770 lines
66 KiB
JSON
770 lines
66 KiB
JSON
[
|
|
{
|
|
"type": "HEADER",
|
|
"value": "Деке́мврїа є҃і"
|
|
},
|
|
{
|
|
"type": "HEADER",
|
|
"value": "И҆́же во ст҃ы́хъ, ѻ҆ц҃а̀ на́шегѡ стефа́на и҆сповѣ́дника, а҆рхїепі́скопа сꙋро́жскагѡ."
|
|
},
|
|
{
|
|
"type": "HEADER",
|
|
"value": "Ве́черъ, Блаже́нъ мꙋ́жъ:"
|
|
},
|
|
{
|
|
"type": "HEADER",
|
|
"value": "На Гдⷭ҇и, воззва́хъ, поста́вимъ стїхѡ́въ ѕ҃, и҆ пое́мъ стїхи̑ры, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Да́лъ є҆сѝ зна́менїе:"
|
|
},
|
|
{
|
|
"type": "TEXT",
|
|
"value": "Житїѐ непоро́чно ꙗ҆ви́лъ є҆сѝ, стефа́не, къ прⷭ҇то́лꙋ гдⷭ҇ню, прехва́льне, доше́лъ є҆сѝ, а҆рхїере́йскимъ мѵ́ромъ пома́завсѧ, на сме́рть предаѧ́сѧ по содѣ́телю созда́нїе: и҆ ны́нѣ на нб҃сѣ́хъ всели́всѧ въ же́ртвенникъ гдⷭ҇е́нь, сла́вне, молѝ ѡ҆ пою́щихъ тѧ̀."
|
|
},
|
|
{
|
|
"type": "TEXT",
|
|
"value": "Зна̑менїи и҆ чꙋдесы̀ тебѐ влⷣка просла́ви, треблаже́нне стефа́не: прого́ниши бо дꙋ́хи, и҆ врачꙋ́еши стра̑сти, дꙋ́шы просвѣща́еши вѣ́рныхъ, приходѧ́щихъ ко ст҃о́мꙋ твоемꙋ̀ гро́бꙋ: а҆́гг҃лѡвъ равностоѧ́телю, а҆рхїере́євъ сопресто́льне, а҆пⷭ҇лѡвъ є҆динонра́вне, благовѣ́рїѧ побо́рниче."
|
|
},
|
|
{
|
|
"type": "TEXT",
|
|
"value": "Пога́ныхъ преще́нїѧ не ᲂу҆страши́всѧ, бл҃же́нне, благобоѧ́зненнымъ ᲂу҆мо́мъ, хрⷭ҇то́вѣ благолѣ́пнѡ честнѣ́й і҆кѡ́нѣ, наꙋчи́лъ є҆сѝ всѣ́хъ непосра́мленнѡ покланѧ́тисѧ, и҆ те́плою вѣ́рою цѣлова́ти: и҆ ѡ҆ не́й претерпѣ́лъ є҆сѝ бїє́нїѧ, ѻ҆́ч҃е стефа́не, и҆ темни̑цы, прови́дѧ бꙋ́дꙋщїѧ ра́дости воспрїѧ́тїе."
|
|
},
|
|
{
|
|
"type": "HEADER",
|
|
"value": "И҆́ны стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: Кі́ими похва́льными:"
|
|
},
|
|
{
|
|
"type": "TEXT",
|
|
"value": "Кі́ими похва́льными вѣнцы̑ ᲂу҆вѧзе́мъ ст҃и́телѧ; свѧще́нствꙋ вѣнца̀, благоче́стїѧ ᲂу҆правле́нїе, цр҃кви свѣ́тлое ᲂу҆краше́нїе, и҆сто́чника бжⷭ҇твенныхъ и҆сцѣле́нїй неисчерпа́емаго, проли́тїе дарова́нїй дх҃о́вныхъ, рѣкꙋ̀ мно́гихъ чꙋде́съ, ѻ҆́трасли сꙋро́жскїѧ веселѧ́ща тече́ньми, стефа́на, те́плаго предста́телѧ на́шегѡ и҆ храни́телѧ."
|
|
},
|
|
{
|
|
"type": "TEXT",
|
|
"value": "Кі́ими смире́нными ᲂу҆стна́ми воспои́мъ ст҃и́телѧ; ди́внаго въ чꙋдесѣ́хъ, и҆ безплѡ́тнымъ сожи́телѧ, ѡ҆свѧще́ннаго ѿ пеле́нъ, столпа̀ цр҃кве недви́жима, весе́лїе землѝ сꙋро́жской, царю̀ нечести́вомꙋ ѡ҆бличи́телѧ, и҆ правосла́вїю и҆сповѣ́дника, и҆ хрⷭ҇та̀ ра́ди ѿ беззако́нныхъ заꙋша́ема, и҆мꙋ́ща ве́лїю ми́лость."
|
|
},
|
|
{
|
|
"type": "TEXT",
|
|
"value": "Прїиди́те, сꙋро́жстїи собо́ри, ѱало́мски воспле́щемъ рꙋка́ми, печа̑льнымъ ᲂу҆тѣ́хꙋ, и҆ ѿча̑ѧннымъ застꙋ́пника, бл҃же́ннаго стефа́на воспѣва́юще, бжⷭ҇твеннаго хрⷭ҇то́ва смире́нїѧ ревни́телѧ, похвалꙋ̀ землѝ сꙋро́жской, и҆ все́й то́й странѣ̀ ᲂу҆краше́нїе, ро́дꙋ же на́шемꙋ вездѣ̀ промы́сленника, подаю́щаго мі́рꙋ ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ д҃:"
|
|
},
|
|
{
|
|
"type": "TEXT",
|
|
"value": "Подоба́етъ сꙋро́жскомꙋ ро́дꙋ стефа́на вездѣ̀ и҆мѣ́ти а҆рхїере́а, ꙗ҆́кѡ нѣ́кꙋю ᲂу҆́тварь ца́рскꙋю, и҆ сокро́вище некра́домо, всѣ̑мъ даю́що бога́тство, спаси́тельное проповѣ́данїе, и҆ всѧ̑ собира́юща къ соедине́нїю пѣ́сней бг҃олѣ́пныхъ. Къ немꙋ́же возопїе́мъ: і҆ера́рше и҆ и҆сповѣ́дниче стефа́не, хрⷭ҇та̀ бг҃а молѝ ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ, гла́съ то́йже:"
|
|
},
|
|
{
|
|
"type": "TEXT",
|
|
"value": "И҆́же тебє̀ ра́ди:"
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. И҆ чтє́нїѧ г҃."
|
|
},
|
|
{
|
|
"type": "HEADER",
|
|
"value": "При́тчей чте́нїе. (Глава̀ і҃.)"
|
|
},
|
|
{
|
|
"type": "TEXT",
|
|
"value": "Па́мѧть пра́веднагѡ съ похвала́ми, и҆ благослове́нїе гдⷭ҇не на главѣ̀ є҆гѡ̀. Блаже́нъ человѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менє̀, ѽ ча̑да! Честна̑ѧ бо рекꙋ̀: и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менє̀ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, мє́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а."
|
|
},
|
|
{
|
|
"type": "HEADER",
|
|
"value": "При́тчей чте́нїе: (Главы̑ і҃ и҆ а҃і.)"
|
|
},
|
|
{
|
|
"type": "TEXT",
|
|
"value": "Оу҆ста̀ првⷣнагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ бл҃года̑ти, ᲂу҆ста́ же нечести́выхъ развраща́ютсѧ. Мѣ̑рила льсти̑ваѧ, ме́рзость предъ гдⷭ҇емъ, вѣ́съ же пра́ведный прїѧ́тенъ є҆мꙋ̀. И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ̑нїѧ въ де́нь ꙗ҆́рости, пра́вда же и҆зба́витъ ѿ сме́рти. Оу҆́меръ првⷣный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋти̑, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ благоспѣ́шное. Во благи́хъ пра́ведныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты̑ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ є҃."
