ponomar-pwa/static/data/shared/menaion-daily/11-23/1.json

[
 {
  "type": "HEADER",
  "value": "Ное́мврїа к҃г"
 },
 {
  "type": "HEADER",
  "value": "И҆́же во ст҃ы́хъ, ѻ҆тє́цъ на́шихъ, а҆мфїло́хїа, є҆пі́скопа і҆коні́йскагѡ."
 },
 {
  "type": "HEADER",
  "value": "И҆ григо́рїа, є҆пі́скопа а҆краганті́йскагѡ."
 },
 {
  "type": "HEADER",
  "value": "На Гдⷭ҇и, воззва́хъ, стїхи̑ры ст҃ы́хъ на ѕ҃."
 },
 {
  "type": "HEADER",
  "value": "Стїхи̑ры ст҃а́гѡ а҆мфїло́хїа, гла́съ д҃."
 },
 {
  "type": "TEXT",
  "value": "Подо́бенъ: Да́лъ є҆сѝ зна́менїе:"
 },
 {
  "type": "TEXT",
  "value": "Нра́въ самовла́стный и҆ по́мыслъ самодержа́вный на стра̑сти наслѣ́довавъ, лꙋ́чшемꙋ да́лъ є҆сѝ ᲂу҆модержа́вно, всебл҃же́нне, влады́чество на го́ршее, мѣ́риломъ пра́веднѣйшимъ, ѻ҆́ч҃е, ᲂу҆равни́въ. Сегѡ̀ ра́ди ключи́мый къ бг҃овидѣ́нїю бы́лъ є҆сѝ и҆ бг҃а разꙋмѣ́нїю, і҆ера́рше бг҃одохнове́нне."
 },
 {
  "type": "TEXT",
  "value": "Сѣ̑ти сокрꙋши́лъ є҆сѝ, и҆ ловлє́нїѧ разрꙋши́лъ є҆сѝ є҆ресе́й, прпⷣбне, догма́тѡвъ пра́востїю, и҆ бг҃осло́вїемъ и҆звѣ́стнѣйшимъ, раздѣле́нїѧ и҆збѣ́гъ, и҆ ѕлѣ́йшагѡ, ѻ҆́ч҃е, стѣсне́нїѧ. Въ предѣ́лехъ же пребы́въ благочести́выѧ на́шеѧ вѣ́ры, трⷪ҇цꙋ проповѣ́далъ є҆сѝ во є҆ди́ницѣ бжⷭ҇тва̀."
 },
 {
  "type": "TEXT",
  "value": "Хи́тростнѡ ᲂу҆мꙋдри́въ на землѝ ца́рствꙋющаго, тогѡ̀ прете́клъ є҆сѝ сы́на непокло́нна, разꙋ́мнѡ наꙋча́ѧ, ꙗ҆́кѡ непокло́ннꙋ презира́емꙋ сн҃ꙋ, негодꙋ́етъ ѻ҆ц҃ъ теплѣ́йше, и҆́же сего̀ пре́жде вѣ̑къ роди́въ па́че ᲂу҆ма̀ нестра́стнѡ, ꙗ҆́кѡ безтѣле́сна, ꙗ҆́кѡ то́й вѣ́сть, прпⷣбне."
 },
 {
  "type": "HEADER",
  "value": "И҆́ны стїхи̑ры, ст҃а́гѡ григо́рїа, гла́съ и҃."
 },
 {
  "type": "TEXT",
  "value": "Подо́бенъ: Ѽ пресла́внагѡ чꙋдесѐ!"
 },
 {
  "type": "TEXT",
  "value": "Ѻ҆́ч҃е свѧще́нне григо́рїе, ѿ пеле́нъ бг҃ꙋ возложе́нъ прилѣпи́всѧ, неѡсла́бными мановє́нїи всѧ̑ сотво́ршемꙋ, и҆ ᲂу҆жѐ ѿ сегѡ̀ ѡ҆блистава́емь, страсте́й преше́лъ є҆сѝ но́щь, и҆ возсїѧ́лъ є҆сѝ свѣ́тъ врачева́нїй и҆ чꙋде́съ бл҃года́ти, ѿгонѧ̀ многолѣ̑тныѧ недꙋ́ги, и҆ прелє́стныѧ дꙋ́хи."
 },
 {
  "type": "TEXT",
  "value": "Ѻ҆́ч҃е чꙋ́дный григо́рїе, свѣтоѧвле́ньми ᲂу҆́мъ чи́стѡ ѡ҆блиста̀, страсте́й ᲂу҆спи́лъ є҆сѝ многово́лненное мо́ре, и҆ безстра́стїемъ лета́ѧ чистѣ́йшими кри́лы дости́глъ є҆сѝ, и҆дѣ́же неизрече́ннаѧ добро́та и҆ недомы́сленнаѧ, ѡ҆ на́съ всегда̀ молѧ́сѧ, благохва́лѧщихъ тѧ̀."
 },
 {
  "type": "TEXT",
  "value": "Ѻ҆́ч҃е ѻ҆тцє́въ григо́рїе, свѧще́нства пра́вило, цѣломꙋ́дрїѧ ѻ҆́бразъ, мона́шествꙋющихъ крѣ́пость, цр҃кве ᲂу҆твержде́нїе, любвѐ свѣти́льникъ, престо́лъ чꙋ́вства, и҆сто́чникъ чꙋде́съ, ѧ҆зы́къ ѻ҆гнедохнове́нный, ᲂу҆ста̀ сладкоглагѡ́лива, сосꙋ́дъ бжⷭ҇твеннагѡ дх҃а, и҆ ᲂу҆́мный бы́лъ є҆сѝ ра́й, бг҃облаже́нне."
 },
 {
  "type": "HEADER",
  "value": "Сла́ва, и҆ ны́нѣ, гла́съ д҃:"
 },
 {
  "type": "TEXT",
  "value": "Прїиди́те, всѝ вѣ́рнїи, є҆ди́нꙋ непоро́чнꙋю восхва́лимъ, ѿ прⷪ҇ро́кѡвъ проповѣ́даннꙋю, и҆ въ хра́мъ приведе́ннꙋю, пре́жде вѣ̑къ пронарече́ннꙋю мт҃рь, и҆ въ послѣ̑днѧѧ лѣ̑та ꙗ҆́вльшꙋюсѧ бцⷣꙋ. Гдⷭ҇и, моли́твами є҆ѧ̀, ми́ръ тво́й пода́ждь на́мъ и҆ ве́лїю ми́лость."
 },
 {
  "type": "HEADER",
  "value": "На стїхо́внѣ стїхи̑ры, гла́съ а҃."
 },
 {
  "type": "TEXT",
  "value": "Подо́бенъ: Нбⷭ҇ныхъ чинѡ́въ:"
 },
 {
  "type": "TEXT",
  "value": "Да приведꙋ́тсѧ, глаго́летъ бг҃оѻте́цъ дв҃дъ, цр҃ю̀ дѣ̑вы въ хра́мъ гдⷭ҇ень, въ слѣ́дъ тебє̀, дв҃о, со свѣ́тлыми свѣща́ми ликовствꙋ́юще, и҆ во ст҃а̑ѧ приводѧ́ще тѧ̀, чⷭ҇таѧ ꙗ҆́кѡ ст҃ы́й кївѡ́тъ бж҃їй."
 },
 {
  "type": "TEXT",
  "value": "Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀."
 },
 {
  "type": "TEXT",
  "value": "Да ᲂу҆гото́вѧтсѧ двє́ри и҆ да ѿверза́ютсѧ хра́ма гдⷭ҇нѧ, и҆ до́мъ сла́вы, и҆ є҆ди́нꙋ пребо́льшꙋю нб҃съ, па́че ᲂу҆ма̀ бы́вшꙋю, да прїе́млютъ ра́дꙋющесѧ, и҆ хрⷭ҇та̀ сп҃са да воспою́тъ."
 },
 {
  "type": "TEXT",
  "value": "Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ."
