йскїѧ ᲂу҆добре́нїе, и҆ всеѧ̀ вселе́нныѧ наслажде́нїе, є҆го́же вѣнцы̑ вѣнча́етъ хрⷭ҇то́съ бг҃ъ на́шъ, и҆мѣ́ѧй ве́лїю ми́лость."
|
|
},
|
|
{
|
|
"type": "TEXT",
|
|
"value": "Кі́ими похва́льными пѣ́сньми ны́нѣ соста́вимъ ликова́нїе; въ честнѣ́мъ пра́здницѣ твоеѧ̀ па́мѧти, страстоте́рпче хрⷭ҇то́въ дими́трїе, дꙋхо́внѡ пра́зднꙋюще мо́лимсѧ: молѝ во́инствꙋ на́шемꙋ, побѣди́тєльнаѧ на врагѝ дарова́ти: тебе́ бо те́пла моли́твенника ко влⷣцѣ стѧжа́хомъ, подаю́щемꙋ мі́рови ве́лїю ми́лость."
|
|
},
|
|
{
|
|
"type": "TEXT",
|
|
"value": "Кі́ими похва́льными добро́тами, воспое́мъ дими́трїа царе́вича страстоте́рпца; безконе́чнꙋю бо благода́ть ѿ хрⷭ҇та̀ прїѧ́лъ є҆́сть, и҆ всѣ̑мъ подае́тъ неѡскꙋ̑днаѧ и҆сцѣлє́нїѧ, и҆ мо́литсѧ за на́съ, своѧ̑ лю́ди, во є҆́же спасти́сѧ на́мъ, тогѡ̀ па́мѧть вѣ́рою почита́ющымъ. Є҆го́же чꙋдесы̀ просла́ви хрⷭ҇то́съ бг҃ъ на́шъ, и҆мѣ́ѧй ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Кто̀ ѿ земны́хъ по достоѧ́нїю возмо́жетъ твоемꙋ̀ вели́чествꙋ хвалꙋ̀ принестѝ; всегда́ бо пита́ешисѧ бг҃овидѣ́нїемъ ст҃ы́ѧ трⷪ҇цы, бжⷭ҇твенными зарѧ́ми просвѣща́емь, неизрече́ннымъ свѣтоли́тїемъ ѡ҆сїѧ́емь, ꙗ҆́снѡ зри́ши бжⷭ҇твеннꙋю сла́вꙋ, и҆ со дерзнове́нїемъ предстоѧ̀ престо́лꙋ всѣ́хъ цр҃ѧ̀, и҆ ми́лостива того̀ на́мъ сотворѧ́ѧ, вѣ́рою соверша́ющымъ и҆ свѣ́тлѡ пра́зднꙋющымъ де́нь бжⷭ҇твенныѧ твоеѧ̀ па́мѧти, сла́вы же и҆ ра́дости, є҆́йже ты̀ сподо́билсѧ є҆сѝ, и҆ вѣ́чнагѡ наслажде́нїѧ, и҆ на́мъ причасти́тисѧ молѝ, и҆ вселе́ннѣй дарова́ти ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ и҆ чтє́нїѧ."
|
|
},
|
|
{
|
|
"type": "HEADER",
|
|
"value": "Прⷪ҇ро́чества и҆са́їина чте́нїе. (Глава̀ м҃г.)"
|
|
},
|
|
{
|
|
"type": "TEXT",
|
|
"value": "Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ: кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла, кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑ и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ, да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ: А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ, ᲂу҆ничижи́хъ и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ: и҆ є҆щѐ ѿ нача́ла а҆́зъ є҆́смь, и҆ нѣ́сть ѿ рꙋ́къ мои́хъ и҆збавлѧ́ѧй, сотворю̀, и҆ кто̀ ѿврати́тъ то̀; Си́це глаго́летъ гдⷭ҇ь бг҃ъ, и҆збавлѧ́ѧй ва́съ, ст҃ы́й і҆зра́илевъ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣ́нитъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры гла́съ и҃:"
|
|
},
|
|
{
|
|
"type": "TEXT",
|
|
"value": "Па́че плотска́гѡ благоро́дїѧ дꙋхо́вное полꙋчи́лъ є҆сѝ: хрⷭ҇тꙋ́ бо ѿ младе́нства дꙋше́ю прилѣпи́всѧ, всѧ́ко наслажде́нїе мїрско́е, ꙗ҆́кѡ не сꙋ́щее ѡ҆ста́вль, дости́глъ є҆сѝ на нб҃сѣ́хъ перворо́дныхъ мно́жество: и҆дѣ́же съ ни́ми предстои́ши ст҃ѣ́й трⷪ҇цѣ, со а҆́гг҃лы веселѧ́сѧ, ꙗ҆́кѡ мꙋ́ченикъ непобѣди́мь, нетлѣ́нными вѣнцы̑ вѣнча́лсѧ є҆сѝ ѿ бг҃а: є҆го́же молѝ ѡ҆ на́съ є҆ди́наго чл҃вѣколю́бца."
|
|
},
|
|
{
|
|
"type": "TEXT",
|
|
"value": "Но́вый страда́льче, свѣ́тлаѧ мꙋ́ченикѡвъ добро́то, царе́виче дими́трїе, ꙗ҆́кѡ ѻ҆рꙋ́жїе крⷭ҇тъ держа́вно носѧ̀, вѣ́рꙋ ꙗ҆́кѡ щи́тъ, наде́ждꙋ ꙗ҆́кѡ бронѧ̀, воѡрꙋжи́лсѧ є҆сѝ на пре́лесть: и҆ ны́нѣ въ ми́рѣ глꙋбо́цѣ правосла́вныхъ житїѐ ᲂу҆твердѝ, и҆ междоꙋсо́бнꙋю бра́нь ᲂу҆кротѝ, и҆ всѧ̑ полє́знаѧ да́рꙋй всегда̀ лю́демъ твои̑мъ моли́твами твои́ми."
|
|
},
|
|
{
|
|
"type": "TEXT",
|
|
"value": "Сопресто́льное сло́во ѻ҆́ч҃ее, да́ждь ᲂу҆тѣше́нїе лю́демъ твои̑мъ, и҆ печа́ль на́шꙋ въ ра́дость претворѝ, и҆ междоꙋсѡ́бныѧ бра̑ни ᲂу҆мирѝ, и҆ всѧ̑ полє́знаѧ да́рꙋй лю́демъ твои̑мъ: твоеѧ́ бо всегда̀ тре́бꙋемъ всѝ по́мощи, да спасе́ши ѿ всѣ́хъ ѕѡ́лъ рабы̑ твоѧ̑, моли́твами страстоте́рпца твоегѡ̀ царе́вича дими́трїа."
|
|
},
|
|
{
|
|
"type": "HEADER",
|
|
"value": "Сла́ва, гла́съ то́йже."
