ponomar-pwa/static/data/shared/menaion-daily/08-24/1.json

[
 {
  "type": "HEADER",
  "value": "А҆́ѵгꙋста к҃д"
 },
 {
  "type": "HEADER",
  "value": "Ст҃а́гѡ сщ҃енномꙋ́ченика є҆ѵтѵ́ха, ᲂу҆ченика̀ ст҃а́гѡ і҆ѡа́нна бг҃осло́ва."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры є҆ѵтѵ́ха, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Мꙋ́чениче є҆ѵтѵ́хе бл҃же́нне, ᲂу҆чи́всѧ свѧще́ннѡ сло́ва ᲂу҆ честна́гѡ ᲂу҆ченика̀, бг҃ослове́снагѡ проповѣ́дника, ѿ негѡ̀ всѧ́кагѡ ᲂу҆че́нїѧ свѧще́ннагѡ наꙋчи́лсѧ є҆сѝ, и҆ свѣ́тъ ꙗ҆ви́лсѧ є҆сѝ, ѡ҆свѣща́ѧ бл҃года́тїю всѧ́кꙋю мы́сль, бг҃ослѡ́вїи твои́ми свѧще́нными. Тѣ́мже свѧтꙋ́ю твою̀ па́мѧть почита́емъ."
 },
 {
  "type": "TEXT",
  "value": "Пре́лести низложи́лъ є҆сѝ ᲂу҆твержде́нїе по́двигомъ тве́рдымъ терпѣ́нїѧ, пребога́те, и҆ ᲂу҆́зами и҆ ра́нами, и҆ сла́вною сме́ртїю: тѣ́мже безсме́ртїе полꙋчи́лъ є҆сѝ, съ ли̑ки мч҃никъ, и҆ со а҆́гг҃льскими чи́ны водворѧ́ѧсѧ, прича́стїемъ лꙋ́чшимъ бг҃олѣ́пнѡ, до́брѣ ѡ҆божа́емь и҆ соверше́ннѣ."
 },
 {
  "type": "TEXT",
  "value": "Въ темни́цѣ затворѧ́емь, хлѣ́бъ прїѧ́лъ є҆сѝ жи́зни съ нб҃сѐ, сла́вне, вве́рженъ же бы́въ въ пла́мень, неѡпале́нъ пребы́лъ є҆сѝ: ра̑ны под̾ѧ́тъ лю́тѣ стрꙋ́жемь, стремлє́нїѧ ѕвѣре́й моли́твами ᲂу҆кроти́лъ є҆сѝ. Мече́мъ глава̀ твоѧ̀ ѿсѣ́чена бы́сть, кровьмѝ къ нб҃сѝ ѡ҆блегча́емь, ꙗ҆́кѡ бжⷭ҇твенною колесни́цею."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Спаси́ мѧ, влⷣчце пречⷭ҇таѧ, ꙗ҆́же сп҃са хрⷭ҇та̀ неизрече́ннѡ ро́ждшаѧ: тѧ́ бо є҆ди́нꙋ стѧжа́хъ предста́тельницꙋ, и҆ неѡбори́мꙋю стѣ́нꙋ, и҆ покро́въ и҆ ра́дованїе, и҆ дꙋшѝ моеѧ̀ бжⷭ҇твенное ᲂу҆тѣше́нїе. Ты̀ ᲂу҆̀бо мѧ̀ и҆зба́ви неꙋсыпа́ющагѡ че́рвїѧ, и҆ ѻ҆гнѧ̀ вѣ́чнꙋющагѡ, мт҃и хрⷭ҇та̀ бг҃а."
 },
 {
  "type": "TEXT",
  "value": "Крⷭ҇тобг҃оро́диченъ: Что̀ зри́мое видѣ́нїе, є҆́же мои́ма ѻ҆чи́ма ви́дитсѧ, ѽ влⷣко! Содержа́й всю̀ тва́рь, на дре́во воздви́женъ бы́въ, и҆ ᲂу҆мира́еши всѣ̑мъ даѧ́й жи́знь, бцⷣа пла́чꙋщисѧ глаго́лаше: є҆гда̀ ᲂу҆зрѣ̀ на крⷭ҇тѣ̀ возноси́ма, и҆зъ неѧ̀ неизрече́ннѡ возсїѧ́вшаго бг҃а и҆ чл҃вѣ́ка."
