ponomar-pwa/static/data/shared/services/canons/paraclete/tone4/fri.json

[
 {
  "type": "TEXT",
  "value": "Канѡ́нъ чⷭ҇тно́мꙋ и҆ животворѧ́щемꙋ крⷭ҇тꙋ̀, гла́съ д҃, творе́нїе і҆ѡ́сифово, є҆гѡ́же краегране́сїе сїѐ:"
 },
 {
  "type": "TEXT",
  "value": "Крⷭ҇тꙋ̀ пригвожде́нъ хрⷭ҇то́съ, пре́лесть разрѣша́етъ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Ѿве́рзꙋ ᲂу҆ста̀ моѧ̑ и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀."
 },
 {
  "type": "TEXT",
  "value": "На крⷭ҇тѣ̀ распросте́рлъ є҆сѝ бж҃е́ствєнныѧ дла̑ни, долготерпѣли́ве, и҆ погиба́ющїй мі́ръ призва́лъ є҆сѝ къ позна́нїю держа́вы твоеѧ̀, ще́дре. Тѣ́мже велича́емъ бл҃гоꙋтро́бїе твоѐ."
 },
 {
  "type": "TEXT",
  "value": "Ѕмі́ѧ воздви́глъ є҆́сть мѡѷсе́й, проѡбразꙋ́ѧ бж҃е́ственное твоѐ распѧ́тїе, сло́ве пребезнача́льне, и҆́мже падѐ ꙗ҆дови́тый ѕмі́й паде́нїю а҆да́мовꙋ хода́тай бы́вый."
 },
 {
  "type": "TEXT",
  "value": "Мч҃нченъ: Во свѣ́тлостехъ ст҃ы́хъ ны́нѣ жи́ти сподо́бистесѧ мч҃нцы, непоколеби́мое прїе́мше ꙗ҆́вѣ црⷭ҇тво, ꙗ҆́коже сказа̀ па́ѵелъ, и҆ сла́вы соприча̑стницы хрⷭ҇то́вы бы́сте."
 },
 {
  "type": "TEXT",
  "value": "Мч҃нченъ: Воздвиза́емыми волна́ми нестерпи́мыхъ мꙋче́нїй ва́шихъ, непогрꙋ́зимь бы́сть кора́бль, мч҃нцы: ѡ҆кормле́нїемъ бо всѣ́хъ цр҃ѧ̀, въ приста́нище доспѣ́сте поко́ищное."
 },
 {
  "type": "TEXT",
  "value": "Бг҃оро́диченъ: Ѻ҆рꙋ́жїе, ꙗ҆́коже речѐ сѷмеѡ́нъ, се́рдце твоѐ про́йде, є҆гда̀ ви́дѣла є҆сѝ хрⷭ҇та̀ распина́ема, дв҃о влⷣчце, и҆ є҆ди́наго пробода́ема копїе́мъ. Тѣ́мже рыда́ющи болѣ̑зни претерпѣ́ла є҆сѝ."
 },
 {
  "type": "HEADER",
  "value": "И҆́нъ канѡ́нъ прест҃ѣ́й бцⷣѣ. Гла́съ д҃."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ты̀ є҆ди́на застꙋпле́нїе, и҆ прибѣ́жище, и҆ храни́тельница є҆сѝ рабѡ́мъ твои̑мъ бг҃ороди́тельнице чⷭ҇таѧ. Сегѡ̀ ра́ди припа́дающе вопїе́мъ тѝ: сп҃сѝ на́съ влⷣчце, млⷭ҇рдїемъ твои́мъ."
 },
 {
  "type": "TEXT",
  "value": "Ѡ҆свѧтѝ влⷣчце ѡ҆скверне́нное се́рдце моѐ, ꙗ҆́же прест҃о́е сло́во ро́ждшаѧ, и҆ сꙋ́щи всѣ́хъ ст҃ѣ́йшаѧ вы́шнихъ си́лъ, ѻ҆трокови́це всенепоро́чнаѧ."
 },
 {
  "type": "TEXT",
  "value": "Па́дшихъ воззва́нїе, и҆ стоѧ́щихъ є҆сѝ ᲂу҆твержде́нїе, всенепоро́чнаѧ. Тѣ́мже молю́сѧ тѝ: па́дшїй мо́й ᲂу҆́мъ грѣхо́мъ и҆спра́ви влⷣчце, да сла́влю тѧ̀."