|
|
},
|
|
{
|
|
"type": "TEXT",
|
|
"value": "Прїиди́те, празднолю́бцы, ли́къ соста́вимъ, прїиди́те, восхва́лимъ чꙋдотво́рца и҆ мꙋ́ченика. Стеце́мсѧ вѣ́рою и҆ любо́вїю, и҆ возопїе́мъ пра́зднствєннаѧ въ настоѧ́щее торжество̀, преимени́тагѡ сегѡ̀ и҆ тве́рдагѡ побо́рника, великомꙋ́ченика царе́вича дими́трїа: се́й бо мо́литъ ѡ҆ на́съ хрⷭ҇та̀ бг҃а на́шего, и҆ подае́тъ на́мъ моли́твами свои́ми ѿпꙋще́нїе грѣхѡ́въ, и҆ дꙋша́мъ спасе́нїе."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Что̀ ва́съ нарече́мъ:"
|
|
},
|
|
{
|
|
"type": "TEXT",
|
|
"value": "Что́ тѧ нарече́мъ, дими́трїе благоро́дне; вы́шнихъ жела́ѧ, дѡ́льнѧѧ презрѣ́лъ є҆сѝ, и҆ коне́цъ житїѧ̀ ѻ҆смолѣ́тнымъ во́зрастомъ мꙋ́ченически соверши́въ, вѣнце́мъ ца́рскимъ ѿ бг҃а вѣнча́лсѧ є҆сѝ, ꙗ҆́кѡ сы́нъ царе́въ и҆ мꙋ́ченикъ непобѣди́мь, и҆ вмѣ́стѡ земны́хъ и҆ тлѣ́нныхъ, на нб҃сѝ нетлѣ̑ннаѧ воспрїѧ́лъ є҆сѝ. Молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Сті́хъ: Пра́ведникъ ꙗ҆́кѡ фі́нїѯъ процвѣте́тъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
|
|
},
|
|
{
|
|
"type": "TEXT",
|
|
"value": "Что́ тѧ нарече́мъ, прехва́льне, мꙋ́чениче и҆ чꙋдотво́рче дими́трїе; ѕвѣздꙋ̀, сїѧ́еши бо чꙋдесы̀: рѣкꙋ̀ ли; и҆сточа́еши бо недꙋ́гѡмъ и҆сцѣлє́нїѧ, всѣ̑мъ человѣ́кѡмъ да́рꙋеши здра́вїе, и҆ чꙋде́съ дарова́нїе, и҆ къ бг҃ꙋ ѡ҆ всѣ́хъ хода́тай. Молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ."
|
|
},
|
|
{
|
|
"type": "TEXT",
|
|
"value": "Что́ тѧ и҆менꙋ́емъ, страстоте́рпче; роди́телѧ земна́го ѡ҆ста́вилъ є҆сѝ, и҆ нбⷭ҇наго бг҃а ѻ҆ц҃а̀ полꙋчи́лъ є҆сѝ. Вы́шнїй і҆ерⷭ҇ли́мъ ма́терь всѣ́хъ возлюби́лъ є҆сѝ, и҆дѣ́же со хрⷭ҇то́мъ ны́нѣ ца́рствꙋеши. Вели́кое твоѐ страда́нїе, и҆ бѡ́льша дарова̑нїѧ: молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, вѣ́рнїи, во ст҃ꙋ́ю цр҃ковь, въ то́й бо дне́сь прино́ситсѧ сла́ва на нб҃са̀ бг҃ꙋ, и҆ на землѝ пое́тсѧ хвала̀ но́вомꙋ мꙋ́ченикꙋ, и҆ страстоте́рпцꙋ царе́вичꙋ дими́трїю: соверша́ющымъ бо па́мѧть є҆гѡ̀, проше́нїе во все́мъ и҆сполнѧ́етъ, и҆ ѿ напа́стей, и҆ бѣ́дъ и҆збавлѧ́етъ, и҆ ѿ всѣ́хъ ѕѡ́лъ покрыва́етъ, и҆ спаса́етъ всѣ́хъ свои́ми моли́твами. Подае́тъ бо хрⷭ҇то́съ моли́твъ ра́ди є҆гѡ̀, на врагѝ побѣ́дꙋ, и҆ ми́ръ вселе́ннѣй, и҆ дꙋша́мъ на́шымъ ѿпꙋще́нїе грѣхѡ́въ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Ца́рскꙋю дїади́мꙋ ѡ҆багри́лъ є҆сѝ кро́вїю твое́ю, бг҃омꙋ́дре мꙋ́чениче, за ски́птръ крⷭ҇тъ въ рꙋкꙋ̀ прїи́мъ, ꙗ҆ви́лсѧ є҆сѝ побѣдоно́сецъ, и҆ же́ртвꙋ непоро́чнꙋю влⷣцѣ прине́слъ є҆сѝ себѐ: ꙗ҆́кѡ бо а҆́гнецъ неѕло́бивъ ѿ раба̀ заколе́нъ є҆сѝ. И҆ ны́нѣ ра́дꙋѧсѧ предстои́ши ст҃ѣ́й трⷪ҇цѣ, моли́сѧ ѡ҆ держа́вѣ сро́дникѡвъ твои́хъ бг҃оꙋго́днѣй бы́ти, и҆ сыновѡ́мъ рѡссі̑йскимъ спасти́сѧ."
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-й стїхоло́гїи, сѣда́ленъ, гла́съ а҃:"
|
|
},
|
|
{
|
|
"type": "TEXT",
|
|
"value": "Ѿ чре́слъ ца́рскихъ произше́дъ, цвѣ́тъ чистоты̀ произни́кнꙋлъ є҆сѝ, и҆ пло́дъ благовѣ́рїѧ возра́слъ ѻ҆смолѣ́тенъ во́зрастомъ, жили́ще бы́лъ є҆сѝ прест҃а́гѡ дх҃а, бж҃е́ственными чꙋдесы̀ сїѧ́ѧ, благоро́дне дими́трїе, ми́ръ мі́рꙋ и҆спросѝ, и҆ дꙋша́мъ на́шымъ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ."
|
|
},
|
|
{
|
|
"type": "HEADER",
|
|
"value": "По в҃-й стїхоло́гїи, сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Кро́вь твою̀ ꙗ҆́коже а҆лава́стръ мѵ́ра хрⷭ҇тꙋ̀ прине́слъ є҆сѝ, благовѣ́рный царе́виче дими́трїе. Тѣ́мъ и҆ преблагі́й вели́кїй дарода́тель бг҃ъ просла́ви тѧ̀, и҆ возвы́си чꙋдесы̀ свои́ми благода́тными: и҆ сегѡ̀ ра́ди па́мѧть твою̀ ра́достнѡ почита́емъ, досточꙋ́дне. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Дв҃о всенепоро́чнаѧ, пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїѧ житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Ѿ младе́нства дꙋше́ю къ бг҃ꙋ прилѣпи́лсѧ є҆сѝ, и҆ сегѡ̀ ра́ди вѣнце́мъ мꙋче́нїѧ вѣнча́лсѧ є҆сѝ, ꙗ҆́кѡ предо́бръ страда́лецъ всече́стенъ: тѣ́мъ съ мꙋ́ченическими ли̑ки веселѧ́сѧ, нбⷭ҇ныѧ да́ры прїе́млеши: и҆́миже подае́ши ѿ всѧ́кихъ недꙋ̑гъ здра́вїе, приходѧ́щымъ къ тебѣ̀ съ вѣ́рою и҆ любо́вїю, чтꙋ́щымъ свѧтꙋ́ю и҆ многоцѣле́бнꙋю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
|
|
},
|
|
{
|
|
"type": "HEADER",
|
|
"value": "Степє́нна, а҃ а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀."
|
|
},
|
|
{
|
|
"type": "TEXT",
|
|
"value": "Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀."
