866 lines
77 KiB
JSON
866 lines
77 KiB
JSON
[
|
|
{
|
|
"type": "HEADER",
|
|
"value": "Септе́мврїа ѳ҃"
|
|
},
|
|
{
|
|
"type": "HEADER",
|
|
"value": "Преставле́нїе прпⷣбнагѡ ѻ҆тца̀ на́шегѡ и҆гꙋ́мена і҆ѡ́сифа волоцка́гѡ, но́вагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "Ве́черъ, на ма́лѣй вече́рни, стїхи̑ры на д҃, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Нбⷭ҇ныхъ чинѡ́въ:"
|
|
},
|
|
{
|
|
"type": "TEXT",
|
|
"value": "Дх҃а ст҃а́гѡ теплото́ю мꙋ́дре, жела̑нїѧ се́рдца твоегѡ̀, є҆́же къ бг҃ꙋ согрѣ́ѧвъ, зи́мꙋ страсте́й многоко́зненнꙋю ᲂу҆мертви́въ, де́мѡнскꙋю си́лꙋ низложи́лъ є҆сѝ, нбⷭ҇ное же во́инство, терпѣ́нїемъ твои́мъ ᲂу҆диви́лъ є҆сѝ. Два́жды."
|
|
},
|
|
{
|
|
"type": "TEXT",
|
|
"value": "Крⷭ҇тъ гдⷭ҇ень взе́мъ, прпⷣбне і҆ѡ́сифе, и҆́стиннѡ послѣ́довалъ є҆сѝ хрⷭ҇тꙋ̀, на́съ ра́ди на крⷭ҇тѣ̀ распе́ншемꙋсѧ, и҆ є҆гѡ̀ ра́ди любвѐ всѧ̑ ѡ҆ста́вилъ є҆сѝ, и҆ того̀ є҆ди́наго возлюби́лъ є҆сѝ, є҆го́же молѝ, спасти́сѧ на́мъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ прїе́мь, ѻ҆́ч҃е, нбⷭ҇ное сѣ́мѧ въ се́рдце, пло́дъ стори́чествꙋющъ добродѣ́тели прине́слъ є҆сѝ, пита́ѧ благоче́стнѡ, гла́домъ добродѣ́тели та́ющихъ дꙋ́шы: но ꙗ҆́кѡ и҆мѣ́ѧ дерзнове́нїе ко влⷣцѣ хрⷭ҇тꙋ̀, молѝ ѡ҆ творѧ́щихъ вѣ́рою и҆ любо́вїю па́мѧть твою̀."
|
|
},
|
|
{
|
|
"type": "HEADER",
|
|
"value": "Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Свѣ́тлый дне́сь возсїѧ̀ на́мъ и҆ всепра́зднственный де́нь, ꙗ҆́коже второ́е со́лнце, просвѣща́ѧ и҆ наставлѧ́ѧ, и҆ ѿгонѧ́ѧ мглꙋ̀ помраче́нїѧ на́шегѡ, вселе́ннꙋю созыва́етъ, любо́вїю къ честнѣ́й ра́цѣ припа́дающихъ, и҆ любе́знѡ ѡ҆блобыза́ющихъ. Молѝ, мо́лимсѧ, ѻ҆́ч҃е, мі́рꙋ ми́ръ дарова́ти, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ то́йже:"
|
|
},
|
|
{
|
|
"type": "TEXT",
|
|
"value": "Всечестно́е твоѐ ржⷭ҇тво̀:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры прпⷣбнагѡ, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "До́мъ дх҃а ст҃а́гѡ бы́лъ є҆сѝ прпⷣбне, просвѣща́ѧ и҆ наставлѧ́ѧ вѣ́рою и҆ любо́вїю притека́ющыѧ къ тебѣ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Бл҃же́нъ вои́стиннꙋ, и҆ пребл҃же́нъ ꙗ҆ви́лсѧ є҆сѝ, премꙋ́дре і҆ѡ́сифе, мона́шествꙋющихъ наста́вниче, и҆ благоче́стїѧ побо́рниче."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи, стеце́мсѧ ᲂу҆се́рднѡ, восхва́лимъ ѻ҆тца̀ на́шего, и҆́стины сказа́телѧ, и҆ нече́стїѧ ѡ҆бличи́телѧ."
|
|
},
|
|
{
|
|
"type": "HEADER",
|
|
"value": "Сла́ва, самогла́сенъ, гла́съ то́йже:"
|
|
},
|
|
{
|
|
"type": "TEXT",
|
|
"value": "Прїиди́те ли́цы мона́шестїи, дне́сь ра́достнѡ воспои́мъ ᲂу҆блажа́юще, и҆ прославлѧ́юще нача́льника на́шего, хрⷭ҇то́ва ᲂу҆го́дника, и҆ тогѡ̀ пречⷭ҇тыѧ мт҃ре, прпⷣбныхъ сожи́телѧ, и҆ собесѣ́дника а҆́гг҃лѡвъ, молѧ́щасѧ гдⷭ҇ꙋ, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ д҃:"
|
|
},
|
|
{
|
|
"type": "TEXT",
|
|
"value": "Всемі́рнаѧ ра́дость:"
|
|
},
|
|
{
|
|
"type": "HEADER",
|
|
"value": "Тропа́рь прпⷣбнагѡ і҆ѡ́сифа, гла́съ є҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ по́стникѡвъ ᲂу҆добре́нїе и҆ ѻ҆тцє́въ красотꙋ̀, ми́лости пода́телѧ, разсꙋжде́нїѧ свѣти́льника, всѝ вѣ́рнїи соше́дшесѧ восхва́лимъ, кро́тости ᲂу҆чи́телѧ, и҆ є҆ресе́й посрами́телѧ, премꙋ́драго і҆ѡ́сифа, рѡссі́йскꙋю ѕвѣздꙋ̀, молѧ́щасѧ гдⷭ҇ꙋ, поми́ловатисѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника. Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Ржⷭ҇тво̀ твоѐ бцⷣе дв҃о:"
|
|
},
|
|
{
|
|
"type": "HEADER",
|
|
"value": "На вели́цѣй вече́рни, Блаже́нъ мꙋ́жъ, а҃-й а҆нтїфѡ́нъ."
|
|
},
|
|
{
|
|
"type": "HEADER",
|
|
"value": "На Гдⷭ҇и, воззва́хъ: стїхи̑ры на и҃: ст҃ы́хъ бг҃оѻтцє́въ на д҃: и҆ прпⷣбнагѡ і҆ѡ́сифа на д҃. Гла́съ є҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е бл҃же́нне і҆ѡ́сифе, вельмѝ подвиза́лсѧ є҆сѝ на врагѝ безплѡ́тныѧ, пѣ́сньми, посто́мъ и҆ моли́твою, бы́въ ѻ҆́бразъ твои̑мъ ᲂу҆ченикѡ́мъ, и҆ нелѣ́ностнѡ хрⷭ҇тꙋ̀ рабо́таѧ, ны́нѣ прпⷣбне, на нб҃сѣ́хъ ликꙋ́еши, со а҆́гг҃лы славосло́вѧ трⷪ҇цꙋ є҆диносꙋ́щнꙋю, преклонѧ́ѧ на чл҃вѣколю́бїе хрⷭ҇та̀ бг҃а на́шего, да спасе́тъ є҆стество̀ человѣ́ческое. Того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти вселе́ннѣй є҆диномышле́нїе, и҆ ча́дѡмъ твои̑мъ ми́ръ и҆ ве́лїю ми́лость. Два́жды."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, вельмѝ подвиза́лсѧ є҆сѝ на врагѝ крⷭ҇та̀ хрⷭ҇то́ва, и҆ на ѿмета́ющыѧсѧ ѻ҆́браза сп҃сова, и҆ є҆гѡ̀ пречⷭ҇тыѧ бг҃ома́тере, и҆ посрами́лъ є҆сѝ є҆ресенача́льники. Ны́нѣ ᲂу҆́бѡ прпⷣбне, всѣ́хъ на́съ ко хрⷭ҇тꙋ̀ помина́й, и҆ моли́сѧ ѡ҆ творѧ́щихъ вѣ́рнѡ свѧтꙋ́ю па́мѧть твою̀, презрѣ́ти на̑ша согрѣшє́нїѧ, и҆ возвестѝ на́съ на пе́рвое достоѧ́нїе. Того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти вселе́ннѣй є҆диномышле́нїе, и҆ вѣ̑рнымъ лю́демъ твои̑мъ на врагѝ ѡ҆долѣ́нїе, и҆ ми́ръ, и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, вельми́ тѧ хрⷭ҇то́съ просла́ви, и҆ дарова̀ тебѣ̀ сло́во бжⷭ҇твеннагѡ ра́зꙋма, и҆́мже ѿсѣ́клъ є҆сѝ лжꙋ̀ ѿ и҆́стины, и҆ и҆сто́рглъ є҆сѝ пле́велы невѣ́рїѧ, и҆ наꙋчи́лъ є҆сѝ сла́вити трⷪ҇цꙋ є҆диносꙋ́щнꙋю, покланѧ́емаго въ тре́хъ ѵ҆поста́сехъ є҆ди́наго бг҃а. Того̀ ᲂу҆̀бо молѝ, томꙋ̀ помоли́сѧ прпⷣбне, дарова́ти просѧ́щымъ и҆сцѣле́нїе, ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ и҆ весели́сѧ цр҃ковь бж҃їѧ мт҃ре, со свѧщє́нники же, и҆ съ людьмѝ благочести́выми, и҆ со благоро́дными и҆ хрⷭ҇тоимени́тыми, мѡна́хи же и҆ просты́ми, бл҃же́ннагѡ і҆ѡ́сифа ѻ҆тца̀ на́шегѡ дне́сь па́мѧть почита́юще, дꙋхо́внѣ соше́дшесѧ пра́зднꙋемъ, и҆ честны́й гро́бъ є҆гѡ̀ ѡ҆бстоѧ́ще, глаго́лемъ: ра́дꙋйсѧ ѻ҆́ч҃е на́шъ і҆ѡ́сифе, свѣти́льниче пресвѣ́тлый, врачꙋ̀ болѧ́щихъ, и҆ моли́твенниче ко сп҃сꙋ хрⷭ҇тꙋ̀ бг҃ꙋ на́шемꙋ. ѡ҆ вѣ́рою и҆ любо́вїю притека́ющихъ къ ра́цѣ моще́й твои́хъ, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Дне́сь непло́днаѧ а҆́нна ражда́етъ бг҃оѻтрокови́цꙋ, ѿ всѣ́хъ родѡ́въ произбра́ннꙋю, въ жили́ще всецр҃ѧ̀ и҆ зижди́телѧ хрⷭ҇та̀ бг҃а, во и҆сполне́нїе бжⷭ҇твеннагѡ смотре́нїѧ, и҆́мже назда́хомсѧ земноро́днїи, и҆ ѡ҆бнови́хомсѧ ѿ тлѝ къ жи́зни неконе́чнѣй."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ, и҆ чтє́нїѧ:"
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе."
