542 lines
48 KiB
JSON
542 lines
48 KiB
JSON
[
|
|
{
|
|
"type": "HEADER",
|
|
"value": "Ма́їа ѳ҃і"
|
|
},
|
|
{
|
|
"type": "HEADER",
|
|
"value": "Прпⷣбнагѡ ѻ҆ц҃а̀ на́шегѡ корни́лїа, коме́льскагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "На ма́лѣй вече́рни стїхи̑ры, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е корни́лїе, ты̀ и҆́го хрⷭ҇то́во на ра́мо взе́мъ, до́блественнѣ наше́ствїе ва̑рваръ попра́лъ є҆сѝ, и҆ пꙋсты́ню гра́дъ показа́лъ є҆сѝ. Сегѡ̀ ра́ди тѧ̀ всѝ вѣ́рою почита́юще про́симъ: ѽ преблаже́нне, мона́шествꙋющихъ похвало̀, хрⷭ҇та̀ непреста́ннѡ молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Вѣ́рою соше́дшесѧ всѝ, ꙗ҆́кѡ по́стника хрⷭ҇то́ва тѧ̀ почита́емъ, корни́лїе: ра́дꙋѧсѧ бо ше́ствовавъ въ пꙋсты́ни непроходи́мѣй, мꙋ́дре, наста́вникъ бы́лъ є҆сѝ че́стенъ. Тѣ́мже тебѣ̀ мы̀ вѣ́рою взыва́емъ: ѽ всеблаже́нне, по́стникѡвъ похвало̀, ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е корни́лїе, бꙋ́дꙋщїѧ ра́ди жи́зни въ верте́пъ разбо́йничь всели́лсѧ є҆сѝ, ника́коже боѧ́сѧ неви́димыхъ вра̑гъ, а҆́ще и҆ мнѡ́ги скѡ́рби творѧ́хꙋ, приходѧ́ще къ тебѣ̀: ты́ же моли́твами твои́ми си́хъ безъ вѣ́сти твори́лъ є҆сѝ, ѽ терпѣли́вый дꙋше́ю, пꙋсты́нный жи́телю. Тѣ́мже тѧ̀ вѣ́рою всѝ почита́емъ и҆ ᲂу҆блажа́емъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Спасе́нїѧ и҆щѧ̀ ѿвсю́дꙋ, блаже́нне корни́лїе, во́льное стра́нство гдⷭ҇а ра́ди прїѧ́лъ є҆сѝ: трꙋды̀ мнѡ́гїѧ и҆ жа́ждꙋ, и҆ гла́дъ, стꙋ́день же и҆ зно́й хрⷭ҇та̀ ра́ди претерпѣ́лъ є҆сѝ. Тѣ́мже и҆ слы́шиши: благі́й ра́бе вѣ́рный, вни́ди въ ра́дость гдⷭ҇а твоегѡ̀. Сегѡ́ же гла́са и҆ на́мъ ᲂу҆слы́шати мо́лимсѧ: да всегда̀ па́мѧть твою̀ любо́вїю ᲂу҆блажа́емъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "Ле́сти лꙋка́выхъ бѣсѡ́въ и҆з̾ѡбличи́въ крⷭ҇тною си́лою, ᲂу҆ѧсни́лъ є҆сѝ сла́вꙋ хрⷭ҇то́вꙋ, ѻ҆́ч҃е корни́лїе."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Взѧ́тсѧ ꙗ҆́коже и҆лїа̀ на колесни́цѣ ѻ҆́гненнѣй, смѣси́лсѧ є҆сѝ, блаже́нне нехода́тайственнѣ трⷪ҇цѣ, корни́лїе прекра́сне."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Носѧ̀ на рꙋкꙋ̀ твоє́ю, ѻ҆́ч҃е, крⷭ҇тъ гдⷭ҇ень, бѣсѡ́вскаѧ мечта̑нїѧ до конца̀, корни́лїе, потреби́лъ є҆сѝ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Вы́ше тѧ̀ ли́цы, бцⷣе дв҃о, пою́тъ съ ни́жними, сла́вѧще непреста́ннѡ ржⷭ҇тво̀ твоѐ пречⷭ҇тое."
|
|
},
|
|
{
|
|
"type": "HEADER",
|
|
"value": "На вели́цѣй вече́рни, Блаже́нъ мꙋ́жъ: На Гдⷭ҇и, воззва́хъ, поста́вимъ стїхѡ́въ и҃: пра́здника на д҃: и҆ преподо́бнагѡ на д҃."
|
|
},
|
|
{
|
|
"type": "HEADER",
|
|
"value": "Стїхи̑ры прпⷣбнагѡ корни́лїа, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Ѻ҆́ч҃е корни́лїе преподо́бне, впери́въ ᲂу҆́мъ къ бг҃ꙋ вѣ́рою, мїрска́гѡ смѣше́нїѧ возгнꙋша́всѧ неꙋста́внагѡ, и҆ крⷭ҇тъ тво́й воспрїе́мь, всеви́дцꙋ послѣ́довалъ є҆сѝ, тѣ́ло непокори́вое пѡ́двиги воздержа́нїѧ, по́мысла си́лою порабо́тивъ бжⷭ҇твенномꙋ дх҃ꙋ."