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе лꙋкѝ, зача́ло р҃ѕ."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀, стїхи́ра, гла́съ и҃:"
|
|
},
|
|
{
|
|
"type": "TEXT",
|
|
"value": "И҆зъ младе́нства и҆згна́нъ бы́въ земна́гѡ ца́рства, нбⷭ҇номꙋ црⷭ҇твꙋ ѿ бг҃а сподо́билсѧ є҆сѝ: ны́нѣ же благода́тный да́ръ ѿ подвигополо́жника хрⷭ҇та̀ соверше́ннѡ воспрїи́мъ, неѡскꙋ́днѡ и҆сточа́еши всѣ̑мъ и҆сцѣле́нїе: со а҆́гг҃лы ликовствꙋ́ѧ, хрⷭ҇тꙋ̀, дими́трїе, моли́сѧ, ꙗ҆́кѡ да ми́лостивъ бꙋ́детъ на́мъ въ де́нь стра́шнагѡ є҆гѡ̀ прише́ствїѧ."
|
|
},
|
|
{
|
|
"type": "HEADER",
|
|
"value": "Канѡ́на два̀: пе́рвый канѡ́нъ, Гла́съ в҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Мꙋ́ченика твоего̀, хрⷭ҇тѐ, дими́трїа, пѣ́ти мнѣ̀ жела́ющемꙋ, моли́твами є҆гѡ̀ ꙗ҆́кѡ бл҃гъ ѡ҆сїѧ́нїе прест҃а́гѡ дх҃а да́рꙋй, да воспою̀ свѣ́тлѡ твоегѡ̀ ᲂу҆го́дника торжество̀."
|
|
},
|
|
{
|
|
"type": "TEXT",
|
|
"value": "Оу҆мертви́вшемꙋ крѣ́пость сме́рти подо́бѧсѧ, мꙋ́чениче дими́трїе, ѿ раба̀ заколе́нїе претерпѣ́лъ є҆сѝ, и҆ пресла́внѡ въ нбⷭ҇ныѧ ѻ҆би́тєли всели́всѧ, трꙋдѡ́въ воздаѧ́нїе прїѧ́лъ є҆сѝ, прехва́льне."
|
|
},
|
|
{
|
|
"type": "TEXT",
|
|
"value": "Честна́ѧ твоѧ̀ па́мѧть, мꙋ́чениче, ѡ҆свѧща́ющи мі́ръ приспѣ̀: ра́дꙋетсѧ же дне́сь пресла́вный гра́дъ москва̀, твоегѡ̀ блага́гѡ полꙋчи́въ застꙋпле́нїѧ, и҆ благодарѧ̀ сп҃сꙋ вопїе́тъ, препросла́вленный гдⷭ҇ь, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѡ҆ тебѣ̀ ны́нѣ прⷪ҇ро́чество соверши́сѧ, бг҃ороди́тельнице влⷣчце чⷭ҇таѧ: є҆го́же бо провозвѣсти́ша высокогла́снѡ всѝ прⷪ҇ро́цы, того̀ невмѣсти́маго пресла́внѡ во чре́вѣ вмѣсти́ла є҆сѝ, во двою̀ є҆стєствꙋ̀ соверше́нна бг҃а же и҆ чл҃вѣ́ка."
|
|
},
|
|
{
|
|
"type": "HEADER",
|
|
"value": "Дрꙋгі́й канѡ́нъ, гла́съ и҃, є҆гѡ́же краегране́сїе сицево̀:"
|
|
},
|
|
{
|
|
"type": "TEXT",
|
|
"value": "Хвалю̀ сла́вꙋ царе́вича дими́трїа."
|
|
},
|
|
{
|
|
"type": "HEADER",
|
|
"value": "Прѡ́чаѧ же кромѣ̀ сегѡ̀ да разꙋмѣ́ютсѧ."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре: і҆и҃лѧ же бѣглеца̀, пѣшехо́дца, спасѐ, пѣ́снь бг҃ови воспѣва́юща."
|
|
},
|
|
{
|
|
"type": "TEXT",
|
|
"value": "Хрⷭ҇тѐ мо́й пребл҃гі́й, ѿженѝ тмꙋ̀ ѿ мра́чнагѡ ᲂу҆ма̀ моегѡ̀, и҆ просвѣтѝ ѡ҆тѧгче́ннꙋю мою̀ дꙋ́шꙋ мно́гими грѣхи̑, и҆ напра́ви мы́сль мою̀, да досто́йнѡ воспою̀ но́ваго сего̀ страда́льца царе́вича дими́трїа."
|
|
},
|
|
{
|
|
"type": "TEXT",
|
|
"value": "Въ мꙋ́ченическихъ ли́цѣхъ предстоѧ̀, и҆ неизрече́нный свѣ́тъ зрѧ̀, страда́льче дими́трїе, просвѣтѝ моѧ̑ недоꙋмѣ̑ннаѧ помышлє́нїѧ, ꙗ҆́кѡ да воспою̀ тѧ̀, ꙗ҆́коже подоба́етъ мѝ рещѝ."
|
|
},
|
|
{
|
|
"type": "TEXT",
|
|
"value": "А҆́ще ра́бъ тво́й и҆ ᲂу҆бі́йца земна́гѡ тѧ̀ ца́рства и҆ лишѝ, ты́ же вмѣ́стѡ тогѡ̀, страда́льче дими́трїе, нбⷭ҇ное воспрїѧ́лъ є҆сѝ, и҆ та́мѡ наслажда́ѧсѧ бжⷭ҇твенныхъ красо́тъ и҆ весе́лїѧ, молѝ хрⷭ҇та̀ бг҃а, дарова́ти на́мъ ве́лїю ми́лость."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Лѣ́ствица є҆сѝ вои́стиннꙋ высо́каѧ ты̀, влⷣчце, ю҆́же і҆а́кѡвъ ви́дѣвъ, ꙗ҆́кѡ а҆́гг҃ли бж҃їи восхожда́хꙋ и҆ низхожда́хꙋ по не́й, гдⷭ҇ь же ᲂу҆твержда́шесѧ на тебѣ̀: ѡ҆чи́сти ти́нꙋ грѣхѡ́въ мои́хъ, и҆ спаси́ мѧ недосто́йнаго раба̀ твоего̀."
|
|
},
|
|
{
|
|
"type": "HEADER",
|
|
"value": "Катава́сїа пра́здника."
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Процвѣла̀ є҆́сть пꙋсты́нѧ ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
|
|
},
|
|
{
|
|
"type": "TEXT",
|
|
"value": "Є҆гда̀ ѡ҆ста́вль земна́гѡ мі́ра те́мность, страда́льчески же ѡ҆багре́но кро́вїю тѣ́ло твоѐ скры́въ на ᲂу҆́глечѣ, дꙋ́шꙋ въ нбⷭ҇ныѧ ѻ҆би́тєли, дими́трїе, всели́лъ є҆сѝ, прехва́льне."
|
|
},
|
|
{
|
|
"type": "TEXT",
|
|
"value": "Но́щи и҆ тмы̀ сы́нове нареко́шасѧ ᲂу҆бі̑йцы беззако́ннїи: ꙗ҆́кѡ а҆́гнца бо тѧ̀ непоро́чна ноже́мъ сбодо́ша, хода́таи твоемꙋ̀ вѣнцꙋ̀ бжⷭ҇твенномꙋ, дими́трїе, бы́вше."
|
|
},
|
|
{
|
|
"type": "TEXT",
|
|
"value": "И҆сцѣле́нїѧ стрꙋи̑ и҆сточа́еши ко гро́бꙋ твоемꙋ̀, мꙋ́чениче дими́трїе, вѣ́рою притека́ющымъ: благода́рно же ра́дованїе подае́ши пою́щымъ: нѣ́сть свѧ́та, ꙗ҆́коже бг҃ъ на́шъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Марі́е, злата́ѧ кади́льнице, страсте́й мои́хъ ѿженѝ смра́дъ, и҆ ᲂу҆тверди́ мѧ коле́блема прираже́ньми лꙋка́вагѡ ратобо́рца."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче."
