ponomar-pwa/static/data/shared/menaion-daily/10-05/1.json

[
 {
  "type": "HEADER",
  "value": "Ѻ҆ктѡ́врїа є҃"
 },
 {
  "type": "HEADER",
  "value": "Ст҃ы́ѧ мч҃ницы харїті́ны:"
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Ра́дости ꙗ҆́кѡ тезоимени́таѧ, ра́достїю пресели́ласѧ є҆сѝ въ черто́гъ, всечестна́ѧ, нбⷭ҇ный, и҆дѣ́же твоѐ возлюби́ла є҆сѝ стѧжа́ти житїѐ, претерпѣ́вши ѻ҆гнѧ̀ болѣ́зненное и҆́стиннѡ мꙋче́нїе, зꙋбѡ́въ ᲂу҆́бѡ и҆ ногте́й всѣ́хъ и҆скоренє́нїѧ, страстоте́рпице харїті́но, дѣвомꙋ́ченице многострада́льнаѧ."
 },
 {
  "type": "TEXT",
  "value": "Львѡ́въ сломи́ла є҆сѝ чє́люсти, многострада́льнаѧ, чє́люстей терпѧ́щи сокрꙋшє́нїѧ, и҆ ногте́й и҆стерза̑нїѧ до́блественнѡ терпѣ́ла є҆сѝ, и҆скоренѧ́ющи лю̑таѧ пре́лести свирѣ̑пства, въ морскі̑ѧ же вве́ржена глꙋбины̑, ѕло́бꙋ потоплѧ́емꙋ творѧ́щи, лꙋка́вагѡ ратобо́рца."
 },
 {
  "type": "TEXT",
  "value": "По кончи́нѣ бл҃же́ннѣй, въ мо́ре тѧ̀ вве́рженꙋ, тво́й роди́тель, сла́внаѧ, прїѧ́тъ тѧ̀, вопїѧ̀ со ᲂу҆́жасомъ: ка́кѡ ны́нѣ ѡ҆благода́тствисѧ, свѧще́ннѣйшее моѐ и҆ люби́мое рожде́нїе, мꙋ́ками честна́гѡ страда́нїѧ, и҆ нарече́нїе и҆́стинное содѣ́лала є҆сѝ, проѡбрази́вшее бл҃года́тїю;"
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Тꙋ́чами дх҃а прест҃а́гѡ, пречⷭ҇таѧ, мою̀ мы́сль ѡ҆росѝ, ꙗ҆́же ка́плю ро́ждшаѧ хрⷭ҇та̀ неизче́тнѡ, безмѣ̑рнаѧ беззакѡ́нїѧ человѣ́кѡвъ щедро́тами и҆змы́вшꙋю: и҆зсꙋшѝ и҆сто́чникъ страсте́й мои́хъ, и҆ пото́ка мѧ̀ сподо́би пи́щи живы́ѧ при́снѡ моли́твами твои́ми."
 },
 {
  "type": "HEADER",
  "value": "Крⷭ҇тобг҃оро́диченъ. Подо́бенъ то́йже:"
 },
 {
  "type": "TEXT",
  "value": "А҆́гнца и҆ па́стырѧ тѧ̀ на дре́вѣ ꙗ҆́кѡ ви́дѣ, а҆́гница ро́ждшаѧ рыда́ше, и҆ мт҃рски тѝ вѣща́ше. сн҃е возжделѣ́нне, ка́кѡ на дре́вѣ крⷭ҇тнѣмъ повѣ́шенъ є҆сѝ долготерпѣли́ве; ка́кѡ рꙋ́цѣ и҆ но́зѣ твоѝ, сло́ве, пригвозди́шасѧ ѿ беззако́нныхъ, и҆ кро́вь твою̀ и҆злїѧ́лъ є҆сѝ, влⷣко;"
 },
 {
  "type": "HEADER",
  "value": "Тропа́рь, гла́съ д҃:"
 },
 {
  "type": "TEXT",
  "value": "А҆́гница твоѧ̀, і҆и҃се, харїті́на, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. Тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха. И҆ ст҃ы́ѧ канѡ́нъ на д҃. Гла́съ д҃. Є҆гѡ́же краегране́сїе:"
 },
 {
  "type": "TEXT",
  "value": "Харїті́ны благода́ть пою̀ любо́вїю. І҆ѡ́сифъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Твои́ми, ѽ харїті́но! Дарова̑нїи ᲂу҆́мъ мо́й ѡ҆благода́тельствꙋй, ѡ҆благода́тившисѧ страда́ньми свѧще́нными, свѧще́ннѡ воспѣва́ти тѧ̀ ꙗ҆́кѡ страстоно́сицꙋ и҆ мꙋ́ченицꙋ, и҆ дѣ́вствомъ сїѧ́ющꙋю."
