ponomar-pwa/static/data/shared/menaion-daily/10-21/1.json

[
 {
  "type": "HEADER",
  "value": "Ѻ҆ктѡ́врїа к҃а"
 },
 {
  "type": "HEADER",
  "value": "Прпⷣбнагѡ ѻ҆тца̀ на́шегѡ і҆ларїѡ́на вели́кагѡ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры на ѕ҃, гла́съ д҃."
 },
 {
  "type": "TEXT",
  "value": "Подо́бенъ: Зва́нный свы́ше:"
 },
 {
  "type": "TEXT",
  "value": "Кро́токъ дꙋше́ю и҆ се́рдцемъ, є҆гда́ тѧ бжⷭ҇твенное раче́нїе ᲂу҆ѧзвѝ, и҆ свѧще́нными восхождє́нїи, ѿлꙋчи́тисѧ мїрски́хъ смꙋще́нїй покорѝ, тогда̀ воѡрꙋжи́всѧ си́лою крⷭ҇та̀, на де́мѡны ᲂу҆стреми́лсѧ є҆сѝ, всеблаже́нне, боре́нїемъ, и҆ спле́лъ є҆сѝ побѣ́ды дїади́мꙋ. И҆ ны́нѣ водворѧ́ешисѧ во свѣ́тлостехъ ст҃ы́хъ, съ ни́миже и҆ на́мъ и҆спросѝ просвѣще́нїе и҆ ми́ръ, и҆ согрѣше́нїй и҆збавле́нїе."
 },
 {
  "type": "TEXT",
  "value": "Свѣтода́тельными зарѧ́ми, пресла́внѡ, ѻ҆́ч҃е достосла́вне, и҆сцѣле́нїй твои́хъ, просвѣща́еши подсо́лнечнꙋю, недꙋ́гѡвъ разрѣша́ѧй тмꙋ̀ глꙋбоча́йшꙋю. Тѣ́мъ тѧ̀ со́лнце и҆но́е познава́емъ, и҆ мона́шествꙋющихъ ᲂу҆твержде́нїе, и҆ наста́вника спаса́емыхъ бжⷭ҇твеннымъ дх҃омъ. И҆ ны́нѣ па́мѧть соверша́емъ твою̀, свѣ́тлꙋю и҆ спаси́тельнꙋю, і҆ларїѡ́не, прегрѣше́нїй тобо́ю разрѣше́нїе прїе́млюще."
 },
 {
  "type": "TEXT",
  "value": "Воздержа́нїемъ, тѣлє́сныѧ стра̑сти, ѻ҆́ч҃е, покори́лъ є҆сѝ разꙋ́мномꙋ дꙋшѝ, и҆ безстра́стїѧ крилы̀ ᲂу҆кра́шенъ, бл҃года́ть прїѧ́лъ є҆сѝ цѣли́ти, прпⷣбне, человѣ́кѡвъ не́мѡщи, и҆ ѿгони́ти дꙋхѡ́въ лꙋка̑вствїѧ, и҆ спаса́ти притека́ющыѧ къ тебѣ̀. Тѣ́мже ли́цы тѧ̀ блажа́тъ мона́шествꙋющихъ, достосла́вне, и҆ почита́етъ всѧ̀ тва́рь, і҆ларїѡ́не, по́двиги твоѧ̑."
 },
 {
  "type": "HEADER",
  "value": "Сла́ва, гла́съ в҃."
