514 lines
48 KiB
JSON
514 lines
48 KiB
JSON
[
|
|
{
|
|
"type": "HEADER",
|
|
"value": "І҆ꙋ́лїа и҃"
|
|
},
|
|
{
|
|
"type": "HEADER",
|
|
"value": "Ст҃а́гѡ бл҃же́ннагѡ проко́пїа, хрⷭ҇та̀ ра́ди ю҆ро́дивагѡ, ᲂу҆́стюжскагѡ чꙋдотво́рца."
|
|
},
|
|
{
|
|
"type": "HEADER",
|
|
"value": "Ве́черъ, Бл҃же́нъ мꙋ́жъ: На Гдⷭ҇и, воззва́хъ, стїхи̑ры, гла́съ и҃."
|
|
},
|
|
{
|
|
"type": "TEXT",
|
|
"value": "Подо́бенъ: Ѽ пресла́внагѡ чꙋдесѐ!"
|
|
},
|
|
{
|
|
"type": "TEXT",
|
|
"value": "Бл҃же́нне проко́пїе бг҃омꙋ́дре, чи́стаѧ твоѧ̀ дꙋша̀ правовѣ̑рнымъ смы́сломъ сїѧ́ющи, ѡ҆блиста́ющи добродѣ́телей свѣтлостьмѝ, ѡ҆зарѧ́етъ вѣ́рныхъ и҆сполне́нїе, бѣсо́вскꙋю тмꙋ̀ ѿгонѧ́щи: тѣ́мже ꙗ҆́кѡ прича́стника тѧ̀ невече́рнѣй благода́ти ᲂу҆блажа́емъ благоче́стнѡ всѝ, досточꙋ́дне."
|
|
},
|
|
{
|
|
"type": "TEXT",
|
|
"value": "И҆мѣ́ѧ дꙋ́шꙋ ми́лостивнꙋ, и҆ чи́стъ по́мыслъ, и҆ се́рдце бо́дро, вѣ́рꙋ небла́зненꙋ, и҆ любо́вь вои́стиннꙋ нелицемѣ́рнꙋ, ѿ землѝ преста́вилсѧ є҆сѝ къ нбⷭ҇нымъ, и҆ съ ли́ки пра́ведныхъ водворѧ́ешисѧ. Тѣ́мже тѧ̀ почита́емъ свѧще́нными пѣ́сньми, и҆ благоче́стнѡ всѝ сла́вимъ, досточꙋ́дне проко́пїе."
|
|
},
|
|
{
|
|
"type": "TEXT",
|
|
"value": "Бжⷭ҇твенными ᲂу҆чє́нїи ᲂу҆крѣплѧ́ѧсѧ, стра̑сти плѡтскі́ѧ ѿ дꙋшѝ ѿгна́лъ є҆сѝ, и҆ ст҃ѣ́й трⷪ҇цѣ селе́нїе преѡчище́ное бы́лъ є҆сѝ. Тѣ́мъ къ бжⷭ҇твеннѣй жи́зни преста́вилсѧ є҆сѝ, бг҃ꙋ соблюда́ющꙋ ны́нѣ невреди́мо твоѐ блаже́нное тѣ́ло, бжⷭ҇твеннымъ сꙋдо́мъ, и҆́мже са́мъ вѣ́сть, прославлѧ́ѧй тѧ̀ ꙗ҆́вѣ, проко́пїе."
|
|
},
|
|
{
|
|
"type": "HEADER",
|
|
"value": "Сла́ва, гла́съ а҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ тече́нїе до́брѣ сконча́вшемꙋ, и҆ вѣ́рꙋ соблю́дшемꙋ непоро́чнꙋ, и҆ врагѝ безплѡ́тныѧ терпѣ́нїемъ свои́мъ попра́вшемꙋ, возложи́сѧ на честны́й тво́й ве́рхъ побѣ́ды вѣне́цъ пресвѣ́телъ, ѿ рꙋкѝ вседержи́телѧ бг҃а, є҆гѡ́же ра́ди мі́ръ и҆ ꙗ҆̀же въ не́мъ сꙋ́єтства преѡби́дѣлъ є҆сѝ: тѣ́мъ и҆ свѧта́ѧ твоѧ̀ чи́стаѧ дꙋша̀ на нб҃са̀ востечѐ ра́дꙋющисѧ, пра́ведныхъ же ли́цы срѣто́ша тѧ̀ веселѧ́щесѧ, и҆ нбⷭ҇наѧ селє́нїѧ свѣ́тлѡ воспрїѧ́ша: блаже́нное же и҆ честно́е тѣ́ло твоѐ на землѝ пребыва́етъ нетлѣ́нно, вѣ̑рнымъ подава́ѧ и҆сцѣле́нїе. Тѣ́мже вѣ́рою пра́вою и҆ те́плымъ жела́нїемъ, свѧто́мꙋ твоемꙋ̀ гро́бꙋ припа́дающе, бг҃омꙋ́дре, проко́пїе, про́симъ и҆спроси́ти ᲂу҆ хрⷭ҇та̀ бг҃а на́шегѡ, гра́дꙋ твоемꙋ̀ непоколеби́мꙋ и҆ безмѧте́жнꙋ пребы́ти ѿ навѣ̑тъ вра́жїихъ, и҆ пога́нскагѡ наше́ствїѧ, ѻ҆те́чествꙋ на́шемꙋ побѣ́ды на врагѝ, ᲂу҆мире́нїѧ мі́рꙋ, и҆ спасе́нїѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ воскре́сенъ."
|
|
},
|
|
{
|
|
"type": "HEADER",
|
|
"value": "Вхо́дъ. Прокі́менъ днѐ. Чтє́нїѧ г҃."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ г҃.)"
|
|
},
|
|
{
|
|
"type": "TEXT",
|
|
"value": "Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ є҃.)"
|
|
},
|
|
{
|
|
"type": "TEXT",
|
|
"value": "Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ."
|
|
},
|
|
{
|
|
"type": "HEADER",
|
|
"value": "Премꙋ́дрости соломѡ́ни чте́нїе. (Глава̀ д҃.)"
|
|
},
|
|
{
|
|
"type": "TEXT",
|
|
"value": "Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀."
