566 lines
50 KiB
JSON
566 lines
50 KiB
JSON
[
|
|
{
|
|
"type": "HEADER",
|
|
"value": "Ѻ҆ктѡ́врїа к҃г"
|
|
},
|
|
{
|
|
"type": "HEADER",
|
|
"value": "Пренесе́нїе моще́й ст҃а́гѡ і҆а́кѡва, борови́тскагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "Ве́черъ, Блаже́нъ мꙋ́жъ: На Гдⷭ҇и, воззва́хъ, стїхи̑ры, гла́съ є҃."
|
|
},
|
|
{
|
|
"type": "HEADER",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ, вели́кїй но́вграде, красꙋ́йсѧ и҆ ликꙋ́й, цр҃ковь бж҃їѧ: дне́сь бо свѣти́ло вели́кое на́мъ ꙗ҆ви́сѧ, многоцѣлє́бныѧ мо́щи бл҃же́ннагѡ і҆а́кѡва, и҆ мі́ръ ве́сь просвѣща́ютъ бг҃одарова́нными чꙋдесы̀: ꙗ҆́кѡ и҆сто́чникъ неисчерпа́емый показа́шасѧ, и҆ ꙗ҆́кѡ стрꙋи̑ точа́тъ и҆сцѣлє́нїѧ, вѣ́рою приходѧ́щымъ къ ра́цѣ бл҃же́нныхъ моще́й є҆гѡ̀: да́рꙋетъ бо здра́вїе неѡскꙋ́днѡ, болѧ́щымъ во грѣсѣ́хъ вели́кое врачева́нїе, и҆ хрⷭ҇та̀ мо́литъ дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ра́дꙋйсѧ, бг҃омꙋ́дре ѻ҆́ч҃е і҆а́кѡве: твоѧ̑ бо мо́щи всечестны̑ѧ и҆ ст҃ы̑ѧ ѻ҆би́льнѡ всегда̀ и҆сточа́ютъ и҆сцѣлє́нїѧ, вѣ́рнѡ приходѧ́щымъ, благоꙋха́нїѧ всѣ́хъ и҆сполнѧ́юще дꙋхо́внагѡ, и҆ тмꙋ̀ де́мѡнскꙋю дале́че ѿгонѧ́юще. Тѣ́мже мо́лимъ тѧ̀ рабѝ твоѝ, всѧ́кагѡ навѣ́та вра́жїѧ на́съ и҆зба́вити: ꙗ҆́кѡ да ра́достною дꙋше́ю и҆ чи́стымъ се́рдцемъ, ст҃о́е твоѐ пренесе́нїе дꙋхо́внѡ пра́зднꙋюще, мо́лимсѧ, дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "TEXT",
|
|
"value": "Ра́дꙋйсѧ, премꙋ́дре ѻ҆́ч҃е і҆а́кѡве, а҆́гг҃льское на землѝ житїѐ пожи́лъ є҆сѝ, дꙋ́хови пло́ть повинꙋ́лъ є҆сѝ, поще́нїемъ же и҆ воздержа́нїемъ свѣ́тъ мі́рови ꙗ҆ви́лсѧ є҆сѝ: ᲂу҆краси́лсѧ бо є҆сѝ, бл҃же́нне, и҆ ст҃ѣ́й трⷪ҇цѣ ѻ҆би́тель себѐ содѣ́лалъ є҆сѝ, и҆ дарова́нїѧ чꙋде́съ ѿ неѧ̀ сподо́бисѧ, и҆сцѣлѧ́ти разли̑чныѧ недꙋ́ги, приходѧ́щымъ съ вѣ́рою къ ра́цѣ моще́й твои́хъ, и҆ пра́зднꙋющымъ ст҃о́е пренесе́нїе. Молѝ дарова́ти дꙋша́мъ на́шымъ ми́ръ и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Пребл҃же́нне ѻ҆́ч҃е на́шъ і҆а́кѡве, бл҃года́тїю бжⷭ҇твеннагѡ дх҃а, ѻ҆би́льнѡ всегда̀ и҆сточа́еши и҆сцѣлє́нїѧ, съ вѣ́рою приходѧ́щымъ къ ра́цѣ моще́й твои́хъ, ю҆́же прїѧ́лъ є҆сѝ ѿ всѣ́хъ цр҃ѧ̀ хрⷭ҇та̀ бг҃а. Є҆гѡ́же дѣ́телїю дꙋ́хи лꙋка̑выѧ ѿ человѣ̑къ ѿгонѧ́еши, и҆сцѣлѧ́еши стра̑сти неисцѣ̑льныѧ, и҆ просвѣща́еши вѣ́рныхъ сердца̀ блиста́нїемъ чꙋде́съ твои́хъ: съ вы́шними же ли̑ки ны́нѣ на нб҃сѣ́хъ водворѧ́ешисѧ, бг҃омꙋ́дре, и҆ ра́дости неизрече́нныѧ наслажда́ешисѧ. Тѣ́мже дне́сь пра́зднꙋюще пренесе́нїе твоѐ, молѝ, мо́лимъ тѧ̀, моли́твами твои́ми дарова́ти на́мъ посо́бїе на врагѝ, и҆ ми́ръ мі́рови и҆спросѝ, належа́щихъ на́мъ скорбе́й дꙋше́вныхъ, и҆ тѣле́сныхъ страсте́й свободѝ моли́твами твои́ми."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "И҆́же тебє̀ ра́ди:"
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. И҆ чтє́нїѧ трѝ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ є҃ и҆ ѕ҃.)"
|
|
},
|
|
{
|
|
"type": "TEXT",
|
|
"value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры гла́съ д҃. Самогла́сны:"
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи, хвала́ми соше́дшесѧ ны́нѣ соста́вимъ торжество̀, въ честнѣ́мъ пра́здницѣ честна́гѡ пренесе́нїѧ бл҃же́ннагѡ і҆а́кѡва, дꙋхо́внѡ пра́зднꙋюще къ немꙋ̀ возопїе́мъ: молѝ, мо́лимсѧ, на́мъ побѣди́тєльнаѧ на врагѝ дарова́ти: тебе́ бо моли́твенника ко влⷣчцѣ те́пла стѧжа́хомъ, подаю́щаго мі́рови ве́лїю ми́лость."
|
|
},
|
|
{
|
|
"type": "TEXT",
|
|
"value": "Возсїѧ̀ дне́сь пресвѣ́тлаѧ па́мѧть твоѧ̀, бг҃омꙋ́дре і҆а́кѡве, созыва́ющи ны̀ празднолю́бцы къ похвале́нїю и҆ сла́вѣ хрⷭ҇та̀ бг҃а на́шегѡ, тѣ́мъ притека́юще къ ра́цѣ моще́й твои́хъ, и҆сцѣле́нїѧ да́ръ прїе́млемъ, и҆ тебѐ просла́вльшаго сп҃са хрⷭ҇та̀ воспѣва́емъ во вѣ́ки, непреста́ннѡ сла́вѧще."
|
|
},
|
|
{
|
|
"type": "TEXT",
|
|
"value": "Ѻ҆́ч҃е пребл҃же́нне і҆а́кѡве, дне́сь любо́вїю соше́дшесѧ къ честнѣ́й и҆ чꙋдотво́рнѣй тѝ ра́цѣ, свѣ́тлѡ торжествꙋ́юще гла́сы пѣ́сненными, ѱало́мски вопїю́ще, глаго́лемъ: бл҃же́нъ мꙋ́жъ боѧ́йсѧ гдⷭ҇а. Непоро́чнѡ бо въ за́повѣдехъ гдⷭ҇нихъ ходи́лъ є҆сѝ. Тѣ́мже ны́нѣ съ пра́ведными на нб҃сѣ́хъ водворѧ́ешисѧ: съ ни́ми же моли́сѧ гдⷭ҇еви, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Дꙋхо́вною бл҃года́тїю ѿе́млеши недꙋ́ги страсте́й, и҆ ѿго́ниши дꙋ́хи лꙋка̑выѧ, и҆ и҆сцѣлѧ́еши стра̑сти неисцѣ̑льныѧ, і҆а́кѡве всесла́вне, и҆ просвѣща́еши сердца̀ вѣ́рныхъ, блиста̑нїи чꙋде́съ твои́хъ. Тѣ́мже дне́сь гла́сы немо́лчными воспѣва́емъ пресвѣ́тлꙋю и҆ свѣтоно́снꙋю па́мѧть твою̀."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "При́зри на молє́нїѧ:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Ѽ пресла́вное чꙋ́до! Бж҃їимъ манове́нїемъ, ра́ка твоѧ̀, бл҃же́нне, на крѣ̀ прише́дши, ста̀ недви́жимѡ: вѣ́рнїи же лю́дїе, ѡ҆брѣ́тше тѧ̀, ра́достїю и҆ любо́вїю прїе́млюще. Моли́твами твоегѡ̀ ᲂу҆го́дника, хрⷭ҇тѐ бж҃е, спасѝ дꙋ́шы на́шѧ, ꙗ҆́кѡ милосе́рдъ."
|
|
},
|
|
{
|
|
"type": "TEXT",
|
|
"value": "Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Ѽ пресла́вное чꙋ́до! Сїѧ́нїемъ дх҃а прест҃а́гѡ просвѣща́еши ве́сь мі́ръ, притека́ющихъ къ ра́цѣ моще́й твои́хъ, бг҃омꙋ́дре і҆а́кѡве. Тѣ́мже вѣ́рнїи соше́дшесѧ въ твоѐ пренесе́нїе, гдⷭ҇еви вопїю́ще: і҆и҃се цр҃ю̀, спасѝ дꙋ́шы на́шѧ, ꙗ҆́кѡ милосе́рдъ."
|
|
},
|
|
{
|
|
"type": "TEXT",
|
|
"value": "Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀."
|
|
},
|
|
{
|
|
"type": "TEXT",
|
|
"value": "Ѽ пресла̑внаѧ и҆́стиннаѧ чꙋдеса̀ бл҃же́ннагѡ і҆а́кѡва! Ка́кѡ возмо́жемъ похвали́ти, и҆лѝ ꙗ҆́снѡ и҆зглаго́лати; подае́тъ бо разли̑чнаѧ и҆сцѣлє́нїѧ, не то́кмѡ притека́ющымъ къ ра́цѣ моще́й є҆гѡ̀, но и҆ вездѣ̀ призыва́ющымъ и҆́мѧ є҆гѡ̀, никогда́же скꙋ̑дны свои́хъ чꙋде́съ ѡ҆ставлѧ́етъ. И҆ ны́нѣ моли́сѧ, бл҃же́нне і҆а́кѡве, дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Возсїѧ̀ дне́сь пресвѣ́тлое торжество̀, ѻ҆́ч҃е бг҃омꙋ́дре і҆а́кѡве: ты́ бо ѿ младе́нства бг҃ꙋ прилѣпи́лсѧ, и҆ тогѡ̀ стопа́мъ послѣ́довалъ є҆сѝ. Мїрскі́й мѧте́жъ а҆́ки нꙋ́ждное волне́нїе преплы́лъ є҆сѝ, и҆ ны́нѣ на нб҃сѣ́хъ црⷭ҇твꙋеши: мы́ же, покланѧ́ющесѧ моще́мъ твои̑мъ, вѣ́рнѡ ѿ дꙋшѝ хрⷭ҇та̀ славосло́вимъ, да́вшаго на́мъ тебѐ те́пла моли́твенника къ бг҃ꙋ. Къ немꙋ́же ѡ҆ на́съ моли́сѧ, чтꙋ́щихъ и҆ вѣ́рнѡ пра́зднꙋющихъ твоѐ пренесе́нїе, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Творе́цъ и҆ и҆зба́витель мо́й:"
|
|
},
|
|
{
|
|
"type": "HEADER",
|
|
"value": "Тропа́рь, гла́съ а҃:"
|
|
},
|
|
{
|
|
"type": "TEXT",
|
|
"value": "Бжⷭ҇твенною бл҃года́тїю просвѣти́всѧ, и҆ по сме́рти да́рꙋеши и҆сцѣле́нїе притека́ющымъ къ ра́цѣ моще́й твои́хъ, премꙋ́дре і҆а́кѡве. Тѣ́мже и҆ мы̀ ны́нѣ чти́мъ честны́хъ моще́й твои́хъ пренесе́нїе, веселѧ́ще вкꙋ́пѣ дꙋ́шы и҆ тѣлеса̀, тѣ́мъ всѝ вопїе́мъ: сла́ва да́вшемꙋ тѝ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Гаврїи́лꙋ вѣща́вшꙋ тебѣ̀, дв҃о:"
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-мъ стїхосло́вїи, сѣда́ленъ, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆ви́лсѧ є҆сѝ:"
|
|
},
|
|
{
|
|
"type": "TEXT",
|
|
"value": "Пресвѣ́тлꙋю твою̀ па́мѧть дне́сь торжествꙋ́юще, сп҃са и҆ гдⷭ҇а моли́ти прилѣ́жнѡ, тѧ̀ мо́лимъ, ѻ҆́ч҃е і҆а́кѡве, всѣ̑мъ пода́ти согрѣше́нїй проще́нїе. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Те́плое застꙋпле́нїе сꙋ́щымъ въ бѣда́хъ, и҆ помо́щницꙋ на́шꙋ, и҆ къ бг҃ꙋ премѣне́нїе, є҆́юже тлѝ и҆зба́вихомсѧ, бцⷣꙋ вѣ́рнїи ᲂу҆бл҃жа́емъ."