 },
 {
  "type": "TEXT",
  "value": "А҆нато́лїа: Ѿ ю҆́ности твоеѧ̀ носѧ̀ соверше́нства мꙋ́дрость, возложи́въ на себѐ, і҆ларїѡ́не, и҆́го хрⷭ҇то́во, и҆ житїю̀ поревнова́лъ є҆сѝ бжⷭ҇твеннагѡ а҆нтѡ́нїа, ра́вными мѣ́рами добродѣ́тели подо́бѧсѧ: и҆зсꙋши́лъ є҆сѝ пло́ть ска́чꙋщꙋ а҆́ки жребѧ̀, ꙗ҆́кѡ до́лжно бѣ̀ дꙋшѝ покори́ти, по́стное тече́нїе соверши́въ. Но, ѽ бл҃же́ннѣйше ѻ҆́ч҃е, и҆ чꙋдодѣ́йственне бг҃оно́се, па́мѧть твою̀ любо́вїю соверша́ющымъ, просѝ ѡ҆чище́нїѧ и҆ ве́лїѧ ми́лости."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Дре́вꙋ крⷭ҇тномꙋ тѧ̀, і҆и҃се, пригвожде́на, зрѧ́щи, неискꙋсобра́чнаѧ, пла́чꙋщи гл҃го́лаше: ча́до сла́дкое, почто̀ ѡ҆ста́вилъ є҆сѝ менѐ, ро́ждшꙋю тѧ̀ є҆ди́нꙋ; свѣ́те непристꙋ́пный пребезнача́льнагѡ ѻ҆ц҃а̀, потщи́сѧ и҆ просла́висѧ, ꙗ҆́кѡ да сла́вꙋ полꙋча́тъ бжⷭ҇твеннꙋю, и҆̀же бжⷭ҇твєнныѧ стра̑сти твоѧ̑ сла́вѧщїи."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ и҃. Самогла́сенъ:"
 },
 {
  "type": "TEXT",
  "value": "Дх҃а ст҃а́гѡ и҆спо́лненъ бы́въ прпⷣбный і҆ларїѡ́нъ, де́мѡнскїѧ кѡ́зни ᲂу҆празднѝ: крⷭ҇то́мъ бо воѡрꙋжи́всѧ, и҆ въ не́мъ дерза́ѧ, всѧ̑ недꙋ́ги сло́вомъ и҆сцѣлѝ, дꙋшє́вныѧ ᲂу҆́бѡ стра̑сти, тѣле́съ же всѧ́кꙋю ꙗ҆́зю. Тогѡ̀ моли́твами хрⷭ҇тѐ, низпослѝ на́мъ ми́ръ, ꙗ҆́кѡ чл҃вѣколю́бецъ."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до. Что́ ти со́нмъ воздадѐ безблагода́тный є҆вре́йскїй, хотѧ́ мѧ ѡ҆безча́дствовати ѿ тебє̀ вселюбе́зне;"
 },
 {
  "type": "HEADER",
  "value": "Тропа́рь, гла́съ и҃:"
 },
 {
  "type": "TEXT",
  "value": "Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, і҆ларїѡ́не, ѻ҆́ч҃е на́шъ: молѝ хрⷭ҇та̀ бг҃а спасти́сѧ дꙋша́мъ на́шымъ."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "HEADER",
  "value": "На ᲂу҆́трени ѻ҆́ба канѡ́на ѻ҆ктѡ́иха, безъ мч҃ничнѡвъ: и҆ ст҃а́гѡ на ѕ҃, гла́съ в҃, ѳеофа́ново, є҆гѡ́же краегране́сїе:"
 },
 {
  "type": "TEXT",
  "value": "Свѣ́тлость пою̀, всебл҃же́нне, твои́хъ чꙋде́съ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ."
 },
 {
  "type": "TEXT",
  "value": "Свѣтоно́сное и҆ свѣтови́дное житїѐ твоѐ, бл҃же́нне, прера́достнѡ благохвали́ти ᲂу҆се́рдствꙋюща, твоеѧ̀ свѣ́тлости ти́хостїю просвѣти́ мѧ, молю́сѧ, и҆ грѣха̀, ѻ҆́ч҃е, ᲂу҆ны́нїе ѿженѝ."
 },
 {
  "type": "TEXT",
  "value": "Всенра́внѡ, блаже́нне, къ бг҃ꙋ ра́дꙋѧсѧ пристꙋпи́лъ є҆сѝ, внѣ̀ пло́ти и҆ мі́ра бы́въ: и҆ ᲂу҆́мъ немꙋ́тенъ, ᲂу҆твержде́нъ воздержа́нїемъ соблю́лъ є҆сѝ, бжⷭ҇твеннымъ безстра́стїемъ ѿсю́дꙋ присвоѧ́ѧсѧ."
