ponomar-pwa/static/data/shared/menaion-daily/12-21/1.json

[
 {
  "type": "HEADER",
  "value": "Деке́мврїа к҃а"
 },
 {
  "type": "HEADER",
  "value": "Предпра́зднство ржⷭ҇тва̀ хрⷭ҇то́ва."
 },
 {
  "type": "HEADER",
  "value": "И҆ ст҃ы́ѧ мч҃ницы і҆ꙋлїані́и, ꙗ҆́же въ нїкомиді́и."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры предпра́зднства, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Се́й бг҃ъ на́шъ, не вмѣни́тсѧ и҆́нъ къ немꙋ̀, восклица́ше прⷪ҇ро́къ дх҃омъ, и҆ пꙋ́ть и҆з̾ѡбрѣ́те всѧ́кагѡ хꙋдо́жества. По си́хъ же человѣ́кѡмъ ᲂу҆подо́битсѧ, въ пло́ть ѡ҆бле́ксѧ: ѿ дв҃ы бо бг҃оѻтрокови́цы роди́тисѧ грѧде́тъ, пристꙋ́пенъ мнѣ̀ бы́въ, и҆́же є҆стество́мъ непристꙋ́пный."
 },
 {
  "type": "TEXT",
  "value": "Сто́гъ гꙋме́нный твоѐ чре́во, всенепоро́чнаѧ бцⷣе, показꙋ́етсѧ, кла́съ невоздѣ́ланный, па́че ᲂу҆ма̀ и҆ сло́ва носѧ́що неизрече́ннѡ. Є҆го́же въ верте́пѣ виѳлее́мстѣмъ роди́ши, тва́рь всю̀ бжⷭ҇твенными ра́зꙋмы хотѧ́щагѡ пита́ти бл҃года́тїю, и҆ ѿ гла́да человѣ́чество дꙋшетлѣ́ннагѡ и҆зба́вити."
 },
 {
  "type": "TEXT",
  "value": "Ю҆́ница непоро́чнаѧ, ᲂу҆пита́ннаго ю҆нца̀ носѧ́щи во чре́вѣ, грѧде́тъ во ст҃ы́й верте́пъ пресла́внымъ сло́вомъ сего̀ породи́ти, и҆ пелена́ми пови́ти, ꙗ҆́кѡ человѣ́ка, и҆ положи́ти въ ꙗ҆́слехъ, ꙗ҆́кѡ млⷣнца. Тва́рь предпра́зднствꙋй, ра́достнѡ велича́ющи, такѡва́ѧ пресла̑внаѧ на землѝ содѣ́лавшаго."
 },
 {
  "type": "HEADER",
  "value": "И҆ ст҃ы́ѧ, гла́съ то́йже."
 },
 {
  "type": "TEXT",
  "value": "Подо́бенъ: Ꙗ҆́кѡ до́блѧ:"
 },
 {
  "type": "TEXT",
  "value": "Багрє́нїи кро́вными спасе́нїѧ ѻ҆де́ждꙋ себѣ̀, всехва́льнаѧ, ѡ҆багри́вши, и҆ просвѣти́вшисѧ дх҃омъ, гдⷭ҇ꙋ ѡ҆брꙋчи́ласѧ є҆сѝ безсме́ртномꙋ цр҃ю̀, соблюда́ющемꙋ тѧ̀ непоро́чнꙋ, нерастлѣ́ннꙋ во вѣ́къ вѣ́ка въ черто́зѣхъ нбⷭ҇ныхъ ꙗ҆́кѡ дв҃ꙋ преꙋдо́бреннꙋ и҆ нетлѣ́ннꙋ."
 },
 {
  "type": "TEXT",
  "value": "Ра́намъ приѡбщи́вшисѧ, и҆ со ѻ҆гне́мъ бра́вшисѧ, и҆ пло́ти терза̑нїѧ претерпѣ́вши, и҆ конѡ́бнаѧ врѣ̑нїѧ до́блественнѣ поне́сши, не побѣди́ласѧ є҆сѝ по́мысломъ, и҆стꙋка̑ннымъ не поже́рла є҆сѝ: но прекло́нши бг҃ꙋ вы́ю, ме́чнымъ мꙋче́нїемъ вѣнцено́сица, на нб҃са̀ возшла̀ є҆сѝ."
 },
 {
  "type": "TEXT",
  "value": "Ка́плѧми кро́ве ᲂу҆ѧсни́вшисѧ, возсїѧ́ла є҆сѝ проѧвле́ннѡ, ꙗ҆́кѡ со́лнце, и҆ ѿгна́ла є҆сѝ, всехва́льнаѧ, безбо́жїѧ тмꙋ̀ бл҃года́тїю, мч҃нице і҆ꙋлїані́е, и҆ вѣ̑рныѧ просвѣти́ла є҆сѝ, чтꙋ́щыѧ твоѧ̑ до́блествєнныѧ по́двиги, и҆ па́мѧть свѣ́тлꙋю и҆ свѣтоно́снꙋю, и҆ по всемꙋ̀ спаси́тельнꙋю."
 },
 {
  "type": "HEADER",
  "value": "Сла́ва, и҆ ны́нѣ: предпра́зднства, гла́съ ѕ҃."
 },
 {
  "type": "TEXT",
  "value": "Сїѡ́не, торжествꙋ́й, і҆ерꙋсали́ме, весели́сѧ: гра́де хрⷭ҇та̀ бг҃а, под̾имѝ зижди́телѧ въ верте́пѣ и҆ ꙗ҆́слехъ вмѣща́емаго. Ѿве́рзите мѝ врата̀, и҆ вше́дъ въ нѧ̀ ᲂу҆зрю̀, ꙗ҆́кѡ млⷣнца пелена́ми повива́емаго, дла́нїю же содержа́щаго тва́рь, є҆го́же пою́тъ а҆́гг҃ли непреста́ннымъ гла́сомъ, жизнода́вца, гдⷭ҇а спаса́ющаго ро́дъ на́шъ."
 },
 {
  "type": "HEADER",
  "value": "На стїхо́внѣ стїхи̑ры предпра́зднства, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Всѣ́хъ прⷪ҇ро́кѡвъ проречє́нїѧ и҆сполнѧ́ютсѧ: хрⷭ҇то́съ бо ражда́етсѧ въ виѳлее́мѣ гра́дѣ, и҆зъ чⷭ҇тыѧ бг҃оѻтрокови́цы."
 },
 {
  "type": "TEXT",
  "value": "Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи."
 },
 {
  "type": "TEXT",
  "value": "Сла́ва земноро́дныхъ, и҆ ра́дованїе и҆ хвала̀, виѳлее́ме честны́й,. Митропо́лїѧ бжⷭ҇твеннаѧ, под̾имѝ зижди́телѧ твоего̀."
 },
 {
  "type": "TEXT",
  "value": "Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ."