 },
 {
  "type": "TEXT",
  "value": "Ме́ртва мѧ̀ скорбьмѝ и҆ недѣ́йственна лежа́ща, рꙋ́кꙋ просте́рши по́мощи твоеѧ̀ возста́ви, и҆ бж҃е́ственнагѡ весе́лїѧ и҆спо́лнена покажи́ мѧ, бг҃ороди́тельнице."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ въ бж҃е́ственнѣй твое́й сла́вѣ вѣнцє́въ сла́вы сподо́би."
 },
 {
  "type": "TEXT",
  "value": "Ꙗ҆́кѡ ѻ҆вча̀ на заколе́нїе ведѧ́хꙋ тѧ̀ хрⷭ҇тѐ, лю́дїе пребеззако́ннїи, а҆́гнца бж҃їѧ сꙋ́ща, и҆ хотѧ́ща и҆зба́вити ѻ҆́вцы ѿ во́лка лю́тагѡ, и҆̀хже чл҃вѣколю́бнѣ возлюби́лъ є҆сѝ."
 },
 {
  "type": "TEXT",
  "value": "Предста́лъ є҆сѝ сꙋдїѝ сꙋди́мь непра́веднѡ, сꙋдѧ́й пра́веднѡ все́й землѝ, и҆ претерпѣ́лъ є҆сѝ ᲂу҆даре́нїе въ лани́тꙋ, свободи́ти мѧ̀ хотѧ̀ порабоще́ннаго гдⷭ҇и, лꙋка́вомꙋ мїроде́ржцꙋ."
 },
 {
  "type": "TEXT",
  "value": "Мч҃нченъ: Страда́вше ст҃і́и зако́ннѡ, беззакѡ́нныѧ врагѝ посрами́сте, и҆ во́лею ᲂу҆мерщвлѧ́еми за всѣ́хъ воста́нїе, и҆ и҆̀же сме́рть и҆схода́таившаго побори́сте ѕмі́ѧ."
 },
 {
  "type": "TEXT",
  "value": "Мч҃нченъ: Ѿ земны́хъ возвы́сившесѧ, ко бл҃госла́вїю же прише́дше страда́льчески мч҃нцы ст҃і́и, и҆ къ невеще́ствєннымъ чинѡ́мъ веще́ственнїи соедини́шасѧ, ра́дости неизрече́нныѧ и҆сполнѧ́еми."
 },
 {
  "type": "TEXT",
  "value": "Бг҃оро́диченъ: И҆з̾ тебѐ дв҃о, ѡ҆бновле́нїе є҆́ѵѣ ꙗ҆ви́сѧ вои́стиннꙋ, бг҃ъ пло́тїю ражда́емь, и҆ на крⷭ҇тъ возвыша́емь, низлага́ѧ бѣ́сы, бг҃обл҃года́тнаѧ влⷣчце."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Поми́лꙋй пречⷭ҇таѧ дв҃о, въ пꙋчи́нѣ жите́йстей лю́тѣ мѧ̀ потоплѧ́ема, и҆ ко приста́нищꙋ ти́хомꙋ сп҃се́нїѧ и҆спра́ви: тѧ́ бо є҆ди́нꙋ наде́ждꙋ стѧжа́хъ."
 },
 {
  "type": "TEXT",
  "value": "Оу҆ма̀ моегѡ̀ тьмꙋ̀ разорѝ, бцⷣе, свѣ́томъ и҆́же въ тебѣ̀ ꙗ҆́кѡ бл҃га, и҆ молю́сѧ: покаѧ́нїѧ мѧ̀ ѡ҆́бразы ᲂу҆твердѝ ꙗ҆́кѡ ще́дра, и҆ многомлⷭ҇тива, да сп҃са́емь ᲂу҆бл҃жа́ю тѧ̀."
 },
 {
  "type": "TEXT",
  "value": "Кропле́нїемъ млⷭ҇ти твоеѧ̀, дв҃о бг҃ора́дованнаѧ, ᲂу҆́глїе погасѝ мои́хъ страсте́й: и҆ ᲂу҆га́сшїй свѣти́льникъ се́рдца моегѡ̀ возжзѝ, златы́й свѣ́щнице всенепоро́чнаѧ."
 },
 {
  "type": "TEXT",
  "value": "Болѧ́щꙋю лю́тѣ страстьмѝ ѻ҆каѧ́ннꙋю мою̀ дꙋ́шꙋ, бг҃ороди́тельнице, ꙗ҆́кѡ млⷭ҇тиваѧ посѣтѝ, и҆ сп҃си́ мѧ мл҃твами твои́ми: ꙗ҆́кѡ да живо́тъ лꙋ́чшїй полꙋчи́въ велича́ю тѧ̀."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ, тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й гдⷭ҇и."