 },
 {
  "type": "TEXT",
  "value": "Да ѿверза́ютсѧ двє́ри бжⷭ҇твеннѣйшагѡ хра́ма, да прїе́млютъ внꙋ́трь нбⷭ҇нꙋю две́рь, и҆ да торжествꙋ́етъ человѣ́ческое є҆стество̀, и҆ да взыгра́ютъ а҆́гг҃ли, спра́зднꙋюще ѻ҆боѝ кꙋ́пнѡ съ на́ми бг҃ома́тере вхо́дъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ є҃:"
 },
 {
  "type": "TEXT",
  "value": "Возсїѧ̀ де́нь ра́достенъ и҆ пра́здникъ всече́стенъ: дне́сь бо, ꙗ҆́же пре́жде ржⷭ҇тва̀ и҆ по ржⷭ҇твѣ̀ дв҃а пребы́вши, въ хра́мъ гдⷭ҇ень приво́дитсѧ, и҆ ра́дꙋетсѧ заха́рїа ста́рецъ, роди́тель прⷣте́чевъ, и҆ вопїе́тъ ве́селѡ: прибли́жисѧ предста́тельница скорбѧ́щихъ въ хра́мъ ст҃ы́й, ꙗ҆́кѡ ст҃а́ѧ, ѡ҆свѧти́тисѧ во ѻ҆би́телище всецр҃ѧ̀. Да весели́тсѧ і҆ѡакі́мъ пра́ѻтецъ, и҆ а҆́нна да ра́дꙋетсѧ, ꙗ҆́кѡ принесо́ша бг҃ꙋ, ꙗ҆́кѡ трилѣ́тствꙋющꙋю ю҆́ницꙋ, непоро́чнꙋю влⷣчцꙋ. Ма́тєри, сра́дꙋйтесѧ, дѣ̑вы, взыгра́йте, и҆ непло́ды, сликовствꙋ́йте, ꙗ҆́кѡ ѿве́рзе на́мъ нбⷭ҇ное црⷭ҇тво пронарече́ннаѧ всецр҃и́ца. Ра́дꙋйтесѧ, лю́дїе, и҆ весели́тесѧ."
 },
 {
  "type": "HEADER",
  "value": "Тропа́рь гла́съ д҃:"
 },
 {
  "type": "TEXT",
  "value": "Бж҃е ѻ҆те́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ."
 },
 {
  "type": "HEADER",
  "value": "Сла́ва, и҆ ны́нѣ, пра́здника."
 },
 {
  "type": "HEADER",
  "value": "На ᲂу҆́трени, на Бг҃ъ гдⷭ҇ь, тропа́рь пра́здника, два́жды."
 },
 {
  "type": "HEADER",
  "value": "Сла́ва, ст҃ы́хъ: И҆ ны́нѣ, пра́здника."
 },
 {
  "type": "HEADER",
  "value": "По а҃-мъ стїхосло́вїи, сѣда́ленъ, гла́съ а҃."
 },
 {
  "type": "TEXT",
  "value": "Подо́бенъ: Ка́мени запеча́танꙋ:"
 },
 {
  "type": "TEXT",
  "value": "Ст҃а́ѧ ст҃ы́хъ, бцⷣе, сꙋ́щи, досто́йнѡ приведе́сѧ жи́ти во ст҃а̑ѧ, ꙗ҆́кѡ ѡ҆дꙋшевле́нъ гдⷭ҇ень кївѡ́тъ, и҆ ст҃а́гѡ дх҃а и҆́стиннѡ вмѣсти́лище бжⷭ҇твенное, дв҃о мт҃и. Тѣ́мже всели́сѧ въ тѧ̀, и҆́же ѻ҆ц҃ꙋ̀ є҆диноро́дный, и҆ ст҃о́мꙋ дх҃ꙋ соесте́ственный, тво́й сн҃ъ неискꙋсомꙋ́жнѡ, ѡ҆бг҃отвори́въ всѐ человѣ́чество."
 },
 {
  "type": "HEADER",
  "value": "Сла́ва, и҆ ны́нѣ, то́йже."
 },
 {
  "type": "HEADER",
  "value": "По в҃-мъ стїхосло́вїи, сѣда́ленъ, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ:"
 },
 {
  "type": "TEXT",
  "value": "Весе́лїѧ дне́сь вселе́ннаѧ и҆спо́лнисѧ всѧ̑, въ благознамени́томъ пра́здницѣ бцⷣы, зовꙋ́щи: та̀ є҆́сть сѣ́нь нбⷭ҇наѧ."
 },
 {
  "type": "HEADER",
  "value": "Сла́ва, и҆ ны́нѣ, то́йже:"
 },
 {
  "type": "HEADER",
  "value": "Канѡ́нъ пра́здника, гла́съ а҃, со і҆рмосо́мъ на ѕ҃: І҆рмосы̀ по два́жды."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ."
 },
 {
  "type": "TEXT",
  "value": "Стеце́мсѧ дне́сь бцⷣꙋ почита́юще пѣ́сньми, и҆ торжествꙋ́имъ дꙋхо́вный пра́здникъ: въ хра́мъ бо бг҃ꙋ да́ръ прино́ситсѧ."
 },
 {
  "type": "TEXT",
  "value": "Пѣ́сньми да воспои́мъ бцⷣы сла́вное предше́ствїе: къ хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески, да́ръ многоцѣ́нный."
 },
 {
  "type": "TEXT",
  "value": "А҆́нна непоро́чнаѧ ра́довашесѧ, ꙗ҆́кѡ да́ръ многоцѣ́ненъ бг҃ꙋ приносѧ́щи въ хра́мъ ма́терски: і҆ѡакі́мъ же съ не́ю торжествꙋ́етъ свѣ́тлѡ."
 },
 {
  "type": "TEXT",
  "value": "Дв҃дъ, пра́ѻтецъ тво́й воспѣ́ тѧ дре́вле, дв҃о бг҃оневѣ́сто, дще́рь глаго́лѧ тѧ̀ цр҃ѧ̀ хрⷭ҇та̀. Є҆го́же и҆ роди́вши ма́терски млⷣнца дои́ла є҆сѝ."
 },
 {
  "type": "HEADER",
  "value": "И҆ ст҃ы́хъ два̀, на и҃. Канѡ́нъ ст҃а́гѡ а҆мфїло́хїа, ѳеофа́ново, гла́съ д҃, є҆гѡ́же краегране́сїе:"
 },
 {
  "type": "TEXT",
  "value": "Пре́лести смѣю́щасѧ пою̀ па́стырѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть."
 },
 {
  "type": "TEXT",
  "value": "Словеса̀ ѕлочести́выхъ є҆ресе́й и҆ кичє́нїѧ, правосла́вїѧ заре́ю просвѣще́нъ, ᲂу҆до́бнѡ разори́лъ є҆сѝ: въ не́мже тебѐ чтꙋ́щыѧ, свѧщенноѧвле́нне, сохранѝ."
 },
 {
  "type": "TEXT",
  "value": "И҆́же всѣ́хъ спасе́нїѧ при́снѡ хотѧ́й гдⷭ҇ь, свѧще́нныѧ тѧ̀ па́ствы пꙋтевожда̀, і҆ера́рше, предлага́етъ, сло́вомъ и҆ житїе́мъ свѣтѧ́ща и҆зрѧ́днѡ ви́дѣвъ."
 },
 {
  "type": "TEXT",
  "value": "Зако́ннѡ пострада́ти и҆збра́въ по хрⷭ҇то́вѣ цр҃кви, всеѻрꙋ́жїемъ, ѻ҆́ч҃е, крⷭ҇та̀ себѐ ѡ҆гради́лъ є҆сѝ, и҆ побѣди́тель благода́тїю и҆ вѣне́чникъ ꙗ҆ви́лсѧ є҆сѝ, сла́вне."
 },
 {
  "type": "TEXT",
  "value": "Бг҃оро́диченъ: Сло́во ѻ҆ц҃ꙋ̀ собезнача́льное, и҆ соприсносꙋ́щное, и҆ тогѡ̀ сꙋщества̀ зра́къ, ро́ждшемꙋ сꙋ́ща, и҆зъ тебє̀ воплоще́нна родила̀ є҆сѝ несказа́ннѡ, неискꙋсобра́чнаѧ."
 },
 {
  "type": "HEADER",
  "value": "И҆́нъ канѡ́нъ ст҃а́гѡ григо́рїа, і҆ѡ́сифово, гла́съ и҃, є҆гѡ́же краегране́сїе:"
 },
 {
  "type": "TEXT",
  "value": "Чꙋдодѣ́йственномꙋ григо́рїю почꙋди́сѧ."
