626 lines
66 KiB
JSON
626 lines
66 KiB
JSON
[
|
|
{
|
|
"type": "HEADER",
|
|
"value": "І҆ꙋ́лїа є҃"
|
|
},
|
|
{
|
|
"type": "HEADER",
|
|
"value": "Ѡ҆брѣ́тенїе честны́хъ моще́й прпⷣбнагѡ и҆ бг҃оно́снагѡ ѻ҆тца̀ на́шегѡ и҆гꙋ́мена се́ргїа, ра́донежскагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "На ма́лѣй вече́рни, стїхи̑ры на д҃, гла́съ а҃:"
|
|
},
|
|
{
|
|
"type": "TEXT",
|
|
"value": "Подо́бенъ: Нбⷭ҇ныхъ чинѡ́въ:"
|
|
},
|
|
{
|
|
"type": "TEXT",
|
|
"value": "Нбⷭ҇ныхъ чинѡ́въ ра́дованїе, и҆ на землѝ человѣ́кѡвъ весе́лїе, въ наста́вшее ны́нѣ торжество̀ честна́гѡ ѡ҆брѣ́тенїѧ чꙋдотво́рныхъ моще́й, во ѻ҆тцѣ́хъ вели́кагѡ и҆ преподо́бнагѡ се́ргїа, тогѡ̀ моли́твами, хрⷭ҇тѐ, спасѝ дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "И҆́же на нб҃сѝ человѣ́ка бж҃їѧ, и҆ на землѝ а҆́гг҃ла сꙋ́ща съ пло́тїю, бг҃ꙋ ѿ чре́ва ма́тернѧ ѡ҆свѧще́ннагѡ блаже́ннагѡ се́ргїа дне́сь наста̀ ѡ҆брѣ́тенїе чꙋдотво́рныхъ моще́й, и҆ созыва́етъ всѐ цр҃ко́вное и҆сполне́нїе, возсыла́ти сла́вꙋ хрⷭ҇тꙋ̀ бг҃ꙋ."
|
|
},
|
|
{
|
|
"type": "TEXT",
|
|
"value": "Вы́спрь на нб҃сѝ а҆́гг҃ли ра́дꙋютсѧ, и҆ ни́зꙋ на землѝ человѣ́цы ликовствꙋ́ютъ и҆ цр҃ковь бж҃їѧ ᲂу҆краша́ема весели́тсѧ ѡ҆ пресла́вномъ пренесе́нїи честны́хъ моще́й твои́хъ, ѻ҆́ч҃е се́ргїе, хрⷭ҇тꙋ̀ вопїю́щи: ты́ ми держа́ва, хрⷭ҇тѐ, и҆ ᲂу҆твержде́нїе."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, всѝ концы̀ земні́и ра́дꙋющесѧ, ѱалмы̑ и҆ пѣ́сньми дꙋхо́вными, честно́е пренесе́нїе застꙋ́пника на́шегѡ благоче́стнѣ восхва́лимъ, и҆ ѡ҆бстоѧ́ще честнꙋ́ю є҆гѡ̀ и҆ чꙋдотво́рнꙋю ра́кꙋ, на по́мощь того̀ призыва́емъ, си́це глаго́люще: пребл҃же́нне ѻ҆́ч҃е, се́ргїе, да́рꙋй ѻ҆те́чествꙋ на́шемꙋ и҆ дꙋхо́вномꙋ ста́дꙋ твоемꙋ̀ твои́ми моли́твами посо́бїе на врагѝ, и҆ ѻ҆те́чество ми́ромъ ѡ҆градѝ, и҆ вѡ́ѧ є҆гѡ̀ на сопроти̑вныѧ ᲂу҆крѣпѝ, и҆ спасѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "До́мъ дх҃а прест҃а́гѡ бы́лъ є҆сѝ, ѻ҆́ч҃е: и҆ на́съ моли́твами твои́ми, вселе́нїе покажѝ ст҃ѣ́й трⷪ҇цѣ, бг҃омꙋ́дре се́ргїе и҆ пребога́те."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи ра́дꙋющесѧ, и҆ вни́демъ въ цр҃ковь въ весе́лїи се́рдца, ѡ҆блобыза́юще чєстны́ѧ мо́щи се́ргїа бг҃омꙋ́драгѡ, и҆сцѣле́нїе и҆ грѣхѡ́въ проще́нїе прїи́мемъ, моли́твами є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Прїимѝ пѣ́нїе ча̑дъ твои́хъ, се́ргїе ѻ҆́ч҃е, и҆ пою́щымъ ѡ҆брѣ́тенїе моще́й твои́хъ, и҆ лю́бѧщымъ тѧ̀, подава́й є҆́же на по́льзꙋ проше́нїе."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ: гла́съ и҆ подо́бенъ то́йже:"
|
|
},
|
|
{
|
|
"type": "TEXT",
|
|
"value": "Вы́шнїи ли́цы, бцⷣе дв҃о, пою́тъ съ ни́жними, сла́вѧще непреста́ннѡ ржⷭ҇тво̀ твоѐ пречи́стое."
|
|
},
|
|
{
|
|
"type": "HEADER",
|
|
"value": "Тропа́рь, гла́съ и҃:"
|
|
},
|
|
{
|
|
"type": "TEXT",
|
|
"value": "Ѿ ю҆́ности воспрїѧ́лъ є҆сѝ хрⷭ҇та̀ въ дꙋшѝ твое́й, преподо́бне, и҆ па́че всегѡ̀ вожделѣ́лъ є҆сѝ мїрска́гѡ мѧте́жа ᲂу҆клони́тисѧ: мꙋ́жески въ пꙋсты́ню всели́лсѧ є҆сѝ, и҆ ча̑да послꙋша́нїѧ въ не́й, плоды̀ смире́нїѧ возрасти́лъ є҆сѝ. Тѣ́мъ бы́въ трⷪ҇цѣ вселе́нїе, чꙋдесы̀ твои́ми всѣ́хъ просвѣти́лъ є҆сѝ, приходѧ́щихъ къ тебѣ̀ вѣ́рою, и҆ и҆сцѣлє́нїѧ всѣ̑мъ подаѧ̀ ѻ҆би́льнѡ: ѻ҆́ч҃е на́шъ се́ргїе, молѝ хрⷭ҇та̀ бг҃а, да спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "На вели́цѣй вече́рни, на Гдⷭ҇и, воззва́хъ, стїхи̑ры на и҃, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Зва́нный свы́ше:"
|
|
},
|
|
{
|
|
"type": "TEXT",
|
|
"value": "Є҆гда̀ пре́жде ржⷭ҇тва̀ твоегѡ̀, прїи́де заче́ншаѧ тѧ̀ въ цр҃ковь бж҃їю, тогда̀ во чре́вѣ є҆ѧ̀ трикра́ты возгласи́лъ є҆сѝ, трⷪ҇цꙋ прославлѧ́ѧ, бг҃омꙋ́дре ѻ҆́ч҃е се́ргїе. Пре́жде мїрска́гѡ позна́нїѧ бг҃а позна́лъ є҆сѝ, па́че же бг҃омъ позна́нъ бы́лъ є҆сѝ, преблаже́нне, проѧвлѧ́ѧ всѣ̑мъ хотѧ̑щаѧ бы́ти на тебѣ̀, бж҃їѧ благода́ти сїѧ́нїе, и҆ свѣтлостьмѝ лица̀ твоегѡ̀, показꙋ́ѧ дꙋше́внꙋю и҆ тѣле́снꙋю чистотꙋ̀, є҆ѧ́же ра́ди и҆збра́нный сосꙋ́дъ бы́въ хрⷭ҇та̀ бг҃а на́шегѡ: є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Є҆гда̀ бж҃їе раче́нїе на́йде на тѧ̀, бг҃омꙋ́дре и҆ всеблаже́нне ѻ҆́ч҃е се́ргїе, тогда̀ всѧ̑ сꙋ̑щаѧ въ мі́рѣ преѡби́дѣлъ є҆сѝ, и҆ хрⷭ҇та̀ є҆ди́наго ѿ дꙋшѝ возлюби́въ, и҆ тогѡ̀ живонѡ́снымъ стопа́мъ послѣ́дꙋѧ, пꙋсты́ню дости́глъ є҆сѝ: и҆ сїю̀ насѣ́ѧвъ сѣ́менемъ трꙋдѡ́въ твои́хъ, и҆ напои́въ тꙋ́чами сле́зъ твои́хъ, ᲂу҆мно́жилъ є҆сѝ плоды̀ добродѣ́телей: и҆ тѣ́ми напита́въ ча̑да, приве́лъ є҆сѝ ѧ҆̀ хрⷭ҇тꙋ̀ бг҃ꙋ. Є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Є҆гда̀ бжⷭ҇твенный гла́съ ᲂу҆слы́шалъ є҆сѝ, бг҃омꙋ́дре, глаго́лющъ тѝ: сѐ пречи́стаѧ грѧде́тъ: тогда̀ во мно́зѣ по́двизѣ прилѣ́жнѣ моли́лсѧ є҆сѝ, ꙗ҆́кѡ да сподо́бишисѧ ѻ҆́нагѡ стра́шнагѡ посѣще́нїѧ. И҆ а҆́бїе пресвѣ́тлый па́че со́лнца свѣ́тъ ѡ҆сїѧ́ тѧ, преподо́бне, и҆ влⷣчцꙋ бг҃ома́терь разꙋ́мныма и҆ тѣле́сныма ѻ҆чи́ма ви́дѣти сподо́билсѧ є҆сѝ, и҆ тоѧ̀ сла́дкїй гла́съ ᲂу҆ши́ма внꙋши́лъ є҆сѝ рече́нный: неѿстꙋ́пна бꙋ́дꙋ ѿ мѣ́ста сегѡ̀, и҆ не и҆́мать ѡ҆скꙋдѣ́ти ѻ҆би́тель твоѧ̀: ю҆́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Є҆гда̀ приспѣ̀ вре́мѧ є҆́же къ бг҃ꙋ ѿше́ствїѧ твоегѡ̀, тогда̀ ꙗ҆́кѡ ѕвѣзда̀ пресвѣ́тлаѧ восте́клъ є҆сѝ въ небє́сныѧ ѻ҆би́тєли, и҆ та́мѡ съ ли́ки ст҃ы́хъ престо́лꙋ є҆диносꙋ́щныѧ трⷪ҇цы предстои́ши: блаже́нное же и҆ честно́е тѣ́ло твоѐ, на мнѡ́га лѣ̑та земле́ю покрове́но бы́вшее, ны́нѣ ѿ землѝ и҆зда́вшесѧ чꙋде́съ зарю̀ и҆спꙋща́етъ, чтꙋ́щымъ ѡ҆брѣ́тенїе твоѐ, бг҃омꙋ́дре се́ргїе. Ѻ҆те́чествꙋ на́шемꙋ на сопроти̑вныѧ побѣ̑ды да́рꙋй, и҆ всѣ̑мъ вѣ̑рнымъ грѣхѡ́въ проще́нїе и҆спросѝ ᲂу҆ хрⷭ҇та̀ бг҃а на́шегѡ: є҆го́же молѝ, спастѝ и҆ просвѣти́ти дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Прїиди́те, всѝ вѣ́рнїи рѡссі́йстїи собо́ри, и҆ наслади́мсѧ ны́нѣшнѧгѡ свѣ́тлагѡ торжества̀, прїиди́те свѧще́нныхъ и҆сполне́нїе, и҆ мона́хѡвъ сосло́вїе, и҆ ви́дите, ка́кѡ цр҃ковь бж҃їѧ ᲂу҆краша́етсѧ, ѱалмы̑ и҆ пѣ́сньми и҆ пѣ́ньми дх҃о́вными и҆сполнѧ́ема: честна́ѧ же и҆ сла́внаѧ ѻ҆би́тель бг҃облаже́ннагѡ ѻ҆тца̀ се́ргїа весе́лїѧ и҆ ра́дости и҆сполнѧ́ема: во ѡ҆брѣ́тенїи честны́хъ моще́й є҆гѡ̀, хва́лѧщисѧ вселе́ннꙋю созыва́етъ ра́достнѡ вопи́ти гдⷭ҇еви: ты̀ дарова́лъ є҆сѝ, влⷣко хрⷭ҇тѐ, ѻ҆те́чествꙋ на́шемꙋ крѣ́пкаго во́ина, и҆ непобѣди́мое ѻ҆рꙋ́жїе на неви̑димыѧ и҆ ви̑димыѧ врагѝ, и҆ хрⷭ҇тоимени̑тымъ лю́демъ сокро́вище неистощи́мо неисчерпа́емыхъ дарова́нїй. Тогѡ̀ моли́твами пода́ждь дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ. Вхо́дъ. Чтє́нїѧ."
|
|
},
|
|
{
|
|
"type": "HEADER",
|
|
"value": "При́тчей чте́нїе. (Главы̑ і҃, г҃ и҆ и҃.)"
|
|
},
|
|
{
|
|
"type": "TEXT",
|
|
"value": "Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менє̀, ѽ ча̑да! Честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а."
|
|
},
|
|
{
|
|
"type": "HEADER",
|
|
"value": "При́тчей чте́нїе. (Главы̑ і҃ и҆ а҃і.)"
|
|
},
|
|
{
|
|
"type": "TEXT",
|
|
"value": "Оу҆ста̀ првⷣнагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ, ме́рзость предъ гдⷭ҇емъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ сме́рти. Оу҆́меръ првⷣный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ благоспѣ́шное. Во благи́хъ пра́ведныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, празднолю́бцы и҆ по́стникѡвъ сосло́вїе, вѣ́рою соше́дшесѧ, и҆́стиннаго по́стника почти́мъ дне́сь се́ргїа, съ весе́лїемъ ше́ствовавшаго по стопа́мъ влⷣки своегѡ̀ ᲂу҆́зкїй пꙋ́ть, и҆ безстра́стнꙋю жи́знь, и҆ вѣ́рою возопїи́мъ: ѽ всеблаже́нне! Прпⷣбнымъ сожи́телю, и҆ по́стникѡмъ похвало̀, ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Прпⷣбне и҆ бг҃оно́се се́ргїе, любвѐ ра́ди хрⷭ҇то́вы всѧ̑ ѡ҆ста́вилъ є҆сѝ, и҆ въ пꙋсты́ню вше́дъ, ника́коже ᲂу҆боѧ́лсѧ є҆сѝ неви́димыхъ вра̑гъ кова́рствїѧ: а҆́ще бо и҆ мно́гажды прїидо́ша на тѧ̀, скрежета́нїемъ зꙋбны́мъ ꙗ҆́рость показꙋ́юще, ты́ же моли́твами твои́ми, ꙗ҆́кѡ ды́мъ безъ вѣ́сти си́хъ сотвори́лъ є҆сѝ. Ѽ непоро́чныѧ твоеѧ̀ дꙋшѝ, и҆ крѣ́пкагѡ терпѣ́нїѧ твоегѡ̀! Хрⷭ҇та̀ непреста́ннѡ молѝ спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "Рѡссі́йскаѧ ᲂу҆́бѡ всеѡсвѧще́ннаѧ, и҆ вели́каѧ цр҃ковь, съ правосла́вными лю́ди, мона́си же и҆ прості́и, є҆ѵⷢ҇льскихъ и҆стѡ́чникъ стрꙋѧ́ми напои́вшесѧ, дꙋхо́внѡ весели́мсѧ, въ наро́читомъ пра́здницѣ, до́брагѡ па́стырѧ и҆ ᲂу҆чи́телѧ, и҆ цѣлє́бныѧ є҆гѡ̀ мо́щи ѡ҆бстоѧ́ще любе́знѡ ѡ҆блобыза́емъ, и҆ си́хъ ꙗ҆́кѡ цвѣ̑ты пѣ́сньми и҆ хвала́ми ᲂу҆вѧзе́мъ, рекꙋ́ще: ра́дꙋйсѧ, се́ргїе блаже́нне, нбⷭ҇ный человѣ́че, земны́й а҆́гг҃ле, и҆ дх҃а ст҃а́гѡ ѻ҆би́тель: ра́дꙋйсѧ, ꙗ҆́кѡ мно́гихъ ко спаси́тельномꙋ пꙋтѝ наста́вилъ є҆сѝ: ра́дꙋйсѧ, во́инствꙋ на́шемꙋ похвала̀ и҆ ᲂу҆твержде́нїе, прпⷣбне се́ргїе бг҃опрїѧ́тне, ѻ҆ч҃ествꙋ твоемꙋ̀ пресвѣ́тлый свѣти́льниче, и҆ моли́твенниче ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "Гла́съ а҃:"
|
|
},
|
|
{
|
|
"type": "TEXT",
|
|
"value": "Прїиди́те, свѧще́нныхъ собо́ри, и҆ правосла́вныхъ и҆сполне́нїе, прїиди́те мона́хѡвъ совокꙋпле́нїе, и҆ вни́демъ ра́дꙋющесѧ въ цр҃ковь бг҃а на́шегѡ, и҆ чꙋдотво́рнꙋю ра́кꙋ преподо́бнагѡ ѻ҆тца̀ се́ргїа ѡ҆б̾и́мемъ ра́достнѡ, ꙗ҆́кѡ чꙋде́съ сокро́вище неиз̾е́млемо: и҆ чєстны́ѧ є҆гѡ̀ мо́щи любо́вїю лобыза́юще, разли́чныхъ недꙋ̑гъ свободи́мсѧ, и҆ дꙋша́мъ спасе́нїе прїи́мемъ, вопїю́ще є҆мꙋ̀: ѽ всеблаже́нне ѻ҆́ч҃е се́ргїе! Молѝ преблага́го бг҃а на́шего, дарова́ти посо́бїе на врагѝ ѻ҆те́чествꙋ на́шемꙋ, и҆ спастѝ дꙋ́шы на́шѧ."