|
|
},
|
|
{
|
|
"type": "TEXT",
|
|
"value": "Подо́бенъ: Ра́дꙋйсѧ:"
|
|
},
|
|
{
|
|
"type": "TEXT",
|
|
"value": "Ра́дꙋйсѧ, свѧще́ннаѧ главо̀, ѿ пеле́нъ ѡ҆чи́стившаѧсѧ дх҃омъ, и҆ семꙋ̀ соꙋмно́жившисѧ, и҆ воспита́вшисѧ до́брѣ въ мѣ́рꙋ бжⷭ҇твеннагѡ наставле́нїѧ, ѿ негѡ́же всѧ́ко движе́нїе, всѧ́ко дѣѧ́нїе, всѧ́къ ра́зꙋмъ, и҆ всѧ́ко сло́во, возвѣща́ѧ до́бльственнѣ, кра́йнѧгѡ жела́нїѧ дости́глъ є҆сѝ! И҆дѣ́же сра́дꙋешисѧ, всебл҃же́нне стефа́не, ликостоѧ́нїю а҆́гг҃льскомꙋ, и҆ а҆рхїере́йскомꙋ собо́рꙋ, со всѣ́ми ст҃ы́ми ᲂу҆молѧ́й сп҃са, поми́ловати на́съ."
|
|
},
|
|
{
|
|
"type": "TEXT",
|
|
"value": "Сті́хъ: Свѧще́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ."
|
|
},
|
|
{
|
|
"type": "TEXT",
|
|
"value": "Ра́дꙋйсѧ ѿ среды̀ тмы̀ мно́гїѧ возсїѧ́вый, ꙗ҆́кѡ ѕвѣзда̀ всесвѣ́тлаѧ, всю̀ вселе́ннꙋю просвѣща́еши свѣ́тлѡ, зарѧ́ми, ѻ҆́ч҃е, дѣ́лъ твои́хъ: тѣ́мъ всѧ̑ влече́ши къ непосты́дномꙋ раче́нїю, и҆ бжⷭ҇твенною любо́вїю взерца́тисѧ всегда̀ лица̀ твоегѡ̀ неразсꙋ́днагѡ зра́ка. И҆́мже и҆ по сме́рти взѧ́тисѧ, свѧ́те, прїе́мшаѧ тѧ̀ сла́ва ꙗ҆́вственнѡ плодоносѧ́щи: є҆ѧ́же ны́нѣ воспрїе́млѧ, ᲂу҆молѧ́й сп҃са, поми́ловати на́съ."
|
|
},
|
|
{
|
|
"type": "TEXT",
|
|
"value": "Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ."
|
|
},
|
|
{
|
|
"type": "TEXT",
|
|
"value": "Ра́дꙋйсѧ, честны́й ᲂу҆́ме, трⷪ҇цѣ чи́стый сосꙋ́де, сто́лпе цр҃ко́вный, вѣ̑рнымъ ᲂу҆твержде́нїе, побѣжда́ємымъ по́мощь, ѕвѣздо̀, и҆́же сїѧ̑нїи бг҃опрїѧ́тныхъ твои́хъ моли́твъ, разорѧ́ѧ напа́стей же и҆ скорбе́й тмꙋ̀ всегда̀, стефа́не, приста́нище ти́хое, въ не́же притека́юще и҆̀же треволне́ньми житїѧ̀ ѡ҆держи́мїи спаса́ютсѧ. Хрⷭ҇та̀ молѝ дꙋша́мъ на́шымъ да́ти ве́лїю ми́лость."
|
|
},
|
|
{
|
|
"type": "HEADER",
|
|
"value": "Сла́ва, гла́съ то́йже:"
|
|
},
|
|
{
|
|
"type": "TEXT",
|
|
"value": "Вострꙋ́бимъ трꙋбо́ю пѣ́сней, стеце́мсѧ, правосла́внїи, и҆ ᲂу҆́зримъ побѣди́тєльства пастыренача́льника сꙋро́жскагѡ, и҆ ᲂу҆чи́телѧ на́шегѡ. Ца́рїе и҆ кнѧ́зи посрами́шасѧ ѿ стефа́нова стра́шнагѡ ꙗ҆вле́нїѧ: царѧ́ бо ѡ҆бличѝ, ѻ҆́бразꙋ хрⷭ҇та̀ бг҃а на́шегѡ не восхотѣ́вшаго покланѧ́тисѧ. Па́стырїе и҆ ᲂу҆чи́телїе правосла́вныѧ па́ствы, хрⷭ҇то́ва пастыренача́льника, прїиди́те, восхва́лимъ, а҆́гг҃лѡвъ сожи́тельника, и҆ мꙋ́ченикѡвъ похвалꙋ̀, а҆рхїере́євъ сла́вꙋ, и҆ по вѣ́рѣ побо́рника, и҆ на́шегѡ те́плаго застꙋ́пника, пꙋтьше́ствꙋющымъ спꙋтеше́ственника, и҆ пла́вающымъ ѡ҆корми́телѧ, вездѣ̀ те́плаго предста́телѧ, первопресто́льника сꙋро́жскаго восхвалѧ́юще, та́кѡ рце́мъ: всесвѧ́те стефа́не, предварѝ, и҆ и҆зба́ви на́съ и҆скꙋше́нїѧ всѧ́кагѡ, и҆ спасѝ па́ствꙋ сїю̀ моли́твами твои́ми."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ, гла́съ то́йже:"
|
|
},
|
|
{
|
|
"type": "TEXT",
|
|
"value": "Вострꙋ́бимъ трꙋбо́ю пѣ́сней: прекло́ншисѧ бо свы́ше всецр҃и́ца мт҃и дв҃а, бл҃гослове́ньми вѣнчава́етъ воспѣва́ющихъ ю҆̀. Лю́дїе да стекꙋ́тсѧ, и҆ цр҃и́цѣ да воспле́щꙋтъ въ пѣ́снехъ цр҃ѧ̀ ро́ждшей, и҆̀же сме́ртїю ѡ҆держи̑мыѧ пе́рвѣе, разрѣши́ти чл҃вѣколю́бнѡ бл҃гоизво́лившаго: па́стырїе и҆ ᲂу҆чи́телїе, до́брагѡ па́стырѧ пречⷭ҇тꙋю мт҃рь соше́дшесѧ восхва́лимъ: свѣ́щникъ златоза́рный, свѣтоно́сный ѻ҆́блакъ, нб҃съ простра́ннѣйшꙋ, ѡ҆дꙋшевле́нный же кївѡ́тъ, ѻ҆гнезра́чный влⷣчень прⷭ҇то́лъ, маннопрїе́мнꙋю златꙋ́ю ста́мнꙋ, заключе́ннꙋю сло́ва две́рь, всѣ́хъ хрⷭ҇тїа́нъ прибѣ́жище, пѣ́сньми бг҃огла́сными похвалѧ́юще, си́це рце́мъ: пала́то сло́ва, сподо́би смире́нныхъ на́съ нбⷭ҇нагѡ црⷭ҇твїѧ, ничто́же бо невозмо́жно хода́тайствꙋ твоемꙋ̀."
|
|
},
|
|
{
|
|
"type": "HEADER",
|
|
"value": "Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ ст҃и́тель со безпло́тными є҆диножи́тель бы́въ, свѧщенномꙋ́чениче стефа́не: воспрїе́мъ бо крⷭ҇тъ, ꙗ҆́кѡ ѻ҆рꙋ́жїе: и҆ ста́въ крѣ́пкѡ сопроти́въ і҆кѡноꙋкори́телѧ, и҆ дꙋхобо́рцєвъ, не покланѧ́ющихсѧ пречⷭ҇томꙋ ѻ҆́бразꙋ хрⷭ҇та̀ бг҃а на́шегѡ, и҆ ѿсѣ́клъ є҆сѝ всѧ́кꙋ є҆́ресь лꙋка́выхъ. Тогѡ̀ ра́ди прїе́мъ мꙋче́нїѧ вѣне́цъ, и҆зба́вилъ є҆сѝ гра́дъ тво́й сꙋро́жъ ѿ всѧ́кїѧ непрїѧ́зни. И҆ ны́нѣ мо́лимъ тѧ̀, свѧ́те, да и҆зба́виши на́съ ѿ всѧ́кихъ ѕлы́хъ и҆скꙋше́нїй и҆ бѣ́дъ и҆ вѣ́чныѧ мꙋ́ки."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Є҆́же ѿ вѣ́ка:"
|
|
},
|
|
{
|
|
"type": "HEADER",
|
|
"value": "На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "По а҃-й каѳі́смѣ, сѣда́ленъ, гла́съ г҃."