|
|
},
|
|
{
|
|
"type": "HEADER",
|
|
"value": "По в҃-мъ стїхосло́вїи сѣда́ленъ, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Ли́къ а҆́гг҃льскїй:"
|
|
},
|
|
{
|
|
"type": "TEXT",
|
|
"value": "Житїѐ на землѝ благоче́стнѡ сконча́въ, прїѧ́телище дх҃а ст҃а́гѡ ꙗ҆ви́лсѧ є҆сѝ, просвѣща́ѧ къ тебѣ̀ вѣ́рою притека́ющыѧ, бл҃же́нне. Тѣ́мже молѝ влⷣкꙋ и҆ гдⷭ҇а, просвѣти́ти дꙋ́шы на́шѧ, воспѣва́ющихъ тѧ̀, і҆а́кѡве бг҃облаже́нне, ѻ҆́ч҃е на́шъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Всѣ́хъ творца̀ и҆ гдⷭ҇а и҆ зижди́телѧ, всенепоро́чнаѧ, чⷭ҇таѧ, дх҃омъ бжⷭ҇твеннымъ въ ложесна́хъ заче́нши, безъ и҆стлѣ́нїѧ родила̀ є҆сѝ, є҆го́же сла́вѧще, тѧ̀ воспѣва́емъ, дв҃о, ꙗ҆́кѡ пала́тꙋ всѣ́хъ цр҃ѧ̀, и҆ мі́рови спасе́нїе."
|
|
},
|
|
{
|
|
"type": "TEXT",
|
|
"value": "По Хвали́те и҆́мѧ гдⷭ҇не:"
|
|
},
|
|
{
|
|
"type": "TEXT",
|
|
"value": "Припѣ́въ: Оу҆блажа́емъ тѧ̀, ст҃ы́й пра́ведный і҆а́кѡве, и҆ чте́мъ свѧтꙋ́ю па́мѧть твою̀: ты́ бо мо́лиши за на́съ хрⷭ҇та̀ бг҃а на́шего."
|
|
},
|
|
{
|
|
"type": "TEXT",
|
|
"value": "Ѱало́мъ и҆збра́нный: Терпѧ̀ потерпѣ́хъ гдⷭ҇а:"
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Премꙋ́дрости:"
|
|
},
|
|
{
|
|
"type": "TEXT",
|
|
"value": "Плотскі̑ѧ стра̑сти воздержа́нїемъ, ѻ҆́ч҃е, ᲂу҆вѧди́лъ є҆сѝ, и҆ бл҃года́ть дꙋхо́внꙋю воспрїѧ́лъ є҆сѝ. Тѣ́мъ и҆ сосꙋ́дъ досто́инъ бы́лъ є҆сѝ, и҆ по кончи́нѣ ꙗ҆ви́лсѧ є҆сѝ стра̑сти ѡ҆чища́ѧ, ѻ҆́ч҃е і҆а́кѡве, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чествꙋ́ющымъ любо́вїю ст҃о́е твоѐ пренесе́нїе. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
|
|
},
|
|
{
|
|
"type": "HEADER",
|
|
"value": "Та́же степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ:"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те, всѝ лю́дїе, хвалꙋ̀ принесе́мъ бл҃же́нномꙋ, вопїю́ще: ра́дꙋйсѧ, пресвѣ́тлый сто́лпе, просвѣща́ѧй на́съ чꙋде́съ свѣтлостьмѝ. Ра́дꙋйсѧ, росоно́сный ѻ҆́блаче, пла́мень погаша́ющь страсте́й, и҆ ѡ҆роша́ющь вѣ́рныхъ мы̑сли. Ра́дꙋйсѧ, молѧ́йсѧ хрⷭ҇тꙋ̀, є҆́же пода́ти во́инствꙋ на́шемꙋ побѣ̑ды на пога̑ныѧ врагѝ, и҆ ᲂу҆мири́ти мі́ръ, и҆ спастѝ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы, со і҆рмосо́мъ на ѕ҃. И҆ ст҃а́гѡ канѡ́нъ на и҃: гла́съ є҃, є҆гѡ́же краегране́сїе по а҆лфави́тꙋ до девѧ́тыѧ пѣ́сни:"
|
|
},
|
|
{
|
|
"type": "TEXT",
|
|
"value": "Соверше́нъ же списа́вшагѡ и҆́менемъ."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "А҆́гнче бж҃їй, сло́ве, да́ждь мѝ сло́во недосто́йномꙋ твоемꙋ̀ рабꙋ̀, да возмогꙋ̀ воспѣ́ти въ па́мѧть пренесе́нїѧ моще́й бл҃же́ннагѡ і҆а́кѡва торжество̀, взыва́ѧ: томꙋ̀ є҆ди́номꙋ воспои́мъ, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Безвѣ̑стнаѧ и҆ та̑йнаѧ послѣ́днемꙋ ро́дꙋ ꙗ҆влє́на бы́ша, честны̑ѧ мо́щи твоѧ̑, премꙋ́дре і҆а́кѡве, къ ни́мже прикаса́ющесѧ, ѡ҆свѧще́нїе