|
|
},
|
|
{
|
|
"type": "HEADER",
|
|
"value": "На лїті́и стїхи̑ры, гла́съ в҃:"
|
|
},
|
|
{
|
|
"type": "TEXT",
|
|
"value": "Ю҆ро́дствомъ премꙋ́дрости дости́гъ глꙋбинꙋ̀, преблаже́нне, и҆ ра̑йскаѧ селє́нїѧ наслѣ́дивъ, и҆ ны́нѣ веселѧ́сѧ съ ли́ки првⷣныхъ, и҆ че́сти зрѧ̀ влⷣчнїѧ добро́ты, и҆ со а҆́гг҃лы предстоѧ̀ ст҃ѣ́й трⷪ҇цѣ, помина́й, блаже́нне, всегда̀ чтꙋ́щыѧ па́мѧть твою̀."
|
|
},
|
|
{
|
|
"type": "TEXT",
|
|
"value": "Тѣ́снымъ ше́ствовавъ пꙋте́мъ, дости́глъ є҆сѝ ра́йскїѧ широты̀, ны́нѣ же и҆зрѧ́днѣ наслажда́ѧсѧ нбⷭ҇ныѧ пи́щи, и҆ вѣнце́мъ страда́нїѧ вѣнча́лсѧ є҆сѝ ѿ рꙋкѝ вседержи́телевы. Є҆го́же ны́нѣ молѝ, блаже́нне проко́пїе, ѡ҆ є҆́же сохрани́тисѧ гра́дꙋ твоемꙋ̀ ѿ вра̑гъ ненавѣ́тнꙋ, и҆ дꙋша́мъ на́шымъ дарова́ти ве́лїю ми́лость."
|
|
},
|
|
{
|
|
"type": "TEXT",
|
|
"value": "Ле́гкостїю кри́лъ прелетѣ́въ ѿ многомѧтꙋ́щагѡ, и҆ треволнова́тельнагѡ мі́ра, и҆ внѣ̀ бꙋ́рнагѡ приста́нища дости́гъ, застꙋпа́ѧ ѿ напа́стей всѧ̑ призыва́ющыѧ тѧ̀ вѣ́рнѡ, покрыва́й, преблаже́нне, и҆ на́съ прите́кшихъ въ хра́мъ тво́й. Ѽ преблаже́нне проко́пїе! Спасѝ ста́до твоѐ моли́твами твои́ми ко гдⷭ҇ꙋ."
|
|
},
|
|
{
|
|
"type": "TEXT",
|
|
"value": "Ꙗ҆́кѡ со́лнце свѣтоза́рно, добродѣ́тельнагѡ ра́ди житїѧ̀ твоегѡ̀, повсю́дꙋ просїѧ́лъ є҆сѝ. Хра́мꙋ ᲂу҆́бѡ, и҆дѣ́же лежа́тъ честны̑ѧ твоѧ̑ мо́щи, ꙗ҆́коже ца́рскꙋю и҆мꙋ́щꙋ ᲂу҆́тварь, гра́дꙋ же ᲂу҆́бѡ всю́дꙋ ꙗ҆́кѡ трꙋбѣ̀ велегла́снѡ вопїю́щꙋ и҆ хва́лѧщꙋсѧ, и҆мѣ́ющꙋ въ себѣ̀ процвѣ́тша чꙋде́съ и҆сто́чника неисчерпа́емаго, и҆ и҆з̾ѻби́льнѡ всѣ̑мъ подава́юща бога́тнѡ дарова̑нїѧ чꙋде́съ. Ѽ преблаже́нне, и҆ чꙋдоно́сче проко́пїе! И҆спросѝ моли́твами твои́ми ᲂу҆ хрⷭ҇та̀ бг҃а, є҆́же дарова́ти ѻ҆те́чествꙋ на́шемꙋ посо́бїе на ва́рвары, и҆ и҆̀же твоѐ пра́зднество творѧ́щымъ че́стнѡ, ѡ҆чище́нїе и҆ спасе́нїе дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Добродѣ́телей твои́хъ, бг҃омꙋ́дре, и҆справлє́нїѧ ᲂу҆ѧсни́ша вѣ́рныхъ сердца̀: кто́ бо слы́шавъ безмѣ́рное твоѐ смире́нїе, и҆ терпѣ́нїе, не ᲂу҆диви́тсѧ; є҆́же ко всѣ̑мъ кро́тость и҆ безѕло́бїе, къ скорбѧ́щымъ ми́лованїе, и҆ къ сꙋ́щымъ въ бѣда́хъ ско́рое поможе́нїе, въ пꙋ́ть ше́ствꙋющымъ благо́е поспѣше́нїе, и҆ къ пла́вающымъ немѧте́жное приста́нище: всѧ̑ бл҃голѣ́пнѡ предварѝ, досточꙋ́дне проко́пїе, и҆ ны́нѣ неꙋвѧда́емымъ ѡ҆дѣ́ѧвсѧ вѣнце́мъ ѿ рꙋкѝ вседержи́телѧ бг҃а. Є҆го́же молѝ, спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ:"
|
|
},
|
|
{
|
|
"type": "HEADER",
|
|
"value": "На стїхо́внѣ стїхи̑ры, гла́съ в҃."
|
|
},
|
|
{
|
|
"type": "TEXT",
|
|
"value": "Подо́бенъ: До́ме Є҆ѵфра́ѳовъ:"
|
|
},
|
|
{
|
|
"type": "TEXT",
|
|
"value": "До́мъ и҆ жили́ще дх҃а прест҃а́гѡ, премꙋ́дре проко́пїе, бы́лъ є҆сѝ. Тѣ́мже и҆ на́съ до́мы тогѡ̀ содѣ́лай, свѧтꙋ́ю твою̀ па́мѧть почита́ющихъ."
|
|
},
|
|
{
|
|
"type": "TEXT",
|
|
"value": "Сті́хъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀."
|
|
},
|
|
{
|
|
"type": "TEXT",
|
|
"value": "Житїѐ твоѐ ꙗ҆́кѡ со́лнце въ сердца̀ вѣ́рныхъ возсїѧ̀, чꙋде́съ зарю̀ и҆спꙋща́ѧ: тѣ́мже и҆ на́съ свѣ́томъ невече́рнимъ ѡ҆зарѝ, всечестнꙋ́ю твою̀ па́мѧть почита́ющихъ."
|
|
},
|
|
{
|
|
"type": "TEXT",
|
|
"value": "Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ."