 },
 {
  "type": "HEADER",
  "value": "На стїхо́внѣ, ѻ҆ктѡ́иха. Тропа́рь, гла́съ д҃:"
 },
 {
  "type": "TEXT",
  "value": "И҆ нра́вѡмъ прича́стникъ, и҆ прⷭ҇то́лѡмъ намѣ́стникъ а҆по́столѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, сщ҃енномꙋ́чениче є҆ѵтѵ́хе, молѝ хрⷭ҇та̀ бг҃а, спасти́сѧ дꙋша́мъ на́шымъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ на д҃. Творе́нїе і҆ѡ́сифово. Гла́съ и҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща."
 },
 {
  "type": "TEXT",
  "value": "А҆пⷭ҇лѡмъ и҆ мꙋ́ченикѡмъ сожи́тель ꙗ҆влѧ́емый, и҆ бж҃е́ственныѧ зарѝ всегда̀ и҆сполнѧ́емь, честны́й тво́й дне́сь пра́здникъ творѧ́щыѧ, свѣ́та прича́стники покажѝ, мꙋ́чениче є҆ѵтѵ́хе достосла́вне."
 },
 {
  "type": "TEXT",
  "value": "Возлю́бленнагѡ ᲂу҆ченика̀, бл҃же́нне, ᲂу҆чени́къ бы́въ бл҃гоче́стнѡ, и҆ тогѡ̀ нра́вы вельмѝ подража́ѧ, гдⷭ҇а возлюби́лъ є҆сѝ, тогѡ̀ бжⷭ҇твєнныѧ зако́ны и҆спо́лнивъ: и҆ страсте́мъ сегѡ̀, є҆ѵтѵ́хе, ᲂу҆подо́билсѧ є҆сѝ."
 },
 {
  "type": "TEXT",
  "value": "Зако́нꙋ бжⷭ҇твенномꙋ бл҃гоче́стнѡ повинꙋ́ѧсѧ, пло́ть ᲂу҆мертви́лъ є҆сѝ по́стными болѣ́зньми, мі́ра ᲂу҆далѧ́ѧсѧ, и҆ въ гора́хъ, сла́вне, пребыва́ѧ, мꙋ́чениче, и҆ дꙋ́шꙋ ѡ҆чища́ѧ, и҆ бг҃ови́дѣнъ познава́емь."
 },
 {
  "type": "TEXT",
  "value": "Бг҃оро́диченъ: На тѧ̀, дв҃о, наде́ждꙋ положи́хъ спасе́нїѧ моегѡ̀, грѣхо́вныѧ скве́рны всего́ мѧ ѡ҆мы́й, и҆ чи́ста содѣ́лай сн҃ꙋ твоемꙋ̀ и҆зрѧ́днѡ бг҃оꙋгожда́юща, и҆ творѧ́ща сегѡ̀ всесвѧтꙋ́ю во́лю."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче."
 },
 {
  "type": "TEXT",
  "value": "Ѡ҆блиста́юще свѣ́томъ проповѣ́данїѧ премꙋ́драгѡ, ꙗ҆́коже со́лнца ѡ҆брѣ́тъ па́ѵла ходи́ти съ ни́мъ: ꙗ҆́кѡ ѕвѣзда̀ ве́лїѧ просвѣща́ѧ се́рдца, бл҃же́нне бг҃омꙋ́дре, дх҃омъ."
 },
 {
  "type": "TEXT",
  "value": "Бг҃осло́вѡвъ ѡ҆снова́нїе, ᲂу҆ченикѡ́въ ве́рхъ і҆ѡа́ннъ при́сный дрꙋ́гъ сп҃совъ, ѿ землѝ бж҃е́ственнѡ прело́жсѧ, тебѣ̀ бж҃їе ста́до, блаже́нне, пастѝ предадѐ."