прїе́млемъ, гдⷭ҇еви пою́ще: того̀ є҆ди́наго воспои́мъ, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Всест҃а́ѧ твоѧ̀ па́мѧть возсїѧ̀ мі́рови, ꙗ҆́кѡ со́лнце просвѣща́етъ дꙋ́шы бл҃гоче́стнѡ пою́щихъ тѧ̀, въ не́йже моли́сѧ, бл҃же́нне, пода́ти ѡ҆чище́нїе грѣхѡ́въ, гдⷭ҇еви зовꙋ́щымъ: того̀ є҆ди́наго воспои́мъ, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Гдⷭ҇ороди́тельнице чⷭ҇таѧ, нбⷭ҇ный вхо́де, горо̀ несѣко́маѧ, две́рь непроходи́маѧ, а҆пⷭ҇лѡмъ сла́ва, мꙋ́ченикѡмъ весе́лїе, прпⷣбнымъ красота̀, прїимѝ моле́нїе на́ше, є҆́же тѝ прино́симъ въ па́мѧть бл҃же́ннагѡ і҆а́кѡва, гдⷭ҇еви пою́ще: тогѡ̀ є҆ди́наго воспои́мъ, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Катава́сїа: Ѿве́рзꙋ ᲂу҆ста̀ моѧ̑:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче."
|
|
},
|
|
{
|
|
"type": "TEXT",
|
|
"value": "Де́нь пра́зднственный дне́сь пра́зднꙋютъ наро́ди вели́кагѡ нова́града: ѡ҆брѣто́ша бо мо́щи бл҃же́ннагѡ і҆а́кѡва, ꙗ҆́кѡ нѣ́кое сокро́вище бога́тно, непреста́ннѡ хрⷭ҇тꙋ̀ зовꙋ́ще: цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче."
|
|
},
|
|
{
|
|
"type": "TEXT",
|
|
"value": "Є҆стество̀ тлѣ́нное нивочто́же вмѣни́въ, житїѐ чи́стое на землѝ пожи́лъ є҆сѝ, и҆ сегѡ̀ ра́ди наслѣ́довалъ є҆сѝ нбⷭ҇ное селе́нїе. Молѝ и҆ на́мъ полꙋчи́ти та́мошнее бл҃же́нство, пра́зднꙋющымъ твоѐ пренесе́нїе, да непреста́ннѡ хрⷭ҇тꙋ̀ зове́мъ: цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче."
|
|
},
|
|
{
|
|
"type": "TEXT",
|
|
"value": "Житїѐ твоѐ ꙗ҆́кѡ со́лнце въ сердца̀ вѣ́рныхъ возсїѧ̀, зарю̀ чꙋде́съ и҆спꙋща́ѧ. Тѣ́мже и҆ на́съ невече́рнимъ свѣ́томъ ѡ҆зарѝ, всечестно́е твоѐ пренесе́нїе почита́ющихъ, да непреста́ннѡ хрⷭ҇тꙋ̀ зове́мъ: цр҃ковь твою̀ ᲂу҆твердѝ, є҆ди́не бл҃же и҆ чл҃вѣколю́бче."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѕѣлѡ̀ лю́тѣ погрꙋжа́емꙋю дꙋ́шꙋ мою̀ въ пꙋчи́нѣ жите́йскихъ страсте́й, и҆ бꙋ́рею ѡ҆держи́мꙋю безмѣ́рныхъ согрѣше́нїй, спасе́нїѧ мѝ прострѝ рꙋ́кꙋ, пречⷭ҇таѧ, и҆ и҆зведѝ и҆зъ глꙋбины̀ ѕѡ́лъ мои́хъ, да ра́дꙋѧсѧ сла́влю тѧ̀ всенепоро́чнꙋю."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ є҃:"
|
|
},
|
|
{
|
|
"type": "TEXT",
|
|
"value": "Пресвѣ́тлаѧ и҆ свѣтоно́снаѧ, ѻ҆́ч҃е бг҃омꙋ́дре і҆а́кѡве, приспѣ̀ твоѧ̀ па́мѧть, созыва́ющи вѣ́рныхъ мно́жество, просла́вити и҆ пѣ́ти твоѐ честно́е пренесе́нїе, про́симъ ѿ хрⷭ҇та̀ прїѧ́ти ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ꙗ҆ви́ласѧ є҆сѝ вы́шши нбⷭ҇ныхъ си́лъ, влⷣкꙋ и҆ гдⷭ҇а ро́ждши, бцⷣе: земны́хъ є҆стество̀ возвела̀ є҆сѝ, бг҃оневѣ́стнаѧ. Тѣ́мже тѧ̀ вои́стиннꙋ, бг҃ороди́тельницꙋ, се́рдцемъ и҆ дꙋше́ю вѣ́рнїи сла́вимъ."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Дѣла̀ смотре́нїѧ твоегѡ̀, гдⷭ҇и, ᲂу҆жаси́ша прⷪ҇ро́ка а҆ввакꙋ́ма: и҆зше́лъ бо є҆сѝ на спасе́нїе люде́й твои́хъ, спастѝ пома̑занныѧ твоѧ̑ прише́лъ є҆сѝ."