|
|
},
|
|
{
|
|
"type": "TEXT",
|
|
"value": "(Глава̀ є҃) Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ. Прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды, вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ. И҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе."
|
|
},
|
|
{
|
|
"type": "TEXT",
|
|
"value": "(Глава̀ г҃) Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ: сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе."
|
|
},
|
|
{
|
|
"type": "TEXT",
|
|
"value": "(Глава̀ д҃) Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ, свѧще́ннаѧ главо̀, прпⷣбне ѻ҆́ч҃е на́шъ і҆ѡ́сифе, а҆́гг҃льскихъ ликѡ́въ собесѣ́дниче въ вы́шнихъ: на земли́ бо добродѣ́тельнѡ пожи́лъ є҆сѝ, и҆ ꙗ҆ви́лсѧ є҆сѝ пречи́сто и҆ нескве́рно зерца́ло, дх҃а ст҃а́гѡ зарѧ́ми блиста́ѧсѧ пребога́те, и҆ ѡ҆зарѧ́емь прозрѣ́лъ є҆сѝ бꙋ̑дꙋщаѧ. Тѣ́мже хрⷭ҇та̀ бг҃а молѝ, ми́ръ дарова́ти дꙋша́мъ на́шымъ, и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ра́дꙋйсѧ, свѧще́ннаѧ главо̀, по́стникѡвъ непоколеби́мый сто́лпе, мона́шествꙋющихъ и҆справле́нїе, и҆ є҆ресе́й новоѧвле́нныхъ, бг҃одохнове́нными твои́ми писа́ньми, ѕлочєсти́ваѧ и҆́хъ ᲂу҆ста̀ загради́лъ є҆сѝ, и҆ де́мѡнѡвъ стремлє́нїѧ погꙋби́лъ є҆сѝ, крⷭ҇та̀ ѻ҆рꙋ́жїемъ всѧ̑ кознодѣ̑йства ѿгонѧ́ѧ. И҆ по преставле́нїи твое́мъ жи́въ ст҃ѣ́й трⷪ҇цѣ предстои́ши, ѡ҆ на́съ молѧ́сѧ ча́дѣхъ твои́хъ дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ра́дꙋйсѧ, свѧще́ннаѧ главо̀, ᲂу҆мо́мъ просвѣще́ннымъ дꙋ́шꙋ твою̀ ѻ҆́ч҃е, просвѣти́лъ є҆сѝ, и҆ ѿ земны́хъ преста́вилсѧ є҆сѝ во хрⷭ҇то́во црⷭ҇твїе, і҆ѡ́сифе пребл҃же́нне: въ по́стницѣхъ ты̀ свѣ́телъ ꙗ҆ви́лсѧ є҆сѝ, сла́дости нестарѣ́емыѧ ны́нѣ насыща́ѧсѧ. ѡ҆ на́съ рабѣ́хъ твои́хъ хрⷭ҇тꙋ̀ бг҃ꙋ моли́сѧ, пода́ти на́мъ ѡ҆ставле́нїе грѣхѡ́въ, и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, сохрани́лъ є҆сѝ добро́тꙋ є҆́же по ѻ҆́бразꙋ бж҃їю, пло́ть покори́лъ є҆сѝ дꙋ́хꙋ: сегѡ̀ ра́ди всели́сѧ въ тѧ̀ прест҃ы́й дх҃ъ. Є҆гѡ́же дѣ́йствїемъ свѣ́тлѡ ᲂу҆кра́шенъ, прїѧ́лъ є҆сѝ да́ръ и҆сцѣле́нїй, притека́ющымъ съ вѣ́рою ко гро́бꙋ моще́й твои́хъ: моли́сѧ хрⷭ҇тꙋ̀ бг҃ꙋ, дарова́ти на́мъ на врагѝ побѣ́дꙋ, и҆ мі́рꙋ ми́ръ, и҆ цр҃квамъ є҆диномы́слїе, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здникъ, гла́съ и҃:"
|
|
},
|
|
{
|
|
"type": "TEXT",
|
|
"value": "Въ благознамени́тый де́нь:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "Прїиди́те ᲂу҆блажи́мъ прпⷣбнаго і҆ѡ́сифа, по́стника и҆ возде́ржника, и҆ мона́хѡвъ нача́льника, хрⷭ҇то́ва ᲂу҆го́дника."
|
|
},
|
|
{
|
|
"type": "TEXT",
|
|
"value": "Сті́хъ: Блаже́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Дне́сь вѣ́рнїи ᲂу҆блажи́мъ прпⷣбнаго і҆ѡ́сифа, и҆́стины сло́ва сказа́телѧ, и҆ по хрⷭ҇то́вѣ і҆кѡ́нѣ побо́рника, и҆ нече́стїѧ ѡ҆бличи́телѧ."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми:"
|
|
},
|
|
{
|
|
"type": "TEXT",
|
|
"value": "Бл҃же́нъ є҆сѝ і҆ѡ́сифе, хрⷭ҇то́въ ᲂу҆го́дниче, и҆ пречⷭ҇тыѧ бг҃омт҃ре, пꙋсты́нный жи́телю, и҆ мона́шествꙋющихъ наста́вниче."
|
|
},
|
|
{
|
|
"type": "HEADER",
|
|
"value": "Сла́ва, гла́съ в҃:"
|
|
},
|
|
{
|
|
"type": "TEXT",
|
|
"value": "Прїиди́те дне́сь ли́цы мона́шестїи, притеце́мъ ко гро́бꙋ прпⷣбнагѡ і҆ѡ́сифа, молѧ́щесѧ хрⷭ҇тꙋ̀ бг҃ꙋ на́шемꙋ, просѧ́ще грѣхѡ́въ проще́нїѧ, и҆ во́инствꙋ на́шемꙋ на врагѝ побѣ́ды, и҆ плѣнє́нымъ свобожде́нїѧ, и҆ мі́рꙋ ᲂу҆строе́нїѧ и҆ цр҃квамъ соедине́нїѧ, и҆ дꙋша́мъ на́шымъ ве́лїѧ ми́лости."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника, гла́съ то́йже:"
|
|
},
|
|
{
|
|
"type": "TEXT",
|
|
"value": "Пронарече́ннаѧ всѣ́хъ цр҃и́ца:"
|
|
},
|
|
{
|
|
"type": "HEADER",
|
|
"value": "На ᲂу҆́трени тропа́рь пра́здника, и҆ бг҃оѻтцє́въ."
|
|
},
|
|
{
|
|
"type": "HEADER",
|
|
"value": "Сла́ва, прпⷣбнагѡ: И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "По а҃-й каѳі́смѣ сѣда́ленъ, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Ско́рѡ предварѝ:"
|
|
},
|
|
{
|
|
"type": "TEXT",
|
|
"value": "Досто́йнѡ ᲂу҆бл҃жа́емъ тѧ̀ прпⷣбне і҆ѡ́сифе, ꙗ҆́кѡ дерзнове́нїе и҆мꙋ́ща ко гдⷭ҇ꙋ: ѡ҆ на́съ при́снѡ моли́сѧ, и҆зба́витисѧ врагѡ́въ належа́щїѧ напа́сти, и҆ дарова́ти на́мъ на сы́ны а҆га̑рѧнскїѧ ѡ҆долѣ́нїе, и҆ плѣнє́нымъ свобожде́нїе, и҆ на́мъ, соверша́ющымъ свѧтꙋ́ю па́мѧть твою̀, ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Оу҆́мъ человѣ́ческїй, по достоѧ́нїю пѣ́ти тѧ̀, влⷣчце пречⷭ҇таѧ бцⷣе, недоꙋмѣ́етъ, но мы̀ зове́мъ тѝ, ꙗ҆̀же а҆рха́гг҃лъ гаврїи́лъ провѣща̀: ра́дꙋйсѧ, а҆да́мово свобожде́нїе. Ра́дꙋйсѧ, прама́тере є҆́ѵы ѡ҆правда́нїе. Ра́дꙋйсѧ, мі́ра спасе́нїе. Ра́дꙋйсѧ, мт҃и хрⷭ҇та̀ бг҃а."