 },
 {
  "type": "TEXT",
  "value": "Прекра́сенъ и҆ свѣтоза́ренъ и҆ и҆спо́лненъ дх҃а бжⷭ҇твеннагѡ, сꙋдѧ́щемꙋ непра́веднѡ предста́лъ є҆сѝ, ѡ҆блича́ѧ тогѡ̀ ѕлоче́стїе, пребога́те, и҆ хрⷭ҇то́во бжⷭ҇твенное и҆сповѣ́даѧ вочл҃вѣ́ченїе."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ, ꙗ҆́же є҆ди́на ра́дость неска́заннѡ ро́ждши: ра́дꙋйсѧ, колесни́це и҆ ѻ҆́блаче сло́ва: ра́дꙋйсѧ, мт҃и бж҃їѧ, дв҃о неискꙋсобра́чнаѧ: ра́дꙋйсѧ, прпⷣбныхъ сла́во: ра́дꙋйсѧ мꙋ́ченикѡвъ вѣнча́нїе."
 },
 {
  "type": "HEADER",
  "value": "Сѣда́ленъ, гла́съ г҃."
 },
 {
  "type": "TEXT",
  "value": "Подо́бенъ: Бжⷭ҇твенныѧ вѣ́ры:"
 },
 {
  "type": "TEXT",
  "value": "Сїѧ́нїе ѡ҆блиста́въ бг҃оразꙋ́мїѧ, тмꙋ̀ разори́лъ є҆сѝ многобо́жїѧ, мч҃нически сконча́въ тече́нїе твоѐ: и҆ и҆сцѣле́нїй и҆сточа́еши дарова̑нїѧ, приходѧ́щихъ ѡ҆чища́еши недꙋ́ги, мꙋ́чениче сла́вне, хрⷭ҇та̀ бг҃а молѝ дарова́ти дꙋша́мъ на́шымъ ве́лїю ми́лость."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречи́стаѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость."
 },
 {
  "type": "TEXT",
  "value": "Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;"
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче."
 },
 {
  "type": "TEXT",
  "value": "Всѣ́мъ ᲂу҆мо́мъ ѿше́дъ ко гдⷭ҇ꙋ, не чꙋ́вствоваше всю́дꙋ бїе́мь и҆ растерза́емь лю́тѣ: и҆ ꙗ҆́коже благово́нное кади́ло, достосла́вне, благово́нїѧ предстоѧ́щыѧ и҆спо́лнилъ є҆сѝ бж҃е́ственнагѡ, дѣ́йствомъ, бг҃омꙋ́дре, дх҃а."
 },
 {
  "type": "TEXT",
  "value": "Бг҃омъ, мꙋ́чениче бг҃омꙋ́дре, соблюде́мь, въ темни́цѣ же свѧ́занъ сѣдѧ̀, хлѣ́бъ нбⷭ҇ный ви́димѡ ра́дꙋѧсѧ прїѧ́лъ є҆сѝ, бг҃ꙋ тѧ̀ ᲂу҆крѣплѧ́ющꙋ є҆ди́номꙋ подвигополо́жникꙋ, є҆ѵтѵ́хе бг҃оно́се: є҆гѡ́же стра́сти бжⷭ҇твеннѣй поревнова́лъ є҆сѝ."
 },
 {
  "type": "TEXT",
  "value": "Твоѧ̑ чⷭ҇тна̑ѧ ᲂу҆ста̀ ѿве́рзлъ дх҃омъ, предъ сꙋди́щемъ, премꙋ́дре, стоѧ̀ мꙋчи́телей, и҆́стиннꙋю вѣ́рꙋ трⷪ҇ческꙋю ᲂу҆ѧсни́лъ є҆сѝ ꙗ҆́вѣ: і҆́дѡльскꙋю же пре́лесть ѡ҆бличи́лъ є҆сѝ, блаже́нне, и҆ мꙋчи́телей безбо́жныхъ мꙋдрова̑нїѧ."