|
|
},
|
|
{
|
|
"type": "TEXT",
|
|
"value": "Зе́млени бо є҆смы̀ и҆ пе́рстни человѣ́цы, вѣ́рнѡ припа́даемъ къ пречестны̑мъ моще́мъ твои̑мъ, бл҃же́нне і҆а́кѡве, просѧ́ще ѿпꙋще́нїѧ грѣхѡ́въ: моли́сѧ ѡ҆ вѣ́рнѡ пра́зднꙋющихъ твоѐ честно́е пренесе́нїе."
|
|
},
|
|
{
|
|
"type": "TEXT",
|
|
"value": "И҆́же крⷭ҇тъ взе́мъ, бл҃же́нне, и҆ жела́емагѡ тѝ ѻ҆те́чества дости́гъ го́рнѧгѡ і҆ерⷭ҇ли́ма, и҆ въ не́мъ со а҆́гг҃лы ликꙋ́еши, і҆а́кѡве премꙋ́дре, моли́сѧ ѡ҆ чтꙋ́щихъ твоѐ честно́е пренесе́нїе."
|
|
},
|
|
{
|
|
"type": "TEXT",
|
|
"value": "Ны́нѣ на нб҃сѣ́хъ съ пра́ведными весели́шисѧ, пребл҃же́нне і҆а́кѡве: съ ни́миже моли́сѧ, хрⷭ҇тꙋ̀ предстоѧ̀, ми́ръ мі́рови дарова́ти, и҆ благочести́вомꙋ наро́дꙋ на́шемꙋ здра́вїе, и҆ на врагѝ побѣжде́нїе, и҆ всѣ̑мъ скорбѧ́щымъ ᲂу҆тѣше́нїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Кто̀ не ᲂу҆диви́тсѧ, и҆лѝ кто̀ не почꙋди́тсѧ человѣколю́бїю бж҃їю; сше́дъ бо съ нб҃сѐ, и҆ воплоти́сѧ на́съ ра́ди и҆зъ тебє̀ безъ ѻ҆тца̀, є҆ди́на всепѣ́таѧ: є҆го́же молѝ и҆зба́витисѧ рабѡ́мъ твои̑мъ ѿ всѧ́кїѧ ско́рби."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆каѧ́ннꙋю дꙋ́шꙋ мою̀, нощеборю́щꙋюсѧ со тмо́ю страсте́й, предвари́въ, ᲂу҆ще́дри, и҆ возсїѧ́й мы́сленное сл҃нце, днесвѣ́тлыѧ ѕвѣзды̀ во мнѣ̀, во є҆́же раздѣли́ти но́щь ѿ свѣ́та."
|
|
},
|
|
{
|
|
"type": "TEXT",
|
|
"value": "Любо́вїю чтꙋ́ще твоѐ пренесе́нїе, прилѣ́жнѡ тѧ̀ мо́лимъ, премꙋ́дре і҆а́кѡве, не преста́й молѧ́сѧ хрⷭ҇тꙋ̀ бг҃ꙋ, да прїи́мемъ грѣхѡ́въ просты́ню, и҆ да ѡ҆зари́тъ на́съ въ нощѝ свѣ́тъ."
|
|
},
|
|
{
|
|
"type": "TEXT",
|
|
"value": "Мно́жество наро́да вели́кагѡ нова́града, соше́дшесѧ дне́сь въ твоѐ пренесе́нїе, бл҃же́нне і҆а́кѡве, прикаса́ющесѧ честны̑мъ моще́мъ твои̑мъ, и҆ ѿ ни́хъ и҆сцѣлє́нїѧ почерпа́емъ, непреста́ннѡ зовꙋ́ще: да ѡ҆зари́тъ на́съ въ нощѝ свѣ́тъ."
|
|
},
|
|
{
|
|
"type": "TEXT",
|
|
"value": "Не то́кмѡ въ житїѝ сы́й, но и҆ по сме́рти мнѡ́га чꙋдеса̀ ѿ честны́ѧ тѝ ра́ки содѣва́ютсѧ, приходѧ́щымъ съ вѣ́рою, всебл҃же́нне і҆а́кѡве, недꙋ́ги прогонѧ́еши, и҆ ѿ бѣ́дъ и҆збавлѧ́еши си́лою хрⷭ҇то́вою. Къ немꙋ́же непреста́ннѡ зове́мъ: да ѡ҆зари́тъ на́съ въ нощѝ свѣ́тъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѻ҆́нъ, вселꙋка́вый, по всѧ̑ дни̑ къ го́ршымъ влече́тъ мѧ̀, и҆ въ ро́въ поги́бели влага́етъ, и҆ во ѿча́ѧнїе мѧ̀ влече́тъ: но тогѡ́ мѧ ловле́нїѧ, чⷭ҇таѧ, и҆схитѝ, и҆ твори́ти во́лю бжⷭ҇твеннꙋю сн҃а твоегѡ̀ и҆ бг҃а на́шегѡ наста́ви, и҆ въ ча́съ стра́шнагѡ прише́ствїѧ є҆гѡ̀, и҆зба́ви мѧ̀ всѧ́кагѡ ѡ҆сꙋжде́нїѧ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѡ҆бы́де мѧ̀ бе́здна, гро́бъ мнѣ̀ ки́тъ бы́сть: а҆́зъ же возопи́хъ къ тебѣ̀ чл҃вѣколю́бцꙋ, и҆ спасе́ мѧ десни́ца твоѧ̀, гдⷭ҇и."
|
|
},
|
|
{
|
|
"type": "TEXT",
|
|
"value": "Прїиди́те, собери́тесѧ вели́кагѡ нова́града наро́ди, свѣ́тлѡ пра́зднꙋемъ пренесе́нїе моще́й бл҃же́ннагѡ і҆а́кѡва: мо́литсѧ бо ко влⷣцѣ и҆ бг҃ꙋ на́шемꙋ, да и҆зба́витъ на́съ ѿ всѧ́кагѡ ѡ҆ѕлобле́нїѧ, къ немꙋ́же воспѣва́юще глаго́лемъ: спасѐ на́съ десни́ца твоѧ̀, гдⷭ҇и."