 },
 {
  "type": "TEXT",
  "value": "Да ѿпꙋ́стиши мѧ̀ ѿ ᲂу҆́зъ грѣхо́вныхъ, чл҃вѣколю́бче, твое́ю во́лею свѧ́занъ бы́лъ є҆сѝ, и҆ на крⷭ҇тѣ̀ ᲂу҆́мерлъ є҆сѝ ꙗ҆́кѡ ѕлодѣ́й: сла́ва мно́гомꙋ бл҃гоꙋтро́бїю твоемꙋ̀."
 },
 {
  "type": "TEXT",
  "value": "Ꙗ҆́звы претерпѣ́лъ є҆сѝ сло́ве бж҃їй, и҆ поно́снꙋю сме́рть, ѡ҆безсме́ртствꙋѧ сꙋщество̀ земны́хъ ᲂу҆мерщвле́ное страстьмѝ: сла́ва мно́гомꙋ бл҃гоꙋтро́бїю твоемꙋ̀."
 },
 {
  "type": "TEXT",
  "value": "Мч҃нченъ: И҆̀же ра́дѡванїѧ бж҃їѧ хотѧ́ще наслѣ́довати дх҃омъ всест҃ы́мъ, ра́достною дꙋше́ю ра̑ны претерпѣ́ша, и҆ нꙋ́жднꙋю сме́рть мч҃нцы, и҆ лꙋка́ваго ᲂу҆ѧзви́ша."
 },
 {
  "type": "TEXT",
  "value": "Мч҃нченъ: Рꙋ́цѣ ѿсѣца́еми, и҆ главы̑, и҆ ѧ҆зы́ки ᲂу҆рѣ́заеми, бг҃осло́внїи, и҆ ѻ҆́чи лиша́еми свѣ́та, и҆ на ᲂу҆́ды ссѣца́еми мч҃нцы, не ѿсѣ́чени же ѿ бг҃а пребы́сте."
 },
 {
  "type": "TEXT",
  "value": "Бг҃оро́диченъ: Раздра́сѧ рꙋкописа́нїе а҆да́мово, копїе́мъ прободе́нꙋ тѝ влⷣко, бцⷣа вопїѧ́ше ᲂу҆ крⷭ҇та̀ предстоѧ́щи, гдⷭ҇и, и҆ болѣ́зненнѡ восклица́ющи."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ꙗ҆́же всенепоро́чнаѧ мт҃и бж҃їѧ, возсїѧ́й мѝ покаѧ́нїѧ зарю̀, разрꙋшѝ мра́къ ѻ҆каѧ́нныѧ моеѧ̀ дꙋшѝ, и҆ лꙋка̑ваѧ помышлє́нїѧ се́рдца моегѡ̀ ѿженѝ, дв҃о."
 },
 {
  "type": "TEXT",
  "value": "Ꙗ҆́же бл҃гопремѣ́ннаго и҆ бл҃гоꙋвѣ́тливаго, пречⷭ҇таѧ, влⷣкꙋ ро́ждши, дв҃омт҃и, ꙗ҆́кѡ бл҃га́ѧ, ѡ҆ на́съ того̀ молѝ всегда̀, ѿ чꙋжда́гѡ и҆зба́вити на́съ."
 },
 {
  "type": "TEXT",
  "value": "Тѧ̀ ѡ҆чисти́лище всѣ́хъ человѣ́кѡвъ, вѣ́рою молю̀ и҆ прошꙋ̀ бл҃гослове́ннаѧ: млⷭ҇тива мнѣ̀ сꙋдїю̀ сн҃а твоего̀ сотворѝ, ꙗ҆́кѡ да во хвале́нїи сла́влю тѧ̀."
 },
 {
  "type": "TEXT",
  "value": "И҆мѣ́ѧ тѧ̀, пречⷭ҇таѧ, помо́щницꙋ всегда̀ никогѡ̀ ᲂу҆бою́сѧ, и҆лѝ ᲂу҆страшꙋ́сѧ: кто́ же ли хотѧ̀ скѡ́рбнаѧ принестѝ рабꙋ̀ твоемꙋ̀, и҆ не ᲂу҆страши́тсѧ;"
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ."
 },
 {
  "type": "TEXT",
  "value": "Ви́дѣвшее тѧ̀ сл҃нца на крⷭ҇тѣ̀ простира́ема, со́лнце скры̀ лꙋчы̀, сїѧ́ти не могꙋ́щее, тебѣ̀ сп҃се заше́дшꙋ, и҆ просвѣща́ющꙋ и҆̀же въ нощѝ пре́лести спѧ́щыѧ, покланѧ́ющыѧсѧ держа́вѣ твое́й."