 },
 {
  "type": "TEXT",
  "value": "По мно́гихъ и҆ны́хъ ра́нахъ тѣле́сныхъ, бжⷭ҇твенною любо́вїю, блаже́нне, распалѧ́емь, запале́нный пла́мень ѻ҆гнѧ̀ ра́дꙋѧсѧ проше́лъ є҆сѝ, преще́нїемъ мꙋчи́телѧ ника́коже ѡ҆пали́всѧ: и҆́бо бжⷭ҇твенна тѧ̀ роса̀, є҆ѵтѵ́хе, съ нб҃сѐ ѡ҆роша́ше."
 },
 {
  "type": "TEXT",
  "value": "Бг҃оро́диченъ: Въ жена́хъ є҆ди́на дв҃а пребыла̀ є҆сѝ, и҆ пре́жде ржⷭ҇тва̀ и҆ по ржⷭ҇твѣ̀: бг҃ъ бо бѣ̀ ѡ҆бновлѧ́ѧ є҆стєства̀ па́че сло́ва, и҆зъ тебє̀ неизрече́ннѡ воплоща́емь, и҆́же горѣ̀ пре́жде вѣ̑къ, и҆ на землѝ въ послѣ̑днѧѧ лѣ̑та ро́ждсѧ, пренепоро́чнаѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ."
 },
 {
  "type": "TEXT",
  "value": "Сло́вомъ бжⷭ҇твеннымъ ѡ҆бога́щсѧ, всѣ̑мъ тре́бꙋющымъ, мꙋ́чениче, пода́лъ є҆сѝ, и҆ хрⷭ҇то́во ста́до свѧще́нникъ бы́въ, ᲂу҆па́слъ є҆сѝ, ᲂу҆тѣша́ѧ, наказꙋ́ѧ и҆ наставлѧ́ѧ ко спасе́нїю, є҆ѵтѵ́хе страстоно́сче многострада́льне."
 },
 {
  "type": "TEXT",
  "value": "Дꙋшепа́гꙋбнꙋю пре́лесть си́лою бжⷭ҇твеннагѡ дх҃а ѿтрѧ́съ, ко хрⷭ҇тꙋ̀ пристꙋпи́лъ є҆сѝ, и҆ мно́жєства семꙋ̀, мꙋ́чениче, приве́лъ є҆сѝ спаса́емыхъ вѣ́рою, твои́ми честны́ми бг҃овѣща̑нїи, є҆ѵтѵ́хе, страда́льцєвъ ᲂу҆добре́нїе."
 },
 {
  "type": "TEXT",
  "value": "Ꙗ҆́кѡ красны̀ но́ги твоѧ̑, преблаже́нне, стезе́ю ходи́вшыѧ свидѣ́нїй бжⷭ҇твенныхъ, и҆ въ си́хъ до́брѣ стꙋпа́вшыѧ, и҆ къ широтѣ̀ вели́цѣй нбⷭ҇нагѡ црⷭ҇тва дости́гшыѧ, мꙋ́чениче сла́вне."
 },
 {
  "type": "TEXT",
  "value": "Бг҃оро́диченъ: Дв҃о мт҃и ѻ҆трокови́це, непостижи́маго пло́тїю ро́ждши, а҆́гг҃лѡвъ сла́во, и҆ де́мѡнѡвъ ꙗ҆́зва, бг҃оневѣ́сто, моѐ се́рдце ᲂу҆ѧ́звенное грѣхмѝ, и҆сцѣле́нїѧ бжⷭ҇твеннагѡ сподо́би."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀."
 },
 {
  "type": "TEXT",
  "value": "Во є҆фе́сѣ прїе́мь є҆́же за хрⷭ҇та̀ кончи́нꙋ, ѿ є҆фе́са, мꙋ́дре, ᲂу҆́зникъ ᲂу҆стреми́лсѧ є҆сѝ, и҆ во ѻ҆те́чествїи твое́мъ честнѣ́мъ страда́ньми ᲂу҆краша́емь, почи́лъ є҆сѝ."