 },
 {
  "type": "TEXT",
  "value": "Бл҃года́ть прест҃а́гѡ дх҃а тѧ̀ ѡ҆дарова́вши, радостотво́рными ᲂу҆красѝ плете́ньми, и҆ ра́дость вѣ́чнꙋющꙋю наслѣ́дити ᲂу҆крѣпѝ, мꙋжемꙋ́дреннѡ пострада́вшꙋю."
 },
 {
  "type": "TEXT",
  "value": "На крⷭ҇тѣ́ тѧ воздви́жена, влⷣко, разꙋмѣ́вши благосла́внаѧ твоѧ̀ мч҃ница, ра̑ны терпи́тъ болѣ́знєнныѧ ᲂу҆крѣплѧ́ема си́лою твое́ю, на́ше є҆стество̀ ᲂу҆крѣпи́вшагѡ."
 },
 {
  "type": "TEXT",
  "value": "Бг҃оро́диченъ: Село̀ вмѣсти́тельно была̀ є҆сѝ бжⷭ҇твеннагѡ є҆стества̀, бг҃ороди́тельнице чⷭ҇таѧ: тѣ́мъ харїті́на лю́бѧщи тѧ̀, дѣ́вственнѡ вслѣ́дствовавши тебѣ̀, сн҃ꙋ твоемꙋ̀ приведе́сѧ."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе."
 },
 {
  "type": "TEXT",
  "value": "Вже́гшее твою̀ дꙋ́шꙋ жела́нїе бжⷭ҇твенное, плотска̑ѧ рачє́нїѧ, и҆ лю̑таѧ врѣ̑нїѧ мꙋ́къ погасѝ."
 },
 {
  "type": "TEXT",
  "value": "Разсѣ́дшасѧ предъ нога́ми твои́ми мч҃ническими врага̀ зрѧ́ще хрⷭ҇то́вою бл҃года́тїю, хвалє́нїѧ є҆мꙋ̀ прино́симъ."
 },
 {
  "type": "TEXT",
  "value": "Крѣ́постїю вседѣ́тельною вражде́бнꙋю главꙋ̀ сокрꙋши́ла є҆сѝ, твоеѧ̀ главы̀ претерпѣ́вши, мч҃нице, крѣ́пкѡ пожже́нїе."
 },
 {
  "type": "TEXT",
  "value": "Бг҃оро́диченъ: Є҆ди́нꙋ въ жена́хъ бл҃гослове́ннꙋю тѧ̀, чⷭ҇таѧ, лю́бѧщи, твои́ми бл҃ги́ми бл҃года́тьми, мч҃ница харїті́на просла́висѧ."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Оу҆диви́сѧ і҆ѡ́сифъ:"
 },
 {
  "type": "TEXT",
  "value": "Ѡ҆благода́тствивши дꙋ́шꙋ твою̀ бг҃ода́нными добродѣ́тельми, просвѣти́ласѧ є҆сѝ и҆́стиннѡ мꙋче́нїемъ твои́мъ, честна́ѧ, и҆ ᲂу҆невѣ́стиласѧ є҆сѝ творцꙋ̀ твоемꙋ̀, нетлѣ́нна чистото́ю пребы́вши, харїті́но: тѣ́мъ врага̀ попра́ла є҆сѝ, многови̑днаѧ страда̑нїѧ же, и҆ болѣ̑зни преѡдолѣ́ннѡ претерпѣ́вши. Сегѡ̀ ра́ди вѣ́рою пресвѧтꙋ́ю твою̀ па́мѧть торжествꙋ́емъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю, и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ."