 },
 {
  "type": "TEXT",
  "value": "Распина́емь за млⷭ҇рдїе, гдⷭ҇и, и҆ сп҃са́еши мѧ̀, ѻ҆́цта и҆ же́лчи прїе́млеши вкꙋше́нїе, сла́стнагѡ и҆збавлѧ́ѧ на́съ вкꙋше́нїѧ ꙗ҆́кѡ бл҃гъ, и҆́мже прельсти́хомсѧ, и҆ тлѝ подпадо́хомъ."
 },
 {
  "type": "TEXT",
  "value": "Мч҃нченъ: Пре́лести разори́сте зи́мꙋ, бж҃е́ственнїи мч҃нцы, дх҃а ст҃а́гѡ теплото́ю, и҆ къ веснѣ̀ поко́ѧ ра́дꙋющесѧ доидо́сте кꙋ́пнѡ, всѣ̑мъ помога́юще сꙋ́щымъ въ ско́рбехъ."
 },
 {
  "type": "TEXT",
  "value": "Мч҃нченъ: Тꙋ́чами бж҃е́ственныѧ кро́ве зе́млю всю̀ напои́сте, и҆зсꙋша́юще пото́ки безбо́жїѧ, ст҃і́и мч҃нцы: тѣ́мже къ водѣ̀ живо́тнѣй ны́нѣ всели́стесѧ, ѡ҆ всѣ́хъ молѧ́щесѧ."
 },
 {
  "type": "TEXT",
  "value": "Бг҃оро́диченъ: Пло́тїю є҆го́же родила̀ сн҃а, бг҃ора́дованнаѧ, ꙗ҆́кѡ ви́дѣ на дре́вѣ возвы́шена, пла́чемъ и҆спо́лнисѧ, и҆ долготерпѣ́нїю є҆гѡ̀ дивлѧ́шесѧ вои́стиннꙋ: тѣ́мже велича́ше є҆гѡ̀ снизхожде́нїе."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Оу҆мерщвле́нъ страстьмѝ и҆ скве́рнами всенепоро́чнаѧ, къ щедро́тамъ твои̑мъ прибѣга́ю, и҆ къ те́пломꙋ твоемꙋ̀ притека́ю, влⷣчце, покро́вꙋ и҆ по́мощи: жи́знь є҆ди́на ро́ждшаѧ, се́рдце моѐ ѡ҆живѝ."
 },
 {
  "type": "TEXT",
  "value": "Просвѣтѝ ѡ҆мраче́нное моѐ се́рдце, пречⷭ҇таѧ, ꙗ҆́же свѣтода́вца ро́ждшаѧ, бг҃а вкꙋ́пѣ и҆ чл҃вѣ́ка: є҆го́же ꙗ҆́кѡ мт҃и ᲂу҆молѝ, пода́ти мѝ и҆збавле́нїе, гпⷭ҇жѐ, пре́жде стра́шнагѡ днѐ."
 },
 {
  "type": "TEXT",
  "value": "Оу҆ма̀ моегѡ̀ ᲂу҆врачꙋ́й сокрꙋшє́нїѧ, всенепоро́чнаѧ, и҆сцѣлѝ стра̑сти дꙋшѝ моеѧ̀, и҆ ᲂу҆ны́нїѧ тьмꙋ̀ ѿженѝ: ꙗ҆́кѡ да во хвале́нїи тѧ̀ пою̀ приснобл҃же́ннꙋю, бцⷣе всепѣ́таѧ."
 },
 {
  "type": "TEXT",
  "value": "Низложѝ влⷣчце, врагѡ́въ мои́хъ шата̑нїѧ: тѧ́ бо є҆ди́нꙋ и҆́мамъ предста́тельницꙋ и҆ наде́ждꙋ, и҆ по́мощь крѣ́пкꙋю, ты́ мѧ соблюдѝ, чⷭ҇таѧ, всѧ́кагѡ и҆збавлѧ́ющи мѧ̀ тѣ́хъ нахожде́нїѧ."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Бж҃е́ственное сїѐ и҆ всечестно́е соверша́юще пра́зднество бг҃омꙋ́дрїи бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ."
 },
 {
  "type": "TEXT",
  "value": "Болѣ́зньми, ꙗ҆̀же претерпѣ́лъ є҆сѝ распина́емь, бѡлѣ́зни ᲂу҆ста́вилъ є҆сѝ человѣ́чествꙋ, и҆ къ неболѣ́зненномꙋ житїю̀ всѣ́хъ приво́диши, бл҃гоꙋтро́бне гдⷭ҇и."