 },
 {
  "type": "HEADER",
  "value": "Пѣ́снь а҃."
 },
 {
  "type": "TEXT",
  "value": "І҆рмо́съ: Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ."
 },
 {
  "type": "TEXT",
  "value": "Зарѧ́ми дх҃а просвѣща́емь при́снѡ, свѧще́нне григо́рїе, и҆ свѣтоза́рна ѕвѣзда̀ бы́въ, всего́ мѧ ѡ҆зарѝ моли́твами твои́ми, ꙗ҆́кѡ да воспою́ тѧ."
 },
 {
  "type": "TEXT",
  "value": "И҆́же предвѣ́децъ всѣ́хъ, ѡ҆благода́тствивъ ᲂу҆́мъ тво́й бг҃ода́нными сїѧ́ньми, ѿ пеле́нъ тѧ̀ ѡ҆свѧща́етъ, бжⷭ҇твенными добродѣ́тельми сїѧ́ти хотѧ́ща, ѻ҆́ч҃е, и҆ чꙋдесы̀."
 },
 {
  "type": "TEXT",
  "value": "Дрема́нїе ѿ вѣ́ждей ᲂу҆ны́нїѧ ѿве́ргъ, свѣти́льникъ бо́дрый ты̀ ꙗ҆ви́лсѧ є҆сѝ, бг҃оно́се, показа́въ вещмѝ зва́нїе твоѐ, григо́рїе и҆́стинствꙋющее."
 },
 {
  "type": "TEXT",
  "value": "Бг҃оро́диченъ: Бцⷣꙋ тѧ̀ госпо́дственнѡ и҆ и҆́стиннѡ и҆сповѣ́дꙋю: родила́ бо є҆сѝ гдⷭ҇а несказа́ннѡ, во двꙋ̀ сꙋщества́хъ и҆ хотѣ́нїихъ, пречⷭ҇таѧ дв҃о, разꙋмѣва́ема."
 },
 {
  "type": "HEADER",
  "value": "Пѣ́снь г҃."
 },
 {
  "type": "TEXT",
  "value": "І҆рмо́съ: Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне."
 },
 {
  "type": "TEXT",
  "value": "Торжествꙋ́имъ празднолю́бцы, и҆ сра́дꙋимсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ."
 },
 {
  "type": "TEXT",
  "value": "І҆ѡакі́ме, ра́дꙋйсѧ дне́сь, и҆ весели́сѧ, а҆́нно, дх҃омъ, рожде́ннꙋю и҆зъ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чи́стꙋ всенепоро́чнꙋю."
 },
 {
  "type": "TEXT",
  "value": "Бж҃їе селе́нїе во хра́мъ ст҃ы́й приво́дитсѧ бцⷣа марїа́мъ, пло́тїю трилѣ́тствꙋющаѧ, и҆ то́й свѣщесвѣ́тѧтъ дѣ̑вы, предтекꙋ́ще."
 },
 {
  "type": "TEXT",
  "value": "Бж҃їѧ а҆́гница небла́зненнаѧ, и҆ голꙋби́ца нескве́рнаѧ, бг҃овмѣсти́маѧ ски́нїѧ, сла́вы ѡ҆свѧще́нїе, въ ски́нїи ст҃ѣ́й ѡ҆бита́ти и҆збра̀."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе."
 },
 {
  "type": "TEXT",
  "value": "Бжⷭ҇твенное и҆ свѣтоза́рное твои́хъ догма́тѡвъ сїѧ́нїе, погасѝ ѕлочести́вый по́лкъ є҆реті́ческїй, а҆мфїло́хїе сла́вне."
 },
 {
  "type": "TEXT",
  "value": "Во́дъ животво́рныхъ ꙗ҆́кѡ рѣка̀ сы́й ѿ бг҃а и҆спо́лнена, первосвѧще́нникъ бы́въ, и҆́миже благочести́вїи напаѧ́емсѧ."
 },
 {
  "type": "TEXT",
  "value": "Бога́тыми лꙋча́ми просвѣща́емь, ᲂу҆́мъ ѡ҆сїѧ́лъ є҆сѝ та́йнымъ, прпⷣбне, твои́хъ ᲂу҆че́нїй благолѣ́пїемъ."
 },
 {
  "type": "TEXT",
  "value": "Бг҃оро́диченъ: Свѣ́щникъ тѧ̀ свѣтоза́рный, и҆ дꙋшепита́тельнꙋю благоче́стїѧ трапе́зꙋ, и҆ кївѡ́тъ, пречⷭ҇таѧ, всѝ вѣ́рнїи возвѣща́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ."
 },
 {
  "type": "TEXT",
  "value": "Сегѡ̀ ра́ди тво́й прїе́мъ, ѻ҆́ч҃е, трꙋ́дъ зижди́тель, ста́рцꙋ приведе́ тѧ въ пꙋсты́ню, ᲂу҆ча́щꙋ тѧ̀, григо́рїе, всѧ́кагѡ писа́нїѧ сказа́нїю."
 },
 {
  "type": "TEXT",
  "value": "Всю̀ провожда́ѧ седми́цꙋ безпи́щенъ, ѻ҆́ч҃е, пита́лсѧ є҆сѝ снѣ́дїю нбⷭ҇ною, твои́хъ сле́зъ дожде́мъ напаѧ́емь, и҆ бжⷭ҇твеннѡ наслажда́емь."
 },
 {
  "type": "TEXT",
  "value": "Ѿ бг҃а тебѣ̀, і҆ера́рше, простра́нство се́рдца даде́сѧ: и҆сточи́лъ бо є҆сѝ бога́тнѡ ᲂу҆че́нїй чистѣ́йшыѧ вѡ́ды, сердца̀ вѣ́рныхъ напаѧ́ющыѧ."
 },
 {
  "type": "TEXT",
  "value": "Бг҃оро́диченъ: Глаго́лы проповѣ́дникѡвъ бг҃оглаго́ливыхъ и҆спо́лнишасѧ: се́ бо родѝ дв҃а мла́до ѻ҆троча̀, а҆да́ма дре́внѣйшее и҆ сопресто́льное роди́телю."
 },
 {
  "type": "HEADER",
  "value": "Конда́къ пра́здника, гла́съ д҃."
 },
 {
  "type": "TEXT",
  "value": "Подо́бенъ: Вознесы́йсѧ:"
 },
 {
  "type": "TEXT",
  "value": "Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆̀же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное."
 },
 {
  "type": "TEXT",
  "value": "І҆́косъ: Неизрече́нныхъ бж҃їихъ и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋ, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное."
 },
 {
  "type": "HEADER",
  "value": "И҆ конда́къ григо́рїа, гла́съ д҃."
 },
 {
  "type": "TEXT",
  "value": "Подо́бенъ: Ꙗ҆ви́лсѧ є҆сѝ дне́сь."
 },
 {
  "type": "TEXT",
  "value": "Свѣтолꙋ́чными сїѧ̑нїи цр҃ковь ст҃а́гѡ дх҃а свѣтово́дитъ свѣ́тлое соверша́ющыѧ твоѐ ᲂу҆спе́нїе, прпⷣбне ѻ҆́ч҃е всеблаже́нне григо́рїе."
 },
 {
  "type": "HEADER",
  "value": "Сѣда́ленъ, гла́съ то́йже."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Просвѣща́еши концы̀ въ твое́й па́мѧти, мꙋ́дре: тѣ́ло бо твоѐ и҆сточа́етъ и҆сцѣле́нїй и҆сто́чникъ, а҆мфїло́хїе сла́вне. Тѣ́мже и҆ не́мощи и҆збавлѧ́еши всѧ́кїѧ, вѣ́рою приходѧ́щыѧ къ честно́мꙋ твоемꙋ̀ хра́мꙋ: сегѡ̀ ра́ди и҆ ны́нѣ молѝ спасти́сѧ на́мъ."
 },
 {
  "type": "HEADER",
  "value": "Сла́ва, гла́съ и҃."