|
|
},
|
|
{
|
|
"type": "TEXT",
|
|
"value": "Ра́ка моще́й твои́хъ, премꙋ́дре і҆а́кѡве, дража́йши сапфі́ра показа́сѧ: чꙋдотвори́ва бо бѣ̀, и҆сцѣлє́нїѧ и҆сточа́ющи. ю҆́же ѡ҆блобыза́юще вѣ́рнїи, ра́достнѡ ѿ дꙋшѝ хрⷭ҇тꙋ̀ зове́мъ: спасѐ на́съ десни́ца твоѧ̀, гдⷭ҇и."
|
|
},
|
|
{
|
|
"type": "TEXT",
|
|
"value": "Свѣ́тлыми сїѧ̑нїи ѡ҆брѣто́шасѧ на крѣ̀ честны̑ѧ твоѧ̑ мо́щи, і҆а́кѡве пречꙋ́дне, ны́нѣ а҆́ки зарѧ̀ пресвѣ́тлаѧ, просвѣща́ютъ и҆ ѡ҆свѧща́ютъ чтꙋ́щихъ тѧ̀ вѣ́рнѡ, и҆ ра́достнѡ ѿ дꙋшѝ хрⷭ҇тꙋ̀ зовꙋ́щихъ: спасѐ на́съ десни́ца твоѧ̀, гдⷭ҇и."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тебѐ, чⷭ҇тꙋю дв҃ꙋ нескве́рнꙋю, є҆ди́нꙋ и҆́мамъ стѣ́нꙋ непреѡбори́мꙋ, прибѣ́жище и҆ покро́въ крѣ́покъ, и҆ ѻ҆рꙋ́жїе спасе́нїѧ: да мѧ̀ не пре́зриши ѻ҆каѧ́ннаго, наде́жда ненадє́жнымъ, скорбѧ́щымъ ра́дость и҆ застꙋпле́нїе."
|
|
},
|
|
{
|
|
"type": "HEADER",
|
|
"value": "Конда́къ, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Взбра́нной:"
|
|
},
|
|
{
|
|
"type": "TEXT",
|
|
"value": "Вѣ́рою и҆ любо́вїю твоѐ честно́е пренесе́нїе пра́зднꙋющихъ, бл҃же́нне, сохранѝ и҆ соблюдѝ ѿ всѧ́кїѧ ѕло́бы, и҆ собла́зна ѕмїи́на: и҆́маши бо дерзнове́нїе ко влⷣцѣ всѣ́хъ хрⷭ҇тꙋ̀ бг҃ꙋ, є҆го́же молѝ спастѝ правосла̑вныѧ лю́ди, молѧ́щыѧ тѧ̀, да всѝ вопїе́мъ тѝ: ра́дꙋйсѧ, ѻ҆́ч҃е і҆а́кѡве, всеѧ̀ рѡссі́йскїѧ землѝ ᲂу҆добре́нїе."
|
|
},
|
|
{
|
|
"type": "TEXT",
|
|
"value": "І҆́косъ: А҆́гг҃лъ на землѝ житїе́мъ показа́всѧ, а҆́гг҃лы ᲂу҆диви́лъ є҆сѝ: бѣ́сы же ᲂу҆страши́лъ є҆сѝ, и҆ человѣ́ки просвѣти́лъ є҆сѝ зарѧ́ми чꙋде́съ твои́хъ, бг҃оно́се и҆ пребл҃же́нне ѻ҆́ч҃е на́шъ і҆а́кѡве. И҆ ны́нѣ на́съ вразꙋмѝ воспѣва́ти пѣ́снь къ твоемꙋ̀ хвале́нїю, ра́достнымъ гла́сомъ си́це гл҃го́лющихъ: ра́дꙋйсѧ, ѡ҆ста́вивый тлѣ́нное мꙋдрова́нїе, и҆ прїе́мый нетлѣ́нный вѣне́цъ. Ра́дꙋйсѧ, терпѣли́вый дꙋше́ю, ѕлоко́зненнаго врага̀ подъ нога́ми сте́рлъ є҆сѝ. Ра́дꙋйсѧ, ни́жнее мꙋдрова́нїе ѡ҆ста́вль, и҆ вы́шнѧгѡ црⷭ҇твїѧ дости́гъ. Ра́дꙋйсѧ, цѣли́телю болѣ́зней, и҆ ѿгони́телю страсте́й. Ра́дꙋйсѧ, ѻ҆́ч҃е і҆а́кѡве, всеѧ̀ рѡссі́йскїѧ землѝ ᲂу҆добре́нїе."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆гнѧ̀ гаси́лище, ѻ҆трокѡ́въ моли́тва, ѡ҆роша́ющаѧ пе́щь, проповѣ́дница чꙋдесѐ, не ѡ҆палѧ́ющи, нижѐ сожига́ющи, пѣсносло́вцы бг҃а ѻ҆тє́цъ на́шихъ."