 },
 {
  "type": "TEXT",
  "value": "Хра́мъ сы́й бж҃їй красе́нъ и҆ пречи́стъ, хра́мы і҆́дѡльскїѧ сквє́рныѧ низложи́лъ є҆сѝ бл҃года́тїю, и҆ къ нбⷭ҇номꙋ хра́мꙋ возне́слсѧ є҆сѝ, є҆ѵтѵ́хе, бг҃ꙋ предста́ти."
 },
 {
  "type": "TEXT",
  "value": "Оу҆крѣпи́ тѧ пꙋте́мъ ше́ствꙋюща бжⷭ҇твенный а҆́гг҃лъ, предглаго́лѧ тебѣ̀ ꙗ҆́вѣ хотѧ̑щаѧ бы́ти, є҆ѵтѵ́хе пребога́те, равноа́гг҃льнꙋ сꙋ́щꙋ, и҆ пло́ти внѣ̀ дх҃омъ."
 },
 {
  "type": "TEXT",
  "value": "Бг҃оро́диченъ: Оу҆ма̀ моегѡ̀ и҆звращє́нїѧ, и҆ дꙋшѝ двиза̑нїѧ стра̑стнаѧ и҆ лю̑таѧ, дв҃о, и҆спра́ви: и҆ цѣ́ла мѧ̀ соблюдѝ ѿ всегда̀ неми́лостивнѡ находѧ́щихъ мѝ."
 },
 {
  "type": "HEADER",
  "value": "Конда́къ, гла́съ ѕ҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "А҆пⷭ҇лѡвъ сопресто́льникъ, и҆ свѧти́телей красота̀ бы́въ, є҆ѵтѵ́хїе, мꙋ́ченически просла́вилсѧ є҆сѝ, просїѧ́лъ є҆сѝ ꙗ҆́кѡ со́лнце, всѣ́хъ просвѣща́ѧ, и҆ разори́лъ є҆сѝ безбо́жїѧ но́щь глꙋбо́кꙋю: сегѡ̀ ра́ди тѧ̀ почита́емъ, ꙗ҆́кѡ бж҃е́ственнаго вои́стиннꙋ свѧщеннотаи́нника хрⷭ҇то́ва."
 },
 {
  "type": "TEXT",
  "value": "І҆́косъ: Ꙗ҆́кѡ бж҃їй свѧще́нникъ, ꙗ҆́кѡ слꙋжи́тель нбⷭ҇ный, ꙗ҆́кѡ па́стырей па́стырь, ꙗ҆́кѡ страда́лецъ непобѣди́мь, съ вы́шними ны́нѣ ли̑ки водворѧ́ѧсѧ, свѧщеннотаи́нниче, свѣ́тъ мѝ низпослѝ, и҆ сло́во мѝ вдохнѝ, восхвали́ти бжⷭ҇твєнныѧ стрⷭ҇ти твоѧ̑, и҆ гонє́нїѧ, и҆ борє́нїѧ и҆зрѧ̑днаѧ и҆ мꙋ́жествєннаѧ, сломлє́нїѧ косте́й, ᲂу҆дѡ́въ ссѣчє́нїѧ: и҆́хже ра́ди бы́лъ є҆сѝ, блаже́нне, причте́нъ а҆́гг҃лѡмъ, ꙗ҆́кѡ бж҃е́ственный вои́стиннꙋ свѧщеннотаи́нникъ хрⷭ҇то́въ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Бж҃їимъ манове́нїемъ ѻ҆́гнь ᲂу҆гасѐ, на па́гꙋбꙋ тебѣ̀ разжже́нный, бг҃омꙋ́дре: съ нб҃се́ бо гро́мъ слы́шашесѧ, и҆ снѣ̑жныѧ ка̑пли пꙋща́хꙋсѧ, невѣ́дꙋщыѧ хрⷭ҇та̀ покрыва́юще."