 },
 {
  "type": "TEXT",
  "value": "Со́лнца лꙋчы̀ скрыва́хꙋсѧ, цр҃ко́внаѧ же свѣ́тлость раздира́шесѧ, и҆ землѧ̀ трѧса́шесѧ, ка́менїе стра́хомъ распада́шесѧ, на крⷭ҇тѣ̀ зижди́телѧ зрѣ́ти не могꙋ́ще."
 },
 {
  "type": "TEXT",
  "value": "Мч҃нченъ: Ме́ртвъ ѕмі́й бы́сть, мꙋ́ками ᲂу҆мерщвлѧ́емы зрѧ̀ бж҃е́ствєнныѧ мч҃нки, и҆ живо́тъ вѣ́чный наслѣ́дꙋющыѧ вои́стиннꙋ, бж҃е́ственною бл҃года́тїю."
 },
 {
  "type": "TEXT",
  "value": "Мч҃нченъ: Мнѡ́гїѧ мꙋ̑ки претерпѣ́сте, мнѡ́гїѧ и҆ вѣнцы̀ ᲂу҆лꙋчи́сте, многочи́слєннаѧ мно́жєства мч҃нкъ при́снѡ живꙋ́щихъ: тѣ́мже ѕѡ́лъ мои́хъ мно́жество ѿжени́те."
 },
 {
  "type": "TEXT",
  "value": "Бг҃оро́диченъ: Приста́нище бꙋ́ди мѝ, всенепоро́чнаѧ, въ пꙋчи́нѣ лю́тыхъ пла́вающꙋ, ꙗ҆́же бѣ́дствꙋющꙋю всю̀ тва́рь ржⷭ҇тво́мъ твои́мъ бг҃ороди́тельнице, сп҃сла̀ є҆сѝ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ."
 },
 {
  "type": "TEXT",
  "value": "Возсїѧ́й мѝ покаѧ́нїѧ зарю̀, влⷣчце, и҆ ѻ҆́блаки ѕлы́хъ помышле́нїй мои́хъ разорѝ, ѻ҆́блаче сл҃нца пра́веднагѡ приснодв҃о."
 },
 {
  "type": "TEXT",
  "value": "Оу҆толѝ страсте́й мои́хъ свирѣ́пꙋю во́лнꙋ, и҆ бꙋ́рю ѕлы́хъ помышле́нїй ᲂу҆кротѝ, приста́нище вели́кое ѡ҆бꙋрева́емыхъ приснодв҃о."
 },
 {
  "type": "TEXT",
  "value": "Напо́й мѧ̀ ᲂу҆миле́нїѧ питїе́мъ, влⷣчце, сле́зъ рѣ́ки мнѣ̀ ны́нѣ подаю́щи: и҆́миже ᲂу҆гашꙋ̀ пла́мень вѣ́чнꙋющїй, є҆ди́на всепѣ́таѧ."
 },
 {
  "type": "TEXT",
  "value": "И҆зсꙋша́ющи ѕѡ́лъ мои́хъ свирѣ́пꙋю пꙋчи́нꙋ, ро́ждшаѧ бл҃гости вои́стиннꙋ пꙋчи́нꙋ, наста́ви мѧ̀ ко приста́нищꙋ бж҃е́ственныѧ во́ли."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Побѣжде́нъ бы́сть сопротивобо́рецъ, и҆ паде́сѧ ди́внымъ паде́нїемъ, возне́сшꙋсѧ хрⷭ҇тꙋ̀ на дре́во, и҆ сп҃се́сѧ пре́жде ѡ҆сꙋжде́нный, вопїѧ̀ є҆мꙋ̀: и҆́же ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Оу҆мерщвле́на мѧ̀ дре́вомъ ѡ҆живи́лъ є҆сѝ на дре́вѣ хрⷭ҇тѐ ᲂу҆ме́рый, и҆ бж҃е́ственными ᲂу҆́бѡ ра́нами твои́ми стрꙋ́пы се́рдца моегѡ̀ и҆сцѣли́лъ є҆сѝ: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Мч҃нченъ: Да́ръ прїе́мше и҆сцѣле́нїѧ, и҆сцѣлѧ́ти недꙋ́ги, и҆ бѣ́сы ѿ человѣ̑къ ѿгонѧ́ти си́лою дх҃о́вною, и҆сцѣли́те стра̑сти се́рдца моегѡ̀ ва́шими мл҃твами мч҃нцы непобѣди́мїи."
 },
 {
  "type": "TEXT",
  "value": "Мч҃нченъ: И҆стоплє́нїѧ под̾е́мый бори́тель, кровьмѝ ва́шими погиба́ше со тьма́ми є҆гѡ̀. Вы́ же всехва́льнїи мч҃нцы, ра́дꙋющесѧ воспѣва́ете: и҆́же ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ."