|
|
},
|
|
{
|
|
"type": "TEXT",
|
|
"value": "Ѻ҆́ч҃е преподо́бне корни́лїе, сле́зными и҆сто́чники дꙋ́шꙋ твою̀ ѡ҆чища́ѧ, и҆ всено́щными стоѧ̑нїи бг҃а молѧ̀, впери́лсѧ є҆сѝ къ любвѝ сегѡ̀ блаже́нныѧ красоты̀, є҆ѧ́же досто́йнѡ ны́нѣ наслажда́ешисѧ непреста́ннѡ и҆ ра́достнѡ, съ пострада́вшими съ тобо́ю, бг҃омꙋ́дре и҆ преподо́бне."
|
|
},
|
|
{
|
|
"type": "TEXT",
|
|
"value": "Преподо́бне ѻ҆́ч҃е премꙋ́дре корни́лїе, болѧ́щымъ ты̀ ꙗ҆ви́лсѧ є҆сѝ и҆сцѣле́нїе, и҆ хрѡмы́мъ хожде́нїе ми́лостивнѡ сотворѧ́еши, и҆ всѣ̑мъ притека́ющымъ съ вѣ́рою къ цѣльбоно́сномꙋ твоемꙋ̀ гро́бꙋ, просѧ́щымъ по́мощи и҆ застꙋпле́нїѧ, моли́твами твои́ми и҆сцѣле́нїе недꙋ́гѡвъ неѡскꙋ́днѡ подае́ши."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Є҆́же по ѻ҆́бразꙋ соблю́дъ невреди́мѡ, ᲂу҆́мъ влⷣкꙋ на стра̑сти па̑гꙋбныѧ по́стнически поста́вивъ, во є҆́же по подо́бїю ꙗ҆́кѡ мо́щнѡ возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. Тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́тели и҆звѣ́стнѣйшее. И҆ ны́нѣ на нб҃сѣ́хъ зерца́лѡмъ разрѣ́шшымсѧ, ѻ҆́ч҃е на́шъ корни́лїе, чи́стѣ зри́ши ст҃ꙋ́ю трⷪ҇цꙋ, молѧ́сѧ несре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. Чтє́нїѧ трѝ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ є҃.)"
|
|
},
|
|
{
|
|
"type": "TEXT",
|
|
"value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе, сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть: Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ в҃, самогла̑сны:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, и҆змла́да въ добродѣ́тели прилѣ́жнѡ ѡ҆бꙋчи́всѧ, ѻ҆рга́нъ бы́лъ є҆сѝ ст҃а́гѡ дх҃а, и҆ ѿ негѡ̀ прїе́мъ чꙋде́съ дѣ́йство, наꙋчи́лъ є҆сѝ человѣ́ки преѡби́дѣти сла̑дкаѧ: ны́нѣ же бжⷭ҇твеннымъ свѣ́томъ чистѣ́йше ѡ҆сїѧва́емь, просвѣтѝ и҆ на́шѧ мы̑сли, корни́лїе ѻ҆́ч҃е на́шъ."
|
|
},
|
|
{
|
|
"type": "TEXT",
|
|
"value": "На землѝ а҆́гг҃ла, и҆ на нб҃сѣ́хъ человѣ́ка бж҃їѧ, мі́рови благоꙋкраше́нїе, наслажде́нїе благи́хъ добродѣ́телей, по́стникѡвъ похвалꙋ̀, корни́лїа почти́мъ: насажде́нъ бо въ домꙋ̀ бж҃їи ꙗ҆́кѡ крі́нъ, и҆ процвѣтѐ пра́веднѡ ꙗ҆́кѡ ке́дръ въ пꙋсты́ни, ᲂу҆мно́жи ста́до хрⷭ҇то́во слове́сныхъ ѻ҆ве́цъ преподо́бїемъ и҆ пра́вдою."