|
|
},
|
|
{
|
|
"type": "HEADER",
|
|
"value": "По в҃-й каѳі́смѣ сѣда́ленъ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Взбра́нной воево́дѣ:"
|
|
},
|
|
{
|
|
"type": "TEXT",
|
|
"value": "Соше́дшесѧ вѣ́рнїи въ па́мѧть прпⷣбнагѡ і҆ѡ́сифа дꙋхо́внѡ пра́зднꙋемъ, восхвалѧ́юще хрⷭ҇та̀ бг҃а на́шего, прославлѧ́юща своего̀ ᲂу҆го́дника, и҆ да́ромъ чꙋде́съ ѡ҆богати́вшаго, притеце́мъ вѣ́рнѡ бо гро́бꙋ моще́й є҆гѡ̀, и҆ почерпе́мъ тѣлесє́мъ здра́вїе, кꙋ́пнѡ и҆ дꙋша́мъ спасе́нїе, и҆ торжествꙋ́емъ свѣ́тлѡ во свѧтꙋ́ю па́мѧть є҆гѡ̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Взбра́нной воево́дѣ и҆ застꙋ́пницѣ на́шей, къ тебѣ̀ прибѣга́емъ, пречⷭ҇таѧ бцⷣе, поборѝ чⷭ҇таѧ, плѣнѧ́ющаго ны̀ дїа́вола, и҆ сводѧ́ща въ стра̑сти безче́стїѧ. Тѣ́мже припа́даемъ къ твоемꙋ̀, пречⷭ҇таѧ, ѻ҆́бразꙋ, просѧ́ще и҆зба́витисѧ всѧ́кїѧ мꙋ́ки, и҆ ѻ҆гнѧ̀ вѣ́чнагѡ, застꙋпи́ ны мт҃и хрⷭ҇та̀ цр҃ѧ̀ нбⷭ҇нагѡ, да зове́мъ тѝ: ра́дꙋйсѧ, невѣ́сто неискꙋсобра́чнаѧ."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ, прпⷣбне, принесы́й себѐ хрⷭ҇тꙋ̀ же́ртвꙋ жи́вꙋ, и҆ ѿ ю҆́ности ᲂу҆се́рднѡ рабо́таѧ хрⷭ҇тꙋ̀ бг҃ꙋ, пѣ́сньми, посто́мъ и҆ воздержа́нїемъ, водвори́лсѧ є҆сѝ въ пꙋсты́ни, є҆ди́нъ є҆ди́номꙋ бесѣ́дꙋѧ. Тѣ́мъ ви́дѣвъ гдⷭ҇ь твоѐ до́брое и҆зволе́нїе, со всѣ́ми ᲂу҆чини́ тѧ преподо́бными и҆ пра́ведными водворѧ́тисѧ въ нбⷭ҇нѣмъ црⷭ҇твїи, и҆ со а҆́гг҃лы хрⷭ҇тꙋ̀ пѣ́ти пѣ́снь немо́лчнꙋю. Но ꙗ҆́кѡ и҆́маши дерзнове́нїе къ немꙋ̀, молѝ, мо́лимсѧ, спасти́сѧ дꙋша́мъ на́шымъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Къ бцⷣѣ возопїи́мъ любо́вїю: ра́дꙋйсѧ, гра́де гдⷭ҇ень. Ра́дꙋйсѧ, ски́птре дв҃довъ. Ра́дꙋйсѧ, пала́то ѡ҆дꙋшевле́ннаѧ. Ра́дꙋйсѧ, ста́мно бжⷭ҇твенныѧ ма́нны. Ра́дꙋйсѧ, неѡпали́маѧ кꙋпино̀. Ра́дꙋйсѧ, свѣщѐ пресвѣ́тлаѧ, и҆ свѣти́льниче златы́й. Ра́дꙋйсѧ, горо̀ бж҃їѧ приѡсѣне́ннаѧ. Ра́дꙋйсѧ, ѻ҆гнено́сный престо́ле. Ра́дꙋйсѧ, лѣ́ствице и҆ две́ре нбⷭ҇наѧ. Ра́дꙋйсѧ, же́зле невла́жнѡ прозѧбы́й. Ра́дꙋйсѧ всѧ̑ спаса́ющи ѿ всѧ́кихъ бѣ́дъ и҆ скорбе́й. Ра́дꙋйсѧ, влⷣчце, мі́ра спасе́нїе."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃:"
|
|
},
|
|
{
|
|
"type": "TEXT",
|
|
"value": "Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе ѿ матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, ѡ҆чи́стилъ є҆сѝ ᲂу҆́мное сꙋщество̀, и҆ сохрани́лъ є҆сѝ добро́тꙋ є҆́же по ѻ҆́бразꙋ бж҃їю, и҆ пло́ть покори́лъ є҆сѝ дꙋ́хꙋ: тогѡ̀ ра́ди въ тѧ̀ всели́сѧ си́ла бж҃їѧ, и҆ прїѧ́лъ є҆сѝ да́ръ и҆сцѣле́нїй. И҆дѣ́же бо любо́вь и҆ согла́сїе, та́мѡ добродѣ́тели позна́нїе: а҆ и҆дѣ́же за́висть и҆ рве́нїе, та́мѡ ѕло́бы ꙗ҆вле́нїе. Но ᲂу҆́бѡ мы̀ бѣ́гаемъ сегѡ̀ ᲂу҆бі́йственнагѡ по́мысла, ѿ негѡ́же да и҆зба́витъ ны̀ хрⷭ҇то́съ бг҃ъ, моли́твами твои́ми прпⷣбне і҆ѡ́сифе, и҆ пода́стъ дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Канѡ́ны пра́здника и҆ бг҃оѻтцє́въ, на и҃."
|
|
},
|
|
{
|
|
"type": "HEADER",
|
|
"value": "И҆ прпⷣбнагѡ і҆ѡ́сифа канѡ́нъ, на ѕ҃. Гла́съ в҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѻрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Тебѣ̀ твоегѡ̀, бл҃же́нне, ᲂу҆че́нїѧ до́лгъ приносѧ́ще, воздаѧ̑нїѧ простира́емъ, вѣне́цъ похва́льный плетꙋ́ще: ты́ же любо́вїю ᲂу҆вѧзе́нъ пребога́те, твои́ми ст҃ы́ми моли́твами бл҃года́ть на́мъ пода́ждь дꙋхо́внꙋю."
|
|
},
|
|
{
|
|
"type": "TEXT",
|
|
"value": "Всегꙋби́тельное стремле́нїе страсте́й, ѻ҆́ч҃е, ᲂу҆вѧди́лъ є҆сѝ, слове́снымъ ѡ҆б̾ѧ́тъ бг҃омꙋ́дрїемъ, благопребы́тенъ бы́лъ є҆сѝ, и҆ благогла́сенъ, кро́токъ же и҆ смире́нъ, сло́вомъ же премꙋ́дрости прпⷣбне ѻ҆́ч҃е і҆ѡ́сифе, и҆ ра́зꙋмомъ вѣнча́нъ."
|
|
},
|
|
{
|
|
"type": "TEXT",
|
|
"value": "Свѧще́ннѡ ᲂу҆краси́лъ є҆сѝ себѐ, прпⷣбне ѻ҆́ч҃е, дѣ́тельнымъ ра́зꙋмомъ бл҃года́ти бг҃оглаго́ливе і҆ѡ́сифе, жела́ѧ вѣнца̀ сла́вы хрⷭ҇то́вы, и҆ своеѧ̀ наде́жды и҆зрѧ́днѡ бл҃же́нне не погрѣши́лъ є҆сѝ."
|
|
},
|
|
{
|
|
"type": "TEXT",
|
|
"value": "Цѣломꙋ́дрїе ᲂу҆держа́лъ є҆сѝ ꙗ҆́вѣ, кра́йнюю же кро́тость, и҆ высокогла́сное смире́нїе: и҆́миже возвыша́емь, трꙋдѡ́въ твои́хъ дѣ́йствомъ и҆ видѣ́нїемъ ра́дꙋѧсѧ принесе́сѧ, вѣне́цъ неꙋвѧда́емый прїи́мъ трꙋдѡ́въ твои́хъ воздаѧ̑нїѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тва́рей ꙗ҆ви́ласѧ є҆сѝ чⷭ҇таѧ, всѣ́хъ ви́димыхъ и҆ неви́димыхъ превы́шши всенепоро́чнаѧ, зижди́телѧ бо родила̀ є҆сѝ, ꙗ҆́коже и҆зво́ли воплоти́тисѧ во ᲂу҆тро́бѣ твое́й. Є҆го́же со дерзнове́нїемъ молѝ спастѝ пою́щыѧ тѧ̀."
|
|
},
|
|
{
|
|
"type": "HEADER",
|
|
"value": "И҆́ный канѡ́нъ прпⷣбнагѡ і҆ѡ́сифа чꙋдотво́рца. Гла́съ ѕ҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Волно́ю морско́ю скры́вшаго дре́вле, гони́телѧ мꙋчи́телѧ, подъ земле́ю скры́ша, спасе́нныхъ ѻ҆́троцы: но мы̀ ꙗ҆́кѡ ѻ҆трокови́цы, гдⷭ҇еви пои́мъ: сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Ѽ бж҃їй сло́ве, ми́лостиве, хрⷭ҇тѐ цр҃ю̀! Пре́зри моѧ̑ мнѡ́гаѧ согрѣшє́нїѧ, и҆ ѿве́рзи мѝ косноѧзы̑чнаѧ ᲂу҆ста̀, и҆ дꙋ́хъ пра́въ ѡ҆бновѝ во ᲂу҆тро́бѣ мое́й, и҆ да́ждь мѝ хрⷭ҇тѐ, сло́во ра́зꙋма, да воспою̀ твоего̀ ᲂу҆го́дника прпⷣбнаго і҆ѡ́сифа."