|
|
},
|
|
{
|
|
"type": "TEXT",
|
|
"value": "Не преста́й молѧ́сѧ, проко́пїе, ѡ҆ при́сныхъ твои́хъ рабѣ́хъ, и҆̀хже дꙋхо́внымъ твои́мъ житїе́мъ просвѣти́лъ є҆сѝ, да всѝ честно́е твоѐ ᲂу҆спе́нїе веселѧ́щесѧ почита́емъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ то́йже: Самогла́сенъ:"
|
|
},
|
|
{
|
|
"type": "TEXT",
|
|
"value": "Свѣ́томъ разꙋ́мнымъ ѿ бг҃а просвѣще́нъ, мїрска́гѡ пристра́стїѧ ѿбѣ́глъ є҆сѝ, бꙋ́йство хрⷭ҇та̀ ра́ди стѧжа́въ: тѣ́мъ гра́да на́шегѡ ᲂу҆́стюга застꙋ́пникъ бы́въ, въ не́мже чи́стымъ и҆ непоро́чнымъ житїе́мъ гдⷭ҇еви ᲂу҆годи́лъ є҆сѝ, и҆ мнѡ́гїѧ лю́ди ᲂу҆диви́лъ є҆сѝ чꙋдесы̀, бг҃облаже́нне проко́пїе: но и҆ ны́нѣ и҆мѣ́ѧ дерзнове́нїе ко влⷣцѣ всѣ́хъ хрⷭ҇тꙋ̀ бг҃ꙋ, молѝ ѡ҆ вѣ́рою творѧ́щихъ всечестнꙋ́ю па́мѧть твою̀, и҆ притека́ющихъ со ᲂу҆се́рдїемъ къ чꙋдотво́рномꙋ гро́бꙋ твоемꙋ̀, и҆зба́витисѧ страсте́й, дꙋше́вныхъ же вкꙋ́пѣ и҆ тѣле́сныхъ, и҆ всѧ́кихъ бѣ́дъ и҆ скорбе́й, и҆ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ, бг҃оро́диченъ: Тропа́рь, гла́съ д҃:"
|
|
},
|
|
{
|
|
"type": "TEXT",
|
|
"value": "Просвѣти́всѧ бжⷭ҇твенною бл҃года́тїю, бг҃омꙋ́дре, и҆ ве́сь ра́зꙋмъ въ се́рдцы, ѿ сꙋ́етнагѡ мі́ра сегѡ̀ къ зижди́телю неꙋкло́ннѡ возложи́лъ є҆сѝ, цѣломꙋ́дрїемъ и҆ мно́гимъ терпѣ́нїемъ, во вре́меннѣй жи́зни тече́нїе до́брѣ сконча́въ, и҆ вѣ́рꙋ соблю́лъ є҆сѝ непоро́чнꙋ. Тѣ́мже и҆ по сме́рти ꙗ҆ви́сѧ свѣ́тлость житїѧ̀ твоегѡ̀: и҆сточа́еши бо чꙋдесє́мъ и҆сто́чникъ неисчерпа́емый вѣ́рою притека́ющымъ ко свѧто́мꙋ твоемꙋ̀ гро́бꙋ, проко́пїе всеблаже́нне, молѝ хрⷭ҇та̀ бг҃а, да спасе́тъ дꙋ́шы на́шѧ."
|
|
},
|
|
{
|
|
"type": "HEADER",
|
|
"value": "На ᲂу҆́трени, по а҃-й стїхоло́гїи сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Ѿ ю҆́ности ꙗ҆́кѡ свѣти́льникъ возсїѧ́лъ є҆сѝ, бл҃же́нне, ѕѣ́льнымъ воздержа́нїемъ ᲂу҆мертви́лъ є҆сѝ плотска̑ѧ взыгра̑нїѧ: тѣ́мъ и҆ на высотꙋ̀ восте́клъ є҆сѝ бг҃оразꙋ́мїѧ, пресла́вне, пожи́въ въ мі́рѣ бг҃оꙋго́днѡ, посрами́лъ є҆сѝ бѣсѡ́вскаѧ ѡ҆полчє́нїѧ, проко́пїе всеблаже́нне. Сегѡ̀ ра́ди вопїе́мъ тѝ, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Помышлє́нїѧ нечи̑ста, и҆ ᲂу҆стны̀ льсти̑вы, дѣла́ же моѧ̑ всѧ̑ ѡ҆сквернє́на, и҆ что̀ сотворю̀; ка́кѡ ᲂу҆срѧ́щꙋ сꙋдїю̀; влⷣчце дв҃о, молѝ сн҃а твоего̀ и҆ зижди́телѧ и҆ гдⷭ҇а, ꙗ҆́кѡ да въ покаѧ́нїи прїи́метъ дꙋ́хъ мо́й, ꙗ҆́кѡ є҆ди́нъ бл҃гоꙋтро́бенъ."
|
|
},
|
|
{
|
|
"type": "HEADER",
|
|
"value": "По в҃-й стїхоло́гїи сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Бы́лъ є҆сѝ бездо́менъ на землѝ, бг҃омꙋ́дре проко́пїе, всѧ́ко ѡ҆ѕлобле́нїе претерпѣва́ѧ, дѡ́брыѧ дѣ́тєли, ꙗ҆́коже ѳѷмїа́мъ благово́ненъ, и҆ же́ртвꙋ бл҃гопрїѧ́тнꙋ бг҃ꙋ прине́слъ є҆сѝ. Тѣ́мъ ны́нѣ на нб҃сѝ дерзнове́нїе стѧжа́въ къ немꙋ̀, молѝ дарова́ти согрѣше́нїй ѡ҆чище́нїе вѣ́рою хва́лѧщымъ свѧтꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. Тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ."
|
|
},
|
|
{
|
|
"type": "HEADER",
|
|
"value": "По полѷеле́и сѣда́ленъ, гла́съ и҃:"
|
|
},
|
|
{
|
|
"type": "TEXT",
|
|
"value": "Ꙗ҆́кѡ врача̀ премꙋ́дра, и҆ ᲂу҆го́дника гдⷭ҇нѧ благопрїѧ́тна, къ чꙋдоно́сномꙋ твоемꙋ̀ гро́бꙋ прикаса́ющесѧ, бг҃омꙋ́дре, соше́дшесѧ любо́вїю и҆ вѣ́рою, во ѱалмѣ́хъ и҆ пѣ́нїихъ возра́дꙋемсѧ сла́вѧще хрⷭ҇та̀, таковꙋ́ю благода́ть тебѣ̀ дарова́вшаго и҆сцѣле́нїй, проко́пїе всеблаже́нне. Молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, вѣ́рою и҆ любо́вїю пра́зднꙋющымъ всечестнꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Тѧ̀ мо́лимъ, пречⷭ҇таѧ, предста́тельницꙋ на́шꙋ: смꙋща́ємыѧ въ печа́лехъ не пре́зри до конца̀ поги́бнꙋти рабы̑ твоѧ̑, но ᲂу҆скорѝ и҆з̾ѧ́ти на́съ настоѧ́щагѡ гнѣ́ва и҆ печа́ли, ѽ бг҃ора́дованнаѧ прест҃а́ѧ чⷭ҇таѧ! Ты́ бо на́мъ є҆сѝ стѣна̀ и҆ по́мощь неѡбори́ма."