|
|
},
|
|
{
|
|
"type": "HEADER",
|
|
"value": "Сла́ва, гла́съ в҃:"
|
|
},
|
|
{
|
|
"type": "TEXT",
|
|
"value": "Пꙋсты́нѧ, ꙗ҆́же пре́жде разбо́йничєскаѧ жили̑ща и҆мѧ́ше, ны́нѣ, корни́лїе, ᲂу҆чєни́къ твои́хъ мно́жествомъ и҆спо́лнена ᲂу҆краша́етсѧ: хра́мъ бо пречⷭ҇тенъ бж҃їѧ мт҃ре воздви́глъ є҆сѝ, разли́чными добро́тами ᲂу҆кра́шенъ. Тѣ́мже въ не́мъ дне́сь соше́дшесѧ, и҆ честны́й гро́бъ тво́й ѡ҆бстоѧ́ше любе́знѡ, покланѧ́ющесѧ и҆ глаго́люще мо́лимсѧ: це́рквамъ є҆диномышле́нїе да́рꙋѧ, правосла́вномꙋ наро́дꙋ на́шемꙋ на врагѝ спосо́бствꙋй моли́твами твои́ми, и҆ на́мъ и҆спросѝ ми́ръ, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Зва́нный свы́ше:"
|
|
},
|
|
{
|
|
"type": "TEXT",
|
|
"value": "Є҆гда̀ бжⷭ҇твенное тѧ̀ жела́нїе распалѝ, прпⷣбне, тогда̀ всѐ плотско́е мꙋдрова́нїе дꙋ́хꙋ повинꙋ́лъ є҆сѝ, поще́нїѧ страда́ньми ᲂу҆тверди́всѧ: и҆ ꙗ҆́кѡ зла́то въ горни́лѣ и҆скꙋше́но сїѐ ꙗ҆ви́всѧ, прїѧ́телище бы́лъ є҆сѝ прест҃а́гѡ дх҃а собра́въ мона́шествꙋющихъ мно́жєства, ᲂу҆че́ньми твои́ми тѣ́хъ, ꙗ҆́кѡ нѣ́коею восхо́дною лѣ́ствицею, на высотꙋ̀ добродѣ́тели возводи́лъ є҆сѝ: тѣ́мже хрⷭ҇та̀ молѝ спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Возсїѧ̀ дне́сь пресвѣ́тлаѧ и҆ всепра́зднственнаѧ па́мѧть твоѧ̀, пресла́вне корни́лїе, созыва́ющи многочи́сленное пѡ́стникъ сосло́вїе, и҆ преподо́бныхъ ликостоѧ́нїе, а҆́гг҃лы же съ человѣ́ки, ꙗ҆́кѡ вои́стиннꙋ къ похвале́нїю, въ трⷪ҇цѣ пѣва́емагѡ хрⷭ҇та̀ бг҃а на́шегѡ: є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Бг҃оно́се и҆ пребл҃же́нне ѻ҆́ч҃е корни́лїе, ты̀ прⷪ҇ро́чески слеза́ми зе́млю ѡ҆мака́въ, не да́лъ є҆сѝ сна̀ твои́ма ѻ҆чи́ма, ни вѣ́ждома дрема́нїѧ, серде́чное жела́нїе ко хрⷭ҇тꙋ̀ ꙗ҆влѧ́ѧ, є҆го́же и҆змла́да возлюби́лъ є҆сѝ, всѧ́кїѧ добродѣ́тели ви́дъ и҆спра́вль. Тѣ́мже тѧ̀ ᲂу҆блажа́емъ, хрⷭ҇та̀ велича́юще, тебѐ просла́вльшаго: є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ корни́лїе: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, преподо́бныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Ѿ ю҆́ности горѧ́щимъ жела́нїемъ бжⷭ҇твенныѧ любвѐ разжига́емь, житє́йскїѧ молвы̑ ѡ҆ста́вилъ є҆сѝ, преподо́бне, ревни́тель а҆нтѡ́нїю вели́комꙋ бы́въ, безмо́лвїемъ и҆ жесто́кимъ пребыва́нїемъ послѣ́дꙋѧ хрⷭ҇тꙋ̀, бдѣ́нїемъ и҆ моли́твами, и҆ посто́мъ, ѻ҆́бразъ бы́лъ є҆сѝ твои̑мъ ᲂу҆ченикѡ́мъ. Тѣ́мже моли́сѧ гдⷭ҇еви, корни́лїе блаже́нне, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-й и҆ по в҃ каѳі́смѣ, сѣда́льны пра́здника."
|
|
},
|
|
{
|
|
"type": "HEADER",
|
|
"value": "По полѷеле́и, сѣда́ленъ, прпⷣбнагѡ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Премꙋ́дрости:"
|
|
},
|
|
{
|
|
"type": "TEXT",
|
|
"value": "Въ пꙋсты́ню, блаже́нне, всели́всѧ, и҆ въ не́й пречⷭ҇тый хра́мъ бж҃їи мт҃ри воздви́гъ, мно́жество мона́шествꙋющихъ та́мѡ собра́лъ є҆сѝ, бг҃ꙋ съ тобо́ю рабо́тающихъ, и҆̀хже сохранѧ́й ѿ всѧ́кагѡ вре́да лꙋка́вагѡ, да всегда̀ благода́рственнѡ вопїе́мъ тѝ: преблаже́нне корни́лїе, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀, стїхи́ра, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Преподо́бне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. Дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Канѡ́нъ пра́здника на ѕ҃: и҆ ст҃а́гѡ на и҃. Гла́съ и҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца, спасѐ, пѣ́снь бг҃ови воспѣва́юща."