|
|
},
|
|
{
|
|
"type": "TEXT",
|
|
"value": "Дне́сь весели́тсѧ нб҃о свы́ше, и҆ землѧ̀ ра́дꙋетсѧ съ человѣ́ки, и҆ да ликовствꙋ́ютъ новоизбра́ннїи рѡссі́йстїи собо́ри, и҆ свѣ́тлѡ торжествꙋ́ютъ мона́шєскаѧ совокꙋплє́нїѧ: ст҃а́ѧ же цр҃ковь бж҃їѧ, и҆ ди́внаѧ въ пра́вдꙋ, ꙗ҆́кѡ пресвѣ́тлыми зарѧ́ми просвѣща́ема, мно́гихъ чꙋде́съ наполнѧ́ющисѧ ѿ честны́хъ и҆ многоцѣле́бныхъ моще́й преподо́бнагѡ ѻ҆тца̀ се́ргїа, всю̀ вселе́ннꙋю созыва́етъ похвали́ти по́двиги є҆гѡ̀. Тѣ́мъ всѝ соше́дшесѧ, тогѡ̀ ѡ҆брѣ́тенїе въ пѣ́снехъ и҆ пѣ́нїихъ ве́селѡ пра́зднꙋющїи, воспое́мъ хрⷭ҇та̀ бг҃а на́шего, да пода́стъ на́мъ моли́твами є҆гѡ̀ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Наста̀ дне́сь свѣ́тлое торжество̀ пренесе́нїѧ моще́й бг҃облаже́ннагѡ ѻ҆ц҃а̀ се́ргїа: прїиди́те, всѝ вѣ́рнїи, це́рковь бж҃їю пѣ́сньми вѣнча́емъ, и҆ въ не́й просла́вимъ въ трⷪ҇цѣ пѣва́емаго хрⷭ҇та̀ бг҃а на́шего, вопїю́ще и҆ глаго́люще: ты̀ дарова́лъ є҆сѝ, влⷣко хрⷭ҇тѐ, твоего̀ ᲂу҆го́дника гра́дꙋ на́шемꙋ москвѣ̀ тве́рдꙋю стѣ́нꙋ, и҆ всѣ̑мъ рѡссі̑йскимъ страна́мъ крѣ́пкаго предста́телѧ показа́лъ є҆сѝ, и҆ хрⷭ҇тоимени̑тымъ лю́демъ такова́го чꙋдесопода́телѧ, и҆ неисцѣ́льныхъ недꙋ̑гъ цѣли́телѧ, и҆ бѣсовѡ́мъ прогони́телѧ, и҆ моли́твенника ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, мона́шествꙋющихъ мно́жество дне́сь, се́ргїа, благоче́стїѧ подража́телѧ, пѣ́сньми и҆ пѣ́ньми восхва́лимъ, и҆ честнꙋ́ю є҆гѡ̀ и҆ многоцѣле́бнꙋю ра́кꙋ ѡ҆бстоѧ́ще, любе́знѡ ѡ҆блобыза́емъ, глаго́люще: ра́дꙋйсѧ, пресла́вне се́ргїе, ѻ҆те́чествꙋ твоемꙋ̀ пресвѣ́тлый свѣти́льниче: ра́дꙋйсѧ, ꙗ҆́кѡ чи́стѣ чистѣ́йшемꙋ свѣ́тꙋ совокꙋ́пльсѧ: ра́дꙋйсѧ, ꙗ҆́кѡ трⷪ҇цѣ предстои́ши со а҆́гг҃лы, ю҆́же непреста́ннѡ молѝ, дарова́ти дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ д҃:"
|
|
},
|
|
{
|
|
"type": "TEXT",
|
|
"value": "Подо́бенъ: Да́лъ є҆сѝ зна́менїе:"
|
|
},
|
|
{
|
|
"type": "TEXT",
|
|
"value": "Да́лъ є҆сѝ ᲂу҆краше́нїе цр҃кви твое́й, гдⷭ҇и, чєстны́ѧ и҆ многоцѣлє́бныѧ мо́щи прпⷣбнагѡ се́ргїа твоегѡ̀ ᲂу҆го́дника: и҆ ꙗ҆́кѡ ᲂу҆́тварь ца́рскꙋю и҆мꙋ́щи красꙋ́етсѧ, и҆ ꙗ҆́кѡ вѣне́цъ пресвѣ́тлый носѧ́щи весели́тсѧ, созыва́ющи своѧ̑ ча̑да, и҆̀хже водо́ю и҆ дх҃омъ є҆ѵⷢ҇льски породѝ. Тѣ́мже твоѐ чл҃вѣколю́бное смотре́нїе сла́вимъ, і҆и҃се чл҃вѣколю́бче, и҆ сп҃се дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Да́лъ є҆сѝ держа́вꙋ неѡбори́мꙋ ца́рствꙋющемꙋ гра́дꙋ москвѣ̀, гдⷭ҇и, и҆ всѣ̑мъ рѡссі̑йскимъ страна́мъ ᲂу҆твержде́нїе: честнѣ́й же ѻ҆би́тели твое́й тве́рдое ᲂу҆крѣпле́нїе и҆ стѣ́нꙋ непоколеби́мꙋ, цѣльбонѡ́сныѧ и҆ ст҃ы̑ѧ мо́щы пребл҃же́ннагѡ се́ргїа твоегѡ̀ рачи́телѧ. Тѣ́мъ твоѧ̑ чл҃вѣколю̑бныѧ щедрѡ́ты сла́вимъ, і҆и҃се всеси́льне, и҆ сп҃се дꙋ́шъ на́шихъ."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Да́лъ є҆сѝ рѡссі́йскомꙋ ѻ҆те́чествꙋ, гдⷭ҇и, тве́рдое защище́нїе, и҆ ѻ҆рꙋ́жїе спасе́нїѧ, и҆ во́ємъ є҆гѡ̀ вели́кое на сопроти̑вныѧ ѡ҆долѣ́нїе, ст҃и́телємъ же честно́е ᲂу҆краше́нїе, и҆ всѣ̑мъ болѧ́щымъ врачевство̀ безме́здно, ст҃ы̑ѧ мо́щи прпⷣбнагѡ и҆ требл҃же́ннагѡ се́ргїа, и҆̀хже ны́нѣ ра́достнѡ ѡ҆блобыза́емъ, и҆сцѣлє́нїѧ разли̑чнаѧ прїе́млюще, твоѐ неизрече́нное милосе́рдїе сла́вимъ, і҆и҃се бл҃госе́рде, и҆ сп҃се дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ се́ргїе: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Безневѣ́стнаѧ дв҃о:"
|
|
},
|
|
{
|
|
"type": "HEADER",
|
|
"value": "На благослове́нїи хлѣ́бѡвъ тропа́рь, гла́съ и҃:"
|
|
},
|
|
{
|
|
"type": "TEXT",
|
|
"value": "Ѿ ю҆́ности воспрїѧ́лъ є҆сѝ хрⷭ҇та̀ въ дꙋшѝ твое́й, преподо́бне, и҆ па́че всегѡ̀ вожделѣ́лъ є҆сѝ мїрска́гѡ мѧте́жа ᲂу҆клони́тисѧ: мꙋ́жески въ пꙋсты́ню всели́лсѧ є҆сѝ, и҆ ча̑да послꙋша́нїѧ въ не́й, плоды̀ смире́нїѧ возрасти́лъ є҆сѝ. Тѣ́мъ бы́въ трⷪ҇цѣ вселе́нїе, чꙋдесы̀ твои́ми всѣ́хъ просвѣти́лъ є҆сѝ, приходѧ́щихъ къ тебѣ̀ вѣ́рою, и҆ и҆сцѣлє́нїѧ всѣ̑мъ подаѧ̀ ѻ҆би́льнѡ: ѻ҆́ч҃е на́шъ се́ргїе, молѝ хрⷭ҇та̀ бг҃а, да спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "На ᲂу҆́трени по а҃-й стїхоло́гїи сѣда́ленъ, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Ка́мени запеча́танꙋ:"