 },
 {
  "type": "TEXT",
  "value": "Подо́бенъ: Премꙋ́дрости:"
 },
 {
  "type": "TEXT",
  "value": "Ѿ пеле́нъ гдⷭ҇ꙋ возложе́нъ, ꙗ҆́кѡ дре́вле пресла́вный самꙋи́лъ, та́кожде зовꙋ́щагѡ тѧ̀ сп҃са послꙋ́шалъ є҆сѝ, и҆ дꙋ́шꙋ ѡ҆чи́стивъ до́брыхъ подаѧ́ньми, свѧще́нства благода́ть досто́йнѡ взѧ́лъ є҆сѝ. Тѣ́мже на ѕла́цѣ бжⷭ҇твеннагѡ зна́нїѧ па́ствовавъ па́ствꙋ, врачева́нїй и҆зблиста́лъ є҆сѝ дѣ̑йства, григо́рїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀."
 },
 {
  "type": "HEADER",
  "value": "И҆ ны́нѣ, пра́здника, гла́съ д҃."
 },
 {
  "type": "TEXT",
  "value": "Подо́бенъ: Ско́рѡ предварѝ:"
 },
 {
  "type": "TEXT",
  "value": "Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопі́й: вни́ди, гпⷭ҇жѐ, въ хра́мъ цр҃е́въ, вни́ди: є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ, хрⷭ҇то́съ."
 },
 {
  "type": "HEADER",
  "value": "Пѣ́снь д҃."
 },
 {
  "type": "TEXT",
  "value": "І҆рмо́съ: Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. Сла́ва си́лѣ твое́й, гдⷭ҇и."
 },
 {
  "type": "TEXT",
  "value": "Прⷪ҇ро́че и҆са́їе, прорцы̀ на́мъ: дв҃а кто̀ є҆́сть, и҆мꙋ́щаѧ во чре́вѣ; ꙗ҆́же и҆зъ і҆ꙋ́дина ко́рене прозѧ́бши, и҆ ро́ждшисѧ и҆зъ дв҃да царѧ̀, сѣ́мене ст҃а́гѡ, пло́дъ бл҃госла́вный."
 },
 {
  "type": "TEXT",
  "value": "Начина́йте, дѣ̑вы, и҆ воспо́йте пѣ̑сни, рꙋка́ми держа́ще свѣщы̀, чⷭ҇тыѧ бцⷣы предше́ствїе хва́лѧще, ны́нѣ грѧдꙋ́щыѧ во хра́мъ бж҃їй кꙋ́пнѡ съ на́ми пра́зднꙋюще."
 },
 {
  "type": "TEXT",
  "value": "І҆ѡакі́ме и҆ а҆́нно, весели́тесѧ ны́нѣ, во хра́мъ приводѧ́ще гдⷭ҇ень чⷭ҇тꙋю бг҃а мт҃рь, хрⷭ҇та̀ всецр҃ѧ̀ бꙋ́дꙋщꙋю, ѿ ва́съ же ро́ждшꙋюсѧ, ꙗ҆́кѡ трилѣ́тствꙋющꙋю ю҆́ницꙋ."
 },
 {
  "type": "TEXT",
  "value": "Ст҃а́ѧ ст҃ы́хъ сꙋ́щи, чⷭ҇таѧ, во хра́мъ ст҃ы́й возлюби́ла є҆сѝ всели́тисѧ, и҆ со а҆́гг҃лы, дв҃о, бесѣ́дꙋющи пребыва́еши пресла́внѣ, съ небесѐ хлѣ́бъ прїе́млющи, пита́тельнице жи́зни."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и."
 },
 {
  "type": "TEXT",
  "value": "А҆мфїло́хїа бжⷭ҇твеннагѡ и҆ бг҃оглаго́ливагѡ свѧще́нное торжество̀, бг҃омꙋ́дрїи, прїиди́те вѣ́рою воспле́щимъ, тогѡ̀ ᲂу҆че́ньми и҆ бг҃осло́вїемъ ᲂу҆крѣплѧ́еми."
 },
 {
  "type": "TEXT",
  "value": "Невѣстово́децъ, бг҃оно́се, цр҃кве сꙋ́щїѧ въ хрⷭ҇тѣ̀ бы́въ, добро́тою слове́съ сїю̀ ᲂу҆краси́лъ є҆сѝ, и҆ красото́ю правосла́вїѧ ᲂу҆ѧсни́лъ є҆сѝ."
 },
 {
  "type": "TEXT",
  "value": "Бг҃осло́вный тво́й ѧ҆зы́къ и҆ бг҃оглаго́ливый, нача́льныѧ трⷪ҇цы є҆диноче́стнꙋю держа́вꙋ всѣ̑мъ ᲂу҆ѧснѝ, и҆ є҆ди́но бжⷭ҇тво̀ чти́ти въ тре́хъ ѵ҆поста́сехъ."
 },
 {
  "type": "TEXT",
  "value": "Бг҃оро́диченъ: Но́вꙋю ски́нїю тѧ̀, дв҃о, разꙋмѣва́емъ, и҆ чи́стое ст҃и́лище всѣ́хъ влⷣки: того́ бо родила̀ є҆сѝ пло́тїю по ѵ҆поста́си сте́кшасѧ, всенепоро́чнаѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопло́щсѧ. Сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й."
 },
 {
  "type": "TEXT",
  "value": "Землѧ̀ ꙗ҆́кѡ добра̀, процвѣ́лъ є҆сѝ стори́чествꙋющїй, ѻ҆́ч҃е, кла́съ, и҆ серпо́мъ твои́хъ ᲂу҆че́нїй пожа́лъ є҆сѝ є҆реті́ческое ѕлочести́вое мнѣ́нїе, собо́ра побо́рникъ ꙗ҆ви́всѧ, прпⷣбне григо́рїе."
 },
 {
  "type": "TEXT",
  "value": "Нбⷭ҇ный тѧ̀ сꙋ́дъ а҆рхїере́а, бж҃їй ᲂу҆го́дниче, показꙋ́етъ до́брѣ пꙋтево́дствити па́ствꙋ, ю҆́же стѧжа̀ кро́вїю хрⷭ҇то́съ, провѣ́дый твоеѧ̀ дꙋшѝ, ѻ҆́ч҃е, свѣ́тлость."
 },
 {
  "type": "TEXT",
  "value": "Хра́мъ бж҃їй бы́лъ є҆сѝ ѡ҆чище́нъ страсте́й скве́рны, и҆ въ хра́мѣ свѧще́ннѣмъ предстоѧ̀, дх҃а прише́ствїе прїѧ́лъ є҆сѝ ꙗ҆́вѣ, ви́домъ чⷭ҇тыѧ голꙋби́цы, хрⷭ҇тꙋ́ тѧ просла́вльшꙋ."
 },
 {
  "type": "TEXT",
  "value": "Бг҃оро́диченъ: Ро́дъ человѣ́ческїй спасе́сѧ, па́че ᲂу҆ма̀ твои́мъ рождество́мъ: и҆ сꙋ́щїи во тмѣ̀ тлѣ́нїѧ, пречⷭ҇таѧ влⷣчце, ви́дѣша свѣ́тъ возсїѧ́вшїй и҆зъ чре́ва твоегѡ̀, вино́внагѡ на́шегѡ, ѻ҆трокови́це, воззда́нїѧ."
 },
 {
  "type": "HEADER",
  "value": "Пѣ́снь є҃."
 },
 {
  "type": "TEXT",
  "value": "І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ."
 },
 {
  "type": "TEXT",
  "value": "Да свѣтлоно́симъ, правосла́внїи всѝ, стека́ющесѧ и҆ сла́вѧще бг҃ома́терь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва благопрїѧ́тна."
 },
 {
  "type": "TEXT",
  "value": "Да веселѧ́тсѧ пра́ѻтцы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ."
 },
 {
  "type": "TEXT",
  "value": "Многоимени́тꙋю и҆ сла́внѣйшꙋю, непоро́чнꙋю ю҆́ницꙋ, ꙗ҆́кѡ пло́тїю ро́ждшꙋю бжⷭ҇твеннаго тельца̀, всѝ воспои́мъ, вѣ́рнѡ пра́зднꙋюще."