 },
 {
  "type": "TEXT",
  "value": "Сло́во ѻ҆́ч҃ее, и҆́мже всѧ̑ бы́ша, безстра́стнѡ и҆ нете́чнѡ, ѵ҆поста́сь зри́тсѧ є҆ди́на во двою̀ є҆стєствꙋ̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ ѕ҃."
 },
 {
  "type": "TEXT",
  "value": "Вѷзанті́ево: Безневѣ́стнаѧ дв҃о, ѿкꙋ́дꙋ пришла̀ є҆сѝ; кто̀ роди́вый тѧ̀; кто̀ и҆ ма́ти твоѧ̀; ка́кѡ зижди́телѧ но́сиши на рꙋкꙋ̀; ка́кѡ не растли́ласѧ є҆сѝ ᲂу҆тро́бою; ѽ вели́кихъ пресла́вныхъ на тебѣ̀ стра́шныхъ та́инствъ, на землѝ соверша́емыхъ, зри́мъ, всест҃а́ѧ! И҆ пред̾ꙋготовлѧ́емъ досто́йный тебѣ̀ до́лгъ, на землѝ верте́пъ: и҆ ѿ нб҃съ про́симъ пода́ти ѕвѣздꙋ̀. И҆ волсви́ же прихо́дѧтъ ѿ восто́кѡвъ землѝ къ за́падѡмъ, ви́дѣти человѣ́ческое спасе́нїе, въ ꙗ҆́слехъ пелена́ми повива́емое."
 },
 {
  "type": "HEADER",
  "value": "Тропа́рь ст҃ы́ѧ, гла́съ д҃:"
 },
 {
  "type": "TEXT",
  "value": "А҆́гница твоѧ̀, і҆и҃се, і҆ꙋлїані́а, зове́тъ ве́лїимъ гла́сомъ: тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю, и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да црⷭ҇твꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но, ꙗ҆́кѡ же́ртвꙋ непоро́чнꙋю, прїими́ мѧ съ любо́вїю поже́ршꙋюсѧ тебѣ̀. Тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ."
 },
 {
  "type": "HEADER",
  "value": "Сла́ва, и҆ ны́нѣ, гла́съ то́йже:"
 },
 {
  "type": "TEXT",
  "value": "Гото́висѧ виѳлее́ме, ѿве́рзисѧ всѣ̑мъ, є҆де́ме, красꙋ́йсѧ, є҆ѵфра́ѳо, ꙗ҆́кѡ дре́во живота̀ въ верте́пѣ процвѣтѐ ѿ дв҃ы: ра́й бо ѻ҆́ноѧ чре́во ꙗ҆ви́сѧ мы́сленный, въ не́мже бжⷭ҇твенный са́дъ, ѿ негѡ́же ꙗ҆́дше, жи́ви бꙋ́демъ, не ꙗ҆́коже а҆да́мъ ᲂу҆́мремъ. Хрⷭ҇то́съ ражда́етсѧ, пре́жде па́дшїй возста́вити ѻ҆́бразъ."
 },
 {
  "type": "TEXT",
  "value": "//Вѣ́домо бꙋ́ди, и҆дѣ́же пра́зднꙋетсѧ ст҃а́гѡ петра̀ митрополі́та пра́здникъ, пое́мъ канѡ́нъ ст҃ы́ѧ і҆ꙋлїані́и на повече́рїи, вкꙋ́пѣ съ трипѣ́снцемъ, и҆ послѣдѝ стїхи̑ры є҆ѧ̀."
 },
 {
  "type": "HEADER",
  "value": "На повече́рїи трипѣ́снецъ, і҆рмо́съ по два́жды, тропарѝ на ѕ҃: и҆ па́ки послѣдѝ і҆рмо́съ ѻ҆́ба ли̑ка вкꙋ́пѣ, гла́съ в҃, є҆гѡ́же краегране́сїе:"
 },
 {
  "type": "TEXT",
  "value": "Четве́ртомꙋ пою̀."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и."
 },
 {
  "type": "TEXT",
  "value": "Вотщѐ со́нмище и҆́рѡдово, и҆ во́лею собира́етсѧ, скверноꙋбі́йственное, ражда́ющагосѧ гдⷭ҇а ᲂу҆би́ти хрⷭ҇та̀. Є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀ гдⷭ҇и."
 },
 {
  "type": "TEXT",
  "value": "Лю́тый совѣ́тъ и҆́рѡдовъ покрыва́етсѧ, бг҃обо́рныѧ дꙋшѝ сы́й, со младє́нцы влⷣкꙋ ᲂу҆би́ти хрⷭ҇та̀, є҆мꙋ́же пое́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Глаго́лъ мꙋчи́телевъ поне́же превозмо́же, седмери́цею пе́щь разжже́на бы́сть и҆ногда̀: въ не́йже ѻ҆́троцы не ѡ҆пали́шасѧ, царе́во попра́вше велѣ́нїе, но вопїѧ́хꙋ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "И҆злива́юще ꙗ҆́кѡ мѵ̑ра сле́зы на́съ ра́ди хрⷭ҇тꙋ̀ ражда́ющемꙋсѧ пло́тїю, и҆́миже сквє́рны ѡ҆чи́стимъ, пречⷭ҇томꙋ чи́стѣ приходѧ́ще, и҆ вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Слеза́ми ᲂу҆миле́нїѧ сле́зъ да ᲂу҆бѣжи́мъ, грѣ́шнїи, мꙋ́ки бꙋ́дꙋщїѧ стра́шныѧ, хрⷭ҇тѡ́вы стѡпы̀ прїе́мше, полага́емꙋ въ пелена́хъ, ꙗ҆́кѡ млⷣнцꙋ, вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Свѧщеннодѣ́йствоватисѧ и҆збавле́нїю вѣ́дѧще, ѿ свои́хъ ᲂу҆тро́бъ же и҆ сле́зъ и҆сто́чника, хрⷭ҇тꙋ̀ и҆сповѣ́данїемъ пред̾измы́вшесѧ, вѣ́рнїи, да пристꙋ́пимъ пло́тїю къ ро́ждшемꙋсѧ въ верте́пѣ, вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Дꙋша́ми чи́стыми и҆ нескве́рными ᲂу҆стна́ми, прїиди́те, возвели́чимъ нескве́рнꙋю и҆ пречⷭ҇тꙋю мт҃рь є҆мманꙋ́илевꙋ: є҆́юже, и҆зъ неѧ̀ къ рожде́нномꙋ приносѧ́ще моли́твꙋ, пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ."
 },
 {
  "type": "TEXT",
  "value": "Неразꙋ́менъ никто́же, ни лꙋка́въ завистноѻбра́зникъ да бꙋ́детъ, ѿ приносѧ́щихъ ны́нѣ да́ры бг҃ꙋ прїѧ́тны, вмѣ́стѡ смѵ́рны, и҆ зла́та, и҆ лїва́на, добродѣ́телей мѷроꙋха́нїе, пою́щихъ хрⷭ҇тꙋ̀ ражда́ющемꙋсѧ: пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ."