|
|
},
|
|
{
|
|
"type": "TEXT",
|
|
"value": "Оу҆ста́ви ны́нѣшнюю бꙋ́рю, ѡ҆бдержа́щꙋю на́съ, блаже́нне, и҆ ᲂу҆кротѝ моли́твами твои́ми, и҆ ва́рварское нахожде́нїе низложѝ, и҆ на́съ ра̑бъ твои́хъ на сопоста́ты ᲂу҆крѣпѝ, да ра́дꙋющесѧ пое́мъ: бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Фарїсе́йски не лицемѣ́рꙋемъ, но со смире́нїемъ и҆ ра́достїю прикаса́ющесѧ къ честнѣ́й ра́цѣ твое́й, премꙋ́дре і҆а́кѡве, про́симъ проще́нїѧ грѣхѡ́въ, хрⷭ҇тꙋ̀ ѿ дꙋшѝ вопїю́ще: бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Храни́тель бꙋ́ди вели́кїѧ рѡссі́и, хрⷭ҇толюби́вомꙋ наро́дꙋ на́шемꙋ, бг҃омꙋ́дре і҆а́кѡве, сохранѧ́ѧй ѿ пога́ныхъ наше́ствїѧ и҆ междоꙋсо́бныѧ бра́ни, гла́да же и҆ па́гꙋбы, да, моли́твами твои́ми и҆зба́вльшесѧ, ра́достнѡ ѿ дꙋшѝ хрⷭ҇тꙋ̀ зове́мъ: бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѿча́ѧвшымсѧ є҆сѝ ве́лїе прибѣ́жище, ѡ҆бꙋрева́ємымъ ти́хое приста́нище є҆сѝ, бцⷣе, тѣ́мже и҆ мы̀, припа́дающїи, да не постыди́мсѧ, мт҃и и҆́стиннагѡ живота̀, тебѐ бл҃годарѧ́ще и҆ пою́ще: бл҃гослове́на ты̀ въ жена́хъ, всенепоро́чнаѧ влⷣчце."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Ѡ҆роси́вшаго пе́щь, и҆ ѻ҆́троки сохра́ншаго посредѣ̀ горѧ́щагѡ пла́мене, ѻ҆́троцы славосло́вите, свѧще́нницы благослови́те, лю́дїе превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Моли́твенника тѧ̀ те́пла стѧжа́вше и҆ ско́раго помо́щника, и҆ ꙗ҆́кѡ стѣ́нꙋ тве́рдꙋ и҆ забра́ло недви́жимо и҆ неѡбꙋрева́емо, не забꙋ́ди моли́твєнникъ твои́хъ, и҆збавлѧ́й на́съ ѿ всѧ́кїѧ нꙋ́жды и҆ печа́ли, да ра́дꙋющесѧ хрⷭ҇тꙋ̀ зове́мъ: лю́дїе, превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Чꙋде́съ и҆сто́чникъ рака̀ твоѧ̀ ꙗ҆ви́сѧ, і҆а́кѡве пребл҃же́нне, ѿ неѧ́же ѻ҆би́льнѡ всѝ притека́ющїи прїе́млютъ тѣлесє́мъ здра́вїе и҆ дꙋша́мъ спасе́нїе, твои́ми моли́твами, да ра́дꙋющесѧ хрⷭ҇тꙋ̀ зове́мъ: лю́дїе, превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Ше́ствїе твоѐ до́брѣ сконча́лъ є҆сѝ и҆ мїрскі́й мѧте́жъ, а҆́ки безбꙋ́рное приста́нище, преплы́лъ є҆сѝ, и҆ а҆́гг҃льски на землѝ пожи́лъ є҆сѝ, пло́ть твою̀ дх҃ови повинꙋ́лъ є҆сѝ. И҆ ны́нѣ, на нб҃сѣ́хъ предстоѧ̀ всѣ́хъ цр҃ю̀ хрⷭ҇тꙋ̀, помина́й чтꙋ́щихъ твоѐ пренесе́нїе, є҆мꙋ́же зове́мъ: лю́дїе превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ще́драго и҆ чл҃вѣколюби́ваго сп҃са ро́ждши, чⷭ҇таѧ, того̀ молѝ, ᲂу҆ще́дрити раба̀ твоего̀, и҆ къ покаѧ́нїѧ пꙋтѝ. Наста́ви: лꙋка́вагѡ собла́зны ѿ се́рдца моегѡ̀ ѿженѝ, и҆ тогѡ̀ и҆зба́ви ловле́нїѧ, и҆ ѻ҆гнѧ̀ вѣ́чнагѡ и҆схитѝ, ꙗ҆́кѡ да непреста́ннѡ пою́ тѧ, чⷭ҇тꙋю, во всѧ̑ вѣ́ки."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ."
|
|
},
|
|
{
|
|
"type": "TEXT",
|
|
"value": "И҆сто́чникъ и҆сцѣле́нїѧ и҆спꙋща́ѧ, врачева́нїе же безме́здно, ковче́гъ свѧще́нїѧ твои́хъ моще́й ра́ка ꙗ҆ви́сѧ: и҆зъ неѧ́же почерпа́емъ здра́вїе присноживо́тное, притека́ющїи вѣ́рнѡ, бл҃же́нне і҆а́кѡве, и҆ тебѐ дарова́вшаго, въ пѣ́снехъ велича́емъ."
|
|
},
|
|
{
|
|
"type": "TEXT",
|
|
"value": "Возвели́чилъ є҆сѝ на землѝ твоего̀ влⷣкꙋ: тѣ́мъ и҆ въ твоѐ пренесе́нїе глꙋбинꙋ̀ чꙋде́съ показа̀, и҆ стрꙋю̀ неѡскꙋдѣва́емꙋ ра́кꙋ моще́й твои́хъ, і҆а́кѡве премꙋ́дре. Слѣпы̑мъ є҆́же ви́дѣти дарова́сѧ, прокажє́ннымъ ѡ҆чище́нїе, и҆ ѡ҆держи̑мыѧ нечи́стыми дꙋ́хи цѣломꙋ́дрены твори́ши. Тѣ́мже тѧ̀ велича́емъ."
|
|
},
|
|
{
|
|
"type": "TEXT",
|
|
"value": "Недосто́йною мое́ю рꙋко́ю принесо́хъ тѝ таково́е сло́ва и҆зви́тїе, бг҃омꙋ́дрый і҆а́кѡве: не пре́зри, но прїимѝ сїѐ съ любо́вїю: и҆ молѝ за мѧ̀ творца̀ твоего̀, влⷣкꙋ и҆ гдⷭ҇а, та́мошнѧгѡ мѧ̀ и҆зба́вити мꙋче́нїѧ, и҆ ми́лость ѡ҆брѣстѝ въ де́нь стра́шнагѡ и҆спыта́нїѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Влⷣчце мі́ра, бцⷣе, во глꙋбинѣ̀ ѕѡ́лъ поги́бели, менѐ, погрꙋже́ннаго ѕлоꙋ́мнѡ сластьмѝ плотски́ми и҆ пристра́стїемъ вещьмѝ житїѧ̀, и҆зведѝ, прест҃а́ѧ дв҃о, твои́мъ милосе́рдїемъ, и҆́бо не и҆́мамъ наде́жды: ве́сь бо є҆́смь, чⷭ҇таѧ, во ѿча́ѧнїи, да тѧ̀ непреста́ннѡ велича́ю."