|
|
},
|
|
{
|
|
"type": "TEXT",
|
|
"value": "Ю҆́ношескагѡ соверше́ннагѡ цвѣ́та не доспѣ́въ, пожа́лсѧ є҆сѝ, непови́нный страда́льче дими́трїе, и҆ нꙋ́жднꙋю сме́рть претерпѣ́лъ є҆сѝ: тогѡ̀ ра́ди ны́нѣ ликꙋ́еши съ ли̑ки мꙋ́ченическими, предстоѧ̀ ᲂу҆ цр҃ѧ̀ и҆ бг҃а всѣ́хъ."
|
|
},
|
|
{
|
|
"type": "TEXT",
|
|
"value": "Сме́рть твоѧ̀ ᲂу҆бѝ раба̀ твоего̀, и҆ ᲂу҆бі́йцꙋ, благоро́дне, нарица́вшихсѧ же во твоѐ благоро́дное и҆́мѧ, та́кожде до конца̀ всѣ́хъ погꙋбѝ: ты́ же сме́ртїю твое́ю вѣ́чный живо́тъ приѡбрѣ́лъ є҆сѝ."
|
|
},
|
|
{
|
|
"type": "TEXT",
|
|
"value": "Лю́тое колеба́нїе бы́сть въ рѡссі́йстѣй землѝ, по сме́рти твое́й, благовѣ́рный дими́трїе, ѿ ѻ҆́нѣхъ ѕлы́хъ и҆ навѣ́тныхъ человѣ̑къ, лжꙋ́щихсѧ и҆́менемъ твои́мъ: бг҃ъ же моли́твъ ра́ди твои́хъ, до конца̀ всѣ́хъ погꙋбѝ, и҆ лю́тое колеба́нїе ѿ ни́хъ ᲂу҆кротѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: А҆́ще бг҃ъ тѧ̀ и҆збра̀ себѣ̀ нбⷭ҇ное селе́нїе, дв҃о мт҃и чи́стаѧ, и҆ кто̀ не подиви́тсѧ пресла́вномꙋ ржⷭ҇твꙋ̀ твоемꙋ̀, и҆́мже всѣ́хъ и҆скꙋпѝ ѿ клѧ́твы зако́нныѧ; тѣ́мъ и҆ а҆́зъ молю́тисѧ, свободѝ и҆ менѐ недосто́йнаго раба̀ твоего̀ ѿ клѧ́твы грѣхо́вныѧ."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ско́рѡ предварѝ:"
|
|
},
|
|
{
|
|
"type": "TEXT",
|
|
"value": "Наста̀, празднолю́бцы, свѣ́тлое торжество̀, па́мѧть сла́внаѧ страстоно́сца хрⷭ҇то́ва, веселѧ́щи всѧ́чєскаѧ, сїѧ́ющи въ мі́рѣ зарѧ́ми чꙋде́съ. Тѣ́мже непреста́ннꙋю благода́ть твои́ми моли́твами ᲂу҆ хрⷭ҇та̀ и҆спросѝ, мꙋ́чениче дими́трїе, дꙋша́мъ на́шымъ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ ѿ младе́нства лише́нъ є҆сѝ земна́гѡ ца́рства, благоро́дне дими́трїе, и҆ въ тогѡ̀ мѣ́стѡ въ нбⷭ҇ное пресели́всѧ, та́мѡ сподо́билсѧ є҆сѝ нбⷭ҇наѧ блага̑ѧ ви́дѣти: и҆ ны́нѣ ꙗ҆́снѡ зри́ши ст҃ꙋ́ю трⷪ҇цꙋ, и҆ мо́лишисѧ ѡ҆ держа́вѣ твои́хъ сро́дникѡвъ, и҆ за всѧ̑ вѣ̑рныѧ лю́ди, во є҆́же бы и҆̀мъ полꙋчи́ти всѧ̑ блага̑ѧ и҆ полє́знаѧ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, съ мч҃никомъ того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Кро́вїю страда́нїѧ, тлѣ́ннагѡ смра́да и҆збѣжа́въ, бг҃омꙋ́дре, вмѣ́стѡ земна́гѡ, нбⷭ҇нагѡ црⷭ҇твїѧ наслѣ́дникъ бы́лъ є҆сѝ, страстоте́рпче: тѣ́мъ всѝ чтꙋ́ще тѧ̀ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "А҆́гг҃льскагѡ селе́нїѧ во дво́рѣхъ пребыва́еши, и҆ въ рѡссі́йстѣй землѝ благода́ть и҆сточа́еши, къ ра́цѣ моще́й твои́хъ любо́вїю припа́дающымъ, страда́льче, и҆ вопїю́щымъ: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Двє́ри нбⷭ҇ныѧ свѣ́тлѡ ѿверзо́шасѧ, прїе́мше тѧ̀, мꙋ́чениче, и҆ цр҃ковь тѧ̀ ны́нѣ и҆мѣ́етъ ликовствꙋ́ющи со и҆збра́нными, пою́щи бг҃ꙋ: си́лѣ твое́й сла́ва, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Свѧще́ннїи провозвѣсти́ша дре́вле гла́си, чревоноше́нїѧ твоегѡ̀ глꙋбинꙋ̀. И҆́хже сбытїѐ ви́дѧще, чⷭ҇таѧ, пое́мъ: си́лѣ твое́й сла́ва, влⷣчце."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Вмѣ́стѡ земны́ѧ высоты̀, нбⷭ҇нꙋю дости́глъ є҆сѝ, благоро́дне дими́трїе, и҆ ны́нѣ съ пра́ведными ли̑ки водворѧ́ешисѧ, и҆ пое́ши, и҆ сла́виши бг҃а, є҆мꙋ́же пое́мъ: си́лѣ твое́й сла́ва, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Оу҆дивѝ бг҃ъ всѣ́хъ свои́хъ чꙋдотворе́нїемъ, ꙗ҆́кѡ посла̀ на раба̀ твоего̀ ᲂу҆бі́йцꙋ, нѣ́коего врага̀ и҆ ѿме́тника пра́выѧ на́шеѧ вѣ́ры, наре́кшагосѧ тезоиме́нствомъ твои́мъ, да све́ржетъ ᲂу҆бі́йцꙋ твоего̀ съ престо́ла ца́рска, є҆́же и҆ бы́сть."
|
|
},
|
|
{
|
|
"type": "TEXT",
|
|
"value": "Цр҃ь царе́й и҆ гдⷭ҇ь господе́й, дарова̀ тебѣ̀ вмѣ́стѡ земна́гѡ црⷭ҇тва, нбⷭ҇ное: рабꙋ́ же твоемꙋ̀ и҆ ᲂу҆бі́йцѣ дадѐ здѣ̀ ѕло́е ѿмще́нїе, во ѻ҆́номъ же вѣ́цѣ по лꙋка́вствꙋ сꙋгꙋ̑баѧ мꙋчє́нїѧ, ꙗ҆́коже са́мъ всѧ̑ вѣ́дый вѣ́сть."