|
|
},
|
|
{
|
|
"type": "TEXT",
|
|
"value": "Повинꙋ́лсѧ є҆сѝ прпⷣбне, вседꙋ́шнѡ твоемꙋ̀ ѻ҆ц҃ꙋ̀, прпⷣбномꙋ пафнꙋ́тїю: и҆ бы́лъ є҆сѝ ꙗ҆́кѡ дрꙋгі́й і҆саа́къ, ра́ди кра́йнѧгѡ послꙋша́нїѧ. Тѣ́мже прпⷣбне, въ тѧ̀ всели́сѧ прест҃ы́й дх҃ъ, є҆гѡ́же дѣ́йствїемъ свѣ́тлѡ ᲂу҆краша́емый, и҆ ны́нѣ предстои́ши ст҃ѣ́й трⷪ҇цѣ ра́дꙋѧсѧ."
|
|
},
|
|
{
|
|
"type": "TEXT",
|
|
"value": "Оу҆подо́билсѧ є҆сѝ, прпⷣбне і҆ѡ́сифе, дре́внемꙋ і҆а́кѡвꙋ, послꙋ́шавшꙋ своеѧ̀ мт҃ре, ѻ҆́тчее благослове́нїе прїе́мшемꙋ: ты́ же прпⷣбномꙋ пафнꙋ́тїю повинꙋ́лсѧ є҆сѝ, и҆ ѿ негѡ̀ благослове́нїе прїи́мъ, ᲂу҆строѧ́ешисѧ па́стырь хрⷭ҇то́ва ста́да въ то́йже ѻ҆би́тели, бг҃ꙋ та́кѡ и҆зво́льшꙋ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Къ тебѣ̀ прибѣга́емъ бцⷣе всепѣ́таѧ, и҆ тебѣ̀ припа́дающе мо́лимсѧ, твои́мъ хода́тайствомъ влⷣчце, и҆ моли́твами твоегѡ̀ ᲂу҆го́дника прпⷣбнагѡ і҆ѡ́сифа, ми́лостива на́мъ сотворѝ, є҆го́же пречи́стѡ и҆ недовѣ́домѡ родила̀ є҆сѝ хрⷭ҇та̀ бг҃а на́шего."
|
|
},
|
|
{
|
|
"type": "TEXT",
|
|
"value": "Катава́сїа: Крⷭ҇тъ начерта́въ:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ це́рковь, прише́ствїемъ твои́мъ, въ не́йже ᲂу҆тверди́сѧ моѐ се́рдце."
|
|
},
|
|
{
|
|
"type": "TEXT",
|
|
"value": "Да́ждь хрⷭ҇тѐ сп҃се, проще́нїе мно́гихъ на́шихъ согрѣше́нїй, ꙗ҆́кѡ да и҆ мы̀ почита́емъ па́мѧть твоегѡ̀ ᲂу҆го́дника прпⷣбнагѡ і҆ѡ́сифа, є҆гѡ́же моли́твами спаси́ ны."
|
|
},
|
|
{
|
|
"type": "TEXT",
|
|
"value": "Твои́ми моли́твами ми́лостиваго ᲂу҆молѧ́й бг҃а, прпⷣбне ѻ҆́ч҃е на́шъ і҆ѡ́сифе, и҆ грѣхо́вный мра́къ печа́ли на́шеѧ разорѝ, и҆ бл҃годꙋ́шїѧ ᲂу҆тѣше́нїе низпослѝ."
|
|
},
|
|
{
|
|
"type": "TEXT",
|
|
"value": "Ѿ младе́нства ты̀ бл҃же́нне і҆ѡ́сифе, позна́нъ бы́лъ є҆сѝ бг҃омъ, и҆ на того̀ надѣ́ѧлсѧ є҆сѝ, наставлѧ́емь на спаси́тєльнаѧ є҆гѡ̀ повелѣ̑нїѧ. Є҆мꙋ́же ны́нѣ предстоѧ̀, со дерзнове́нїемъ ѡ҆ на́съ моли́сѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Є҆ди́наго ст҃ы́ѧ трⷪ҇цы, сло́ва сн҃а родила̀ є҆сѝ дв҃о пречⷭ҇таѧ, є҆го́же съ прпⷣбнымъ і҆ѡ́сифомъ ѡ҆ рабѣ́хъ твои́хъ молѝ, вѣ́рою просѧ́щихъ грѣхѡ́въ проще́нїѧ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Тобо́ю, хрⷭ҇тѐ, небеса̀ ᲂу҆твержда́ема всѧ̑, сло́во бж҃їе и҆ си́ла, и҆сповѣ́дꙋютъ сла́вꙋ неизрече́ннꙋ, и҆ вседѣ́тельныѧ рꙋкѝ твоеѧ̀ сотворе́нїе: нѣ́сть бо пресвѧ́тъ, ра́звѣ тебє̀, гдⷭ҇и."
|
|
},
|
|
{
|
|
"type": "TEXT",
|
|
"value": "Не преда́ждь, влⷣко, твоегѡ̀ достоѧ́нїѧ врагѡ́мъ хва́лѧщымсѧ на ны̀, мо́лимъ тѧ̀ ми́лостиве, спасѝ правосла́вныѧ хрⷭ҇тїа́ны и҆ бꙋ́ди ми́лостивъ твои̑мъ рабѡ́мъ: и҆ и҆зба́ви ны̀ хрⷭ҇тѐ цр҃ю̀, мꙋче́нїѧ и҆ ѻ҆гнѧ̀ негаси́магѡ, и҆ сподо́би ны̀ десна́гѡ предстоѧ́нїѧ, моли́твами прпⷣбнагѡ і҆ѡ́сифа."
|
|
},
|
|
{
|
|
"type": "TEXT",
|
|
"value": "Напо́лнисѧ се́рдце твоѐ, прпⷣбне, бл҃года́ти хрⷭ҇то́вы, и҆ пра́вагѡ ᲂу҆че́нїѧ, бы́лъ є҆сѝ ѻ҆́бразъ мона́шествꙋющихъ, всѧ́кими добро́тами дꙋхо́вными: не да́лъ бо є҆сѝ сна̀ твои̑мъ ѻ҆чесє́мъ, ни вѣ́ждамъ дрема́нїѧ: но ꙗ҆́кѡ стѧжа́лъ є҆сѝ дерзнове́нїе ко гдⷭ҇ꙋ, молѝ ѡ҆ на́съ, мо́лимъ тѧ̀ да бꙋ́детъ на́мъ ми́лостивъ въ де́нь сꙋ́дный."
|
|
},
|
|
{
|
|
"type": "TEXT",
|
|
"value": "Ꙗ҆́кѡ ле́въ стра́шенъ и҆зъ пꙋсты́ни ᲂу҆стреми́всѧ, ᲂу҆страши́лъ є҆сѝ безбѡ́жныѧ є҆ретїкѝ, и҆мѣ́ѧ прпⷣбне ме́чь дꙋхо́вный, и҆́же є҆́сть глаго́лъ бж҃їй, посѣ́клъ є҆сѝ и҆зни̑кшаѧ нечє́стїѧ, и҆ и҆зъ ко́рене и҆сто́рглъ є҆сѝ ѕлосла́вныхъ ᲂу҆чє́нїѧ, собра́лъ є҆сѝ ꙗ҆́кѡ трꙋдолюби́ва пчела̀ ѿ всѣ́хъ писа́нїй бжⷭ҇твєннаѧ словеса̀, и҆ си́ми ᲂу҆ста̀ сквє́рнаѧ безбо́жныхъ загради́лъ є҆сѝ, прпⷣбне і҆ѡ́сифе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Дивѧ́тсѧ, мт҃и бж҃їѧ, нбⷭ҇нїи чи́ни красотѣ̀ дꙋшѝ твоеѧ̀, и҆ чистотѣ̀ дѣ́вства твоегѡ̀: мы́ же земні́и недоꙋмѣ́емъ глаго́лати несказа́ннагѡ ржⷭ҇тва̀ твоегѡ̀, є҆мꙋ́же та́йнѡ наꙋча́ющесѧ, позна́хомъ тѧ̀ ро́ждшꙋю хрⷭ҇та̀ бг҃а на́шего. Є҆го́же ми́лостива на́мъ сотворѝ въ де́нь сꙋ́дный стра́шнагѡ прише́ствїѧ є҆гѡ̀."
|
|
},
|
|
{
|
|
"type": "HEADER",
|
|
"value": "Конда́къ и҆ і҆́косъ пра́здника."
|
|
},
|
|
{
|
|
"type": "HEADER",
|
|
"value": "Та́же, прпⷣбнагѡ сѣда́ленъ, гла́съ г҃."