 },
 {
  "type": "TEXT",
  "value": "Бг҃оро́диченъ: Невѣ́ста непоро́чнаѧ, пала́та зижди́телѧ, землѐ недѣ́ланнаѧ, прⷭ҇то́лъ ѻ҆гнезра́ченъ ꙗ҆ви́ласѧ є҆сѝ, пречⷭ҇таѧ. Тѣ́мже вопїе́мъ тѝ: ра́дꙋйсѧ, пречⷭ҇таѧ влⷣчце, ꙗ҆́же человѣ́ки ѡ҆божи́вшаѧ бж҃їимъ твои́мъ ржⷭ҇тво́мъ."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ: Сп҃сы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ."
 },
 {
  "type": "TEXT",
  "value": "Любо́вїю притека́ю мно́гою под̾ ст҃ы́й тво́й покро́въ, не ѿвратѝ менѐ тща̀: но да́ждь мѝ, пречⷭ҇таѧ, ѡ҆ставле́нїе прегрѣше́нїй, и҆ сп҃си́ мѧ, да ви́дѣвше вразѝ моѝ посра́мѧтсѧ."
 },
 {
  "type": "TEXT",
  "value": "Не ᲂу҆бою́сѧ ѕла̀, ты́ бо со мно́ю є҆сѝ дв҃о: поженꙋ̀ врагѝ, ꙗ҆̀же неща́днѡ менѐ гонѧ́щыѧ, и҆ побѣждꙋ̀ си́лою твое́ю ᲂу҆крѣплѧ́емь, мр҃і́е бг҃ороди́тельнице."
 },
 {
  "type": "TEXT",
  "value": "И҆́маши є҆́же мощѝ при́снѡ всѣ́хъ, ꙗ҆́кѡ ро́ждши влⷣкꙋ, влады́чествїѧ мѧ̀ сла́стнагѡ и҆ страсте́й свободѝ, да пою̀ ра́дꙋѧсѧ: ра́дꙋйсѧ прⷭ҇то́ле вы́шнѧгѡ, бл҃гослове́ннаѧ."
 },
 {
  "type": "TEXT",
  "value": "Тѧ̀ є҆ди́нꙋ покрови́тельницꙋ и҆́мамъ на землѝ тво́й ра́бъ, и҆ по́мощь вои́стиннꙋ сп҃си́тельнꙋю и҆ тве́рдꙋю, пречⷭ҇таѧ, бг҃опросла́вленнаѧ: и҆ къ тебѣ̀ прибѣга́ю, сп҃си́ мѧ ѿ сѣ́тей ловѧ́щихъ, бг҃ороди́тельнице."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки."
 },
 {
  "type": "TEXT",
  "value": "Разрѣша́еши мѧ̀ ѿ ᲂу҆́зъ лѣ́тныхъ, въ лѣ́то безлѣ́тный бы́въ, свѧ́занъ же бы́въ во́лею, го́рдаго ᲂу҆́замъ нерѣши̑мымъ ѿсла́лъ є҆сѝ влⷣко, и҆ сп҃са́еши мѧ̀ крⷭ҇то́мъ и҆ стрⷭ҇тїю: тѣ́мже бл҃гословлю́ тѧ, хрⷭ҇тѐ, во вѣ́ки."
 },
 {
  "type": "TEXT",
  "value": "Воздви́гсѧ на дре́во во́лею, и҆ всю̀ тва́рь совоздви́глъ є҆сѝ, сло́ве препѣ́тый, безнача́льне и҆ неви́диме, и҆́же нача̑ла и҆ вла̑сти тьмы̀ стрⷭ҇тїю твое́ю, хрⷭ҇тѐ, ѡ҆бличи́лъ є҆сѝ: тѣ́мже тѧ̀ пое́мъ во всѧ̑ вѣ́ки."
 },
 {
  "type": "TEXT",
  "value": "Мч҃нченъ: Всѣдо́сте на кро́вь свою̀ ꙗ҆́кѡ на колесни́цꙋ, мч҃нцы всекра́снїи, и҆ къ премі̑рнымъ взѧ́ти бы́сте селе́нїємъ, ѿ хрⷭ҇та̀ достѡ́йныѧ по́чєсти прїе́млюще, гдⷭ҇а по́йте, вопїю́ще, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Мч҃нченъ: На древа̀ возвыша́еми, и҆ въ ро́въ вмета́еми, ѕвѣрє́мъ же вдава́еми, во ѻ҆́гнь же и҆ въ во́дꙋ раздѣле́ни быва́юще, стрⷭ҇тоно́сцы мч҃нцы, ра́дꙋющесѧ поѧ́хꙋ: гдⷭ҇а по́йте, и҆ превозноси́те є҆го̀ во вѣ́ки."