 },
 {
  "type": "TEXT",
  "value": "Крⷭ҇тобг҃оро́диченъ: Дв҃а и҆ а҆́гница ви́дѣвши на крⷭ҇тѣ̀ безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскрⷭ҇нѝ, па́дшаго воздвиза́ѧ пра́ѻтца."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Же́ртвꙋ, ꙗ҆́кѡ непоро́чнꙋ, къ заколе́нїю тѧ̀, и҆зъ ѻ҆те́ческихъ, мꙋ́ченице страстоно́сице, восхи́тиша рꙋ́къ мꙋчи́тели, ѻ҆ц҃а̀ небе́снаго ѕѣлѡ̀ возлюби́вшꙋю."
 },
 {
  "type": "TEXT",
  "value": "Ѻ҆трокови́цамъ мꙋ̑дрымъ послѣ́дствовавши, дꙋше́внꙋю свѣщꙋ̀ твою̀ бога́тнѡ кровьмѝ напои́ла є҆сѝ, всесла́внаѧ: и҆ бжⷭ҇твенный наслѣ́довала є҆сѝ, мꙋ́ченице радостоимени́таѧ, черто́гъ."
 },
 {
  "type": "TEXT",
  "value": "Се́рдце твоѐ, раче́нїемъ женихо́вымъ распалѧ́емо, ᲂу҆́глїе пре́лести, доблемꙋ́дреннаѧ, проли́тїемъ погасѝ кро́ве, и҆ мо́ре многобо́жїѧ и҆зсꙋшѝ."
 },
 {
  "type": "TEXT",
  "value": "Бг҃оро́диченъ: Воплоще́ннаго родила̀ є҆сѝ бж҃їѧ сло́ва бг҃ороди́тельнице чⷭ҇таѧ: є҆го́же, харїті́на, лю́бѧщи теплѣ́йше, ѻ҆гню̀ противоѡполчи́сѧ, и҆ многови̑днымъ мꙋ́камъ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Главы̀ ѡ҆стриже́нїемъ, и҆ ᲂу҆́глїѧ разжже́нїемъ ѡ҆скорблѧ́юще тѧ̀, бг҃омꙋ́драѧ, ра́зꙋма твоегѡ̀ крѣ́пости ника́коже поколеба́ша."
 },
 {
  "type": "TEXT",
  "value": "Гво́здїе твоѐ и҆ заколе́нїе проѡбразꙋ́ющи, гдⷭ҇и, разжже́ныхъ рожнѡ́въ терплю̀ болѣ́знь, мч҃ница вопїѧ́ше."
 },
 {
  "type": "TEXT",
  "value": "Ѿто́ржєннымъ рꙋ́къ твои́хъ и҆ но́гъ, дѣ́во чи́стаѧ, ногтє́мъ, текꙋ́щею честно́ю твое́ю кро́вїю вѣ̑рныѧ ѡ҆свѧти́ла є҆сѝ, и҆ де́мѡнскїѧ кро́ве, мі́ръ хрⷭ҇топодо́бнѡ ѡ҆чи́стила є҆сѝ."
 },
 {
  "type": "TEXT",
  "value": "Бг҃оро́диченъ: Оу҆́мъ земны́й твоегѡ̀ па́че є҆стества̀ зача́тїѧ не мо́жетъ разꙋмѣ́ти, мт҃и дв҃о ѻ҆трокови́це: бг҃а бо родила̀ є҆сѝ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Бл҃года́тьми и҆ зна́мєнїи хрⷭ҇то́съ вѣнча̀ свѧще́ннꙋю твою̀ главꙋ̀, за него́же пострада́ти и҆зво́лила є҆сѝ, страстоте́рпице, ра́дости бжⷭ҇твенныѧ тезоимени́таѧ."