|
|
},
|
|
{
|
|
"type": "TEXT",
|
|
"value": "Сло́во мѝ да́ждь, сло́ве бж҃їй, свѣтода́вче хрⷭ҇тѐ, воспѣ́ти свѣ́тлое и҆ свѣтоно́сное житїѐ твоегѡ̀ ᲂу҆го́дника, прпⷣбнагѡ корни́лїа. Моли́твами є҆гѡ̀ разорѝ мра́къ се́рдца моегѡ̀, и҆ твои́мъ свѣ́томъ дꙋшѝ ѡ҆зари́тисѧ, молю́сѧ."
|
|
},
|
|
{
|
|
"type": "TEXT",
|
|
"value": "Влⷣчнемꙋ любостра́нствꙋ, преподо́бне, подо́бѧсѧ, са́мъ стра́нствовати и҆зво́лилъ є҆сѝ. Тѣ́мже и҆ всеви́дѧщее ѻ҆́ко, ви́дѣвъ твоѐ благо́е и҆зволе́нїе, да́ромъ чꙋде́съ ѡ҆богати́ тѧ, корни́лїе, ꙗ҆́кѡ пресла́внѡ."
|
|
},
|
|
{
|
|
"type": "TEXT",
|
|
"value": "Трисо́лнечнымъ сїѧ́нїемъ, бг҃омꙋ́дре, ѡ҆зарѧ́емь, ѕло́е, блаже́нне, бѣсѡ́въ шата́нїе, и҆ вра̑жїѧ прещє́нїѧ, ра́нами болѣ́зней ꙗ҆́коже паꙋчи́нꙋ разори́лъ є҆сѝ, бж҃їимъ дх҃омъ разжига́емь, корни́лїе блаже́нне."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆́кѡ бж҃їѧ мт҃и, дерзнове́нїе и҆мꙋ́щи къ ро́ждшемꙋсѧ и҆зъ тебє̀ є҆диноро́дномꙋ сло́вꙋ, и҆ ѻ҆ц҃ꙋ̀ собезнача́льномꙋ, и҆ соесте́ственномꙋ дх҃ꙋ ст҃о́мꙋ, молѧ́щисѧ не преста́й ѿ бѣ́дъ спастѝ, всенепоро́чнаѧ, тѧ̀ бцⷣꙋ сла́вѧщыѧ."
|
|
},
|
|
{
|
|
"type": "HEADER",
|
|
"value": "Катава́сїа пра́здника."
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче."
|
|
},
|
|
{
|
|
"type": "TEXT",
|
|
"value": "Кто̀ и҆зрещѝ мо́жетъ зе́мленъ твоѧ̑ болѣ̑зни, ѻ҆́ч҃е, и҆ по́двиги, и҆́хже ра́ди досто́йнꙋ мздꙋ̀ стѧжа́лъ є҆сѝ ѿ бг҃а; и҆ бы́лъ є҆сѝ прїѧ́телище бжⷭ҇твеннагѡ дх҃а, преподо́бенъ и҆́стиненъ, пра́веденъ и҆ непоро́ченъ."
|
|
},
|
|
{
|
|
"type": "TEXT",
|
|
"value": "Оу҆крѣ́пль ᲂу҆́мъ ра́зꙋмомъ бжⷭ҇твеннымъ, ѻ҆́ч҃е корни́лїе, и҆ премꙋ́дростїю дꙋхо́вною, и҆ сло́вомъ ᲂу҆кра́шенъ. Тѣ́мъ привле́клъ є҆сѝ мно́гихъ дꙋ́шы во спасе́нїе, ꙗ҆ви́въ мона́хѡмъ и҆звѣ́стно житїѧ̀ прописа́нїе."