 },
 {
  "type": "TEXT",
  "value": "Бг҃оро́диченъ: Ви́дѣвши ᲂу҆снꙋ́вша на дре́вѣ хрⷭ҇та̀, всѣ̑мъ бо́дрость подаю́щаго бж҃е́ственнꙋю и҆ сп҃си́тельнꙋю, мт҃и всенепоро́чнаѧ, восклица́нїемъ рыда́ше и҆ взыва́ше: что̀ сїѐ новѣ́йшее чꙋ́до; ѡ҆живлѧ́ѧй всѧ̑, ᲂу҆мира́етъ хотѧ̀."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Блꙋ́днѡ житїѐ и҆жди́въ, и҆ всѧ́кꙋю нечистотꙋ̀ содѣ́лавъ, трепе́щꙋ сꙋди́ща, трепе́щꙋ и҆стѧза́нїѧ, трепе́щꙋ и҆ ѿвѣ́та ѡ҆сꙋжде́нїѧ моегѡ̀, чⷭ҇таѧ: ꙗ҆́же сꙋдїю̀ ро́ждшаѧ, предста́ни мѝ тогда̀, и҆ и҆зба́ви мѧ̀ нꙋ́жды."
 },
 {
  "type": "TEXT",
  "value": "На тѧ̀ всю̀ наде́ждꙋ сп҃се́нїѧ моегѡ̀ возложи́хъ, бг҃омт҃и неискꙋсобра́чнаѧ, и҆ тебѐ на по́мощь призыва́ю всегда̀: сп҃си́ мѧ ѿ печа́лей и҆ напа́стей врага̀, и҆ разрѣшѝ плени̑цы ѕѡ́лъ мои́хъ, и҆ вѣ́чныѧ тьмы̀ и҆схити́ мѧ."
 },
 {
  "type": "TEXT",
  "value": "Въ ча́съ, дв҃о, конца̀ моегѡ̀ рꙋкѝ бѣсо́вскїѧ мѧ̀ и҆схитѝ, и҆ сꙋда̀ и҆ прѣ́нїѧ, и҆ стра́шнагѡ и҆спыта́нїѧ, и҆ мыта́рствъ го́рькихъ, и҆ кнѧ́зѧ лю́тагѡ, бг҃ома́ти, и҆ вѣ́чнагѡ ѡ҆сꙋжде́нїѧ."
 },
 {
  "type": "TEXT",
  "value": "Соблюдѝ раба̀ твоего̀, дв҃о, ѿ всѧ́кагѡ навѣ́та чꙋжда́гѡ, тѧ́ бо и҆́мамъ влⷣчце, покро́въ и҆ застꙋпле́нїе, прибѣ́жище и҆ ᲂу҆твержде́нїе: и҆ тебѐ ра́ди ча́ю и҆зба́витисѧ сѣ́тей врага̀, є҆ди́на предста́тельнице ро́да человѣ́ческагѡ."
 },
 {
  "type": "TEXT",
  "value": "Та́же, пое́мъ пѣ́снь бцⷣѣ: Вели́читъ дꙋша̀ моѧ̀ гдⷭ҇а:"
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ бцⷣе, чⷭ҇таѧ приснодв҃о."
 },
 {
  "type": "TEXT",
  "value": "Стоѧ́ше сꙋди́мь чл҃вѣколю́бче, и҆́же сꙋди́ти хотѧ́й всѣ̑мъ: вѣнце́мъ же терно́вымъ ᲂу҆вѧ́злсѧ є҆сѝ хоти́тельнѣ, сп҃се свое́ю во́лею, преслꙋша́нїѧ, хрⷭ҇тѐ, тє́рнїѧ и҆з̾ ко́рене и҆стерза́ѧ, всѣ̑мъ же насажда́ѧ твоегѡ̀ бл҃гоꙋтро́бїѧ позна́нїе."
 },
 {
  "type": "TEXT",
  "value": "Ѽ ка́кѡ лю́дїе беззако́ннїи, за́вистїю сꙋ́ще ѡ҆мраче́ни, пра́ведна сꙋ́ща, и҆ непоро́чна тѧ̀, свѣтода́вче крⷭ҇тꙋ̀ предаю́тъ; є҆гѡ́же стрⷭ҇ть со́лнце зрѧ̀ помрача́шесѧ, и҆ свѣ́тлость цр҃ко́внаѧ раздира́шесѧ, и҆ колеба́хꙋсѧ ѡ҆снова̑нїѧ землѝ."