|
|
},
|
|
{
|
|
"type": "TEXT",
|
|
"value": "Подо́бенъ: Бжⷭ҇твенныѧ вѣ́ры:"
|
|
},
|
|
{
|
|
"type": "TEXT",
|
|
"value": "Бжⷭ҇твеннымъ дх҃омъ просвѣще́нъ, проповѣ́далъ є҆сѝ со дерзнове́нїемъ правосла́вїѧ преда́нїе, всебл҃же́нне стефа́не, и҆ мꙋчи́телѧ беззако́нна посрами́лъ є҆сѝ, въ заточе́нїе непра́веднѡ ѿсыла́емь. ѻ҆́ч҃е прпⷣбне, хрⷭ҇та̀ бг҃а молѝ, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Нбⷭ҇наѧ любо́вїю веселѧ́хꙋсѧ, и҆ земна̑ѧ тре́петомъ ᲂу҆жаса́хꙋсѧ, є҆гда̀ пречⷭ҇тый гла́съ на́йде на тѧ̀, бцⷣе: є҆ди́но бо торжество̀ ѻ҆бои̑мъ возсїѧ̀, є҆гда̀ безпло́тный ра́дость тебѣ̀ принесѐ. Тѣ́мже со а҆́гг҃ломъ тебѣ̀ вопїе́мъ: ра́дꙋйсѧ, чⷭ҇таѧ, бж҃їе жили́ще."
|
|
},
|
|
{
|
|
"type": "HEADER",
|
|
"value": "По в҃-й каѳі́смѣ, сѣда́ленъ, гла́съ и҆ подо́бенъ то́йже:"
|
|
},
|
|
{
|
|
"type": "TEXT",
|
|
"value": "Бжⷭ҇твєннаѧ повелѣ̑нїѧ ᲂу҆мно́живъ, вѣ́рꙋ соблю́лъ є҆сѝ правосла́вїѧ, бѣды̑ прїе́мъ за ню̀, стефа́не, въ заточе́нїи пострада́въ ра́нами, въ темни́цахъ претерпѣ́въ ѡ҆ѕлоблє́нїѧ, ѻ҆́ч҃е прпⷣбне: хрⷭ҇та̀ бг҃а молѝ дарова́ти на́мъ ве́лїю ми́лость. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чⷭ҇тото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Ско́рѡ предварѝ:"
|
|
},
|
|
{
|
|
"type": "TEXT",
|
|
"value": "Хрⷭ҇тꙋ̀ послѣ́довавъ, мі́ръ ѡ҆ста́вилъ є҆сѝ, и҆ пло́ть покори́въ воздержа́нїемъ ꙗ҆́вѣ, пребл҃же́нне стефа́не. Ѿню́дꙋже свѧще́нїѧ пома́занїе и҆мѣ́лъ є҆сѝ: ны́нѣ же къ невеще́ствєннымъ преста́вилсѧ є҆сѝ ликѡ́мъ, молѧ̀ ѡ҆ всѣ́хъ на́съ восхвалѧ́ющихъ тѧ̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Є҆ди́на ро́ждшаѧ творца̀ всемꙋ̀, є҆ди́на ᲂу҆краси́вшаѧ человѣ́чество ржⷭ҇тво́мъ твои́мъ, бг҃оневѣ́сто, и҆зба́ви мѧ̀ ѿ сѣ́ти льсти́вагѡ стрѣльца̀, и҆ поста́ви мѧ̀ на ка́мени хрⷭ҇то́выхъ хотѣ́нїй: того̀ молѧ́щи прилѣ́жнѡ, є҆го́же воплоти́ла є҆сѝ."
|
|
},
|
|
{
|
|
"type": "HEADER",
|
|
"value": "Та́же степє́нна, а҃ а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀."
|
|
},
|
|
{
|
|
"type": "TEXT",
|
|
"value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
|
|
},
|
|
{
|
|
"type": "TEXT",
|
|
"value": "Всѧ́кое дыха́нїе:"
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе і҆ѡа́нна, зача́ло л҃є, ѿ полꙋ̀."
|
|
},
|
|
{
|
|
"type": "HEADER",
|
|
"value": "По н҃-мъ ѱалмѣ̀ стїхи́ра, гла́съ д҃:"
|
|
},
|
|
{
|
|
"type": "TEXT",
|
|
"value": "Подоба́етъ сꙋро́жскомꙋ ро́дꙋ стефа́на вездѣ̀ и҆мѣ́ти а҆рхїере́а, ꙗ҆́кѡ нѣ́кꙋю ᲂу҆́тварь ца́рскꙋю, и҆ сокро́вище некра́домо, всѣ̑мъ даю́що бога́тство, спаси́тельное проповѣ́данїе, и҆ всѧ̑ собира́юща къ соедине́нїю пѣ́сней бг҃олѣ́пныхъ, къ немꙋ́же возопїе́мъ: ст҃и́телю и҆ и҆сповѣ́дниче стефа́не, хрⷭ҇та̀ бг҃а молѝ ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы на ѕ҃: и҆ ст҃а́гѡ два̀, на и҃."
|
|
},
|
|
{
|
|
"type": "HEADER",
|
|
"value": "Канѡ́нъ. Гла́съ ѕ҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Волно́ю морско́ю скры́вшаго дре́вле, гони́телѧ, мꙋчи́телѧ, подъ земле́ю скры́ша спасе́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ: сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Прїиди́те, соше́дшесѧ, воспои́мъ всѝ свѧще́ннаго на́шего стефа́на, и҆ почти́мъ сꙋро́жꙋ ᲂу҆твержде́нїе, застꙋ́пника дꙋша́мъ на́шымъ, и҆ гра́дꙋ на́шемꙋ храни́телѧ неѡбори́ма."
|
|
},
|
|
{
|
|
"type": "TEXT",
|
|
"value": "Преклонѝ сердца̀ на̑ша, бг҃оно́сче, во спаси́тєльныѧ хрⷭ҇тѡ́вы за́пѡвѣди, не помышлѧ́ти жите́йскихъ, но да, дꙋше́вныхъ дости́гше добро́тъ, свѣ́тлѡ вни́демъ въ черто́гъ хрⷭ҇то́въ."
|
|
},
|
|
{
|
|
"type": "TEXT",
|
|
"value": "Стефа́не бг҃омꙋ́дре, верхо́вный ѻ҆́ч҃е, а҆́гг҃лѡмъ ра́вне, сꙋро́жꙋ ᲂу҆твержде́нїе, не ѿве́ржи, но пѣ́сненнѡ прїимѝ, ꙗ҆́кѡ кади́ло ѿ ᲂу҆бо́жества моегѡ̀, є҆́же тѝ принесо́хъ не досто́йный."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Возопі́й, недосто́йнаѧ дꙋшѐ, пре́жде сме́рти къ бг҃ома́тери, въ по́мыслѣхъ те́плѣ со слеза́ми вопїю́щи: пречⷭ҇таѧ гпⷭ҇жѐ, сн҃а твоего̀ моли́твами твои́ми ми́лостива мнѣ̀ сотворѝ."
|
|
},
|
|
{
|
|
"type": "HEADER",
|
|
"value": "Дрꙋгі́й канѡ́нъ. Гла́съ а҃. Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Хрⷭ҇то́съ ражда́етсѧ, сла́вите. Хрⷭ҇то́съ съ нб҃съ, срѧ́щите. Хрⷭ҇то́съ на землѝ, возноси́тесѧ. По́йте гдⷭ҇еви всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ."
|
|
},
|
|
{
|
|
"type": "TEXT",
|
|
"value": "Бл҃года́ть дх҃а прїе́мъ, ѻ҆́ч҃е, въ се́рдцы твое́мъ, хрⷭ҇то́въ ст҃и́телю, ѡ҆чи́сти ѧ҆зы́къ же и҆ се́рдце твои́хъ пѣвє́цъ, ꙗ҆́кѡ да твою̀ па́мѧть воспѣва́емъ свѣ́тлѡ, стефа́не и҆сповѣ́дниче."