|
|
},
|
|
{
|
|
"type": "TEXT",
|
|
"value": "Подо́бенъ: Красотѣ̀ дѣ́вства:"
|
|
},
|
|
{
|
|
"type": "TEXT",
|
|
"value": "Хрⷭ҇то́ва ᲂу҆го́дника, є҆ѵⷢ҇льскагѡ ᲂу҆че́нїѧ послꙋ́шника, свѣ́тлѡ пра́зднꙋемъ прпⷣбнагѡ і҆ѡ́сифа па́мѧть: прїиди́те ᲂу҆блажи́мъ страннопрїи́мца сꙋ́ща, сирота́мъ и҆ вдова́мъ застꙋ́пника те́пла, и҆ ни́щымъ да́телѧ нескꙋ́дна, цѣломꙋ́дрїѧ храни́телѧ, и҆ добродѣ́телей дѣ́лателѧ, и҆ є҆ресе́й ѡ҆бличи́телѧ непосты́дна, и҆ свѣти́льника рꙋ́сскаго, є҆гѡ́же ра́ди просѧ́ще ѿ хрⷭ҇та̀ дꙋша́мъ на́шымъ спасе́нїѧ, и҆ мі́рꙋ ве́лїѧ ми́лости."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "TEXT",
|
|
"value": "А҆́ще ли пое́ши прпⷣбнагѡ і҆ѡ́сифа кромѣ̀ попра́зднства, глаго́ли по сѣда́льнѣ: Сла́ва, и҆ ны́нѣ, се́й бг҃оро́диченъ:"
|
|
},
|
|
{
|
|
"type": "TEXT",
|
|
"value": "Земноро́днїи тобо́ю спасе́ни бы́хомъ, пречⷭ҇таѧ бцⷣе: пре́жде вѣ̑къ бо и҆зъ ѻ҆ц҃а̀ ро́ждшагосѧ сн҃а бж҃їѧ породила̀ є҆сѝ, за милосе́рдїе мно́гое благоволи́вшаго и҆зъ тебє̀ роди́тисѧ: и҆́же спасѐ а҆да́ма пра́ѻтца, и҆ раѧ̀ сотворѝ жи́телѧ. Є҆го́же молѝ мт҃и пребл҃гослове́ннаѧ, спасти́сѧ на́мъ вѣ́рнѡ пою́щымъ тѧ̀."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Прише́лъ є҆сѝ ѿ дв҃ы, не хода́тай ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Ты̀ прпⷣбне і҆ѡ́сифе, мона́шествꙋющихъ бы́лъ є҆сѝ вѣне́цъ, не ка́менїемъ многоцѣ́ннымъ ᲂу҆кра́шенъ, но добродѣ́тельми ѡ҆бложе́нъ, и҆ ꙗ҆ви́лсѧ є҆сѝ, бл҃же́нне, благодарова́нное вои́стиннꙋ ᲂу҆краше́нїе."
|
|
},
|
|
{
|
|
"type": "TEXT",
|
|
"value": "Бжⷭ҇твеннꙋю бг҃омꙋ́дре, почти́лъ є҆сѝ мꙋ́дрость, ꙗ҆́же тѧ̀ дарова̑нїи благи́ми ѡ҆богатѝ, сла́вꙋ вѣ́чнꙋю тебѣ̀ и҆схода́тайствовавши, прпⷣбне ѻ҆́ч҃е і҆ѡ́сифе всече́стне."
|
|
},
|
|
{
|
|
"type": "TEXT",
|
|
"value": "Свѣ́тлостїю нра́вѡмъ твои́хъ, и҆ ѻ҆́бразы бл҃года́ти, прпⷣбне ѻ҆́ч҃е і҆ѡ́сифе, подо́бнѣ пожи́лъ є҆сѝ: тѣ́мже благопристꙋ́пенъ ты̀ всѣ̑мъ бы́лъ є҆сѝ, всебл҃же́нне досточꙋ́дне."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Оу҆мерщвле́нїе плодо́мъ мнѣ̀ є҆́ѵа принесѐ, ты́ же жи́знь ро́ждши ѵ҆поста́снꙋю пречⷭ҇таѧ, а҆́бїе и҆спра́вила є҆сѝ. Тѣ́мже зове́мъ тѝ: сла́ва си́лѣ твое́й."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆диви́сѧ тво́й ра́зꙋмъ ѿ менє̀, ᲂу҆слы́шавшꙋ пресла̑внаѧ велѣ̑нїѧ смотре́нїѧ твоегѡ̀, ᲂу҆крѣпи́сѧ же возлюбле́нїемъ твоегѡ̀ схожде́нїѧ: ты́ бо моеѧ̀ нищеты̀ не ѿве́рглсѧ є҆сѝ."
|
|
},
|
|
{
|
|
"type": "TEXT",
|
|
"value": "Ꙗ҆́коже дре́вле і҆ѡ́сифꙋ прекра́сномꙋ зави́дѣвше бра́тїѧ, совѣ́тъ лꙋка́въ ᲂу҆мы́слиша: та́кѡ и҆ на тѧ̀, прпⷣбне і҆ѡ́сифе, совѣ́товаша лꙋка́вое ᲂу҆мышле́нїе. Ты́ же любо́вїю ко хрⷭ҇тꙋ̀ вперѧ́емь, си́хъ негодова̑нїѧ въ ничто́же вмѣни́въ, непреста́ннѡ моли́сѧ ѡ҆ на́съ гдⷭ҇ꙋ."
|
|
},
|
|
{
|
|
"type": "TEXT",
|
|
"value": "И҆зше́лъ є҆сѝ, прпⷣбне, ѿ и҆дѣ́же пре́жде нача́льствꙋѧ, хрⷭ҇тꙋ̀ цр҃ю̀ нбⷭ҇номꙋ молѧ́сѧ и҆ пречⷭ҇тѣй бцⷣѣ, ше́ствꙋѧ на мѣ́сто, бг҃омъ тебѣ̀ пока́занное, и҆ та́мѡ пꙋсты́ню населѧ́еши, хрⷭ҇та̀ ра́ди: въ не́йже зарю̀ свѣ́тлꙋ ᲂу҆зрѣ́ти сподо́билсѧ є҆сѝ бл҃года́ти дх҃о́вныѧ, бл҃же́нне і҆ѡ́сифе."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, ᲂу҆подо́билсѧ є҆сѝ і҆ѡ́сифꙋ прекра́сномꙋ: не покори́лсѧ бо є҆сѝ сладостра́стїю, и҆ ѕѣлѡ̀ тща́лсѧ є҆сѝ ѡ҆ цѣломꙋ́дрїи, мы́сленнаго ѕмі́ѧ побѣди́лъ є҆сѝ, и҆ со́ннагѡ житїѧ̀ небре́глъ є҆сѝ, и҆зъ темни́цы тѣ́ла и҆зше́лъ є҆сѝ, и҆ ца́рь не є҆гѵ́пта, но страсте́й бы́лъ є҆сѝ, и҆ добродѣ́тели пшени́цꙋ собра́лъ є҆сѝ, є҆́юже ны̀ ча̑да твоѧ̑ пита́еши."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пречⷭ҇таѧ бцⷣе, вѣ́мы тѧ̀ хрⷭ҇тїа́не тве́рдꙋю защи́тницꙋ, и҆ ско́рꙋю помо́щницꙋ, и҆ въ бѣда́хъ и҆збавле́нїе. Тѣ́мже мо́лимъ тѧ̀: и҆спросѝ на́мъ ᲂу҆ хрⷭ҇та̀ мно́жествꙋ согрѣше́нїй проще́нїе, и҆ вѣ́чныѧ мꙋ́ки и҆збавле́нїе."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы."
|
|
},
|
|
{
|
|
"type": "TEXT",
|
|
"value": "Оу҆мо́мъ чи́стымъ писа́нїємъ бжⷭ҇твєннымъ бесѣ́довалъ є҆сѝ, бг҃оглаго́ливе і҆ѡ́сифе, и҆ видѣ́нїѧ и҆ дѣѧ́нїѧ собра́въ бога́тство, ѻ҆́ч҃е прпⷣбне."
|
|
},
|
|
{
|
|
"type": "TEXT",
|
|
"value": "Премꙋ́дрости глꙋбинꙋ̀ и҆спыта́въ мꙋ́дре і҆ѡ́сифе, дости́глъ є҆сѝ ѡ҆брѣстѝ, є҆ли́кѡ благопотре́бно, и҆ би́серъ многоцѣ́нный болѣ́зньми стѧжа́лъ є҆сѝ, пребл҃же́нне, ра́зꙋма."
|
|
},
|
|
{
|
|
"type": "TEXT",
|
|
"value": "А҆́ще земно́е ѻ҆те́чество бл҃же́нне і҆ѡ́сифе, ѡ҆ста́вилъ є҆сѝ, всѧ́чески благоимени́тнꙋ бж҃їи мт҃ри ѻ҆би́тель созда́лъ є҆сѝ, и҆ мно́жество мона́шествꙋющихъ въ не́й собра́лъ є҆сѝ: сегѡ̀ ра́ди пе́рвое ѻ҆те́чество нбⷭ҇ное прїѧ́лъ є҆сѝ, со дерзнове́нїемъ, ѻ҆́ч҃е, за ны̀ моли́сѧ хрⷭ҇тꙋ̀ бг҃ꙋ, рабы̑ твоѧ̑."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Сѐ во чре́вѣ, бцⷣе пречⷭ҇таѧ, хрⷭ҇та̀ бг҃а па́че сло́ва и҆мѣ́ла є҆сѝ, ꙗ҆́коже и҆са́їа провозгласѝ: вы́ше є҆стества̀ сего̀ бг҃ороди́тельнице родила̀ є҆сѝ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Ми́ръ мно́гъ лю́бѧщымъ тѧ̀, хрⷭ҇тѐ, и҆ но́щь просвѣще́нїѧ въ пи́щи слове́съ твои́хъ: сегѡ̀ ра́ди ѿ но́щи ᲂу҆́тренююще, про́симъ ми́лости ѿ тебє̀, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Всѧ́къ пи́сменникъ наꙋчи́всѧ бжⷭ҇твенномꙋ писа́нїю, подо́бенъ є҆́сть црⷭ҇твїю нбⷭ҇номꙋ: ты́ же прпⷣбне, поревнова́въ є҆ѵⷢ҇льскомꙋ ᲂу҆че́нїю, и҆ ѿ сегѡ̀ прїѧ́лъ є҆сѝ крѣ́пость дꙋхо́внꙋю. Сха́рїа є҆вре́ина посрами́лъ є҆сѝ, и҆ є҆гѡ̀ проклѧ̑тыѧ ᲂу҆ченикѝ та̑ѧжде мꙋ́дрствꙋющыѧ, и҆ а҆на́ѳемѣ пре́далъ є҆сѝ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, дарова̀ тебѣ̀ бг҃ъ мꙋ́дрость, и҆ сло́во ра́зꙋма: ты́ же проповѣ́далъ є҆сѝ въ трїе́хъ ли́цѣхъ є҆ди́наго бг҃а, и҆ семꙋ̀ свидѣ́тельство приве́лъ є҆сѝ ѿ бжⷭ҇твенныхъ писа́нїй, наꙋча́ѧ покланѧ́тисѧ въ трⷪ҇цѣ є҆ди́номꙋ бг҃ꙋ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, безꙋ̑мныѧ є҆ретїкѝ глаго́лющыѧ, ꙗ҆́кѡ є҆щѐ хрⷭ҇то́съ не роди́сѧ, ѡ҆бличи́въ ꙗ҆́снѡ сказа́лъ є҆сѝ, ꙗ҆́кѡ роди́сѧ хрⷭ҇то́съ на́шегѡ ра́ди спасе́нїѧ ѿ пречⷭ҇тыѧ дв҃ы марі́и, и҆ на́съ ра́ди пострада̀ во́лею распѧ́тїе, и҆ воскр҃се тридне́внѡ: и҆ па́ки грѧде́тъ со ст҃ы́ми а҆́гг҃лы, сꙋди́ти ве́сь мі́ръ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѽ безꙋ́мнїи є҆ретїцы̀ и҆ ѿстꙋ́пницы, и҆ непокори́вїи є҆вре́є. Є҆го́же вы̀ ча́ете, то́й нѣ́сть хрїсто́съ, но а҆нті́хрїстъ є҆́сть, ꙗ҆́коже свидѣ́тельствꙋютъ бжⷭ҇твєннаѧ писа̑нїѧ. Мы́ же и҆сповѣ́дꙋемъ хрⷭ҇та̀ бг҃а на́шего, ро́ждшагосѧ неискꙋсомꙋ́жнѡ ѿ дв҃ы чⷭ҇тыѧ марі́и: є҆ѧ́же моли́твами и҆зба́ви на́съ хрⷭ҇тѐ, ѿ таковы́ѧ пре́лести, и҆ спасѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
|
|
},
|
|
{
|
|
"type": "TEXT",
|
|
"value": "Вселе́ннѣй свѣти́ло пресвѣ́тлое, ѻ҆́ч҃е, ꙗ҆ви́лсѧ є҆сѝ і҆ѡ́сифе, словесы̀ дꙋхо́вными просвѣща́ѧ, вѣ́рою и҆ любо́вїю къ тебѣ̀ притека́ющыѧ."