 },
 {
  "type": "TEXT",
  "value": "Крѣ́пкѡ стрꙋ́жемь, благово́нїѧ мѵ́ро, мꙋ́чениче, и҆спꙋсти́лъ є҆сѝ, во благово́нїе стрⷭ҇те́й и҆злїѧ́вшагѡсѧ. И҆́бо прите́къ къ сло́вꙋ и҆ содѣ́телю, къ немꙋ́же взыва́лъ є҆сѝ: благослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Житїѐ твоѐ непоро́чно, мꙋче́нїе, мꙋ́дре, пречꙋ́дно, и҆ спаси́тельно всѣ̑мъ пристꙋпа́ющымъ моще́й твои́хъ ко ст҃ѣ́й ра́цѣ, и҆сцѣлє́нїѧ точа́щи, и҆ сквернє́нїѧ страсте́й мно́гихъ и҆зима́ющи."
 },
 {
  "type": "TEXT",
  "value": "Бг҃оро́диченъ: Разꙋмѣ́вше и҆здале́ча честні́и прⷪ҇ро́цы та́инства твоегѡ̀ неизрече́ннꙋю глꙋбинꙋ̀, многоѻбра́знѡ всѣ̑мъ ᲂу҆ѧсни́ша твоѐ ржⷭ҇тво̀, дв҃о, взыва́юще: бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Рꙋ́цѣ просте́ръ, сла́вне, ко хрⷭ҇тꙋ̀ бг҃ꙋ на́шемꙋ, посредѣ̀ сꙋди́ща борѧ́сѧ со львы̀, невреди́мь пребы́лъ є҆сѝ, ꙗ҆́коже прⷪ҇ро́къ пре́жде данїи́лъ, а҆́гг҃ла при́снѡ соблюда́юща тѧ̀ и҆мѣ́ѧ, и҆ поѧ̀ непреста́ннѡ: свѧще́нницы бл҃гослови́те, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Ско́тски ви́дѣ тѧ̀ беззако́нными ѡ҆сꙋжде́на, ѕвѣ́рь твое́й ᲂу҆гото́вленный поги́бели ꙗ҆́снѡ провѣща̀ всеси́льнымъ манове́нїемъ, и҆ вели̑чїѧ сп҃са хрⷭ҇та̀ проповѣ́да ᲂу҆дивлѧ́ѧ вопїю́щыѧ: свѧще́нницы бл҃гослови́те, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Си́лою бж҃їею и҆ бл҃года́тїю по́двигъ вели́кїй мꙋче́нїѧ проше́дъ, вѣнцы̀ ᲂу҆лꙋчи́лъ є҆сѝ побѣ́ды ра́дꙋѧсѧ, и҆ ликѡ́мъ приче́лсѧ є҆сѝ всѣ́хъ а҆пⷭ҇лъ и҆ мꙋ́чєникъ, съ ни́миже вопїе́ши непреста́ннѡ: свѧще́нницы бл҃гослови́те, лю́дїе превозноси́те во всѧ̑ вѣ́ки."
 },
 {
  "type": "TEXT",
  "value": "Бг҃оро́диченъ: Оу҆мерщвле́ннꙋю ᲂу҆грызе́нїемъ дꙋ́шꙋ мою̀ ѕмїи́нымъ, є҆ди́на ꙗ҆вле́ннѡ живо́тъ ро́ждшаѧ, всенепоро́чнаѧ, ѡ҆живѝ, и҆ твори́ти сподо́би на́съ ра́ди и҆зъ тебє̀, дв҃о, ро́ждшагѡсѧ хотѣ́нїе, вопїю́щꙋ: свѧще́нницы благослови́те, лю́дїе превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ."
 },
 {
  "type": "TEXT",
  "value": "И҆сцѣлє́нїѧ и҆сточа́еши разли̑чна, и҆ недꙋ́ги ᲂу҆тиша́еши тѧ́жкїѧ, ѿ хрⷭ҇та̀ бл҃года́ть прїи́мъ вои́стиннꙋ, до́брѣ подви́гсѧ, и҆ побѣди́въ врагѝ, бг҃омꙋ́дре стрⷭ҇тоте́рпче, а҆́гг҃лѡвъ сограждани́не и҆ мꙋ́ченикѡвъ ве́рхъ."