|
|
},
|
|
{
|
|
"type": "TEXT",
|
|
"value": "Вели́кїй ны́нѣ стефа́нъ, па́стырь цр҃кве сꙋро́жскїѧ, па́стырѧ вкꙋ́пѣ и҆ ста́до и҆ ве́сь сꙋро́жъ свѣ́тлѡ призыва́етъ: прїиди́те, собра́вшесѧ, ꙗ҆́кѡ ѻ҆́бщемꙋ ѻ҆тцꙋ̀ свѣ́тлѡ торжествꙋ́емъ."
|
|
},
|
|
{
|
|
"type": "TEXT",
|
|
"value": "Побѣжда́ютъ твоѧ̑ и҆справлє́нїѧ и҆ словеса̀ и҆ вє́щи, стефа́не, є҆гѡ́же ра́ди дꙋше́вное предложе́нїе прїе́мли со благоꙋвѣ́тїемъ, достоди́вный, є҆́же бо по досто́инствꙋ пѣ́снь тебѣ̀ плестѝ всѣ̑мъ невозмо́жно."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Безмѣ́рна бе́здна твоегѡ̀ непостижи́магѡ ржⷭ҇тва̀, всечⷭ҇таѧ, сегѡ̀ ра́ди вѣ́рнїи несомнѣ́ннѡ ᲂу҆́бѡ чи́стѣ припа́даемъ тѝ, глаго́люще: ра́дꙋйсѧ, бцⷣе дв҃о, мт҃и неневѣ́стнаѧ."
|
|
},
|
|
{
|
|
"type": "TEXT",
|
|
"value": "Катава́сїа: Хрⷭ҇то́съ ражда́етсѧ:"
|
|
},
|
|
{
|
|
"type": "HEADER",
|
|
"value": "Гла́съ г҃."
|
|
},
|
|
{
|
|
"type": "TEXT",
|
|
"value": "І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀."
|
|
},
|
|
{
|
|
"type": "TEXT",
|
|
"value": "Кто̀ тебѐ не ᲂу҆блажи́тъ, пребл҃же́нне стефа́не бг҃оно́сче, то́й ме́ртвъ є҆́сть дꙋше́ю и҆ тѣ́ломъ пре́жде сме́рти, и҆ пре́жде сꙋда̀ во ѡ҆сꙋжде́нїе низпадѐ."
|
|
},
|
|
{
|
|
"type": "TEXT",
|
|
"value": "Сокрꙋшѝ сꙋпоста́ты, преподо́бне, и҆ си́лꙋ и҆́хъ воѡрꙋже́ннꙋю, покорѝ на́мъ подъ но́ги вско́рѣ ви́димꙋю ра́ть: рабы̑ твоѧ̑ ᲂу҆твердѝ, и҆ держа́вꙋ да́рꙋй твое́й па́ствѣ, блаже́нне и҆ свѧще́нне."
|
|
},
|
|
{
|
|
"type": "TEXT",
|
|
"value": "Покры́й гра́дъ тво́й, ѻ҆́ч҃е на́шъ стефа́не бг҃оно́сче, ѿ сынѡ́въ а҆га̑рѧнъ. Се́ бо скреже́щꙋтъ зꙋбы̀ свои́ми на ны̀, пожре́ти ны̀ разже́гшесѧ, ꙗ҆́кѡ ѕвѣ́рїе ди́вїи: но сокрꙋшѝ зꙋ́бы и҆́хъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Лѣ́ствицꙋ тѧ̀ прови́дѣ, препѣ́таѧ мт҃и, і҆а́кѡвъ во снѣ̀, нб҃сѐ досѧза́ющꙋ, въ ню́же сло́во всели́сѧ, и҆ человѣ́ки возведѐ, ѿ человѣкогꙋби́тельнагѡ ѕмі́ѧ и҆збавлѧ́ѧй."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и."
|
|
},
|
|
{
|
|
"type": "TEXT",
|
|
"value": "Позна̀ тебѐ ѿ чре́ва, бг҃оно́се, всевѣ́дый бг҃ъ, пре́жде возвѣща́етъ тебѣ̀ а҆́гг҃ломъ: ѡ҆свѧща́етъ тебѐ пꙋтеводи́телѧ дꙋша́мъ, и҆ па́стырѧ вели́каго, ꙗ҆́коже петрꙋ̀, и҆ тебѣ̀ ввѣрѧ́етъ своѐ ста́до."
|
|
},
|
|
{
|
|
"type": "TEXT",
|
|
"value": "Жезло́мъ воздержа́нїѧ страсте́й мо́ре раздѣли́лъ є҆сѝ, блаже́нне, ꙗ҆́коже мѡѷсе́й, и҆ на безстра́стїѧ го́рꙋ вше́лъ є҆сѝ, прїе́мъ разꙋ̑мныѧ скрижа̑ли, цр҃ковь наꙋчи́лъ є҆сѝ хрⷭ҇то́вꙋ зако́нꙋ дꙋхо́вномꙋ."
|
|
},
|
|
{
|
|
"type": "TEXT",
|
|
"value": "Смире́нъ ꙗ҆ви́лсѧ є҆сѝ, кро́токъ же и҆ ти́хъ, стефа́не, ѿню́дꙋже дꙋхо́внаѧ бл҃года́ть дово́льнѣ и҆злїѧ́вшисѧ въ тебѣ̀, вели́ка показа́ тѧ, чꙋде́съ лꙋча́ми зе́млю сꙋро́жскꙋю ѡ҆сїѧва́юща."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тѧ̀ запеча́таннꙋю и҆́стиннѡ, ли́къ прⷪ҇ро́ческїй, и҆ заключе́ннꙋю и҆сто́чника две́рь наречѐ, дѣ́вства твоегѡ̀, всепѣ́таѧ, и҆здале́ча ѻ҆́бразы на́мъ пи́шꙋщь тѧ̀, ю҆́же соблюдѐ и҆ по ржⷭ҇твѣ̀."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ а҃."
|
|
},
|
|
{
|
|
"type": "TEXT",
|
|
"value": "Подо́бенъ: Гро́бъ тво́й, сп҃се."
|
|
},
|
|
{
|
|
"type": "TEXT",
|
|
"value": "Вели́кїй ст҃и́тель хрⷭ҇то́въ да воспое́тсѧ, сто́лпъ свѣ́тлый, просвѣща́ѧй на́съ чꙋде́съ свѣ́тлостьми, и҆ ѻ҆́блакъ ро́сный, пла́мень страсте́й погаша́ющь, и҆ ѡ҆роша́ющь вѣ́рныхъ мы̑сли, бжⷭ҇твенный стефа́нъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Свѣ́тлый свѣти́льниче, бжⷭ҇твеннаѧ трапе́зо, кади́льнице злата́ѧ, ста́мно, ма́ннꙋ носѧ́щаѧ живоно́снꙋю, вѣ́рныхъ мы̑сли ᲂу҆слажда́ющи, ꙗ҆́коже прⷪ҇ро́цы тебѐ, дв҃о, провозвѣсти́ша."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: На крⷭ҇тѣ̀ твоѐ бжⷭ҇твенное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, приѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ."
|
|
},
|
|
{
|
|
"type": "TEXT",
|
|
"value": "Ѿлꙋчи́хсѧ ѿ бг҃а грѣ́шный, и҆ ᲂу҆дали́хсѧ а҆́зъ блꙋ́дный, и҆ногда̀ во странꙋ̀ всели́хсѧ дале́че, ѻ҆́ч҃е, ѡ҆бнажи́хсѧ, послꙋ́шавъ лестца̀, неиспра́вленный."
|
|
},
|
|
{
|
|
"type": "TEXT",
|
|
"value": "Ты̀ пра́веднѣ ѡ҆зари́лсѧ є҆сѝ трисо́лнечнымъ свѣ́томъ несозда́нныѧ трⷪ҇цы: того̀ на́мъ послѝ пою́щымъ є҆го̀, и҆ на нб҃сѝ того̀ сподо́би на́съ въ трⷪ҇цѣ воспѣва́ти, блаже́нный ѻ҆́ч҃е, бг҃оно́сный стефа́не."