|
|
},
|
|
{
|
|
"type": "TEXT",
|
|
"value": "Приспѣ̀ дне́сь па́мѧть твоѧ̀, ѻ҆́ч҃е се́ргїе прехва́льне, веселѧ́щи и҆збра́нное твоѐ ста́до: въ ню́же че́стнѡ пра́зднꙋемъ ѡ҆брѣ́тенїе ст҃ы́хъ твои́хъ моще́й, и҆ ра́достнѡ велича́емъ хрⷭ҇та̀ бг҃а, чꙋде́съ благода́ть тебѣ̀ дарова́вшаго, вопїю́ще: сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва даю́щемꙋ тобо́ю всѣ̑мъ и҆сцѣле́нїе. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Гаврїи́лꙋ вѣща́вшꙋ тебѣ̀, дв҃о, ра́дꙋйсѧ, со гла́сомъ воплоща́шесѧ всѣ́хъ влⷣка, въ тебѣ̀ ст҃ѣ́мъ кївѡ́тѣ, ꙗ҆́коже речѐ пра́ведный дв҃дъ: ꙗ҆ви́ласѧ є҆сѝ ши́ршаѧ нб҃съ, поноси́вши зижди́телѧ твоего̀. Сла́ва все́льшемꙋсѧ въ тѧ̀: сла́ва проше́дшемꙋ и҆зъ тебє̀: сла́ва свободи́вшемꙋ на́съ ржⷭ҇тво́мъ твои́мъ."
|
|
},
|
|
{
|
|
"type": "HEADER",
|
|
"value": "По в҃-й стїхоло́гїи сѣда́ленъ, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Гро́бъ тво́й:"
|
|
},
|
|
{
|
|
"type": "TEXT",
|
|
"value": "Вели́кїй па́стырь на́шъ ны́нѣ да похва́литсѧ, мона́шескїй пресвѣ́тлый сто́лпъ да воспое́тсѧ пѣ́сньми, просвѣща́ѧй на́съ чꙋде́съ свѣтлостьмѝ, ѿ пречестны́хъ є҆гѡ̀ моще́й и҆сходѧ́щими, и҆ ꙗ҆́кѡ росода́тельный ѻ҆́блакъ, погаша́ѧй пла́мень страсте́й на́шихъ, и҆ ѡ҆роша́ѧй вѣ́рныхъ ра́зꙋмы, бжⷭ҇твенный се́ргїй. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ г҃."
|
|
},
|
|
{
|
|
"type": "TEXT",
|
|
"value": "Подо́бенъ: Красотѣ̀ дѣ́вства:"
|
|
},
|
|
{
|
|
"type": "TEXT",
|
|
"value": "Ми́лостивомꙋ хрⷭ҇то́вꙋ ᲂу҆го́дникꙋ, па́стырю на́шемꙋ и҆ ᲂу҆чи́телю, всѝ тебѣ̀ прилѣ́жнѡ мо́лимсѧ, и҆ любо́вїю ѡ҆блобыза́емъ мо́щи твоѧ̑ чєстны́ѧ, и҆ ра́достїю ѿ дꙋшѝ вопїе́мъ: разрꙋшѝ пога́ныхъ нашє́ствїѧ, и҆ покорѝ подъ но́зѣ во́инствꙋ на́шемꙋ, и҆ разорѝ ѻ҆́блакъ страсте́й на́шихъ, и҆ бѣсѡ́вскаѧ мечта̑нїѧ прогонѝ ѿ ста́да ᲂу҆чєни́къ твои́хъ, и҆ всѧ́ческихъ и҆зба́ви и҆скꙋше́нїй любо́вїю тѧ̀ пою́щихъ, се́ргїе прпⷣбне. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ѧнное на тебѣ̀ стра́шное бж҃їе та́инство: и҆́бо неѡб̾име́ннаго заче́нши родила̀ є҆сѝ, пло́тїю ѡ҆бложе́на ѿ пречⷭ҇тыхъ крове́й твои́хъ: є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ и҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, мі́ра красоты̑ и҆ пи̑щи вре́мєнныѧ ѿню́дъ возненави́дѣлъ є҆сѝ, мона́шеское житїѐ па́че возлюби́въ, и҆ а҆́гг҃лѡмъ собесѣ́дникъ бы́ти сподо́билсѧ є҆сѝ, и҆ свѣти́льникъ многосвѣ́тлый рѡссі́йскїѧ землѝ, чꙋдесмѝ ꙗ҆́коже второ́е со́лнце сїѧ́ѧ: но всѣ́хъ на́съ помина́й, соверша́ющихъ свѧще́ннꙋю па́мѧть твою̀. Мы́ бо ча̑да твоѧ̑, и҆ ѻ҆́вцы слове́сныхъ твои́хъ ᲂу҆че́нїй, и҆ тѧ̀ на по́мощь призыва́емъ, просѧ́ще тобо́ю прїѧ́ти ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы со і҆рмосо́мъ на ѕ҃: И҆ прпⷣбнагѡ се́ргїа на и҃. Гла́съ д҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Предѣли́въ пꙋчи́нꙋ чермнꙋ́ю бг҃ъ, фараѡ́на погрꙋзи́вый въ не́й, прове́дъ мѡѷсе́а немо́креннѡ въ пꙋсты́ню, и҆ ѡ҆дожди́въ ма́ннꙋ въ снѣ́дь лю́демъ і҆и҃лєвымъ, ꙗ҆́кѡ си́ленъ."
|
|
},
|
|
{
|
|
"type": "TEXT",
|
|
"value": "Свѣ́томъ твоегѡ̀ трисо́лнечнагѡ бж҃ества̀, содѣ́телю мо́й, просвѣтѝ помрачє́нныѧ ѻ҆́чи дꙋшѝ моеѧ̀, молю́тисѧ, и҆ ѡ҆чи́сти се́рдце моѐ, да возмогꙋ̀ пѣ́ти ѡ҆брѣ́тенїе честны́хъ моще́й прпⷣбнагѡ се́ргїа твоегѡ̀ рачи́телѧ."
|
|
},
|
|
{
|
|
"type": "TEXT",
|
|
"value": "Да́ждь мѝ сло́во, сло́ве бж҃їй, во ѿверзе́нїе ᲂу҆́стъ мои́хъ, и҆ ᲂу҆ѧсни́ ми ѧ҆зы́къ, ми́лостиве, и҆ не помина́й грѣхѡ́въ мои́хъ мно́жества, да твое́ю бл҃года́тїю наставлѧ́емь, возмогꙋ̀ пѣ́ти прпⷣбнаго твоего̀ се́ргїа."