 },
 {
  "type": "TEXT",
  "value": "Красе́нъ въ по́двизѣхъ ꙗ҆́вльсѧ, въ кра̑сныѧ черто́ги всели́лсѧ є҆сѝ, ᲂу҆сѣ́ченъ бы́въ мече́мъ во свѧтꙋ́ю твою̀ главꙋ̀, ю҆́же і҆и҃съ вѣнча̀ побѣ́ды вѣнце́мъ бл҃голѣ́пнымъ, свѣти́льниче цр҃кве, ᲂу҆твержде́нїе и҆ похвала̀ бл҃гоче́стнѡ бл҃жа́щихъ тѧ̀."
 },
 {
  "type": "TEXT",
  "value": "Сокрꙋши́лъ є҆сѝ держа́вꙋ лꙋка́вагѡ, є҆ѵтѵ́хе страстоте́рпче прехва́льне, и҆ на него̀ побѣ́дꙋ поста́вль ю҆́ношески: и҆ побѣди́тель преизрѧ́денъ ны́нѣ є҆сѝ на нб҃сѣ́хъ, прⷭ҇то́лꙋ трⷪ҇ческомꙋ со дерзнове́нїемъ мно́гимъ свѣ́тлѡ предстоѧ̀."
 },
 {
  "type": "TEXT",
  "value": "Па́мѧть твоѧ̀ бжⷭ҇твеннаѧ и҆ свѣтоза́рнаѧ па́че со́лнца всѣ̑мъ просїѧ̀, свѣ́тлыми сїѧ̑нїи просвѣща́ющи вѣ́рнѡ и҆ бл҃гоче́стнѡ всегда̀ сїѐ пра́зднꙋющихъ, є҆ѵтѵ́хе, въ не́йже тѧ̀ мо́лимъ, ꙗ҆́кѡ и҆мѣ́ѧ дерзнове́нїе, спасе́нїе на́мъ и҆спросѝ."
 },
 {
  "type": "TEXT",
  "value": "Бг҃оро́диченъ: Гла́съ тѝ провозглаша́емъ гаврїи́ловъ: ра́дꙋйсѧ, землѐ и҆збра́ннаѧ: ра́дꙋйсѧ, трапе́зо златови́днаѧ: ра́дꙋйсѧ, человѣ́кѡвъ прибѣ́жище: ра́дꙋйсѧ, мꙋ́ченикѡвъ похвало̀: ра́дꙋйсѧ, а҆́гг҃лѡвъ ра́дованїе, ст҃а́ѧ бцⷣе, держа́во, вѣ́рою чи́стою блажа́щихъ тѧ̀."
 },
 {
  "type": "HEADER",
  "value": "Свѣти́ленъ."
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "И҆ престо́лѡвъ ꙗ҆́кѡ прее́мникъ, и҆ нра́вѡвъ ꙗ҆́кѡ прича́стникъ свѧще́нныхъ а҆пⷭ҇лѡвъ ты̀ бы́въ, бг҃омꙋ́дре вѣ́рою ст҃о́е твоѐ страда́нїе пра́зднꙋющыѧ съ нб҃сѐ назира́й, ꙗ҆́кѡ ᲂу҆ч҃ни́къ сло́ва, є҆ѵтѵ́хе ст҃и́телю."
 },
 {
  "type": "TEXT",
  "value": "Бг҃оро́диченъ: При́зри, чⷭ҇таѧ, на достоѧ́нїе твоѐ, и҆ непобѣди́мымъ твои́мъ сїѐ соблюдѝ предста́тельствомъ: цр҃ковь ᲂу҆пра́ви, вѣ́рꙋ ᲂу҆твердѝ, ꙗ҆зы́ки ᲂу҆кротѝ, и҆ и҆зле́й ми́ръ въ концы̀ мі́ра."
 }
]