 },
 {
  "type": "TEXT",
  "value": "Оу҆невѣ́щенїѧ написꙋ́ютсѧ бжⷭ҇твєннаѧ зна́мєнїѧ, па́че ᲂу҆ма̀ ржⷭ҇тва̀ твоегѡ̀, чⷭ҇таѧ дв҃о, дне́сь дх҃омъ ст҃ы́мъ въ домꙋ̀ бж҃їи."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀."
 },
 {
  "type": "TEXT",
  "value": "Просвѣща́емь свѣ́томъ трисо́лнечнагѡ бжⷭ҇тва̀, сѣ́лъ є҆сѝ на прⷭ҇то́лѣ а҆рхїере́йства, бг҃омꙋ́дре а҆мфїло́хїе."
 },
 {
  "type": "TEXT",
  "value": "Всецѣ́ла тебѐ сама́го бг҃ꙋ ѡ҆свѧти́лъ є҆сѝ, и҆ бы́лъ є҆сѝ бг҃опроповѣ́дникъ велегла́сенъ, ѻ҆́ч҃е, всебл҃же́нне а҆мфїло́хїе."
 },
 {
  "type": "TEXT",
  "value": "Ра́достный на́мъ пра́здникъ и҆ всесвѧще́нный наста̀, бжⷭ҇твеннагѡ и҆ мꙋ́драгѡ ᲂу҆чи́телѧ, мі́ръ ѡ҆свѧща́ющїй."
 },
 {
  "type": "TEXT",
  "value": "Бг҃оро́диченъ: Ѽ всѣ́хъ вѣ́рныхъ благолѣ́пное ᲂу҆добре́нїе, пречⷭ҇таѧ бг҃омт҃и! Дꙋшѝ моеѧ̀ скве́рнꙋ ѡ҆мы́й моли́твами твои́ми."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀."
 },
 {
  "type": "TEXT",
  "value": "Глаго́ломъ твои́мъ ѡ҆чища́еши смра̑дныѧ не́мѡщи прокаже́ннагѡ и҆ногда̀, прише́дшагѡ къ тебѣ̀ вѣ́рою: ѿ бг҃а бо прїѧ́лъ є҆сѝ благода́ть чꙋде́съ, мꙋ́дре, ꙗ҆́коже є҆лїссе́й бжⷭ҇твенный, бг҃омꙋ́дре григо́рїе."
 },
 {
  "type": "TEXT",
  "value": "Ѿве́рзлъ є҆сѝ моли́твою твое́ю гꙋгни́вагѡ ᲂу҆ста̀ и҆ ᲂу҆́ши, григо́рїе, врачева́нїй, всеблаже́нне, дѣ́йствомъ ѡ҆богати́лсѧ є҆сѝ, и҆ и҆зры́гнꙋлъ є҆сѝ бг҃осло́вїѧ глꙋбинꙋ̀, морѧ̀ безбо́жныхъ и҆зсꙋша́ющꙋ."
 },
 {
  "type": "TEXT",
  "value": "Земна́гѡ пристра́стїѧ ѡ҆чи́щсѧ, ѻ҆́ч҃е, ꙗ҆́кѡ пе́тръ первоизбра́нный а҆пⷭ҇лѡвъ, сѣ́нїю твое́ю цѣлє́нїѧ соверша́еши, содержи̑мыѧ лю́тыми недꙋ́гѡвъ нападе́ньми бжⷭ҇твеннѡ врачꙋ́ѧ."
 },
 {
  "type": "TEXT",
  "value": "Бг҃оро́диченъ: Нѣ́дръ ѻ҆ч҃ескихъ не и҆стощи́въ, во є҆́же воплоща́тисѧ, всенепоро́чнаѧ, въ твои́хъ нѣ́дрѣхъ ви́дитсѧ держи́мь, ꙗ҆́кѡ млⷣнецъ: є҆го́же ми́лостива сотворѝ, благоче́стнѡ тѧ̀ чтꙋ́щымъ, дв҃о бг҃оневѣ́сто."
 },
 {
  "type": "HEADER",
  "value": "Пѣ́снь ѕ҃."
 },
 {
  "type": "TEXT",
  "value": "І҆рмо́съ: Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀."
 },
 {
  "type": "TEXT",
  "value": "Пра́зднꙋимъ, вѣ́рнїи, пра́здникъ дꙋхо́вный мт҃ре бж҃їѧ, воспѣва́юще благоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ."
 },
 {
  "type": "TEXT",
  "value": "Пѣ́сньми дꙋхо́вными восхва́лимъ, вѣ́рнїи, мт҃рь свѣ́та, ꙗ҆́кѡ дне́сь на́мъ ꙗ҆ви́сѧ предходѧ́щи въ хра́мъ бж҃їй."
 },
 {
  "type": "TEXT",
  "value": "Нескве́рнаѧ а҆́гница, и҆ чⷭ҇таѧ голꙋби́ца, приведе́сѧ ѡ҆бита́ти въ до́мъ бж҃їй, ꙗ҆́кѡ непоро́чнаѧ, пронарече́ннаѧ бы́ти мт҃и бж҃їѧ."
 },
 {
  "type": "TEXT",
  "value": "Въ хра́мъ зако́нный вхо́ды соверша́етъ хра́мъ бж҃їй, нбⷭ҇наѧ ски́нїѧ: и҆зъ неѧ́же на́мъ сꙋ́щымъ во тмѣ̀ свѣ́тъ возсїѧ̀."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю."
 },
 {
  "type": "TEXT",
  "value": "Оу҆мертви́въ въ пло́ти долѣре́вностное мꙋдрова́нїе, безстра́стїѧ бл҃года́тїю ѡ҆дѣ́ѧлсѧ є҆сѝ, ѻ҆́ч҃е свѧщеннотаи́нниче, и҆ всечи́стыми ᲂу҆чє́нїи трⷪ҇цꙋ проповѣ́далъ є҆сѝ. Два́жды."
 },
 {
  "type": "TEXT",
  "value": "Стра́хомъ ѡ҆гради́всѧ бжⷭ҇твеннымъ, бг҃опрїѧ́тне, и҆ дꙋ́шꙋ ѿ скве́рнъ чи́стꙋ содѣ́ѧвъ, бг҃осло́вїѧ ꙗ҆ви́лсѧ є҆сѝ свѧще́ннѣйшїй ѻ҆рга́нъ, прпⷣбне."
 },
 {
  "type": "TEXT",
  "value": "Бг҃оро́диченъ: Чи́стое тѧ̀ и҆ ст҃о́е вѣ́дѧще селе́нїе цр҃ѧ̀ сла́вы, и҆ хра́мъ и҆ прⷭ҇то́лъ превысоча́йшагѡ, мо́лимъ дꙋ́шы на́шѧ спастѝ, всепѣ́таѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ человѣколю́бецъ, и҆ ᲂу҆пра́ви живо́тъ мо́й, молю́сѧ."
 },
 {
  "type": "TEXT",
  "value": "Оу҆крѣплѧ́етсѧ ѻ҆трокови́ца, тѣ́ломъ разсла́бленнаѧ въ лѣ́тѣхъ мно́жайшихъ, моли́твою твое́ю, прпⷣбне, вѣ́рнѡ прише́дши къ тебѣ̀, и҆ вино́внаго всѣ́хъ велича́етъ хрⷭ҇та̀."
 },
 {
  "type": "TEXT",
  "value": "Стопа́мъ послѣ́дꙋѧ влⷣчнимъ, житїе́мъ непоро́чнымъ, сла́вне, непра́веднѣ ѡ҆скорблѧ́емь и҆ ѡ҆клевета́емь, не и҆зничто́женъ пребы́лъ є҆сѝ."
 },
 {
  "type": "TEXT",
  "value": "Ѕло́бою соживꙋ́щїи, тѧ̀ неѕло́биваго а҆́гнца, ꙗ҆́кѡ свирѣ́пїи ѕвѣ́рїе восхи́тивше, въ темни́цꙋ ѡ҆сꙋди́ша, храни́ма, ѻ҆́ч҃е, бжⷭ҇твенною благода́тїю."
 },
 {
  "type": "TEXT",
  "value": "Бг҃оро́диченъ: Оу҆́мъ разꙋмѣ́ти недоꙋмѣ́етъ вели́кое твоегѡ̀ рождества̀ та́инство: бг҃а бо родила̀ є҆сѝ, чл҃вѣ́ка бы́вша, приснодв҃о, неѡбмы́сленнаго."