|
|
},
|
|
{
|
|
"type": "HEADER",
|
|
"value": "Степє́нна, а҃-й а҆нтїфѡ́нъ д҃-гѡ гла́са."
|
|
},
|
|
{
|
|
"type": "TEXT",
|
|
"value": "Прокі́менъ: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀."
|
|
},
|
|
{
|
|
"type": "TEXT",
|
|
"value": "Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀."
|
|
},
|
|
{
|
|
"type": "HEADER",
|
|
"value": "Є҆ѵⷢ҇лїе матѳе́а, зача́ло м҃г."
|
|
},
|
|
{
|
|
"type": "HEADER",
|
|
"value": "По н҃ ѱалмѣ̀ стїхи́ра, гла́съ ѕ҃:"
|
|
},
|
|
{
|
|
"type": "TEXT",
|
|
"value": "Человѣ́че бж҃їй, вѣ́рный ра́бе, ᲂу҆го́дниче хрⷭ҇то́въ, соверши́телю тогѡ̀ бжⷭ҇твенныхъ повелѣ́нїй, мꙋ́же ди́вный въ чꙋдесѣ́хъ, сто́лпе и҆ ᲂу҆твержде́нїе гра́да на́шегѡ, црⷭ҇твїѧ нбⷭ҇нагѡ наслѣ́дниче, бг҃облаже́нне проко́пїе, дерзнове́нїе и҆мѣ́ѧ ко хрⷭ҇тꙋ̀ бг҃ꙋ, не преста́й моли́тисѧ ѡ҆ дꙋша́хъ на́шихъ."
|
|
},
|
|
{
|
|
"type": "HEADER",
|
|
"value": "Канѡ́нъ бцⷣы, со і҆рмосо́мъ на ѕ҃: и҆ ст҃а́гѡ проко́пїа на и҃. Гла́съ в҃."
|
|
},
|
|
{
|
|
"type": "HEADER",
|
|
"value": "Пѣ́снь а҃."
|
|
},
|
|
{
|
|
"type": "TEXT",
|
|
"value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ."
|
|
},
|
|
{
|
|
"type": "TEXT",
|
|
"value": "Высоко̀ житїѐ и҆мѣ́ѧ, и҆ восхождє́нїи бжⷭ҇твенными ве́сь свѣ́телъ бы́въ, просвѣще́нїе мѝ и҆спросѝ похвалѧ́ющꙋ честны̑ѧ твоѧ̑ по́двиги, и҆́миже до́брѣ пожи́въ, полꙋчи́лъ є҆сѝ и҆́хже надѣ́ѧлсѧ є҆сѝ, бл҃же́нне проко́пїе."
|
|
},
|
|
{
|
|
"type": "TEXT",
|
|
"value": "Мѷроꙋха̑ннаѧ любѧ̀ ᲂу҆чє́нїѧ, и҆ во чте́нїи ст҃ы́хъ писа́нїй ᲂу҆пражнѧ́ѧсѧ, сласте́й ᲂу҆клони́лсѧ є҆сѝ, бл҃же́нне, смра́дныхъ и҆ безче́стныхъ: и҆ ѡ҆благово́нилсѧ є҆сѝ бжⷭ҇твенными дарова́ньми ᲂу҆добрѧ́ѧсѧ."
|
|
},
|
|
{
|
|
"type": "TEXT",
|
|
"value": "Дрема́нїе вѣ́ждома ѿ дꙋшѝ, бл҃же́нне, ѿгна́лъ є҆сѝ, бдѧ̀ и҆ бг҃ꙋ приединѣва́ѧсѧ всено́щными стоѧ̑нїи, непрекло́ненъ нꙋ́ждами є҆сте́ственными: тѣ́мже ко дню̀ невече́рнемꙋ преше́лъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Ꙗ҆́кѡ черто́гъ ѡ҆дꙋшевле́нный бж҃їй и҆ кади́льницꙋ разꙋ́мнагѡ и҆ свѣтоно́снагѡ ᲂу҆́глѧ, приснора́дованнꙋю блажи́мъ бцⷣꙋ, зовꙋ́ще: ра́дꙋйсѧ, хода́таице спасе́ннагѡ воззва́нїѧ."
|
|
},
|
|
{
|
|
"type": "TEXT",
|
|
"value": "Катава́сїа: Ѿве́рзꙋ ᲂу҆ста̀ моѧ̑:"
|
|
},
|
|
{
|
|
"type": "HEADER",
|
|
"value": "Пѣ́снь г҃."
|
|
},
|
|
{
|
|
"type": "TEXT",
|
|
"value": "І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и."
|
|
},
|
|
{
|
|
"type": "TEXT",
|
|
"value": "Глаго́лѡмъ животѡ́чнымъ внима́ѧ, и҆спи́лъ є҆сѝ во́дꙋ спасе́нїѧ, возгнꙋша́всѧ го́рькагѡ грѣха̀, и҆ поѧ̀ глаго́лалъ є҆сѝ бг҃ꙋ, проко́пїе: ꙗ҆́кѡ нѣ́сть свѧ́тъ па́че тебє̀, гдⷭ҇и."
|
|
},
|
|
{
|
|
"type": "TEXT",
|
|
"value": "Ми́лованїе стѧжа́лъ є҆сѝ хрⷭ҇топодо́бно, разда́лъ є҆сѝ бога́тство́ тре́бꙋющымъ, нбⷭ҇ное бога́тство хода́тайствꙋющее тебѣ̀, є҆го́же и҆ полꙋчи́лъ є҆сѝ, вопїѧ̀, проко́пїе: ꙗ҆́кѡ нѣ́сть свѧ́тъ па́че тебє̀, гдⷭ҇и."