 },
 {
  "type": "TEXT",
  "value": "Свѣ́тлыми ты̀ зарѧ́ми просвѣща́емь безнача́льнагѡ и҆ несозда́ннагѡ бж҃ества̀, ѻ҆́ч҃а не бре́глъ є҆сѝ ѕловѣ́рїѧ, и҆ многомѧте́жнагѡ невѣ́жества тогѡ̀ ѿврати́всѧ, є҆ди́нѣй трⷪ҇цѣ сочета́лсѧ є҆сѝ."
 },
 {
  "type": "TEXT",
  "value": "Бг҃оро́диченъ: Возсїѧ́вый сл҃нце и҆зъ тебє̀, мт҃и приснодв҃о, и҆зъ ѻ҆ц҃а̀ пре́жде вѣ̑къ неви́димый, и҆ ви́димымъ же пресла́внѡ ѡ҆писꙋ́емь тѣ́ломъ, благоче́стїѧ свѣ́томъ человѣ́ки просвѣти́лъ є҆́сть."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и."
 },
 {
  "type": "TEXT",
  "value": "Ꙗ҆дови́тыхъ страсте́й воста̑нїѧ, лѣчбо́ю по́стничества ѡ҆бложе́нъ, и҆зсꙋши́лъ є҆сѝ, приснопа́мѧтне, взыва́ѧ: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ па́че тебє̀, гдⷭ҇и."
 },
 {
  "type": "TEXT",
  "value": "Кѡ́жныѧ ме́ртвєнныѧ ри̑зы ѡ҆строга́въ ноже́мъ воздержа́нїѧ, и҆стка́лъ є҆сѝ ри́зꙋ спасе́нїѧ вопїѧ̀ творцꙋ̀ твоемꙋ̀: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и."
 },
 {
  "type": "TEXT",
  "value": "Оу҆крѣплѧ́емь наде́ждею вѣ́чныхъ, и҆ бг҃ꙋ приводи́мь, бг҃оно́се, дла́ньми бг҃омꙋ́драгѡ а҆нтѡ́нїа, є҆го́же подража́ѧ свѣти́льникъ бы́лъ є҆сѝ, пресла́вными чꙋдесы̀ свѣтѧ́сѧ, прпⷣбне."
 },
 {
  "type": "TEXT",
  "value": "Бг҃оро́диченъ: И҆́же всѧ̑ воѡбрази́вый хотѣ́нїемъ бжⷭ҇твеннымъ, въ человѣ́ка воѡбрази́тисѧ сподо́бисѧ, созида́ѧсѧ во ᲂу҆тро́бѣ твое́й, бцⷣе. Є҆мꙋ́же ны́нѣ зове́мъ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и."
 },
 {
  "type": "HEADER",
  "value": "Сѣда́ленъ, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "А҆нтѡ́нїа бжⷭ҇твеннагѡ дꙋхо́внѣ добродѣ́тельномꙋ житїю̀ поревнова́въ, на ра́мена твоѧ̑ взѧ́лъ є҆сѝ крⷭ҇тъ гдⷭ҇а твоегѡ̀, ѡ҆ста́вивъ житїѧ̀ всѐ попече́нїе, и҆ стра̑сти ᲂу҆мертви́въ, дꙋ́хомъ пожи́лъ є҆сѝ. Тѣ́мъ и҆ тва́рь пресла́вными и҆спо́лнилъ є҆сѝ чꙋдесы̀, прпⷣбне, дх҃а бл҃года́тїю: і҆ларїѡ́не, ѻ҆́ч҃е на́шъ, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀. Два́жды."
 },
 {
  "type": "HEADER",
  "value": "Сла́ва, и҆ ны́нѣ, бг҃оро́диченъ:"
 },
 {
  "type": "TEXT",
  "value": "Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀."
 },
 {
  "type": "TEXT",
  "value": "Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве."
 },
 {
  "type": "TEXT",
  "value": "Оу҆мертви́въ пло́ти мꙋдрова́нїе, пото́къ беззако́нїѧ мѧте́жи, прпⷣбне, и҆ де́мѡнскихъ ко́зней и҆збѣжа́въ, къ ти́хости бжⷭ҇твеннагѡ дх҃а, съ пра́ведными, ѻ҆́ч҃е, воспочи́лъ є҆сѝ."