|
|
},
|
|
{
|
|
"type": "TEXT",
|
|
"value": "Бл҃же́нное житїѐ, ѻ҆́ч҃е, преше́лъ є҆сѝ, назда́въ ᲂу҆́бѡ чꙋ̑вства, внѣ̀ бы́лъ є҆сѝ мїрска́гѡ мѧте́жа, и҆ бг҃ꙋ прибли́жилсѧ є҆сѝ, прпⷣбне і҆ѡ́сифе."
|
|
},
|
|
{
|
|
"type": "TEXT",
|
|
"value": "Ѕѣлѡ̀ ми́лостива, и҆ страннопрїи́мца показа́ тѧ сп҃съ на́шъ мі́рꙋ, ѻ҆́ч҃е, и҆ врача̀ болѧ́щымъ і҆ѡ́сифе, сирота́мъ и҆ ᲂу҆бѡ́гимъ застꙋ́пника любе́зна."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Па́че є҆стества̀, дв҃о, родила̀ є҆сѝ, и҆ вѣ́чнꙋеши дв҃а, ꙗ҆́вльшисѧ и҆́стиннагѡ сн҃а и҆ бг҃а твоегѡ̀ мт҃и чⷭ҇таѧ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на влⷣцѣ вопїю́ ти: ѿ тли́ мѧ возведѝ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ свѧще́нникъ сы́й пои́стиннѣ приносѧ̀ хрⷭ҇тꙋ̀ бг҃ꙋ же́ртвꙋ безкро́внꙋ, та́йнѡ возложе́ннꙋю, и҆ ѿ а҆́гг҃лъ сла́вимꙋю, ѿ бг҃а ѻ҆ц҃а̀ прїе́млемꙋ, и҆ ст҃ы́мъ дх҃омъ ѡ҆сѣнѧ́емꙋ, и҆ на́мъ на спасе́нїе да́рꙋемꙋ."
|
|
},
|
|
{
|
|
"type": "TEXT",
|
|
"value": "Ѽ безꙋ́мнїи є҆ретїцы̀, что̀ поѡщрѧ́ете ѧ҆зы́ки бг҃охꙋ̑льныѧ, глаго́люще: не можа́ше ли бг҃ъ не роди́всѧ спастѝ мі́ръ и҆на́кѡ; ты́ же прпⷣбне і҆ѡ́сифе, си́хъ ᲂу҆ста̀ загради́лъ є҆сѝ, наꙋча́ѧ сла́вити хрⷭ҇та̀ бг҃а на́шего."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, є҆ретїкѡ́въ ᲂу҆ста̀ загради́лъ є҆сѝ, приводѧ̀ свидѣ́тєльства ѿ бжⷭ҇твенныхъ писа́нїй: пыта́йте, речѐ, безꙋ́мнїи, писа̑нїѧ, ꙗ҆́кѡ ꙗ҆ви́ласѧ є҆́сть ст҃а́ѧ трⷪ҇ца а҆враа́мꙋ въ тре́хъ ли́цахъ, во є҆ди́номъ бжⷭ҇твѣ̀."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Припа́даемъ тебѣ̀ пречⷭ҇таѧ бцⷣе, со ᲂу҆миле́нїемъ, глаго́люще: и҆зба́ви ны̀ мт҃и хрⷭ҇та̀ бг҃а, всѧ́кїѧ пре́лести разлꙋча́ющїѧ ѿ бг҃а, и҆ сподо́би въ де́нь сꙋ́дный полꙋчи́ти ѿ хрⷭ҇та̀ ми́лость, и҆ не ѿпа́сти десна́гѡ предстоѧ́нїѧ."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Взбра́нной:"
|
|
},
|
|
{
|
|
"type": "TEXT",
|
|
"value": "Житїѧ̀ треволнє́нїѧ, и҆ мѧте́жъ мїрскі́й, и҆ стра̑стнаѧ взыгра̑нїѧ въ ничто́же вмѣни́въ, пꙋсты́нный граждани́нъ показа́лсѧ є҆сѝ, мно́гихъ бы́въ наста́вникъ і҆ѡ́сифе прпⷣбне: мона́хѡвъ собра́тель, и҆ моле́бникъ вѣ́ренъ, чистоты̀ рачи́тель, молѝ хрⷭ҇та̀ бг҃а, спасти́сѧ дꙋша́мъ на́шымъ."
|
|
},
|
|
{
|
|
"type": "TEXT",
|
|
"value": "І҆́косъ: Бжⷭ҇твенными добродѣ́тельми твои́ми, себѐ, мꙋ́дре, ᲂу҆краси́лъ є҆сѝ, и҆ сп҃са хрⷭ҇та̀ жили́ще содѣ́лалъ є҆сѝ ѻ҆́ч҃е, мꙋ́жественнѣ, ꙗ҆́коже зла́то и҆скꙋси́всѧ вѣ́рою къ бг҃ꙋ и҆ наде́ждею, и҆ любо́вїю ѻ҆бѣ́ты полага́ѧ: воздержа́нїемъ пости́всѧ ꙗ҆́кѡ безпло́тенъ, въ цѣломꙋ́дрїи, и҆ въ смире́нїи возвы́силсѧ є҆сѝ. Тѣ́мже и҆ мы̀ моли́твами твои́ми просвѣ́щшесѧ, прпⷣбне і҆ѡ́сифе, вопїе́мъ тѝ: ра́дꙋйсѧ, ꙗ҆́кѡ и҆змла́да бг҃ꙋ послꙋжи́лъ є҆сѝ: ра́дꙋйсѧ, ꙗ҆́кѡ притека́ющихъ къ тебѣ̀ ко спасе́нїю хода́тай бы́лъ є҆сѝ: ра́дꙋйсѧ, хрⷭ҇толюби́вомꙋ во́инствꙋ похвала̀: ра́дꙋйсѧ, ꙗ҆́кѡ твои́ми моли́твами проти́внїи побѣжда́ютсѧ: ра́дꙋйсѧ, ꙗ҆́кѡ всѣ̑мъ просѧ́щымъ дае́ши да́ръ, ѿ гдⷭ҇а дарова́нный тебѣ̀: ра́дꙋйсѧ, ꙗ҆́кѡ чꙋдесы́ тѧ бг҃ъ прославлѧ́етъ, и҆ всѣ́хъ зва́ти тебѣ̀ наꙋча́етъ: ра́дꙋйсѧ, прпⷣбне ѻ҆́ч҃е і҆ѡ́сифе, по́стникѡвъ ᲂу҆добре́нїе. Молѝ хрⷭ҇та̀ бг҃а, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ благочести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ."
|
|
},
|
|
{
|
|
"type": "TEXT",
|
|
"value": "Благоꙋха́ютъ прпⷣбне і҆ѡ́сифе, твои́хъ ᲂу҆че́нїй сла̑дкаѧ словеса̀ лю́бѧщымъ та̑ѧ: ᲂу҆страша́ютъ же є҆ретїкѡ́въ мꙋдрова̑нїѧ. Бл҃года́тїю бо ст҃а́гѡ дх҃а глаго́лалъ є҆сѝ, бжⷭ҇тво̀ є҆ди́но проповѣ́дꙋѧ въ тре́хъ ли́цѣхъ: сло́ва же воплоще́нїе поѧ̀, благоꙋха́еши на́съ пребога́те."