 },
 {
  "type": "TEXT",
  "value": "Глаго́лаше ко прише́дшымъ и҆́рѡдъ волхвѡ́мъ мꙋ̑дрымъ: ше́дше поищи́те ро́ждшагосѧ ны́нѣ цр҃ѧ̀, и҆ ѡ҆брѣ́тше возвѣсти́те мнѣ̀, поꙋчи́всѧ лю́тый ѡ҆ ᲂу҆бі́йствѣ скверноꙋбі́йственнымъ се́рдцемъ. Пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ."
 },
 {
  "type": "TEXT",
  "value": "Ѽ слѣпо́тнагѡ скверноꙋбі́йства, вседе́рзостне! И҆́мже забве́нїе полꙋчи́лъ є҆сѝ, ꙗ҆́кѡ бг҃а никто́же є҆́мь рꙋка́ми ᲂу҆бїе́тъ: преразже́гсѧ же ꙗ҆́ростїю, свирѣ́пѡ младе́нцы закала́еши, и҆́рѡде, пощадѝ дꙋ́шы на́шѧ, хрⷭ҇тѐ бж҃е, и҆ спасѝ на́съ."
 },
 {
  "type": "HEADER",
  "value": "На ᲂу҆́трени по а҃-й каѳі́смѣ сѣда́ленъ предпра́зднства. Гла́съ в҃."
 },
 {
  "type": "TEXT",
  "value": "Подо́бенъ: Благоѻбра́зный:"
 },
 {
  "type": "TEXT",
  "value": "Непристꙋ́пный бг҃ъ, за бл҃гоꙋтро́бїе пристꙋ́пенъ мнѣ̀ бы́въ во́лею, прихо́дитъ пло́тїю роди́тисѧ, ꙗ҆́кѡ человѣ́къ, во гра́дѣ виѳлее́мѣ и҆зъ дв҃ы ѻ҆трокови́цы. Є҆го́же прїѧ́ти ᲂу҆се́рднѡ потщи́мсѧ, вопїю́ще со стра́хомъ: гдⷭ҇и, сла́ва тебѣ̀."
 },
 {
  "type": "HEADER",
  "value": "Сла́ва, и҆ ны́нѣ, гла́съ а҃."
 },
 {
  "type": "TEXT",
  "value": "Подо́бенъ: Гро́бъ тво́й:"
 },
 {
  "type": "TEXT",
  "value": "Приклони́вый нб҃са̀, и҆ въ дв҃ꙋ всели́выйсѧ, предгрѧде́тъ пло́тїю въ виѳлее́мстѣмъ верте́пѣ роди́тисѧ, ꙗ҆́коже пи́шетсѧ, ꙗ҆ви́тисѧ же млⷣнцъ, младе́нцы ѡ҆живлѧ́ѧй во ᲂу҆тро́бѣ: сего̀ ра́дꙋющесѧ ны́нѣ срѧ́щимъ всѝ се́рдца пра́востїю."
 },
 {
  "type": "HEADER",
  "value": "По в҃-й каѳі́смѣ сѣда́ленъ, гла́съ є҃."
 },
 {
  "type": "TEXT",
  "value": "Подо́бенъ: Собезнача́льное:"
 },
 {
  "type": "TEXT",
  "value": "Виѳлее́ме, гото́висѧ на срѣ́тенїе дв҃ы марі́и и҆ бг҃ома́тере: се́ бо грѧде́тъ къ тебѣ̀ млⷣнца носѧ́щи хрⷭ҇та̀, собезнача́льнаго ѻ҆ц҃ꙋ̀ и҆ дх҃ꙋ при́снѡ: є҆го́же въ верте́пѣ роди́тъ, и҆ по ржⷭ҇твѣ̀ дв҃а па́ки ꙗ҆ви́тсѧ."
 },
 {
  "type": "HEADER",
  "value": "Сла́ва, и҆ ны́нѣ, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀:"
 },
 {
  "type": "TEXT",
  "value": "Чꙋ́до пресла́вно зри́тсѧ дне́сь: сп҃си́тель бо на́шъ въ верте́пѣ пло́тїю ѿ дв҃ы на́съ ра́ди роди́тисѧ ны́нѣ тщи́тсѧ. Волсви́ же съ да̑ры ꙗ҆́кѡ цр҃ю̀ покло́нѧтсѧ, и҆ па́стырїе со а҆́гг҃лы славосло́вѧтъ є҆го̀: съ ни́миже и҆ мы̀ вопїе́мъ: сла́ва на́съ ра́ди вочл҃вѣ́чшемꙋсѧ."
 },
 {
  "type": "HEADER",
  "value": "Канѡ́нъ предпра́зднства, со і҆рмосо́мъ на и҃: и҆ ст҃ы́ѧ на д҃."
 },
 {
  "type": "HEADER",
  "value": "Канѡ́нъ предпра́зднства, є҆гѡ́же краегране́сїе, по а҆лфави́тꙋ. І҆ѡ́сифъ. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ, побѣ́дное воспою̀ пѣ́нїе."
 },
 {
  "type": "TEXT",
  "value": "Ра́дꙋйсѧ, нб҃о, и҆ землѐ, весели́сѧ: бг҃ъ бо на́шъ бы́въ пло́тїю ѿ дв҃ы ѻ҆трокови́цы ражда́етсѧ, и҆ пелена́ми повива́етсѧ: плени̑цы же разрѣша́етъ мои́хъ прегрѣше́нїй, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Цр҃и́ца чⷭ҇таѧ цр҃ѧ̀ всѣ́хъ ражда́етъ па́че ᲂу҆ма̀, вы́шнее вѣ̑рнымъ црⷭ҇тво ѿверза́ющаго, и҆ и҆́же въ на́съ ѻ҆каѧ́ннѡ ца́рствꙋющїй всегда̀ грѣ́хъ, коне́чнѡ ѿе́млющаго."
 },
 {
  "type": "TEXT",
  "value": "Писа̑нїѧ прⷪ҇ро́чєскаѧ коне́цъ прїе́млютъ: се́ бо, є҆го́же провозвѣсти́ша хрⷭ҇та̀, во гра́дѣ виѳлее́мѣ ꙗ҆влѧ́етсѧ воплоща́емь: сегѡ̀ ны́нѣ предпра́здновати ржⷭ҇тво̀ потщи́мсѧ пра́востїю мы́сли дне́сь."