|
|
},
|
|
{
|
|
"type": "TEXT",
|
|
"value": "Ꙗ҆́коже во чре́вѣ ма́терни проглаше́нїемъ трⷪ҇цꙋ проповѣ́далъ є҆сѝ, та́кѡ и҆ та̀ просла́ви тѧ̀: ка́кѡ на мнѡ́га лѣ̑та сокровє́ны земле́ю чєстны́ѧ мо́щи твоѧ̑ нетлѣ̑нны ѡ҆брѣто́шасѧ, благоꙋха́нїѧ вкꙋ́пѣ же и҆ чꙋде́съ вѣ́рныхъ и҆сполнѧ́юще."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пречⷭ҇таѧ влⷣчце, нбⷭ҇ныхъ си́лъ превы́шшаѧ, поро́ждшаѧ сп҃са всѣ́хъ содѣ́телѧ, є҆диносꙋ́щна ѻ҆ц҃ꙋ̀ и҆ дх҃ꙋ, да́ждь на́мъ сло́во, препѣ́таѧ, ꙗ҆́кѡ да возмо́жемъ пѣ́ти тѧ̀, сꙋ́щꙋю застꙋ́пницꙋ ро́да на́шегѡ."
|
|
},
|
|
{
|
|
"type": "TEXT",
|
|
"value": "Катава́сїа: Ѿве́рзꙋ ᲂу҆ста̀ моѧ̑:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Да не хва́литсѧ мꙋ́дръ хвалѧ́йсѧ, но ѡ҆ се́мъ, є҆́же разꙋмѣва́ти, ꙗ҆́кѡ нѣ́сть свѧ́тъ, ꙗ҆́кѡ бг҃ъ на́шъ, возносѧ́й ро́гъ на́шъ, даѧ́й крѣ́пость царє́мъ на́шымъ."
|
|
},
|
|
{
|
|
"type": "TEXT",
|
|
"value": "Крⷭ҇та̀ гдⷭ҇нѧ си́лою ᲂу҆крѣплѧ́ѧсѧ, стра̑сти дꙋшє́вныѧ и҆ плотско́е мꙋдрова́нїе дꙋ́хꙋ покори́лъ є҆сѝ: и҆ сегѡ̀ ра́ди дх҃ꙋ прест҃о́мꙋ прекра́снаѧ ѻ҆би́тель бы́въ, и҆ нераздѣ́льныѧ трⷪ҇цы и҆збра́нно поко́ище."
|
|
},
|
|
{
|
|
"type": "TEXT",
|
|
"value": "Житїе́мъ твои́мъ, є҆́же въ мі́рѣ се́мъ, ѻ҆́бразъ бы́въ всѣ̑мъ, ѿ дꙋшѝ хрⷭ҇тꙋ̀ порабо́тившымсѧ, чистото́ю же ꙗ҆́кѡ со́лнце просїѧ́лъ є҆сѝ: и҆ сегѡ̀ ра́ди стокра́тное возда́нїе ѿ рꙋкꙋ̀ вседержи́телѧ прїѧ́лъ є҆сѝ, бг҃омꙋ́дре се́ргїе. Тѣ́мже тѧ̀ ра́достнѡ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "Прїиди́те, сни́демсѧ въ настоѧ́щее ны́нѣ торжество̀, ᲂу҆́зримъ и҆ ра́дости и҆спо́лнимсѧ, и҆ хрⷭ҇та̀ да просла́вимъ та́кѡ прославлѧ́юща є҆го̀ прославлѧ́ющихъ, и҆ на́мъ стѣ́нꙋ неѡбори́мꙋ и҆ чꙋде́съ пода́телѧ дарова́вшаго, бг҃облаже́ннаго се́ргїа."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Бл҃годаре́нїе, вкꙋ́пѣ же и҆ пѣ́нїе, бг҃ома́ти, ра́дꙋѧсѧ прино́симъ тѝ, ꙗ҆́кѡ родила̀ є҆сѝ пло́тїю бг҃а вседержи́телѧ, тве́рдꙋю предста́тельницꙋ тебѐ хрⷭ҇тїа́нѡмъ дарова́вшаго."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Жите́йское мо́ре преплы́лъ є҆сѝ мно́гимъ воздержа́нїемъ, и҆ приста́лъ є҆сѝ въ ти́хое приста́нище, въ нбⷭ҇ныѧ ѻ҆би́тєли, ꙗ҆́кѡ ѕвѣзда̀ свѣтоза́рна сїѧ́еши, и҆ ꙗ҆́кѡ со́лнце незаходи́мое мо́лнїѧми чꙋде́съ твои́хъ вселе́ннꙋю всю̀ просвѣща́еши, и҆ ѡ҆зарѧ́еши стада̀ ᲂу҆чєни́къ твои́хъ: всѣ̑мъ вѣ̑рнымъ да́рꙋеши грѣхѡ́въ проще́нїе, и҆ житїѧ̀ и҆справле́нїе, и҆ є҆́же на сопроти̑вныѧ ѡ҆долѣ́нїе, ꙗ҆́кѡ да ра́достнѡ ѡ҆бстоѧ́ще честнꙋ́ю и҆ многоцѣле́бнꙋю ра́кꙋ, любе́знѡ лобыза́емъ ст҃ы̑ѧ мо́щи твоѧ̑, и҆ ꙗ҆́кѡ ѻ҆тцꙋ̀ чадолюби́вꙋ вопїе́мъ тѝ: бг҃омꙋ́дре и҆ пребл҃же́нне ѻ҆́ч҃е се́ргїе, молѝ ст҃ꙋ́ю трⷪ҇цꙋ, є҆́йже въ житїѝ се́мъ порабо́талъ є҆сѝ, грѣхѡ́въ ѡ҆ставле́нїе дарова́ти чтꙋ́щымъ любо́вїю ѡ҆брѣ́тенїе честны́хъ моще́й твои́хъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Нб҃са̀ добродѣ́тель твоѧ̀ покры́ла є҆́сть, и҆ землѧ̀ и҆спо́лнисѧ сла́вы твоеѧ̀, хрⷭ҇тѐ. Тѣ́мже вѣ́рнѡ вопїе́мъ: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Ѿ ᲂу҆тро́бы мт҃рни бг҃ꙋ прилѣпи́лсѧ є҆сѝ, бл҃же́нне ѻ҆́ч҃е се́ргїе, и҆ зача́ло мꙋ́дрости стра́хъ бж҃їй въ се́рдцы твое́мъ и҆мѣ́лъ є҆сѝ, ко́рень и҆ ѡ҆снова́нїе всѣ́хъ благи́хъ, нищетꙋ̀ дꙋхо́внꙋю возлюби́въ. Сегѡ̀ ра́ди влⷣка хрⷭ҇то́съ чꙋдесы̀ ѡ҆богати́лъ тѧ̀ є҆́сть."
|
|
},
|
|
{
|
|
"type": "TEXT",
|
|
"value": "Ꙗ҆́кѡ крі́нъ благово́нный, ѿ земны́хъ нѣ́дръ и҆зда́шасѧ чєстны́ѧ мо́щи твоѧ̑, преблаже́нне се́ргїе, и҆ ꙗ҆́кѡ сокро́вище, чꙋде́съ зарю̀ и҆спꙋща́ютъ, веселѧ́ще дꙋхѡ́внаѧ ча̑да твоѧ̑."
|
|
},
|
|
{
|
|
"type": "TEXT",
|
|
"value": "Дне́сь ра́дꙋетсѧ ца́рствꙋющїй гра́дъ москва̀, и҆ весе́лїѧ и҆сполнѧ́етсѧ всѧ̀ вселе́ннаѧ: честна́ѧ же ѻ҆би́тель твоѧ̀, бг҃облаже́нне се́ргїе, хва́лѧщисѧ ᲂу҆краша́етсѧ, и҆мѣ́ющи въ себѣ̀ чєстны́ѧ мо́щи твоѧ̑, ꙗ҆́кѡ сокро́вище неѡскꙋ́дное и҆ пречꙋ́дное."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Дв҃о гдⷭ҇оимени́таѧ, и҆ цр҃и́це всеѧ̀ тва́ри, мно́гими прⷪ҇рѡ́ки пронарече́ннаѧ ро́ждшаѧ цр҃ѧ̀ нбⷭ҇ныхъ си́лъ, да́ждь, гпⷭ҇жѐ, побѣ́дꙋ на врагѝ во́инствꙋ на́шемꙋ, и҆ црⷭ҇твїѧ нбⷭ҇нагѡ всѣ́хъ на́съ сподо́би моли́твами твои́ми."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ча́сть моѧ̀ є҆сѝ, гдⷭ҇и, и҆ сла́ва лица̀ моегѡ̀: ты́ бо мѧ̀ и҆зъ тмы̀ невѣ́дѣнїѧ є҆ди́нъ и҆зба́вилъ є҆сѝ бг҃оразꙋ́мїемъ. И҆ тебѣ̀ молю́сѧ, хрⷭ҇тѐ, да́рꙋй рабꙋ̀ твоемꙋ̀ ми́ръ, ꙗ҆́кѡ чл҃вѣколю́бецъ."