|
|
},
|
|
{
|
|
"type": "HEADER",
|
|
"value": "Свѣти́ленъ:"
|
|
},
|
|
{
|
|
"type": "TEXT",
|
|
"value": "Подо́бенъ: Жєны̀ ᲂу҆слы́шите:"
|
|
},
|
|
{
|
|
"type": "TEXT",
|
|
"value": "Ꙗ҆́коже со́лнце ѡ҆блиста́ѧ, чꙋдеса̀ и҆спꙋща́еши, просвѣща́ѧ вѣ́рныхъ сердца̀, твоѐ сла́вное пренесе́нїе вѣ́рнѡ творѧ́щыѧ спаса́й, бг҃омꙋ́дре і҆а́кѡве, ѻ҆́ч҃е на́шъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Тѧ̀ предста́тельницꙋ и҆́мамы, грѣ́шнїи, ѽ прест҃а́ѧ дв҃о! Ты̀ благопремѣ́нна сотворѝ сн҃а твоего̀ и҆ бг҃а на́шего, мт҃рними твои́ми моли́твами."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры на д҃, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ꙗ҆́кѡ до́блѧ:"
|
|
},
|
|
{
|
|
"type": "TEXT",
|
|
"value": "Прїиди́те вѣ́рнїи, хвала́ми, соше́дшесѧ, ны́нѣ соста́вимъ торжество̀ въ честнѣ́мъ пра́здницѣ честна́гѡ пренесе́нїѧ бл҃же́ннагѡ і҆а́кѡва дꙋхо́внѡ пра́зднꙋюще, къ немꙋ̀ возопїи́мъ: молѝ, мо́лимсѧ, на́мъ побѣди́тєльнаѧ на врагѝ дарова́ти: тебе́ бо ко влⷣцѣ те́пла моли́твенника стѧжа́хомъ, подаю́щемꙋ мі́рꙋ ве́лїю ми́лость. Два́жды."
|
|
},
|
|
{
|
|
"type": "TEXT",
|
|
"value": "Возсїѧ̀ дне́сь пресвѣ́тлаѧ па́мѧть твоѧ̀, бг҃омꙋ́дре і҆а́кѡве, созыва́ющи ны̀, празднолю́бцы, къ похвале́нїю и҆ сла́вѣ хрⷭ҇та̀ бг҃а на́шегѡ. Тѣ́мъ притека́юще къ ра́цѣ моще́й твои́хъ, и҆сцѣле́нїѧ да́ръ прїе́млемъ, и҆ тебѐ просла́вльшаго, сп҃са хрⷭ҇та̀, воспѣва́емъ во вѣ́ки, непреста́ннѡ сла́вѧще."
|
|
},
|
|
{
|
|
"type": "TEXT",
|
|
"value": "Ѻ҆́ч҃е пребл҃же́нне і҆а́кѡве, дне́сь любо́вїю соше́дшесѧ къ честнѣ́й и҆ чꙋдотво́рнѣй твое́й ра́цѣ, свѣ́тлѡ торжествꙋ́юще, гла́сы пѣ́сненными, ѱало́мски вопїю́ще глаго́лемъ: бл҃же́нъ мꙋ́жъ, боѧ́йсѧ гдⷭ҇а, непоро́чнѡ бо въ за́повѣдехъ гдⷭ҇нихъ ходи́лъ є҆сѝ. Тѣ́мже ны́нѣ съ првⷣными на нб҃сѣ́хъ водворѧ́ешисѧ: съ ни́миже моли́сѧ гдⷭ҇еви, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прїиди́те всѝ вели́кагѡ нова́града наро́ди, соше́дшесѧ, возвели́чимъ хрⷭ҇то́ва рачи́телѧ: се́й бо и҆змла́да покорѝ пло́ть дꙋ́хꙋ, и҆ по гдⷭ҇нимъ стопа́мъ и҆зво́ли ходи́ти, на землѝ жестоко̀ житїѐ показа̀. А҆́гг҃лы ᲂу҆́бѡ ᲂу҆дивѝ, де́мѡны же ᲂу҆страшѝ и҆ человѣ́ки просвѣтѝ. Къ немꙋ́же си́це рце́мъ: ра́дꙋйсѧ, терпѣли́вый дꙋше́ю, и҆́же ѡ҆ста́вивъ тлѣ́нное мꙋдрова́нїе и҆ прїе́мъ нетлѣ́нный вѣне́цъ. Ра́дꙋйсѧ, свѣти́льниче многосвѣ́тлый и҆ къ бг҃ꙋ мл҃твенниче те́плый, и҆́же ѕлоко́зненнаго врага̀ до конца̀ подъ нога́ми сте́рлъ є҆сѝ. Ра́дꙋйсѧ, і҆а́кѡве преди́вный, нбⷭ҇ный человѣ́че, земны́й а҆́гг҃ле, и҆ ны́нѣ на нб҃сѣ́хъ ᲂу҆ прⷭ҇то́ла предстои́ши всецр҃ѧ̀ хрⷭ҇та̀, къ немꙋ́же за ны̀ моли́сѧ, вѣ́рою и҆ любо́вїю пра́зднꙋющыѧ твоѐ честно́е пренесе́нїе, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Бцⷣе ты̀ є҆сѝ лоза̀:"
|
|
},
|
|
{
|
|
"type": "HEADER",
|
|
"value": "Славосло́вїе вели́кое, и҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и слꙋ́жба преподо́бническаѧ."
|
|
}
|
|
] |