|
|
},
|
|
{
|
|
"type": "TEXT",
|
|
"value": "Бг҃оро́диченъ: А҆да́мова дщѝ и҆ внꙋ́ка ты̀ была̀ є҆сѝ, влⷣчце, ѿ негѡ́же ве́сь ро́дъ человѣ́чь произы́де, ты́ же всѣ́хъ живо́тъ породила̀ є҆сѝ хрⷭ҇та̀ бг҃а на́шего: є҆го́же молѝ, да спасе́тъ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ, приведе́нїе и҆́мамы."
|
|
},
|
|
{
|
|
"type": "TEXT",
|
|
"value": "Мꙋ́чениче дими́трїе, ꙗ҆́кѡ ѕвѣзда̀ пресвѣ́тлаѧ въ рѡссі́йстѣй землѝ возсїѧ́лъ є҆сѝ, це́рковь хрⷭ҇то́вꙋ свѣ́томъ бг҃оразꙋ́мїѧ ѡ҆зари́въ: тмꙋ́ же ѿ неѧ̀ ѿгна́въ невѣ́дѣнїѧ, просвѣти́лъ є҆сѝ тꙋ̀ пресла́вныхъ чꙋде́съ ꙗ҆вле́нїемъ."
|
|
},
|
|
{
|
|
"type": "TEXT",
|
|
"value": "И҆мѣ́ѧ къ бг҃ꙋ дерзнове́нїе, бжⷭ҇твенное твоѐ торжество̀, мꙋ́чениче, творѧ́щыѧ, и҆ честно́е твоѐ страда́нїе вѣ́рою чи́стою хва́лѧщыѧ, помина́й, преблаже́нне, и҆ ѿ бꙋ́ри, и҆ бѣ́дъ, и҆ напа́стей, спаса́й."
|
|
},
|
|
{
|
|
"type": "TEXT",
|
|
"value": "Ты̀ ꙗ҆́кѡ крі́нъ благоцвѣтꙋ́щъ, тече́нїемъ кро́ве твоеѧ̀ показа́лсѧ є҆сѝ, бл҃же́нне, и҆ гро́здъ мы́сленный вїногра́да хрⷭ҇то́ва, благово́нїемъ чꙋде́съ мі́ръ ѡ҆благоꙋха́лъ є҆сѝ, вѣ́рою тѧ̀, мꙋ́чениче, сла́вѧщыѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Но́во ꙗ҆́кѡ млⷣнца на́мъ, превѣ́чное сло́во родила̀ є҆сѝ, двѣма̀ во́лема и҆ дѣ́йствы сꙋ́ща сꙋгꙋ́ба, ꙗ҆́кѡ чл҃вѣ́ка, кꙋ́пнѡ же и҆ бг҃а, всенепоро́чнаѧ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ."
|
|
},
|
|
{
|
|
"type": "TEXT",
|
|
"value": "Рожде́нїе твоѐ ѿ ца́рскагѡ ко́рене бы́сть, ᲂу҆бїе́ни же твоѐ ѿ ра́бскагѡ зва́нїѧ слꙋчи́сѧ: ты́ же, страда́льче дими́трїе, си́мъ не повреди́лсѧ є҆сѝ, но и҆ па́че ѿ земна́гѡ ца́рствїѧ въ нбⷭ҇ное пресели́лсѧ є҆сѝ."
|
|
},
|
|
{
|
|
"type": "TEXT",
|
|
"value": "Є҆́й вои́стиннꙋ рече́сѧ, ꙗ҆́кѡ пра́ведникъ и҆ по сме́рти жи́въ бꙋ́детъ: та́кожде и҆ ты̀, непови́нный страда́льче дими́трїе, и҆ по сме́рти твое́й жи́въ и҆ црⷭ҇твꙋеши со всѣ́ми ст҃ы́ми во црⷭ҇твїи нбⷭ҇нѣмъ."
|
|
},
|
|
{
|
|
"type": "TEXT",
|
|
"value": "Ве́лїѧ ра́дость сотвори́сѧ по все́й рѡссі́йстѣй землѝ, ꙗ҆́кѡ бг҃ъ моли́твами твои́ми погꙋбѝ всѧ̑ врагѝ, и҆ навѣ́тники человѣ́ки, смꙋща́ющыѧ держа́вꙋ срѡ́дникъ твои́хъ, ѡ҆ ни́хже ны́нѣ мо́лишисѧ, дарова́ти и҆̀мъ ве́лїю ми́лость."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆зъ тебє̀ бг҃ъ произы́де и҆ спасе́нїе дарова̀ всемꙋ̀ ро́дꙋ человѣ́чꙋ. Тѣ́мже и҆ а҆́зъ, недосто́йный ра́бъ тво́й, молю́тисѧ, пречⷭ҇таѧ: спасе́нїе мѝ да́рꙋй, ꙗ҆́кѡ да пою́ тѧ и҆ велича́ю, дв҃о всепѣ́таѧ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
|
|
},
|
|
{
|
|
"type": "TEXT",
|
|
"value": "Разже́гсѧ за́вистїю ра́бъ ᲂу҆бі́йца, побѣди́сѧ властолю́бїемъ и҆ къ за́висти ᲂу҆бі́йство приплетѐ, закла́ тѧ, ꙗ҆́кѡ а҆́гнца непоро́чна, мꙋ́чениче, ѿмще́нїѧ же пра́веднагѡ не ᲂу҆бѣжа̀."
|
|
},
|
|
{
|
|
"type": "TEXT",
|
|
"value": "И҆́стиннꙋю ча́шꙋ ѿ твои́хъ крове́й страда́льческихъ поче́рплъ є҆сѝ, прехва́льне мꙋ́чениче, и҆ сїю̀ всегда̀ предлага́еши це́ркви, и҆ пита́еши твои́ми чꙋдесы̀, дими́трїе, вопїю́щыѧ хрⷭ҇тꙋ̀: ѿ тлѝ, бж҃е, и҆зба́ви на́съ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ пречестна̀ же́ртва та́йнѣй трапе́зѣ принесе́нъ бы́въ заколе́нїемъ, мꙋ́чениче, въ нбⷭ҇ныхъ ѻ҆би́телехъ пресла́внѡ водворѧ́ешисѧ, зрѧ̀ сла́вꙋ бж҃їю, и҆ прїе́млѧ болѣ́зней твои́хъ по́чєсти и҆ страда̑нїѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: На тѧ̀ соше́дши роса̀ нбⷭ҇наѧ, и҆ ѡ҆лѧденѣ́вшꙋю зе́млю, приснодв҃о, бг҃оразꙋ́мїѧ вода́ми напои́вши, многопло́днꙋ ꙗ҆вѝ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ, ꙗ҆́кѡ петро́ви, ѽ ᲂу҆пра́вителю, и҆ спасѝ."
|
|
},
|
|
{
|
|
"type": "TEXT",
|
|
"value": "Чꙋ́дно па́ки, и҆ ди́вно ви́дѣти, ꙗ҆́кѡ ра́бъ тво́й и҆ ᲂу҆бі́йца, сѣдѧ̀ на престо́лѣ ѻ҆те́чєствїѧ твоегѡ̀, и҆ слы́ша и҆здале́ча благоро́дное твоѐ и҆́мѧ, боѧ́знїю ѡ҆бдержа́сѧ, и҆ сме́ртїю сконча́сѧ, ты́ же при́снѡ живе́ши въ црⷭ҇твїи нбⷭ҇нѣмъ."