 },
 {
  "type": "TEXT",
  "value": "Водны́ми сле́зъ течє́нїи напаѧ́емь, прпⷣбне, дꙋше́внꙋю ни́вꙋ многопло́днꙋ, дѣ́ланїемъ ꙗ҆́вѣ сп҃совымъ, ѻ҆́ч҃е, показа́лъ є҆сѝ, по́стникѡвъ ᲂу҆мно́живъ составлє́нїѧ."
 },
 {
  "type": "TEXT",
  "value": "Прича́стїемъ ст҃а́гѡ дх҃а ᲂу҆крѣплѧ́емь, бг҃оно́се, лꙋка́вствїѧ дꙋ́хи низложи́лъ є҆сѝ, и҆ си́лою хрⷭ҇то́вою немѡщны́ѧ и҆сцѣлѧ́еши, прⷪ҇ро́ческою ѡ҆богати́всѧ чистото́ю."
 },
 {
  "type": "TEXT",
  "value": "Бг҃оро́диченъ: Хра́мъ тѧ̀ и҆ черто́гъ ѡ҆дꙋшевле́нный, и҆ мы́сленнꙋю трапе́зꙋ и҆ свѣти́льникъ, бг҃ома́ти бл҃гослове́ннаѧ, разꙋмѣ́емъ, и҆зъ неѧ́же сꙋ́щымъ во тмѣ̀ свѣ́тъ возсїѧ̀, ѻ҆́ч҃а сꙋщества̀ сїѧ́нїе."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои̑мъ: и҆но́гѡ бо, ра́звѣ тебє̀, бо́га не зна́ю."
 },
 {
  "type": "TEXT",
  "value": "Ꙗ҆́кѡ мо́лнїѧ, чистото́ю житїѧ̀ и҆ жи́тельствомъ, безплѡ́тнымъ подо́бѧсѧ, просїѧ́въ въ мі́рѣ, тмы̀ предста́телѧ ѿго́ниши, бг҃облаже́нне, благоче́стїѧ свѣ́томъ просвѣща́емь."
 },
 {
  "type": "TEXT",
  "value": "Всѧ́ческими свѣтѧ́сѧ, бг҃омꙋ́дре, чꙋдодѣ́йствы, и҆ бл҃года́тїю бжⷭ҇твенною ѡ҆заре́нъ, всѣ̑мъ позна́лсѧ є҆сѝ сокро́вище и҆сцѣле́нїй лю́бѧщымъ, ѻ҆́ч҃е бг҃опрїѧ́тне, ꙗ҆́кѡ дрꙋгі́й нѣ́кїй прⷪ҇ро́къ бж҃їй познава́емь."
 },
 {
  "type": "TEXT",
  "value": "Свѣ́тлостїю твои́хъ, ѻ҆́ч҃е, кро́ткихъ и҆справле́нїй, мра̑чныѧ вра̑жїѧ си̑лы прогна́лъ є҆сѝ: и҆ ѿ тѣ́хъ ꙗ҆́рости и҆схити́въ къ тебѣ̀ прибѣга́ющыѧ, бжⷭ҇твенными твои́ми ᲂу҆чє́нїи къ вѣ́рѣ просвѣти́лъ є҆сѝ."
 },
 {
  "type": "TEXT",
  "value": "Бг҃оро́диченъ: Є҆ди́нꙋ на́мъ во двꙋ̀ сꙋщєствꙋ̀ ви́димꙋю ѵ҆поста́сь, є҆ди́на бл҃гослове́ннаѧ родила̀ є҆сѝ неизрече́ннѡ, бж҃їѧ бг҃а сло́ва, вопло́щшасѧ за ми́лость неизглаго́ланнꙋю. Сего̀ ᲂу҆́бѡ молѝ, сохрани́ти пою́щыѧ тѧ̀."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ."
 },
 {
  "type": "TEXT",
  "value": "Є҆динонача́лїю слꙋжа̀ бж҃ества̀ безнача́льнагѡ, многонача́лїе ѡ҆бличи́лъ є҆сѝ, і҆́дѡльское нече́стїе ᲂу҆праздни́въ, бг҃омꙋ́дре, бл҃года́тїю."