|
|
},
|
|
{
|
|
"type": "TEXT",
|
|
"value": "Ꙗ҆́же въ трⷪ҇цѣ бг҃а на́шегѡ ст҃а́ѧ цр҃ковь и҆ ди́внаѧ впра́вдꙋ, свѣ́тлѡ красꙋ́етсѧ: всенаро́дное мно́жество дꙋхо́внѣ ра́дꙋетсѧ, зрѧ́ще тѧ̀, бг҃омꙋ́дре се́ргїе, рꙋка́ма а҆рхїере́а бж҃їѧ че́стнѡ взе́млема, и҆ на плещꙋ̀ свѧще́нныхъ носи́ма."
|
|
},
|
|
{
|
|
"type": "TEXT",
|
|
"value": "Посѣще́нїѧ ра́ди бг҃ома́тере ра́дости и҆спо́лнивсѧ, свѣ́тъ бы́лъ є҆сѝ ста́дꙋ твоемꙋ̀, и҆ наста́вникъ но́вомꙋ і҆и҃лю, преводѧ̀ на́съ, ѻ҆́ч҃е, ѿ землѝ къ нбⷭ҇нымъ ѻ҆би́телемъ, и҆дѣ́же ны́нѣ наслажда́ешисѧ неизрече́нныѧ свѣ́тлости."
|
|
},
|
|
{
|
|
"type": "TEXT",
|
|
"value": "Ма́тернѧ ᲂу҆тро́ба ѡ҆свѧти́сѧ честны́мъ зача́тїемъ твои́мъ, сла́вный же гра́дъ росто́въ просвѣти́сѧ рождество́мъ твои́мъ: вели́каѧ же твоѧ̀ и҆ многосла́внаѧ ѻ҆би́тель просла́висѧ пѡ́двиги твои́ми, всѧ́ же вселе́ннаѧ напо́лнисѧ чꙋде́съ твои́хъ, прпⷣбне ѻ҆́ч҃е се́ргїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Мт҃и бж҃їѧ пречⷭ҇таѧ, тве́рдаѧ застꙋ́пнице на тѧ̀ надѣ́ющымсѧ, покро́ве и҆ стра́жъ гра́дꙋ на́шемꙋ, и҆ неѡбори́маѧ стѣно̀ свѧтѣ́й ѻ҆би́тели се́й, и҆ ѻ҆рꙋ́жїе спасе́нїѧ ѻ҆те́чествꙋ на́шемꙋ, спасѝ всѣ́хъ благоче́стнѡ покланѧ́ющихсѧ ст҃о́мꙋ ѻ҆́бразꙋ твоемꙋ̀."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Да не погрꙋзи́тъ менє̀ бꙋ́рѧ водна́ѧ, нижѐ пожре́тъ менѐ глꙋбина̀: ѿве́рженъ бо є҆́смь во глꙋбины̑ се́рдца морска́гѡ ѕѡ́лъ мои́хъ. Тѣ́мъ зовꙋ̀, ꙗ҆́кѡ і҆ѡ́на: да взы́детъ ѿ тлѝ ѕѡ́лъ живо́тъ мо́й къ тебѣ̀, бж҃е."
|
|
},
|
|
{
|
|
"type": "TEXT",
|
|
"value": "Ѿ млада́гѡ во́зраста, ѻ҆́ч҃е се́ргїе, хрⷭ҇та̀ возлюби́въ, и҆ сегѡ̀ живонѡ́снымъ стопа́мъ послѣ́дꙋѧ, мі́ра всегѡ̀ и҆збѣ́глъ є҆сѝ, и҆ дости́глъ є҆сѝ въ незаходи́мый свѣ́тъ ра́зꙋма, и҆дѣ́же ны́нѣ дерзнове́ннѡ ст҃ѣ́й трⷪ҇цѣ предстои́ши: ю҆́же ѡ҆ всѣ́хъ на́съ ᲂу҆молѝ."
|
|
},
|
|
{
|
|
"type": "TEXT",
|
|
"value": "Оу҆диви́шасѧ во пло́ти житїю̀ твоемꙋ̀ безпло́тнїи чи́нове, и҆ ᲂу҆страши́шасѧ бѣсѡ́вскаѧ пѡ́лчища ѿ бг҃а да́нныѧ тебѣ̀ на ни́хъ побѣ́ды: мы́ же прославлѧ́емъ тѧ̀, преподо́бне се́ргїе, ѡ҆бстоѧ́ще ра́кꙋ честны́хъ моще́й твои́хъ, и҆ велича́емъ хрⷭ҇та̀, чꙋдесы̀ тѧ̀ просла́вльшаго."
|
|
},
|
|
{
|
|
"type": "TEXT",
|
|
"value": "И҆̀же любо́вїю и҆ чи́стою вѣ́рою чтꙋ́щымъ честно́е и҆ сла́вное ѡ҆брѣ́тенїе ст҃ы́хъ моще́й твои́хъ, и҆ пра́зднꙋющымъ свѣ́тлѡ свѧще́ннꙋю па́мѧть твою̀, ѻ҆́ч҃е преблаже́нне се́ргїе, моли́твами твои́ми всѣ̑мъ полє́знаѧ и҆спросѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Безъ сѣ́мене во чре́вѣ твое́мъ заче́нши творца̀ всѣ́хъ и҆ сп҃си́телѧ, бг҃ома́ти влⷣчце, и҆ ро́ждши пло́тїю хрⷭ҇та̀ бг҃а: є҆го́же моли́твами твои́ми ми́лостива на́мъ сотворѝ, и҆ да сподо́бимсѧ всѝ ꙗ҆вле́нїѧ є҆гѡ̀ и҆ црⷭ҇твїѧ."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Взбра́нной:"
|
|
},
|
|
{
|
|
"type": "TEXT",
|
|
"value": "Дне́сь ꙗ҆́кѡ со́лнце пресвѣ́тло возсїѧ́вше ѿ землѝ чєстны́ѧ мо́щи твоѧ̑, нетлѣ̑нны ѡ҆брѣто́шасѧ, ꙗ҆́кѡ благоꙋха́нный цвѣ́тъ, мно́жествомъ чꙋде́съ сїѧ́юще, и҆ всѣ̑мъ вѣ̑рнымъ и҆сточа́юще разли̑чнаѧ и҆сцѣлє́нїѧ, и҆ веселѧ́ще и҆збра́нное твоѐ ста́до, є҆́же мꙋ́дрѣ собра́въ, до́брѣ па́ствилъ є҆сѝ. Ѡ҆ ни́хже и҆ ны́нѣ трⷪ҇цѣ предстои́ши молѧ́сѧ, и҆ во́инствꙋ побѣди́тєльнаѧ на врагѝ дарова́ти, да всѝ вопїе́мъ тѝ: ра́дꙋйсѧ, се́ргїе бг҃омꙋ́дре."