|
|
},
|
|
{
|
|
"type": "TEXT",
|
|
"value": "А҆́ще и҆ во є҆ди́номъ часѣ̀, лю́тꙋю сїю̀ сме́рть претерпѣ́лъ є҆сѝ, страда́льче дими́трїе, но со многострада́вшими мꙋ́ченики вѣ́чный живо́тъ приѡбрѣ́лъ є҆сѝ. И҆ ны́нѣ съ ни́ми наслажда́ешисѧ ра́йскїѧ красоты̀ и҆ весе́лїѧ."
|
|
},
|
|
{
|
|
"type": "TEXT",
|
|
"value": "Ди́вство ве́лїе показа̀ бг҃ъ тобо́ю, ка́кѡ по толи́цѣхъ лѣ́тѣхъ, вопїю́щи непови́ннаѧ кро́вь твоѧ̀, а҆́ки а҆́велева на ка́їна, на раба̀ твоего̀ и҆ ᲂу҆бі́йцꙋ, и҆́же и҆ ца́рь бы́сть, и҆ прише́дши ѕлѣ̀ погꙋбѝ є҆го̀ ты́ же при́снѡ ра́дꙋешисѧ, пребыва́ѧ ᲂу҆ хрⷭ҇та̀ цр҃ѧ̀ и҆ бг҃а всѣ́хъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆зъ ко́рене і҆ессе́ева прозѧбла̀ є҆сѝ, влⷣчце, и҆ ко́рень породила̀ є҆сѝ всѣ́хъ цр҃ѧ̀ хрⷭ҇та̀ бг҃а на́шего, ѿ негѡ́же всѝ спасе́нїе полꙋча́емъ. Тѣ́мъ непреста́ннѡ молѝ є҆го̀, дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃:"
|
|
},
|
|
{
|
|
"type": "TEXT",
|
|
"value": "Возсїѧ̀ дне́сь въ сла́внѣй па́мѧти твое́й, вѣ̑рнымъ весе́лїе, ꙗ҆́кѡ бо доброра́сленный гре́знъ прозѧ́блъ є҆сѝ, и҆ хрⷭ҇тꙋ̀ красе́нъ пло́дъ прине́слъ є҆сѝ себѐ. Тѣ́мже и҆ по ᲂу҆бїе́нїи твое́мъ соблюдѐ тѣ́ло твоѐ нетлѣ́но, страда́льчески ѡ҆багре́ное кро́вїю. Благоро́дне свѧ́те дими́трїе, соблюда́й ѻ҆те́чество твоѐ, и҆ гра́дъ тво́й невреди́мь: томꙋ́ бо є҆сѝ ᲂу҆твержде́нїе."
|
|
},
|
|
{
|
|
"type": "TEXT",
|
|
"value": "І҆́косъ: Ꙗ҆́кѡ а҆́гнецъ непоро́ченъ кро́вь твою̀ и҆злїѧ́лъ є҆сѝ, бг҃омꙋ́дре дими́трїе, и҆ ѿ благода́телѧ всѣ́хъ бг҃а чꙋде́съ да́ръ прїѧ́лъ є҆сѝ, и҆ вмѣ́стѡ тлѣ́ннагѡ ѡ҆брѣ́лъ є҆сѝ бога́тство нетлѣ́нное: предстои́ши бо престо́лꙋ сла́вы всѣ́хъ цр҃ѧ̀. Є҆мꙋ́же ѡ҆ на́съ, мꙋ́чениче, моли́сѧ, да твои́ми моли́твами ѿ бѣ́дъ свободи́вшесѧ, ра́достнѡ возопїе́мъ глаго́люще: ра́дꙋйсѧ, вѣ́рныхъ прави́телю: ра́дꙋйсѧ, вѣ́ры тве́рдое забра́ло: ра́дꙋйсѧ, чꙋ́до чꙋде́съ пресла́вное, и҆ приста́нище ти́хое притека́ющихъ къ тебѣ̀: ра́дꙋйсѧ, ко́реню вѣ́ры, и҆ моле́бниче ѡ҆ молѧ́щихтисѧ: ра́дꙋйсѧ, ѻ҆те́чествꙋ твоемꙋ̀ похвала̀, и҆ во́инствꙋ на́шемꙋ на врагѝ побо́рникъ, сохранѧ́ѧй гра́дъ тво́й невреди́мь: томꙋ́ бо є҆сѝ ᲂу҆твержде́нїе."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ."
|
|
},
|
|
{
|
|
"type": "TEXT",
|
|
"value": "Собла̑знъ лꙋка́вагѡ раба̀, и҆ тогѡ̀ хи́тростей превы́ше, ꙗ҆́кѡ побѣди́тель и҆зрѧ́денъ, мꙋ́чениче, бы́въ, просла́вилсѧ є҆сѝ зовы́й: бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Лꙋча́ми ꙗ҆́кѡ ѕвѣзда̀, собо́рнꙋю цр҃ковь чꙋдесы̀ просвѣти́лъ є҆сѝ, вѣ́рою же притека́ющымъ къ ра́цѣ моще́й твои́хъ и҆сцѣле́нїе неѡскꙋ́днѡ подае́ши, преблаже́нне, и҆ зовꙋ́щымъ: бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "А҆́ки а҆́гнецъ непоро́ченъ и҆ кади́ло благопрїѧ́тно, а҆́гнцꙋ и҆́стинномꙋ и҆ па́стырю, мꙋ́чениче, прине́слсѧ є҆сѝ въ приноше́нїе всебога́тно, и҆ прїѧ́тно всесожже́нїе, є҆мꙋ́же пое́мъ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Невеще́ственнагѡ свѣ́та вселе́нїе твоѐ чре́во бы́сть, свѣтлостьмѝ бжⷭ҇твеннагѡ ра́зꙋма безбо́жїе ѿгна́вшагѡ, пречⷭ҇таѧ бг҃оневѣ́сто ѻ҆трокови́це. Є҆мꙋ́же пое́мъ взыва́юще: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Мнѡ́ги кѡ́зни ᲂу҆мышлѧ́ше на тѧ̀ ра́бъ тво́й и҆ ᲂу҆бі́йца, да преда́стъ тѧ̀ непови́ннѣй и҆ лю́тѣй сме́рти, ꙗ҆́коже и҆ бы́сть: по́слѣжде же са́мъ живота̀ своегѡ̀ гонза́етъ, и҆ ца́рства ѿбыва́етъ, ты́ же, страда́льче, во вѣ́ки ца́рствꙋеши."
|
|
},
|
|
{
|
|
"type": "TEXT",
|
|
"value": "И҆зъ чре́ва ма́тернѧ и҆зы́де, и҆ не во мно́зѣ вре́мени настоѧ́щее сѐ житїѐ ви́дѣ, и҆ лю́тою и҆ непови́нною сме́ртїю ѿ ѻ҆́нагѡ раба̀ своегѡ̀ и҆ ᲂу҆бі́йцы ко гдⷭ҇ꙋ ѿи́де, и҆ въ кро́вы нбⷭ҇ныѧ всели́сѧ."