 },
 {
  "type": "HEADER",
  "value": "И҆́нъ канѡ́нъ ст҃ы́ѧ, і҆ѡ́сифъ, гла́съ то́йже, є҆гѡ́же краегране́сїе:"
 },
 {
  "type": "TEXT",
  "value": "Пѣ́ти тѧ̀, мч҃нице, да приложи́тъ бг҃ъ бл҃года́ть."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Мч҃ническою ꙗ҆́вѣ свѣ́тлостїю ѡ҆блиста́ющи ѡ҆ бз҃ѣ ликꙋ́еши, свѧще́ннѡ ѡ҆божа́ема, всехва́льнаѧ, и҆ просвѣще́нїе моли́твами твои́ми подава́еши пою́щымъ тѧ̀."
 },
 {
  "type": "TEXT",
  "value": "Оу҆ѧзви́ласѧ є҆сѝ сладча́йшимъ раче́нїемъ хрⷭ҇то́вымъ, всехва́льнаѧ, и҆ плѡтскі́ѧ ѡ҆ста́вльши сла̑сти, и҆ ѡ҆брꙋ́чника тлѣ́ннаго, ѡ҆брꙋчи́ласѧ є҆сѝ, непоро́чнаѧ чи́стаѧ дѣ́во, сотво́ршемꙋ."
 },
 {
  "type": "TEXT",
  "value": "Ѡ҆сїѧ́въ свѣтлоѧвле́нными добро́тами твою̀ мы́сль созда́тель всѣ́хъ и҆ бг҃ъ, нбⷭ҇ныхъ тѧ̀ черто́гѡвъ дѣ́вственнѡ ликꙋ́ющꙋю, мꙋ́ченице бг҃омꙋ́драѧ, ᲂу҆досто́и."
 },
 {
  "type": "TEXT",
  "value": "Бг҃оро́диченъ: Дв҃а созда́телѧ є҆стества̀ роди́ти и҆́детъ въ верте́пѣ, пло́ть и҆зъ неѧ̀ по ѵ҆поста́си несказа́ннѡ преесте́ственнѣ поне́сшаго, ꙗ҆́кѡ да ѡ҆божи́тъ человѣ́чество."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и."
 },
 {
  "type": "TEXT",
  "value": "Данїи́лъ тѧ̀ ѿ горы̀ дѣ́вственныѧ ка́мень, сло́ве, ѿсѣ́ченъ зри́тъ, и҆ и҆стнѣва́ющь хра́мы і҆́дѡльскїѧ держа́вою твое́ю: сегѡ̀ ра́ди тѧ̀ стра́хомъ сла́вимъ."
 },
 {
  "type": "TEXT",
  "value": "Ѿ восто́ка волсвѝ тебѣ̀, цр҃ю̀ всѣ́хъ, наста́влени бы́вше ѕвѣздо́ю, да́ры прино́сѧтъ, хрⷭ҇тѐ, смѵ́рнꙋ, зла́то и҆ лїва́нъ, ᲂу҆ди́вльшесѧ твоемꙋ̀ снисхожде́нїю."
 },
 {
  "type": "TEXT",
  "value": "Живоно́сный кла́съ ни́ва неѡра́ннаѧ но́ситъ, роди́ти во гра́дѣ виѳлее́мѣ марїа́мъ, всѣ́хъ дꙋ́шы пита́ющаго, зовꙋ́щихъ: ст҃ъ є҆сѝ, гдⷭ҇и."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе."
 },
 {
  "type": "TEXT",
  "value": "Соверши́ла є҆сѝ дꙋ́шꙋ, хра́мъ бж҃їй пресвѧ́тъ, сла́внаѧ, бжⷭ҇твєннымъ храмѡ́мъ вы́нꙋ пѣ́сньми и҆ моли́твами присѣдѧ́щи."
 },
 {
  "type": "TEXT",
  "value": "Велича́йшихъ ᲂу҆лꙋчи́ти жела́ющи дарова́нїй, всечестна́ѧ, болѣ̑зни плотскі̑ѧ терпѣ́ла є҆сѝ ꙗ҆́кѡ въ чꙋжде́мъ тѣлесѝ."
 },
 {
  "type": "TEXT",
  "value": "Крове́й твои́хъ ка́плѧми, безбо́жїѧ ѻ҆́гнь погаси́ла є҆сѝ, и҆ вѣ́рныхъ напои́ла є҆сѝ, і҆ꙋлїані́е, ра́зꙋмы."
 },
 {
  "type": "TEXT",
  "value": "Бг҃оро́диченъ: И҆збавлѧ́ѧй человѣ́ки и҆зба́витель, ѿ чⷭ҇тыѧ ражда́етсѧ въ виѳлее́мѣ, пелєны̀ ꙗ҆́коже млⷣнцъ прїе́мъ."
 },
 {
  "type": "HEADER",
  "value": "Конда́къ ст҃ы́ѧ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Дѣ́вства добро́тами преѡчище́на, дѣви́це, и҆ мꙋче́нїѧ вѣнцы̑, і҆ꙋлїані́е, ны́нѣ вѣнча́вшисѧ, дае́ши сꙋ́щымъ въ нꙋ́ждахъ и҆ недꙋ́зѣхъ и҆сцѣле́нїе и҆ спасе́нїе, пристꙋпа́ющымъ къ ра́цѣ твое́й: бжⷭ҇твеннꙋю бо благода́ть хрⷭ҇то́съ и҆сточа́етъ и҆ жи́знь вѣ́чнꙋю."
 },
 {
  "type": "HEADER",
  "value": "Сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Жениха̀ возлюби́вши творца̀ и҆ бг҃а, жениха̀ тлѣ́ннаго ѡ҆ста́вила є҆сѝ, мꙋ́ченице честна́ѧ, и҆ ра́дꙋющисѧ претерпѣ́ла є҆сѝ мꙋ̑ки и҆ терза̑нїѧ, и҆ ѻ҆́гненное томле́нїе. Тѣ́мже вѣнцено́сица къ бжⷭ҇твенномꙋ черто́гꙋ возшла̀ є҆сѝ, и҆спроша́ющи всѣ̑мъ прегрѣше́нїй проще́нїе."
 },
 {
  "type": "HEADER",
  "value": "Сла́ва, и҆ ны́нѣ, предпра́зднства, гла́съ г҃."
 },
 {
  "type": "TEXT",
  "value": "Подо́бенъ: Красотѣ̀ дѣ́вства:"
 },
 {
  "type": "TEXT",
  "value": "Ра́дости и҆спо́лнитесѧ всѧ̑ концы̀: бцⷣа бо роди́ти приближа́етсѧ цр҃ѧ̀ всѧ́ческихъ. Ѽ чꙋдесѐ неизрече́ннагѡ! Безнача́льный начина́етсѧ, и҆ безпло́тный воплоща́етсѧ: верте́пъ прїе́млетъ содержа́щаго всѧ́чєскаѧ. Виѳлее́ме, ра́дꙋйсѧ, и҆ ликꙋ́й тва́рь де́нь предпра́зднственный."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Ст҃а́ѧ мѷрополо́жница честна́гѡ свѧще́нїѧ, въ виѳлее́мѣ гра́дѣ сїѐ и҆злїѧ́ти прихо́дитъ, свѧще́нїе на́мъ всѣ̑мъ подаю́щаго, вопїю́щымъ: сла́ва, хрⷭ҇тѐ, си́лѣ твое́й."