|
|
},
|
|
{
|
|
"type": "TEXT",
|
|
"value": "Ри́зъ хꙋ́дость и҆мѣ́лъ є҆сѝ прпⷣбне і҆ѡ́сифе, въ зимѣ́ же и҆ лѣ́тѣ не премѣнѧ́ѧ, болѣ́зненнѡ претерпѣва́лъ є҆сѝ бг҃а ра́ди соверше́ннѡ: тѣ́мже и҆ нбⷭ҇нагѡ прїѧ́тїѧ сподо́билсѧ є҆сѝ наслѣ́дникъ бы́ти."
|
|
},
|
|
{
|
|
"type": "TEXT",
|
|
"value": "Сло́во твоѐ со́лїю растворе́но, ѻ҆́ч҃е, и҆ житїѐ твоѐ бл҃года́тїю пребл҃же́нне сїѧ́ѧ ꙗ҆ви́сѧ пречꙋ́дне: тѣ́мже и҆ въ вы̑шнїѧ ѻ҆би́тєли ра́дꙋѧсѧ всели́лсѧ є҆сѝ, хрⷭ҇тꙋ̀ со дерзнове́нїемъ ны́нѣ предстои́ши ѡ҆ на́съ молѧ́сѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Оу҆правлѧ́ющи пречⷭ҇таѧ на́ше житїѐ, къ твоемꙋ̀ всети́хомꙋ приста́нищꙋ напра́ви: бг҃а бо родила̀ є҆сѝ бл҃ги́хъ и҆сто́чника, всѣ̑мъ подаю́щи вѣ̑рнымъ нетлѣ́нїѧ бл҃года̑ти."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Сказꙋ́ѧ, прпⷣбне, ѿ бжⷭ҇твенныхъ писа́нїй, ка́кѡ и҆ ко́еѧ ра́ди вины̀ подоба́етъ хрⷭ҇тїа́нѡмъ покланѧ́тисѧ, и҆ почита́ти ст҃ы̑ѧ і҆кѡ́ны, и҆ честны́й крⷭ҇тъ хрⷭ҇то́въ, и҆ прѡ́чаѧ свѧщє́ннаѧ воѡбражє́нїѧ. Си́мъ прїѧ́лъ є҆сѝ ѿ хрⷭ҇та̀ дарова̑нїѧ, поѧ̀: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "И҆зъ є҆гѵ́пта страсте́й и҆зше́лъ є҆сѝ прпⷣбне, и҆ преше́лъ є҆сѝ мо́ре жите́йское безъ и҆стопле́нїѧ, и҆ дости́глъ є҆сѝ го́рꙋ небе́снꙋю, мнѡ́гїѧ грѣ́шныхъ дꙋ́шы приводѧ̀ хрⷭ҇тꙋ̀ покаѧ́нїемъ, и҆ поѧ̀: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Потопи́лъ є҆сѝ прпⷣбне, фараѡ́на мы́сленнаго въ вода́хъ сле́зъ твои́хъ, и҆ є҆гѡ̀ колесни̑цы, и҆̀же сꙋ́ть лꙋка̑выѧ де́мѡны, и҆ ко́ни и҆ вса́дники, ѕлоꙋ̑мныѧ є҆ретїкѝ и҆ безбѡ́жныѧ, и҆ ра́дꙋѧсѧ пѣ́снь побѣ́днꙋю воспѣ́лъ є҆сѝ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: А҆́зъ, дв҃о чⷭ҇таѧ, къ тебѣ̀ прибѣга́ю ѻ҆каѧ́нный, и҆скі́й тобо́ю ѡ҆брѣстѝ спасе́нїе: вѣ́мъ бо пречⷭ҇таѧ влⷣчце, ꙗ҆́кѡ мо́жеши, є҆ли̑ка хо́щеши. Хрⷭ҇та̀ є҆го́же родила̀ є҆сѝ пречⷭ҇таѧ, молѝ, да бꙋ́детъ на́мъ ми́лостивъ въ де́нь и҆спыта́нїѧ, пою́щымъ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Вѣне́цъ благолѣ́пенъ, хрⷭ҇то́съ жизнода́вецъ на ве́рхъ тво́й положѝ, тезоиме́нне і҆ѡ́сифе, дѣѧ́ньми бо просїѧ́лъ є҆сѝ и҆ видѣ̑нїи, зовы́й: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Всѧ̑ преше́дъ чꙋ́вствєннаѧ пребл҃же́нне, ᲂу҆мꙋ̀ пе́рвомꙋ прибли́жилсѧ є҆сѝ, дꙋшѝ твоеѧ̀ чистото́ю, житїѧ́ же свѣ́тлостїю вѣнчено́сче і҆ѡ́сифе, зовы́й: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Въ дꙋшѝ твое́й бжⷭ҇твенное бога́тство дх҃а ст҃а́гѡ собра́въ, непоро́чнꙋю моли́твꙋ, и҆ чистотꙋ̀ краснолѣ́пнꙋю, бдѣ́нїе и҆ воздержа́нїе: сегѡ̀ ра́ди жили́ще ст҃ы́ѧ трⷪ҇цы ꙗ҆ви́лсѧ є҆сѝ, прпⷣбне і҆ѡ́сифе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Влⷣчце пречⷭ҇таѧ, грѣ́шникѡвъ спасе́нїе, прїимѝ мольбꙋ̀ сїю̀, и҆ и҆зба́ви мѧ̀ ѿ грѣхѡ́въ мои́хъ, твоемꙋ̀ сн҃ꙋ прибѣга́ющаго, моли́твами ᲂу҆го́дника твоегѡ̀ прпⷣбнагѡ і҆ѡ́сифа."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Оу҆жасни́сѧ боѧ́йсѧ не́бо, и҆ да подви́жатсѧ ѡ҆снова̑нїѧ землѝ. Се́ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆гѡ́же ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Что̀ безꙋ́мнїи є҆ретїцы̀ всꙋ́е мѧте́тесѧ, глаго́люще: ꙗ҆́кѡ ᲂу҆жѐ се́дмь ты́сѧщъ лѣ́тъ сконча́шасѧ. Хрⷭ҇то́во же прише́ствїе є҆щѐ нѣ́сть; сїѧ̑ глаго́лющихъ де́рзостнѣ ѡ҆бличи́лъ є҆сѝ, сказꙋ́ѧ: бли́зъ є҆́сть при две́рехъ прише́ствїе, ꙗ҆́кѡ гл҃го́лютъ прⷪ҇ро́цы, и҆ а҆пⷭ҇ли, и҆̀мже сказа̀ ст҃ы́й дх҃ъ, и҆ наꙋча́ѧ пѣ́ти: є҆го́же дѣ́ти бл҃гослови́те, свѧще́нницы по́йте, и҆ превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Стра́шно є҆́сть впа́сти въ рꙋ́цѣ бг҃а жи́ва, безꙋ́мнїи не льсти́тесѧ, не крести́тъ хрⷭ҇то́съ по сме́рти спасе́нымъ креще́нїемъ, непра́вѣ ѡ҆ не́мъ мꙋ́дрствꙋющихъ, но во ѻ҆гнѝ негаса́ющемъ мꙋ́читъ: мы́ же вѣ́рнїи ᲂу҆ хрⷭ҇та̀ про́симъ вре́мѧ покаѧ́нїѧ, да бꙋ́детъ на́мъ ми́лостивъ въ де́нь стра́шнагѡ є҆гѡ̀ прише́ствїѧ. Сїѧ̑ прпⷣбне глаго́лалъ є҆сѝ, и҆ на́съ ᲂу҆чи́лъ є҆сѝ пѣ́ть: гдⷭ҇а дѣ́ти благослови́те, свѧще́нницы по́йте, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Мѡѷсе́й вели́кїй къ пꙋсты́ни повелѣ̀ і҆и҃лю вы́спрь на мѣ́дный ѕмі́й взира́ти, и҆ та́кѡ ᲂу҆грызе́нїѧ ѕмїи́на и҆збавлѧ́хꙋсѧ: ты́ же прпⷣбне, нечести̑выѧ наꙋча́ѧ покланѧ́тисѧ крⷭ҇тꙋ̀ животворѧ́щемꙋ, и҆ сла́вити ст҃ꙋ́ю трⷪ҇цꙋ во є҆ди́номъ бжⷭ҇твѣ̀, и҆ си́мъ и҆збавлѧ́тисѧ пре́лести ѕмі́ѧ мы́сленнагѡ дїа́вола, и҆ на́съ ᲂу҆чѧ̀ пѣ́ти: дѣ́ти благослови́те гдⷭ҇а, свѧще́нницы по́йте, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тобо́ю пречⷭ҇таѧ бцⷣе, ѿ всѧ́кїѧ напа́сти и҆збавлѧ́емсѧ, и҆зба́ви ны̀ мт҃и бж҃їѧ вѣ́чнагѡ ѡ҆сꙋжде́нїѧ, да зове́мъ тѝ немо́лчнѡ: ра́дꙋйсѧ, кꙋпино̀ неѡпали́маѧ, ра́дꙋйсѧ, горо̀ присѣ́ннаѧ, ра́дꙋйсѧ, запеча́танный и҆сто́чниче, ра́дꙋйсѧ, дв҃о чⷭ҇таѧ, гдⷭ҇ь съ тобо́ю. Є҆го́же благослови́тъ всѧ̀ тва́рь, и҆ превозно́ситъ во всѧ̑ вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
|
|
},
|
|
{
|
|
"type": "TEXT",
|
|
"value": "Пречестны́й ѻ҆́ч҃е і҆ѡ́сифе, ны́нѣ чи́стѡ ᲂу҆слажда́ешисѧ пи́щею па́че ᲂу҆́мною, и҆дѣ́же собо́ри ст҃ы́хъ ѻ҆́крестъ гдⷭ҇а ликꙋ́ютъ бл҃же́нне, и҆̀же ны́нѣ чтꙋ́щыѧ тѧ̀, хода́тайствꙋѧ къ себѣ̀ привлецы̀."