|
|
},
|
|
{
|
|
"type": "TEXT",
|
|
"value": "Тече́тъ сла́ва а҆́ки рѣка̀ въ рѡссі́йстѣй землѝ, повѣ́дающи и҆ непови́ннꙋю сме́рть твою̀: ка́кѡ повелѣ́нїемъ ѻ҆́нагѡ раба̀ твоегѡ̀, таково́ю сме́ртїю вѣ́чный живо́тъ себѣ̀ полꙋчи́лъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ро́дъ земны́хъ по достоѧ́нїю воспѣ́ти тѧ̀ не мо́жетъ, влⷣчце: а҆́зъ же ѻ҆каѧ́нный и҆ скве́рный ка́кѡ могꙋ̀ простре́ти недосто́йнїи ᲂу҆стнѣ̀ моѝ, и҆ воспѣ́ти тѧ̀, дв҃о всепѣ́таѧ;"
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Вше́дъ, мꙋ́чениче, въ нбⷭ҇нагѡ крꙋ́га течє́нїѧ, на добродѣ́тельный воздꙋ́хъ, страда́ньми препоѧ́санъ, крⷭ҇тъ за ски́петръ въ деснꙋ́ю рꙋ́кꙋ и҆мѣ́ѧ, сцрⷭ҇твовати хрⷭ҇тꙋ̀ сподо́билсѧ є҆сѝ, дими́трїе царе́виче. Молѝ, спасти́сѧ на́мъ, пою́щымъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Оу҆кра́шенъ ра́зꙋмомъ, кра́сномꙋ влⷣцѣ предстои́ши свѣ́телъ при́снѡ, ꙗ҆́кѡ побѣдоно́сецъ бг҃опрїѧ́тенъ, ᲂу҆кротѝ моли́твами твои́ми ва̑рварскаѧ нахождє́нїѧ, и҆ низложѝ мꙋ́чащее на́съ и҆скꙋше́нїе, согнѣта́ющее ѕло́мъ во глꙋбинꙋ̀ поги́бели, страстоте́рпче дими́трїе, пою́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Пречестна́ѧ па́мѧть, ѡ҆свѧща́ющи мі́ръ, приспѣ̀, всехва́льне страстоно́сче, въ ню́же мо́лимсѧ, полꙋчи́ти тобо́ю застꙋпле́нїе, дими́трїе, пою́щымъ сла́вꙋ блага́гѡ ᲂу҆го́дника: бл҃гослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Свѧще́нныхъ прⷪ҇рѡ́къ честны́й ли́къ тѧ̀ прописꙋ́етъ кївѡ́тъ и҆ несѣко́мꙋю го́рꙋ, же́злъ и҆ две́рь, є҆́юже ꙗ҆́кѡ вѣ́сть про́йде вы́шнїй, и҆ па́ки затворе́нꙋ ѡ҆ста́ви тѧ̀ дв҃ꙋ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "И҆зъ ѻ҆тца̀ благочести́ва царѧ̀ благода́ти тезоиме́нна, ма́тере же цари́цы госпожѝ нарече́нныѧ, произше́лъ є҆сѝ, благоро́дне дими́трїе, и҆ самагѡ̀ ма́тере градовѡ́мъ, го́рнѧгѡ і҆ерⷭ҇ли́ма дости́глъ є҆сѝ. Тогѡ̀ ра́ди мо́лимъ тѧ̀, не преста́й моли́ти ѡ҆ дꙋша́хъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ а҆́гнецъ неѕло́бивъ, ничи́мже проти́висѧ рабꙋ̀ твоемꙋ̀ и҆ ᲂу҆бі́йцѣ: ѻ҆́нъ же за́вистїю дїа́волею ꙗ҆́тъ бы́сть, и҆ предаде́ тѧ непови́ннѣй сме́рти, тогѡ̀ ра́ди живота̀ своегѡ̀ ѕлѣ̀ гонза́етъ: ты́ же при́снѡ пребыва́еши во ца́рствїи нбⷭ҇нѣмъ."
|
|
},
|
|
{
|
|
"type": "TEXT",
|
|
"value": "Ꙗ҆ви́сѧ пе́рвый вра́гъ въ рѡссі́йстѣй землѝ по сме́рти твое́й, и҆́же пре́жде носѧ́й на себѣ̀ ѻ҆́бразъ и҆́ноческъ, послѣди́ же све́рже є҆го̀ съ себѐ, и҆ возложѝ на сѧ̀ тезоимени́тство твоѐ, и҆ бы́сть ца́рь: бг҃ъ же моли́твъ ра́ди твои́хъ до конца̀ сего̀ погꙋбѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆́стиннаѧ є҆сѝ мт҃и нбⷭ҇нагѡ цр҃ѧ̀ и҆ бг҃а всѣ́хъ, влⷣчце: тобо́ю ве́сь ро́дъ человѣ́чь ѡ҆бнови́сѧ, и҆ ѿ дре́внїѧ клѧ́твы свободи́сѧ. Тѣ́мже и҆ а҆́зъ недосто́йный молю́тисѧ: свободѝ и҆ менѐ непотре́бнаго раба̀ твоего̀ ѿ содержа́щагѡ грѣха̀ моегѡ̀."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
|
|
},
|
|
{
|
|
"type": "TEXT",
|
|
"value": "Ѡ҆брѣ́лъ є҆сѝ ѿ хрⷭ҇та̀ возме́здїе, мꙋ́дре мꙋ́чениче, пра́вды вѣне́цъ прїи́мъ, и҆ ра́дость неконча́емꙋю: и҆ нбⷭ҇нагѡ селе́нїѧ во дво́рѣхъ пребыва́ѧ, держа́вꙋ ѻ҆те́чества твоегѡ̀ помина́й, мꙋ́чениче дими́трїе."
|
|
},
|
|
{
|
|
"type": "TEXT",
|
|
"value": "Є҆гда̀ принесе́ни бы́ша честны̑ѧ твоѧ̑ мо́щи, страстоте́рпче дими́трїе, тогда̀ ст҃и́тели ѡ҆бстоѧ́ще ѻ҆́дръ, ца́рь же и҆ кнѧ́зи, и҆ всѝ рѡссі́йстїи наро́ди, воскли́кнꙋша кꙋ́пнѡ па́мѧть вѣ́чнꙋю, хрⷭ҇та̀ велича́юще."
|
|
},
|
|
{
|
|
"type": "TEXT",
|
|
"value": "Мꙋ́чєникъ дне́сь сосло́вїе, ст҃ы́хъ и҆ пра́ведныхъ дꙋ́шы, ꙗ҆́кѡ побѣдоно́сца тѧ̀ и҆ слико́вника прїѧ́ша, мꙋ́чениче дими́трїе: съ ни́миже пое́ши, ра́дꙋѧсѧ, бг҃а въ трⷪ҇цѣ, спаса́ющаго дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Разꙋмѣ́вше и҆здале́ча прозорли́выма ѻ҆чи́ма прⷪ҇ро́цы, тѧ̀ ꙗ҆́вѣ провозвѣсти́ша, хотѧ́щꙋю мт҃рь бы́ти вседѣ́телю и҆ всѣ́хъ влⷣцѣ. Тѣ́мъ тѧ̀ пое́мъ, всепѣ́таѧ бцⷣе, и҆ и҆сповѣ́дꙋемъ ꙗ҆́кѡ вои́стиннꙋ сꙋ́щꙋю бцⷣꙋ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ."
|
|
},
|
|
{
|
|
"type": "TEXT",
|
|
"value": "Тезоимени́тъ є҆сѝ, страда́льче, дре́внемꙋ великомꙋ́ченикꙋ дими́трїю селꙋ́нскомꙋ: є҆гѡ́же ᲂу҆́бѡ моли́твами сла́вный мꙋ́ченикъ не́сторъ лі́а ᲂу҆бѝ, ты́ же и҆́менемъ твои́мъ раба̀ твоего̀ и҆ ᲂу҆бі́йцꙋ ѕлѣ̀ погꙋби́лъ є҆сѝ."