 },
 {
  "type": "TEXT",
  "value": "Бг҃оглаго́ливе и҆са́їе, честна̑ѧ твоѧ̑ проповѣ̑данїѧ бы̑вшаѧ ви́дѧ вещмѝ, ра́дꙋйсѧ и҆ ликꙋ́й: дв҃а бо безсѣ́меннѡ родѝ въ верте́пѣ пло́тїю виѳлее́мстѣмъ невмѣсти́маго."
 },
 {
  "type": "TEXT",
  "value": "І҆и҃съ пло́тїю ражда́етсѧ, и҆ въ лѣ́тѣ безлѣ́тный ви́димь є҆́сть млⷣнецъ, разрѣша́ѧ моѧ̑ лѣ̑тнаѧ прегрѣшє́нїѧ, и҆ неизрече́нною нището́ю ны́нѣ ѡ҆богаща́етъ мѧ̀, ѡ҆бнища́вшаго тлетво́рными престꙋпле́нїѧми."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Просте́ртꙋ мы́сль стѧжа́вши ко всѣ́хъ гдⷭ҇ꙋ, пло́тїю просте́рта, и҆ ᲂу҆ранѧ́ема лю́тѡ, ника́коже брегла̀ є҆сѝ, і҆ꙋлїані́е до́браѧ дв҃о."
 },
 {
  "type": "TEXT",
  "value": "Превозмого́ша рачє́нїѧ влⷣчнѧѧ пло́ти, всехва́льнаѧ мч҃нице, ѡ҆мрачи́ти: тѣ́мже пренебрегла̀ є҆сѝ и҆ бога́тство, и҆ ѡ҆брꙋ́чника, и҆ многоѻбра̑зныѧ мꙋ̑ки."
 },
 {
  "type": "TEXT",
  "value": "Тѧ̀ нескве́рнꙋю а҆́гницꙋ, ꙗ҆́коже во́лцы, мꙋчи́телїе терза́юще, мч҃нице, ра́нами, непоро́чное цѣ́лое бж҃їе соверши́ша бжⷭ҇твенное ѻ҆вча̀ и҆ заколе́нїе."
 },
 {
  "type": "TEXT",
  "value": "Бг҃оро́диченъ: Дѣ́вство по ржⷭ҇твѣ̀ запеча́тано, бцⷣе, ви́дѧщи, ᲂу҆́жасомъ ѡ҆держи́ма бы́вши. Ча́до, взыва́ше: ка́кѡ ны́нѣ повїю́ тѧ, песко́мъ повива́ющаго мо́ре;"
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ: но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче."
 },
 {
  "type": "TEXT",
  "value": "Ѿ дв҃ы ражда́етсѧ бг҃ъ є҆мманꙋ́илъ, и҆ въ ꙗ҆́слехъ возле́гъ, на́ше воззва́нїе во́лею содѣ́ловаетъ: сегѡ̀ ржⷭ҇тво̀ благоче́стнѡ предпра́зднꙋимъ."
 },
 {
  "type": "TEXT",
  "value": "Сло́во сы́й пребезнача́льное ѻ҆́ч҃ее и҆ соесте́ственное, въ ꙗ҆́слехъ возле́гъ безслове́сныхъ, разрѣши́лъ є҆сѝ безслове́сїѧ ны̀, предпра́зднствꙋющыѧ благоче́стнѡ твоѐ ржⷭ҇тво̀."
 },
 {
  "type": "TEXT",
  "value": "Бл҃же́нъ бы́сть ко́рень і҆ессе́евъ, прозѧбы́й чⷭ҇тꙋю, цвѣ́тъ бжⷭ҇твенный носѧ́щꙋю хрⷭ҇та̀ гдⷭ҇а. Є҆го́же предпра́зднꙋимъ ржⷭ҇тво̀ ра́дꙋющесѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Стрꙋю̀, мꙋ́ченице, ѕлочести́вагѡ безбо́жїѧ и҆зсꙋши́ла є҆сѝ тече́ньми крове́й, непра́веднѡ пролива́емыми, и҆ ѻ҆́гнь пре́лести погаси́ла є҆сѝ."
 },
 {
  "type": "TEXT",
  "value": "Всецѣ́лꙋ тебѐ самꙋ́ю бг҃ꙋ принесла̀ є҆сѝ, че́рвлень дѣ́вства багрє́нїи крове́й твои́хъ, свѣтлѣ́йшꙋ соверши́вши."
 },
 {
  "type": "TEXT",
  "value": "Твое́ю добро́тою дꙋ́шꙋ ᲂу҆ѧзви́вши, претечѐ, ѽ влⷣко, дв҃а ви̑димыѧ добрѡ́ты, страда́нїемъ сїѧ́ющи."
 },
 {
  "type": "TEXT",
  "value": "Бг҃оро́диченъ: Чꙋ́до новолѣ́пно, дв҃а и҆́детъ пречⷭ҇таѧ въ верте́пъ виѳлее́мскїй роди́ти бг҃а вочеловѣ́чшасѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве."
 },
 {
  "type": "TEXT",
  "value": "Но́въ на землѝ на́мъ ѻ҆́трочищъ ро́ждсѧ, и҆́же пре́жде вѣкѡ́въ ѿ ѻ҆ц҃а̀ неизрече́ннѡ возсїѧ́въ, дре́внѧгѡ всѧ̑ свободѝ престꙋпле́нїѧ, ꙗ҆́кѡ бл҃гоꙋтро́бенъ."
 },
 {
  "type": "TEXT",
  "value": "Стра̑нна и҆ пресла́вна слы̑шана бы́ша въ виѳлее́мѣ гра́дѣ, роди́вшꙋсѧ тебѣ̀, безнача́льне сло́ве: па́стырїе бо со а҆́гг҃лы пѣ́снь тебѣ̀ ꙗ҆́кѡ влⷣцѣ приноша́хꙋ."
 },
 {
  "type": "TEXT",
  "value": "Ѕвѣзда̀ пра́вды возвѣща́етъ волхвѡ́мъ неизрече́ннѡ сл҃нца ро́ждшасѧ: є҆гѡ́же честно́е ны́нѣ предпра́зднꙋимъ ра́дꙋющесѧ ржⷭ҇тво̀."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Жела́нїемъ ᲂу҆ѧ́звлена бы́вши бжⷭ҇твеннымъ, взыва́ла є҆сѝ: хрⷭ҇та̀ и҆дꙋ̀ дости́гнꙋти кра́снаго добро́тою: тѣ́мже мꙋ̑ки терплю̀, неꙋкло́ннымъ ра́дꙋющисѧ ра́зꙋмомъ."