|
|
},
|
|
{
|
|
"type": "TEXT",
|
|
"value": "Ѕло́бы нача́льникъ вра́гъ, хотѧ̀ тебѣ̀ па́кость сотвори́ти, преподо́бне корни́лїе, лꙋка́выхъ человѣ̑къ на тѧ̀ воѡрꙋжа́етъ: тебѣ̀ прирази́всѧ постыдѣ́сѧ, хрⷭ҇тꙋ́ бо тѧ̀ соблюда́ющꙋ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Херꙋві̑мъ и҆ серафі̑мъ превы́шши ꙗ҆ви́ласѧ є҆сѝ, бцⷣе: ты́ бо прїѧ́ла є҆сѝ невмѣсти́маго бг҃а, во твое́мъ чре́вѣ нескве́рнаѧ. Тѣ́мже тѧ̀ всѝ вѣ́рнїи пѣ́сньми, чⷭ҇таѧ, ᲂу҆блажа́емъ."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Премꙋ́дрости:"
|
|
},
|
|
{
|
|
"type": "TEXT",
|
|
"value": "Хрⷭ҇то́вою любо́вїю свѧза́въ твою̀ дꙋ́шꙋ, и҆ поще́нїѧ страда́ньми ᲂу҆тверди́всѧ, зла́та свѣтлѣ́йши, благоче́стїемъ ѡ҆блиста́лъ є҆сѝ, и҆ чи́стое прїѧ́телище бы́въ дх҃ꙋ, лꙋка́выхъ дꙋхѡ́въ тмꙋ̀ разгна́лъ є҆сѝ: тѣ́мъ собра́въ и҆́ночествꙋющихъ мно́жєства, па́стырь и҆̀мъ бы́лъ є҆сѝ, и҆ свѣти́льникъ свѣ́телъ, корни́лїе прпⷣбне: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника, и҆лѝ бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ всенепоро́чнаѧ невѣ́сто творцꙋ̀, ꙗ҆́кѡ неискꙋсомꙋ́жнаѧ мт҃и и҆зба́вителю, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ бѣсѡ́мъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити, и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ моли́твами твои́ми."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Свѣ́тлое твоѐ житїѐ, ꙗ҆́кѡ пра́вило и҆звѣ́стно, всѧ́кїѧ, ѻ҆́ч҃е, добродѣ́тели показа́сѧ, въ моли́твахъ и҆ поще́нїихъ, бдѣ́нїихъ же и҆ мольба́хъ, ꙗ҆̀же ко хрⷭ҇тꙋ̀ чл҃вѣколю́бцꙋ."
|
|
},
|
|
{
|
|
"type": "TEXT",
|
|
"value": "Сна̀ твои́ма ѻ҆чи́ма не да́лъ є҆сѝ, бл҃же́нне корни́лїе, ни вѣ́ждома дрема́нїѧ, до́ндеже сподо́билсѧ є҆сѝ пра́ведныхъ селе́нїѧ, є҆́же ᲂу҆гото́ва бг҃ъ, преподо́бне, лю́бѧщымъ є҆го̀."
|
|
},
|
|
{
|
|
"type": "TEXT",
|
|
"value": "Стенѧ̀ и҆ пла́чѧ, и҆ сѣ́тꙋѧ, ᲂу҆миле́нїемъ и҆ слеза́ми кропѧ̀ зе́млю, при́снѡ, ѻ҆́ч҃е бг҃омꙋ́дре, моли́твꙋ соверша́лъ є҆сѝ, до́ндеже ѡ҆брѣ́лъ є҆сѝ бжⷭ҇твенное ᲂу҆тѣше́нїе во гра́дѣ бж҃їи, и҆ со всѣ́ми ст҃ы́ми, преподо́бне, всели́лсѧ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Бг҃а и҆зъ тебє̀ воплоще́ннаго непрело́жнѡ, є҆диносꙋ́щна ѻ҆ц҃ꙋ̀, и҆ тебѣ̀ ро́ждшей ра́вна по человѣ́чествꙋ, молѝ, проще́нїе согрѣше́нїй, и҆ дꙋша́мъ спасе́нїе, пою́щымъ тѧ̀ вѣ́рою дарова́ти."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ."
|
|
},
|
|
{
|
|
"type": "TEXT",
|
|
"value": "Погаси́въ стра̑сти росо́ю подвигѡ́въ твои́хъ, ѻ҆́ч҃е блаже́нне, бога́тнѡ возже́глъ є҆сѝ ѻ҆гне́мъ любвѐ и҆ вѣ́ры воздержа́нїѧ свѣти́льникъ, и҆ просвѣще́нїе безстра́стїѧ, и҆ днѐ сы́нъ ꙗ҆ви́лсѧ є҆сѝ."
|
|
},
|
|
{
|
|
"type": "TEXT",
|
|
"value": "И҆сцѣле́нїй тебѣ̀ благода́ть хрⷭ҇то́съ въ недꙋ́зѣхъ разли́чныхъ дарова̀, и҆ на дꙋ́хи нечи̑стыѧ вла́сть, мꙋ́дре: є҆стество́ бо, ѻ҆́ч҃е, побѣди́въ, па́че є҆стества̀ дарова́нїй сподо́билсѧ є҆сѝ дх҃а."
|
|
},
|
|
{
|
|
"type": "TEXT",
|
|
"value": "Ра́йскїѧ добро́ты жела́ѧ, преподо́бне корни́лїе, въ слеза́хъ и҆ воздыха́нїихъ, и҆ бдѣ́нїихъ, и҆ моли́твахъ, твою̀ жи́знь препроводи́лъ є҆сѝ: и҆ сегѡ̀ ра́ди по сме́рти ѿ хрⷭ҇та̀ чꙋдесы̀ просла́вилсѧ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тѧ̀ стѣ́нꙋ и҆мꙋ́щїи, и҆ застꙋпле́нїемъ твои́мъ соблюда́емїи, твое́ю бжⷭ҇твенною сла́вою хва́лѧщесѧ, тѧ̀ ᲂу҆блажа́емъ: ты́ бо, пречⷭ҇таѧ, дꙋша́мъ на́шымъ и҆сточа́еши весе́лїе и҆ ра́дованїе."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀."