|
|
},
|
|
{
|
|
"type": "TEXT",
|
|
"value": "Присво́ивсѧ зижди́телю любо́вїю бжⷭ҇твенною, прїѧ́лъ є҆сѝ нбⷭ҇ное наслѣ́дїе. Дре́ва живо́тнагѡ полꙋчи́ти сподо́билсѧ є҆сѝ, бл҃же́нне, бг҃отворе́нїемъ ѡ҆божа́ѧсѧ, и҆ поѧ̀, сла́вне: ꙗ҆́кѡ нѣ́сть свѧ́тъ па́че тебє̀, гдⷭ҇и."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Сꙋ́щи а҆́гг҃лъ ст҃ѣ́йши, зижди́телѧ а҆́гг҃лѡвъ во твою̀ бокꙋ̀ носи́ла є҆сѝ, и҆ родила̀ є҆сѝ, бг҃ома́ти, на и҆збавле́нїе человѣ́кѡмъ пою́щымъ тѝ: ꙗ҆́кѡ нѣ́сть пречⷭ҇ты, ра́звѣ тебє̀, влⷣчце."
|
|
},
|
|
{
|
|
"type": "HEADER",
|
|
"value": "Сѣда́ленъ, гла́съ д҃:"
|
|
},
|
|
{
|
|
"type": "TEXT",
|
|
"value": "Благоволи́въ благи́ми дѣѧ̑нїи, и҆скꙋси́лсѧ є҆сѝ ꙗ҆́кѡ зла́то въ пещѝ напа́стьми, проко́пїе сла́вне. Тѣ́мже и҆ по сме́рти и҆сточа́еши чꙋдеса̀ бога́тнѡ ꙗ҆́кѡ во́ды, недꙋ́ги ᲂу҆ставлѧ́еши: ѡ҆ на́съ при́снѡ моли́сѧ, ꙗ҆́кѡ да согрѣше́нїй проще́нїе прїи́мемъ. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Чтⷭ҇аѧ, всенепоро́чнаѧ и҆ неискꙋсомꙋ́жнаѧ, ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то ро́ждши. Сего̀ со ст҃ы́ми и҆ честны́ми патрїа̑рхи, и҆ мꙋ́чєники, и҆ прⷪ҇рѡ́ки, прпⷣбными молѝ, дарова́ти на́мъ ѡ҆чище́нїе и҆ ве́лїю ми́лость."
|
|
},
|
|
{
|
|
"type": "HEADER",
|
|
"value": "Пѣ́снь д҃."
|
|
},
|
|
{
|
|
"type": "TEXT",
|
|
"value": "І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и."
|
|
},
|
|
{
|
|
"type": "TEXT",
|
|
"value": "Повелѣ̑нїѧ ѻ҆те́чєскаѧ хранѧ̀ невреди́мѡ, правовѣ́рнымъ смы́сломъ, ты̀ ѿ ю҆́ности и҆мѣ́лъ є҆сѝ житїѐ чи́сто, и҆ ми́лостивенъ нра́въ, досточꙋ́дне."
|
|
},
|
|
{
|
|
"type": "TEXT",
|
|
"value": "Ни смꙋще́нїе мїрско́е, ни вла́сти держа́нїе, ни сла́ва вре́меннаѧ, твоегѡ̀ къ бг҃ꙋ раче́нїѧ, проко́пїе, превратѝ: но благоволи́лъ є҆сѝ вои́стиннꙋ бжⷭ҇твєннымъ дѣѧ́нїємъ."
|
|
},
|
|
{
|
|
"type": "TEXT",
|
|
"value": "Возне́ссѧ бжⷭ҇твенными поꙋчє́нїи вы́нꙋ, врага̀ смири́лъ є҆сѝ: и҆сцѣле́нїѧ дѣ́тель прїѧ́лъ є҆сѝ, проко́пїе, сꙋдо́мъ пра́веднымъ всѧ́чєскаѧ пра́вѧщагѡ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Препѣ́таѧ, во́инствы горѣ̀ препѣ́таго бг҃а родила̀ є҆сѝ, чл҃вѣ́ка вои́стиннꙋ бы́вша: є҆го́же за рабы̑ твоѧ̑ молѧ́щи не преста́й, приснодв҃о."
|
|
},
|
|
{
|
|
"type": "HEADER",
|
|
"value": "Пѣ́снь є҃."
|
|
},
|
|
{
|
|
"type": "TEXT",
|
|
"value": "І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю."
|
|
},
|
|
{
|
|
"type": "TEXT",
|
|
"value": "Свѣ́томъ чи́стымъ ст҃ы́ѧ трⷪ҇цы просвѣще́нъ, зако́номъ же сеѧ̀ ѡ҆гражде́нъ, но́щь жите́йскꙋю безъ претыка́нїѧ преше́лъ є҆сѝ: видѣ̑нїи бжⷭ҇твенными возвыша́ѧсѧ, блаже́нне, въ бжⷭ҇твенный живо́тъ всели́лсѧ є҆сѝ."
|
|
},
|
|
{
|
|
"type": "TEXT",
|
|
"value": "Ны́нѣ на тебѣ̀ чꙋ́до ве́лїе ви́дитсѧ, и҆ ᲂу҆́жаса и҆спо́лнено: ка́кѡ по погребе́нїи вои́стиннꙋ надо́лзѣ соблюда́етсѧ невреди́мѡ, бл҃же́нне, твоѐ тѣ́ло во гро́бѣ лежа́що, сꙋдо́мъ и҆́мже вѣ́сть бг҃ъ, прославлѧ́ѧй тѧ̀."
|
|
},
|
|
{
|
|
"type": "TEXT",
|
|
"value": "Блаже́нне проко́пїе, твоѐ дерзнове́нїе къ бг҃ꙋ, и҆ любо́вь ю҆́же ѿ се́рдца къ томꙋ̀ и҆мѣ́ти благоволи́въ, и҆́стинно и҆мени́то же возсїѧ́въ пресла́внѡ, бжⷭ҇твенными свѣтлостьмѝ просвѣтѝ вѣ́рныхъ сѡ́нмища."
|
|
},
|
|
{
|
|
"type": "TEXT",
|
|
"value": "Бг҃оро́диченъ: За ны̀ и҆зъ тебє̀ вопло́щшагосѧ, дв҃о мт҃и, всегда̀ молѝ, благоче́стнѡ тѧ̀ блажа́щымъ и҆зба́витисѧ бѣ́дъ, дꙋшетлѣ́нныхъ страсте́й и҆ печа́лей, и҆ вѣ́чнꙋющагѡ пла́мене мꙋче́нїѧ."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
|
|
},
|
|
{
|
|
"type": "TEXT",
|
|
"value": "Ка̑пли сла̑дкїѧ и҆ска́павше, блаже́нне, пѡ́тъ твои́хъ сла́дость, и҆ и҆сцѣле́нїй сїѧ̑нїѧ, на хвалꙋ̀ хрⷭ҇та̀ бг҃а на́шегѡ."