|
|
},
|
|
{
|
|
"type": "TEXT",
|
|
"value": "А҆́ще а҆́ки кла́съ незрѣ́лъ и҆ пожа́лсѧ є҆сѝ тѣле́снѣ, благовѣ́рне царе́виче дими́трїе, но благоро́дною твое́ю дꙋше́ю невреди́мь пре́былъ є҆сѝ: и҆ ны́нѣ пребыва́еши въ нбⷭ҇ныхъ селе́нїихъ ра́дꙋѧсѧ, и҆ весели́шисѧ, поѧ̀ и҆ славосло́вѧ гдⷭ҇а."
|
|
},
|
|
{
|
|
"type": "TEXT",
|
|
"value": "Во ѻ҆смолѣ́тномъ во́зрастѣ ко гдⷭ҇ꙋ ѿше́дъ, и҆ со многомꙋ́чившимисѧ мꙋ́ченики въ ра́дость и҆ весе́лїе вше́дъ, ра́дꙋешисѧ съ ни́ми, и҆ весели́шисѧ ᲂу҆ хрⷭ҇та̀ и҆ бг҃а всѣ́хъ: є҆го́же поѧ̀, моли́сѧ ѡ҆ на́съ."
|
|
},
|
|
{
|
|
"type": "TEXT",
|
|
"value": "А҆́ще и҆ не во мно́зѣмъ вре́мени пострада́лъ є҆сѝ, но во є҆ди́номъ часѣ̀, сїю̀ лю́тꙋю и҆ непови́ннꙋю сме́рть претерпѣ́лъ є҆сѝ, страда́льче дими́трїе: сегѡ̀ ра́ди введѐ бг҃ъ тѧ̀ въ вѣ́чное весе́лїе и҆ неконча́емꙋю ра́дость."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Соприсносꙋ́щное сло́во ѻ҆ц҃ꙋ̀ и҆ дх҃ꙋ, во чре́вѣ твое́мъ заче́нши, и҆ безъ сѣ́мене поро́ждши, мт҃и дв҃о чⷭ҇таѧ, ѿ негѡ́же вѣ́рнїи спасе́нїе и҆ просвѣще́нїе прїе́млемъ дꙋша́мъ и҆ тѣ́лѡмъ на́шымъ: того̀ молѝ, да спасе́тъ дꙋ́шы на́шѧ, ꙗ҆́кѡ бл҃гъ и҆ чл҃вѣколю́бецъ."
|
|
},
|
|
{
|
|
"type": "TEXT",
|
|
"value": "Свѣти́ленъ: Ꙗ҆́кѡ цвѣ́тъ краснѣ́йшїй ѿ ца́рска прозѧ́блъ є҆сѝ ко́рене, прекра́сне дими́трїе, и҆ ѡ҆багре́нїемъ страда́нїѧ твоегѡ̀, ꙗ҆́кѡ ца́рскою порфѵ́рою, ѡ҆багри́лсѧ є҆сѝ кро́вїю. Тѣ́мъ всечестнꙋ́ю твою̀ па́мѧть любо́вїю творѧ́щыѧ ѿ бѣ́дъ спаса́й. Два́жды."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Стоѧ́ще ѻ҆́крестъ тебє̀ дѣ́вы бг҃омꙋ̑дрыѧ, бг҃ороди́тельнице марі́е, ꙗ҆́коже царе́вы дще́ре, сн҃ꙋ твоемꙋ̀ приведо́шасѧ невѣстолѣ́пнѡ, пречⷭ҇таѧ, ꙗ҆́кѡ цр҃ю̀ всѧ́ческихъ: є҆го́же, мт҃и дв҃о ѻ҆трокови́це, ѡ҆ на́съ молѝ."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры на д҃, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Да́лъ є҆сѝ зна́менїе:"
|
|
},
|
|
{
|
|
"type": "TEXT",
|
|
"value": "Да́лъ є҆сѝ зна́менїе цр҃кви твое́й, гдⷭ҇и, новоѧвле́ннаго чꙋдотво́рца, благовѣ́рнаго царе́вича дими́трїа, непови́ннѡ пострада́вшаго, и҆ кро́вь свою̀ ꙗ҆́кѡ во́дꙋ пролїѧ́вшаго: тебе́ бо всѣ́ми владꙋ́щаго возлюби́въ чи́стымъ се́рдцемъ, дꙋше́ю сокрꙋше́нною бы́сть побо́рникъ вѣ́ры, и҆ и҆сто́чникъ чꙋде́съ, потопѝ бѣсѡ́вскаѧ ѡ҆полчє́нїѧ. Два́жды."
|
|
},
|
|
{
|
|
"type": "TEXT",
|
|
"value": "Ѿ ко́рене и҆зра́слъ є҆сѝ благочести́вагѡ, розга̀ благовѣ́рнаѧ, дими́трїе, и҆зъ младе́нства крⷭ҇тъ, ꙗ҆́кѡ ѻ҆рꙋ́жїе на ра́мо твоѐ взе́мъ, вѣ́рꙋ ꙗ҆́кѡ щи́тъ, наде́ждꙋ ꙗ҆́кѡ бронѧ̀, кро́тость и҆ неѕло́бїе ꙗ҆́кѡ ѻ҆ско́рдъ, побѣжда́ющыѧ врагѝ, и҆ бѣсѡ́вскаѧ ѡ҆полчє́нїѧ, и҆ тѣ́хъ прило́ги: сегѡ̀ ра́ди ликꙋ́ѧ со а҆́гг҃лы, непреста́ннѡ молѝ ѡ҆ дꙋша́хъ на́шихъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ ѕвѣзда̀ пресвѣ́тлаѧ, просвѣща́ющи дꙋ́шы вѣ́рныхъ чꙋде́сными сїѧ̑нїи, страстоно́сче гдⷭ҇ень, благовѣ́рный дими́трїе, мра́къ страсте́й и҆ болѣ́зней на́шихъ ѿгонѧ́еши: здра́вїе же всѣ̑мъ да́рꙋеши, любе́знѡ цѣлꙋ́ющымъ многострада̑льнаѧ твоѧ̑ мо́щи, моли́твенниче ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Прїиди́те дне́сь, собо́ри рѡссі́йстїи, и҆ ви́дите неѕло́биваго а҆́гнца, закла́ннаго непови́ннѡ, побѣдоно́сца дими́трїа. Тѣ́ломъ ᲂу҆́бѡ во гро́бѣ погребе́нъ бы́сть ꙗ҆́кѡ ме́ртвъ: дꙋше́ю же на нб҃сѣ́хъ со а҆́гг҃лы и҆ съ мꙋ́ченики ликовствꙋ́етъ ꙗ҆́кѡ жи́въ, ꙗ҆́коже свидѣ́тельствꙋютъ и҆ бг҃одарова̑ннаѧ є҆гѡ̀ чꙋдеса̀. Є҆мꙋ́же пою́ще возопїе́мъ: страстоно́сче хрⷭ҇то́въ дими́трїе, смоле́бники прїи́мъ а҆́гг҃льскїѧ ли́ки и҆ мꙋ́ченики, моли́сѧ прест҃ѣ́й трⷪ҇цѣ, вѣ́рнѡ чтꙋ́щемꙋ тѧ̀ наро́дꙋ здра́вїе дарова́ти, и҆ на врагѝ ѡ҆долѣ́нїе, и҆ спастѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На лїтꙋргі́и слꙋ́жба мꙋ́ченическаѧ."
|
|
}
|
|
] |