|
|
},
|
|
{
|
|
"type": "TEXT",
|
|
"value": "Ѻ҆́ч҃е ѻ҆тцє́въ бг҃оно́сный стефа́не, сꙋро́жꙋ ᲂу҆твержде́нїе, сы́нъ правовѣ́рїѧ, рабы̑ своѧ̑ соблюдѝ ѿ всѧ́кагѡ прегрѣше́нїѧ, и҆ ѿ безбо́жныхъ ва̑рваръ, ви́димыхъ же вра̑гъ и҆ неви́димыхъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Го́рестныхъ сле́зъ мои́хъ не забꙋ́ди, и҆ стена́нїѧ дꙋшѝ моеѧ̀ не пре́зри, дв҃о чи́стаѧ и҆ непоро́чнаѧ, ꙗ҆вѝ на мнѣ̀ ми́лость и҆ чл҃вѣколю́бїе сн҃а и҆ бг҃а твоегѡ̀."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Же́злъ и҆зъ ко́рене і҆ессе́ева и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀, хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Зако́нѡмъ ѿ сосє́цъ ма́тернихъ подклони́всѧ дꙋхѡ́внымъ, закѡ́нъ плотски́хъ превше́лъ є҆сѝ, прпⷣбне, ꙗ҆̀же пре́жде вре́мене ᲂу҆мертви́лъ є҆сѝ, тѧ́жкихъ грѣхо́вныхъ: сегѡ̀ ра́ди невѣ́рнаго царѧ̀ ѡ҆бличи́лъ є҆сѝ, и҆сповѣ́дникъ вели́кїй ꙗ҆́вльсѧ, стефа́не."
|
|
},
|
|
{
|
|
"type": "TEXT",
|
|
"value": "Сна̀ ѻ҆чесє́мъ твои̑мъ и҆ дрема́нїѧ вѣ́ждѡмъ не да́лъ є҆сѝ, до́ндеже ѡ҆брѣ́лъ є҆сѝ мѣ́сто досто́йно всѣ́хъ блаже́нныхъ, ѻ҆́ч҃е, се́рдце твоѐ ѡ҆чи́стивъ досто́йнѣ. Тѣ́мже показа̀ тебѐ жили́ще своѐ цр҃ь сла́вы и҆ бг҃ъ вѣ́чный."
|
|
},
|
|
{
|
|
"type": "TEXT",
|
|
"value": "Оу҆мертвѝ мꙋдрова́нїе, мꙋ́дре, пло́ти на́шеѧ неисцѣ́льное, и҆ къ бжⷭ҇твєннымъ наста́ви ны̀ стезѧ́мъ, ꙗ҆́кѡ крѣ́покъ и҆ си́ленъ, и҆ зако́нѡмъ благи̑мъ повинѝ, блаже́нне, и҆ рабы̑ покажѝ хрⷭ҇тѡ́вы, порабощє́нныѧ страстьмѝ лю́тыми."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Пое́мъ вели́кое и҆ стра́шное твоѐ та́инство, є҆́же премі́рныхъ ᲂу҆́бѡ ᲂу҆таи́всѧ, возвѣстѝ тебѣ̀ чинонача́льникъ, на тѧ̀ сы́й сни́де, ꙗ҆́кѡ до́ждь на рꙋно̀, всепѣ́таѧ, на спасе́нїе на́ше и҆ ѡ҆бновле́нїе."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Сою́зомъ любвѐ свѧзꙋ́еми а҆пⷭ҇ли, влⷣчествꙋющемꙋ всѣ́ми себѐ хрⷭ҇тꙋ̀ возло́жше, кра́сны но́ги ѡ҆чища́хꙋ, благовѣствꙋ́юще всѣ̑мъ ми́ръ."
|
|
},
|
|
{
|
|
"type": "TEXT",
|
|
"value": "Дꙋ́шꙋ мою̀ ѡ҆черни́хъ неподо́бными дѣ́лы а҆́зъ ни́щїй, къ тебѣ̀ вопїю̀ застꙋ́пникꙋ моемꙋ̀ те́пломꙋ: не ѡ҆ста́ви менѐ, прече́стне стефа́не, но моли́твꙋ сотворѝ ко сп҃сꙋ."
|
|
},
|
|
{
|
|
"type": "TEXT",
|
|
"value": "Мольбы̑ твоегѡ̀ раба̀ не забꙋ́ди, ѻ҆́ч҃е люби́мый: но прїимѝ сїѧ̑, и҆ ко гдⷭ҇ꙋ те́плѣ принесѝ, да и҆збꙋ́демъ нꙋ́жды и҆ ѻ҆гнѧ̀ негаси́магѡ."
|
|
},
|
|
{
|
|
"type": "TEXT",
|
|
"value": "Ѡ҆тѧгче́нꙋ во грѣсѣ́хъ, и҆ на землѝ лежа́щꙋ, по́мощь твою̀, ѻ҆́ч҃е, послѝ мнѣ̀ рабꙋ̀ твоемꙋ̀, и҆ возста́ви мѧ̀, да стою̀ пра́вѣ, и҆ хождꙋ̀ въ пꙋте́хъ бж҃їихъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ра́дꙋйсѧ, є҆ди́на бцⷣе, ра́дость ро́ждшаѧ, а҆́гг҃льскаѧ красото̀, и҆ человѣ́кѡвъ вели́кое прибѣ́жище, грѣ́шныхъ просты́не, волнꙋ́ющихсѧ приста́нище, дв҃о."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ, бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче."
|
|
},
|
|
{
|
|
"type": "TEXT",
|
|
"value": "Ꙗ҆́кѡ вели́кое бога́тство твои́хъ щедро́тъ ꙗ҆ви́сѧ сꙋро́жскомꙋ ро́дꙋ, безчи́сленно проли́тїе ми́лости твоеѧ̀, слꙋго̀ хрⷭ҇то́въ. Ты́ бо просѧ́щымъ сꙋ̑щаѧ подава́ѧ, и҆ тѣ́хъ насы́тити тща́лсѧ є҆сѝ твои́мъ предложе́нїемъ, бл҃же́нне."
|
|
},
|
|
{
|
|
"type": "TEXT",
|
|
"value": "Кро́токъ ꙗ҆ви́всѧ и҆ смире́нъ вкꙋ́пѣ, дѣ́ломъ же и҆ сло́вомъ и҆ мы́слїю, си́мъ всѧ̑ къ себѣ̀ привле́клъ є҆сѝ, любо́вїю и҆ до́брыми дѣ́лы. Царѧ́ же ѕлосла́внаго ѡ҆бличи́въ, сердца̀ вѣ́рныхъ возвесели́лъ є҆сѝ, ᲂу҆крѣплѧ́емыхъ твои́мъ и҆сповѣ́данїемъ."
|
|
},
|
|
{
|
|
"type": "TEXT",
|
|
"value": "Вели́кїй па́стырь всѣ́хъ хрⷭ҇то́съ, ѻ҆ве́цъ тѧ̀, бл҃же́нне, показа̀ свои́хъ па́стырѧ и҆ ᲂу҆чи́телѧ слове́сныхъ. Тѣ́мже заблꙋжда́емыхъ на́съ на гора́хъ поги́бельныхъ, ꙗ҆́кѡ па́стырь чл҃вѣколюби́въ, ны́нѣ твои́хъ ѻ҆ве́цъ взыщѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ст҃ы́хъ ст҃а́ѧ дв҃о чⷭ҇таѧ, ст҃ы́хъ ст҃а́го родила̀ є҆сѝ, всѧ́чєскаѧ ѡ҆сщ҃а́ющаго, хрⷭ҇та̀ и҆зба́вителѧ. Тѣ́мже тѧ̀, цр҃и́цꙋ и҆ влⷣчцꙋ всѣ́хъ, ꙗ҆́кѡ мт҃рь зижди́телѧ тва́рей, велича́емъ."
|
|
},
|
|
{
|
|
"type": "HEADER",
|
|
"value": "Пѣ́снь ѕ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тли́ мѧ возведѝ."
|
|
},
|
|
{
|
|
"type": "TEXT",
|
|
"value": "И҆мꙋ́ще тѧ̀ твоѝ рабѝ застꙋ́пника те́пла, не ᲂу҆бои́мсѧ сꙋпоста́тныхъ си́лъ, но побѣжда́емъ ты̑ѧ, крⷭ҇то́мъ хрⷭ҇то́вымъ ᲂу҆крѣплѧ́еми."