 },
 {
  "type": "HEADER",
  "value": "Конда́къ ст҃а́гѡ а҆мфїло́хїа, гла́съ в҃."
 },
 {
  "type": "TEXT",
  "value": "Подо́бенъ: Вы́шнихъ и҆щѧ̀:"
 },
 {
  "type": "TEXT",
  "value": "Бжⷭ҇твенный гро́мъ, трꙋба̀ дх҃а, вѣ́ры садодѣ́лателю, и҆ сѣ́чиво є҆ресе́й, і҆ера́рше а҆мфїло́хїе, трⷪ҇цы ᲂу҆го́дниче вели́кїй, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ."
 },
 {
  "type": "TEXT",
  "value": "І҆́косъ: Ѿ дх҃а ст҃а́гѡ премꙋ́дрый і҆ера́рхъ хрⷭ҇то́въ вдохнꙋ́всѧ, цр҃ковь запеча́та: и҆мѣ́ѧ бо си́лы дѣ́йство, сла́вный таи́нникъ, и҆ ᲂу҆чи́тель вѣ́ры прїѧ́тенъ, ᲂу҆слы́шавъ благочте́нїе бжⷭ҇твенныхъ писа́нїй, воѡбраже́нїе живоно́снагѡ и҆ честна́гѡ крⷭ҇та̀ творе́нїемъ, є҆ѵно́мїа ѿгна̀, и҆ вѣ́рꙋ ᲂу҆ѧсни́въ проповѣ́даѧ хрⷭ҇та̀, мо́литъ непреста́ннѡ ѡ҆ всѣ́хъ на́съ."
 },
 {
  "type": "HEADER",
  "value": "Пѣ́снь з҃."
 },
 {
  "type": "TEXT",
  "value": "І҆рмо́съ: Пе́щь, сп҃се, ѡ҆роша́шесѧ, ѻ҆́троцы же, ликꙋ́юще, поѧ́хꙋ: ѻ҆тцє́въ бж҃е, бл҃гослове́нъ є҆сѝ."
 },
 {
  "type": "TEXT",
  "value": "Ликовствꙋ́имъ празднолю́бцы дне́сь, воспои́мъ чⷭ҇тꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще."
 },
 {
  "type": "TEXT",
  "value": "Прⷪ҇ро́чествꙋй дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебє̀, приведꙋ́тсѧ тебѣ̀ во хра́мъ цр҃и́цы мт҃ри."
 },
 {
  "type": "TEXT",
  "value": "Ра́довахꙋсѧ а҆́гг҃лѡвъ чи́ни, веселѧ́хꙋсѧ пра́ведныхъ дꙋ́си, ꙗ҆́кѡ бж҃їѧ мт҃и во ст҃а̑ѧ приво́дитсѧ."
 },
 {
  "type": "TEXT",
  "value": "Прїе́млющи пи́щꙋ нбⷭ҇нꙋю, преспѣва́ше мꙋ́дростїю и҆ бл҃года́тїю, бы́вши мт҃и по пло́ти хрⷭ҇та̀ бг҃а."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и."
 },
 {
  "type": "TEXT",
  "value": "Та́инственнѣйшымъ бг҃овѣща́нїємъ твои̑мъ вне́млюще любо́вїю, а҆́рїева, ѻ҆́ч҃е, разсѣче́нїѧ бж҃ества̀ и҆збѣга́емъ, трⷪ҇цꙋ несозда́ннꙋю и҆ є҆диносꙋ́щнꙋю вѣ́рою сла́вѧще."
 },
 {
  "type": "TEXT",
  "value": "Ѡ҆блича́ема ᲂу҆че́нїемъ твои́мъ македо́нїа, ѻ҆́ч҃е, зрѧ́ще, дх҃а бл҃га́го, ѻ҆ц҃ꙋ́ же и҆ сн҃ꙋ спокланѧ́ема, и҆ собезнача́льна, вѣ́рою сла́вимъ."
 },
 {
  "type": "TEXT",
  "value": "Сло́вомъ ᲂу҆ѧсни́въ, є҆́же па́че сло́ва, сло́ва воплоще́нїе, чествова́ти въ двꙋ́хъ сꙋщества́хъ є҆ди́наго бг҃а, бг҃омꙋ́дреннѡ наꙋчи́лъ є҆сѝ, и҆ раздѣле́нїѧ и҆ смѣше́нїѧ бѣжа́ти, бг҃опрїѧ́тне."
 },
 {
  "type": "TEXT",
  "value": "Бг҃оро́диченъ: Всѝ, ᲂу҆се́рднѡ бцⷣꙋ восхва́лимъ, прїиди́те, вѣ́рою спа́сшїисѧ, и҆зъ неѧ̀ ро́ждшагосѧ вседержи́телѧ, бл҃гослове́на ты̀ въ жена́хъ є҆сѝ, вопїю́ще, всенепоро́чнаѧ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложивы́й на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ."
 },
 {
  "type": "TEXT",
  "value": "Чꙋдодѣ́йствꙋетъ зижди́тель, сꙋди́мꙋ тебѣ̀, блаже́нне, блꙋдни́ца бо жени́що стремле́нїемъ взѧта̀ де́мѡнскимъ, всѣ̑мъ показа́ тѧ чи́ста, григо́рїе."
 },
 {
  "type": "TEXT",
  "value": "Свѣтопода́тельнїи бжⷭ҇твеннїи ᲂу҆ч҃ницы̀ сп҃совы, тебѣ̀ предста́вше, прпⷣбне, привѧ́зана дре́вꙋ разрѣша́ютъ, ра́достнѡ лобыза́юще."
 },
 {
  "type": "TEXT",
  "value": "Терпѣ́нїю твоемꙋ̀, ѻ҆́ч҃е, влⷣка вне́млѧ, чꙋдодѣ́йствы бо́льшими тѧ̀ свѧще́ннѡ ᲂу҆краша́етъ, недꙋ́гѡвъ мра́къ ѿгонѧ́ща."
 },
 {
  "type": "TEXT",
  "value": "Бг҃оро́диченъ: Матеролѣ́пнѡ всѣ́хъ родила̀ є҆сѝ зижди́телѧ, и҆ рꙋка́ми понесла̀ є҆сѝ, ꙗ҆́кѡ херꙋві́мскїй прⷭ҇то́лъ, содержа́щаго всѧ̑, неискꙋсобра́чнаѧ."
 },
 {
  "type": "HEADER",
  "value": "Пѣ́снь и҃."
 },
 {
  "type": "TEXT",
  "value": "І҆рмо́съ: Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки."
 },
 {
  "type": "TEXT",
  "value": "Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ ст҃ꙋ́ю дще́рь."
 },
 {
  "type": "TEXT",
  "value": "Хва́лѧтсѧ ст҃і́и дв҃дъ и҆ і҆ессе́й, и҆ і҆ꙋ́да чти́тсѧ: и҆зъ ко́рене бо и҆́хъ и҆зрастѐ пло́дъ, дв҃а чⷭ҇таѧ, и҆зъ неѧ́же роди́сѧ бг҃ъ превѣ́чный."
 },
 {
  "type": "TEXT",
  "value": "Марі́а пречⷭ҇таѧ и҆ ѡ҆дꙋшевле́ннаѧ ски́нїѧ, приво́дитсѧ дне́сь въ до́мъ бж҃їй, и҆ прїе́млетъ сїю̀ заха́рїа рꙋка́ми, ꙗ҆́кѡ ѡ҆свѧще́нное сокро́вище гдⷭ҇не."