 },
 {
  "type": "TEXT",
  "value": "Протѧза́ти неми́лостивнѡ, и҆ же́злїемъ сокрꙋша́ти гдⷭ҇ню а҆́гницꙋ лꙋка́вый гони́тель повелѣва́ше, просте́ртꙋ ко хрⷭ҇тꙋ̀ мы́сль и҆мꙋ́щꙋю."
 },
 {
  "type": "TEXT",
  "value": "Оу҆́треневала є҆сѝ ко хрⷭ҇тꙋ̀, невече́рнемꙋ сл҃нцꙋ, и҆ тогѡ̀ свѣтлостьмѝ дꙋ́шꙋ, бг҃омꙋ́драѧ, и҆ се́рдце ѡ҆зари́ла є҆сѝ, и҆ къ свѣ́тꙋ преложи́ласѧ є҆сѝ присносꙋ́щномꙋ."
 },
 {
  "type": "TEXT",
  "value": "Бг҃оро́диченъ: Мо́ре пови́вый мгло́ю, во́лею ражда́етсѧ зижди́тель и҆зъ дв҃ы ѻ҆трокови́цы, и҆ пелєны̀, ꙗ҆́кѡ млⷣнцъ, прїе́млетъ, мі́ръ и҆збавлѧ́ѧй."
 },
 {
  "type": "HEADER",
  "value": "Конда́къ, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Въ виѳлее́мѣ зрѧ́ще пелена́ми повива́емаго, всю̀ зе́млю держа́ща рꙋко́ю свое́ю, предпра́зднствєнныѧ пѣ̑сни ро́ждшей сего̀ прино́симъ: мт҃рски бо весели́тсѧ, держа́щи въ нѣ́дрѣхъ сн҃а бж҃їѧ."
 },
 {
  "type": "TEXT",
  "value": "І҆́косъ: Сн҃а бж҃їѧ дв҃а держа́щи во ѡ҆б̾ѧ́тїихъ, мт҃рскими ѡ҆блобыза́ньми цѣлꙋ́ющи, вѣща́ше: сѣ́мене не позна́хъ въ зача́тїи, и҆ тлѣ́нїѧ не под̾ѧ́хъ въ рожде́нїи: ны́нѣ же чиста̀ є҆́смь, ꙗ҆́коже пре́жде, кꙋ́пнѡ и҆ по ржⷭ҇твѣ̀. Тѣ́мъ твоѐ проповѣ́дꙋю, ча́до, мно́гое благоꙋтро́бїе, и҆ непостижи́мое вели́чество, є҆́же показа́лъ є҆сѝ на мнѣ̀: ѿѻнꙋ́дꙋже и҆ ра́дꙋюсѧ, держа́щи въ нѣ́дрѣхъ сн҃а бж҃їѧ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жши, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ."
 },
 {
  "type": "TEXT",
  "value": "Ка́кѡ тѧ̀ верте́пъ вмѣсти́тъ, грѧдꙋ́ща на́съ ра́ди роди́тисѧ, невмѣсти́маго; ка́кѡ тѧ̀ воздои́тъ дв҃а, пита́телѧ всѣ́хъ, бл҃гоꙋтро́бне і҆и҃се, сꙋ́ща."
 },
 {
  "type": "TEXT",
  "value": "Глаго́лѡмъ послѣ́дꙋюще волхва̀ валаа́ма, волсвѝ тща́тсѧ хрⷭ҇тꙋ̀ поклони́тисѧ съ да̑ры, разꙋмѣ́юще сего̀ всѧ́кимъ дыха́нїемъ ца́рствꙋюща."
 },
 {
  "type": "TEXT",
  "value": "Непло́дствꙋющее человѣ́ческое є҆стество̀ всѧ́кїѧ добродѣ́тели ра́дꙋйсѧ и҆ ликꙋ́й: грѧде́тъ бо хрⷭ҇то́съ ѿ дв҃ы пло́тїю роди́тисѧ, ꙗ҆́кѡ да пока́жетъ тѧ̀ дѡ́брымъ благоча́дно."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Безꙋ́мїемъ въ ражже́нный коно́бъ, мꙋ́ченице, сꙋдїѧ́ тѧ вмета́етъ неми́лостивнѡ: а҆́гг҃ломъ же тѧ̀ гдⷭ҇ь невре́днꙋ спасѐ, сего̀ почита́ющꙋ."
 },
 {
  "type": "TEXT",
  "value": "Не ᲂу҆жаса́ющисѧ мꙋжемꙋ́дреннѡ, па́че же, всечестна́ѧ мꙋ́ченице, ко ѻ҆гню̀ грѧде́ши, восхлажде́нїе чꙋ́вствꙋющи, и҆ вопїю́щи: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Ты̀ женихꙋ̀, ꙗ҆́коже вѣ́но, принесла̀ є҆сѝ, наро́дъ и҆ лю́ди вѣ́ровавшїи въ того̀, и҆ ле́сти ѡ҆мраче́нїе свѣтоно́сными твои́ми чꙋдотворе́ньми ѿрази́ла є҆сѝ."
 },
 {
  "type": "TEXT",
  "value": "Бг҃оро́диченъ: Ра́дꙋйсѧ, село̀ невмѣсти́магѡ, мт҃и дв҃о: сего́ бо плотоно́сца хотѧ́щи на́съ ра́ди въ верте́пѣ роди́ти, пречⷭ҇таѧ, и҆справлѧ́юща свои́хъ рꙋ́къ созда́нїе."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а."
 },
 {
  "type": "TEXT",
  "value": "Мно́гими мѧ̀, хрⷭ҇тѐ, престꙋпле́ньми разбо́йникѡвъ бы́вшаго верте́пъ, за благоꙋтро́бїе неизрече́нное спаса́ѧ, роди́тисѧ въ верте́пѣ ѿ дв҃ы чⷭ҇тыѧ и҆зво́лилъ є҆сѝ."
 },
 {
  "type": "TEXT",
  "value": "Подписꙋ́ѧ соверше́нное мнѣ̀ ѡ҆ставле́нїе, написа́лсѧ є҆сѝ ке́саревымъ повелѣ́нїемъ творе́цъ тва́ри съ рабы̑: пою̀ твоегѡ̀ бл҃гоꙋтро́бїѧ безмѣ́рнꙋю, влⷣко, пꙋчи́нꙋ."