 },
 {
  "type": "TEXT",
  "value": "Мч҃нченъ: Соѡбра́зни стрⷭ҇те́мъ хрⷭ҇тѡ́вымъ бы́сте ст҃і́и мч҃нцы, и҆ снаслѣ̑дницы црⷭ҇твїѧ и҆ свѣ́тлости: тѣ́мже просвѣти́те премꙋ́дрїи, пѣвцы̀ ва́шѧ, грѣхо́внагѡ мра́ка свобожда́юще, и҆ разли́чныхъ ѡ҆бстоѧ́нїй."
 },
 {
  "type": "TEXT",
  "value": "Мч҃нченъ: Оу҆жѐ въ са̑маѧ премꙋ́дрїи нбⷭ҇наѧ все́льшесѧ, сла́вꙋ же прїе́мше присносꙋ́щнꙋю, и҆ прича́стїи сщ҃е́нными ѡ҆божа́еми, помѧни́те всѣ́хъ на́съ, чтꙋ́щихъ вѣ́рою всесщ҃е́ннꙋю и҆ честнꙋ́ю ва́шꙋ па́мѧть, присносла́внїи."
 },
 {
  "type": "TEXT",
  "value": "Бг҃оро́диченъ: Просвѣтѝ, чⷭ҇таѧ, любо́вїю воспѣва́ющихъ и҆ велича́ющихъ тѧ̀, разрѣшѝ страсте́й на́шихъ тьмꙋ̀, ѻ҆трокови́це, ᲂу҆кротѝ бꙋ́рю и҆ лꙋка́вагѡ собла́зны ѿ среды̀ ѿженѝ, ты̀, ѻ҆трокови́це, мл҃твами твои́ми."
 },
 {
  "type": "HEADER",
  "value": "И҆́нъ"
 },
 {
  "type": "TEXT",
  "value": "І҆рмо́съ то́йже."
 },
 {
  "type": "TEXT",
  "value": "Ра́дꙋйсѧ, ꙗ҆́же ра́дость ро́ждшаѧ, пречⷭ҇таѧ, сꙋ́щымъ на землѝ вои́стиннꙋ. Ра́дꙋйсѧ, сп҃си́тельное приста́нище, и҆ покро́ве притека́ющихъ къ тебѣ̀. Ра́дꙋйсѧ, лѣ́ствице чⷭ҇таѧ, возвы́сившаѧ па́дшихъ. Ра́дꙋйсѧ, всебл҃же́ннаѧ бцⷣе, ᲂу҆пова́нїе дꙋша́мъ на́шымъ."
 },
 {
  "type": "TEXT",
  "value": "Разрꙋшѝ па́жить грѣха̀ моегѡ̀, ѡ҆скверне́нныѧ моеѧ̀ дꙋшѝ и҆ тѣлесѐ, бг҃ора́дованнаѧ пречⷭ҇таѧ влⷣчце, си́льною мл҃твою твое́ю, ѽ всенепоро́чнаѧ, и҆сцѣле́нїе да́вши сп҃си́тельное, влⷣчнїй стра́хъ бж҃е́ственный."
 },
 {
  "type": "TEXT",
  "value": "Ты̀ мнѣ̀ просвѣще́нїе, ты̀ мѝ и҆збавле́нїе и҆ ра́дованїе, ты̀ побо́рница моѧ̀, ты̀ моѧ̀ сла́ва и҆ похвала̀, и҆ ча́ѧнїе сп҃се́нїѧ моегѡ̀ є҆сѝ всенепоро́чнаѧ, и҆ тебѣ̀ вѣ́рнѡ покланѧ́юсѧ, и҆ вопїю́ ти: сп҃си́ мѧ ѻ҆каѧ́ннаго раба̀ твоего̀, и҆ ѿ вра́тъ а҆́довыхъ и҆схити́ мѧ."
 },
 {
  "type": "TEXT",
  "value": "Сп҃сѝ мѧ̀ чⷭ҇таѧ, сп҃са ро́ждшаѧ и҆ всеще́драго, ᲂу҆ще́дри мѧ̀ раба̀ твоего̀, и҆ къ покаѧ́нїѧ пꙋтѝ наста́ви: лꙋка́вагѡ собла́зны ѿ среды̀ ѿженѝ, и҆ тогѡ̀ ловле́нїѧ и҆зба́ви мѧ̀ и҆ ѻ҆гнѧ̀ вѣ́чнагѡ, пренепоро́чнаѧ, и҆схитѝ мѧ̀."
 }
]