|
|
},
|
|
{
|
|
"type": "TEXT",
|
|
"value": "Преше́лъ є҆сѝ ра́дꙋѧсѧ къ жела́нїємъ раѧ̀, ко є҆ди́номꙋ и҆́стиннѡ ꙗ҆́вѣ бл҃же́нствꙋ, къ пребо́льшей добро́тѣ, и҆ къ жи́зни и҆́стиннѡ нестарѣ́ющейсѧ, и҆ къ свѣ́тꙋ невече́рнемꙋ бг҃оно́се ѻ҆́ч҃е і҆ѡ́сифе."
|
|
},
|
|
{
|
|
"type": "TEXT",
|
|
"value": "Ꙗ҆́коже со́лнце просїѧ́лъ є҆сѝ въ мона́шескихъ собо́рѣхъ: ѿ млады́хъ бо ногте́й ѡ҆свѧще́нъ бы́лъ є҆сѝ, ꙗ҆́коже зарю̀ и҆спꙋща́ѧ добродѣ́тєли своегѡ̀ житїѧ̀, прпⷣбне і҆ѡ́сифе, бг҃оно́се ѻ҆́ч҃е пребога́те."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Разꙋмѣ́вше и҆здале́ча, прозорли́выми ѻ҆чесы̀, прⷪ҇ро́цы тѧ̀ ꙗ҆́вѣ провозвѣсти́ша, хотѧ́щꙋю мт҃рь бы́ти вседѣ́телѧ и҆ влⷣки всѣ́хъ. Тѣ́мъ тѧ̀ всепѣ́таѧ, бцⷣꙋ и҆сповѣ́дꙋемъ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Не рыда́й менѐ, мт҃и, зрѧ́щи во гро́бѣ, є҆го́же во чре́вѣ безъ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, помина́й на́съ ча̑да твоѧ̑ ко хрⷭ҇тꙋ̀ бг҃ꙋ на́шемꙋ, да спасе́тъ ѿ всѧ́кихъ бѣ́дъ и҆ скорбе́й, и҆ сподо́битъ ми́лости и҆ десна́гѡ предстоѧ́нїѧ въ де́нь сꙋ́дный, сла́вити своѐ бж҃ество̀, вѣ́рою и҆ любо́вїю того̀ велича́ющыѧ."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е і҆ѡ́сифе, мона́шеское житїѐ возлюби́лъ є҆сѝ, и҆ хꙋ́лѧщихъ то́е ᲂу҆ста̀ загради́лъ є҆сѝ, а҆пⷭ҇ла па́ѵла ꙗ҆̀же къ тїмоѳе́ю словеса̀ возвѣща́ѧ, ꙗ҆́кѡ мона́шеское житїѐ бг҃ꙋ прїѧ́тно є҆́сть, є҆мꙋ́же и҆ ты̀ си́мъ благоꙋгоди́лъ є҆сѝ: сегѡ̀ ра́ди тѧ̀ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ і҆исꙋ́съ наѵи́нъ подвиза́сѧ на і҆ерїхѡ́нѧны, та́кѡ ты̀ бл҃же́нне, словесы̀ твои́ми безбо́жныхъ ᲂу҆ста̀ загради́лъ є҆сѝ ѿстꙋ́пникѡвъ, и҆ мнѡ́гаѧ невѣ̑рїѧ ᲂу҆кроти́лъ є҆сѝ, наꙋча́ѧ сла́вити ст҃ꙋ́ю трⷪ҇цꙋ: сегѡ̀ ра́ди тѧ̀ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѽ прест҃а́ѧ влⷣчце бцⷣе! Не и҆́мамы по́мощи и҆ны́ѧ ра́звѣ тебє̀, моли́сѧ сн҃ꙋ твоемꙋ̀ и҆ бг҃ꙋ на́шемꙋ, съ прпⷣбнымъ і҆ѡ́сифомъ, да соблюде́тъ лю́ди твоѧ̑, и҆ сохрани́тъ странꙋ̀ на́шꙋ нерꙋши́мꙋ, и҆ да спасе́тъ ны̀ вѣ́рою и҆ любо́вїю тѧ̀ велича́ющыѧ."
|
|
},
|
|
{
|
|
"type": "HEADER",
|
|
"value": "Свѣти́ленъ прпⷣбнагѡ:"
|
|
},
|
|
{
|
|
"type": "TEXT",
|
|
"value": "Мїрска́гѡ пристра́стїѧ ꙗ҆́кѡ скве́рны ᲂу҆клони́лсѧ є҆сѝ, и҆ а҆́лчбою пло́ть твою̀ ᲂу҆вѧди́лъ є҆сѝ ѻ҆́ч҃е, и҆ нбⷭ҇ною сла́вою со а҆́гг҃лы ѡ҆богати́лсѧ є҆сѝ: тѣ́мже непреста́ннѡ молѝ хрⷭ҇та̀ бг҃а прпⷣбне і҆ѡ́сифе. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры, на д҃, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Прпⷣбне ѻ҆́ч҃е:"
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, дꙋ́шꙋ твою̀ съ тѣ́ломъ ѡ҆чи́стилъ є҆сѝ, и҆ ст҃а́гѡ дх҃а прекра́снаѧ ѻ҆би́тель ꙗ҆ви́лсѧ є҆сѝ, и҆ сла́вна тѧ̀ концє́мъ, пребл҃же́нне і҆ѡ́сифе, содѣ́ла. Въ чꙋдесѣ́хъ же вели́ка свѣти́льника, просвѣти́вшаго сꙋ́щыѧ во мра́цѣ невѣ́дѣнїѧ: ꙗ҆́кѡ наста́вника мно́гихъ мона́хѡвъ, соше́дшесѧ велемꙋ́дреннѡ ᲂу҆блажи́мъ."
|
|
},
|
|
{
|
|
"type": "TEXT",
|
|
"value": "Ꙗ҆ви́лсѧ є҆сѝ бг҃обл҃же́нне, мꙋ́драѧ плени́ца, свѧзꙋ́ющаѧ мнѡ́гаѧ врагѡ́въ ѡ҆полчє́нїѧ: тѣ́мже и҆ вѣнце́мъ вѣнча́лсѧ є҆сѝ неꙋвѧда́емымъ, весе́лїе и҆ ра́дость вѣ́чнꙋю воспрїѧ́лъ є҆сѝ бг҃омꙋ́дре і҆ѡ́сифе, молѝ дарова́ти ми́ръ мі́рꙋ, и҆ дꙋша́мъ на́шымъ ве́лїю ми́лость."
|
|
},
|
|
{
|
|
"type": "TEXT",
|
|
"value": "Прпⷣбне ѻ҆́ч҃е, тѣлє́сныѧ стра̑сти ѕѣ́льнымъ воздержа́нїемъ, и҆ по́стническими моли́твами же и҆ трꙋды̑ ᲂу҆спи́лъ є҆сѝ, сле́зными же потѡ́ки и҆ пѡ́ты ᲂу҆́глїе сладостра́стїѧ погаси́лъ є҆сѝ: тогѡ̀ ра́ди въ чꙋдесѣ́хъ сла́вна тѧ̀ показа̀ гдⷭ҇ь рѡссі̑йскимъ лю́демъ і҆ѡ́сифе бл҃же́нне, и҆ ᲂу҆краси́ тѧ вы́шними дарова̑нїи. Є҆мꙋ́же слꙋ́жиши съ нбⷭ҇ными си́лами, і҆и҃сꙋ чл҃вѣколю́бцꙋ и҆ сп҃сꙋ дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те празднолю́бцы, и҆ по́стникѡвъ сосло́вїе вѣ́рою соше́дшесѧ, и҆́стиннаго по́стника дне́сь почита́юще, ра́достнѡ ше́ствовавшаго по стопа́мъ влⷣки хрⷭ҇та̀, ᲂу҆́зкїй пꙋ́ть, и҆ безстра́стное житїѐ, ꙗ҆́коже дре́вле а҆враа́мъ пра́ведный, прпⷣбне ѻ҆́ч҃е і҆ѡ́сифе, страннолю́бїе притѧжа́лъ є҆сѝ, та́кожде пресели́лсѧ є҆сѝ ѿ ѻ҆те́чества твоегѡ̀ до мѣ́ста, и҆дѣ́же ны́нѣ лежи́тъ честно́е тѣ́ло твоѐ. Тѣ́мже всѝ притека́юще вопїе́мъ тѝ: ѽ всебл҃же́нне и҆ прпⷣбне і҆ѡ́сифе! По́стникѡвъ похвало̀, и҆ собесѣ́дниче безпло́тныхъ, во́инствꙋ на́шемꙋ на пога̑ныѧ спосо́бниче, и҆ наста́вниче мона́хѡвъ, и҆ ѡ҆ на́съ моли́сѧ рабѣ́хъ твои́хъ хрⷭ҇тꙋ̀ бг҃ꙋ на́шемꙋ, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, пра́здника."
|
|
},
|
|
{
|
|
"type": "HEADER",
|
|
"value": "На лїтꙋргі́и: Бл҃жє́нна ѿ канѡ́на, пѣ́снь г҃, и҆ ѕ҃-ѧ."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "HEADER",
|
|
"value": "А҆пⷭ҇лъ, къ гала́тѡмъ, зача́ло сг҃і."
|
|
},
|
|
{
|
|
"type": "TEXT",
|
|
"value": "А҆ллилꙋ́їа: Блаже́нъ мꙋ́жъ боѧ́йсѧ гдⷭ҇а:"
|
|
},
|
|
{
|
|
"type": "TEXT",
|
|
"value": "Сті́хъ: Си́льно на землѝ бꙋ́детъ сѣ́мѧ є҆гѡ̀."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю бꙋ́детъ првⷣникъ:"
|
|
}
|
|
] |