|
|
},
|
|
{
|
|
"type": "TEXT",
|
|
"value": "Сохранѝ гра́дъ тво́й, ѻ҆́тче прпⷣбне стефа́не, и҆ ѿ безбо́жныхъ и҆новѣ́рныхъ нахо́да, и҆ ѿ ᲂу҆со́бныѧ ра́ти, и҆ всѧ́кагѡ стра́ха и҆ мꙋ́ки и҆зба́ви."
|
|
},
|
|
{
|
|
"type": "TEXT",
|
|
"value": "Дадѐ на́мъ хрⷭ҇то́съ честна́го стефа́на, посѣка́ти проти̑внаѧ всѧ̑ ви̑димаѧ вѡ́инства, и҆ и҆справлѧ́ти благовѣ́рное своѐ ста́до."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ст҃ъ є҆сѝ є҆ди́нъ, во ст҃ы́хъ почива́ѧй, свѣ́томъ свои́мъ мѧ̀ ѡ҆сїѧ́въ, ѡ҆свѧтѝ дꙋ́шꙋ мою̀ покаѧ́нїемъ, моли́твами мт҃ре твоеѧ̀."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее, про́йде сохра́ншее нетлѣ́ннꙋ. Є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ."
|
|
},
|
|
{
|
|
"type": "TEXT",
|
|
"value": "Ты̀ сꙋро́жꙋ бы́въ просвѣти́тель, и҆ живꙋ́щихъ въ не́мъ вездѣ̀ застꙋ́пникъ, ѡ҆бꙋрева́емыхъ же въ ско́рбехъ ти́хое приста́нище, вра́чь дꙋше́вныхъ страсте́й вкꙋ́пѣ и҆ тѣле́сныхъ, ѿню́дꙋже всѝ вкꙋ́пѣ вѣща́ютъ и҆ призыва́ютъ твоѐ и҆́мѧ."
|
|
},
|
|
{
|
|
"type": "TEXT",
|
|
"value": "А҆рхїере́и и҆ свѧще́нницы сра́дꙋютсѧ на́мъ дне́сь, сꙋро́жскомꙋ ѻ҆тцꙋ̀ пра́зднꙋюще: согласꙋ́ютъ же и҆ воспѣва́ютъ вкꙋ́пѣ ѻ҆́бщїи и҆́стиннїи безмо́лвницы, и҆ прості́и всѝ на́шемꙋ тебѣ̀ воспѣва́ютъ предста́телю вкꙋ́пѣ и҆ ᲂу҆чи́телю."
|
|
},
|
|
{
|
|
"type": "TEXT",
|
|
"value": "Ча́до поро́чное а҆́зъ є҆ди́нъ бы́хъ, ѻ҆́ч҃е, страстьмѝ скве́рными, вои́стиннꙋ недосто́инъ до́брагѡ твоегѡ̀, сла́вне, и҆ кра́снагѡ пра́зднованїѧ: но ты̀ ѡ҆чи́стивъ мою̀ скве́рнꙋ, прпⷣбне, дꙋше́внꙋю, покажи́ мѧ ве́чери твое́й досто́йна."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Нѣ́дръ не ѿстꙋ́пль безнача́льна роди́телѧ, въ нѣ́дрѣхъ чⷭ҇тыѧ ѻ҆трокови́цы водворѧ́етсѧ, и҆ быва́етъ безма́теренъ пре́жде, ны́нѣ безъ ѻ҆тца̀ воплоща́етсѧ, и҆́же при́снѡ црⷭ҇твꙋѧй хрⷭ҇то́съ: сегѡ̀ неисче́тенъ и҆ стра́шенъ ро́дъ и҆ неизрече́ненъ."
|
|
},
|
|
{
|
|
"type": "HEADER",
|
|
"value": "Конда́къ, гла́съ г҃:"
|
|
},
|
|
{
|
|
"type": "TEXT",
|
|
"value": "Вы́шнѧгѡ си́лою, свѧще́нне, ᲂу҆крѣпи́всѧ, царє́ва низложи́лъ є҆сѝ і҆кѡнобѡ́рнаѧ шата̑нїѧ: дне́сь сꙋро́жꙋ и҆ на́мъ вѣ̑рнымъ предлежа́тъ, сла́ва и҆ бога́тство, ст҃ы̑ѧ твоѧ̑ мо́щи, и҆̀хже свы́ше дароно́сѧтъ а҆́гг҃льстїи чи́нове: пѣ́сньми и҆ пѣ́нїемъ славосло́вѧтъ тѧ̀, вели́кїй свѧще́нный стефа́не."
|
|
},
|
|
{
|
|
"type": "TEXT",
|
|
"value": "І҆́косъ: Твоегѡ̀ чи́стагѡ и҆ непоро́чнагѡ житїѧ̀ кі́й ѧ҆зы́къ человѣ́ческїй восхвали́ти когда̀ и҆ воспѣ́ти, прпⷣбне стефа́не, возмо́жетъ, вѣ́рою и҆ ра́зꙋмомъ и҆ и҆́стиною; и҆́бо во всѣ́хъ по́двизѣхъ до́блественъ показа́лсѧ є҆сѝ: ты́ бо, всеблаже́нне, лю́таго царѧ̀ посрами́лъ є҆сѝ, че́сть же і҆кѡ́ны восходи́ти на первоѻбра́зїе наꙋчи́лъ є҆сѝ, свѧ́те, и҆ ѻ҆тцє́въ догма́ты, всемꙋ́дре, и҆сповѣ́далъ є҆сѝ: сегѡ̀ ра́ди тѧ̀ ᲂу҆блажа́емъ, вели́кїй свѧще́нный стефа́не."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆зъ пла́мене, во гро́бѣ ме́ртвъ бездыха́ненъ полага́етсѧ, во спасе́нїе на́съ пою́щихъ: и҆зба́вителю бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Ѿве́рзи мѝ двє́ри покаѧ́нїѧ, прпⷣбне стефа́не, и҆ всѧ́къ мра́къ ѿженѝ ѿ моеѧ̀ дꙋшѝ, и҆ тѣла̀ моегѡ̀ всѧ̑ сквє́рны ѡ҆чи́сти, да приношꙋ́ ти пѣ́снь, и҆ зовꙋ̀: и҆зба́вителю бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Предста́ни дꙋшѝ моеѧ̀ во и҆схо́дѣ, стефа́не прече́стне, и҆ ѿ лꙋка́вствїѧ сатанина̀ и҆зба́ви мѧ̀, ꙗ҆́кѡ да сла́влю тѧ̀ вѣ́рнѡ і҆ера́рха вели́каго, поѧ̀ бг҃ꙋ: и҆зба́вителю бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "І҆ера́рше, твоѧ̑ лю́ди ᲂу҆па́стви, сохранѧ́ѧ на́съ, стефа́не мꙋ́дре, и҆ на нб҃сѣ́хъ сподо́би съ тобо́ю трⷪ҇цѣ безпреста́ннѡ воспѣва́ти: и҆зба́вителю бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: До́ждь пода́ждь мѝ сле́зъ, влⷣчце, стрꙋ́пы дꙋшє́вныѧ и҆ пло́тнꙋю че́рность ѡ҆мыва́ющи мѝ ѡ҆чи́сти, и҆ приведѝ къ содѣ́телю, и҆ мꙋче́нїѧ всѧ́кагѡ и҆зба́ви мѧ̀."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Ѻ҆́троцы, благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене, стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Землѧ̀ сꙋро́жскаѧ и҆ страны̑, ѻ҆́ч҃е, чꙋдеса̀ твоѧ̑ возвѣща́ютъ ᲂу҆́бѡ, и҆ воспѣва́ютъ всю́дꙋ, ᲂу҆ча́щесѧ пѣ́ти ра́достнѡ: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Жени́хъ кра́сный па́че всѣ́хъ сынѡ́въ человѣ́ческихъ, ꙗ҆́коже є҆́сть пи́сано, невѣ́стѣ, блаже́нне, свое́й цр҃кви, краснѣ́йша тѧ̀ показа̀ жениха̀, тогѡ̀ носѧ́ща ѻ҆́бразы подо́бїѧ, ѻ҆тцє́въ бг҃а и҆ препросла́вленна."