|
|
},
|
|
{
|
|
"type": "TEXT",
|
|
"value": "Главы̑ врагѡ́въ мы́сленныхъ сокрꙋши́ти, мо́лимсѧ, и҆ ви̑димыѧ подъ но́зѣ на́ши покори́ти, моли́сѧ, преподо́бне, чтꙋ́щымъ любо́вїю свѧтꙋ́ю па́мѧть твою̀."
|
|
},
|
|
{
|
|
"type": "TEXT",
|
|
"value": "Житїѧ̀ твоегѡ̀ и҆справлє́нїѧ и҆ вѣща̑нїѧ, ѻ҆́ч҃е, всю̀ ѡ҆бтеко́ша ѿню́дъ вселе́ннꙋю, и҆́бо въ пресла́внꙋю дости́глъ є҆сѝ высотꙋ̀: бг҃ъ бо тѧ̀ просла́ви, и҆ сла́вна всѣ̑мъ сотворѝ."
|
|
},
|
|
{
|
|
"type": "TEXT",
|
|
"value": "Ни́щихъ строи́тель, вдѡ́въ предста́тель, промы́сленникъ си́рыхъ, печа́льныхъ ᲂу҆тѣше́нїе, па́дшихъ и҆справле́нїе, ѡ҆би́димыхъ застꙋ́пникъ ско́ръ бы́лъ є҆сѝ, твоемꙋ̀, ѻ҆́ч҃е, подо́бѧсѧ ᲂу҆чи́телю."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Вознесла̀ є҆сѝ вои́стиннꙋ па́дшее человѣ́ческое сꙋщество̀, ѻ҆́бразъ бжⷭ҇твенный, и҆ ѻ҆ц҃ꙋ̀ ра́венство и҆мꙋ́ща, ви́димаго сн҃а неизмѣ́нна, бг҃ома́ти, безъ сѣ́мене во чре́вѣ поноси́вши."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃:"
|
|
},
|
|
{
|
|
"type": "TEXT",
|
|
"value": "Гдⷭ҇еви ѿ ст҃ы́ѧ дв҃ы возсїѧ́вшꙋ мі́рови, и҆ томꙋ̀ и҆змла́да ꙗ҆́кѡ а҆́гг҃лъ послꙋжи́лъ є҆сѝ, блаже́нне, и҆ си́лою є҆гѡ̀ пꙋсты́ню ꙗ҆́кѡ гра́дъ сотвори́лъ є҆сѝ, мно́жество же ᲂу҆чєни́къ въ не́й собра́лъ є҆сѝ, и҆̀хже бг҃одохнове́нными ᲂу҆че́ньми просвѣти́лъ є҆сѝ. Тѣ́мъ вопїе́мъ тѝ: ра́дꙋйсѧ, ѻ҆́ч҃е на́шъ корни́лїе, и҆́нокѡмъ бжⷭ҇твенное ᲂу҆добре́нїе."
|
|
},
|
|
{
|
|
"type": "TEXT",
|
|
"value": "І҆́косъ: Зва́нїю гдⷭ҇а твоегѡ̀ послѣ́довалъ є҆сѝ прилѣ́жнѡ, блаже́нне, всѧ̑ ꙗ҆̀же въ мі́рѣ кра̑снаѧ є҆гѡ̀ ра́ди преѡби́дѣвъ. Тѣ́мже вопїе́мъ тѝ: ра́дꙋйсѧ, ꙗ҆́кѡ и҆змла́да хрⷭ҇та̀ возлюби́въ, си́лою є҆гѡ̀ претерпѣ́лъ є҆сѝ пꙋсты́нное ѡ҆ѕлобле́нїе ᲂу҆се́рднѡ: ра́дꙋйсѧ, ꙗ҆́кѡ вы́шнѧгѡ по́мощїю бѣсо́вскꙋю пре́лесть попра́лъ є҆сѝ: ра́дꙋйсѧ, ꙗ҆́кѡ прече́стенъ хра́мъ бж҃їѧ мт҃ре воздви́глъ є҆сѝ: ра́дꙋйсѧ, ꙗ҆́кѡ въ не́мъ тобо́ю бг҃ъ прославлѧ́етсѧ: ра́дꙋйсѧ, ꙗ҆́кѡ собра́лъ є҆сѝ ᲂу҆чєни́къ мно́жество: ра́дꙋйсѧ, ꙗ҆́кѡ съ тѣ́ми прилѣ́жнѡ гдⷭ҇еви рабо́талъ є҆сѝ: ра́дꙋйсѧ, ꙗ҆́кѡ ᲂу҆диви́лъ є҆сѝ а҆́гг҃лы житїе́мъ твое́мъ: ра́дꙋйсѧ, ꙗ҆́кѡ тобо́ю человѣ́цы по́льзовашасѧ: ра́дꙋйсѧ, правосла́вномꙋ наро́дꙋ похвала̀: ра́дꙋйсѧ, хрⷭ҇толюби́вомꙋ во́инствꙋ ᲂу҆твержде́нїе: ра́дꙋйсѧ, ꙗ҆́кѡ моли́твами твои́ми сопроти́внїи побѣжда́ютсѧ: ра́дꙋйсѧ, ѻ҆́ч҃е на́шъ корни́лїе, и҆́нокѡмъ бжⷭ҇твенное ᲂу҆добре́нїе."