 },
 {
  "type": "TEXT",
  "value": "І҆ѡ́нꙋ и҆зъ глꙋбины̀ и҆зба́вивый, и҆ тебѐ въ морскꙋ́ю пꙋчи́нꙋ вве́рженꙋю спаса́етъ жи́вꙋ, бг҃омꙋ́драѧ: и҆ глꙋбино́ю крове́й твои́хъ врага̀ погрꙋзи́лъ є҆́сть."
 },
 {
  "type": "TEXT",
  "value": "Ѻ҆рꙋ́жїемъ терпѣ́нїѧ врагѝ ᲂу҆мертви́ла є҆сѝ, и҆ терпѧ́щи зꙋбѡ́въ всеконе́чное и҆стерза́нїе, сла́внаѧ, львѡ́въ безпло́тныхъ чє́люсти сломи́ла є҆сѝ."
 },
 {
  "type": "TEXT",
  "value": "Бг҃оро́диченъ: Крѣ́пость тѧ̀ ѡ҆брѣ́тши, дв҃о, и҆ ᲂу҆твержде́нїе харїті́на страстоте́рпица, мꙋ̑ки крѣ́пкѡ терпи́тъ, и҆ ра́дꙋющисѧ во слѣ́дъ тебѐ всѣ́хъ влⷣцѣ приво́дитсѧ."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Крѣ́пкимъ ра́зꙋмомъ, харїті́но, дꙋ́шꙋ ᲂу҆тве́рждши вѣ́рою, бори́телѧ врага̀ ꙗ҆́вѣ посрами́ла є҆сѝ, ᲂу҆ хрⷭ҇та̀ предста̀ всеблаже́ннаѧ, червлени́цꙋ ѿ крове́й твои́хъ носѧ́щи, и҆ при́снѡ со а҆́гг҃лы ра́дꙋешисѧ, молѝ за ны̀ страстоте́рпице."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Ю҆́ныѧ трѝ ѻ҆́троки ѿ пе́щи и҆зба́вивый, спаса́етъ ѿ колесѐ тѧ̀, мч҃нице, ѻ҆гневи́днагѡ, благода́рственнѡ воспѣва́ющꙋю: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Съ дѣ́вами свѣщено́сица на нбⷭ҇наѧ восхо́диши, ѻ҆́гнєнныѧ свѣщы̀ крѣ́пкѡ, внегда̀ пѣ́ти, терпѣ́ла є҆сѝ бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Ѡ҆бличе́нъ терпѣ́нїемъ твои́мъ пребеззако́нный, рꙋ́цѣ свѧзꙋ́етъ и҆ но́зѣ, и҆ во глꙋбины̑ вмета́етъ тѧ̀ пою́щꙋю: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и."
 },
 {
  "type": "TEXT",
  "value": "Сло́вомъ твои́мъ бжⷭ҇твеннымъ безслове́сїе врагѡ́въ ѡ҆бличи́ла є҆сѝ: страсте́й страстьмѝ, мꙋ́ченице, животво́рныхъ и҆спо́лнила є҆сѝ лише́нїе, бл҃гослове́нъ є҆сѝ, зовꙋ́щи, бж҃е мо́й гдⷭ҇и."
 },
 {
  "type": "TEXT",
  "value": "Бг҃оро́диченъ: Дв҃ꙋ є҆ди́нꙋ ꙗ҆́кѡ чⷭ҇тꙋ тѧ̀ и҆ нетлѣ́ннꙋ сло́во чⷭ҇тое возлюбѝ, и҆ и҆зъ тебє̀ возсозда̀ воплоща́емый, ѻ҆трокови́це, всего̀ человѣ́ка, харїті́нꙋ просла́вивъ чꙋдесы̀."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Красна̀ добро́тами твои́хъ ꙗ҆́звъ была̀ є҆сѝ, и҆ причта́ласѧ є҆сѝ, дѣ́во нетлѣ́нна пребы́вши, кра́сномꙋ сло́вꙋ, всечестна́ѧ, ѿ дв҃ы на́съ ра́ди воплоще́нномꙋ хрⷭ҇тꙋ̀. Є҆мꙋ́же вопїе́мъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Всѣ́ми бори́ма прилѡ́ги мꙋ́чащихъ тѧ̀, до́блественнѡ претерпѣ́ла є҆сѝ, колесѐ палѧ́ща лю́тость, рожнѡ́въ разжжє́нїѧ, въ глꙋбинꙋ̀ вверже́нїе, и҆ зꙋбѡ́въ, честна́ѧ, и҆ ногте́й и҆скоренє́нїѧ, хрⷭ҇та̀ велича́ющи во вѣ́ки."