 },
 {
  "type": "TEXT",
  "value": "Ꙗ҆́кѡ две́рь спаси́тельнꙋю, и҆ го́рꙋ мы́сленнꙋю, ꙗ҆́кѡ лѣ́ствицꙋ ѡ҆дꙋшевле́ннꙋю, почти́мъ, вѣ́рнїи, вои́стиннꙋ, дв҃ꙋ и҆ мт҃рь бж҃їю, благослове́ннꙋю рꙋка́ми і҆ере́євъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Оу҆краси́шасѧ пѣ́сненнѡ ᲂу҆ста̀ твоѧ̑ бг҃ослѡ́вѧщаѧ ꙗ҆́снѡ, трⷪ҇цꙋ несозда́ннꙋ, безнача́льнꙋ, є҆диносꙋ́щнꙋ, несли́тнꙋ тремѝ ѵ҆поста́сьми, ѻ҆́ч҃е бг҃омꙋ́дре. Є҆́йже вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бога́тство тебѣ̀ и҆ сла́вꙋ честнꙋ́ю ѵ҆поста́снаѧ мꙋ́дрость дадѐ, бг҃осло́вившꙋ тѝ, премꙋ́дре, благоче́стнѡ, и҆ є҆ресе́й низложи́вшꙋ горды́ню, и҆ любо́вїю пою́щꙋ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "И҆́же всѣ̑мъ подаѧ́й жи́знь, ꙗ҆́кѡ і҆ера́рха вѣ́рна, и҆ бг҃оглаго́лива, въ цр҃ковь тѧ̀ прпⷣбне перворо́дныхъ вво́дитъ, свѧще́нствꙋюща та́инственнѡ, и҆ вѣ́рнѡ пою́ща: бл҃гослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "TEXT",
  "value": "Бг҃оро́диченъ: Сѐ ны́нѣ ѡ҆скꙋдѣ̀ ꙗ҆́вѣ ѿ і҆ꙋ́дина колѣ́на нача́льникъ и҆ во́ждь: ты́ бо, всенепоро́чнаѧ, родила̀ є҆сѝ, самаго̀ ѿлежа́щаго жда́нїе ꙗ҆зы́кѡвъ хрⷭ҇та̀: є҆мꙋ́же пое́мъ: благослови́те, всѧ̑ дѣла̀ гдⷭ҇нѧ, гдⷭ҇а."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки."
 },
 {
  "type": "TEXT",
  "value": "Ѿрѣша́етсѧ ра́ны де́мѡнскїѧ стра́шныѧ моли́твою твое́ю, блаже́нне, ꙗ҆́же лꙋка́вствомъ пребеззако́нныхъ мꙋже́й ѡ҆клевета́вшаѧ тебѐ пра́веднаго ѻ҆трокови́ца: и҆ посредѣ̀ собо́ра тѧ̀ прославлѧ́етъ подвигополо́жникъ бг҃ъ, во всѧ̑ вѣ́ки."
 },
 {
  "type": "TEXT",
  "value": "Те́мнагѡ ѡ҆мраче́нїѧ и҆сполнѧ́ютсѧ лꙋка́вствомъ на тѧ̀ поꙋчи́вшїисѧ, ѻ҆́ч҃е, и҆ сїѧ́етъ твоѐ свѣтоза́рное житїѐ, предъ ѻ҆ц҃ы̀, григо́рїе, въ и҆́хже прише́ствїи, ᲂу҆́глїе держа̀ рꙋко́ю, чꙋдодѣ́йствовалъ є҆сѝ."
 },
 {
  "type": "TEXT",
  "value": "Ꙗ҆́кѡ ѕвѣзда̀ свѣтлѣ́йшаѧ, ꙗ҆ви́лсѧ є҆сѝ и҆́стиннѡ на высотѣ̀, ѻ҆́ч҃е, церко́внѣй, ѡ҆зарѧ́еши ны̀ добродѣ́тельми всегда̀, и҆ чꙋде́съ лꙋча́ми, пою́щыѧ твою̀ свѣтоно́снꙋю па́мѧть, ст҃и́телю бг҃омꙋ́дре григо́рїе."
 },
 {
  "type": "TEXT",
  "value": "Бг҃оро́диченъ: Пресла́вное ржⷭ҇тво̀ твоѐ, помышлє́нїѧ на̑ша ᲂу҆жаса́етъ, є҆ди́на бл҃гослове́ннаѧ: бг҃ъ бо и҆зъ тебє̀ пло́ть прїѧ́тъ, є҆́же бѣ̀ пребы́въ, бцⷣе, невра́щенъ є҆стество́мъ: є҆го́же превозно́симъ во вѣ́ки."
 },
 {
  "type": "HEADER",
  "value": "Пѣ́снь ѳ҃."
 },
 {
  "type": "TEXT",
  "value": "І҆рмо́съ: Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю."
 },
 {
  "type": "TEXT",
  "value": "И҆зъ пра́ведныхъ произы́де, і҆ѡакі́ма и҆ а҆́нны, ѡ҆бѣща́нїѧ пло́дъ, бг҃оѻтрокови́ца марі́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти."
 },
 {
  "type": "TEXT",
  "value": "Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ благово́нїѧ пра́ведныхъ, ꙗ҆́кѡ пло́дъ дꙋхо́вный."
 },
 {
  "type": "TEXT",
  "value": "Со а҆́гг҃ломъ, є҆́же ра́дꙋйсѧ, бцⷣѣ прили́чнѣ возопїи́мъ, вѣ́рнїи: ра́дꙋйсѧ, вседо́браѧ, невѣ́сто. Ра́дꙋйсѧ, ѻ҆́блаче свѣ́тлый, и҆зъ негѡ́же на́мъ возсїѧ̀ гдⷭ҇ь, во тмѣ̀ невѣ́дѣнїѧ сѣдѧ́щымъ. Ра́дꙋйсѧ, всѣ́хъ наде́ждо."
 },
 {
  "type": "TEXT",
  "value": "Ст҃ы́хъ ст҃а́ѧ и҆ бг҃ома́ти марі́е, моли́твами твои́ми, чⷭ҇таѧ, свободи́ ны ѿ сѣ́тей вра́жїихъ, и҆ всѧ́кїѧ є҆́реси, и҆ ско́рби, вѣ́рнѡ покланѧ́ющыѧсѧ ѻ҆́бразꙋ ст҃а́гѡ твоегѡ̀ зра́ка."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. Тѣ́мъ веселѧ́щесѧ, тѧ̀, бцⷣе, велича́емъ."
 },
 {
  "type": "TEXT",
  "value": "Є҆ди́но трїѷпоста́сное є҆стество̀ всеблагоче́стнѡ бг҃осло́вивъ, всесвѧтꙋ́ю трⷪ҇цꙋ бг҃онача́льнꙋю, непости́жнꙋю, ны́нѣ ѿ неѧ̀ почествова́лсѧ є҆сѝ, свѧщенноѧвле́нне а҆мфїло́хїе."
 },
 {
  "type": "TEXT",
  "value": "И҆мѣ́ѧ къ бг҃ꙋ дерзнове́нїе, ꙗ҆́кѡ і҆ера́рхъ, бг҃оно́се, свѧще́ннꙋю и҆ свѣтоно́снꙋю соверша́ющихъ па́мѧть твою̀, всебл҃же́нне, всегда̀ помина́й, твоемꙋ̀ влⷣцѣ предстоѧ̀."
 },
 {
  "type": "TEXT",
  "value": "Дава́еши мѝ ѻ҆би́льнꙋю бл҃года́ть, похвалы̑ тебѣ̀, бг҃омꙋ́дре, спле́тшꙋ ᲂу҆се́рднымъ се́рдцемъ, грѣхѡ́въ разрѣше́нїе просѧ́щꙋ, ꙗ҆́кѡ ст҃и́тель вѣ́рнѣйшїй, прпⷣбне ѻ҆́ч҃е а҆мфїло́хїе."
 },
 {
  "type": "TEXT",
  "value": "Бг҃оро́диченъ: А҆да́мова ᲂу҆́бѡ внꙋ́ка ꙗ҆ви́ласѧ є҆сѝ, бж҃їѧ же мт҃и позна́ласѧ є҆сѝ: ты́ бо ѿ вѣ́ка ꙗ҆ви́ласѧ є҆сѝ ст҃ѣ́йши всѧ́кїѧ тва́ри, бл҃гослове́ннаѧ пречⷭ҇таѧ. Тѣ́мъ тѧ̀ всѝ велича́емъ."
 },
 {
  "type": "HEADER",
  "value": "И҆́нъ."
 },
 {
  "type": "TEXT",
  "value": "І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра."