 },
 {
  "type": "TEXT",
  "value": "Прозѧ́бъ, ѻ҆́ч҃е, ꙗ҆́кѡ фі́нїѯъ процвѣ́лъ є҆сѝ въ цр҃кви, всебл҃же́нне бг҃омꙋ́дре, плодѡ́въ сла́достїю вѣ́рныхъ возвеселѧ́ѧ и҆сполне́нїе."
 },
 {
  "type": "TEXT",
  "value": "Низложи́тель ꙗ҆ви́лсѧ є҆сѝ непобѣди́мь лꙋка́выхъ дꙋхѡ́въ, всесла́вне, богатотвѡ́рнаѧ дарова̑нїѧ ѿ хрⷭ҇та̀ полꙋчи́въ, бл҃же́нне."
 },
 {
  "type": "TEXT",
  "value": "Бг҃оро́диченъ: Неискꙋсомꙋ́жнѡ дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бжⷭ҇тва̀, сн҃а и҆ бг҃а твоегѡ̀ ѻ҆́бразы."
 },
 {
  "type": "HEADER",
  "value": "Конда́къ, гла́съ г҃."
 },
 {
  "type": "TEXT",
  "value": "Подо́бенъ: Дв҃а дне́сь:"
 },
 {
  "type": "TEXT",
  "value": "Ꙗ҆́кѡ свѣти́льника незаходи́маго, ᲂу҆́мнаго тѧ̀ сл҃нца, соше́дшесѧ дне́сь восхвалѧ́емъ въ пѣ́снехъ: возсїѧ́лъ бо є҆сѝ сꙋ́щымъ во тмѣ̀ невѣ́дѣнїѧ, всѧ̑ возводѧ̀ къ бжⷭ҇твеннѣй высотѣ̀, і҆ларїѡ́не. Тѣ́мже вопїе́мъ: ра́дꙋйсѧ, ѻ҆́ч҃е, всѣ́хъ по́стникѡвъ ѡ҆снова́нїе."
 },
 {
  "type": "TEXT",
  "value": "І҆́косъ: Возлюби́въ хрⷭ҇то́вы бжⷭ҇твєнныѧ за́пѡвѣди, и҆ возненави́дѣвъ всегѡ̀ мі́ра наслажде́нїе, прише́лъ є҆сѝ ᲂу҆се́рднѡ къ томꙋ̀, и҆ бы́лъ є҆сѝ свѣти́льникъ, просвѣща́ѧ всѧ̑ концы̀ блиста́нїемъ дх҃а. Тѣ́мъ припа́даѧ молю̀ тѧ̀: просвѣтѝ и҆ моѧ̑ ѻ҆́чи дꙋшє́вныѧ, воспѣ́ти твоѧ̑ по́двиги, ꙗ҆̀же показа́лъ є҆сѝ на землѝ ра́ди бꙋ́дꙋщїѧ жи́зни. Є҆ѧ́же ны́нѣ наслажда́ѧсѧ, помина́й вопїю́щихъ тѝ: ра́дꙋйсѧ, ѻ҆́ч҃е, всѣ́хъ по́стникѡвъ ѡ҆снова́нїе."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ."
 },
 {
  "type": "TEXT",
  "value": "Глагѡ́лъ вѣща́нїе твоѐ, и҆ чꙋде́съ бл҃года́ть бжⷭ҇твеннаѧ во всю̀ и҆зы́де зе́млю, всебл҃же́нне, бг҃оче́стїѧ заре́ю всѣ̑мъ сїѧ́ѧ вѣ́рнѡ и҆сцѣле́нїй тишинꙋ̀."
 },
 {
  "type": "TEXT",
  "value": "Крⷭ҇то́мъ ѡ҆гражда́емь сп҃совымъ, неврежде́нъ пре́былъ є҆сѝ, безꙋ́мнѡ ѡ҆кꙋси́вшꙋсѧ де́мѡнскомꙋ свирѣ́пствꙋ ѡ҆ тебѣ̀, всемꙋ́дре: вѣ́сть бо вы́шнїй бг҃ъ соблюда́ти своѧ̑ ᲂу҆го́дники."