|
|
},
|
|
{
|
|
"type": "TEXT",
|
|
"value": "Во дво́рѣхъ бг҃а процвѣ́лъ є҆сѝ, вїногра́дъ многопло́депъ прозѧ́бъ, и҆ добродѣ́телей гро́здїе, дѣ́лателю дꙋша́мъ ѻ҆би́лїе пода́въ."
|
|
},
|
|
{
|
|
"type": "TEXT",
|
|
"value": "Ца́рства бж҃їѧ возжелѣ́лъ є҆сѝ, надъ страстьмѝ ца́рствовавъ, проко́пїе, и҆ по произволе́нїю лꙋ́чшемꙋ, ра́дость пра́ведныхъ полꙋчи́лъ є҆сѝ."
|
|
},
|
|
{
|
|
"type": "TEXT",
|
|
"value": "Бг҃оро́диченъ: И҆збра́нно бг҃ꙋ бы́вши ꙗ҆́кѡ прекра́сное селе́нїе, и҆ простра́нное семꙋ̀, дв҃о, была̀ є҆сѝ, и҆ черто́гъ, и҆ свѣ́щникъ, и҆ трапе́за."
|
|
},
|
|
{
|
|
"type": "HEADER",
|
|
"value": "Конда́къ, гла́съ д҃:"
|
|
},
|
|
{
|
|
"type": "TEXT",
|
|
"value": "Хрⷭ҇та̀ ра́ди, ю҆ро́дствомъ воздꙋ̑шнаѧ мыта̑рства на рꙋка́хъ а҆́гг҃льскихъ неприкоснове́ннѡ преше́дъ, ца́рскагѡ дости́глъ є҆сѝ престо́ла, и҆ ѿ цр҃ѧ̀ всѣ́хъ хрⷭ҇та̀ бг҃а да́ръ прїе́мъ благода́ть и҆сцѣле́нїй: мно́гими бо чꙋдесы̀ твои́ми и҆ зна́менїемъ стра́шнымъ ᲂу҆диви́лъ є҆сѝ гра́дъ тво́й вели́кїй ᲂу҆́стюгъ: лю́демъ твои̑мъ ми́лость и҆спросѝ, мѵ́ро ѿ честна́гѡ ѻ҆́браза прест҃ы́ѧ бцⷣы моли́твою и҆зве́лъ є҆сѝ, и҆ недꙋ̑жнымъ по́далъ є҆сѝ цѣльбы̑. Тѣ́мже мо́лимъ тѧ̀, чꙋдоно́сче проко́пїе, молѝ хрⷭ҇та̀ бг҃а непреста́ннѡ, пода́ти грѣхѡ́въ на́шихъ проще́нїе."
|
|
},
|
|
{
|
|
"type": "TEXT",
|
|
"value": "І҆́косъ: Ка́кѡ возмогꙋ̀ грѣ́шный и҆ скве́рный а҆́зъ дꙋше́ю вкꙋ́пѣ и҆ тѣ́ломъ и҆списа́ти во пло́ти сꙋ́щее равноа́гг҃лѡмъ житїѐ твоѐ, и҆ пресла̑внаѧ чꙋдеса̀; а҆́ще ᲂу҆́бѡ мно́зи премꙋ́дрїи не дости́гнꙋтъ и҆сповѣ́дати мно́гагѡ твоегѡ̀ терпѣ́нїѧ, и҆ смире́нїѧ, и҆ те́плыѧ ко хрⷭ҇тꙋ̀ любвѐ: но ѻ҆ба́че надѣ́ѧсѧ на твоѐ безѕло́бїе, ѽ блаже́нне! Си́це вопїю́ ти: ра́дꙋйсѧ, пресвѣ́тлаѧ ѕвѣздо̀, ѿ восто́ка добродѣ́телей возсїѧ́вшаѧ, и҆ вселе́ннꙋю чꙋдесы̀ ѡ҆зари́вшаѧ: ра́дꙋйсѧ, возненави́дѣвый роди́тельскꙋю любо́вь, хрⷭ҇та́ же є҆ди́наго надъ всѣ́ми сꙋ́щаго бг҃а всѣ́мъ се́рдцемъ возлюби́вый и҆ томꙋ̀ невозвра́тнымъ жела́нїемъ послѣ́довавый: ра́дꙋйсѧ, ꙗ҆́кѡ бꙋ́йственное и҆ ю҆ро́дственное, є҆́же по а҆пⷭ҇лꙋ, жи́тельство и҆збра́вый: ра́дꙋйсѧ премѣни́вый тлѣ̑ннаѧ и҆ настоѧ̑щаѧ, наде́ждею бꙋ́дꙋщихъ бла̑гъ: ра́дꙋйсѧ, дре́внемꙋ і҆́ѡвꙋ ᲂу҆подо́бивыйсѧ терпѣ́нїемъ: ра́дꙋйсѧ, страстоте́рпче хрⷭ҇то́въ непобѣди́мый, но при́снѡ побѣди́вый дїа́вола твои́мъ смире́нїемъ: ра́дꙋйсѧ, ꙗ҆́кѡ дре́внїй ѻ҆́нъ ла́зарь ни́щїй ны́нѣ почива́еши въ нѣ́дрѣхъ а҆враа́млихъ: ра́дꙋйсѧ, и҆́же по ѿше́ствїи мі́ра сегѡ̀, сꙋ́щымъ въ бѣда́хъ, и҆ и҆скꙋше́нїихъ гото́въ ѡ҆брѣта́ѧйсѧ предста́тель и҆ застꙋ́пникъ: ра́дꙋйсѧ, вездѣ̀ призыва́ющыѧ тѧ̀ бы́стрѡ предварѧ́ѧй: мо́лиши бо хрⷭ҇та̀ бг҃а непреста́ннѡ, пода́ти грѣхѡ́въ на́шихъ проще́нїе."
|
|
},
|
|
{
|
|
"type": "HEADER",
|
|
"value": "Пѣ́снь з҃."
|
|
},
|
|
{
|
|
"type": "TEXT",
|
|
"value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ."
|
|
},
|
|
{
|
|
"type": "TEXT",
|
|
"value": "Крѣ́постїю возмо́гъ живода́вца, плотско́е ᲂу҆держа́лъ є҆сѝ жела́нїе, пребога́те, и҆ ᲂу҆́мъ возвы́силъ є҆сѝ на нбⷭ҇наѧ, поѧ̀ крѣ́пкѡ: сы́й бл҃гослове́нъ и҆ препросла́вленъ."