|
|
},
|
|
{
|
|
"type": "TEXT",
|
|
"value": "Оу҆краси́въ твоѐ житїѐ ми́лостынею, и҆ кро́тостїю, и҆ любо́вїю, свѣтлоподо́бникъ показа́лсѧ є҆сѝ и҆зрѧ́дный, па́стырѧ до́брагѡ, и҆збра́въ тогѡ̀ добродѣ́тєли до́брѣ. Є҆мꙋ́же пое́мъ: ѻ҆тцє́въ бж҃е, бл҃гослове́нъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Тѧ̀ і҆а́кѡвъ, бцⷣе, лѣ́ствицꙋ прⷪ҇ро́чески разꙋмѣва́етъ, тебє́ бо ра́ди превозноси́мый на землѝ ꙗ҆ви́сѧ, и҆ съ человѣ̑ки поживѐ, ꙗ҆́коже благоволѝ, воспѣ́тый ѻ҆тцє́въ бг҃ъ и҆ препросла́вленъ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: За зако́ны ѻ҆ч҃єскїѧ блаже́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Согрѣши́хъ ве́сь грѣ́шный па́че всѣ́хъ человѣ̑къ, и҆ нѣ́сть грѣха̀, є҆гѡ́же не сотвори́хъ, ни ѕла̀, нижѐ клеветы̀, и҆́хже не содѣ́ѧхъ: но вѣ́рою прихождꙋ̀ къ тебѣ̀, хрⷭ҇тѐ, ꙗ҆́коже манассі́ю ѻ҆́наго, поми́лꙋй мѧ̀."
|
|
},
|
|
{
|
|
"type": "TEXT",
|
|
"value": "Ѻ҆́ч҃е ѻ҆тцє́въ ст҃ы́й стефа́не, правовѣ́рїѧ сто́лпъ, сы́нъ вѣ́ры, рабы̑ твоѧ̑ спаса́й ѿ всѧ́кїѧ бѣды̀, возмꙋщє́нныѧ ѿ человѣкоꙋбі́йцы дїа́вола, не пре́зри молѧ́щихсѧ тебѣ̀ и҆́стиннымъ се́рдцемъ и҆ пою́щихъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Сы́нове а҆га́рѧни воѡрꙋжа́ютсѧ на смирє́нныѧ лю́ди твоѧ̑, стефа́не прече́стне: но сокрꙋшѝ и҆̀хъ неви́димѡ, лꙋ́къ и҆ стрѣ́лы и҆́хъ и҆ мечѝ вонзѝ въ сердца̀ и҆́хъ, да ра́достїю воспое́мъ пѣ́снь многогла́снꙋю: гдⷭ҇а по́йте дѣла̀, и҆ превозноси́те є҆го̀ во вѣ́ки."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ѡ҆держи́ма прегрѣшє́нїи, и҆ въ по́хотехъ жите́йскихъ погрꙋже́на, свободѝ и҆ спаси́ мѧ, ст҃а́ѧ бцⷣе, и҆ стена̑нїѧ сердє́чнаѧ ᲂу҆слы́ши: ꙗ҆́коже блꙋдни́цы сле́зы, и҆ менѐ пока́ѧвшасѧ, дв҃и́це, и҆ со слеза́ми припа́дающа прїимѝ."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Чꙋ́да преесте́ственнагѡ, росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. Тѣ́мъ, воспѣва́юще, воспое́мъ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки."
|
|
},
|
|
{
|
|
"type": "TEXT",
|
|
"value": "Ѡ҆кормѝ моли́твою твое́ю цр҃ковь твою̀ многочеловѣ́чнꙋю, и҆ бꙋ̑ри вѣ̑тръ проти́вныхъ чꙋ́вственныхъ и҆ мы́сленныхъ ᲂу҆ста́ми твои́ми моли́твами, и҆ запретѝ, и҆ и҆зба́ви всѧ́кихъ и҆скꙋше́нїй и҆ смꙋще́нїй, и҆ да́же до конца̀ неврежде́ннꙋю соблюдѝ."
|
|
},
|
|
{
|
|
"type": "TEXT",
|
|
"value": "Падо́ша востаю́щїи на ны̀, ѻ҆́ч҃е, твои́ми моли́твами побѣжда́еми, а҆га́рѧни внꙋ́цы, хотѧ́щїи достоѧ́нїе твоѐ ѡ҆ѕло́бити, и҆ смѣ́хъ ᲂу҆́бѡ бы́ша и҆ рꙋга́нїе, паде́нїѧ своегѡ̀ пла́чꙋще: мы́ же воспѣва́емъ ра́достнѡ твою̀ сщ҃е́ннꙋю па́мѧть."
|
|
},
|
|
{
|
|
"type": "TEXT",
|
|
"value": "Неизрече́нно твоѐ чадолю́бїе, ѻ҆́ч҃е, превосходѧ́ще ѻ҆те́ческꙋю любо́вь: всегда̀ ᲂу҆́бѡ прирадѣ́еши, неви́димѡ на́съ посѣща́ѧ бо́дренными твои́ми моли́твами, спасе́нїе на́мъ всегда̀ содѣва́ѧ, и҆ подава́ѧ на́мъ съ ти́хостїю, стефа́не, ра́дѡстнаѧ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Всего́ мѧ ѿпа́дша, бцⷣе дв҃о, и҆ сокрꙋши́вша є҆́же по ѻ҆́бразꙋ, чⷭ҇таѧ, бг҃ъ своегѡ̀ созда́нїѧ не презрѣ̀, но тобо́ю всего́ мѧ ѡ҆бновѝ. Сегѡ̀ ра́ди тѧ̀ винꙋ̀ спасе́нїѧ на́шегѡ всѧ̀ тва́рь воспѣва́етъ, зовꙋ́щи: бл҃гослове́на ты̀ въ жена́хъ є҆сѝ, всенепоро́чнаѧ."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Не рыда́й менє̀, мт҃и, зрѧ́щи во гро́бѣ, є҆го́же во чре́вѣ безъ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ, ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ."
|
|
},
|
|
{
|
|
"type": "TEXT",
|
|
"value": "Вельмѝ ра́дꙋетсѧ при́снѡ гра́дъ тво́й твои́ми чꙋдесы̀, и҆ мы̀ во всѧ̑ка времена̀ насыща́емсѧ во вѣ́ки ѿ свѧще́нныхъ моще́й твои́хъ. И҆ ны́нѣ не ѿходѝ ѿ на́съ, моли́твꙋ творѧ̀ ко гдⷭ҇ꙋ, ꙗ҆́кѡ да ѿ безбо́жныхъ ва̑рваръ на́съ и҆зба́витъ."
|
|
},
|
|
{
|
|
"type": "TEXT",
|
|
"value": "Сꙋро́жстїи наро́ди, прїиди́те, собери́тесѧ всѝ къ бжⷭ҇твеннѣй ра́цѣ ѻ҆тца̀ на́шегѡ стефа́на прпⷣбнагѡ, и҆ со слеза́ми воззови́те: и҆зба́ви лю́ди своѧ̑, не да́ждь достоѧ́нїѧ твоегѡ̀ ро́дꙋ і҆сма́ильтескомꙋ, да достодо́лжнѡ воспое́мъ ми́лость твою̀, ст҃и́телю."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆́кѡ разбо́йникъ, ꙗ҆́кѡ блꙋдни́ца, вопїю́ ти ѿ се́рдца: согрѣши́вша ѡ҆живи́ мѧ, ст҃а́ѧ бцⷣе, не разгнѣ́вайсѧ на мѧ̀, не ѿве́ржи менє̀ ѿ лица̀ твоегѡ̀, неразꙋ́мна сꙋ́ща и҆ ѿча́ѧнна."
|
|
},
|
|
{
|
|
"type": "HEADER",
|
|
"value": "И҆́нъ."
|
|
},
|
|
{
|
|
"type": "TEXT",
|
|
"value": "І҆рмо́съ: Та́инство стра́нное ви́жꙋ и҆ пресла́вное: не́бо, верте́пъ: престо́лъ херꙋві́мскїй, дв҃ꙋ: ꙗ҆́сли, вмѣсти́лище, въ ни́хже возлежѐ невмѣсти́мый хрⷭ҇то́съ бг҃ъ: є҆го́же, воспѣва́юще, велича́емъ."