 },
 {
  "type": "TEXT",
  "value": "Ꙗ҆́кѡ сто́лпъ непоколе́бленъ, небесовысо́кїй, ꙗ҆́кѡ стѣна̀ неподви́жима ꙗ҆ви́лсѧ є҆сѝ посто́мъ, просвѣща́ѧ чꙋдесы̀, и҆ даѧ̀ и҆сцѣлє́нїѧ, и҆ и҆сточа́ѧ бжⷭ҇твєнныѧ догма́ты ѿ и҆сто́чника приснотекꙋ́ща бг҃одохнове́нныхъ писа́нїй."
 },
 {
  "type": "TEXT",
  "value": "Бг҃оро́диченъ: Ѻ҆́блакъ дв҃а, тѧ̀ пра́вды сл҃нце родѝ, и҆ дв҃а пребы́вши, дебельствꙋ̀ пло́ти приѡбщи́вшасѧ, чл҃вѣ́ка бы́вша за бл҃гоꙋтро́бїе и҆ снизхожде́нїе: є҆го́же воспѣва́емъ ꙗ҆́кѡ препросла́влена."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Престо́лъ и҆́стиннѡ чꙋ́вствїѧ бы́лъ є҆сѝ, бжⷭ҇твеннымъ ра́зꙋмомъ просвѣща́емь, и҆ бж҃їимъ повелѣ́нїемъ бг҃омꙋ́дреннѡ наставлѧ́емь, и҆ добродѣ́телїю свѣтѧ́сѧ зовы́й: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Колесни́ца та́инственнаѧ, носѧ́щаѧ и҆́мѧ гдⷭ҇не, ꙗ҆ви́лсѧ є҆сѝ, прпⷣбне, свѣ́тлостїю дѣ́лъ, и҆ чꙋде́съ ꙗ҆вле́нїемъ, и҆ чистото́ю житїѧ̀, взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Сыноположе́нъ бж҃е́ственною благода́тїю, снаслѣ́дникъ хрⷭ҇то́въ бы́лъ є҆сѝ, и҆ бога́тство нбⷭ҇ное и҆ црⷭ҇тво непрее́мное прїѧ́лъ є҆сѝ, бг҃оглаго́ливе, зовѧ̀: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Мѵ́ро ᲂу҆́мное и҆стоще́нное, дв҃о, и҆менꙋ́ема сн҃а чревоноси́ла є҆сѝ, кꙋре́нїемъ бж҃ества̀ земны̑ѧ бл҃гово́нствꙋюща, и҆ ѿ тлѝ и҆збавлѧ́ющаго взыва́ющыѧ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. Тѣ́мъ всепѣ́тꙋю бцⷣꙋ велича́емъ."
 },
 {
  "type": "TEXT",
  "value": "Ст҃ы́хъ жили̑ща проходи́ти сподо́билсѧ є҆сѝ, житїѐ соверши́въ свѧ́то, прпⷣбне: и҆ ꙗ҆́кѡ сꙋ́щꙋ пра́веднꙋ тебѣ̀ трисвѣ́тлый возсїѧ̀ свѣ́тъ, и҆ тогѡ̀ сопрꙋ́гъ весе́лїе прїѧ́ше."
 },
 {
  "type": "TEXT",
  "value": "Трꙋдѡ́въ воздаѧ́нїе ѿ хрⷭ҇та̀ прїе́мъ, и҆ жи́зни вѣ́чныѧ ꙗ҆́вѣ причасти́всѧ, и҆ па́че ᲂу҆ма̀ благолѣ́пїѧ добро́тами, ѻ҆́ч҃е, преизѧ́ществованъ, ѡ҆ пою́щихъ тѧ̀ ко влⷣцѣ моли́сѧ."