|
|
},
|
|
{
|
|
"type": "TEXT",
|
|
"value": "Са́мъ неблагоро́денъ сотвори́всѧ, благоро́дны пра́вы стѧжа́лъ є҆сѝ ᲂу҆мо́мъ цѣ́лымъ: поꙋче́нїемъ же ᲂу҆пражнѧ́ѧсѧ бг҃одохнове́нныхъ писа́нїй, всѐ жела́нїе твоѐ къ бг҃ꙋ всеви́дцꙋ, блаже́нне, возложи́лъ є҆сѝ."
|
|
},
|
|
{
|
|
"type": "TEXT",
|
|
"value": "Го́рнее црⷭ҇тво, вы́шнїй гра́дъ, бж҃їй ра́й, пра́ведныхъ наслажде́нїе, и҆ пи́щꙋ несодѣ́ѧннꙋю, бога́тство некра́домое, свѣ́тъ невече́рнїй, ѡ҆брѣстѝ сподо́билсѧ є҆сѝ, блаже́нне проко́пїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Є҆го́же породила̀ є҆сѝ, влⷣчце, при́снѡ молѝ, ѿ рабо́ты и҆зба́вити мѧ̀ страсте́й, и҆ ѡ҆сꙋжде́нїѧ, и҆ стꙋжа́ющагѡ мѝ лю́тагѡ ѡ҆камене́нїѧ, и҆ ѡ҆скорблѧ́ющагѡ, чⷭ҇таѧ, ѡ҆держа́нїѧ, бг҃ора́дованнаѧ."
|
|
},
|
|
{
|
|
"type": "HEADER",
|
|
"value": "Пѣ́снь и҃."
|
|
},
|
|
{
|
|
"type": "TEXT",
|
|
"value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
|
|
},
|
|
{
|
|
"type": "TEXT",
|
|
"value": "Ѻ҆́гнь помышлѧ́ѧ стра́шный, предъ прⷭ҇то́ломъ хрⷭ҇то́вымъ хотѧ́щъ и҆зы́ти, ᲂу҆миле́нїемъ се́рдца те́плы пролива́еши пото́ки слє́зныѧ, погаша́ѧ тѣ́ми страсте́й пе́щь, проко́пїе бг҃омꙋ́дре."
|
|
},
|
|
{
|
|
"type": "TEXT",
|
|
"value": "Любо́вїю предложи́лъ є҆сѝ твою̀, мꙋ́дре, къ бг҃ꙋ дꙋ́шꙋ, и҆ къ томꙋ̀ прилѣпи́лсѧ є҆сѝ, вопїѧ̀ пѣ́сненнѡ, хрⷭ҇тѐ мо́й, ты̀ ны́нѣ мѧ̀ и҆зба́ви страсте́й смертоно́сныхъ во вѣ́ки."
|
|
},
|
|
{
|
|
"type": "TEXT",
|
|
"value": "Терпѣ́нїемъ пожда́тель и҆ се́рдцемъ смире́нъ, ты̀ ви́дѣнъ бы́лъ є҆сѝ, ми́лостивъ тре́бꙋющымъ, ѻ҆бы́чай при́снѡ бла́гъ и҆мѣ́ѧ, и҆ нра́въ добродѣ́тельный, всече́стне. Въ ни́хже до́брѣ пожи́въ, чꙋде́съ то́чиши благода́ть."
|
|
},
|
|
{
|
|
"type": "TEXT",
|
|
"value": "Бг҃оро́диченъ: А҆да́мовъ содѣ́тель ѿ крове́й твои́хъ чⷭ҇тыхъ зи́ждетсѧ, и҆ млеко́мъ пита́етсѧ, пита́ѧй всѧ́ко дыха́нїе, дв҃о бцⷣе. Тѣ́мъ ꙗ҆́кѡ мт҃рь тѧ̀ бж҃їю прославлѧ́емъ."
|
|
},
|
|
{
|
|
"type": "HEADER",
|
|
"value": "Пѣ́снь ѳ҃."
|
|
},
|
|
{
|
|
"type": "TEXT",
|
|
"value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
|
|
},
|
|
{
|
|
"type": "TEXT",
|
|
"value": "Ви́дѣти жела́ѧ сла́вꙋ бг҃а на́шегѡ, добродѣ́тельми бг҃оразꙋ́мїѧ себѐ ᲂу҆добри́лъ є҆сѝ: и҆ свѣщꙋ̀ носѧ̀, вше́лъ є҆сѝ во свѣ́тлый черто́гъ, со а҆́гг҃лы живы́й ꙗ҆снѣ́е наслажда́ѧсѧ бж҃ества̀."
|
|
},
|
|
{
|
|
"type": "TEXT",
|
|
"value": "Ꙗ҆́кѡ ᲂу҆́треннее со́лнце взы́де па́мѧть твоѧ̀, сꙋ́щыѧ во мра́цѣ сердца̀ просвѣща́ющи: ты́ бо свѣ́та и҆ днѐ ꙗ҆ви́лсѧ є҆сѝ вои́стиннꙋ сы́нъ, бг҃омꙋ́дре проко́пїе: сегѡ̀ ра́ди тѧ̀ почита́емъ."
|
|
},
|
|
{
|
|
"type": "TEXT",
|
|
"value": "Мꙋ́дростїю ᲂу҆краша́ѧсѧ, и҆ ра́зꙋмомъ просвѣща́ѧсѧ, смире́нїемъ се́рдца красꙋ́ѧсѧ, высото́ю житїѧ̀, досточꙋ́дне, въ разꙋ̑мныѧ дворы̀ вше́лъ є҆сѝ, и҆дѣ́же на́съ помѧнѝ чтꙋ́щихъ тѧ̀, блаже́нне проко́пїе."
|
|
},
|
|
{
|
|
"type": "TEXT",
|
|
"value": "Бг҃оро́диченъ: Свѣ́та жили́ще, всѧ̑ ѡ҆зари́вшагѡ, и҆ сѣ́нь ви́дѣна была̀ є҆сѝ, бг҃облагода́тнаѧ, мо́стъ и҆ лѣ́ствица, на высотꙋ̀ земны̑ѧ возводѧ́щи, дв҃о. Тѣ́мъ тѧ̀ ᲂу҆блажа́емъ, и҆ вѣ́рнѡ велича́емъ."
|
|
},
|
|
{
|
|
"type": "HEADER",
|
|
"value": "Свѣти́ленъ."