 },
 {
  "type": "TEXT",
  "value": "Свѣ́тлаѧ влⷣчнѧ пала́то, ка́кѡ возшла̀ є҆сѝ въ малѣ́йшїй верте́пъ, цр҃ѧ̀ гдⷭ҇а на́съ ра́ди вопло́щшасѧ роди́ти, всест҃а́ѧ дв҃о бг҃оневѣ́сто."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Горѣ̀ твоѐ ѻ҆́ко и҆ ᲂу҆́мъ къ могꙋ́щемꙋ спастѝ и҆мꙋ́щи бг҃ꙋ, конѡ́бнаѧ врѣ̑нїѧ благода́тїю бжⷭ҇твеннагѡ дх҃а ᲂу҆гаси́ла є҆сѝ, воспѣва́ющи пѣ́снь ѻ҆́троческꙋю, мꙋ́ченице, вѣ́рою: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Глаго́лꙋ мꙋчи́телѧ ѕлочести́вагѡ слꙋжа́ше, ѻ҆гнѧ̀ досто́йнїи сꙋемꙋ́дреннїи, жи́вꙋ тѧ̀, мꙋ́ченице, во ѻ҆́гнь вложи́ша: но неѡпале́на была̀ є҆сѝ ѻ҆гне́мъ, женихо́вою любо́вїю, бг҃оно́снаѧ, ѡ҆роша́ема, сего̀ почита́ющи."
 },
 {
  "type": "TEXT",
  "value": "Стоѧ́ла є҆сѝ предъ сꙋди́щемъ, хрⷭ҇та̀ проповѣ́дающи бг҃а безсме́ртнаго, претерпѣ́вшаго распѧ́тїе, и҆ пре́лесть ᲂу҆мертви́вшаго, и҆ безсме́ртнꙋю жи́знь вѣ̑рнымъ подаю́щаго вопїю́щымъ: всѧ̑ дѣла̀, по́йте гдⷭ҇а."
 },
 {
  "type": "TEXT",
  "value": "Бг҃оро́диченъ: Ѻ҆́блаки восхожде́нїе своѐ полага́ѧ гдⷭ҇ь, ѻ҆́блакомъ на́мъ дв҃ою роди́тисѧ грѧде́тъ, ꙗ҆́кѡ да разори́тъ дꙋ́шъ на́шихъ грѣха̀ мра́чный ѻ҆́блакъ, вопїю́щихъ є҆мꙋ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. Тѣ́мъ тѧ̀ всѝ велича́емъ."
 },
 {
  "type": "TEXT",
  "value": "Ликꙋ́имъ всѝ вѣ́рнїи, взыгра́имъ и҆ согла́снѡ воскли́кнемъ: грѧде́тъ всѣ́хъ спасе́нїе, приближа́етсѧ роди́тисѧ гдⷭ҇и, спастѝ є҆гѡ̀ рождество̀ бг҃омꙋ́дреннѡ пра́зднꙋющыѧ."
 },
 {
  "type": "TEXT",
  "value": "Ѱалти́рь, ст҃ы́й дв҃де, воспрїимѝ и҆ гꙋ́сли, и҆ пѣсновоспо́й: до́ме є҆ѵфра́ѳовъ, весели́сѧ: ѻ҆ц҃ъ бо и҆зъ чре́ва є҆го́же родѝ, въ тебѣ̀ пресвѣ́тло ражда́етсѧ, ѿ дв҃ы воплоща́ѧсѧ."
 },
 {
  "type": "TEXT",
  "value": "Ꙗ҆́кѡ тꙋ́ча, ꙗ҆́кѡ вели́кїй до́ждь, во ᲂу҆тро́бꙋ твою̀ влⷣка сни́де, и҆ мра̑чнаѧ безбѡ́жїѧ, землѝ ѡ҆лѧденѣ́вшаѧ напоѝ, и҆ пре́лести морѧ̀ и҆зсꙋшѝ, бг҃ороди́тельнице мт҃и дв҃о."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "І҆ꙋлїані́и бг҃оно́сныѧ сꙋ́щымъ ѡ҆ вѣ́рѣ подвигѡ́мъ а҆́гг҃ли ᲂу҆диви́шасѧ: ка́кѡ же́нскимъ є҆стество́мъ посрамѝ тоѧ̀ прама́терь въ раѝ ᲂу҆мори́вшаго."
 },
 {
  "type": "TEXT",
  "value": "Ꙗ҆́кѡ преꙋдобре́ннаѧ страстоно́сица, и҆ преизрѧ́днаѧ дѣ́ва, вѣне́цъ воспрїѧ́ла є҆сѝ зако́ннѡ пра́вды, попра́вши съ пло́тїю безпло́тнаго, и҆ побѣдоно́сица бы́вши."
 },
 {
  "type": "TEXT",
  "value": "Тѧ̀ разꙋ́мнꙋю ла́стовицꙋ, и҆ нерастлѣ́ннꙋю го́рлицꙋ и҆ голꙋби́цꙋ, свидѣ́тельствомъ позлаще́нна и҆мꙋ́щꙋ кри́ла, и҆ къ бг҃ꙋ полетѣ́вшꙋю и҆ почи́вшꙋю, почита́емъ."
 },
 {
  "type": "TEXT",
  "value": "Процвѣла̀ є҆сѝ во ᲂу҆до́лѣхъ мч҃ническихъ, ꙗ҆́кѡ крі́нъ, страстоно́сице і҆ꙋлїані́е, и҆ ꙗ҆́кѡ ши́покъ благово́ненъ дѣ́вствомъ была̀ є҆сѝ, и҆ кра́сномꙋ женихꙋ̀ твоемꙋ̀ бжⷭ҇твенное ѡ҆бонѧ́нїе бы́вши."
 },
 {
  "type": "TEXT",
  "value": "Бг҃оро́диченъ: Носѧ́щи носѧ́щаго всѧ̑, къ виѳлее́мꙋ грѧде́тъ дв҃а, того̀ и҆ роди́ти, и҆ во ꙗ҆́слехъ восклони́ти, ꙗ҆́кѡ млⷣнца, человѣ́кѡвъ воззва́нїе и҆зрѧ́днѡ содѣ́ловающаго."
 },
 {
  "type": "HEADER",
  "value": "Свѣти́ленъ предпра́зднства."
 },
 {
  "type": "TEXT",
  "value": "Подо́бенъ: Посѣти́лъ ны̀ є҆́сть:"
 },
 {
  "type": "TEXT",
  "value": "Предпра́зднствєнныѧ, вѣ́рнїи, ржⷭ҇тва̀ пѣ̑сни прїиди́те принесе́мъ всѝ: грѧде́тъ ᲂу҆жѐ хрⷭ҇то́съ въ виѳлее́мъ роди́тисѧ, спастѝ вселе́ннꙋю, ꙗ҆́кѡ є҆ди́нъ чл҃вѣколю́бецъ."
 },
 {
  "type": "HEADER",
  "value": "Сла́ва, и҆ ны́нѣ:"
 },
 {
  "type": "TEXT",
  "value": "Виѳлее́ме, землѐ і҆ꙋ́дова, ᲂу҆красѝ вхо́ды: въ тебѣ́ бо дв҃а и҆ бцⷣа ᲂу҆жѐ прихо́дитъ роди́ти, въ верте́пѣ и҆ ꙗ҆́слехъ, бг҃а моего̀ и҆ гдⷭ҇а."