 },
 {
  "type": "TEXT",
  "value": "Ꙗ҆́кѡ ке́дръ высокове́рхїй добродѣ́телїю возвыша́емь, во дво́рѣхъ, бг҃оно́се, бж҃їихъ насажде́нъ бы́лъ є҆сѝ, и҆ ꙗ҆́кѡ заключе́нъ ѻ҆гра́дъ, ꙗ҆́кѡ благоцвѣты́й ра́й ꙗ҆ви́лсѧ є҆сѝ, и҆ ꙗ҆́кѡ и҆сто́чникъ кипѧ́щїй и҆сцѣле́нїй дарова́нїѧ."
 },
 {
  "type": "TEXT",
  "value": "Бг҃оро́диченъ: Черто́гъ была̀ є҆сѝ па́че ᲂу҆ма̀ воплоти́вшагѡсѧ сло́ва, дв҃о бг҃ороди́тельнице, ѡ҆дѣ́ѧна сла́вою добродѣ́телей и҆ ᲂу҆кра́шенна. Тѣ́мъ тѧ̀, всенепоро́чнаѧ, бцⷣꙋ возвѣща́емъ."
 },
 {
  "type": "HEADER",
  "value": "Свѣти́ленъ:"
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Мїрска́гѡ пристра́стїѧ ꙗ҆́кѡ стра́стна ᲂу҆клони́лсѧ є҆сѝ, и҆ безпи́щїемъ пло́ть ᲂу҆вѧди́въ, ѡ҆бновлѧ́еши брозды̀ держа́щихъ, и҆ сла́вою ѡ҆богати́лсѧ є҆сѝ чꙋдодѣ́йствꙋѧ и҆зрѧ̑днаѧ, пастыренача́льникѡвъ ве́рхъ, бг҃опрїѧ́тне і҆ларїѡ́не."
 },
 {
  "type": "TEXT",
  "value": "Бг҃оро́диченъ: Во двꙋ́хъ хотѣ́нїихъ и҆ є҆стества́хъ, всенепоро́чнаѧ, є҆ди́нѣй же ѵ҆поста́си ражда́еши бг҃а неизрече́ннѡ, на́съ ра́ди ѡ҆бнища́вшаго до крⷭ҇та̀ хотѣ́нїемъ, и҆ дарова́вшаго на́мъ бжⷭ҇тва̀ бога́тство, бг҃ома́ти дв҃о."
 },
 {
  "type": "HEADER",
  "value": "На стїхо́внѣ ѻ҆ктѡ́иха. Сла́ва, гла́съ в҃. Самогла́сенъ:"
 },
 {
  "type": "TEXT",
  "value": "Ти́хое твоѐ, ѻ҆́ч҃е, и҆ чи́стое житїѐ ви́дѣвъ хрⷭ҇то́съ, кро́ткое и҆ молчали́вое, ѻ҆би́тель сотворѝ въ тебѣ̀, и҆ бы́лъ є҆сѝ жили́ще бжⷭ҇твенное. И҆ сегѡ̀ ра́ди со а҆́гг҃лы на нб҃сѣ́хъ водворѧ́ешисѧ, блаже́нне."
 },
 {
  "type": "HEADER",
  "value": "И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ."
 },
 {
  "type": "TEXT",
  "value": "Подо́бенъ: Є҆гда̀ ѿ дре́ва:"
 },
 {
  "type": "TEXT",
  "value": "Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бла́гость, чл҃вѣколю́бче."
 },
 {
  "type": "HEADER",
  "value": "На лїтꙋргі́и: Бл҃жє́нна ѻ҆ктѡ́иха, на д҃: и҆ ст҃а́гѡ пѣ́снь г҃, на д҃."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми."
 },
 {
  "type": "HEADER",
  "value": "А҆пⷭ҇лъ къ корі́нѳѧнѡмъ, зача́ло рп҃и."
 },
 {
  "type": "TEXT",
  "value": "А҆ллилꙋ́їа, гла́съ ѕ҃: Блаже́нъ мꙋ́жъ боѧ́йсѧ гдⷭ҇а."
 },
 {
  "type": "HEADER",
  "value": "Є҆ѵⷢ҇лїе лꙋкѝ, зача́ло к҃д."
 },
 {
  "type": "TEXT",
  "value": "Прича́стенъ: Въ па́мѧть вѣ́чнꙋю."
 }
]