 },
 {
  "type": "TEXT",
  "value": "Но́зѣ твоѝ добро́тами болѣ́зней, сла́внаѧ, ᲂу҆краси́стѣсѧ, тѣ́мъ на во́ды стꙋпа́ющи не ѡ҆мокри́стѣсѧ, съ тобо́ю пребыва́ющымъ, дѣ́во мꙋ́ченице, сла̑внымъ бж҃їимъ а҆́гг҃лѡмъ, съ ни́миже вопїѧ́ла є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Чꙋ́до ᲂу҆дивлѧ́ющее всѧ́къ ᲂу҆́мъ по сконча́нїи, ка́кѡ роди́телю и҆здадѐ мо́щи твоѧ̑ глꙋбина̀ прїе́мшаѧ, ꙗ҆̀же погребѐ ѻ҆те́чески, сокро́вищствꙋетъ бл҃года́ть ѿ тебѐ, харїті́но, црⷭ҇тво прїи́мъ нбⷭ҇ное."
 },
 {
  "type": "TEXT",
  "value": "Бг҃оро́диченъ: Ꙗ҆ви́ласѧ є҆сѝ превы́шшаѧ нб҃съ, бг҃а нбⷭ҇наго поро́ждши, ѡ҆небеси́вшаго земноро́дныхъ, пречⷭ҇таѧ, всѐ смѣше́нїе, и҆ харїті́ны честнꙋ́ю па́мѧть просвѣти́вша, є҆мꙋ́же пои́мъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Да вѣнцє́въ сла́вы, ꙗ҆́кѡ нетлѣ́ннаѧ дѣ́во мч҃нице, полꙋчи́ши, всѧ́кихъ мꙋче́нїй ви́дъ претерпѣ́ла є҆сѝ, веселѧ́щисѧ дꙋ́хомъ, и҆ ра́зꙋма тве́рдостїю."
 },
 {
  "type": "TEXT",
  "value": "Ꙗ҆́кѡ ᲂу҆добре́наѧ и҆ кра́снаѧ и҆ бг҃оꙋго́днаѧ дв҃а, ꙗ҆́кѡ непобѣди́маѧ мч҃ница, и҆ влⷣчнѧ невѣ́ста непоро́чнаѧ, златови́дными крилы̀ къ небє́снымъ возлетѣ́ла є҆сѝ."
 },
 {
  "type": "TEXT",
  "value": "Ты̀, свѣтови́днаѧ страстоте́рпице, возсїѧ́ла є҆сѝ лꙋча́ми, мра́къ лꙋка́вствїѧ де́мѡнѡвъ и҆ страсте́й ѿго́ниши, бг҃ода́нными тѝ всегда̀ чꙋдодѣ́йствы, досточꙋ́днаѧ."
 },
 {
  "type": "TEXT",
  "value": "Ра́достный тво́й де́нь веселѧ́щисѧ лю́ди совокꙋплѧ́етъ, твоѧ̑ до́блєсти воспѣ́ти, и҆ по́двиги и҆ борє́нїѧ, и҆ мꙋ́жественное страда́нїе, великомꙋ́ченице радостотезоимени́таѧ."
 },
 {
  "type": "TEXT",
  "value": "Бг҃оро́диченъ: Свѣ́тъ на́мъ возсїѧ̀ и҆зъ ᲂу҆тро́бы неискꙋсобра́чныѧ твоеѧ̀, дв҃о: є҆гѡ́же сїѧ́ньми ѡ҆зари́вшисѧ бжⷭ҇твеннѡ, свѣ́тъ бы́сть ра́дости тезоимени́таѧ, бг҃ороди́тельнице неискꙋсобра́чнаѧ."
 }
]