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "И҆стощи́въ тꙋ́лъ стрѣ́лъ вра́гъ вселꙋка́вый, ᲂу҆страши́ти тѧ̀ не возмо́же, си́лою бо вы́шнѧгѡ ᲂу҆крѣплѧ́емь, и҆ тогѡ̀ по́мощїю воѡрꙋжа́емь, прпⷣбне, поѧ̀: благослове́нъ є҆сѝ, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Бꙋ́дꙋщїѧ жи́зни взыска́въ, сла́вꙋ маловре́меннꙋю небре́глъ є҆сѝ, и҆ въ пꙋсты́ню всели́всѧ, бл҃же́нне, со ѕвѣрьмѝ жи́ти и҆зво́лилъ є҆сѝ, поѧ̀: бл҃гослове́нъ є҆сѝ, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Вра́гъ прирази́всѧ тебѣ̀, преподо́бне, разбо́йники на тѧ̀ посыла́етъ: постыдѣ́вжесѧ, дꙋше́внагѡ твоегѡ̀ хра́ма не поколеба̀: ᲂу҆твержде́нъ бо бѣ̀ на ка́мени."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Го́рꙋ тѧ̀ прⷪ҇ро́къ данїи́лъ бжⷭ҇твеннымъ дх҃омъ наречѐ, дв҃о, и҆зъ неѧ́же ка́мень безъ рꙋ́къ ѿсѣче́сѧ, сокрꙋше́нїе содѣ́ѧ и҆стꙋка́ннѣй пре́лести."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Цр҃ю̀ всѣ́хъ и҆ бг҃ꙋ со ст҃ы́ми предстоѧ̀, съ ни́миже, корни́лїе, моли́сѧ, во́инствꙋ на́шемꙋ побѣ̑ды на ва́рвары дарова́ти, и҆ грѣхѡ́въ ѡ҆ставле́нїе, твою̀ па́мѧть почита́ющымъ, и҆ пою́щымъ вы́нꙋ: свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Гдⷭ҇нихъ за́повѣдей и҆звѣ́стенъ храни́тель бы́лъ є҆сѝ, раздроблѧ́ѧ а҆́лчꙋщымъ хлѣ́бъ тво́й, прпⷣбне, та́ющꙋ гла́домъ добродѣ́телей дꙋ́шꙋ мою̀ насы́ти, блаже́нне, пою́ща любо́вїю: свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Ва̑рваръ и҆ногда̀ наше́ствїе, и҆ ко ѻ҆би́тели твое́й ᲂу҆стреми́вшихсѧ, бжⷭ҇твенною си́лою ᲂу҆страши́лъ є҆сѝ. И҆ ны́нѣ на на́съ мы́сленныхъ вра̑гъ ᲂу҆стремле́нїе, моли́твами твои́ми разорѝ, пою́щихъ: свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Къ бцⷣѣ всѐ твоѐ ᲂу҆пова́нїе и҆мѣ́лъ є҆сѝ, корни́лїе, и҆ тоѧ̀ призыва́нїемъ вра̑жїѧ сѣ̑ти всѧ̑ расто́рглъ є҆сѝ, и҆ лю́тыхъ воста́нїе: съ не́юже, преподо́бне, моли́сѧ, ѡ҆ и҆̀же любо́вїю честнꙋ́ю твою̀ па́мѧть чтꙋ́щихъ, и҆ вопїю́щихъ: свѧще́нницы, воспо́йте, лю́дїе, превозноси́те во всѧ̑ вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ."
|
|
},
|
|
{
|
|
"type": "TEXT",
|
|
"value": "Бѣ́гаѧ сла́вы ѿ человѣ̑къ, въ пꙋсты́ню всели́лсѧ є҆сѝ, всѧ̑ ᲂу҆ме́ты вмѣни́въ, да хрⷭ҇та̀ є҆ди́наго приѡбрѧ́щеши: є҆гѡ́же ра́ди пꙋсты̑ннаѧ ѡ҆ѕлоблє́нїѧ претерпѣ́лъ є҆сѝ, да тлѣ́нными нетлѣ̑ннаѧ и҆змѣни́ши, корни́лїе."