|
|
},
|
|
{
|
|
"type": "TEXT",
|
|
"value": "І҆́косъ: Сꙋ̑щаѧ въ мі́рѣ преѡби́дѣвъ, премі̑рнаѧ и҆ нетлѣ̑ннаѧ селє́нїѧ, ѻ҆́ч҃е бг҃омꙋ́дре, стѧжа́лъ є҆сѝ, и҆ незави́стными дармѝ ѿ вседержи́тельныѧ десни́цы по числꙋ̀ добродѣ́телей ѡ҆богати́всѧ, и҆ вѣнце́мъ по́чести ꙗ҆́кѡ побѣди́тель вѣнча́всѧ, чꙋдесы̀ всѣ́хъ ѡ҆богаща́еши, пою́щихъ тѝ си́це: ра́дꙋйсѧ, бг҃облаже́нне се́ргїе: ра́дꙋйсѧ, и҆́же пре́жде рожде́нїѧ твоегѡ̀ трикра́ты проглаше́нїемъ просла́вивый ст҃ꙋ́ю трⷪ҇цꙋ: ра́дꙋйсѧ, ꙗ҆́кѡ ѿ младе́нства твоегѡ̀ и҆збра́нный сосꙋ́дъ бы́въ прест҃о́мꙋ дх҃ꙋ: ра́дꙋйсѧ, мїрскꙋ́ю красотꙋ̀ и҆ сла́вꙋ ꙗ҆́кѡ ᲂу҆ме́ты вмѣни́лъ є҆сѝ: ра́дꙋйсѧ, ꙗ҆́кѡ всели́выйсѧ въ пꙋсты́ню: ра́дꙋйсѧ, ꙗ҆́кѡ гра́дъ сїю̀ сотвори́лъ є҆сѝ: ра́дꙋйсѧ, ꙗ҆́кѡ въ не́й хра́мъ прече́стенъ въ похвалꙋ̀ ст҃ы́ѧ трⷪ҇цы воздви́гнꙋвый: ра́дꙋйсѧ, ꙗ҆́кѡ сла́внꙋ и҆ превели́кꙋ ѻ҆би́тель въ сла́вꙋ бж҃їю созда́лъ є҆сѝ: ра́дꙋйсѧ, ꙗ҆́кѡ въ не́й мно́жєства мона́шествꙋющихъ собра́въ, гдⷭ҇еви приве́лъ є҆сѝ: ра́дꙋйсѧ, ꙗ҆́кѡ ми́лостивагѡ посѣще́нїѧ бг҃ома́тере сподо́билсѧ є҆сѝ, то́й бо во пло́ти ꙗ҆́кѡ а҆́гг҃лъ послꙋжи́въ: ра́дꙋйсѧ, ꙗ҆́кѡ гдⷭ҇еви мо́лишисѧ ѡ҆ чтꙋ́щихъ ѡ҆брѣ́тенїе честны́хъ моще́й твои́хъ: ра́дꙋйсѧ, наро́дꙋ на́шемꙋ ѻ҆рꙋ́жїе спасе́нїѧ, и҆ побѣди́тель на врагѝ, є҆го́же соблюда́й вы́нꙋ здра́ва и҆ ве́села, да всѝ твоѐ ѡ҆брѣ́тенїе свѣ́тлѡ пра́зднꙋемъ, ра́достнѡ вопїю́ще: ра́дꙋйсѧ, се́ргїе бг҃омꙋ́дре."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Не преда́ждь на́съ до конца̀ и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѡ҆ста́ви ми́лости твоеѧ̀ ѿ на́съ, гдⷭ҇и бж҃е ѻ҆тє́цъ на́шихъ, препѣ́тый во вѣ́ки."
|
|
},
|
|
{
|
|
"type": "TEXT",
|
|
"value": "Бж҃їимъ хране́нїемъ соблюдено̀ бы́сть честно́е тѣ́ло твоѐ, бг҃омꙋ́дре се́ргїе, мно́гими лѣ́ты земле́ю покрове́но цѣ́ло, и҆ ничи́мже вреди́мо и҆зы́де. Мы́ же ча̑да твоѧ̑ сїѐ зрѧ́ще, ра́достнѡ вопїе́мъ: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Весе́лїѧ ри́зою ѡ҆блече́сѧ, ра́дости вѣнце́мъ вѣнча́сѧ честна́ѧ глава̀ твоѧ̀, свѣ́тлѡ вни́де въ небе́сный черто́гъ цр҃ѧ̀ хрⷭ҇та̀, по́честь прїе́млѧ трꙋдѡ́въ твои́хъ, поѧ̀ гдⷭ҇еви: бл҃гослове́нъ бг҃ъ ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Свѣ́тлымъ житїе́мъ твои́мъ сїѧ́ѧ, чꙋ́дне се́ргїе, въ жи́зни се́й, безпло́тныхъ чи́ны дости́глъ є҆сѝ, ны́нѣ же съ ни́ми ликꙋ́еши ᲂу҆ прⷭ҇то́ла всѣ́хъ бг҃а: просѝ грѣхѡ́въ ѡ҆ставле́нїе дарова́ти, соверша́ющымъ любо́вїю па́мѧть ѡ҆брѣ́тенїѧ честны́хъ моще́й твои́хъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Прострѝ моле́нїе, пречⷭ҇таѧ дв҃о влⷣчце, къ ро́ждшемꙋсѧ и҆зъ тебє̀ бг҃ꙋ на́шемꙋ, и҆ тобо́ю а҆да́ма назда́вшемꙋ, и҆ на́ше є҆стество̀ ѡ҆бнови́вшꙋ, да всѝ вопїе́мъ тѝ: бл҃гослове́нъ, пречⷭ҇таѧ, пло́дъ чре́ва твоегѡ̀."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Всѧ́чєскаѧ, влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. Тѣ́мъ всѝ вопїе́мъ, воспѣва́юще: благослови́те, дѣла̀ гдⷭ҇нѧ, непреста́ннѡ гдⷭ҇а."
|
|
},
|
|
{
|
|
"type": "TEXT",
|
|
"value": "Весели́тсѧ дне́сь цр҃ковь бж҃їѧ, ꙗ҆́кѡ ца́рскою порфѵ́рою ѡ҆дѣва́ющисѧ: честна́ѧ же ѻ҆би́тель твоѧ̀, бг҃облаже́нне ѻ҆́ч҃е се́ргїе, ꙗ҆́кѡ многоцѣ́нно сокро́вище и҆мꙋ́щи честно́е тѣ́ло твоѐ, разли̑чна и҆сцѣлє́нїѧ подава́юще всѣ̑мъ, вѣ́рнѡ пою́щымъ: бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а."
|
|
},
|
|
{
|
|
"type": "TEXT",
|
|
"value": "Свѣ́томъ небе́снымъ просвѣща́етсѧ хра́мъ бж҃їй, и҆ въ не́мъ благочести́выхъ собо́ри ра́дꙋютсѧ, ви́дѧще тѧ̀, бг҃облаже́нне ѻ҆́ч҃е се́ргїе, а҆рхїере́йскима рꙋка́ма носи́ма и҆ ѿ всѣ́хъ вѣ́рныхъ покланѧ́ема, хрⷭ҇тꙋ̀ вопїю́щихъ, бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а."
|
|
},
|
|
{
|
|
"type": "TEXT",
|
|
"value": "Съ нбⷭ҇ными вѡ́инствы ны́нѣ трⷪ҇цѣ предстоѧ̀, и҆ съ ли́ки всѣ́хъ ст҃ы́хъ водворѧ́ѧсѧ, вѣ́рнѡ почита́ющымъ па́мѧть твою̀, грѣхѡ́въ проще́нїе и҆спросѝ: и҆ свѣ́тлѡ пра́зднꙋющымъ ѡ҆брѣ́тенїе честны́хъ моще́й твои́хъ, спасе́нїе на́мъ да́рꙋй, да ра́дꙋющесѧ пое́мъ: бл҃гослови́те всѧ̑ дѣла̀ гдⷭ҇нѧ непреста́ннѡ гдⷭ҇а."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Превѣ́чный во чре́вѣ твое́мъ, дв҃о чⷭ҇таѧ, зачина́етсѧ, и҆ соверше́нный бг҃ъ, и҆́же и҆зъ тебє̀ неискꙋсобра́чныѧ ѻ҆трокови́цы млⷣнецъ пло́тїю роди́всѧ, соверше́нъ бг҃ъ и҆ человѣ́къ, человѣ̑ки ви́дитсѧ, сопрⷭ҇то́ленъ сы́й ѻ҆ц҃ꙋ̀ и҆ дх҃ꙋ: є҆го́же превозно́симъ во вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Мѡѷсе́й на горѣ̀ неѡпали́мꙋю кꙋпинꙋ̀ ви́дѣ, і҆ѡ́сифъ въ верте́пѣ неизрече́нное ржⷭ҇тво̀ слы́ша, нескве́рнаѧ дв҃о, безмꙋ́жнаѧ мт҃и, пѣ́сньми тѧ̀, бцⷣе, велича́емъ."