|
|
},
|
|
{
|
|
"type": "TEXT",
|
|
"value": "Подо́бенъ: Жєны̀ ᲂу҆слы́шите:"
|
|
},
|
|
{
|
|
"type": "TEXT",
|
|
"value": "Оу҆дали́лсѧ є҆сѝ, бѣ́гаѧ мїрска́гѡ сожи́тельства, и҆ хрⷭ҇тꙋ̀ сꙋ́щемꙋ надъ всѣ́ми бг҃ꙋ на́шемꙋ непоро́чнымъ житїе́мъ благоꙋгоди́лъ є҆сѝ, всеблаже́нне проко́пїе. Є҆го́же и҆ ны́нѣ молѝ ѡ҆ на́съ рабѣ́хъ твои́хъ, вѣ́рою пра́зднꙋющихъ всечестнꙋ́ю па́мѧть твою̀. Два́жды."
|
|
},
|
|
{
|
|
"type": "HEADER",
|
|
"value": "Сла́ва, и҆ ны́нѣ, бг҃оро́диченъ:"
|
|
},
|
|
{
|
|
"type": "TEXT",
|
|
"value": "Премꙋ́дрость ѵ҆поста́снꙋю, сло́во ѻ҆́ч҃ее присносꙋ́щное, врача̀ человѣ́кѡмъ хрⷭ҇та̀ ро́ждшаѧ, дв҃о пречⷭ҇таѧ, ꙗ҆́звы и҆ стрꙋ́пы се́рдца моегѡ̀ и҆сцѣлѝ лю̑тыѧ и҆ многовре́мєнныѧ, и҆ страстна̑ѧ взыгра̑нїѧ ᲂу҆тишѝ пло́ти моеѧ̀."
|
|
},
|
|
{
|
|
"type": "HEADER",
|
|
"value": "На хвали́техъ стїхи̑ры ст҃а́гѡ на д҃, гла́съ д҃."
|
|
},
|
|
{
|
|
"type": "TEXT",
|
|
"value": "Подо́бенъ: Да́лъ є҆сѝ зна́менїе:"
|
|
},
|
|
{
|
|
"type": "TEXT",
|
|
"value": "Да́лъ є҆сѝ при́тчꙋ терпѣ́нїѧ и҆ мꙋ́жества, пребл҃гі́й гдⷭ҇и, пра́веднаго проко́пїа и҆ многочꙋде́снаго, добродѣ́тельми и҆ словесы̀ и҆ дѣ́лы сїѧ́юща, цѣломꙋ́дрїемъ ᲂу҆краша́ема и҆ кро́тостїю: тѣ́мъ твоѐ неизрече́нное смотре́нїе сла́вимъ, і҆и҃се всеси́льне и҆ сп҃се дꙋ́шъ на́шихъ. Два́жды."
|
|
},
|
|
{
|
|
"type": "TEXT",
|
|
"value": "Пра́веденъ и҆ неѕло́бивъ, и҆́стиненъ же и҆ непоро́ченъ и҆ вѣ́ренъ, ᲂу҆клонѧ́ѧсѧ ѿ всѧ́кїѧ ѕло́бныѧ ве́щи, показа́лсѧ є҆сѝ, проко́пїе блаже́нне, просвѣще́нъ добродѣ́тельми, и҆ благоче́стїемъ сїѧ́ѧ. Тѣ́мъ тѧ̀ ᲂу҆блажа́емъ, и҆ свѧто́е твоѐ и҆ честно́е дне́сь пра́зднꙋемъ ᲂу҆спе́нїе, ра́дꙋющесѧ, бг҃омꙋ́дре."
|
|
},
|
|
{
|
|
"type": "TEXT",
|
|
"value": "Цѣломꙋ́дрїемъ и҆ благовѣ́рїемъ, ꙗ҆́кѡ багрѧни́цею многоцѣ́нною ѡ҆дѣ́ѧвсѧ, проко́пїе, пра́вдою же и҆ кро́тостїю, ꙗ҆́кѡ бжⷭ҇твеннымъ вѣнце́мъ ᲂу҆вѧ́злсѧ є҆сѝ, со стра́ждꙋщими хрⷭ҇та̀ ра́ди ца́рствовати возжелѣ́лъ є҆сѝ. И҆ ны́нѣ цр҃ю̀ си́лъ предстои́ши, і҆и҃сꙋ всеми́лостивомꙋ и҆ сп҃сꙋ дꙋ́шъ на́шихъ."
|
|
},
|
|
{
|
|
"type": "HEADER",
|
|
"value": "Сла́ва, гла́съ и҃:"
|
|
},
|
|
{
|
|
"type": "TEXT",
|
|
"value": "Добродѣ́телей твои́хъ, бг҃омꙋ́дре, и҆справлє́нїѧ ᲂу҆ѧсни́ша вѣ́рныхъ сердца̀: кто́ бо, слы́шавъ безмѣ́рное твоѐ смире́нїе и҆ терпѣ́нїе, не ᲂу҆диви́тсѧ; є҆́же ко всѣ̑мъ кро́тость и҆ безѕло́бїе, къ скорбѧ́щымъ ми́лованїе, и҆ сꙋ́щымъ въ бѣда́хъ ско́рое поможе́нїе, въ пꙋ́ть ше́ствꙋющымъ благо́е поспѣше́нїе, и҆ къ пла́вающымъ немѧте́жное приста́нище: всѧ̑ бг҃олѣ́пнѡ предвари́лъ є҆сѝ, досточꙋ́дне проко́пїе: и҆ ны́нѣ неꙋвѧда́емымъ ᲂу҆вѧ́злсѧ є҆сѝ вѣнце́мъ ѿ рꙋкѝ вседержи́телѧ бг҃а, є҆го́же молѝ спасти́сѧ дꙋша́мъ на́шымъ."
|
|
},
|
|
{
|
|
"type": "HEADER",
|
|
"value": "И҆ ны́нѣ:"
|
|
},
|
|
{
|
|
"type": "TEXT",
|
|
"value": "Всѐ ᲂу҆пова́нїе:"
|
|
},
|
|
{
|
|
"type": "HEADER",
|
|
"value": "Славосло́вїе вели́кое. И҆ ча́съ а҃-й. И҆ ѿпꙋ́стъ."
|
|
},
|
|
{
|
|
"type": "HEADER",
|
|
"value": "На лїтꙋргі́и, бл҃жє́нна, пѣ́снь г҃-ѧ и҆ ѕ҃."
|
|
},
|
|
{
|
|
"type": "HEADER",
|
|
"value": "Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе преподо́бнагѡ."
|
|
}
|
|
] |