|
|
},
|
|
{
|
|
"type": "TEXT",
|
|
"value": "Ѿ мѣ́ста ѿгони́ти тѧ̀ вра́гъ покꙋша́всѧ, мона́хи на ᲂу҆бїе́нїе твоѐ поѡщрѧ́ше, корни́лїе преподо́бне, ꙗ҆̀же до́брѣ ᲂу҆че́нїемъ твои́мъ наказа́лъ є҆сѝ, и҆ ꙗ҆́коже твоѧ̑ ча̑да при́снѡ тѣ́хъ возлюби́лъ є҆сѝ."
|
|
},
|
|
{
|
|
"type": "TEXT",
|
|
"value": "Не забꙋ́ди посѣща́ѧ ча̑дъ твои́хъ, корни́лїе прпⷣбне, къ ра́цѣ моще́й твои́хъ притека́ющихъ, и҆ любо́вїю па́мѧть твою̀ торжествꙋ́ющихъ, ѿ всѣ́хъ и҆скꙋше́нїй вра́жїихъ и҆зба́витисѧ, всѣ́хъ влⷣцѣ моли́сѧ, бл҃же́нне."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Зачала̀ є҆сѝ, дв҃о, безъ сѣ́мене, всѧ́чєскаѧ созда́вшаго сло́во бж҃їе, кромѣ̀ хотѣ́нїѧ пло́ти и҆ безъ и҆стлѣ́нїѧ родила̀ є҆сѝ, безъ болѣ́зней ма́терскихъ. Тѣ́мъ тѧ̀, бцⷣе, ѧ҆зы́комъ и҆ се́рдцемъ и҆сповѣ́дающе велича́емъ."
|
|
},
|
|
{
|
|
"type": "TEXT",
|
|
"value": "Свѣти́ленъ: Стра́стнагѡ ѡ҆мраче́нїѧ дꙋ́шꙋ ѡ҆чи́стивъ, преподо́бне, честны́мъ поще́нїемъ и҆ моли́твами непреста́нными, зерца́ло бы́лъ є҆сѝ бжⷭ҇твенныхъ сїѧ́нїй, свѣти́льниче мона́хѡвъ корни́лїе бг҃омꙋ́дре. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры на д҃. Гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Ѽ пресла́внагѡ чꙋдесѐ! Въ послѣ́днихъ родѣ́хъ просїѧ̀ въ добродѣ́телехъ, посты̑ и҆ моли́твами, и҆ трꙋды̑ тѣле́сными, и҆ и҆ны́ми мно́гими страда̑нїи, по семꙋ̀ вре́мени твоегѡ̀ житїѧ̀, ᲂу҆́мъ вперѧ́ѧ къ бг҃ꙋ, подвиза́лсѧ є҆сѝ неѡсла́бнѡ, ѻ҆́ч҃е корни́лїе. Два́жды."
|
|
},
|
|
{
|
|
"type": "TEXT",
|
|
"value": "Ѽ пресла́внагѡ чꙋдесѐ! Нигдѣ́же ꙗ҆ви́лсѧ є҆сѝ по́честь ᲂу҆ловлѧ́ѧ, и҆ ласка́ньми ᲂу҆слажда́ѧсѧ, па́че же смире́нїе хрⷭ҇то́во носѧ̀ въ согбе́ннѣ мꙋдрова́нїи, є҆́же воѡбража́лъ є҆сѝ твои̑мъ ᲂу҆ченикѡ́мъ, и҆̀хже собра́лъ є҆сѝ мно́гими пѡ́двиги и҆ трꙋды̑, ѻ҆́ч҃е корни́лїе."
|
|
},
|
|
{
|
|
"type": "TEXT",
|
|
"value": "Ѽ пресла́внагѡ чꙋдесѐ! Пꙋсты́ню гра́дъ сотворѝ, ю҆́же ви́дѣвше ра́тнїи, ᲂу҆боѧ́шасѧ настꙋпи́ти на ню̀, мнѧ́хꙋ бо и҆ ви́дѧхꙋ мно́жество воѡрꙋже́нныхъ во́инѡвъ: се́ же дѣ́ло моли́твъ ра́ди ст҃а́гѡ бы́сть, и҆́же твори́тъ всегда̀, помога́ѧ на́мъ свои̑мъ ᲂу҆ченикѡ́мъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ з҃:"
|
|
},
|
|
{
|
|
"type": "TEXT",
|
|
"value": "Оу҆мно́живъ добродѣ́тель, просвѣти́лъ є҆сѝ мі́ръ: ᲂу҆жаси́въ де́мѡны, возвесели́лъ є҆сѝ а҆́гг҃лы: собра́въ ста́до мона́хѡвъ, наꙋчи́лъ є҆сѝ и҆̀хъ ходи́ти въ за́повѣдехъ гдⷭ҇нихъ: и҆ прїе́мъ бл҃года́ть и҆сцѣле́нїѧ, съ вѣ́рою приходѧ́щымъ да́рꙋеши безме́зднѡ. Прпⷣбне ѻ҆́ч҃е на́шъ, моли́сѧ ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На лїтꙋргі́и слꙋ́жба всѧ̀ преподо́бническаѧ."
|
|
}
|
|
] |