|
|
},
|
|
{
|
|
"type": "TEXT",
|
|
"value": "Сла́вꙋ твою̀ воспѣ́ти по досто́инствꙋ невозмо́жно: чꙋдеса́ бо твоѧ̑ мнѡ́га, и҆ и҆сцѣлє́нїѧ безчи́слєнна незави́стнѡ подае́ши съ те́плою вѣ́рою приходѧ́щымъ, стефа́не ст҃и́телю, похвало̀ ро́да сꙋро́жскагѡ."
|
|
},
|
|
{
|
|
"type": "TEXT",
|
|
"value": "Поста́ви тебѐ цр҃кви свое́й ѡ҆снова́нїе хрⷭ҇то́съ, столпа̀ крѣ́пка и҆ неподви́жна во вѣ́ки, соблюда́юща и҆ назира́юща гра́дъ сво́й незы́бленъ, и҆ во вѣ́ки вѣ́ка ненавѣ́тꙋемь, и҆ ѿ всѧ́кихъ и҆збавлѧ́юща напа́данїй, вѣ́рою соверша́ющихъ свѧще́ннꙋю твою̀ па́мѧть."
|
|
},
|
|
{
|
|
"type": "TEXT",
|
|
"value": "А҆рхїере́и ᲂу҆́бѡ, сщ҃е́нницы же и҆ мона́си, и҆ всѝ лю́дїе, мꙋ́жїе и҆ жєны̀, и҆ ѻ҆трокови̑цы, ста́рцы со младє́нцы, и҆ всѧ́къ во́зрастъ, и҆ всѧ́ко достоѧ́нїе, ст҃и́телю стефа́нꙋ сꙋро́жскомꙋ свѣ́тлѡ пра́зднꙋемъ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Неизрече́нно дв҃ы та́инство: та́ бо престо́лъ херꙋві́мскїй, и҆ свѣтоно́сный черто́гъ показа́сѧ вседержи́телѧ хрⷭ҇та̀ бг҃а. ю҆́же благоче́стнѡ, ꙗ҆́кѡ бцⷣꙋ, велича́емъ."
|
|
},
|
|
{
|
|
"type": "HEADER",
|
|
"value": "Свѣти́ленъ."
|
|
},
|
|
{
|
|
"type": "TEXT",
|
|
"value": "Дв҃дски процвѣ́лъ є҆сѝ въ домꙋ̀ гдⷭ҇ни, ꙗ҆́кѡ фі́нїѯъ, ѻ҆́ч҃е прпⷣбне, пло́дъ твои́хъ трꙋдѡ́въ стокра́тнѡ ны́нѣ ᲂу҆мно́жилъ є҆сѝ. Тѣ́мже ѻ҆́блакъ де́мѡнѡвъ тꙋ́чами сле́зъ твои́хъ, блаже́нне, погрꙋзи́въ, ѿ хрⷭ҇та̀ по́честь и҆ вѣне́цъ побѣ́ды прїѧ́лъ є҆сѝ, и҆ чꙋде́съ, премꙋ́дре, незави́стнѡ бога́тꙋю ми́лость. Два́жды."
|
|
},
|
|
{
|
|
"type": "HEADER",
|
|
"value": "Бг҃оро́диченъ:"
|
|
},
|
|
{
|
|
"type": "TEXT",
|
|
"value": "Подо́бенъ: Со ᲂу҆ченики̑ взы́демъ:"
|
|
},
|
|
{
|
|
"type": "TEXT",
|
|
"value": "Хрⷭ҇то́вꙋ ны́нѣ престо́лꙋ предстоѧ̀, ст҃и́телю, съ бг҃омт҃рїю и҆ пречⷭ҇тою дв҃ою молѧ́сѧ не преста́й, побѣ̑ды на ва́рвары странѣ̀ на́шей дарова́ти, и҆ ми́ръ мі́рꙋ, и҆ дꙋша́мъ спасе́нїе, премꙋ́дре, соверша́ющымъ, ѽ стефа́не, па́мѧть твою̀, ст҃и́телємъ красото̀."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры, на д҃, гла́съ д҃:"
|
|
},
|
|
{
|
|
"type": "TEXT",
|
|
"value": "Стефа́не пресла́вне ѻ҆́ч҃е, а҆рхїере́ю хрⷭ҇то́въ, ᲂу҆тѣше́нїе стра́нныхъ, вра́чь недꙋ́жныхъ, не ѿходѝ ѿ на́съ, молѧ̀ за пою́щыѧ тѧ̀. Два́жды."
|
|
},
|
|
{
|
|
"type": "TEXT",
|
|
"value": "Ѻ҆́бразъ соблю́лъ є҆сѝ, прпⷣбне ѻ҆́ч҃е, по хрⷭ҇то́вѣ і҆кѡ́нѣ ста́лъ є҆сѝ мꙋ́жески, не ᲂу҆страши́всѧ гноете́знагѡ преще́нїѧ, но дꙋхо́внымъ мече́мъ того̀ ᲂу҆мертви́лъ є҆сѝ. Тѣ́мъ дерзнове́нїе и҆́маши ко гдⷭ҇ꙋ, спасѝ па́ствꙋ твою̀ ѿ є҆́реси всѧ́кїѧ, стефа́не многострада́льне."
|
|
},
|
|
{
|
|
"type": "HEADER",
|
|
"value": "Гла́съ и҃:"
|
|
},
|
|
{
|
|
"type": "TEXT",
|
|
"value": "До́блестей твои́хъ, прпⷣбне ѻ҆́ч҃е, пло́дъ ᲂу҆ѧснѝ вѣ́рныхъ сердца̀: кто́ бо слы́ша безмѣ́рное твоѐ смире́нїе, и҆ терпѣ́нїю не ᲂу҆диви́тсѧ, є҆́же къ ни́щымъ ти́хость, къ скорбѧ́щымъ ми́лованїе; всѧ̑ бг҃олѣ́пнѡ наꙋчи́лъ є҆сѝ, ст҃и́телю стефа́не. И҆ ны́нѣ неꙋвѧда́емымъ вѣнце́мъ ᲂу҆вѧ́злсѧ є҆сѝ, молѝ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Прпⷣбне требл҃же́нне, свѧще́нный ѻ҆́ч҃е, па́стырю до́брый, первопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ твою̀ за сꙋро́жь: ты̀ и҆ ны́нѣ, стефа́не ст҃и́телю, просѝ моли́твами твои́ми дарова́ти на́мъ ве́лїю ми́лость."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Бцⷣе, ты̀ є҆сѝ лоза̀ и҆́стиннаѧ:"
|
|
},
|
|
{
|
|
"type": "HEADER",
|
|
"value": "Славосло́вїе вели́кое и҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и бл҃жє́нна, пе́рвагѡ канѡ́на пѣ́снь г҃-ѧ, на д҃: и҆ в҃-гѡ пѣ́снь ѕ҃, на д҃."
|
|
},
|
|
{
|
|
"type": "HEADER",
|
|
"value": "Прокі́менъ, гла́съ а҃:"
|
|
},
|
|
{
|
|
"type": "TEXT",
|
|
"value": "Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ."
|
|
},
|
|
{
|
|
"type": "TEXT",
|
|
"value": "Сті́хъ: Оу҆слы́шите сїѧ̑ всѝ ꙗ҆зы́цы:"
|
|
},
|
|
{
|
|
"type": "HEADER",
|
|
"value": "А҆пⷭ҇лъ ко є҆вре́ємъ, зача́ло ти҃і."
|
|
},
|
|
{
|
|
"type": "TEXT",
|
|
"value": "А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ."
|
|
},
|
|
{
|
|
"type": "TEXT",
|
|
"value": "Сті́хъ: Зако́нъ бг҃а є҆гѡ̀ въ се́рдцѣ є҆гѡ̀, и҆ не за́пнꙋтсѧ стѡпы̀ є҆гѡ̀."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло а҃і."
|
|
},
|
|
{
|
|
"type": "TEXT",
|
|
"value": "Прича́стенъ: Въ па́мѧть вѣ́чнꙋю бꙋ́детъ пра́ведникъ."
|
|
}
|
|
] |