|
|
},
|
|
{
|
|
"type": "TEXT",
|
|
"value": "Взѧ́тсѧ къ высотѣ̀ нбⷭ҇нѣй добродѣ́тельми, бг҃омꙋ́дре ѻ҆́ч҃е се́ргїе, и҆ въ весе́лїи се́рдца предстои́ши прⷭ҇то́лꙋ ст҃ы́ѧ трⷪ҇цы, не забꙋ́ди ча̑дъ твои́хъ. Соверше́нно здра́вїе и҆ ди́внꙋ побѣ́дꙋ да́рꙋй на врагѝ во́инствꙋ на́шемꙋ, да вси́ тѧ пѣ́сньми непреста́ннѡ велича́емъ."
|
|
},
|
|
{
|
|
"type": "TEXT",
|
|
"value": "Пресла́внаѧ па́мѧть твоѧ̀, бг҃оно́се, па́че лꙋ̑чъ со́лнечныхъ, вѣ̑рныѧ просвѣща́етъ, благоче́стнѡ тѧ̀ почита́ющыѧ, и҆ вѣ́рою и҆ любо́вїю покланѧ́ющыѧсѧ ра́цѣ честны́хъ моще́й твои́хъ, и҆ въ пѣ́снехъ пою́щыѧ тѧ̀, бг҃омꙋ́дре се́ргїе."
|
|
},
|
|
{
|
|
"type": "TEXT",
|
|
"value": "Рꙋко́ю мое́ю недосто́йною, и҆ любо́вїю серде́чною приноси́мое тебѣ̀ ма́лое моле́нїе, прїимѝ, бг҃облаже́нне ѻ҆́ч҃е се́ргїе, дꙋша́мъ на́шымъ спасе́нїе, и҆ тѣлесє́мъ здра́вїе, и҆ мі́рꙋ ми́ръ моли́твами твои́ми да́рꙋй: да тѧ̀ мно́жае въ пѣ́снехъ велича́емъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѽ дв҃о влⷣчце всепѣ́таѧ, мт҃и хрⷭ҇та̀ бг҃а на́шегѡ! Спасѝ всѧ̑ на тѧ̀ надѣ́ющыѧсѧ, и҆ къ твоемꙋ̀ застꙋпле́нїю притека́ющыѧ, и҆ благоче́стнѡ тѧ̀ сꙋ́щꙋю бцⷣꙋ въ пѣ́снехъ велича́ющыѧ."
|
|
},
|
|
{
|
|
"type": "HEADER",
|
|
"value": "Свѣти́ленъ."
|
|
},
|
|
{
|
|
"type": "TEXT",
|
|
"value": "Подо́бенъ: Жєны̀ ᲂу҆слы́шите:"
|
|
},
|
|
{
|
|
"type": "TEXT",
|
|
"value": "Дне́сь соше́дшесѧ нбⷭ҇наѧ со земны́ми ра́дꙋютсѧ, и҆ вѣ́рныхъ совокꙋплє́нїѧ со свѧще́нными, вкꙋ́пѣ же и҆ мона̑хи, весе́лїѧ дꙋхо́внагѡ и҆ дарѡ́въ чꙋде́съ твои́хъ и҆сполнѧ́ютсѧ, прпⷣбне се́ргїе, въ твоѐ ѡ҆брѣ́тенїе, сла́вѧще гдⷭ҇а. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Премꙋ́дрость ѵ҆поста́снꙋю, сло́во ѻ҆́ч҃ее присносꙋ́щное, врача̀ человѣ́кѡмъ хрⷭ҇та̀ ро́ждшаѧ, дв҃о пречⷭ҇таѧ, ꙗ҆́звы и҆ стрꙋ́пы се́рдца моегѡ̀ и҆сцѣлѝ, лю̑тыѧ и҆ многовре́мєнныѧ, и҆ страстна̑ѧ взыгра̑нїѧ ᲂу҆ти́ши пло́ти моеѧ̀."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры на д҃, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆́кѡ до́блѧ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ ѕвѣзда̀ многосвѣ́тлаѧ хрⷭ҇та̀ сл҃нца незаходи́магѡ, зарѧ́ми твои́хъ добродѣ́телей всѣ́хъ просвѣща́еши, блиста́нїемъ чꙋде́съ всѧ̑ концы̀ ѡ҆зарѧ́еши, бг҃облаже́нне и҆ бг҃омꙋ́дре ѻ҆́ч҃е се́ргїе, вѣ́рою чтꙋ́щихъ свѧтꙋ́ю па́мѧть твою̀, и҆ честно́е ѡ҆брѣ́тенїе моще́й твои́хъ, въ пѣ́снехъ свѣ́тлѡ почита́ющихъ. Два́жды."
|
|
},
|
|
{
|
|
"type": "TEXT",
|
|
"value": "Ꙗ҆́кѡ свѣти́льникъ многосвѣ́тлый, и҆ болѧ́щымъ вра́чь преизрѧ́дный, и҆ мона́шескїй па́стырь доброразсꙋ́дный показа́лсѧ є҆сѝ, во́инствꙋ на́шемꙋ ѻ҆рꙋ́жїе спасе́нїѧ, и҆ на врагѝ побѣ́да, и҆ всеѧ̀ рѡссі́йскїѧ землѝ ᲂу҆добре́нїе, и҆ моле́бникъ вѣ́ренъ ѡ҆ всѣ́хъ, вѣ́рою и҆́мѧ твоѐ, се́ргїе, призыва́ющихъ, и҆ любо́вїю пра́зднꙋющихъ ѡ҆брѣ́тенїе честны́хъ моще́й твои́хъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ цвѣ́тъ бл҃гово́ненъ, и҆ кади́ло благоꙋха́нїѧ, и҆ ꙗ҆́кѡ бжⷭ҇твеннаѧ мѷрополо́жница, за́пахъ масте́й твои́хъ во всѧ̑ страны̑ и҆спꙋща́еши, и҆ мо́лнїѧми чꙋде́съ твои́хъ лю́ди хрⷭ҇тоимєни́тыѧ просвѣща́еши, вѣ́рою соверша́ющыѧ свѧще́ннꙋю па́мѧть твою̀, прпⷣбне и҆ всеблаже́нне се́ргїе."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Дне́сь вѣ́рнїи хрⷭ҇тоимени́тїи наро́ди соше́дшесѧ, ра́дости и҆спо́лнимсѧ, и҆ ли́къ соста́вльше, дꙋхо́внѣ пра́зднꙋемъ, во благонаро́читое торжество̀ прпⷣбнагѡ ѻ҆тца̀, во ѱалмѣ́хъ и҆ пѣ́нїихъ хрⷭ҇тꙋ̀ вопїю́ще: ты̀ проѧви́лъ є҆сѝ, влⷣко хрⷭ҇тѐ, послѣ́днемꙋ ро́дꙋ на́шемꙋ, такова́го чꙋде́съ дарова́телѧ, вели́каго застꙋ́пника всеѧ̀ землѝ рѡссі́йскїѧ: но, ѽ прпⷣбне, и҆ бг҃омꙋ́дре ѻ҆́ч҃е се́ргїе! Моли́сѧ прилѣ́жнѡ хрⷭ҇тꙋ̀ бг҃ꙋ на́шемꙋ за всѣ́хъ, вѣ́рою и҆ любо́вїю тѧ̀ почита́ющихъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ: Славосло́вїе вели́кое. И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и, бл҃жє́нна, ѿ канѡ́на прпⷣбнагѡ пѣ́снь г҃-ѧ и҆ ѕ҃-ѧ."
|
|
},
|
|
{
|
|
"type": "HEADER",
|
|
"value": "Прокі́менъ, а҆пⷭ҇лъ и҆ а҆ллилꙋ́їа прпⷣбнагѡ."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе лꙋкѝ, зача́ло к҃д."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю:"
|
|
}
|
|
] |