 },
 {
  "type": "TEXT",
  "value": "Сѐ, свѣ́тлое торжество̀, сѐ па́мѧть свѧще́ннаѧ, сѐ бл҃года́ть всѣ̑мъ соше́дшымсѧ вѣ̑рнымъ, ѻ҆би́льнѡ врачєва́нїѧ точа́щи, пристꙋ́пимъ: то́читъ бо на́мъ григо́рїева ра́ка просвѣще́нїе присноте́чное и҆ безсме́ртїе."
 },
 {
  "type": "TEXT",
  "value": "Ꙗ҆́кѡ рѣка̀ и҆спо́лнилсѧ є҆сѝ во́дъ хрⷭ҇то́выхъ, ꙗ҆́кѡ ма́слина є҆ле́й то́чиши жи́зни, ꙗ҆́кѡ фі́нїѯъ возвы́силсѧ є҆сѝ, григо́рїе, ꙗ҆́кѡ лоза̀, гро́здїе на́мъ добродѣ́телей твои́хъ но́сиши, ѿ ни́хже напаѧ́емсѧ вїно́мъ нетлѣ́нїѧ."
 },
 {
  "type": "TEXT",
  "value": "Да сра́дꙋетсѧ дне́сь на́мъ въ па́мѧти твое́й свѧще́нныхъ собо́ръ, и҆ прпⷣбныхъ мно́жество, и҆ всѣ́хъ а҆́гг҃лъ чи́нове: съ ни́миже предстоѧ̀ творцꙋ̀, ѡ҆зарѧ́емь, ѻ҆́ч҃е, помѧнѝ любо́вїю тѧ̀ пѣсносло́вѧщыѧ."
 },
 {
  "type": "TEXT",
  "value": "Ѡ҆свѧще́нъ бы́лъ є҆сѝ, ѻ҆́ч҃е, сосꙋ́дъ хрⷭ҇то́въ, цр҃кве сто́лпъ, и҆ приста́нище вѣ́рныхъ, и҆ ме́чь, пре́лєсти и҆зсѣка́ющїй, и҆сто́чникъ и҆сцѣле́нїй, и҆ глꙋбина̀ бжⷭ҇твенныхъ разꙋмѣ́нїй, и҆ свѣща̀ неꙋгаса́ющаѧ, и҆ па́стырь па́стырей."
 },
 {
  "type": "TEXT",
  "value": "Бг҃оро́диченъ: Свѣ́тъ ро́ждшаѧ безлѣ́тный возсїѧ́вшїй и҆зъ ѻ҆ц҃а̀, просвѣтѝ мою̀, ѻ҆трокови́це, дꙋ́шꙋ и҆ ᲂу҆́мъ, дале́че ѿ менє̀ ѿгонѧ́щи тмꙋ̀, дв҃о, страсте́й: да тѧ̀ ᲂу҆блажа́ю приснобл҃же́ннꙋю, вѣ́рныхъ наде́ждꙋ."
 },
 {
  "type": "HEADER",
  "value": "Свѣти́ленъ ст҃а́гѡ а҆мфїло́хїа."
 },
 {
  "type": "TEXT",
  "value": "Подо́бенъ: Оу҆ченикѡ́мъ:"
 },
 {
  "type": "TEXT",
  "value": "Бг҃ъ положе́нїемъ бы́въ, въ безвеще́ственнѣмъ причаще́нїи бж҃їѧ є҆стества̀, всемꙋ́дре, ѿ а҆́гг҃лъ пома́завсѧ ст҃и́тель бжⷭ҇твенномꙋ при́чтꙋ, хода́тайствꙋѧ созда́телю и҆ созда́нїю, бг҃опрїѧ́тне а҆мфїло́хїе ѻ҆́ч҃е. Тѣ́мже твою̀ соверша́юще па́мѧть, тѧ̀ воспѣва́емъ, и҆збавлѧ́еми моли́твами твои́ми, ѿ тлѝ и҆ напа́стей."
 },
 {
  "type": "HEADER",
  "value": "Сла́ва, ст҃а́гѡ григо́рїа:"
 },
 {
  "type": "TEXT",
  "value": "По́стнически житїѐ твоѐ ᲂу҆краси́въ, мꙋ́дре ѻ҆́ч҃е, и҆ честны́ѧ, григо́рїе, хрⷭ҇то́вы цр҃кве і҆ера́рхъ ꙗ҆ви́лсѧ є҆сѝ, бл҃же́нне: правосла́вныхъ просвѣща́ѧ зарѧ́ми ᲂу҆че́нїй твои́хъ, и҆ неизглаго́ланными чꙋдесы̀. Тѣ́мже твоѐ пресвѧто́е ᲂу҆спе́нїе соверша́ющымъ и҆спросѝ моли́твами твои́ми дꙋше́вное спасе́нїе."
 },
 {
  "type": "HEADER",
  "value": "И҆ ны́нѣ, пра́здника."
 },
 {
  "type": "TEXT",
  "value": "Подо́бенъ: Жєны̀ ᲂу҆слы́шите:"
 },
 {
  "type": "TEXT",
  "value": "Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇ꙋ."
 },
 {
  "type": "HEADER",
  "value": "На стїхо́внѣ стїхи̑ры, гла́съ в҃."
 },
 {
  "type": "TEXT",
  "value": "Подо́бенъ: До́ме є҆ѵфра́ѳовъ:"
 },
 {
  "type": "TEXT",
  "value": "Взѧ́тсѧ граде́жъ средостѣ́нїѧ, бжⷭ҇твеннымъ и҆́стиннѡ, бцⷣы вхожде́нїемъ, и҆ дѡ́льнѧѧ съ вы́шними ны́нѣ совокꙋпи́хомсѧ."
 },
 {
  "type": "TEXT",
  "value": "Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆ и҆́скрєннїѧ є҆ѧ̀ приведꙋ́тсѧ тебѣ̀."
 },
 {
  "type": "TEXT",
  "value": "Воспѣ́ша дѣ́вственнїи ли́цы бжⷭ҇твеннꙋю пѣ́снь, провожда́юще въ до́мъ бж҃їй, свѣщенѡ́сныѧ, є҆ди́нꙋ всенепоро́чнꙋю."
 },
 {
  "type": "TEXT",
  "value": "Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ царе́въ."
 },
 {
  "type": "TEXT",
  "value": "Внꙋ́трь ст҃и́лища, ст҃ꙋ́ю ст҃ы́хъ, бцⷣꙋ сꙋ́щꙋю, ѽ заха́рїе, прїе́мли, во ст҃а̑ѧ ст҃ы́хъ."
 },
 {
  "type": "HEADER",
  "value": "Сла́ва, и҆ ны́нѣ, гла́съ ѕ҃:"
 },
 {
  "type": "TEXT",
  "value": "Дне́сь, собо́ри вѣ́рныхъ, соше́дшесѧ, дꙋхо́внѣ да торжествꙋ́имъ, и҆ бг҃оѻтрокови́цꙋ, дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋ ѿ всѣ́хъ родѡ́въ, во ѡ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы, чтꙋ́ще честно́е происхожде́нїе: ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра хода́таицѣ. Всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїи́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ."
 },
 {
  "type": "HEADER",
  "value": "На лїтꙋргі́и: Блажє́нна пра́здника, пѣ́снь д҃-ѧ и҆ є҃-ѧ, на ѕ҃."
 },
 {
  "type": "HEADER",
  "value": "Прокі́менъ, гла́съ з҃:"
 },
 {
  "type": "TEXT",
  "value": "Честна̀ предъ гдⷭ҇емъ сме́рть прпⷣбныхъ є҆гѡ̀."
 },
 {
  "type": "TEXT",
  "value": "Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;"
 },
 {
  "type": "HEADER",
  "value": "А҆пⷭ҇лъ къ є҆вре́ємъ, зача́ло тл҃д."
 },
 {
  "type": "TEXT",
  "value": "А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ."
 },
 {
  "type": "TEXT",
  "value": "Сті́хъ: Зако́нъ бг҃а є҆гѡ̀ въ се́рдцѣ є҆гѡ̀:"
 },
 {
  "type": "HEADER",
  "value": "Є҆ѵⷢ҇лїе матѳе́а, зача́ло р҃г."
 },
 {
  "type": "TEXT",
  "value": "Прича́стенъ: Ра́дꙋйтесѧ, првⷣнїи, ѡ҆ гдⷭ҇ѣ:"
 }
]