 },
 {
  "type": "HEADER",
  "value": "На хвали́техъ стїхи̑ры на д҃, гла́съ ѕ҃."
 },
 {
  "type": "TEXT",
  "value": "Подо́бенъ: А҆́гг҃льскїѧ пред̾иди́те:"
 },
 {
  "type": "TEXT",
  "value": "Содѣ́тельнаѧ ны́нѣ предгрѧде́тъ премꙋ́дрость: прⷪ҇ро́честїи ѿверза́ютсѧ ѻ҆́блацы, бл҃года́ть процвѣта́етъ, и҆́стина возсїѧ̀: престаю́тъ гада̑нїѧ сѣнѡ́внаѧ: є҆де́ма ѿве́рзесѧ две́рь: а҆да́ме, ликꙋ́й, созда́тель бг҃ъ на́шъ во́льнѡ созда́сѧ."
 },
 {
  "type": "TEXT",
  "value": "Речє́нїѧ и҆сполнѧ́ѧ прⷪ҇ро́чєскаѧ и҆ видѣ̑нїѧ, ражда́етсѧ пло́тїю, и҆ ѡ҆дебелѣва́етъ сло́во, и҆ въ ꙗ҆́слехъ безслове́сныхъ роди́всѧ возлега́етъ. Сїѐ кра́йнее снизхожде́нїе, сїѐ стра́шное смотре́нїе, є҆гѡ́же ра́ди пое́мъ: цр҃ь і҆и҃левъ хрⷭ҇то́съ прихо́дитъ."
 },
 {
  "type": "TEXT",
  "value": "Сѐ чⷭ҇таѧ па́че ᲂу҆ма̀ и҆ сло́ва ражда́етъ сн҃а бж҃їѧ, є҆го́же прⷪ҇ро́цы проповѣ́даша дре́вле, прови́дѧще дх҃омъ ст҃ы́мъ, нескве́рнꙋ тѧ̀ сохранѧ́юща, и҆ разрѣша́ющаго а҆да́ма ѿ грѣха̀ лю́дїе, рце́мъ: цр҃ь на́шъ хрⷭ҇то́съ пло́тїю прихо́дитъ."
 },
 {
  "type": "TEXT",
  "value": "Нѣ́дръ ѻ҆ч҃ескихъ не ѿстꙋ́пль, человѣ́къ ꙗ҆ви́лсѧ є҆сѝ, и҆ дѣ́вственными держи́мь рꙋка́ми, волхвы̀ ѿ персі́ды ѕвѣздо́ю призва́лъ є҆сѝ, цр҃ю̀ тебѣ̀ и҆ бг҃ꙋ покланѧ́ющыѧсѧ. Дх҃омъ ᲂу҆сте́нъ нече́ствꙋющыѧ кнѧ́зи ꙗ҆зы́чєскїѧ погꙋби́ши, и҆ ᲂу҆пасе́ши лю́ди ѡ҆сꙋществє́нныѧ."
 },
 {
  "type": "HEADER",
  "value": "Сла́ва, гла́съ и҆ подо́бенъ то́йже:"
 },
 {
  "type": "TEXT",
  "value": "Сло́во и҆́же ѻ҆ц҃ꙋ̀ є҆диносꙋ́щенъ сы́й, ѿ двⷭ҇твенныхъ растворе́нїе прїе́мъ чⷭ҇тыхъ крове́й, и҆ зи́ждетсѧ, и҆ расте́тъ вре́меннымъ разстоѧ́нїемъ, па́ки и҆ ражда́етсѧ въ верте́пѣ: ᲂу҆́жасъ ве́лїй! А҆́гг҃ли воспѣва́ютъ, человѣ́цы же рꙋка́ми пле́щꙋтъ: цр҃ь і҆и҃левъ хрⷭ҇то́съ прихо́дитъ."
 },
 {
  "type": "HEADER",
  "value": "И҆ ны́нѣ, гла́съ и҆ подо́бенъ то́йже:"
 },
 {
  "type": "TEXT",
  "value": "Волхва̀ валаа́ма проречє́нїѧ и҆сполне́нїе прїе́млютъ: персі́дскими бо чꙋдесы̀ ѡ҆блїѧ́ни бы́вше, ѕвѣзды̀ неѻбы́чныѧ ѡ҆сїѧ́нїемъ, незаходи́магѡ сл҃нца хрⷭ҇та̀ ѡ҆сїѧ́ни бы́вше, въ виѳлее́мѣ воплоще́ннаго бг҃а цр҃ѧ̀, и҆ во́льнаго мертвеца̀ дармѝ назна́менаютъ."
 },
 {
  "type": "HEADER",
  "value": "На стїхо́внѣ стїхи́ры, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Просїѧва́етъ ѕвѣзда̀, ᲂу҆жѐ ражда́емаго въ верте́пѣ прозна́менꙋѧ: па́стырїе со а҆́гг҃лы, волсвѝ съ да̑ры; предвари́ти потщи́тесѧ."
 },
 {
  "type": "TEXT",
  "value": "Сті́хъ: Бг҃ъ ѿ ю҆́га прїи́детъ, и҆ ст҃ы́й и҆зъ горы̀ приѡсѣне́нныѧ ча́щи."
 },
 {
  "type": "TEXT",
  "value": "Да прⷪ҇ро́чєскаѧ и҆спо́лнитъ проречє́нїѧ, въ виѳлее́мѣ ражда́етсѧ, и҆ є҆де́мъ ѿверза́етъ сꙋ́щымъ и҆зъ а҆да́ма гдⷭ҇ь."
 },
 {
  "type": "TEXT",
  "value": "Сті́хъ: Гдⷭ҇и, ᲂу҆слы́шахъ слꙋ́хъ тво́й, и҆ ᲂу҆боѧ́хсѧ: гдⷭ҇и, разꙋмѣ́хъ дѣла̀ твоѧ̑, и҆ ᲂу҆жасо́хсѧ."
 },
 {
  "type": "TEXT",
  "value": "Пома́жи мѵ́ромъ, виѳлее́ме, ꙗ҆́сли ст҃і́и: въ тебѣ́ бо влⷣка простре́ти и҆́мать лꙋчѝ своегѡ̀ бжⷭ҇тва̀."
 },
 {
  "type": "HEADER",
  "value": "Сла́ва, и҆ ны́нѣ. Подо́бенъ то́йже:"
 },
 {
  "type": "TEXT",
  "value": "Прїиди́те, земноро́днїи, согла́снѡ дв҃ꙋ бцⷣꙋ марі́ю да воспое́мъ непреста́ннѡ, и҆зъ неѧ́же хрⷭ҇то́съ ражда́етсѧ."
 }
]